Ani okane Buu-Mɔɔ srɔtoi ni ba nyɛsɛɛ nɛɛ jogbaŋŋ? Kwɛmɔ akɛ obaanyɛ ohã sanebimɔi ni nyiɛ sɛɛ nɛɛ ahetoo lo:

Mɛni yɔɔ Biblia lɛ mli ni hãa wɔnaa akɛ Nyɔŋmɔ nuɔ he ehãa wɔ?

Be ni Ejiptbii lɛ yeɔ blema Israelbii lɛ nyɔŋ lɛ, Nyɔŋmɔ na Israelbii lɛ ahaomɔ lɛ, ni enu amɛpiŋmɔ lɛ hu he. (2 Mo. 3:7; Yes. 63:9) Nyɔŋmɔ bɔ wɔ tamɔ bɔ ni eyɔɔ lɛ, ni no hewɔ lɛ, wɔ hu wɔnuɔ he wɔhãa mɛi. Kɛ́ wɔnu he akɛ wɔsaaa mɛi ni Nyɔŋmɔ jieɔ suɔmɔ kpo etsɔɔ po lɛ, Nyɔŋmɔ nuɔ he ehãa wɔ.​—wp18.3, bf. 8-9.

Mɛɛ gbɛ nɔ nibii ni Yesu tsɔɔ mɛi lɛ ye ebua amɛ ni amɛhe akatsɛ̃ mɛi?

Yudafoi ni hi shi yɛ Yesu beiaŋ lɛ ateŋ mɛi pii ehiɛɛɛ mɛi krokomɛi ahe jwɛŋmɔ kpakpa. Yesu kɛɛ ekaselɔi lɛ akɛ ehe miihia ni amɛba amɛhe shi, ni akɛ, esaaa akɛ amɛnuɔ he akɛ hei ni amɛjɛ lɛ hewɔ lɛ, amɛnɔ kwɔlɔ fe mɛi krokomɛi. Ekɛɛ amɛ akɛ amɛ fɛɛ lɛ, nyɛmimɛi ji amɛ.​—w18.06, bf. 9-10.

Mɛni wɔkaseɔ yɛ nɔ hewɔ ni Nyɔŋmɔ hãaa Mose aya Shiwoo Shikpɔŋ lɛ nɔ lɛ mli?

Yehowa naanyo kpaakpa ji Mose. (5 Mo. 34:10) Be ni eshwɛ fioo ni Israelbii lɛ baashɛ Shiwoo Shikpɔŋ lɛ nɔ lɛ, amɛtɔke amɛwo Mose nɔ ni ji shii enyɔ nɔ yɛ nu ni amɛnáaa amɛnu lɛ hewɔ. Nyɔŋmɔ kɛɛ Mose akɛ ekɛ tɛsaa lɛ awie. Shi Mose kɛ etso lɛ tswa tɛsaa lɛ. Ekɛ gbɛtsɔɔmɔ ni Yehowa kɛhã lɛ lɛ tsuuu nii, ni eeenyɛ efee akɛ, enɛ hewɔ Yehowa mli fu lɛ waa lɛ. Eeenyɛ efee hu akɛ, emli fu lɛ akɛni nɔ ni efee lɛ hãaa akɛ anunyam ni sa lɛ, Yehowa lɛ, ahã lɛ lɛ hewɔ. (4 Mo. 20:6-12) Nɔ ni enɛ tsɔɔ wɔ ji akɛ, esa akɛ wɔbo Yehowa toi ni wɔwo ehiɛ nyam.​—w18.07, bf. 13-14.

Kɛ́ wɔdamɔ bɔ ni mɛi ji yɛ kponɔgbɛ lɛ nɔ wɔkojo amɛ lɛ, mɛni hewɔ ewaaa akɛ wɔbaatɔ̃ lɛ?

Bei pii lɛ, mɛi damɔɔ mɛi ahewolonɔ su loo he ni amɛjɛ, niiatsɛmɛi loo ohiafoi ni amɛji, loo afii abɔ ni amɛye lɛ nɔ amɛkojoɔ amɛ. Shi kɛ́ wɔfee nakai lɛ, ewaaa akɛ wɔbaakwɛ hiɛiaŋ. Ehe miihia ni wɔbɔ mɔdɛŋ wɔkase Nyɔŋmɔ, mɔ ni kwɛɛɛ mɛi ahiɛiaŋ lɛ! (Bɔf. 10:34, 35)​—w18.08, bf. 8-12.

Mɛni Kristofoi ni edara yɛ afii amli lɛ baanyɛ afee kɛye amɛbua mɛi krokomɛi?

Kɛ́ atsake nitsumɔ ni Kristofonyo ko ni eda yɛ afii amli lɛ tsuɔ yɛ Yehowa asafo lɛ mli lɛ, no etsɔɔɔ akɛ Yehowa bɛ ehe miishɛɛ dɔŋŋ. Nibii pii yɛ ni mɔ lɛ baanyɛ afee kɛye ebua mɛi krokomɛi. Ebaanyɛ eye ebua mɛi ni yɔɔ asafo lɛ mli lɛ ahefatalɔi ni jeee Odasefoi lɛ kɛ mɛi ni ekpa Yehowa sɔɔmɔ lɛ, ekɛ mɛi akase Biblia lɛ, ni etsu babaoo yɛ shiɛmɔ nitsumɔ lɛ mli.​—w18.09, bf. 8-11.

Kɛ́ akɛɛ Nibii Ni Wɔkɛtsuɔ Nii Kɛtsɔɔ Mɛi Nii lɛ, mɛɛ woji kɛ nibii atsɔɔ lɛ?

JW.ORG kaadii kɛ ninefɔɔ woji, tratii kpaanyɔ ni kɛnitsumɔ waaa, Buu-Mɔɔ kɛ Awake!, broshuɔi enyɔoo ko, woji enyɔ ni nomɛi titri wɔkɛfeɔ Biblia mli nikasemɔ lɛ, kɛ vidioi ejwɛ. Vidioi nɛɛ ekome ji, Mɛni Hewɔ Esa Akɛ Okase Biblia Lɛ?​—w18.10, bf. 16.

Mɛɛ gbɛ nɔ Kristofonyo ko baanyɛ ‘ahé anɔkwale’ lɛ, tamɔ bɔ ni awoɔ he hewalɛ yɛ Abɛi 23:23 lɛ?

Wɔkɛ shika héee anɔkwale lɛ. Kɛ̃lɛ, wɔkɛ wɔbe kɛ nibii krokomɛi shãa afɔle yɛ anɔkwale lɛ hewɔ.​—w18.11, bf. 4.

Mɛni wɔbaanyɛ wɔkase yɛ bɔ ni Hosea kɛ eŋa Gomer ye ehã lɛ mli?

Gomer fite gbãla shii abɔ, shi Hosea kɛ ehe ke lɛ ni eshwieee lɛ. Kɛ́ Kristofonyo ko ŋa loo ewu yabɔ ajwamaŋ lɛ, lɛ mɔ ni eyabɔko ajwamaŋ lɛ baanyɛ ekɛ ehefatalɔ lɛ he ake lɛ. Kɛ́ ekɛ ehefatalɔ lɛ bɔi bɔlɛnamɔ lɛ, ebɛ nɔ ko dɔŋŋ ni ebaadamɔ nɔ etse lɛ gbãla yɛ Ŋmalɛ naa.​—w18.12, bf. 13.