YEHOWA kɛ mumɔ krɔŋkrɔŋ lɛ tsirɛ Paulo ni eŋma sui nɛɛhu ni mumɔ krɔŋkrɔŋ lɛ hãa mɛi jieɔ lɛ kpo lɛ ahe sane. (Gal. 5:22, 23) Kɛ́ wɔjie sui nɛɛhu nɛɛ fɛɛ akpo lɛ, belɛ wɔmiiwo ‘mumɔ lɛ yibii’ lɛ. * No baatsɔɔ hu akɛ wɔwo “subaŋ hee lɛ.” (Kol. 3:10) Tamɔ bɔ ni tso woɔ yibii kɛ́ ashwie nɔ nu jogbaŋŋ lɛ, mɛi fɛɛ ni mumɔ krɔŋkrɔŋ lɛ tsuɔ nii jogbaŋŋ yɛ amɛnɔ lɛ woɔ mumɔ lɛ yibii lɛ.​—Lala 1:1-3.

Klɛŋklɛŋ su ni Paulo tsĩ tã ji suɔmɔ. Su nɛɛ he miihia waa. Anɔkwa, ehe miihia aahu akɛ, Paulo kɛɛ kɛ́ ebɛ suɔmɔ lɛ ‘ejeee nɔ ko.’ (1 Kor. 13:2) Shi mɛni tuuntu ji suɔmɔ? Ni te wɔbaafee tɛŋŋ wɔná su nɛɛ ni wɔjie lɛ kpo daa gbi?

Eyɛ mli akɛ ewa akɛ wɔbaatsɔɔ nɔ tuuntu ni suɔmɔ ji moŋ, shi Biblia lɛ hãa wɔleɔ bɔ ni mɔ ko ni yɔɔ suɔmɔ lɛ susuɔ nii ahe ehãa kɛ bɔ ni efeɔ enii ehãa. Akɛ nɔkwɛmɔnɔ lɛ, Biblia lɛ kɛɔ akɛ “suɔmɔ toɔ etsui shi ni emli hi.” Ekɛɔ hu akɛ, “enáa miishɛɛ yɛ anɔkwale hewɔ,” ni “edamɔɔ nibii fɛɛ naa, eheɔ nibii fɛɛ eyeɔ, ehiɛ kãa nibii fɛɛ nɔ, efiɔ shi yɛ nibii fɛɛ mli.” Mɔ ko ni yɔɔ suɔmɔ lɛ susuɔ mɛi krokomɛi ahe waa ni amɛsane kã etsui nɔ. Kɛfata he lɛ, eji naanyo anɔkwafo. Shi mɛi ni bɛ suɔmɔ lɛ yeɔ mɛi ahe awuŋa, amɛwóɔ amɛhe nɔ, amɛfeɔ nibii ni bulɛ bɛ he, amɛfoɔ amɛ pɛ amɛnɔ mli, amɛbɛɔ mɛi amɛwoɔ amɛmli, ni amɛkɛ eshai ekeee. Yɛ nɔ najiaŋ ni wɔbaajie sui gbohii ni yɔɔ taŋ nɛɛ akpo lɛ, esa akɛ wɔbɔ mɔdɛŋ wɔjie suɔmɔ kpo, ejaakɛ suɔmɔ ‘taooo lɛ diɛŋtsɛ enɔ,’ no ji epeleee ehãaa lɛ pɛ ehe.​—1 Kor. 13:4-8.

“Nyɔŋmɔ lɛ, suɔmɔ ji lɛ.” (1 Yoh. 4:8) Yɛ anɔkwale mli lɛ, wɔnyɛŋ wɔwie suɔmɔ he ni wɔtsĩii Yehowa gbɛ́i tã. Nibii fɛɛ ni ebɔ kɛ nibii fɛɛ ni efee lɛ yeɔ odase akɛ eyɛ suɔmɔ. Nibii ni efee kɛtsɔɔ akɛ esumɔɔ adesai lɛ ateŋ nɔ ni fe fɛɛ ji tsu ni etsu Yesu kɛba shikpɔŋ lɛ nɔ koni ebana nɔ ni egbo ehã wɔ lɛ. Bɔfo Yohane wie akɛ: “Enɛ nɔ atsɔ ajie Nyɔŋmɔ suɔmɔ lɛ kpo yɛ wɔgbɛfaŋ, no ji akɛ Nyɔŋmɔ tsu e-Bi koome lɛ kɛba je lɛ mli koni wɔtsɔ enɔ wɔná wala. Nɛkɛ ji bɔ ni suɔmɔ lɛ yɔɔ, jeee akɛ wɔ wɔsumɔ Nyɔŋmɔ, shi moŋ akɛ lɛ esumɔ wɔ ni etsu e-Bi lɛ akɛ kpatamɔ afɔle yɛ wɔhe eshai lɛ ahewɔ.” (1 Yoh. 4:9, 10) Nyɔŋmɔ sumɔɔ wɔ, ni no hewɔ lɛ, eto gbɛjianɔ koni ekɛ wɔhe eshai lɛ ake wɔ, bɔ ni afee ni wɔná hiɛnɔkamɔ kɛ wala.

Yesu tsɔɔ akɛ esumɔɔ adesai be ni ejɛ esuɔmɔ mli eba koni ebafee Nyɔŋmɔ suɔmɔnaa nii lɛ. Paulo ŋma akɛ: “Nɛkɛ ‘suɔmɔnaa nii’ nɛɛ naa lɛ, atsɔ Yesu Kristo gbɔmɔtso lɛ ni eŋɔhã shi kome nyɔŋlo lɛ nɔ atsuu wɔhe.” (Heb. 10:9, 10) Adesa ko bɛ ni baanyɛ ajie suɔmɔ ni da fe enɛ kpo. Yesu kɛɛ: “Mɔ ko bɛ suɔmɔ ni da fe enɛ, akɛ mɔ baaŋɔ ewala eŋmɛ shi ehã enanemɛi.” (Yoh. 15:13) Ani wɔ, ni wɔji adesai ni yeee emuu lɛ, baanyɛ akase Yehowa kɛ Yesu ni wɔjie suɔmɔ ni tamɔ amɛnɔ lɛ kpo? Hɛɛ, wɔbaanyɛ! Nyɛhãa wɔkwɛa gbɛi komɛi ni wɔbaanyɛ wɔtsɔ nɔ wɔfee nakai.

Paulo wo wɔ hewalɛ akɛ: “Akɛ bii ni asumɔɔ lɛ, nyɛfea nyɛhe mɛi ni kaseɔ Nyɔŋmɔ, ni nyɛyaa nɔ nyɛnyiɛa yɛ suɔmɔ mli, tamɔ bɔ ni Kristo lɛ hu sumɔ wɔ, ní eŋɔ ehe ehã yɛ wɔhewɔ [lɛ].” (Efe. 5:1, 2) Kɛ́ akɛɛ ‘wɔya nɔ wɔnyiɛ yɛ suɔmɔ mli lɛ,’ te etsɔɔ tɛŋŋ? Etsɔɔ akɛ, esa akɛ wɔjie suɔmɔ kpo yɛ nɔ fɛɛ nɔ ni wɔfeɔ lɛ mli. Jeee wɔwiemɔi pɛ anɔ wɔtsɔɔ wɔjieɔ suɔmɔ kpo, shi moŋ kɛtsɔ wɔnifeemɔi hu anɔ. Yohane ŋma akɛ: “Bii bibii, esaaa akɛ wɔsumɔɔ mɛi yɛ wiemɔ mli loo lilɛi nɔ, shi moŋ yɛ nifeemɔ kɛ anɔkwale mli.” (1 Yoh. 3:18) Akɛ nɔkwɛmɔnɔ lɛ, wɔshiɛɔ “Maŋtsɛyeli lɛ he sane kpakpa” lɛ wɔtsɔɔ mɛi, ejaakɛ wɔsumɔɔ Nyɔŋmɔ kɛ wɔnaanyo gbɔmɔ. (Mat. 24:14; Luka 10:27) Agbɛnɛ hu, wɔtoɔ wɔtsui shi, wɔjieɔ mlihilɛ kpo, ni wɔkɛ eshai keɔ kɛtsɔɔ akɛ ‘wɔmiiya nɔ wɔmiinyiɛ yɛ suɔmɔ mli.’ Biblia lɛ kɛɔ akɛ: “Bɔ ni Yehowa kɛfa nyɛ tswaa lɛ, esa akɛ nyɛ hu nyɛfee nakai nɔŋŋ.”​—Kol. 3:13.

Kɛ́ wɔwo mɔ ko ŋaa loo wɔjaje lɛ lɛ, no etsɔɔɔ akɛ wɔsumɔɔɔ lɛ. Akɛ nɔkwɛmɔnɔ lɛ, fɔlɔi komɛi feɔ nɔ fɛɛ nɔ ni amɛbii lɛ taoɔ amɛhãa amɛ, koni gbekɛbii lɛ akafo. Shi fɔlɔi ni sumɔɔ amɛbii lɛɛlɛŋ lɛ feɔ shiŋŋ kɛ́ ehe bahia ni amɛfee nakai. Nakai nɔŋŋ Yehowa hu feɔ. Yehowa sumɔɔ wɔ, shi “mɛi ni Yehowa sumɔɔ lɛ, amɛ etsɔseɔ.” (Heb. 12:6) Kɛ́ wɔ hu wɔtsɔse mɛi be fɛɛ be ni ehe baahia ni wɔfee nakai lɛ, no baatsɔɔ akɛ wɔmiinyiɛ yɛ suɔmɔ mli. (Abɛi 3:11, 12) Kɛ̃lɛ, be ni wɔfeɔ nakai lɛ, esa akɛ wɔkai akɛ wɔ hu wɔyeee emuu, ni no hewɔ lɛ bei pii lɛ wɔfeɔ nibii ni suɔmɔ bɛ mli. Yɛ anɔkwale mli lɛ, wɔ fɛɛ wɔbaanyɛ wɔya wɔhiɛ yɛ bɔ ni wɔjieɔ suɔmɔ kpo wɔhãa lɛ mli. Shi te wɔbaafee tɛŋŋ wɔya wɔhiɛ lɛ? Nyɛhãa wɔsusua gbɛi etɛ ni wɔbaanyɛ wɔtsɔ nɔ wɔfee nakai lɛ ahe.

Klɛŋklɛŋ lɛ, esa akɛ wɔkpa Nyɔŋmɔ fai ni ehã wɔ mumɔ krɔŋkrɔŋ lɛ, ejaakɛ no baahã wɔjie suɔmɔ kpo. Yesu wie akɛ, Yehowa kɛ mumɔ krɔŋkrɔŋ lɛ hãa “mɛi ni biɔ lɛ lɛ.” (Luka 11:13) Kɛ́ wɔsɔle wɔbi Nyɔŋmɔ ni ehã wɔ mumɔ krɔŋkrɔŋ lɛ, ni wɔmia wɔhiɛ waa akɛ ‘wɔbaaya nɔ wɔnyiɛ yɛ mumɔ naa’ lɛ, wɔbaaya wɔhiɛ yɛ bɔ ni wɔjieɔ suɔmɔ kpo wɔhãa lɛ mli. (Gal. 5:16) Akɛ nɔkwɛmɔnɔ lɛ, kɛ́ wɔmiisɔmɔ akɛ asafoŋ onukpai lɛ, wɔbaanyɛ wɔsɔle wɔbi Yehowa mumɔ krɔŋkrɔŋ lɛ koni eye ebua wɔ ni wɔjie suɔmɔ kpo be ni wɔjɛɔ Ŋmalɛi lɛ amli wɔwoɔ mɛi ŋaa lɛ. Fɔlɔi hu baanyɛ akpa Nyɔŋmɔ fai ni eduro amɛ emumɔ lɛ koni no aye abua amɛ ni amɛtsɔse amɛbii lɛ yɛ suɔmɔ mli shi jeee yɛ mlifu mli.

Nɔ ni ji enyɔ lɛ, esa akɛ wɔjwɛŋ bɔ ni Yesu jie suɔmɔ kpo etsɔɔ mɛi ni wo emli la po lɛ nɔ jogbaŋŋ. (1 Pet. 2:21, 23) Kɛ́ mɛi jije wɔnaa loo amɛye wɔ sane ni ejaaa lɛ, ehe miihia waa ni wɔsusu Kristo nɔkwɛmɔnɔ lɛ he. Yɛ shihilɛi ni tamɔ nakai lɛ amli lɛ, ehi jogbaŋŋ akɛ wɔbaabi wɔhe akɛ, ‘Eji Yesu ni afee lɛ nɛkɛ kulɛ, mɛni ebaafee?’ Nyɛmi yoo ko ni atsɛɔ lɛ Leigh lɛ bi ehe sane nɛɛ, ni no ye ebua lɛ ni esusu nii ahe kɛtee shɔŋŋ. Ewie akɛ: “Be ko lɛ, yoo ko ni mikɛtsuɔ nii lɛ ŋma mi kɛ nitsumɔ ni mitsuɔ lɛ he saji gbohii ni ekɛmaje mɛi krokomɛi ni mikɛtsuɔ nii lɛ. Sane lɛ dɔ mi waa diɛŋtsɛ. Shi mibi mihe akɛ, ‘Eji Yesu ni afee lɛ nɛkɛ kulɛ, te ebaatsu he nii ehã tɛŋŋ?’ Be ni mijwɛŋ nɔ ni Yesu baafee lɛ he lɛ, mikpɛ miyiŋ akɛ maŋmɛɛ he kɛkɛ, koni sane kɛ esane aya. Sɛɛ mli lɛ, miná mile akɛ yoo lɛ miiye hela ko ni naa wa, ni ehao. No hewɔ lɛ, mimu sane naa akɛ, ekolɛ, eji eyɛ hewalɛ kulɛ, eŋmaŋ nɔ ni eŋma lɛ. Mijwɛŋ bɔ ni Yesu jie suɔmɔ kpo be ni mɛi wo emli la po lɛ he, ni no ye ebua mi ni mi hu mijie suɔmɔ ni tamɔ nakai nɔŋŋ kpo mitsɔɔ yoo nɛɛ.” Kɛ́ wɔkase Yesu lɛ, wɔbaajie suɔmɔ kpo be fɛɛ be.

Nɔ ni ji etɛ lɛ, esa akɛ wɔjɛ suɔmɔ mli wɔkɛ wɔhe ashã afɔle wɔhã mɛi krokomɛi. Enɛ ji nɔ ni akɛkadiɔ anɔkwa Kristofoi. (Yoh. 13:34, 35) Yesu jie suɔmɔ ni tamɔ nɛkɛ kpo, ni ekɛfee nɔkwɛmɔnɔ ehã wɔ. Biblia lɛ kɛɔ akɛ be ni eshi ŋwɛi lɛ, “ejie nɔ fɛɛ nɔ efɔ̃ shi” yɛ wɔ hewɔ, aahu po akɛ, ekɛ ewala tete fɔ̃ shi ehã wɔ. (Fil. 2:5-8) Kɛ́ wɔkase Yesu, ni wɔ hu wɔjɛ suɔmɔ mli wɔkɛ  wɔhe shã afɔle wɔhã mɛi krokomɛi lɛ, wɔsusumɔi kɛ wɔhenumɔi kɛ Kristo nɔ lɛ baakpã gbee, ni no baatsirɛ wɔ ni wɔsusu amɛhiamɔ nii ahe klɛŋklɛŋ dani wɔsusu wɔ diɛŋtsɛ wɔnɔ he. Kɛ́ wɔjie suɔmɔ kpo lɛ, mɛɛ nibii kpakpai krokomɛi baajɛ mli aba?

Kɛ́ wɔjie suɔmɔ kpo lɛ, wɔnáa he sɛɛ waa. Susumɔ sɛɛnamɔi enyɔ nɛɛ ahe okwɛ:

• WƆYƐ NYƐMIMƐI YƐ JEŊ FƐƐ: Akɛni wɔsumɔɔ wɔhe hewɔ lɛ, wɔle akɛ ekɔɔɔ he ko maŋ nɔ ni wɔbaaya kɛ asafo ni wɔkɛbaabɔ lɛ, nyɛmimɛi ni yɔɔ jɛmɛ lɛ baahere wɔ hiɛmɛɛ. Ani otsui enyɔɔɔ omli akɛ nyɛmimɛi ni yɔɔ jeŋ fɛɛ lɛ sumɔɔ bo? (1 Pet. 5:9) Nyɔŋmɔ webii ateŋ pɛ obaana suɔmɔ ni tamɔ nɛkɛ yɛ!

• TOIŊJƆLƐ: Akɛni ‘wɔnáa tsui wɔhãa wɔhe yɛ suɔmɔ mli’ hewɔ lɛ, ‘toiŋjɔlɛ fĩɔ wɔ efeɔ wɔ ekome.’ (Efe. 4:2, 3) Wɔnaa ekomefeemɔ nɛɛ jogbaŋŋ yɛ wɔsafoŋ kpeei, kpeei bibii, kɛ kpeei wuji ashishi. Toiŋjɔlɛ nɛɛ hãa esoroɔ wɔ kwraa yɛ jeŋ ni béi kɛ mligbalamɔi eyi mli obɔ nɛɛ mli. (Lala 119:165; Yes. 54:13) Kɛ́ wɔbɔ mɔdɛŋ wɔhã toiŋjɔlɛ hi wɔ kɛ mɛi krokomɛi ateŋ lɛ, no tsɔɔ akɛ wɔsumɔɔ amɛ waa, ni enɛ hãa wɔ-Tsɛ ni yɔɔ ŋwɛi lɛ mii shɛɔ ehe waa.​—Lala 133:1-3; Mat. 5:9.

Paulo ŋma akɛ: “Suɔmɔ tswaa mɔ emaa shi.” (1 Kor. 8:1) Yɛ mɛɛ gbɛ nɔ? Yɛ 1 Korintobii yitso 13 lɛ, Paulo wie gbɛi srɔtoi anɔ ni suɔmɔ baanyɛ atswa mɔ ama shi lɛ ahe. Ewie akɛ, kɛ́ mɔ ko yɛ suɔmɔ lɛ, ebaatao nɔ ni mɛi krokomɛi baaná he sɛɛ. (1 Kor. 10:24; 13:5) Kɛfata he, akɛni mɛi ni yɔɔ suɔmɔ lɛ amli hi, amɛtoɔ amɛtsui shi, ni amɛsusuɔ bɔ ni amɛwiemɔi kɛ amɛnifeemɔi baasa mɛi krokomɛi ahe ahã lɛ he hewɔ lɛ, suɔmɔ kɛ ekomefeemɔ hiɔ amɛwekui kɛ amɛsafoi lɛ amli.​—Kol. 3:14.

Suɔmɔ ni wɔ fɛɛ wɔyɔɔ kɛhã Nyɔŋmɔ lɛ jara wa fe nɔ fɛɛ nɔ, ni suɔmɔ nɛɛ ji nɔ ni tswaa wɔ emaa shi fe fɛɛ. No ji nɔ ni hãa wɔkɛ gbee kome sɔmɔɔ Yehowa kɛ miishɛɛ eyɛ mli akɛ wɔjɛ hei srɔtoi, wɔyɛ hewolonɔ sui srɔtoi, ni wɔwieɔ wiemɔi srɔtoi. (Zef. 3:9) Nyɛhãa wɔtswaa wɔfai shi akɛ, wɔbaajie su kpakpa nɛɛ ni fata yibii ni Nyɔŋmɔ mumɔ krɔŋkrɔŋ lɛ hãa awoɔ lɛ ahe lɛ kpo daa gbi.