Yɛ afi 2012 lɛ, mɛi ni tsaa shi amɛtaoɔ blema nibii lɛ yana gbɛ́ ko ni eye afii 3,000, ni nɔ ni aŋma yɛ gbɛ́ nɛɛ he lɛ sa kadimɔ waa.

Be ni shitsalɔi lɛ yana gbɛ́ nɛɛ lɛ, no mli lɛ ejwara. Shi amɛna akɛ aŋma nɔ ko yɛ he yɛ Kanaanbii awiemɔ mli. No hewɔ lɛ, amɛbɔ mɔdɛŋ amɛtsara lɛ fɛfɛo koni amɛnyɛ amɛkane nɔ ni aŋma lɛ. Nɔ ni aŋma yɛ he lɛ ji: “Eshba’al Ben Beda’,” eshishi ji, “Eshbaal, Beda binuu.” Enɛ ji be klɛŋklɛŋ ni shitsalɔi ena gbɛ́i nɛɛ yɛ blema nɔ ko he.

Biblia lɛ hãa wɔleɔ akɛ, atsɛɔ Maŋtsɛ Saul bihii lɛ ateŋ mɔ kome hu Eshbaal. (1 Kron. 8:33; 9:39) Nilelɔ Kpanaa Yosef Garfinkel fata mɛi ni yana gbɛ́ nɛɛ ahe. Ewie akɛ: “Mɔ ni atsɛɔ lɛ Eshbaal yɛ Biblia lɛ mli lɛ hi shi yɛ Maŋtsɛ David beiaŋ, ni gbɛ́ lɛ ni wɔna lɛ hu ji gbɛ́ ni akɛtsu nii yɛ be kome too nɛɛ nɔŋŋ mli. Enɛ sa kadimɔ waa.” Mɛi komɛi kɛɛ Maŋtsɛ David beiaŋ pɛ akɛ gbɛ́i nɛɛ tsu nii yɛ. Shi kome ekoŋŋ lɛ, mɛi ni tsaa shi amɛtaoɔ blema nibii lɛ eyana nɔ ko ni yeɔ odase akɛ Biblia lɛ ja.

Yɛ 2 Samuel 2:10 lɛ, akɛ gbɛ́i Ishboshet ye gbɛ́i ni ji Eshbaal lɛ najiaŋ. Mɛni hewɔ? Niiamlitaolɔi tsɔɔ mli akɛ: “Etamɔ nɔ ni akɛ gbɛ́i Eshbaal lɛ tsuuu nii, ejaakɛ nakai gbɛ́i lɛ kai Israelbii lɛ Kanaanbii lɛ anyɔŋmɔ ni ji Baal lɛ. Kanaanbii lɛ kɛɛ nyɔŋmɔ nɛɛ ji mɔ ni hãa nugbɔ nɛɔ.” Enɛ hewɔ ajie “baal” lɛ ni akɛ “boshet” ye najiaŋ lɛ. Shi yɛ Kronika wolo lɛ mli lɛ, ashi gbɛ́i lɛ bɔ ni eyɔɔ lɛ nɔŋŋ.