Yoshua 3:1-17
-
Israel fo Yordan lɛ (1-17)
3 Ni Yoshua te shi leebi maŋkpa, ni lɛ kɛ Israelbii* lɛ fɛɛ fã kɛshi Shitim+ ni amɛba Yordan lɛ naa. Amɛye jenamɔ lɛ yɛ jɛmɛ dani amɛfo faa lɛ.
2 Gbii etɛ sɛɛ lɛ, maŋ lɛ nɔkwɛlɔi+ lɛ kpa nsara lɛ mli fɛɛ
3 ni amɛfã maŋbii lɛ akɛ: “Kɛ́ nyɛna akɛ osɔfoi ni ji Levibii lɛ etere Yehowa, nyɛ-Nyɔŋmɔ lɛ, kpaŋmɔ adeka lɛ,+ amrɔ nɔŋŋ lɛ, nyɛfãa kɛshia he ni nyɛyɔɔ lɛ, ni nyɛnyiɛa sɛɛ.
4 Shi nyɛhãa gbɛ aaafee ninetalɔi 2,000* akãa nyɛ kɛ adeka lɛ teŋ; nyɛkabɛŋkɛa lɛ kwraa, bɔ ni afee ni nyɛna he ni sa akɛ nyɛtsɔ, ejaakɛ nyɛtsɔko gbɛ nɛɛ nɔ dã.”
5 Ni Yoshua kɛɛ maŋ lɛ akɛ: “Nyɛfea nyɛhe krɔŋkrɔŋ,+ ejaakɛ wɔ́ lɛ, Yehowa baafee naakpɛɛ nii yɛ nyɛteŋ.”+
6 Ni Yoshua kɛɛ osɔfoi lɛ akɛ: “Nyɛwóa kpaŋmɔ adeka+ lɛ ni nyɛnyiɛa maŋ lɛ hiɛ.” No hewɔ lɛ, amɛwó kpaŋmɔ adeka lɛ ni amɛyi maŋ lɛ hiɛ.
7 Ni Yehowa kɛɛ Yoshua akɛ: “Ŋmɛnɛ gbi nɛɛ, mabɔi onɔ womɔ yɛ Israel fɛɛ hiɛ,+ koni amɛná amɛle akɛ, mikɛ bo baahi shi+ tamɔ bɔ ni mikɛ Mose hi shi lɛ.+
8 Okɛ famɔ nɛɛ ahã osɔfoi ni tere kpaŋmɔ adeka lɛ akɛ: ‘Kɛji nyɛshɛ Yordan nui lɛ anaa lɛ, nyɛwaa nyɛdamɔa shi yɛ Yordan lɛ mli.’”+
9 Ni Yoshua kɛɛ Israelbii lɛ akɛ: “Nyɛbaa biɛ, ni nyɛbaboa Yehowa, nyɛ-Nyɔŋmɔ lɛ, wiemɔi lɛ toi.”
10 Kɛkɛ ni Yoshua kɛɛ: “Enɛ nyɛkɛbaale akɛ, Nyɔŋmɔ hiɛkãalɔ ko yɛ nyɛteŋ,+ ni akɛ, bɔ fɛɛ bɔ ni fee lɛ, ebaashwie Kanaanbii lɛ kɛ Hitbii lɛ kɛ Hivbii lɛ kɛ Perizbii lɛ kɛ Girgashbii lɛ kɛ Amorbii lɛ kɛ Yebusbii lɛ kɛje nyɛhiɛ.+
11 Naa! Shikpɔŋ muu lɛ fɛɛ Nuŋtsɔ lɛ kpaŋmɔ adeka lɛ miinyiɛ nyɛhiɛ kɛmiiya Yordan lɛ mli.
12 Agbɛnɛ, nyɛhalaa hii 12 kɛjɛa Israel wekui lɛ amli, nuu kome kɛjɛ weku fɛɛ weku mli,+
13 ni kɛji osɔfoi ni tere Yehowa, ni ji shikpɔŋ muu lɛ fɛɛ Nuŋtsɔ lɛ, Adeka lɛ anajiashi sa Yordan lɛ nui lɛ amli nɔŋŋ pɛ lɛ, Yordan lɛ nui lɛ ni hoɔ kɛjɛɔ yiteŋgbɛ kɛbaa lɛ baawa kɛdamɔ shi, ni amɛbaama shi tamɔ gbogbo.”*+
14 No hewɔ lɛ, be ni maŋbii lɛ fã kɛjɛ amɛmama tsũi lɛ amli ní amɛyaafo Yordan lɛ, osɔfoi ni tere kpaŋmɔ adeka+ lɛ yi maŋbii lɛ ahiɛ.
15 Be ni mɛi ni tere Adeka lɛ bashɛ Yordan lɛ naa, ní osɔfoi ni tere Adeka lɛ kɛ amɛnaji mamɔ nui lɛ amli nɔŋŋ pɛ lɛ (yɛ nikpamɔ gbii lɛ amli fɛɛ lɛ, Yordan lɛ yiɔ kɛbaa etoitoii lɛ fɛɛ),+
16 nui ni hoɔ kɛjɛɔ yiteŋgbɛ kɛbaa lɛ wa damɔ shi. Nui lɛ te shi damɔ shi yɛ shɔŋŋ tamɔ gbogbo,* yɛ Adam, ni ji maŋ ko ni bɛŋkɛ Zaretan lɛ, ni nui ni kpelekeɔ shi kɛyaa Araba lɛ Ŋshɔ, ni ji Ŋoo Ŋshɔ* lɛ, mli lɛ tã. Nui lɛ wa damɔ shi, ni maŋ lɛ fo faa lɛ yɛ Yeriko hiɛ.
17 Osɔfoi ni tere Yehowa kpaŋmɔ adeka lɛ tee nɔ amɛdamɔ shikpɔŋ gbiŋ nɔ+ yɛ Yordan lɛ teŋ, ni Israel fɛɛ tsɔ shikpɔŋ gbiŋ nɔ kɛfo faa lɛ,+ kɛyashi maŋ muu lɛ fɛɛ fo Yordan lɛ amɛtã.
Shishigbɛ Niŋmaa
^ Hebri sht. ŋm., “Israel bihii.”
^ Aaafee mitai 890 (nanetalɔi 2,920). Kwɛmɔ Saji Krokomɛi B14 lɛ.
^ Loo “tamɔ faa ni atswa gbogbo kɛtsĩ naa.”
^ Loo “tamɔ faa ni atswa gbogbo kɛtsĩ naa.”
^ Ni ji, Ŋshɔ Ni Egbo lɛ.
