1. Mɛɛ gbɛi anɔ wɔtsɔɔ wɔ kɛ Yehowa feɔ ekome kɛtsuɔ nii?

YEHOWA bɔ wɔ koni wɔ kɛ lɛ afee ekome kɛtsu nii koni eyiŋtoi aba mli. Eyɛ mli akɛ wɔyeee emuu bianɛ moŋ, shi mɛi ni yeɔ Yehowa anɔkwa lɛ baanyɛ amɛ kɛ lɛ afee ekome kɛtsu nii daa gbi. Akɛ nɔkwɛmɔnɔ lɛ, kɛ́ wɔshiɛ Maŋtsɛyeli lɛ he sane kpakpa lɛ ni wɔfee mɛi kaselɔi lɛ, belɛ wɔ kɛ Nyɔŋmɔ miifee ekome kɛmiitsu nii. (1 Kor. 3:5-9) Eji hegbɛ kpele ni wɔná akɛ wɔ kɛ Ofe lɛ, mɔ ni bɔ nibii fɛɛ lɛ efee ekome kɛmiitsu nitsumɔ ni he hiaa waa nɛɛ! Kɛ̃lɛ, jeee shiɛmɔ kɛ kaselɔfeemɔ nitsumɔ lɛ pɛ nɔ wɔtsɔɔ wɔ kɛ Yehowa tsuɔ nii. Nikasemɔ nɛɛ baahã wɔna akɛ, kɛ́ wɔye wɔbua wɔweku lɛ kɛ wɔnyɛmimɛi Kristofoi lɛ, wɔfee mɛi gbɔ, wɔkɛ wɔhe hã kɛhã nitsumɔi srɔtoi, ni wɔlɛɛ wɔsɔɔmɔ nitsumɔ lɛ mli lɛ, no hu tsɔɔ akɛ wɔ kɛ Yehowa efee ekome kɛmiitsu nii.​—Kol. 3:23.

2. Mɛni hewɔ esaaa akɛ wɔkɛ nɔ ni wɔbaanyɛ wɔfee yɛ Yehowa sɔɔmɔ lɛ mli lɛ toɔ mɛi krokomɛi anɔ he kɔkɔɔkɔ lɛ?

² Be ni nikasemɔ nɛɛ yaa nɔ lɛ, esaaa akɛ okɛ nɔ ni obaanyɛ ofee yɛ Yehowa sɔɔmɔ lɛ mli lɛ toɔ nɔ ni mɛi krokomɛi baanyɛ afee lɛ he. Kaimɔ akɛ, afii ni mɔ ko eye, egbɔmɔtsoŋ hewalɛ, shihilɛ mli ni eyɔɔ, kɛ nyɛmɔi ni eyɔɔ lɛ baanyɛ asa nɔ ni ebaanyɛ etsu yɛ Yehowa sɔɔmɔ lɛ mli lɛ he. Akɛ mumɔ tsirɛ bɔfo Paulo ni eŋma akɛ: “Mɔ fɛɛ mɔ apɛi enifeemɔi amli ekwɛ, kɛkɛ lɛ ebaana nɔ ko yɛ lɛ diɛŋtsɛ ehe  ni baahã emii ashɛ ehe, shi jeee ni ekɛ ehe baato mɔ kroko he.”​—Gal. 6:4.

3. Mɛni hewɔ wɔbaanyɛ wɔkɛɛ akɛ, kɛ́ wɔkwɛ wɔweku lɛ, belɛ wɔ kɛ Nyɔŋmɔ efee ekome lɛ?

³ Yehowa miisumɔ ni wɔkwɛ wɔweku lɛ, ni nibii srɔtoi yɛ ni ekolɛ enɛ baabi ni wɔfee. Akɛ nɔkwɛmɔnɔ lɛ, ekolɛ ebaabi ni wɔtsu nii koni wɔná shika kɛtsu wɔweku lɛ hiamɔ nii ahe nii. Mamimɛi pii hiɔ shĩa bɔ ni afee ni amɛnyɛ amɛkwɛ amɛbii bibii lɛ. Agbɛnɛ hu, kɛ́ wɔfɔlɔi egbɔlɔ ni amɛnyɛɛɛ nɔ ko amɛfee lɛ, ekolɛ ehe baahia ni wɔkwɛ amɛ. Nibii nɛɛ fɛɛ ahe miihia. Nyɔŋmɔ Wiemɔ lɛ kɛɔ akɛ: “Kɛ́ mɔ ko kwɛɛɛ lɛ diɛŋtsɛ emɛi, kɛ titri lɛ, lɛ diɛŋtsɛ eshĩabii lɛ, ekwa hemɔkɛyeli lɛ, ni eji gbɔmɔ gbonyo fe mɔ ni bɛ hemɔkɛyeli.” (1 Tim. 5:8) Kɛ́ weku sɔ̃i ni jwere onɔ lɛ ahewɔ lɛ onyɛɛɛ otsu babaoo yɛ Yehowa sɔɔmɔ lɛ mli tamɔ bɔ ni oosumɔ ni ofee lɛ, kaaye otsui! Yehowa náa miishɛɛ kɛji okwɛ oweku lɛ.​—1 Kor. 10:31.

4. Mɛni fɔlɔi baanyɛ afee kɛtsɔɔ akɛ amɛkɛ Maŋtsɛyeli lɛ miiye klɛŋklɛŋ gbɛhe? Ni mɛɛ yibii kpakpai enɛ woɔ?

⁴ Kɛ́ fɔlɔi ni ji Kristofoi lɛ ye amɛbua amɛbii ni amɛkɛ otii mamɔ amɛhiɛ yɛ Yehowa sɔɔmɔ lɛ mli lɛ, belɛ fɔlɔi nɛɛ kɛ Yehowa efee ekome kɛmiitsu nii. Fɔlɔi pii efee nakai, ni ŋmɛnɛ lɛ, amɛteŋ mɛi komɛi abii miisɔmɔ akɛ be fɛɛ sɔɔlɔi. Bii nɛɛ ateŋ mɛi komɛi miisɔmɔ akɛ maŋsɛɛ sɔɔlɔi, mɛi komɛi hu miisɔmɔ akɛ gbɛgbalɔi yɛ hei ni hiamɔ lɛ da yɛ, mɛi komɛi hu miisɔmɔ yɛ Betel, loo yɛ hei krokomɛi ni kɛ amɛshĩa teŋ jekɛ. Ekolɛ akɛni hei ni bii nɛɛ sɔmɔɔ yɛ lɛ kɛ shĩa teŋ jekɛ hewɔ lɛ, amɛnyɛɛɛ amɛyasara amɛfɔlɔi kpitiokpitio tamɔ bɔ ni fɔlɔi lɛ baasumɔ ni amɛfee lɛ. Fɛɛ sɛɛ lɛ, fɔlɔi nɛɛ woɔ amɛbii lɛ hewalɛ ni amɛya nɔ amɛsɔmɔ yɛ hei ni amɛyɔɔ lɛ. Mɛni hewɔ? Ejaakɛ amɛle akɛ amɛbii lɛ kɛ Maŋtsɛyeli lɛ miiye klɛŋklɛŋ gbɛhe, ni enɛ ni amɛle lɛ hãa amɛnáa miishɛɛ waa. (3 Yoh. 4) Hana ni hi shi yɛ blema lɛ wie akɛ ekɛ ebinuu Samuel ‘efa’ Yehowa, ni nakai fɔlɔi nɛɛ ateŋ mɛi babaoo nuɔ he. Amɛbuɔ hegbɛ ni amɛná akɛ amɛ kɛ Yehowa baafee ekome kɛtsu nii yɛ nɛkɛ gbɛ nɔ lɛ akɛ eji hegbɛ kpele diɛŋtsɛ. Ni amɛshwako amɛhe akɛ amɛfee nakai!​—1 Sam. 1:28.

5. Mɛɛ gbɛ nɔ obaanyɛ oye obua nyɛmimɛi ni yɔɔ osafo lɛ mli lɛ? (Kwɛmɔ mfoniri ni yɔɔ nikasemɔ lɛ shishijee lɛ.)

⁵ Kɛ́ amrɔ nɛɛ ni wɔwieɔ lɛ, obɛ weku sɔ̃ ko ni ootsu he nii lɛ, ani obaanyɛ oye obua nyɛmimɛi ni bɛ hewalɛ, loo mɛi ni egbɔlɔ ni yɔɔ osafo lɛ mli lɛ? Ani obaanyɛ oye obua nyɛmi ko ni miikwɛ emɔ ko ni bɛ hewalɛ loo egbɔ lɛ? Ani obaanyɛ oye obua mɛi krokomɛi ni yelikɛbuamɔ he miihia amɛ lɛ? Kɛ́ okɛ ohiɛ fɔ̃ shi lɛ, obaana mɛi yɛ osafo lɛ mli ni obaanyɛ oye obua amɛ. Akɛ nɔkwɛmɔnɔ lɛ, obaanyɛ oto gbɛjianɔ ni oyakwɛ nyɛmi yoo ko fɔlɔi ni egbɔlɔ lɛ ohã lɛ koni enyɛ eyatsu nibii krokomɛi ahe nii. Obaanyɛ oyawó nyɛmi ko kɛya asafoŋ kpee, oyaye jara ohã lɛ, loo oya maŋ lɛ mli oyatsu nibii krokomɛi ahe nii ohã lɛ. Kɛ́ nyɛmi ko mɔ ko kã helatsamɔhe lɛ, obaanyɛ oto gbɛjianɔ ni oyawó lɛ ni nyɛyasara lɛ. Namɔ aaale akɛ ekolɛ nyɛmi lɛ esɔle yɛ enɛ he, ni Yehowa miitsɔ oyelikɛbuamɔ lɛ nɔ eehã esɔlemɔ lɛ hetoo? Ani osumɔŋ ni okɛ Yehowa afee ekome kɛtsu nii yɛ nɛkɛ gbɛ nɔ?​—Kanemɔ 1 Korintobii 10:24.

6. Kɛ́ akɛɛ wɔfee mɛi gbɔ lɛ, te atsɔɔ tɛŋŋ?

⁶ Ale Nyɔŋmɔ tsuji waa akɛ amɛfeɔ mɛi gbɔ. Yɛ Biblia lɛ mli lɛ, Greek wiemɔ ni atsɔɔ shishi akɛ “gbɔfeemɔ” lɛ shishitsɔɔmɔ ŋmiiŋmi ji, “mlihilɛ kpo ni ajieɔ atsɔɔ gbɔi.” (Heb. 13:2; shn.) Biblia lɛ gbaa wɔ mɛi komɛi ni fee mɛi gbɔ lɛ ahe sane, ni wɔbaanyɛ wɔkase amɛ. (1 Mo. 18:1-5) Be fɛɛ be ni hegbɛ lɛ baaba akɛ wɔye wɔbua mɔ ko lɛ, esa akɛ wɔfee  nakai, ekɔɔɔ he eko kɛji mɔ lɛ ji nyɛmi loo ejeee nyɛmi.​—Gal. 6:10.

7. Kɛ́ ofee be fɛɛ sɔɔlɔi gbɔ lɛ, mɛɛ gbɛ nɔ obaaná he sɛɛ?

⁷ Ani obaanyɛ ohã be fɛɛ sɔɔlɔi ni basaraa nyɛsafo lɛ he ko amɛwɔ? Kɛ́ ofee nakai lɛ, belɛ okɛ Nyɔŋmɔ efee ekome kɛmiitsu nii. (Kanemɔ 3 Yohane 5, 8.) Kɛ́ ofee be fɛɛ sɔɔlɔi gbɔ lɛ, obaaná he sɛɛ, ni amɛ hu amɛbaaná he sɛɛ. ‘Nyɛbaawowoo nyɛhe hewalɛ.’ (Rom. 1:11, 12) Naa niiashikpamɔ ni nyɛmi nuu ko ni atsɛɔ lɛ Olaf lɛ ná. Afii babaoo ni eho nɛ, be ni eji oblanyo lɛ, kpokpaa nɔkwɛlɔ oshijafo ko basara amɛsafo lɛ, ni ehe bahia ni aná wɔɔhe ahã lɛ. Olaf bi efɔlɔi ni jeee Odasefoi lɛ kɛji kpokpaa nɔkwɛlɔ lɛ baanyɛ abato amɛshĩa lɛ. Amɛkpɛlɛ nɔ, shi amɛhã Olaf le akɛ, belɛ lɛ, Olaf lɛ ebaakã sɛi lɛ mli. Nakai pɛpɛɛpɛ Olaf fee, ni eŋɔɔ enaa waa akɛ efee nakai. Nakai otsi lɛ, lɛ kɛ kpokpaa nɔkwɛlɔ lɛ fɛɛ ná miishɛɛ waa! Ewie akɛ: “Daa leebi lɛ, mi kɛ kpokpaa nɔkwɛlɔ lɛ fɛɛ teɔ shi mra, ni wɔgbaa sane kɛ miishɛɛ be ni wɔyeɔ wɔleebi niyenii lɛ. Ewo mi hewalɛ waa ni no hã miná he miishɛɛ akɛ mikɛ mihe baawo be fɛɛ sɔɔmɔ nitsumɔ lɛ mli.” Olaf kɛ afii 40 esɔmɔ akɛ maŋsɛɛ sɔɔlɔ yɛ maji srɔtoisrɔtoi anɔ.

8. Mɛni hewɔ esa akɛ ofee mɛi ejurɔ kɛ́ amɛhiɛ esɔɔɔ po? Gbaa niiashikpamɔ ko ni tsɔɔ nakai.

⁸ Obaanyɛ otsɔ gbɛi srɔtoi anɔ ojie mlihilɛ kpo otsɔɔ gbɔi kɛ́ yɛ shishijee mli lɛ amɛhiɛ esɔɔɔ nɔ ni ofee lɛ po. Susumɔ niiashikpamɔ ni nyɛmi yoo ko ni yɔɔ Spain lɛ ná lɛ he okwɛ. Be ko lɛ, ekɛ yoo ko ni jɛ Ecuador ni atsɛɔ lɛ Yesica ni ekɛ lɛ kaseɔ nii lɛ miikase nii ni eyɔse akɛ fo sɔŋŋ Yesica foɔ. No hewɔ lɛ, ebi lɛ nɔ hewɔ ni efoɔ lɛ. Yesica kɛɛ lɛ akɛ dani ebaafã kɛba Spain lɛ, no mli lɛ ohiafo ji lɛ. Be ko po lɛ, ebɛ nɔ ko ni ekɛ ebiyoo fioo lɛ baaye. No hewɔ lɛ, ehã lɛ nu, ni ewɔle lɛ ni ewɔ. Be ni ewɔleɔ lɛ lɛ, esɔle ekpa Nyɔŋmɔ fai ni eye ebua amɛ. No sɛɛ etsɛɛɛ lɛ, Odasefoi enyɔ ba eŋɔɔ, shi emli fu amɛ waa ni etserɛ magazin ni amɛkɛhã lɛ lɛ mli. Ekɛɛ amɛ akɛ: “Enɛ nyɛtaoɔ mibi lɛ aye?” Nyɛmimɛi lɛ bɔ mɔdɛŋ akɛ amɛbaashɛje emii, shi ekpɛlɛɛɛ. Sɛɛ mli lɛ, amɛkɛ niyenii wo kɛntɛŋ mli ni amɛkɛbama Yesica shinaa lɛ shi. Enɛ hewɔ Yesica foɔ be ni akɛ lɛ kaseɔ nii lɛ. Ena akɛ nakai gbi lɛ, kulɛ esa akɛ eyɔse akɛ Yehowa miitsɔ nyɛmimɛi lɛ anɔ eehã esɔlemɔ lɛ hetoo. Etswa efai shi akɛ, bianɛ lɛ ebaasɔmɔ Yehowa. Eyɛ faŋŋ akɛ, ejurɔ ni nyɛmimɛi lɛ fee lɛ lɛ wo yibii kpakpai!​—Jaj. 11:1, 6.

9, 10. (a) Mɛɛ be nɛkɛ ehe bahia ni mɛi kɛ amɛhe ahã yɛ blema Israel? (b) Mɛni nyɛmimɛi hii baanyɛ afee kɛye amɛbua amɛsafoi lɛ ŋmɛnɛ?

⁹ Yɛ blema Israel lɛ, ehe bahia ni mɛi kɛ amɛhe ahã kɛhã nitsumɔi srɔtoi. (2 Mo. 36:2; 1 Kro. 29:5; Neh. 11:2) Ŋmɛnɛ hu lɛ, wɔbaanyɛ wɔkɛ wɔbe, nibii ni wɔyɔɔ, kɛ wɔhesai ashã afɔle kɛtsu nitsumɔi srɔtoi pii kɛye wɔbua wɔnyɛmimɛi Kristofoi lɛ. Kɛ́ wɔfee nakai lɛ, wɔbaaná miishɛɛ waa ni Yehowa baajɔɔ wɔ babaoo.

¹⁰ Nyɔŋmɔ Wiemɔ lɛ woɔ nyɛmimɛi hii hewalɛ ni amɛkɛ amɛhe ahã kɛsɔmɔ akɛ asafoŋ sɔɔlɔi kɛ asafoŋ onukpai. Kɛ́ amɛfee nakai lɛ, belɛ amɛ kɛ Yehowa miifee ekome kɛmiitsu nii. (1 Tim. 3:1, 8, 9; 1 Pet. 5:2, 3) Esa akɛ nyɛmimɛi hii ni miitao amɛsɔmɔ akɛ sɔɔlɔi kɛ nɔkwɛlɔi lɛ aná he miishɛɛ akɛ amɛbaaye amɛbua nyɛmimɛi lɛ koni nyɛmimɛi lɛ ahemɔkɛyeli mli awa. Agbɛnɛ hu, esa akɛ amɛye amɛbua amɛ yɛ gbɛi krokomɛi hu anɔ. (Bɔf. 6:1-4) Ani asafoŋ onukpai lɛ ekɛɛ bo akɛ amɛbaasumɔ ni okwɛ shitaramɔ nɔ, okwɛ woji lɛ anɔ, otsu shikpɔŋkukuji lɛ ahe nii, oye obua kɛ nibii asaamɔ, loo otsu nitsumɔ kroko ni tamɔ nakai? Nyɛmimɛi ni tsuɔ nitsumɔi nɛɛ baakɛɛ bo akɛ, etsumɔ yɛ miishɛɛ pam!

11. Mɛɛ gbɛ nɔ nanemɛi ni nyɛmi yoo ko ná be ni etsuɔ tsũmaa nitsumɔ lɛ ye amɛbua lɛ?

¹¹ Bei pii lɛ, mɛi ni yayeɔ amɛbuaa kɛmamɔɔ  Maŋtsɛyeli Asai, Kpee Asai, kɛ tsũi krokomɛi ni ajáa Yehowa yɛ mli lɛ náa nanemɛi hei. Naa nɔ ni nyɛmi yoo ko ni atsɛɔ lɛ Margie ni kɛ afii 18 eye ebua kɛmamɔ Maŋtsɛyeli Asai lɛ eyɔse. Nyɛmi yoo nɛɛ kɛ nyɛmimɛi oblayei ni baa koni amɛ hu amɛbaye amɛbua kɛ nitsumɔ lɛ bɔɔ naanyo ni etsɔɔ amɛ nii. Ewie akɛ kɛ́ mɛi baye amɛbua kɛ nitsumɔ lɛ, amɛnáa hegbɛ amɛwowoɔ amɛhe hewalɛ. (Rom. 1:12) Margie wie po akɛ, be ni ekɛ shihilɛi ni mli wawai kpe lɛ, nanemɛi ni ená yɛ tsumaa nitsumɔi nɛɛ amli lɛ wo lɛ hewalɛ. Ani oyaye obua kɛ tsumaa nitsumɔi nɛɛ eko pɛŋ? Kɛ́ ole ŋaa nitsumɔ ko jio, oleee eko jio, obaanyɛ okɛ ohe ahã.

12. Mɛni wɔbaanyɛ wɔfee kɛye wɔbua mɛi ni oshãrai enina amɛ lɛ?

¹² Gbɛ kroko ni wɔbaanyɛ wɔtsɔ nɔ wɔ kɛ Nyɔŋmɔ afee ekome kɛtsu nii ji, ni wɔbaaye wɔbua wɔnyɛmimɛi ni oshãrai enina amɛ lɛ. Nɔ kome ni wɔbaanyɛ wɔfee ji, ni wɔbaatsu onia ni akɛwa amɛ. (Yoh. 13:34, 35; Bɔf. 11:27-30) Nɔ kroko ni wɔbaanyɛ wɔfee ji, ni wɔbaaye wɔbua kɛ amɛshĩai lɛ amli saamɔ, loo kɛ tsũi lɛ diɛŋtsɛ asaamɔ. Be ko lɛ, nu afua fite nyɛmi yoo ko ni jɛ Poland ni atsɛɔ lɛ Gabriela lɛ shĩa. Be ni nyɛmimɛi ni yɔɔ asafoi ni yɔɔ jɛmɛ lɛ amli lɛ ba amɛbaye amɛbua lɛ lɛ, emii shɛ ehe. Ewie akɛ: “Misumɔɔɔ ni mikɛ mijwɛŋmɔ maa miheloonaa nibii ni fite lɛ anɔ; nomɛi lɛ, heloonaa nibii kɛkɛ ni. Miisumɔ ni mikɛ mijwɛŋmɔ ama nibii ni miná lɛ moŋ anɔ. Bɔ ni nyɛmimɛi lɛ ye amɛbua mi lɛ hã mina akɛ, eji hegbɛ kpele akɛ mɔ ko baahi Kristofoi asafo lɛ mli, ni akɛ Kristofoi asafo lɛ mli ji he ni miishɛɛ yɔɔ.” Nyɛmimɛi babaoo ni oshãrai enina amɛ ni aye abua amɛ lɛ baakɛɛ bo akɛ amɛ hu amɛnuɔ he nakai nɔŋŋ. Mɛi ni kɛ Yehowa feɔ ekome kɛyeɔ amɛbuaa mɛi yɛ nɛkɛ gbɛ nɔ lɛ hu náa miishɛɛ waa ni amɛtsui nyɔɔ amɛmli diɛŋtsɛ.​—Kanemɔ Bɔfoi 20:35; 2 Korintobii 9:6, 7.

13. Kɛ́ wɔkɛ wɔhe hã kɛye wɔbua mɛi lɛ, mɛɛ gbɛ nɔ ehãa suɔmɔ ni wɔyɔɔ kɛhã Yehowa lɛ mli waa? Gbaa niiashikpamɔ ko ni tsɔɔ nakai.

¹³ Nyɛmi yoo ko ni atsɛɔ lɛ Stephanie lɛ kɛ nyɛmimɛi krokomɛi kɛ Nyɔŋmɔ fee ekome kɛtsu nii kɛye amɛbua Odasefoi ni ejo foi kɛjɛ amɛmaŋ kɛba United States yɛ ta ni awuɔ yɛ amɛmaŋ lɛ nɔ lɛ hewɔ lɛ. Amɛye amɛbua nyɛmimɛi nɛɛ koni amɛná shĩai ni amɛbaahi mli kɛ tsũ mli nibii. Stephanie  wie akɛ: “Nyɛmimɛi lɛ ahiɛ sɔ suɔmɔ ni ajie kpo atsɔɔ amɛ lɛ, ni amɛná miishɛɛ. Ehã amɛna akɛ, ekɔɔɔ he eko he ni amɛbaaya yɛ je lɛ mli lɛ, amɛyɛ nyɛmimɛi yɛ jɛmɛ, ni enɛ ta wɔtsuiŋ waa. Nyɛmimɛi nɛɛ susu akɛ wɔye wɔbua amɛ, shi yɛ anɔkwale mli lɛ, amɛ moŋ amɛye amɛbua wɔ waa. Suɔmɔ kɛ ekomefeemɔ ni yɔɔ amɛteŋ lɛ, hemɔkɛyeli ni amɛjie lɛ kpo lɛ, kɛ bɔ ni amɛkɛ amɛhiɛ fɔ̃ Yehowa nɔ lɛ ehã suɔmɔ ni wɔyɔɔ kɛhã Yehowa lɛ mli ewa waa, ni no ehã wɔhiɛ esɔ nibii fɛɛ ni etsɔɔ esafo lɛ nɔ efeɔ ehãa wɔ lɛ waa.”

14, 15. (a) Mɛɛ su gbalɔ Yesaia jie lɛ kpo? (b) Mɛɛ gbɛ nɔ Yehowa tsuji ni yɔɔ ŋmɛnɛ lɛ baanyɛ akase Yesaia?

¹⁴ Ani obaasumɔ ni okɛ Yehowa afee ekome kɛtsu babaoo fe bɔ ni otsuɔ bianɛ lɛ? Ani obaasumɔ ni ofã ni oyasɔmɔ yɛ he ko ni shiɛlɔi ahe miihia waa yɛ? Jeee ja mɔ ko efã kɛtee he ko shɔŋŋ dani ebaanyɛ esɔmɔ Nyɔŋmɔ. Shi nyɛmimɛi komɛi ashihilɛi ŋmɛɔ amɛ gbɛ koni amɛyasɔmɔ yɛ shɔŋŋ. Su ni amɛjieɔ lɛ kpo lɛ tamɔ su ni gbalɔ Yesaia jie lɛ kpo be ni Yehowa bi akɛ, “Namɔ matsu, ni namɔ baaya ahã wɔ?” lɛ. Ehã hetoo akɛ: “Naa mi! Tsu mi!” (Yes. 6:8) Ani obaasumɔ ni oye obua Yehowa asafo lɛ? Ani oshihilɛ baaŋmɛ bo gbɛ ni ofee nakai? Ekolɛ, obaabi akɛ, ‘Mɛni manyɛ mafee kɛye mabua asafo lɛ?’

¹⁵ Yesu wie yɛ shiɛmɔ kɛ kaselɔfeemɔ nitsumɔ lɛ he akɛ: “Nikpamɔ lɛ fa, shi nitsulɔi lɛ faaa. No hewɔ lɛ, nyɛkpaa nikpamɔ Nuŋtsɔ lɛ fai koni etsu nitsulɔi kɛba enikpamɔ lɛ mli.” (Mat. 9:37, 38) Ani obaanyɛ osɔmɔ akɛ gbɛgbalɔ yɛ he ko ni hiamɔ lɛ da yɛ? Ani obaanyɛ oye obua mɔ ko ni efee nakai? Nyɛmimɛi babaoo nuɔ he akɛ gbɛ ni hi fe fɛɛ ni amɛbaanyɛ amɛtsɔ nɔ amɛtsɔɔ akɛ amɛsumɔɔ Nyɔŋmɔ kɛ amɛnyɛmi gbɔmɔ ji, ni amɛbaayasɔmɔ akɛ gbɛgbalɔi yɛ hei ni shiɛlɔi ahe miihia waa yɛ. Ani obaanyɛ osusu gbɛi krokomɛi ni obaanyɛ otsɔ nɔ otsu babaoo yɛ Yehowa sɔɔmɔ lɛ mli lɛ ahe? Kɛ́ otsu babaoo yɛ Yehowa sɔɔmɔ lɛ mli lɛ, obaaná miishɛɛ waa.

16, 17. Mɛɛ gbɛi krokomɛi anɔ wɔbaanyɛ wɔtsɔ wɔtsu babaoo yɛ Yehowa sɔɔmɔ lɛ mli?

¹⁶ Ani obaasumɔ ni oyasɔmɔ yɛ Betel loo oyaye obua kɛ tsumaa nitsumɔ ko, ekolɛ be kukuoo ko loo gbi kome loo nɔ ni fe nakai yɛ otsi lɛ mli? Mɛi ni be fɛɛ be lɛ Yehowa asafo lɛ taoɔ ekɛtsu nii ji, mɛi ni kɛ amɛhe baahã ni amɛtsu nii yɛ he fɛɛ he ni akɛ amɛ baaya, ekɔɔɔ he eko nitsumɔ ni akɛbaahã amɛ. Kɛ́ wɔkɛ wɔhe hã lɛ, ekolɛ hiamɔ ko ni eba lɛ hewɔ lɛ, abaahã wɔtsu nitsumɔ ko ni wɔtsuko pɛŋ, eyɛ mli akɛ wɔle nibii krokomɛi tsumɔ waa moŋ. Yehowa hiɛ sɔɔ mɛi fɛɛ ni kɛ amɛhe shãa afɔle koni amɛsɔmɔ yɛ he fɛɛ he ni hiamɔ lɛ yɔɔ lɛ.​—Lala 110:3.

¹⁷ Ani obaasumɔ ni oya skul ko ni baaye abua bo ni onyɛ osɔmɔ Yehowa jogbaŋŋ fe bɔ ni ofeɔ amrɔ nɛɛ po? Kɛ́ nakai ni lɛ, ekolɛ obaanyɛ oŋmala woji anɔ nii koni ahã oya Skul Kɛhã Maŋtsɛyeli Sane Kpakpa Jajelɔi lɛ eko. Skul nɛɛ tsɔseɔ nyɛmimɛi hii kɛ yei ni edara yɛ mumɔŋ ni yɔɔ be fɛɛ sɔɔmɔ lɛ mli momo lɛ koni Yehowa asafo lɛ anyɛ ekɛ amɛ atsu nii waa. Kɛ́ oosumɔ ni oya skul nɛɛ eko lɛ, belɛ esa akɛ ofee klalo akɛ, he fɛɛ he ni abaakɛɛ bo akɛ oyasɔmɔ yɛ lɛ, obaaya. Ani obaasumɔ ni oya skul nɛɛ eko koni onyɛ otsu babaoo yɛ Yehowa sɔɔmɔ lɛ mli?​—1 Kor. 9:23.

18. Kɛ́ wɔkɛ Yehowa fee ekome kɛtsu nii daa gbi lɛ, mɛɛ gbɛ nɔ wɔbaaná he sɛɛ?

¹⁸ Yehowa tsuji ji wɔ, ni enɛ hewɔ lɛ, wɔfeɔ ejurɔ, wɔfeɔ ekpakpa, wɔmli hi, ni wɔjieɔ suɔmɔ kpo wɔtsɔɔ mɛi. Wɔsusuɔ mɛi krokomɛi ahe daa gbi. Nibii nɛɛ ni wɔfeɔ lɛ hewɔ lɛ, wɔyeee wɔtsui yɛ nibii ahe, wɔyɛ toiŋjɔlɛ, ni wɔyɛ miishɛɛ hu. (Gal. 5:22, 23) Kɛ́ ofee mɛi ejurɔ, tamɔ bɔ ni Yehowa feɔ lɛ, ni okɛ lɛ fee ekome kɛtsu nii lɛ, obaaná miishɛɛ ekɔɔɔ he eko shihilɛ mli ni oyɔɔ!​—Abɛi 3:9, 10.