Yesaia 34:1-17
34 Nyɛ jeŋmaji, nyɛtsia nyɛbɛŋkɛa ni nyɛbaboa toi,Nyɛ majimaji, nyɛboa toi jogbaŋŋ.
Shikpɔŋ lɛ kɛ nibii ni yɔɔ nɔ lɛ abo toi,Shikpɔŋ lɛ kɛ enibaa nii lɛ fɛɛ abo toi.
2 Ejaakɛ Yehowa mli efu jeŋmaji lɛ fɛɛ,+Emli ewo la ewo amɛsraafoi lɛ fɛɛ.+
Ebaakpãtã amɛhiɛ;Ebaagbe amɛ.+
3 Abaashɛrɛ amɛgbohii lɛ ashwie,Ni amɛgbohii lɛ baaje fu kɛya ŋwɛi tɔ̃ɔ;+Amɛlá lɛ baahã gɔji lɛ asere.*+
4 Ŋwɛi asraafoi lɛ fɛɛ baakpɔtɔ,Ni abaakota ŋwɛi lɛ tamɔ akotaa wolokpo lɛ.
Bɔ ni baa ni egbi kpɔɔ kɛjeɔ wain tso heKɛ bɔ ni agbami ni egbi kpɔɔ kɛjeɔ agbami tso he lɛ,Nakai amɛsraafoi lɛ fɛɛ baagbi.
5 “Ejaakɛ lá baakpa miklante lɛ he kpɔtɔɔ yɛ ŋwɛi.+
Ebaaba Edom nɔ yɛ kojomɔ mli,+Maŋ ni mito akɛ makpãtã ehiɛ lɛ.
6 Yehowa yɛ klante; lá baakpa he kpɔtɔɔ.
Fɔ baakpa he fɛɛ,+Gwantɛŋhii* kɛ abotiai alá baakpa he,Gwantɛŋhii asabai amli fɔ baakpa he.
Ejaakɛ Yehowa baashã afɔle yɛ Bozra,Ebaagbe kooloi babaoo yɛ Edom shikpɔŋ lɛ nɔ.+
7 Ŋa mli tsinahii lɛ kɛ amɛ baakpeleke shi,Tsinahii ni darako lɛ kɛ tsinahii ni edara ni he wa lɛ.
Lá baakpa amɛshikpɔŋ lɛ nɔ kpɔtɔɔ,Ni amɛshikpɔŋ lɛ nɔ mulu lɛ baafɔ kɛ fɔ.”
8 Ejaakɛ Yehowa yɛ oweletɔɔ gbi,+Afi ni ekɛbaagbala toi ehã Zion.+
9 Efai* lɛ baatsɔmɔ kootaa,Ni eshikpɔŋ lɛ nɔ mulu lɛ baatsɔ sɔlfa,Ni eshikpɔŋ lɛ baatsɔ tamɔ kootaa ni miitso.
10 Jenamɔ kɛ jetsɛremɔ fɛɛ lɛ, egboŋ;Elasu lɛ baakwɔ kɛya ŋwɛi daa.
Ebaaya nɔ ehi shi akɛ maŋ ni akpãtã hiɛ kɛjɛ yinɔ kome nɔ kɛmiiya yinɔ kroko nɔ;Mɔ ko mɔ ko tsɔŋ emli kɛhoŋ dɔŋŋ kɛmiiya naanɔi anaanɔ.+
11 Ŋa nɔ dɔkɔdɔkɔ kɛ kɔtɔkɔ baahi jɛmɛ,Ni patui kɛ amɛtoii kakadaji kɛ kwaakwaalabitei baahi jɛmɛ.
Ebaakpã susumɔ kpãa kɛ plomo* mli yɛ enɔNi ekɛtsɔɔ akɛ ebaakã shi efolo ni ebaatsɔ amaŋfɔ.
12 Awóŋ ebladei lɛ ateŋ mɔ ko maŋtsɛ,Ni abuŋ elumɛi lɛ fɛɛ ahãŋ nɔ ko.
13 Ŋmei baakwɛ̃ yɛ emɔji lɛ amli,Jwɛi kɛ jwɛi ni ŋmei yɔɔ he baakwɛ̃ yɛ emɔji lɛ amli.
Ebaatsɔ ŋa mli gbei ashihilɛhe,+Okpɔŋɔ-loofɔji* ashihilɛhe.
14 Ŋa kpataa nɔ kooloi kɛ kooloi ni bolɔɔ tamɔ gbei baakpe yɛ jɛmɛ,Ni ŋa mli abotia* baabo etsɛ enaanyo.
Hɛɛ, gbɛkɛ loofɔlɔ baahi jɛmɛ, ni jɛmɛ ebaajɔɔ ehe yɛ.
15 Onufu ni tsɛ̃ɔ kɛbaa mɔ nɔ lɛ baafee etsu yɛ jɛmɛ, ni ebaaŋmɛ wɔji yɛ jɛmɛ,Ni ebaafɛlɛ amɛ ni ebua amɛnaa yɛ ehɔɔŋ lɛ mli.
Hɛɛ, laalɔi* baabua amɛhe naa yɛ jɛmɛ, eko fɛɛ eko kɛ ehefatalɔ.
16 Nyɛtaoa Yehowa wolo lɛ mli ni nyɛkanea lɛ waa.
Amɛteŋ ekome folo elaajeŋ;Eko eko bɛ ni náŋ hefatalɔ,Ejaakɛ Yehowa naabu ni wo mla lɛ,Ni emumɔ lɛ ji nɔ ni ebua amɛnaa.
17 Lɛ ji mɔ ni efɔ̃ oshiki ehã amɛ,Ni lɛ diɛŋtsɛ enine esusu amɛshihilɛhe lɛ ehã amɛ.*
Amɛbaahi jɛmɛ daa;Amɛbaahi jɛmɛ yɛ yinɔi fɛɛ amli.
Shishigbɛ Niŋmaa
^ Loo “Amɛlá lɛ baaho yɛ gɔji lɛ anɔ.”
^ Loo “Gwantɛŋ oblahii.”
^ Eeenyɛ efee akɛ, aawie Bozra, ni ji Edom maŋtiase lɛ he.
^ Ni ji, kpãa ko kɛ enaa dade ní akɛkwɛɔ akɛ nɔ ko ma shi jaŋŋ lo.
^ Loo “Dugumai.” Blɔfo mli lɛ, ostrich.
^ Shishitsɔɔmɔi komɛi kɛɔ akɛ, “daimonio abotia.”
^ Eji loofɔlɔ ko ni tamɔ akroma.
^ Hebri sht. ŋm., “ekɛ susumɔ kpãa eja mli ehã amɛ.”
