Yesaia 7:1-25
7 Yɛ Yuda maŋtsɛ Ahaz,+ ni ji Uzia binuu Yotam binuu lɛ gbii lɛ amli lɛ, Siria maŋtsɛ Rezin kɛ Israel maŋtsɛ Peka,+ Remalia binuu lɛ, kwɔ kɛba koni amɛkɛ Yerusalem abawu, shi enyɛɛɛ eye* nɔ kunim.+
2 Abakɛɛ David shĩa lɛ akɛ: “Siriabii lɛ kɛ Efraimbii lɛ efee ekome.”
Ni Ahaz tsui kɛ emaŋbii lɛ atsui bɔi kpokpomɔ tamɔ bɔ ni koo mli tsei hosoɔ kɛ́ kɔɔyɔɔ miitswa lɛ.
3 Kɛkɛ ni Yehowa kɛɛ Yesaia akɛ: “Ofainɛ, yaa ni okɛ Ahaz ayakpe, bo kɛ obinuu Shear-yashub,*+ yɛ ŋwɛigbɛ kpaakpo lɛ gɔɔta* lɛ naa,+ yɛ gbɛ ni yaa niiahefɔlɔi ashikpɔŋ lɛ nɔ lɛ he.
4 Kɛɛmɔ lɛ akɛ, ‘Kwɛmɔ jogbaŋŋ ni okahao. Kaashe gbeyei, ni otsui akafã hu yɛ nɛkɛ laitsei enyɔ ni eshã ni eshwɛ amɛnaabu bibioo ni miije lasu nɛɛ ahewɔ, yɛ Rezin kɛ Siria kɛ Remalia binuu lɛ mlifu ni naa wa lɛ hewɔ.+
5 Ejaakɛ Siriabii lɛ kɛ Efraimbii lɛ ni efee ekome lɛ, kɛ Remalia binuu lɛ eto ohe ŋaa fɔŋ akɛ:
6 “Nyɛhãa wɔkwɔa kɛyaa Yuda ni wɔyatserɛ emli* ni wɔŋɔ wɔhã wɔhe,* ni wɔwó Tabeel binuu lɛ enɔ maŋtsɛ.”+
7 “‘Nɔ ni Nuŋtsɔ Ofe Yehowa kɛɛ nɛ:
“Eyeŋ omanye,Ni ebaŋ mli nakai hu.
8 Ejaakɛ Siria yitso ji Damasko,Ni Damasko hu yitso ji Rezin.
Dani afii 65 baashɛ lɛNo mli lɛ, akpãtã Efraim hiɛ butuu, ni ejeee maŋ dɔŋŋ.+
9 Efraim yitso ji Samaria,+Ni Samaria hu yitso ji Remalia+ binuu lɛ.
Kɛ́ nyɛhemɔkɛyeli mli waaa lɛ,Nyɛnyɛŋ nyɛdamɔ shi shiŋŋ.”’”
10 Yehowa tee nɔ ekɛɛ Ahaz akɛ:
11 “Bi Yehowa, o-Nyɔŋmɔ lɛ ni ehã bo okadi ko;+ okadi ni mli kwɔ tamɔ Gbonyobu* lɛ mli jio, nɔ ni nɔ kwɔ tamɔ ŋwɛi jio, mahã bo.”
12 Shi Ahaz kɛɛ akɛ: “Mibiŋ nɔ ko, ni mikaŋ Yehowa mikwɛŋ hu.”
13 Kɛkɛ ni Yesaia kɛɛ akɛ: “Nyɛ, David shĩa, nyɛfainɛ nyɛboa toi. Gbɔmɛi amli la ni nyɛwoɔ lɛ, no faaa hãaa nyɛ? Ani nyɛbaawo Nyɔŋmɔ hu mli la?+
14 No hewɔ lɛ, Yehowa diɛŋtsɛ baahã nyɛ okadi ko: Naa! Oblayoo lɛ* baaná musu ni ebaafɔ binuu,+ ni ebaawo lɛ gbɛ́i akɛ Imanuel.*+
15 Be ni ebaale efɔŋ kwamɔ kɛ ekpakpa halamɔ lɛ, no mli lɛ, ebɔi bɔta kɛ wo yeli momo.
16 Ejaakɛ dani gbekɛ nuu lɛ baale efɔŋ kwamɔ kɛ ekpakpa halamɔ lɛ, no mli lɛ, ashi maŋtsɛmɛi enyɔ ni osheɔ amɛ gbeyei lɛ ashikpɔŋ lɛ afɔ̃ shi.+
17 Yehowa kɛ gbii ni bako dã, kɛjɛ gbi ni Efraim tse ehe kɛje Yuda he lɛ nɔ lɛ,+ baaba bo kɛ omaŋbii lɛ kɛ otsɛ shĩa lɛ nɔ, ejaakɛ ebaahã* Asiria maŋtsɛ lɛ abatutua bo.+
18 “Yɛ nakai gbi lɛ nɔ lɛ, Yehowa baakpã bɛlɛ kɛtsɛ adɔdɔji kɛjɛ Nilo Faa ni yɔɔ Ejipt lɛ gbeji ni yɔɔ shɔŋŋ lɛ ahe, kɛ wobii ni yɔɔ Asiria shikpɔŋ lɛ nɔ lɛ,
19 ni amɛ fɛɛ amɛbaaba, ni amɛbaasɔmɔ jɔi* ni mli kwɔlɔ lɛ amli, kɛ tɛsai fɔji amli, kɛ ŋmei tsei lɛ fɛɛ anɔ, kɛ hei ni nu yɔɔ lɛ fɛɛ.
20 “Yɛ nakai gbi lɛ nɔ lɛ, Yehowa baatsɔ yishɛɛ kakla ni ayahai kɛjɛ Faa* lɛ kpokpaa lɛ nɔ lɛ nɔ, ni ji Asiria maŋtsɛ+ lɛ nɔ eshɛ Yuda yiteŋ tsɔi fɛɛ kɛ enaji ahetsɔi fɛɛ, ni ebaashɛ etsɛ̃ŋ fɛɛ hu eshwie.
21 “Yɛ nakai gbi lɛ nɔ lɛ, gbɔmɔ baabaa tsinayoo kome yi yɛ tsinai ateŋ kɛ gwantɛŋi enyɔ hu ayi.
22 Ni akɛni mliki baabu hewɔ lɛ, ebaaye bɔta, ejaakɛ mɔ fɛɛ mɔ ni baashwɛ yɛ shikpɔŋ lɛ nɔ lɛ baaye bɔta kɛ wo.
23 “Yɛ nakai gbi lɛ nɔ lɛ, he fɛɛ he ni no mli lɛ ayɔɔ wain tsei 1,000 ni jara shɛɔ jwiɛtɛi kapɛji 1,000 lɛ, ŋmei tsei kɛ jwɛi sɔŋŋ baakwɛ̃ yɛ jɛmɛ.
24 Gbɔmɛi kɛ gãi kɛ gãimlibi baaya jɛmɛ, ejaakɛ ŋmei tsei kɛ jwɛi sɔŋŋ yɔɔ shikpɔŋ lɛ nɔ.
25 Ni gɔji fɛɛ ni no mli lɛ akɛ kɔi huɔ nɔ lɛ, oyaŋ jɛmɛ yɛ ŋmei tsei kɛ jwɛi ni yɔɔ jɛmɛ lɛ gbeyei ni osheɔ lɛ hewɔ; jɛmɛ baatsɔmɔ hei ni tsinahii yeɔ nii yɛ kɛ hei ni gwantɛŋi nyiɛɔ.”
Shishigbɛ Niŋmaa
^ Shishitsɔɔmɔi komɛi kɛɔ akɛ, “amɛnyɛɛɛ amɛye.”
^ Eshishi ji, “Mɛi Fioo Ko Pɛ Baashwɛ Ni Baaku Amɛsɛɛ.”
^ Loo “nujɔɔ.”
^ Shishitsɔɔmɔi komɛi kɛɔ akɛ, “wɔwo ehe gbeyei.”
^ Loo “ni wɔkumɔ egbogboi lɛ.” Hebri sht. ŋm., “wɔgba mli.”
^ Hebri mli lɛ, “Sheol,” ni ji, mfonirifeemɔŋ gbonyobu kome kɛhã adesai. Kwɛmɔ Wiemɔi Titrii Amligbalamɔ lɛ.
^ Atsɔɔ shishi yɛ Septuajint lɛ mli akɛ “Oblayoo fro lɛ.”
^ Eshishi ji, “Nyɔŋmɔ Kɛ Wɔ Yɛ.”
^ Ni ji, Nyɔŋmɔ.
^ Loo “nujɔi.”
^ Ni ji, Yufrate Faa lɛ.
