1. Mɛni ji nɔ kome ni hãa esoroɔ adesai yɛ kooloi ahe?

YEHOWA edro adesai nɔ ko ni hãa esoroɔ wɔ kwraa yɛ kooloi ahe, ni no ji henilee. Kɛjɛ Adam kɛ Hawa yinɔ tɔ̃ɔ ni ekɛ nikeenii nɛɛ dro wɔ. Te wɔfeɔ tɛŋŋ wɔleɔ enɛ? Kɛ́ obaakai lɛ, be ni Adam kɛ Hawa gbo Yehowa nɔ toi lɛ, amɛyatee amɛhe, ejaakɛ no mli lɛ amɛhenilee miiyi amɛ.

2. Mɛɛ gbɛ nɔ wɔhenilee tamɔ kudɔɔ? (Kwɛmɔ mfoniri ni yɔɔ nikasemɔ lɛ shishijee lɛ.)

² Henilee ji henumɔ ko ni hãa wɔnaa nɔ ni ji ekpakpa kɛ nɔ ni ji efɔŋ. Henumɔ nɛɛ yeɔ ebuaa wɔ ni wɔkpɛɔ yiŋ yɛ saji ahe. Abaanyɛ akɛ mɔ ko ni tsɔseko ehenilee jogbaŋŋ lɛ ato meele ko ni ekudɔɔ (steer) tsuuu nii jogbaŋŋ lɛ he. Enɛ yɛ oshara waa, ejaakɛ kɔɔyɔɔ lɛ kɛ ŋshɔkei lɛ baanyɛ ahã meele lɛ adu gbɛ. Shi kɛ́ kudɔɔ lɛ miitsu nii jogbaŋŋ lɛ, meelekudɔlɔ lɛ baanyɛ akudɔ meele lɛ kɛya he ni eyaa lɛ shweshweeshwe. Nakai nɔŋŋ ehe miihia ni wɔ hu wɔtsɔse wɔhenilee jogbaŋŋ; ja wɔfee nakai dani wɔbaanyɛ wɔkpɛ yiŋ kpakpai yɛ shihilɛ mli.

3. Kɛ́ wɔtsɔseee wɔhenilee jogbaŋŋ lɛ, mɛni baanyɛ ajɛ mli kɛba?

 ³ Kɛ́ wɔtsɔseee wɔhenilee jogbaŋŋ lɛ, kɛji wɔyaafee efɔŋ lɛ, ebɔŋ wɔ kɔkɔ. (1 Tim. 4:1, 2) Ebaahã wɔna “efɔŋ akɛ ekpakpa.” (Yes. 5:20) Yesu bɔ esɛɛnyiɛlɔi lɛ kɔkɔ akɛ: “Ŋmɛlɛtswaa lɛ miiba, be mli ni mɔ fɛɛ mɔ ni gbeɔ nyɛ lɛ baasusu akɛ ekɛ sɔɔmɔ krɔŋŋ ko miihã Nyɔŋmɔ.” (Yoh. 16:2) Nakai ji bɔ ni mɛi ni gbe Yesu kaselɔ Stefano lɛ nu he. (Bɔf. 6:8, 12; 7:54-60) Kɛjɛ blema beebe lɛ, mɛi pii ni kɛɛ Nyɔŋmɔjalɔi ji amɛ lɛ gbeɔ mɛi ni amɛfeɔ nibii gbohii krokomɛi yɛ Nyɔŋmɔ gbɛ́i mli. Shi yɛ anɔkwale mli lɛ, nibii ni amɛfeɔ lɛ teɔ shi ewoɔ Nyɔŋmɔ mlai lɛ! (2 Mo. 20:13) Amɛhenilee hãa amɛduɔ gbɛ kwraa!

4. Te wɔbaafee tɛŋŋ wɔhã wɔhenilee atsu nii jogbaŋŋ be fɛɛ be?

⁴ No hewɔ lɛ, te wɔbaafee tɛŋŋ wɔhã wɔhenilee atsu nii jogbaŋŋ be fɛɛ be? Mlai kɛ shishitoo mlai ni yɔɔ Nyɔŋmɔ Wiemɔ lɛ mli lɛ ‘ahe yɛ sɛɛnamɔ kɛhã nitsɔɔmɔ, kɛhã mɔjajemɔ, kɛhã nibii ajajemɔ, kɛhã tsɔsemɔ yɛ jalɛ mli.’ (2 Tim. 3:16) Kɛ́ wɔkase Biblia lɛ jogbaŋŋ, wɔjwɛŋ nibii ni wɔkaseɔ lɛ anɔ, ni wɔkɛtsu nii yɛ wɔshihilɛ mli lɛ, fiofio lɛ, wɔbaana Nyɔŋmɔ susumɔ yɛ saji ahe, ni no baahã wɔná henilee kpakpa ni wɔkpɛ yiŋ kpakpai. Nyɛhãa wɔkwɛa bɔ ni wɔɔfee wɔkɛ Yehowa mlai kɛ eshishitoo mlai lɛ atsɔse wɔhenilee.

5, 6. Kɛ́ wɔye Nyɔŋmɔ mlai lɛ anɔ lɛ, mɛɛ gbɛ nɔ wɔnáa he sɛɛ?

⁵ Kɛ́ wɔmiitao wɔná Nyɔŋmɔ mlai lɛ ahe sɛɛ lɛ, belɛ jeee kanemɔ pɛ esa akɛ wɔkane. Moŋ lɛ, esa akɛ wɔná suɔmɔ kɛ bulɛ wɔhã mlai nɛɛ. Biblia lɛ kɛɔ akɛ: “Nyɛnyɛa nɔ fɔŋ, ní nyɛsumɔa nɔ kpakpa.” (Amos 5:15) Kɛ́ wɔtsɔse wɔhe bɔ ni baahã wɔna Yehowa susumɔ yɛ saji ahe lɛ, no baaye abua wɔ ni wɔnyɛ efɔŋ ni wɔsumɔ ekpakpa. Akɛ nɔkwɛmɔnɔ lɛ, ŋɔɔ lɛ akɛ onyɛɛɛ owɔ jogbaŋŋ ni otee helatsamɔhe koni akwɛ bo. Datrɛfonyo ni kwɛ bo lɛ tsɔɔ bo niyenii ni oye, ni ekɛɛ bo akɛ ogbɔle okpɔiaŋ, ni okpa nibii komɛi feemɔ. Be ni okɛ eŋaawoo lɛ tsu nii lɛ, onyɛ owɔ jogbaŋŋ. Te obaana ŋaa ni ewo bo lɛ ohã tɛŋŋ?

⁶ Wɔbaanyɛ wɔkɛ wɔ-Bɔlɔ lɛ ato nakai datrɛfonyo lɛ he. Lɛ hu ehã wɔ mlai ni baaye abua wɔ ni wɔtsi wɔhe kɛje nifeemɔi ni baanyɛ aye wɔ awui lɛ ahe koni wɔná miishɛɛ. Akɛ nɔkwɛmɔnɔ lɛ, Biblia lɛ kɛɔ akɛ wɔkamale, wɔkashishiu mɛi, wɔkaju, wɔkabɔ ajwamaŋ, wɔkaye mɛi awui, ni wɔkɛ mumɔi fɔji akashara. (Kanemɔ Abɛi 6:16-19; Kpo. 21:8) Kɛ́ wɔye mlai nɛɛ anɔ lɛ, wɔbaaná he sɛɛ, ni kɛ́ wɔna bɔ ni wɔná he sɛɛ wɔhã lɛ, suɔmɔ ni wɔyɔɔ kɛhã Yehowa lɛ mli baawa ni wɔhiɛ baasɔ emlai lɛ waa.

7. Mɛɛ gbɛ nɔ mɛi ahe saji ni aŋmala yɛ Biblia lɛ mli lɛ baanyɛ aye abua wɔ?

⁷ Ehe ehiaaa ni wɔku Nyɔŋmɔ mlai amli ni wɔna amane dani wɔna nɔ ni hi kɛ nɔ ni ehiii. Wɔbaanyɛ wɔkase nii kɛjɛ tɔmɔi ni mɛi tɔ̃ yɛ blema ni abɔ he amaniɛ yɛ Biblia lɛ mli lɛ amli. Abɛi 1:5 lɛ kɛɔ akɛ: “Hiɛshikalɔ boɔ toi, ni no hãa ekaseɔ nii kɛfataa enilee he.” Nyɔŋmɔ ji mɔ ni hã aŋmala saji nɛɛ ashwie shi ahã wɔ, ni kɛ́ wɔkane saji nɛɛ ni wɔjwɛŋ nɔ lɛ, wɔbaakase nibii kpakpai pii. Hã wɔkɛ nɔ ni nina Maŋtsɛ David lɛ afee enɛ he nɔkwɛmɔnɔ. David gbo Yehowa kitã nɔ toi ni ekɛ Batsheba fite gbãla. Enɛ hewɔ lɛ, David na nɔ waa. (2 Sam. 12:7-14) Kɛ́ okane David sane lɛ, obaanyɛ obi ohe saji ni nyiɛ sɛɛ nɛɛ ni okɛjwɛŋ nɔ: ‘Mɛni kulɛ esa akɛ Maŋtsɛ David afee koni ekafee  esha ni ena nɔ? Kɛ́ mikɛ kaa ni ekɛkpe lɛ eko kpe lɛ, mɛni mafee? Ani majo naa foi tamɔ bɔ ni Yosef fee lɛ, aloo mafee esha tamɔ bɔ ni David fee lɛ?’ (1 Mo. 39:11-15) Kɛ́ wɔjwɛŋ nibii gbohii ni jɛɔ esha mli kɛbaa lɛ anɔ jogbaŋŋ lɛ, ‘wɔbaanyɛ efɔŋ.’

8, 9. (a) Mɛɛ shihilɛi amli wɔhenilee baanyɛ aye abua wɔ? (b) Mɛɛ gbɛ nɔ Biblia mli shishitoo mlai yeɔ amɛbuaa wɔhenilee?

⁸ Wɔnyɛɔ nibii ni Nyɔŋmɔ nyɛɔ lɛ, ni wɔtsiɔ wɔhe kɛjeɔ amɛhe kwraa. Shi kɛ́ wɔkɛ shihilɛ ko ni awoko mla pɔtɛɛ ko yɛ he yɛ Biblia lɛ mli lɛ kpe lɛ, mɛni wɔbaafee? Te wɔbaafee tɛŋŋ wɔna nɔ ni Nyɔŋmɔ miisumɔ ni wɔfee yɛ nakai shihilɛ lɛ mli? Kɛ́ wɔkɛ Biblia lɛ tsɔse wɔhenilee lɛ, wɔbaakpɛ yiŋ kpakpa.

⁹ Yehowa sumɔɔ wɔ, ni no hewɔ lɛ, ehã wɔ shishitoo mlai ni wɔbaanyɛ wɔkɛtsɔse wɔhenilee jogbaŋŋ koni wɔkpɛ yiŋ kpakpai. Yehowa diɛŋtsɛ ewie akɛ: “Mi Yehowa, miji o-Nyɔŋmɔ lɛ, mɔ ni tsɔɔ bo nii koni oná he sɛɛ lɛ, mɔ ni tsɔɔ bo gbɛ yɛ gbɛ ni esa akɛ onyiɛ nɔ lɛ nɔ lɛ.” (Yes. 48:17, 18) Kɛ́ wɔjwɛŋ Biblia mli shishitoo mlai anɔ jogbaŋŋ ni wɔhã ebote wɔtsui mli lɛ, no baahã wɔhenilee atsu nii jogbaŋŋ, ni enɛ ji nɔ ni baaye abua wɔ ni wɔkpɛ yiŋ kpakpai.

10. Mɛni ji shishitoo mla? Ni te Yesu kɛtsu nii ehã tɛŋŋ?

¹⁰ Shishitoo mla ji anɔkwa sane ko loo tsɔɔmɔ ko ni baanyɛ aye abua wɔ ni wɔjwɛŋ nii anɔ loo wɔle nɔ ni esa akɛ wɔfee. Kɛ́ wɔkase Biblia mli shishitoo mlai lɛ, wɔbaana Yehowa susumɔ yɛ saji ahe kɛ nɔ hewɔ ni ewo mlai komɛi. Yesu kɛ shishitoo mlai tsɔse ekaselɔi lɛ koni amɛna akɛ, nɔ ni amɛduɔ lɛ, no nɔŋŋ amɛbaakpa. Akɛ nɔkwɛmɔnɔ lɛ, ehã amɛle akɛ kɛ́ amɛmli fu lɛ, no baahã amɛye mɛi awui, ni ehã amɛle hu akɛ, kɛ́ amɛhã akɔnɔ fɔŋ ná amɛnɔ hewalɛ lɛ, no baanyɛ ahã amɛfite gbãla loo amɛyabɔ ajwamaŋ. (Mat. 5:21, 22, 27, 28) Kɛ́ wɔhã Biblia mli shishitoo mlai kudɔ wɔ lɛ, wɔhenilee baatsu nii jogbaŋŋ ni wɔbaafee nibii ni baawo Nyɔŋmɔ hiɛ nyam.​—1 Kor. 10:31.

11. Ani wɔ fɛɛ wɔhenilee tsuɔ nii yɛ gbɛ kome too nɔ?

¹¹ Kristofoi enyɔ ni kɛ Biblia lɛ etsɔse amɛhenilee jogbaŋŋ lɛ baanyɛ akpɛ yiŋ srɔtoi yɛ sane ko he. Akɛ nɔkwɛmɔnɔ lɛ, amɛbaanyɛ amɛkpɛ yiŋ srɔtoi yɛ dãanumɔ he. Biblia lɛ ekɛko akɛ wɔkanu dãa, shi ebɔɔ wɔ kɔkɔ akɛ esaaa akɛ wɔnuɔ dãa babaoo loo wɔtɔɔ dãa. (Abɛi 20:1; 1 Tim. 3:8) Ani enɛ tsɔɔ akɛ dãa lɛ falɛ lɛ pɛ kɛkɛ he esa akɛ Kristofonyo ko asusu kɛ́ eekpɛ eyiŋ yɛ dãanumɔ he? Dabi kwraa. Kɛ́ ehenilee ŋmɛɔ lɛ gbɛ ni enu dãa po lɛ, esa akɛ esusu mɛi krokomɛi hu ahenilee he dã.

12. Mɛɛ gbɛ nɔ sane ni yɔɔ Romabii 14:21 lɛ baanyɛ aye abua wɔ ni wɔsusu mɛi krokomɛi ahenilee he?

¹² Nɔ ko ni Paulo ŋma lɛ hãa wɔnaa akɛ, esa akɛ wɔsusu mɛi krokomɛi ahenilee he. Eŋma akɛ: “Ehi akɛ okaye loo ko, loo okanu wain, loo okafee nɔ kroko ni baatɔ̃tɔ onyɛmi nane.” (Rom. 14:21) No hewɔ lɛ, eyɛ mli akɛ wɔyɛ hegbɛ ni wɔnuɔ dãa moŋ, shi kɛ́ wɔle akɛ nakai feemɔ baanyɛ agba wɔnyɛmi ko naa lɛ, ani wɔkɛ hegbɛ ni wɔyɔɔ nɛɛ baashã afɔle yɛ wɔnyɛmi lɛ hewɔ? Ŋwanejee ko bɛ he akɛ, wɔbaafee nakai. Wɔnyɛmimɛi lɛ ekomɛi yɛ ni dani amɛbaaba anɔkwale lɛ mli lɛ, amɛwuɔ dãa, shi bianɛ ni amɛbale anɔkwale lɛ, amɛtswa amɛfai shi akɛ amɛyaŋ dãa he kwraa. Ekã shi faŋŋ akɛ, wɔsumɔŋ ni wɔfee nɔ ko ni baahã wɔnyɛmimɛi nɛɛ ayakɔ amɛsa jeŋba lɛ ekoŋŋ ni eye amɛ awui, aloo jeee nakai? (1 Kor. 6:9, 10) No hewɔ lɛ, kɛ́ nyɛmi ko basara wɔ ni ekɛɛ wɔ  akɛ enuuu dãa lɛ, esaaa akɛ wɔnyɛɔ enɔ doo akɛ enu. Kɛ́ wɔnyɛ enɔ lɛ, no baatsɔɔ akɛ wɔsumɔɔɔ esane.

13. Mɛɛ nɔkwɛmɔnɔ kpakpa Timoteo fee ehã wɔ?

¹³ Be ni Timoteo ji oblanyo lɛ, ekpɛlɛ ni afo lɛ ketia eyɛ mli akɛ eji nɔ ko ni waa mɔ he waa. Timoteo le akɛ, kɛ́ afooo lɛ ketia lɛ, ebaanyɛ etɔ̃tɔ Yudafoi ni ebaayashiɛ ehã lɛ anane. Shi Timoteo sumɔɔɔ ni etɔ̃tɔɔ mɛi anane, tamɔ bɔ ni bɔfo Paulo hu bɔ mɔdɛŋ ni ekatɔ̃tɔ mɛi anane lɛ. (Bɔf. 16:3; 1 Kor. 9:19-23) Ani bo hu obaasumɔ ni okɛ nɔ ko ni oyɔɔ he hegbɛ lɛ ashã afɔle yɛ mɛi krokomɛi ahilɛkɛhamɔ hewɔ?

14, 15. (a) Kɛ́ akɛɛ mɔ ko eda yɛ mumɔŋ lɛ te atsɔɔ tɛŋŋ? (b) Te mɛi ni edara yɛ mumɔŋ lɛ kɛ mɛi krokomɛi yeɔ amɛhãa tɛŋŋ?

¹⁴ Esa akɛ Kristofoi fɛɛ ‘afo mli yɛ Kristo lɛ shishijee tsɔɔmɔi lɛ ahe ni amɛya amɛhiɛ kɛshɛ dalɛ he.’ (Heb. 6:1) Shi enɛ baaa kɛkɛ. Esa akɛ wɔmia wɔhiɛ loo wɔya nɔ wɔbɔ wɔhe mɔdɛŋ waa dani wɔbaanyɛ wɔdara yɛ mumɔŋ. Mɛi ni edara yɛ mumɔŋ lɛ yɛ Biblia lɛ he nilee babaoo ni amɛnuɔ Ŋmalɛ lɛ shishi jogbaŋŋ. Enɛ hewɔ awoɔ wɔ hewalɛ be fɛɛ be akɛ wɔkane Biblia lɛ fã ko daa gbi lɛ. (Lala 1:1-3) Kɛ́ wɔkane Biblia lɛ daa gbi lɛ, wɔbaanu Yehowa mlai kɛ eshishitoo mlai lɛ ashishi jogbaŋŋ.

¹⁵ Ani ole mla ni he hiaa fe fɛɛ ni esa akɛ Kristofoi aye nɔ? No ji suɔmɔ mla lɛ. Yesu kɛɛ ekaselɔi lɛ akɛ: “Kɛji nyɛsumɔɔ nyɛhe lɛ, no mɛi fɛɛ kɛbaale akɛ mikaselɔi ji nyɛ.” (Yoh. 13:35) Biblia lɛ tsɛɔ suɔmɔ akɛ “Maŋtsɛ lɛ mla lɛ,” ni Paulo wie akɛ “suɔmɔ woɔ mla lɛ obɔ.” (Yak. 2:8; Rom. 13:10) Ebɛ naakpɛɛ akɛ Biblia lɛ wieɔ suɔmɔ he waa, ejaakɛ “Nyɔŋmɔ lɛ, suɔmɔ ji lɛ.” (1 Yoh. 4:8) Nyɔŋmɔ suɔmɔ lɛ jeee henumɔ ko kɛkɛ; ejieɔ lɛ kpo yɛ enifeemɔi amli. Yohane ŋma akɛ: “Enɛ nɔ atsɔ ajie Nyɔŋmɔ suɔmɔ lɛ kpo yɛ wɔgbɛfaŋ, no ji akɛ, Nyɔŋmɔ tsu e-Bi koome lɛ kɛba je lɛ mli koni wɔtsɔ enɔ wɔná wala.” (1 Yoh. 4:9) Kɛ́ wɔtsɔ wɔnifeemɔi anɔ wɔtsɔɔ akɛ wɔsumɔɔ Yehowa, Yesu, wɔnyɛmimɛi Kristofoi lɛ, kɛ mɛi krokomɛi lɛ, no tsɔɔ akɛ wɔdara yɛ mumɔŋ.​—Mat. 22:37-39.

16. Be ni wɔdaraa yɛ mumɔŋ lɛ, mɛni hewɔ shishitoo mlai ahe bahiaa wɔ waa lɛ?

 ¹⁶ Be ni wɔdaraa yɛ mumɔŋ lɛ, wɔbayɔseɔ akɛ shishitoo mlai ahe miihia waa. Mɛni hewɔ? Ejaakɛ anyɛɔ akɛ shishitoo mlai tsuɔ nii yɛ shihilɛi srɔtoi pii amli, shi bei pii lɛ, anyɛɔ akɛ mlai tsuɔ nii yɛ shihilɛi pɔtɛi komɛi pɛ amli. Akɛ nɔkwɛmɔnɔ lɛ, gbekɛbii leee akɛ kɛ́ amɛkɛ mɛi ni baaa amɛjeŋ jogbaŋŋ bɔ naanyo lɛ, ebaaye amɛ awui. No hewɔ lɛ, fɔlɔi ni hiɛ kã shi lɛ woɔ amɛbii lɛ mlai koni amɛkɛbu amɛbii lɛ ahe. (1 Kor. 15:33) Shi be ni gbekɛbii lɛ daraa ni amɛjwɛŋmɔ mli gbeleɔ lɛ, amɛnyɛɔ amɛjwɛŋɔ Biblia mli shishitoo mlai anɔ, ni no yeɔ ebuaa amɛ ni amɛhalaa nanemɛi kpakpai. (Kanemɔ 1 Korintobii 13:11; 14:20.) Kɛ́ wɔtee nɔ wɔjwɛŋ Biblia mli shishitoo mlai anɔ lɛ, wɔhenilee baaya nɔ atsu nii jogbaŋŋ, ni no baahã wɔna Nyɔŋmɔ susumɔi yɛ saji ahe.

17. Mɛni hewɔ wɔbaanyɛ wɔkɛɛ akɛ wɔyɛ nibii ni baanyɛ aye abua wɔ ni wɔkpɛ yiŋ kpakpai?

¹⁷ Ani wɔyɛ nibii fɛɛ ni he hiaa ni baanyɛ aye abua wɔ ni wɔkpɛ yiŋ kpakpai ni baahã Yehowa aná wɔhe miishɛɛ? Hɛɛ. Mlai kɛ shishitoo mlai ni yɔɔ Biblia lɛ mli lɛ baanyɛ ahã ‘wɔfee mɛi ni sa jogbaŋŋ, ni asaa amɛ jogbaŋŋ kɛhã nitsumɔ kpakpa fɛɛ nitsumɔ kpakpa.’ (2 Tim. 3:16, 17) No hewɔ lɛ, yɛ shihilɛ fɛɛ shihilɛ ni okɛbaakpe lɛ mli lɛ, pɛimɔ nibii amli jogbaŋŋ koni ona Biblia mli shishitoo mlai ni baahã ‘oyɔse nɔ ni Yehowa miisumɔ ni ofee’ yɛ nakai shihilɛ lɛ mli. (Efe. 5:17) Obaanyɛ okɛ Watch Tower Publications Index lɛ, Niiamlitaomɔ Wolo Kɛhã Yehowa Odasefoi lɛ, Watchtower Library lɛ, Buu-Mɔɔ INTANƐT NƆ WOJIATOOHE lɛ, kɛ JW Library lɛ atsu nii kɛtao nii amli. Nibii nɛɛ baaye abua wɔ koni wɔná aŋkro nikasemɔ kɛ weku nikasemɔ he sɛɛ jogbaŋŋ.

18. Kɛ́ wɔkɛ Yehowa mlai kɛ shishitoo mlai tsu nii yɛ wɔshihilɛ mli lɛ, mɛɛ gbɛ nɔ wɔbaaná he sɛɛ?

¹⁸ Kɛ́ wɔkɛ Yehowa mlai kɛ shishitoo mlai tsu nii yɛ wɔshihilɛ mli lɛ, ehiɔ ehãa wɔ. Lala 119:97-100 lɛ kɛɔ akɛ: “Misumɔɔ omla lɛ waa diɛŋtsɛ! Mijwɛŋɔ nɔ gbi muu fɛɛ. Okitã lɛ hãa mihiɛ kãa shi fe mihenyɛlɔi lɛ, ejaakɛ eyɛ mimasɛi daa. Miyoɔ nii asɛɛ waa fe mitsɔɔlɔi lɛ fɛɛ, ejaakɛ mijwɛŋɔ okaimɔi lɛ anɔ. Minuɔ nii ashishi fe onukpai po, ejaakɛ miyeɔ ofamɔi lɛ anɔ.” Kɛ́ wɔhe be kɛjwɛŋ Nyɔŋmɔ mlai kɛ shishitoo mlai anɔ jogbaŋŋ lɛ, wɔhiɛ baakã shi waa ni wɔbaayoo nii asɛɛ. Ni kɛ́ wɔkɛ Nyɔŋmɔ mlai kɛ shishitoo mlai tsɔse wɔhenilee lɛ, wɔbaadara “kɛshɛ Kristo lɛ dalɛ lɛ he.”​—Efe. 4:13.