KƐ́ OOTAO ole bɔ ni atswa lɛ, mɛni obaafee? Kɛ́ watsi ko bɛŋkɛ bo lɛ, obaakwɛ. Ŋɔɔ lɛ akɛ be ko lɛ, onaanyo ko bi bo bɔ ni atswa. Be ni okwɛ owatsi lɛ ni ona akɛ atswa shwane 1:30. No hewɔ lɛ, te obaahã lɛ hetoo ohã tɛŋŋ?

Obaanyɛ owie lɛ yɛ gbɛi srɔtoi anɔ. Obaanyɛ okɛɛ onaanyo lɛ akɛ atswa ŋmɛlɛ kome ni eho he minitii 30. Aloo obaanyɛ okɛɛ lɛ akɛ eshwɛ minitii 30 ni abaatswa ŋmɛji enyɔ. Aloo ekolɛ obaakɛɛ lɛ akɛ atswa ŋmɛlɛ kome kɛ fã.

Nakai nɔŋŋ yɛ blema be ni aŋmaa Biblia lɛ, ayɛ gbɛi srɔtoi ni atsɔɔ nɔ atsɔɔ bɔ ni atswa. Yɛ Hebri Ŋmalɛ lɛ mli lɛ, bei komɛi lɛ, akɛ wiemɔi tamɔ “leebi,” “shwane fintiŋŋ,” “shwane,” kɛ “gbɛkɛ” tsuɔ nii kɛtsɔɔ be ni sane ko tee nɔ. (1 Mo. 8:11; 19:27; 43:16; 5 Mo. 28:29; 1 Maŋ. 18:26) Shi bei komɛi hu lɛ, akɛ wiemɔi ni hãa anaa ŋmɛlɛtswaa pɔtɛɛ nɔ ni nɔ ko tee nɔ lɛ tsuɔ nii.

Yɛ blema lɛ, mɛi pii hãa bulɔi buɔ amɛnibii ahe, titri lɛ, gbɛkɛ. Afii ohai abɔ dani abaafɔ Yesu lɛ, no mli lɛ, Israelbii lɛ ejara jenamɔ lɛ mli etɛ, ni amɛtsɛɔ eko fɛɛ eko buu be. (Lala 63:6) Akɛ nɔkwɛmɔnɔ lɛ, yɛ Kojolɔi 7:19 lɛ, atsĩ “nyɔɔŋ buu be ni ji enyɔ lɛ” tã. Shi be ni shɛɔ Yesu beiaŋ lɛ, Yudafoi lɛ ejara jenamɔ lɛ mli ejwɛ, tamɔ bɔ ni no mli lɛ Greekbii lɛ kɛ Romabii lɛ efee lɛ.

Yɛ Sanekpakpai lɛ amli lɛ, atsĩ buu bei nɛɛ atã shii abɔ. Akɛ nɔkwɛmɔnɔ lɛ, “nyɔɔŋ buu be ni ji ejwɛ lɛ nɔ” Yesu nyiɛ ŋshɔ lɛ hiɛ kɛyanina ekaselɔi lɛ yɛ amɛlɛlɛ lɛ mli lɛ. (Mat. 14:25) Agbɛnɛ hu, yɛ nɔkwɛmɔnɔ ko ni Yesu gba lɛ mli lɛ, ewie akɛ: “Eji shĩatsɛ lɛ le nyɔɔŋ lɛ mli be [loo, “nyɔɔŋ buu be,” shn.] ni julɔ lɛ baaba kulɛ, ewɔŋ, ni eŋmɛŋ gbɛ ni agbu eshĩa lɛ awo mli.”​—Mat. 24:43.

Yesu tsĩ buu bei ejwɛ lɛ fɛɛ atã be ni ekɛɛ ekaselɔi lɛ sane ni nyiɛ sɛɛ nɛɛ: “No hewɔ lɛ, nyɛyaa nɔ nyɛbua, ejaakɛ nyɛleee gbi nɔ ni shĩa lɛ nuŋtsɔ lɛ baaba, gbɛkɛ jio, nyɔɔŋteŋ jio, dani maŋkɛ jio loo leebi maŋkpa jio.” (Mar. 13:35; shn.) Klɛŋklɛŋ buu be lɛ, ni ji “gbɛkɛ” lɛ, jeɔ shishi kɛjɛɔ hulushinyɔɔ mli kɛyashi aaafee gbɛkɛ ŋmɛlɛ nɛɛhu. Buu be ni ji enyɔ lɛ, ni ji “nyɔɔŋteŋ” lɛ, jeɔ shishi kɛjɛɔ aaafee gbɛkɛ ŋmɛlɛ nɛɛhu kɛyashi nyɔɔŋteŋ. Buu be ni ji etɛ lɛ, ni ji “dani maŋkɛ” loo “wuɔgbɛɛmɔ be” lɛ, jeɔ shishi kɛjɛɔ nyɔɔŋteŋ kɛyashi maŋkɛ aaafee ŋmɛji etɛ. Eeenyɛ efee akɛ, gbi gbɛkɛ ni amɔ Yesu lɛ, buu be nɛɛ mli wuɔ lɛ gbɛɛ lɛ. (Mar. 14:72) Buu be ni ji ejwɛ lɛ, ni ji “leebi maŋkpa” lɛ, jeɔ shishi kɛjɛɔ maŋkɛ aaafee ŋmɛji etɛ kɛyashi hulushitee.

No hewɔ lɛ, eyɛ mli akɛ mɛi ni hi shi yɛ blema lɛ bɛ watsii, tamɔ bɔ ni wɔyɔɔ ŋmɛnɛ lɛ moŋ, shi no mli lɛ amɛyɛ gbɛ ni amɛtsɔɔ nɔ amɛtsɔɔ bɔ ni atswa.