BLEMA SHISHITOO MLA NI HE YƆƆ SƐƐNAMƆ LOLO
Nyɛkafea Yeyeeye
BIBLIA MLI SHISHITOO MLA: ‘Nyɛkpaa yeyeeye ni nyɛfeɔ yɛ nyɛwala he lɛ.’—Mateo 6:25.
Mɛni etsɔɔ? Yesu wie wiemɔi nɛɛ yɛ e-Gɔŋ nɔ Shiɛmɔ lɛ mli. Biblia mli wiemɔkulibii ashishitsɔɔmɔ wolo ko wie akɛ, Hela feemɔwiemɔ ni atsɔɔ shishi akɛ “feɔ yeyeeye” lɛ baanyɛ akɔ “bɔ ni mɔ ko baafee enii yɛ ohia, hɔmɔ, kɛ naagbai krokomɛi ni ekɛkpeɔ yɛ edaa gbi shihilɛ mli lɛ he lɛ he.” Bei pii lɛ, haomɔ ni wɔhaoɔ yɛ nibii ni baanyɛ aba wɔsɛɛ lɛ ahe lɛ ji nɔ ni hãa wɔfeɔ yeyeeye. Tɔmɔ bɛ he akɛ wɔbaahao wɔhe yɛ wɔheloonaa hiamɔ nii kɛ wɔsuɔlɔi ahilɛkɛhamɔ he. (Filipibii 2:20) Shi be ni Yesu kɛɛ, “nyɛkafea yeyeeye kɔkɔɔkɔ” lɛ, no mli eewo esɛɛnyiɛlɔi lɛ hewalɛ ni amɛkahao amɛhe fe nine—ni tsɔɔ gbeyei ni amɛaashe fe nine yɛ nɔ ni baaba wɔ he, ní baanyɛ afite miishɛɛ ni amɛyɔɔ ŋmɛnɛ lɛ.—Mateo 6:31, 34.
Ani ehe yɛ sɛɛnamɔ ŋmɛnɛ? Nilee yɛ mli akɛ wɔbaabo Yesu ŋaawoo lɛ toi. Mɛni hewɔ? Niiamlitaomɔ komɛi ni afee lɛ tsɔɔ akɛ, kɛ́ mɛi hao amɛhe fe nine yɛ nɔ ko he lɛ, fãji ni yɔɔ amɛgbɔmɔtso lɛ mli lɛ fɛɛ teɔ shi, ni enɛ hãa amɛnáa ‘helai komɛi, tamɔ gbɔmɔtsoŋ faji, tsui hela, kɛ fɛ̃fɛ̃.’
Yesu tsɔɔ nɔ hewɔ ni esaaa akɛ wɔfeɔ yeyeeye fe nine lɛ: Sɛɛnamɔ bɛ he. Yesu bi akɛ: “Nyɛteŋ namɔ baanyɛ ekɛ yeyeeyefeemɔ atsa ewala sɛɛkɛlɛ nɔ ninetalɔ kome?” (Mateo 6:27) Kɛ́ wɔkɛ wɔjwɛŋmɔ ma wɔnaagbai lɛ anɔ fe nine lɛ, ehaŋ wɔwala sɛɛ akɛ sɛkɛnsi kome po, asaŋ ehaŋ wɔshihilɛ lɛ ahi. Kɛfata he lɛ, bei pii lɛ bɔ ni wɔsusuɔ akɛ nibii baaya lɛ hewɔ ni wɔsheɔ gbeyei lɛ, eyabaaa lɛ nakai. Nilelɔ ko wie akɛ: “Sɛɛnamɔ bɛ he akɛ wɔbaahao wɔhe yɛ wɔsɛɛ he, ni agbɛnɛ hu lɛ, bei pii lɛ bɔ ni wɔsusuɔ akɛ nibii baaya lɛ wɔsɛɛ lɛ eyabaaa lɛ nakai.”
Mɛni wɔbaanyɛ wɔfee koni wɔkafee yeyeeye? Klɛŋklɛŋ lɛ, okɛ ohiɛ afɔ̃ Nyɔŋmɔ nɔ. Kɛ́ Nyɔŋmɔ hãa loofɔji niyenii ni ewulaa fɔfɔi lɛ, ani ehaŋ adesai ni kɛ ejamɔ yeɔ klɛŋklɛŋ gbɛhe yɛ amɛshihilɛ mli lɛ amɛhiamɔ nii? (Mateo 6:25, 26, 28-30) Nɔ ni ji enyɔ lɛ, jwɛŋmɔ ŋmɛnɛ pɛ he, kaagba ohe naa yɛ wɔ he. Yesu kɛɛ akɛ, “Nyɛkafea yeyeeye yɛ wɔ́ he kɔkɔɔkɔ, ejaakɛ wɔ́ hu kɛ lɛ diɛŋtsɛ eyeyeeyefeemɔi baaba.” Eyɛ faŋŋ akɛ, “Gbi fɛɛ gbi kɛ emli naagbai.”—Mateo 6:34.
Kɛ́ wɔbo Yesu ŋaawoo ni nilee yɔɔ mli lɛ toi lɛ, wɔyeŋ wɔhe awui. Nɔ ni fe fɛɛ lɛ, wɔtoiŋ baajɔ wɔ—no ji nɔ ni Biblia lɛ tsɛɔ lɛ “Nyɔŋmɔ toiŋjɔlɛ” lɛ.—Filipibii 4:6, 7.
Ekolɛ Obaasumɔ Enɛ Hu
SANEBIMƆI NI BIBLIA LƐ EHÃ HETOO
Obaanyɛ Oná Saji Yɛ Biblia Lɛ Mli Ni Baashɛje Omii
Biblia mli ŋmalɛi eshɛje mɛi ni miitsɔ shihilɛi ni mli wawai amli lɛ ateŋ mɛi babaoo amii.
BIBLIA MLI ŊMALƐI NI AGBALA MLI
Mateo 6:34 Ni Agbala Mli—“Nyɛkahaoa Nyɛhe Nyɛtoa Wɔ́”
Yesu etsɔɔɔ akɛ wɔkato gbɛjianɔ kɛhã wɔ́ sɛɛ.
BIBLIA TSƆƆMƆI NI HE HIAA WAA
Nɛgbɛ Obaanyɛ Oná Shihilɛ Mli Sanebimɔi Ni He Hiaa Waa Lɛ Ahetoo Yɛ?
Ani oyɛ sanebimɔi ni kɔɔ wala, gbele, kɛ wɔsɛɛ he? Obaanyɛ oná sanebimɔi nɛɛ kɛ ekrokomɛi ahetoo ni sa jogbaŋŋ! Shi, yɛ nɛgbɛ?
