1, 2. Mɛni hewɔ Paulo ŋma wolo eyahã Kristofoi ni yɔɔ Yudea lɛ?

YƐ AFI 61 lɛ, asafoi fɛɛ ni yɔɔ Israel lɛ yɛ toiŋjɔlɛ bɔ ni sa. No mli lɛ, awo bɔfo Paulo tsuŋ yɛ Roma, shi ehiɛ kã nɔ akɛ, etsɛŋ, abaajie lɛ. Aŋmɛɛ Timoteo, ni ji enaanyo ni ekɛ lɛ fãa gbɛ lɛ he etsɛko, ni amɛto gbɛjianɔ akɛ, kɛ́ aŋmɛɛ Paulo he lɛ, amɛbaafee ekome kɛyasara nyɛmimɛi ni yɔɔ Yudea lɛ. (Hebribii 13:23) Yɛ afii enumɔ pɛ sɛɛ lɛ, ehe baahia ni Kristofoi ni yɔɔ Yudea, titri lɛ, mɛi ni yɔɔ Yerusalem lɛ, abo ŋaa ko ni Yesu wo lɛ toi oya nɔŋŋ. Yesu etsɔ hiɛ egba akɛ, be ko baaba ní tabilɔi baabɔ nsara amɛwo Yerusalem, ni ewo esɛɛnyiɛlɔi lɛ ŋaa akɛ, kɛ́ eba lɛ nakai lɛ, amɛjo foi kɛshi Yerusalem oya nɔŋŋ.​—Luka 21:20-24.

² Afii 28 eho kɛjɛ be ni Yesu gba nakai gbalɛ lɛ. Ni Kristofoi ni yɔɔ Israel lɛ etee nɔ amɛhiɛ amɛhemɔkɛyeli lɛ mli yɛ kai srɔtoi babaoo ni amɛkɛkpe kɛ amɛyi ni awa waa lɛ fɛɛ sɛɛ. (Hebribii 10:32-34) Shi, kaa ni kã amɛhiɛ lɛ mli wa kwraa fe kai srɔtoi fɛɛ ni amɛkɛkpe pɛŋ, ni ehe bahia ni Paulo asaa amɛ jogbaŋŋ koni amɛnyɛ amɛkpee naa. (Mateo 24:20, 21; Hebribii 12:4) Nɔ ni baaye abua amɛ ni amɛbo Yesu famɔ akɛ amɛjo foi kɛshi Yerusalem lɛ toi ji, shifimɔ kɛ hemɔkɛyeli ni mli wa. Ni ja amɛbo nakai famɔ lɛ toi dani amɛyi baaná wala.  (Kanemɔ Hebribii 10:36-39.) No hewɔ lɛ, Yehowa mumɔ lɛ tsirɛ Paulo ni eŋma wolo eyahã nyɛmimɛi ni yɔɔ jɛmɛ lɛ. Nakai wolo lɛ ji nɔ ni amrɔ nɛɛ wɔtsɛɔ lɛ Hebribii awolo lɛ, ni aŋma ní akɛwaje nyɛmimɛi lɛ koni amɛnyɛ amɛkpee kaa ni kã amɛhiɛ lɛ naa.

3. Mɛni hewɔ esa akɛ saji ni yɔɔ Hebribii awolo lɛ mli lɛ he ahia wɔ?

³ Esa akɛ saji ni yɔɔ Hebribii awolo lɛ mli lɛ he ahia wɔ. Mɛni hewɔ? Ejaakɛ shihilɛ ni wɔyɔɔ mli ŋmɛnɛ lɛ tamɔ shihilɛ ni Kristofoi ni yɔɔ Yudea lɛ yaje mli lɛ. Wɔyɛ “bei krɛdɛɛ ní jaraa” amli, ni Kristofoi anɔkwafoi babaoo kɛ kai srɔtoi ni naa wala miikpe loo aawa amɛyi po. (2 Timoteo 3:1, 12) Shi wɔteŋ mɛi babaoo hu yɛ toiŋjɔlɛ, ni mɔ ko mɔ ko waaa wɔyi. No hewɔ lɛ, esa akɛ wɔhã wɔhiɛ ahi wɔhe nɔ, tamɔ bɔ ni ehe bahia ni Kristofoi ni hi shi yɛ Paulo beiaŋ lɛ afee lɛ. Mɛni hewɔ? Ejaakɛ etsɛŋ kwraa, wɔkɛ kaa ni mli wa fe kai fɛɛ ni wɔkɛkpe pɛŋ lɛ baakpe!​—Kanemɔ Luka 21:34-36.

4. Mɛni ji afi 2016 afi ŋmalɛ lɛ? Ni mɛni hewɔ eji ŋmalɛ ko ni sa jogbaŋŋ lɛ?

⁴ Mɛni baaye abua wɔ ni wɔnyɛ wɔkpee kaa ni kã wɔhiɛ lɛ naa? Paulo wie nibii srɔtoi ni baanyɛ aye abua wɔ ni wɔhemɔkɛyeli lɛ mli awa lɛ ahe yɛ Hebribii awolo lɛ mli. Nɔ kome ni he hiaa waa ni ewie lɛ jeɔ kpo yɛ Hebribii 13:1. Ekɛɔ akɛ: “Nyɛyaa nɔ nyɛhiɛa nyɛnyɛmimɛi asuɔmɔ lɛ mli.” Ahala ŋmalɛ nɛɛ akɛ afi 2016 afi ŋmalɛ.

5. Mɛni ji nyɛmimɛi asuɔmɔ?

⁵ Mɛni ji nyɛmimɛi asuɔmɔ? No ji suɔmɔ ni mli wa ni yɔɔ wekumɛi loo nanemɛi ni bɛŋkɛ kpaakpa lɛ ateŋ. (Yohane 11:36) Hela wiemɔ ni Paulo kɛtsu nii lɛ shishitsɔɔmɔ ŋmiiŋmi ji, “hedɔɔ kɛhã nyɛmi.” Wiemɔ “nyɛmi nuu” loo “nyɛmi yoo” ni wɔkɛtsɛɔ wɔhe lɛ, jeee sablã. Nyɛmimɛi diɛŋtsɛ ji wɔ. (Mateo 23:8) Paulo wie akɛ: “Nyɛdɔdɔa nyɛhe waa yɛ nyɛmimɛi asuɔmɔ mli. Mɔ fɛɛ mɔ atsɔ hiɛ ekɛ woo ahã enaanyo.” (Romabii 12:10) Nɔ ni ewie lɛ hãa wɔnaa akɛ, esa akɛ wɔdɔ wɔnyɛmimɛi lɛ ahe waa. Nyɛmimɛi asuɔmɔ nɛɛ, kɛ suɔmɔ ni damɔ Biblia shishitoo mlai anɔ lɛ, ji nɔ ni yeɔ ebuaa Nyɔŋmɔ webii ni amɛkɛ amɛhe bɔɔ naanyo gbagbalii ni amɛfeɔ ekome lɛ.

6. Namɛi wɔtsɛɔ akɛ wɔnyɛmimɛi? Ni mɛni hewɔ?

⁶ He titri ni anaa wiemɔ ni ji “nyɛmimɛi asuɔmɔ” lɛ yɛ ji, yɛ Kristofoi awoji amli. Yɛ blema lɛ, Yudafoi kɛ gbɛ́i ni ji “nyɛmi” lɛ tsuɔ nii amɛhãa amɛwekumɛi, ni bei komɛi lɛ, amɛnyɛɔ amɛtsɛɔ mɛi ni jeee amɛwekumɛi hu nakai. Shi amɛkɛtsuuu nii kɔkɔɔkɔ amɛhãaa mɛi ni jeee Yudafoi. Jeee nakai eji yɛ wɔteŋ. Wɔ lɛ, wɔtsɛɔ mɛi fɛɛ ni ji anɔkwa Kristofoi lɛ wɔnyɛmimɛi, ekɔɔɔ he eko maŋ nɔ ni amɛjɛ. (Romabii 10:12) Yehowa etsɔɔ wɔ nii, no hewɔ lɛ, wɔsumɔɔ wɔhe, tamɔ bɔ ni nyɛmimɛi sumɔɔ amɛhe lɛ. (1 Tesalonikabii 4:9) Shi mɛni hewɔ ehe miihia ni wɔya nɔ wɔjie nyɛmimɛi asuɔmɔ kpo lɛ?

7. (a) Mɛni ji yiŋtoo ni he hiaa fe fɛɛ hewɔ ni esa akɛ wɔjie nyɛmimɛi asuɔmɔ kpo? (b) Tsɔɔmɔ nɔ kroko hewɔ ni ehe miihia ni wɔhã suɔmɔ ni wɔyɔɔ kɛhã wɔnyɛmimɛi lɛ mli awa.

⁷ Yiŋtoo ni he hiaa fe fɛɛ hewɔ ni esa akɛ wɔjie nyɛmimɛi asuɔmɔ kpo ji akɛ, Yehowa kɛɛ wɔjie lɛ kpo. Kɛ́ wɔŋmɔ wɔyiŋ kpɔ akɛ wɔsumɔŋ wɔnyɛmimɛi lɛ, no lɛ, wɔnyɛŋ wɔsumɔ Yehowa. (1 Yohane 4:7, 20, 21) Nɔ kroko hu ji akɛ, wɔnyɛmimɛi lɛ ayelikɛbuamɔ he miihia wɔ, ni wɔ hu wɔyelikɛbuamɔ  he miihia amɛ, titri lɛ, yɛ jaramɔ bei amli. Be ni Paulo ŋmaa wolo lɛ eyahã Kristofoi ni yɔɔ Yudea lɛ, no mli lɛ, ele akɛ etsɛŋ, ehe baahia ni amɛteŋ mɛi komɛi ashi amɛshĩai kɛ amɛnibii yɛ sɛɛ. Yesu etsɔ hiɛ ewie akɛ, shihilɛ lɛ mli baawa waa yɛ nakai beiaŋ. (Marko 13:14-18; Luka 21:21-23) No hewɔ lɛ, ehe bahia ni nyɛmimɛi lɛ ahã suɔmɔ ni amɛyɔɔ kɛhã amɛhe lɛ mli awa waa dani nakai be lɛ ashɛ.​—Romabii 12:9.

8. Mɛni esa akɛ wɔfee amrɔ nɛɛ dani amanehulu kpeteŋkpele lɛ aba?

⁸ Etsɛŋ, amanehulu ni fe amanehului fɛɛ ni eba shikpɔŋ lɛ nɔ pɛŋ lɛ baaba. (Marko 13:19; Kpojiemɔ 7:1-3) Ni ehe baahia ni wɔbo ŋaawoo ni nyiɛ sɛɛ nɛɛ toi, akɛ: “Yaa, mimaŋ, ní oyabote opia lɛ mli, ní oŋa oshinaa lɛ owo oyi; teemɔ ohe hiŋmɛitswaaoo ko kɛyashi beyinɔ ní mlifu lɛ aaaho!” (Yesaia 26:20) Eeenyɛ efee akɛ, ‘pia’ ni atsĩ tã yɛ ŋmalɛ nɛɛ mli lɛ damɔ shi kɛhã wɔsafoi srɔtoi lɛ. Wɔsafoi lɛ amli wɔkɛ wɔnyɛmimɛi lɛ kpeɔ yɛ ni wɔjáa Yehowa. Shi yɛ kpeei ni wɔbaaya be fɛɛ be lɛ sɛɛ lɛ, nɔ kroko hu yɛ ni esa akɛ wɔfee. Paulo kai Kristofoi ni yɔɔ Yudea akɛ, esa akɛ amɛwowoo amɛhe hewalɛ koni amɛjie suɔmɔ kpo ni amɛfee amɛnyɛmimɛi ejurɔ. (Hebribii 10:24, 25) Amrɔ nɛɛ ji be ni esa akɛ wɔhã wɔnyɛmimɛi asuɔmɔ lɛ mli awa, ejaakɛ wɔsɛɛ lɛ, no baaye abua wɔ ni wɔnyɛ wɔkpee kai fɛɛ ni baaba wɔnɔ lɛ anaa.

9. (a) Mɛɛ shihilɛi hãa wɔnáa hegbɛ kɛjieɔ nyɛmimɛi asuɔmɔ kpo? (b) Okɛ nɔkwɛmɔnii ahã kɛtsɔɔ bɔ ni Yehowa webii jieɔ nyɛmimɛi asuɔmɔ kpo.

⁹ Amanehulu kpeteŋkpele lɛ bako moŋ nɛ, shi shihilɛi pii yɛ ŋmɛnɛ ní hãa wɔnáa hegbɛ akɛ wɔbaajie nyɛmimɛi asuɔmɔ kpo. Shikpɔŋhosomɔi, nu afuai, lasuogbelei, tsunami, kɛ adebɔɔ naa osharai krokomɛi hãa wɔnyɛmimɛi lɛ ateŋ mɛi babaoo naa nɔ. Aawa wɔnyɛmimɛi lɛ ekomɛi hu ayi. (Mateo 24:6-9) Kɛfata he lɛ, juu kɛ fɔ̃ ehe shi yɛ je lɛ mli, ni enɛ hewɔ lɛ, wɔnyɛmimɛi lɛ babaoo kɛ shika he naagbai kpeɔ daa gbi. (Kpojiemɔ 6:5, 6) Naagbai nɛɛ ni wɔnyɛmimɛi lɛ kɛkpeɔ lɛ hãa wɔnáa hegbɛi babaoo ni wɔkɛbaajie suɔmɔ krɔŋŋ kpo wɔtsɔɔ amɛ. Eyɛ mli akɛ suɔmɔ etã yɛ je lɛ mli moŋ, shi esa akɛ wɔya nɔ wɔjie nyɛmimɛi asuɔmɔ kpo. (Mateo 24:12) [1]​—Kwɛmɔ shishigbɛ niŋmaa ni yɔɔ sane lɛ naagbee lɛ.

10. Mɛni he wɔbaasusu amrɔ nɛɛ?

¹⁰ Mɛni baaye abua wɔ ni wɔya nɔ wɔhiɛ wɔnyɛmimɛi asuɔmɔ lɛ mli yɛ naagbai ni wɔkɛkpeɔ lɛ fɛɛ sɛɛ? Mɛni wɔbaanyɛ wɔfee kɛtsɔɔ akɛ wɔsumɔɔ wɔnyɛmimɛi lɛ ni wɔdɔɔ amɛhe? Be ni bɔfo Paulo wie akɛ “nyɛyaa nɔ nyɛhiɛa nyɛnyɛmimɛi asuɔmɔ lɛ mli” lɛ sɛɛ lɛ, etsĩ nibii pii ni Kristofoi baanyɛ afee kɛtsɔɔ akɛ amɛmiibo ŋaawoo nɛɛ toi lɛ atã. Nyɛhãa wɔsusua amɛmli ekpaa he.

11, 12. Mɛni ji gbɔfeemɔ? (Kwɛmɔ mfoniri ni yɔɔ nikasemɔ lɛ shishijee lɛ.)

 ¹¹ “Nyɛhiɛ akakpaa gbɔfeemɔ nɔ.” (Kanemɔ Hebribii 13:2.) Wiemɔ ni bɔfo Paulo kɛtsu nii ní atsɔɔ shishi akɛ “gbɔfeemɔ” lɛ shishitsɔɔmɔ ŋmiiŋmi ji, “mlihilɛ kpo ní ajieɔ atsɔɔ gbɔi” loo mɛi ni aleee. Abraham kɛ Lot fee enɛ he nɔkwɛmɔnɔ. Amɛjie mlihilɛ kpo amɛtsɔɔ mɛi kpɔ̃ji. Sɛɛ mli lɛ, amɛná amɛle akɛ, mɛi ni amɛfee amɛ gbɔ lɛ ji ŋwɛibɔfoi. (1 Mose 18:2-5; 19:1-3) Amɛnɔkwɛmɔnɔ kpakpa lɛ wo Kristofoi ni yɔɔ Yudea lɛ hewalɛ ní amɛfee mɛi gbɔ kɛtsɔɔ akɛ amɛyɛ nyɛmimɛi asuɔmɔ.

¹² Mɛni ji gbɛi komɛi ni wɔbaanyɛ wɔtsɔ nɔ wɔfee wɔnyɛmimɛi lɛ gbɔ? Wɔbaanyɛ wɔfɔ̃ amɛ nine kɛba wɔshĩai amli koni wɔkɛ amɛ aye nii ni wɔwowoo wɔhe hewalɛ. Eeenyɛ efee akɛ wɔleee wɔkpokpaa nɔkwɛlɔ lɛ kɛ eŋa lɛ jogbaŋŋ, kɛ̃lɛ, kɛ́ amɛbasara wɔsafo lɛ, wɔbaanyɛ wɔfɔ̃ amɛ nine kɛba wɔshĩai amli. (3 Yohane 5-8) Ehe ehiaaa ni wɔfite shika babaoo loo wɔhoo niyenii pii. Oti hewɔ ni wɔfɔ̃ɔ wɔnyɛmimɛi lɛ nine ji, ni wɔwowoo wɔhe hewalɛ, shi jeee ni wɔtsɔɔ amɛ akɛ wɔyɛ shika babaoo. Ni esaaa akɛ wɔfɔ̃ɔ mɛi ni baanyɛ ato wɔ najiaŋ lɛ pɛ nine. (Luka 10:42; 14:12-14) Eyɛ mli akɛ wɔbɛ dekã kwraa moŋ, shi esaaa akɛ wɔhiɛ kpaa gbɔfeemɔ nɔ!

13, 14. Mɛni wɔbaanyɛ wɔfee kɛtsɔɔ akɛ ‘wɔkaiɔ mɛi ni awo amɛ tsuŋ lɛ’?

¹³ “Nyɛkaia mɛi ni awo amɛ tsuŋ lɛ.” (Kanemɔ Hebribii 13:3.) Mɛi ni Paulo wieɔ amɛhe yɛ biɛ lɛ ji mɛi ni awo amɛ tsuŋ yɛ amɛhemɔkɛyeli lɛ hewɔ. Paulo jie asafo lɛ yi, ejaakɛ ‘amɛmusuŋ shã amɛ’ yɛ nyɛmimɛi ni eyaje nakai shihilɛ lɛ mli lɛ ahewɔ. (Hebribii 10:34) Be ko be ni awo Paulo tsuŋ afii ejwɛ lɛ, nyɛmimɛi komɛi ye amɛbua lɛ. Shi nyɛmimɛi ni yɔɔ Yudea lɛ nyɛɛɛ aba eŋɔɔ ní amɛbaye amɛbua lɛ, ejaakɛ amɛkɛ lɛ teŋ jekɛ. No hewɔ lɛ, mɛni Paulo wo amɛ hewalɛ ni amɛfee? Ewo amɛ hewalɛ ni amɛya nɔ amɛsɔle waa amɛhã lɛ.​—Filipibii 1:12-14; Hebribii 13:18, 19.

¹⁴ Ŋmɛnɛ lɛ, awo Odasefoi pii tsuŋ yɛ amɛhemɔkɛyeli lɛ hewɔ. Nyɛmimɛi ni bɛŋkɛ hei ni awo Odasefoi nɛɛ tsuŋ yɛ lɛ baanyɛ aye abua amɛ yɛ gbɛi srɔtoi anɔ. Shi wɔteŋ mɛi babaoo bɛŋkɛɛɛ amɛ. No hewɔ lɛ, mɛni wɔbaanyɛ wɔfee kɛye wɔbua amɛ ni wɔkɛtsɔɔ akɛ wɔhiɛ kpako amɛnɔ? Esa akɛ nyɛmimɛi asuɔmɔ atsirɛ wɔ ni wɔsɔle waa wɔhã amɛ. Akɛ nɔkwɛmɔnɔ lɛ, awo wɔnyɛmimɛi hii, yei, kɛ gbekɛbii po tsuŋ yɛ Eritrea. Wɔbaanyɛ wɔsɔle wɔhã amɛ. Nyɛmimɛi nɛɛ ateŋ mɛi etɛ ehi tsuŋwoo mli nɔ ni fe afii 20. Amɛgbɛ́i ji, Paulos Eyassu, Isaac Mogos, kɛ Negede Teklemariam.

15. Mɛɛ nibii kɛ́ wɔfee lɛ ebaanyɛ etsɔɔ akɛ wɔbuuu wɔgbãla lɛ?

¹⁵ “Awo gbalashihilɛ hiɛ nyam yɛ mɛi fɛɛ ateŋ.” (Kanemɔ Hebribii 13:4.) Gbɛ kroko ni wɔbaanyɛ wɔtsɔ nɔ wɔjie nyɛmimɛi asuɔmɔ kpo ji, ni wɔbaatsi wɔhe kɛje jeŋba sha he. (1 Timoteo 5:1, 2) Akɛ nɔkwɛmɔnɔ lɛ, kɛ́ wɔkɛ nyɛmi ko yabɔ ajwamaŋ lɛ, wɔye lɛ kɛ eweku lɛ fɛɛ awui, ni ebaanyɛ efite wekukpaa ni yɔɔ wɔ kɛ nyɛmimɛi  krokomɛi ateŋ lɛ hu. (1 Tesalonikabii 4:3-8) Agbɛnɛ hu, susumɔ bɔ ni nyɛmi yoo ko baanu he ehã kɛji ená ele akɛ ewu lɛ kwɛɔ ponografi. Kɛ́ nyɛmi nuu ko fee nakai lɛ, ani no etsɔŋ akɛ esumɔɔɔ eŋa lɛ ni ebuuu gbalashihilɛ gbɛjianɔtoo lɛ?​—Mateo 5:28.

16. Kɛ́ wɔmii shɛɔ nii ni wɔyɔɔ ahe lɛ, mɛɛ gbɛ nɔ no baaye abua wɔ ni wɔjie nyɛmimɛi asuɔmɔ kpo?

¹⁶ “Nyɛmii ashɛa nibii ni yɔɔ amrɔ nɛɛ he.” (Kanemɔ Hebribii 13:5.) Kɛ́ wɔkɛ wɔhiɛ fɔ̃ Yehowa nɔ akɛ ebaaye ebua wɔ lɛ, wɔmii baashɛ nii ni wɔyɔɔ lɛ ahe, ni no baaye abua wɔ ni wɔjie nyɛmimɛi asuɔmɔ kpo. Mɛni hewɔ wɔkɛɔ nakai? Kɛ́ wɔmii shɛɔ nii ni wɔyɔɔ ahe lɛ, wɔhiɛ kpaŋ nɔ kɔkɔɔkɔ akɛ wɔnyɛmimɛi Kristofoi lɛ ahe miihia kwraa fe shika kɛ heloonaa nibii. (1 Timoteo 6:6-8) Wɔwieŋ wɔshiŋ wɔnyɛmimɛi lɛ, ni asaŋ wɔgbigbiliŋ wɔmli yɛ nibii ahe. Wɔyeŋ mɛi ahe awuŋa, ni wɔhiɛ ekɔŋ amɛnibii anɔ. Moŋ lɛ, wɔbaaya nɔ wɔfee mɛi ejurɔ.​—1 Timoteo 6:17-19.

17. Kɛ́ wɔná “ekãa babaoo” lɛ, mɛɛ gbɛ nɔ ebaaye ebua wɔ ni wɔjie nyɛmimɛi asuɔmɔ kpo?

¹⁷ Ná “ekãa babaoo.” (Kanemɔ Hebribii 13:6.) Kɛ́ wɔkɛ wɔhiɛ fɔ̃ Yehowa nɔ lɛ, ebaaduro wɔ ekãa babaoo koni wɔnyɛ wɔdamɔ kai ni naa wala anaa. Ekãa nɛɛ ji nɔ ni baaye abua wɔ ni wɔnijiaŋ akaje wui. Ni kɛ́ wɔnijiaŋ ejeee wui lɛ, wɔbaanyɛ wɔwo wɔnyɛmimɛi lɛ hewalɛ ni wɔshɛje amɛmii kɛtsɔɔ akɛ wɔyɛ nyɛmimɛi asuɔmɔ. (1 Tesalonikabii 5:14, 15) Kɛ́ amanehulu kpeteŋkpele lɛ fɛ lɛ, ehe baahia ni wɔkai akɛ wɔkpɔmɔ lɛ miibɛŋkɛ, ejaakɛ no baaye abua wɔ ni wɔfee ekãa ni wɔkashe gbeyei.​—Luka 21:25-28.

18. Mɛni kɛ́ wɔfee lɛ ebaahã nyɛmimɛi asuɔmɔ ni wɔyɔɔ kɛhã asafoŋ onukpai lɛ mli awa?

 ¹⁸ “Nyɛkaia mɛi ni nyiɛɔ hiɛ yɛ nyɛteŋ” lɛ. (Kanemɔ Hebribii 13:7, 17.) Asafoŋ onukpai lɛ kɛ be ni amɛbaanyɛ amɛkɛfee nɔ ko amɛhã amɛ diɛŋtsɛ amɛhe lɛ shãa afɔle yɛ wɔhewɔ. Kɛ́ wɔsusu nibii abɔ ni amɛfeɔ amɛhãa wɔ lɛ ahe lɛ, suɔmɔ ni wɔyɔɔ kɛhã amɛ lɛ mli baawa, ni wɔhiɛ baasɔ amɛ waa. Wɔsumɔŋ ni wɔfee nɔ ko ni baafite amɛmiishɛɛ loo ehã amɛnijiaŋ aje wui kɔkɔɔkɔ. No hewɔ lɛ, wɔbaajɛ wɔtsuiŋ wɔbo amɛ toi. Kɛ́ wɔfee nakai lɛ, no baatsɔɔ akɛ ‘wɔhiɛ sɔɔ amɛ naakpa diɛŋtsɛ yɛ suɔmɔ mli, yɛ nitsumɔ ní amɛtsuɔ lɛ hewɔ.’​—1 Tesalonikabii 5:13.

19, 20. Mɛni baaye abua wɔ ni wɔteke nɔ yɛ bɔ ni wɔjieɔ nyɛmimɛi asuɔmɔ kpo wɔhãa lɛ mli?

¹⁹ Taakɛ eji kɛjɛ Paulo beiaŋ tɔ̃ɔ lɛ, nɔ kome ni kadiɔ Yehowa webii ji, nyɛmimɛi asuɔmɔ ni amɛyɔɔ kɛhã amɛhe lɛ. Shi Paulo wo enyɛmimɛi Kristofoi lɛ hewalɛ ni ‘amɛya nɔ amɛsumɔ amɛhe ni eteke nɔ fe tsutsu lɛ.’ (1 Tesalonikabii 4:9, 10) Ni tsɔɔ akɛ, wɔbaanyɛ wɔya wɔhiɛ be fɛɛ be yɛ bɔ ni wɔjieɔ suɔmɔ kpo wɔhãa lɛ mli.

²⁰ No hewɔ lɛ, be fɛɛ be ni wɔbaakwɛ afi nɛɛ afi ŋmalɛ lɛ, nyɛhãa wɔbia wɔhe akɛ: Mɛɛ gbɛ nɔ manyɛ maya mihiɛ yɛ bɔ ni mifeɔ mɛi gbɔ lɛ mli? Mɛni manyɛ mafee kɛye abua nyɛmimɛi ni awo amɛ tsuŋ lɛ? Ani mijieɔ bulɛ kpo kɛhã gbɛjianɔ ni Nyɔŋmɔ eto kɛhã gbalashihilɛ lɛ? Mɛni baaye abua mi ni mimii ashɛ nii ni miyɔɔ lɛ ahe? Mɛni manyɛ mafee kɛtsɔɔ akɛ mikɛ mihiɛ fɔ̃ɔ Yehowa nɔ yɛ nii fɛɛ mli? Mɛni manyɛ mafee kɛtsɔɔ akɛ miboɔ mɛi ni nyiɛɔ hiɛ lɛ atoi? Kɛ́ wɔtee wɔhiɛ yɛ nibii ekpaa ni wɔsusu he nɛɛ amli lɛ, afi nɛɛ afi ŋmalɛ lɛ he baaba sɛɛnamɔ kɛhã wɔ; ebaakai wɔ ni wɔbo ŋaa ni Paulo wo lɛ toi akɛ: “Nyɛyaa nɔ nyɛhiɛa nyɛnyɛmimɛi asuɔmɔ lɛ mli.”​—Hebribii 13:1.