1, 2. (a) Te Yehowa Odasefoi nuɔ he amɛhãa tɛŋŋ yɛ Biblia lɛ he? (b) Mɛɛ Biblia mli wolo loo woji onyaa he waa?

YEHOWA ODASEFOI sumɔɔ Biblia lɛ waa. Eshɛjeɔ wɔmii, ehãa wɔ hiɛnɔkamɔ, ni wɔbaanyɛ wɔmu wɔfɔ̃ gbɛtsɔɔmɔi ni yɔɔ mli lɛ anɔ. (Romabii 15:4) Eji “Nyɔŋmɔ wiemɔ,” jeee gbɔmɛi anɔ.​—1 Tesalonikabii 2:13.

² Ŋwanejee ko bɛ he akɛ, wɔ fɛɛ wɔyɛ Biblia mli wolo loo woji komɛi ni wɔnyaa he waa. Wɔteŋ mɛi komɛi sumɔɔ Sanekpakpai lɛ, ejaakɛ amɛhãa wɔnaa bɔ ni Yesu jie Yehowa sui ni nɔ bɛ lɛ akpo ehã. (Yohane 14:9) Mɛi komɛi hu sumɔɔ Biblia mli woji ni mli eyimɔ obɔbɔ kɛ gbalɛi lɛ. Woji nɛɛ ateŋ ekome ji Kpojiemɔ wolo lɛ, ni hãa wɔleɔ nibii ni etsɛŋ ebaaba lɛ. (Kpojiemɔ 1:1) Mɛi komɛi sumɔɔ Lala wolo lɛ kanemɔ, ejaakɛ emli wiemɔi lɛ shɛjeɔ amɛmii, ni mɛi komɛi hu nyaa Abɛi awolo lɛ kɛ ŋaawoi kpakpai ni yɔɔ mli lɛ ahe waa. No hewɔ lɛ, eyɛ faŋŋ akɛ, mɔ fɛɛ mɔ baanyɛ aná Biblia he sɛɛ.

3, 4. (a) Te wɔnuɔ he wɔhãa tɛŋŋ yɛ asafo lɛ woji lɛ ahe? (b) Mɛɛ woji kɛ nibii yɔɔ ni aje gbɛ afee ahã mɛi pɔtɛi komɛi?

³ Akɛni wɔsumɔɔ Biblia lɛ hewɔ lɛ, wɔsumɔɔ asafo lɛ woji lɛ hu. Nyɔŋmɔ Wiemɔ lɛ nɔ adamɔɔ aŋmalaa asafo lɛ woji,  broshuɔi, magazin srɔtoi lɛ, kɛ nibii krokomɛi lɛ fɛɛ. Nibii nɛɛ fɛɛ jɛ Yehowa ŋɔɔ, ni amɛyeɔ amɛbuaa wɔ koni wɔya nɔ wɔhi emasɛi ni ‘wɔhe awa yɛ hemɔkɛyeli lɛ mli.’​—Tito 2:2.

⁴ Wɔwoji, vidioi, kɛ ekrokomɛi ni fata he lɛ pii yɛ ni afee ahã Yehowa Odasefoi fɛɛ, ekɔɔɔ he eko afii abɔ ni amɛye loo shihilɛ mli ni amɛyɔɔ. Shi ekomɛi hu yɛ ni afee ahã mɛi pɔtɛi komɛi. Akɛ nɔkwɛmɔnɔ lɛ, ekomɛi yɛ ni afee ahã oblahii kɛ oblayei, ni ekomɛi hu yɛ ni afee ahã fɔlɔi. Ni saji kɛ vidioi ni yɔɔ wɔwɛbsaiti lɛ nɔ lɛ pii yɛ ni afee ahã mɛi ni jeee Yehowa Odasefoi. Nibii srɔtoi nɛɛ fɛɛ hãa wɔnaa akɛ, Yehowa miihã mɛi srɔtoi fɛɛ mumɔŋ niyenii babaoo, taakɛ ewo shi akɛ ebaafee lɛ.​—Yesaia 25:6.

5. Mɛni kɛ́ wɔfee lɛ, Yehowa náa he miishɛɛ?

⁵ Wɔteŋ mɛi pii yɛ ni wɔná kulɛ, wɔkɛ be babaoo baakase Biblia lɛ kɛ asafo lɛ woji lɛ fe bɔ ni wɔfeɔ bianɛ lɛ. Shi, akɛni be lɛ shɛɛɛ wɔnaa hewɔ lɛ, ekolɛ jeee woji lɛ eko fɛɛ eko wɔnyɛɔ wɔkaseɔ fitsofitso. Fɛɛ sɛɛ lɛ, kɛ́ wɔhe be kɛkane Biblia lɛ ni wɔkase wɔwoji lɛ, Yehowa baaná he miishɛɛ, ni no baatsɔɔ akɛ wɔkɛ wɔbe miitsu nii jogbaŋŋ. (Efesobii 5:15, 16) Shi, nɔ ko yɛ ni esa akɛ wɔkwɛ wɔhe nɔ jogbaŋŋ yɛ he. Ani ole nɔ ni ji?

6. Mɛni baanyɛ ahã nibii kpakpai ni Yehowa kɛduroɔ wɔ lɛ ekomɛi aŋmɛɛ wɔ?

⁶ Kɛ́ wɔkwɛɛɛ ni ahi lɛ, wɔbaaná jwɛŋmɔ lɛ akɛ, Biblia lɛ mli saji lɛ ekomɛi loo asafo lɛ woji lɛ ekomɛi ahe ehiaaa wɔ. Akɛ nɔkwɛmɔnɔ lɛ, ekolɛ shihilɛ ni wɔyɔɔ mli lɛ hewɔ lɛ, wɔbaasusu akɛ Biblia lɛ mli sane pɔtɛɛ ko he baŋ sɛɛnamɔ kɛhaŋ wɔ. Aloo ekolɛ, wɔfataaa mɛi ni atsɔɔ akɛ aje gbɛ afee wolo ko ahã lɛ ahe. Kɛ́ wɔshɛ Biblia lɛ fãi nɛɛ loo wɔnine shɛ woji ni tamɔ nɛkɛ anɔ lɛ, ani wɔkaneɔ? Ni kɛ́ wɔkaneɔ lɛ, te wɔkaneɔ lɛ tɛŋŋ? Ani wɔkɛ wɔhiŋmɛi tsɔɔ mli shwiaa, kɛkɛ lɛ wɔŋa naa wɔfɔ̃ shi? Kɛji nakai wɔfeɔ lɛ, belɛ, nibii kpakpai miiŋmɛɛ wɔ. No hewɔ lɛ, mɛni baaye abua wɔ koni wɔkafee nakai? Nɔ kome ni baaye abua wɔ waa ji, ni wɔbaahã ehi wɔjwɛŋmɔŋ akɛ, Biblia lɛ kɛ asafo lɛ woji lɛ fɛɛ jɛ Yehowa ŋɔɔ. Biblia lɛ kɛɔ akɛ: “Miji Yehowa, o-Nyɔŋmɔ lɛ, mɔ ni tsɔɔo nii ni hi hao.” (Yesaia 48:17) Yɛ nikasemɔ nɛɛ mli lɛ, wɔbaasusu nibii etɛ komɛi ni baaye abua wɔ ni wɔná nibii fɛɛ ni Yehowa kɛduroɔ wɔ lɛ ahe sɛɛ.

7. Kɛ́ wɔmiikane Biblia lɛ fã ko lɛ, mɛni hewɔ esa akɛ wɔhã ehi wɔjwɛŋmɔŋ akɛ nɔ ko yɛ ni wɔbaanyɛ wɔkase yɛ mli?

⁷ Kanemɔ kɛ jwɛŋmɔ lɛ akɛ, obaanyɛ okase nɔ ko yɛ mli. Eyɛ mli akɛ Biblia lɛ mli saji lɛ ekomɛi yɛ ni aŋma ahã mɔ loo mɛi pɔtɛi komɛi moŋ, shi Biblia lɛ kɛɔ akɛ, “Ŋmalɛ lɛ fɛɛ jɛ Nyɔŋmɔ mumɔ lɛŋ, ni ehe yɛ sɛɛnamɔ.” (2 Timoteo 3:16) No hewɔ lɛ, ekɔɔɔ he eko Biblia lɛ mli he ni wɔkaneɔ lɛ, esa akɛ wɔhã ehi wɔjwɛŋmɔŋ akɛ, nɔ ko yɛ ni wɔbaanyɛ wɔkase yɛ mli. Nyɛmi nuu ko wie akɛ: “Kɛ́ miikane Biblia lɛ, mibɔɔ mɔdɛŋ ni makai mihe akɛ, nibii pii yɛ ni manyɛ makase yɛ nɔ ni mikaneɔ lɛ mli.” Enɛ eye ebua lɛ ni enyɛ ena otii komɛi ni mɛi pii ni kaneɔ Biblia lɛ yɔseee. No hewɔ lɛ, dani wɔbaakane Biblia lɛ fã ko lɛ, esa akɛ wɔbi Yehowa ni eye ebua wɔ ni wɔkɛ wɔjwɛŋmɔ aya nibii ni wɔbaanyɛ wɔkase yɛ mli lɛ anɔ, ni eduro wɔ hiɛshikamɔ koni wɔnyɛ wɔnu nibii ni eesumɔ ni wɔkase lɛ ashishi jogbaŋŋ.​—Ezra 7:10; kanemɔ Yakobo 1:5.

8, 9. (a) Kɛ́ wɔkane Biblia lɛ fã ko lɛ, mɛɛ saji wɔbaanyɛ wɔbi wɔhe? (b) Mɛni taomɔ nii ni Yehowa kpaa gbɛ akɛ asafoŋ onukpai baashɛ he lɛ tsɔɔ wɔ yɛ ehe?

 ⁸ Bi ohe saji. Kɛ́ okane Biblia lɛ fã ko ogbe naa lɛ, mɛɛ fioo ni obi ohe saji ni nyiɛ sɛɛ nɛɛ: ‘Mɛni enɛ hãa mileɔ yɛ Yehowa he? Te mafee tɛŋŋ mikɛ enɛ atsu nii yɛ mishihilɛ mli? Te mafee tɛŋŋ mikɛye mabua mɛi krokomɛi?’ Kɛ́ ojwɛŋ sanebimɔi nɛɛ anɔ lɛ, obaaná Biblia lɛ fã ni okane lɛ he sɛɛ waa. Naa enɛ he nɔkwɛmɔnɔ: Biblia lɛ etsɔɔ taomɔ nii ni esa akɛ Kristofonyo ko ashɛ he dani ahala lɛ akɛ asafoŋ onukpa. (Kanemɔ 1 Timoteo 3:2-7.) Wɔteŋ mɛi babaoo jeee asafoŋ onukpai. No hewɔ lɛ, ekolɛ wɔbaasusu akɛ sane nɛɛ nyɛŋ aye abua wɔ yɛ gbɛ ko gbɛ ko nɔ. Shi, kɛ́ wɔkɛ sanebimɔi etɛ ni wɔwie he yɛ kuku nɛɛ shishijee lɛ pɛi mli lɛ, wɔbaana akɛ, wɔ fɛɛ wɔbaanyɛ wɔkase nɔ ko yɛ mli. Nyɛhãa wɔfea nakai wɔkwɛa.

⁹ “Mɛni enɛ hãa mileɔ yɛ Yehowa he?” Yehowa ji mɔ ni kɛ taomɔ nii ni esa akɛ mɔ ko ashɛ he dani ahala lɛ akɛ asafoŋ onukpa lɛ hã. Esumɔɔɔ ni ahalaa mɛi komɛi kɛkɛ ni amɛkwɛ asafo lɛ nɔ. Ni no hãa wɔnaa akɛ, asafo lɛ jara wa hã lɛ. Biblia lɛ kɛɔ akɛ, “ekɛ lɛ diɛŋtsɛ e-Bi lɛ lá” ni hé asafo lɛ. (Bɔfoi 20:28) No hewɔ lɛ, Yehowa miikpa gbɛ akɛ, asafoŋ onukpai lɛ baafee nɔkwɛmɔnɔ kpakpa amɛhã asafoŋbii lɛ, ni amɛbaabu bɔ ni amɛkwɛɔ asafo lɛ nɔ amɛhãa lɛ he akɔntaa amɛhã lɛ. Eesumɔ ni  asafoŋbii lɛ anyɛ amu afɔ̃ amɛnɔ. (Yesaia 32:1, 2) No hewɔ lɛ, taomɔ nii nɛɛ hãa wɔnaa akɛ, Yehowa susuɔ wɔhe waa diɛŋtsɛ.

10, 11. (a) Mɛɛ gbɛ nɔ wɔbaanyɛ wɔkɛ ŋmalɛ ni wieɔ taomɔ nii ni esa akɛ asafoŋ onukpai ashɛ he lɛ atsu nii yɛ wɔshihilɛ mli? (b) Mɛɛ gbɛ nɔ wɔbaanyɛ wɔkɛye wɔbua mɛi krokomɛi?

¹⁰ “Te mafee tɛŋŋ mikɛ enɛ atsu nii yɛ mishihilɛ mli?” Kɛ́ oosɔmɔ momo akɛ asafoŋ onukpa lɛ, esa akɛ okwɛ taomɔ nii nɛɛ amli ekoŋŋ yɛ be kɛ beiaŋ, koni kɛ́ otɔɔ fã fioo yɛ eko mli lɛ, ofee tsakemɔi. Kɛ́ ‘ootao otsɔ nɔkwɛlɔ lɛ,’ esa akɛ ofee bɔ fɛɛ bɔ ni obaanyɛ koni onyɛ oshɛ taomɔ nii nɛɛ ahe. (1 Timoteo 3:1) Kristofoi krokomɛi fɛɛ hu baanyɛ aná taomɔ nii nɛɛ ahe sɛɛ. Akɛ nɔkwɛmɔnɔ lɛ, Yehowa miisumɔ ni wɔ fɛɛ wɔfee mɛi ni nuɔ nii ashishi ni nyɛɔ amɛkpɛɔ yiŋ ni ja yɛ saji ahe. (Filipibii 4:5; 1 Petro 4:7) Kɛ́ asafoŋ onukpai ba amɛjeŋ jogbaŋŋ lɛ, asafoŋbii lɛ baakase amɛnɔkwɛmɔnɔ kpakpa lɛ kɛ amɛhemɔkɛyeli lɛ.​—1 Petro 5:3; Hebribii 13:7.

¹¹ “Te mafee tɛŋŋ mikɛye mabua mɛi krokomɛi?” Wɔbaanyɛ wɔkɛ ŋmalɛi ni tsɔɔ sui ni akpaa gbɛ akɛ asafoŋ onukpai baajie lɛ kpo lɛ aye abua mɛi ni wɔkɛkpeɔ yɛ shiɛmɔ nitsumɔ lɛ mli kɛ mɛi ni wɔkɛkaseɔ Biblia lɛ, koni amɛna akɛ esoro asafoŋ onukpai lɛ yɛ osɔfoi lɛ ahe. Ebaanyɛ eye ebua wɔ ni wɔkai deŋme ni asafoŋ onukpai lɛ gboɔ yɛ wɔhewɔ lɛ hu. Ni no baahã wɔbu amɛ waa. (1 Tesalonikabii 5:12) Kɛ́ wɔtee nɔ wɔbu asafoŋ onukpai lɛ, amɛbaaya nɔ amɛsɔmɔ kɛ miishɛɛ.​—Hebribii 13:17.

12, 13. (a) Mɛɛ saji nɛkɛ wɔbaanyɛ wɔkɛ dɛŋdadei ni wɔyɔɔ lɛ atao mli kɛ́ wɔmiikane Biblia lɛ? (b) Okɛ nɔkwɛmɔnɔ ahã kɛtsɔɔ nɔ hewɔ ni kɛ́ wɔle saji krokomɛi ni kɔɔ ŋmalɛ ko he lɛ, ebaanyɛ ehã wɔyɔse otii komɛi ni ekolɛ mɛi pii yɔseŋ.

¹² Taomɔ nii amli. Sanebimɔi ni nyiɛ sɛɛ nɛɛ baanyɛ aye abua wɔ kɛ́ wɔmiikase Biblia lɛ:

• Namɔ ŋma Biblia mli wolo nɛɛ?

• Nɛgbɛ aŋma yɛ ni mɛɛ be aŋma?

• Mɛɛ nibii komɛi ni he hiaa tee nɔ be ni aŋmaa wolo nɛɛ?

Sanebimɔi nɛɛ ahetoo baanyɛ aye abua wɔ ni wɔyɔse otii komɛi ni ekolɛ mɛi pii yɔseŋ.

¹³ Akɛ nɔkwɛmɔnɔ lɛ, Ezekiel 14:13, 14 lɛ kɛɔ akɛ: “Kɛ́ shikpɔŋ ko tɔ̃ ní ekɛfee esha eshi mi, ní mikpã minine mli yɛ enɔ, ní miku eboloo tso lɛ ní mihã hɔmɔ ba nɔ, ni mikpãtã gbɔmɔ kɛ kooloo hiɛ yɛ nɔ lɛ: Kɛ́ nɛkɛ hii etɛ nɛɛ, ni ji Noa, Daniel kɛ Hiob yɛ jɛi tete lɛ, amɛ diɛŋtsɛ amɛsusumai kɛkɛ amɛkɛ amɛjalɛ lɛ aaajie, Nuŋtsɔ Yehowa kɛɛ.” Kɛ́ wɔtao nii amli fioo lɛ, wɔbaana akɛ, Ezekiel ŋma sane nɛɛ aaafee afii 612 dani Kristo ba. No mli lɛ, Noa kɛ Hiob fɛɛ egboi jeeŋmɔ. Kɛ̃lɛ, Yehowa kai bɔ ni amɛye lɛ anɔkwa lɛ. Ni Daniel hu? No mli lɛ eye aaafee afii 20 pɛ. Kɛ̃lɛ, Yehowa bu lɛ eshi anɔkwafoi tamɔ Noa kɛ Hiob nɔ. Mɛni enɛ tsɔɔ wɔ yɛ Yehowa he? Etsɔɔ wɔ akɛ, Yehowa tsuji anɔkwafoi fɛɛ, ni oblahii kɛ oblayei hu fata he lɛ, ajara wa hã lɛ, ni enaa nɔ fɛɛ nɔ ni amɛfeɔ amɛhãa lɛ lɛ.​—Lala 148:12-14.

14. Mɛɛ gbɛ nɔ oblahii kɛ oblayei náa saji ni asafo lɛ ŋmalaa ehãa amɛ lɛ ahe sɛɛ? Mɛɛ gbɛ nɔ mɛi krokomɛi hu baanyɛ aná saji ni tamɔ nɛkɛ lɛ ahe sɛɛ? (Kwɛmɔ mfoniri ni yɔɔ nikasemɔ lɛ shishijee lɛ.)

¹⁴ Saji ni aŋmalaa ahãa oblahii kɛ oblayei. Wɔbana akɛ, wɔbaanyɛ wɔná saji fɛɛ ni yɔɔ Biblia lɛ mli lɛ he sɛɛ. Ni nakai nɔŋŋ wɔbaanyɛ wɔná saji fɛɛ ni asafo lɛ ŋmalaa lɛ hu he sɛɛ. Nyɛhãa wɔsusua ekomɛi ahe wɔkwɛa. Nyɛsɛɛ nɛɛ, Yehowa etsɔ esafo lɛ nɔ eŋmala saji babaoo ehã oblahii kɛ oblayei. ^[1] (Kwɛmɔ shishigbɛ niŋmaa ni yɔɔ sane lɛ naagbee lɛ.) Saji nɛɛ yeɔ ebuaa amɛ ni amɛnyɛɔ amɛdamɔɔ naagbai ni amɛkɛkpeɔ yɛ skul kɛ naagbai ni amɛkɛkpeɔ be ni amɛdaraa lɛ anaa. Shi mɛɛ gbɛ nɔ wɔ fɛɛ wɔbaanyɛ wɔná saji nɛɛ ahe sɛɛ? Kɛ́ wɔkane saji nɛɛ lɛ, wɔbaana naagbai ni oblahii kɛ oblayei kɛkpeɔ, kɛ bɔ ni wɔbaafee wɔye wɔbua amɛ ni wɔwo amɛ hewalɛ.

15. Mɛni hewɔ esa akɛ Kristofoi ni edara lɛ hu akase saji ni aŋmalaa ahãa oblahii kɛ oblayei lɛ?

¹⁵ Esa akɛ Kristofoi ni edara lɛ aba amɛhe shi ni amɛ hu amɛkane saji nɛɛ. Naagbai ni awie he yɛ saji nɛɛ amli lɛ kɔɔ Kristofoi fɛɛ ahe. Akɛ nɔkwɛmɔnɔ lɛ, esa akɛ wɔ fɛɛ wɔfã wɔhemɔkɛyeli lɛ he, wɔye wɔhe nɔ, wɔtsi wɔhe kɛje nanemɛi fɔji kɛ hiɛtserɛjiemɔi ni esaaa ahe, ni wɔnyɛ wɔfee nɔ ni ja ekɔɔɔ he eko nɔ ni wɔnanemɛi baakɛɛ. No hewɔ lɛ, eyɛ mli akɛ oblahii kɛ oblayei ji mɛi titri ni aŋmalaa saji nɛɛ ahãa moŋ, shi fɛɛ jɛ Biblia lɛ mli, ni Kristofoi fɛɛ baanyɛ aná he sɛɛ.

16. Mɛni ji nɔ kroko ni saji ni aŋmalaa ahãa oblahii kɛ oblayei lɛ yeɔ ebuaa amɛ ni amɛfee?

¹⁶ Saji ni aŋmalaa ahãa oblahii kɛ oblayei lɛ baanyɛ aye abua amɛ ni amɛfee nibii ni baahã wekukpaa ni yɔɔ amɛ kɛ Yehowa teŋ lɛ mli awa. (Kanemɔ Jajelɔ 12:1, 13.) Mɛi ni edara lɛ baanyɛ aná saji ni tamɔ nɛkɛ lɛ hu ahe sɛɛ. Akɛ nɔkwɛmɔnɔ lɛ, sane ko ni yitso ji, “Young People Ask . . . How Can I Make Bible Reading Enjoyable?” (Oblahii kɛ Oblayei Biɔ Akɛ . . . Mɛni Baaye Abua Mi ni Manya Biblia lɛ Kanemɔ He?) lɛ je kpo yɛ April 2009 Awake! lɛ mli. Sane nɛɛ tsɔɔ nibii komɛi ni baaye abua wɔ ni wɔnya Biblia lɛ kanemɔ he, ni akɛ akrabatsa ko ni abaanyɛ afo ni akɛto lɛ fata he. Ani oblahii kɛ oblayei pɛ ji mɛi ni ná sane nɛɛ he sɛɛ? Dabi. Yoo ko ni ebote gbalashihilɛ mli ni efɔ lɛ wie akɛ: “Mináko Biblia lɛ kanemɔ mlɛo pɛŋ. Shi mikɛ ŋaawoi ni akɛhã yɛ sane nɛɛ mli lɛ bɔi nitsumɔ, ni ehã mina tsakpãa ni yɔɔ Biblia mli woji lɛ ateŋ. Ehã mina akɛ, Biblia muu lɛ fɛɛ wieɔ sane kome he.” Enɛ ehã enya Biblia lɛ kanemɔ he, ni amrɔ nɛɛ, emii shɛɔ ehe waa kɛ́ be shɛ ni ebaakane Biblia lɛ.

17, 18. Kɛ́ wɔkane saji ni aŋmala ahã mɛi ni jeee Odasefoi lɛ, mɛɛ gbɛ nɔ wɔbaanyɛ wɔná he sɛɛ? Okɛ enɛ he nɔkwɛmɔnɔ ahã.

¹⁷ Saji ni aŋmalaa ahãa mɛi ni jeee Odasefoi. Abɔi Buu-Mɔɔ ni ji nikasemɔ nɔ lɛ feemɔ kɛjɛ afi 2008, ni wɔná he sɛɛ waa. Aje gbɛ afee magazin nɛɛ ahã  Yehowa Odasefoi. Shi wɔmagazin lɛ ekomɛi hu yɛ ni mɛi ni jeee Odasefoi ahewɔ afee. Ani wɔbaanyɛ wɔná nomɛi hu ahe sɛɛ? Hɛɛ. Susumɔ nɔkwɛmɔnɔ nɛɛ he okwɛ. Ŋɔɔ lɛ akɛ, mɔ ko ni ofɔ̃ lɛ nine akɛ eba Maŋtsɛyeli Asa lɛ nɔ lɛ eba, ni ehã omii eshɛ ohe waa. Be ni wielɔ lɛ hãa maŋshiɛmɔ lɛ, osusu bɔ ni mɔ ni ofɔ̃ lɛ nine lɛ baanu saji lɛ ashishi ehã, kɛ bɔ ni ebaata etsuiŋ waa ni ehã efee tsakemɔi komɛi yɛ eshihilɛ mli lɛ he. Enɛ hewɔ lɛ, sane lɛ ta bo hu otsuiŋ, ni ehã ohiɛ sɔ nakai maŋshiɛmɔ lɛ waa.

¹⁸ Nakai nɔŋŋ ebaanyɛ eba lɛ kɛji wɔkane saji ni aŋmala ahã mɛi ni jeee Odasefoi lɛ. Akɛ nɔkwɛmɔnɔ lɛ, wiemɔi ni akɛtsuɔ nii kɛ́ aagbala Biblia mli sane ko mli yɛ Buu-Mɔɔ ni ji maŋbii anɔ lɛ mli, loo yɛ jw.org lɛ nɔ lɛ, ashishinumɔ waaa. Kɛ́ wɔkane saji ni tamɔ nɛkɛ lɛ, ebaahã wɔnu Biblia mli anɔkwalei komɛi ni wɔnuɔ shishi momo lɛ ashishi jogbaŋŋ fe tsutsu lɛ po. Kɛfata he lɛ, ekolɛ wɔbaana gbɛi krokomɛi ni wɔbaanyɛ wɔtsɔ nɔ wɔgbala nibii amli wɔhã mɛi ni wɔkɛkpeɔ yɛ shiɛmɔ nitsumɔ lɛ mli lɛ. Awake! lɛ hu hãa hemɔkɛyeli ni wɔyɔɔ akɛ Mɔ ko ni bɔ nibii fɛɛ lɛ mli waa, ni eyeɔ ebuaa wɔ ni wɔnaa bɔ ni wɔbaafee wɔfã wɔhemɔkɛyeli lɛ he.​—Kanemɔ 1 Petro 3:15.

19. Mɛni wɔbaanyɛ wɔfee kɛtsɔɔ Yehowa akɛ wɔhiɛ sɔɔ nibii ni ekɛduro wɔ lɛ?

¹⁹ Eyɛ faŋŋ akɛ, Yehowa eduro wɔ ŋaawoi kɛ gbɛtsɔɔmɔi kpakpai babaoo. (Mateo 5:3) No hewɔ lɛ, nyɛhãa wɔyaa nɔ wɔkanea saji fɛɛ ni ekɛhãa wɔ lɛ, ni wɔkɛtsu nii. Kɛ́ wɔfee nakai lɛ, wɔbaaná he sɛɛ, ni no baatsɔɔ akɛ, wɔhiɛ sɔɔ nibii fɛɛ ni Yehowa kɛduro wɔ lɛ.​—Yesaia 48:17.