Zakaria 10:1-12
10 “Nyɛbia Yehowa ni ehã nugbɔ anɛ ahã nyɛ yɛ mra mli nugbɔnɛmɔ be* lɛ mli.
Yehowa ji mɔ ni hãa nugbɔ woɔ lutulutu,Ni ehãa nugbɔ nɛɔ ehãa gbɔmɛi,*+Ni ehãa mɔ fɛɛ mɔ náa kwɛ̃ɛ nii yɛ ŋa nɔ.
2 Ejaakɛ terafim amagai* lɛ wieɔ lakamɔ wiemɔi;*Ni klamɔfoi lɛ naa amale ninai.
Amɛgbaa lamɔi ni sɛɛnamɔ bɛ he,Ni yakatswaa amɛshɛjeɔ mɛi amii lɛ.
No hewɔ ni amɛbaakpa shi tamɔ gwantɛŋi lɛ.
Amɛbaana nɔ, ejaakɛ tookwɛlɔ ko bɛ.
3 Mimli ewo la ewo tookwɛlɔi lɛ,Ni mahã hiɛnyiɛlɔi ni yitseiaŋ wala* lɛ abu amɛhe akɔntaa amɛhã mi;Ejaakɛ Yehowa, taiatsɛ lɛ, egbala ejwɛŋmɔ kɛba etooku lɛ,+ ni ji Yuda shĩa lɛ nɔ,Ni ehã amɛtsɔ tamɔ ekpɔŋɔ ni hiɛ yɔɔ nyam yɛ ta mli.
4 Lɛ emli mɔ titri* lɛ baajɛ aba,Lɛ emli nɔyelɔ yelikɛbualɔ* lɛ baajɛ aba,Lɛ emli ta gãi lɛ baajɛ aba;Lɛ emli nɔkwɛlɔ fɛɛ nɔkwɛlɔ* baajɛ aya, amɛ fɛɛ kwa.
5 Ni amɛbaatsɔmɔ tamɔ tawulɔiNí naanaa gbɛjegbɛi anɔ ŋmɔtɔ mli yɛ ta mli.
Amɛbaawu ta, ejaakɛ Yehowa kɛ amɛ yɛ;+Ni abaahã okpɔŋɔnɔtaralɔi ahiɛ ashwie shi.+
6 Mahã Yuda shĩa lɛ nɔ akwɔ gojoo,Ni mahere Yosef shĩa lɛ yiwala.+
Mikɛ amɛ baaku sɛɛ kɛba,Ejaakɛ mana amɛ mɔbɔ;+Ni amɛbaafee tamɔ mɛi ni mishɛrɛko amɛ mishwieko dã;+Ejaakɛ miji Yehowa, amɛ-Nyɔŋmɔ lɛ, ni mabo amɛ toi.
7 Efraimbii lɛ baatsɔ tamɔ tawulɔ kãkãlɔ ko,Ni amɛtsui baanya tamɔ nɔ ni amɛnu wain.+
Amɛbii lɛ baana enɛ ni amɛbaanya;Amɛtsui mii baashɛ ehe yɛ Yehowa hewɔ.+
8 ‘Makpã bɛlɛ matsɛ amɛ, ni mabua amɛnaa kɛkpe;Ejaakɛ makpɔ̃ amɛ,+ ni amɛyi baafa,Ni amɛyi baaya nɔ afa.
9 Magbɛ amɛ mashwã tamɔ dumɔwui yɛ majimaji lɛ ateŋ moŋ,Shi amɛbaakai mi yɛ hei ni yɔɔ shɔŋŋshɔŋŋ lɛ;Amɛ kɛ amɛbii lɛ baaná hewalɛ hee ni amɛbaaku amɛsɛɛ kɛba.
10 Mikɛ amɛ baaku sɛɛ kɛaajɛ Ejipt shikpɔŋ lɛ nɔ kɛbaNi mabua amɛnaa kɛaajɛ Asiria kɛba;+Mikɛ amɛ baaba Gilead+ kɛ Lebanon shikpɔŋ lɛ nɔ,Ni anáŋ gbɛ ahã amɛ dɔŋŋ.+
11 Ekɛ haomɔ baatsɔ ŋshɔ lɛ mli kɛho;Ni ebaatswia ŋshɔkei lɛ nii yɛ ŋshɔ lɛ mli;+Nilo lɛ mli hei ni kwɔlɔ lɛ fɛɛ baagbi.
Abaaba nɔ ni Asiria kɛshwãa lɛ shi,Ni Ejipt maŋtsɛtso lɛ baaho aya.+
12 Mawó amɛnɔ gojoo yɛ Yehowa mli,+Ni amɛbaanyiɛ yɛ egbɛ́i lɛ mli,’+ Yehowa kɛɛ.”
Shishigbɛ Niŋmaa
^ Yɛ Biblia lɛ mli lɛ, “mra mli nugbɔnɛmɔ be” lɛ jeɔ shishi aaafee October teŋgbɛ.
^ Hebri sht. ŋm., “amɛ.”
^ Loo “shĩa nyɔŋmɔi; shĩa amagai.”
^ Loo “naakpɛɛ wiemɔi; nii ni mɔ jwɛŋmɔ shɛɛɛ he.”
^ Hebri sht. ŋm., “abotiahii.”
^ Hebri sht. ŋm., “koŋ mɔɔ,” akɛ enɛ feɔ mɔ ko ni he hiaa waa he mfoniri; onukpa.
^ Hebri sht. ŋm., “tso kɛ enaa piɔpiɔ,” akɛ enɛ feɔ mɔ ko ni ji yelikɛbualɔ he mfoniri; nɔyelɔ.
^ Loo “nitsumɔ nɔkwɛlɔ fɛɛ nitsumɔ nɔkwɛlɔ.”
