Yoshua 4:1-24
-
Tɛi ní baatsɔ kaimɔ nɔ lɛ (1-24)
4 Be ni maŋ muu lɛ fɛɛ fo Yordan lɛ amɛtã nɔŋŋ pɛ lɛ, Yehowa kɛɛ Yoshua akɛ:
2 “Halamɔ hii 12 kɛjɛ maŋbii lɛ ateŋ, nuu kome kɛjɛ weku fɛɛ weku mli,+
3 ní okɛ famɔ nɛɛ ahã amɛ akɛ: ‘Nyɛholea tɛi 12 kɛjɛa Yordan lɛ teŋ, he ni osɔfoi lɛ anaji mamɔ lɛ,+ ni nyɛkɛfo faa lɛ kɛya ni nyɛkɛyamamɔa shi yɛ he ni nyɛbaaye jenamɔ lɛ yɛ lɛ.’”+
4 No hewɔ lɛ, Yoshua tsɛ hii 12 ní ehala kɛjɛ Israelbii lɛ ateŋ lɛ, nuu kome kɛjɛ weku fɛɛ weku mli,
5 ni Yoshua kɛɛ amɛ akɛ: “Nyɛtsɔa Yehowa, nyɛ-Nyɔŋmɔ lɛ, Adeka lɛ hiɛ kɛyaa Yordan lɛ teŋ, ni nyɛteŋ mɔ fɛɛ mɔ awo tɛ kome kɛfɔ̃ ekɔɔŋ nɔ, yɛ Israelbii lɛ awekui lɛ ayibɔ lɛ naa,
6 koni etsɔ okadi yɛ nyɛteŋ. Kɛ́ nyɛbii* lɛ bi nyɛ wɔsɛɛ ko akɛ, ‘Mɛni hewɔ nyɛkɛ tɛi nɛɛ mamɔ biɛ lɛ?’+
7 no lɛ, nyɛkɛa amɛ akɛ: ‘Ejaakɛ Yordan lɛ mli nui lɛ wa damɔ shi yɛ Yehowa kpaŋmɔ adeka lɛ hiɛ.+ Be ni akɛ adeka lɛ fo Yordan lɛ, Yordan lɛ mli nui lɛ wa damɔ shi. Tɛi nɛɛ baatsɔ kaimɔ nɔ kɛhã Israelbii lɛ daa.’”+
8 No hewɔ lɛ, Israelbii lɛ fee bɔ ni Yoshua fã amɛ lɛ pɛpɛɛpɛ. Amɛhole tɛi 12 kɛjɛ Yordan lɛ teŋ, tamɔ bɔ ni Yehowa fã Yoshua lɛ pɛpɛɛpɛ, yɛ Israelbii lɛ awekui lɛ ayibɔ lɛ naa. Amɛhole tɛi lɛ kɛtee he ni amɛbaaye jenamɔ lɛ yɛ lɛ, ni amɛkɛmamɔ shi yɛ jɛmɛ.
9 Agbɛnɛ hu, Yoshua kɛ tɛi 12 mamɔ shi yɛ Yordan lɛ teŋ, he ni osɔfoi ni tere kpaŋmɔ adeka lɛ kɛ amɛnaji mamɔ lɛ,+ ni tɛi nɛɛ yɛ jɛmɛ kɛbashi ŋmɛnɛ.
10 Osɔfoi ni tere Adeka lɛ tee nɔ amɛdamɔ shi yɛ Yordan lɛ teŋ, kɛyashi agbe nɔ fɛɛ nɔ ni Yehowa fã Yoshua akɛ ekɛɛ maŋ lɛ ní amɛfee lɛ naa, yɛ nɔ fɛɛ nɔ ni Mose fã Yoshua lɛ naa pɛpɛɛpɛ. Nɛkɛ be nɛɛ mli fɛɛ lɛ, maŋbii lɛ ahe fee oya kɛfo faa lɛ.
11 Be ni maŋbii lɛ fɛɛ fo faa lɛ amɛgbe naa nɔŋŋ lɛ, Yehowa Adeka lɛ kɛ osɔfoi lɛ hu fo faa lɛ yɛ maŋbii lɛ ahiɛ.+
12 Ni Rubenbii lɛ kɛ Gadbii lɛ kɛ Manase weku lɛ fã lɛ bua amɛhe naa kɛhã ta,+ ni amɛnyiɛ Israelbii krokomɛi lɛ ahiɛ kɛfo faa lɛ, tamɔ bɔ ni Mose fã amɛ lɛ pɛpɛɛpɛ.+
13 Asraafoi aaafee 40,000 ni esaa amɛhe kɛhã ta fo faa lɛ yɛ Yehowa hiɛ kɛtee Yeriko ŋa kpataa lɛ nɔ.
14 Nakai gbi lɛ nɔ lɛ, Yehowa wó Yoshua nɔ yɛ Israelbii lɛ fɛɛ ahiɛ,+ ni amɛbu lɛ waa* ewala gbii abɔ fɛɛ, tamɔ bɔ ni amɛbu Mose waa lɛ pɛpɛɛpɛ.+
15 Ni Yehowa kɛɛ Yoshua akɛ:
16 “Fã osɔfoi ni tere Odaseyeli adeka+ lɛ ní amɛje* Yordan lɛ mli.”
17 No hewɔ lɛ, Yoshua fã osɔfoi lɛ akɛ: “Nyɛjea* Yordan lɛ mli.”
18 Be ni osɔfoi ni tere Yehowa kpaŋmɔ adeka+ lɛ je* Yordan lɛ teŋ, ní osɔfoi lɛ anajiashi sa shikpɔŋ gbiŋ nɔ nɔŋŋ lɛ, Yordan lɛ mli nui lɛ bɔi hoo ekoŋŋ, ni eyi kɛba faa lɛ toitoii lɛ fɛɛ+ tamɔ tsutsu lɛ.
19 Maŋ lɛ je kpo* kɛje Yordan lɛ mli yɛ klɛŋklɛŋ nyɔɔŋ lɛ nɔ gbi ni ji nyɔŋma lɛ nɔ, ni amɛyabɔ nsara yɛ Gilgal,+ yɛ Yeriko bokãgbɛ husu lɛ nɔ.
20 Shi tɛi 12 lɛ ni amɛhole yɛ Yordan lɛ mli lɛ, Yoshua kɛmamɔ shi yɛ Gilgal.+
21 Ni ekɛɛ Israelbii lɛ akɛ: “Wɔsɛɛ ko kɛ́ nyɛbii lɛ bi amɛtsɛmɛi akɛ, ‘Mɛni tɛi nɛɛ tsɔɔ?’ lɛ,+
22 no lɛ, nyɛgbálaa mli nyɛtsɔa nyɛbii lɛ akɛ: ‘Israel fo Yordan lɛ yɛ shikpɔŋ gbiŋ nɔ+
23 be ni Yehowa, nyɛ-Nyɔŋmɔ lɛ, hã Yordan lɛ mli nui lɛ gbi yɛ amɛhiɛ kɛyashi amɛfo lɛ, tamɔ bɔ ni Yehowa, nyɛ-Nyɔŋmɔ lɛ, fee Ŋshɔ Tsuru lɛ be ni ehã egbi yɛ wɔhiɛ kɛyashi wɔfo lɛ.+
24 Efee enɛ bɔ ni afee ni shikpɔŋ lɛ nɔ maji fɛɛ aná ale bɔ ni Yehowa nine yɔɔ hewalɛ hã,+ ní nyɛ hu nyɛshe Yehowa, nyɛ-Nyɔŋmɔ lɛ, gbeyei daa.’”
Shishigbɛ Niŋmaa
^ Hebri sht. ŋm., “nyɛbihii.”
^ Hebri sht. ŋm., “amɛshe lɛ gbeyei.”
^ Loo “amɛkwɔ kɛje.”
^ Loo “Nyɛkwɔa kɛjea.”
^ Loo “kwɔ kɛje.”
^ Loo “kwɔ kɛje kpo.”
