Kɛ́ ootao ole mɔ ko jogbaŋŋ lɛ, ehi waa akɛ obaale nibii ni efee kɛ naagbai ni enyɛ etsu he nii. Nakai nɔŋŋ kɛ́ ootao ole Nyɔŋmɔ jogbaŋŋ lɛ, esa akɛ ole nibii ni efee. Kɛ́ ofee nakai lɛ, obaana akɛ efee nibii babaoo ni yeɔ ebuaa wɔ bianɛ ni baahã wɔná miishɛɛ hu wɔsɛɛ.

Yehowa Nyɔŋmɔ ji Bɔlɔ Kpeteŋkpele lɛ, ni “esui ni anaaa lɛ, ni ji enaanɔ hewalɛ kɛ Nyɔŋmɔ ni eji lɛ, kɛjɛ jeŋbɔɔ mli beebe lɛ anaa faŋŋ, ejaakɛ atsɔɔ nibii ni efee lɛ anɔ ayɔseɔ enɛɛmɛi.” (Romabii 1:20) Biblia lɛ kɛɛ akɛ: “Lɛ ji mɔ ni kɛ ehewalɛ fee shikpɔŋ lɛ, mɔ ni jɛ ehiɛshikamɔ mli eto shikpɔŋ lɛ shishi, ni elɛɛ ŋwɛi mli yɛ eniiashishinumɔ naa lɛ.” (Yeremia 10:12) Adebɔɔ nibii yɛ naakpɛɛ, ni amɛhãa wɔnaa akɛ Nyɔŋmɔ susuɔ wɔhe.

Yehowa bɔ wɔ yɛ gbɛ krɛdɛɛ nɔ. Bo lɛ susumɔ he okwɛ, ebɔ wɔ “tamɔ bɔ ni eyɔɔ lɛ.” (1 Mose 1:27) Enɛ tsɔɔ akɛ, ebɔ wɔ bɔ ni wɔbaanyɛ wɔjie esui ni nɔ bɛ lɛ akpo bɔ ni sa. Agbɛnɛ hu, ebɔ wɔ bɔ ni wɔbaanyɛ wɔnu esusumɔi ashishi, ni wɔna nɔ ni esuɔmɔnaa nii ji. Kɛ́ wɔmia wɔhiɛ wɔhi shi yɛ nibii nɛɛ anaa lɛ, wɔbaaná miishɛɛ waa yɛ shihilɛ mli. Nɔ ni fe fɛɛ lɛ, ebɔ wɔ bɔ ni baahã wɔnyɛ wɔkɛ lɛ abɔ naanyo.

Bɔ ni Nyɔŋmɔ bɔ shikpɔŋ lɛ ehã lɛ hãa wɔnaa akɛ esumɔɔ wɔ waa. Bɔfo Paulo wie akɛ, Nyɔŋmɔ kpaaa “lɛ diɛŋtsɛ ehe odaseyeli ejaakɛ efeɔ ekpakpa, ehãa nugbɔ nɛɔ kɛjɛɔ ŋwɛi ehãa [wɔ] kɛ bei ni nii baa pii hu, ni no hãa [wɔnáa] niyenii babaoo, ni miishɛɛ yiɔ [wɔtsuiiaŋ] obɔbɔ.” (Bɔfoi 14:17) Nyɔŋmɔ ehã wɔ nibii babaoo fe nɔ ni he hiaa wɔ koni wɔhi wala mli kɛkɛ. Ehã wɔ nibii srɔtoisrɔtoi babaoo hu koni wɔmii ashɛ wɔhe yɛ shihilɛ mli. Nibii ni ekpɛ eyiŋ akɛ ebaahã wɔ lɛ fioo ko pɛ nɛ.

 Yehowa bɔ shikpɔŋ lɛ koni adesai ahi nɔ kɛya naanɔ. Biblia lɛ kɛɔ akɛ: “Ekɛ shikpɔŋ lɛ ehã gbɔmɛi abii,” ni “ebɔɔɔ lɛ efolo, shi moŋ eshɔ̃ ni ahi nɔ.” (Lala 115:16; Yesaia 45:18) Namɛi baahi nɔ, ni bei enyiɛ amɛkɛbaahi nɔ? “Jalɔi lɛ, shikpɔŋ lɛ baatsɔ amɛnɔ, ni amɛbaahi nɔ kɛya naanɔ.”​—Lala 37:29.

Enɛ hewɔ lɛ, Yehowa bɔ klɛŋklɛŋ nuu kɛ yoo, ni ji Adam kɛ Hawa, ni ekɛ amɛ wo paradeiso mli yɛ shikpɔŋ lɛ nɔ koni ‘amɛtsu mli nii ní amɛkwɛ nɔ.’ (1 Mose 2:8, 15) Nyɔŋmɔ kɛ nitsumɔi enyɔ komɛi ni sa kadimɔ waa wo amɛdɛŋ, nomɛi ji: “Nyɛfɔa ní nyɛyi afaa, ni nyɛyia shikpɔŋ lɛ nɔ obɔ ni nyɛkwɛa nɔ.” (1 Mose 1:28) No hewɔ lɛ, kulɛ Adam kɛ Hawa baanyɛ ahi shikpɔŋ lɛ nɔ kɛya naanɔ. Shi dɔlɛ sane ji akɛ, amɛje gbɛ amɛgbo Nyɔŋmɔ nɔ toi, ni no hã hiɛnɔkamɔ ni amɛyɔɔ akɛ amɛbaafata “jalɔi lɛ” ni “shikpɔŋ lɛ baatsɔ amɛnɔ” lɛ ahe lɛ bɔ amɛ. Shi tamɔ bɔ ni wɔbaana lɛ, amɛnifeemɔ lɛ tsakeko yiŋtoo ni Yehowa yɔɔ kɛhã wɔ loo shikpɔŋ lɛ. Shi klɛŋklɛŋ lɛ, hã wɔsusu nɔ kroko ni Nyɔŋmɔ efee lɛ he.

Atsɛɔ Biblia lɛ akɛ Nyɔŋmɔ Wiemɔ hu. Mɛni hewɔ Yehowa kɛ Biblia lɛ hã wɔ lɛ? Yiŋtoo titri lɛ ji, koni wɔle lɛ. (Abɛi 2:1-5) Anɔkwa, Biblia lɛ etsɔɔɔ wɔ nɔ fɛɛ nɔ ni kɔɔ Nyɔŋmɔ he​—ni wolo ko wolo ko hu bɛ ni baanyɛ afee nakai. (Jajelɔ 3:11) Kɛ̃lɛ, nɔ fɛɛ nɔ ni yɔɔ Biblia lɛ mli lɛ waa wɔ koni wɔle Nyɔŋmɔ. Wɔnaa mɔ ni eji, kɛtsɔ bɔ ni ekɛ mɛi yeɔ ehãa lɛ nɔ. Wɔnaa mɛi ni esumɔɔ kɛ mɛi ni esumɔɔɔ. (Lala 15:1-5) Wɔnaa susumɔ ni ehiɛ yɛ jamɔ, jeŋba, kɛ heloonaa nibii ahe. Ni Biblia lɛ tsɔɔ Yesu Kristo, ni ji Yehowa Bi lɛ wiemɔi kɛ enifeemɔi anɔ ehãa wɔnaa mɔ tuuntu ni Yehowa ji, yɛ gbɛ ni fe fɛɛ nɔ.​—Yohane 14:9.

Yiŋtoo kroko hewɔ ni Yehowa kɛ e-Wiemɔ, ni ji Biblia lɛ hã wɔ lɛ ji, koni wɔle bɔ ni wɔbaafee wɔná miishɛɛ yɛ shihilɛ mli. Yehowa tsɔɔ Biblia lɛ nɔ etsɔɔ wɔ nibii ni kɛ́ wɔfee lɛ miishɛɛ baahi wɔweku mli, wɔhiɛ baasɔ nii ni wɔyɔɔ, ni wɔyeŋ wɔtsui. Ni sɛɛ mli lɛ, wɔbaana yɛ magazin nɛɛ mli akɛ, Biblia lɛ hãa sanebimɔi ni he hiaa waa lɛ ahetoo, ekomɛi ji: Mɛni hewɔ mɛi pii naa nɔ nɛkɛ? Mɛni baaba wɔsɛɛ? Agbɛnɛ hu, etsɔɔ wɔ nɔ ni Nyɔŋmɔ efee koni eyiŋtoo lɛ aba mli.

Nibii krokomɛi pii hu yɛ ni hãa wɔnaa akɛ Biblia lɛ nɔ bɛ kwraa, ni ejɛ Nyɔŋmɔ ŋɔɔ lɛɛlɛŋ. Hii aaafee 40 kɛ nɔ ni fe afii 1,600 ŋma, ni kɛ̃lɛ emli woji lɛ fɛɛ wieɔ sane titri kome he, ejaakɛ Nyɔŋmɔ ji Mɔ Ni Ŋma. (2 Timoteo 3:16) Etamɔɔɔ blema woji krokomɛi, ejaakɛ abaa emli wiemɔi lɛ ayi jogbaŋŋ, ni blema Bibliai ni akɛ niji ŋmala lɛ akpei abɔ maa enɛ nɔ mi. Kɛfata he lɛ, mɔdɛŋ fɛɛ ni abɔ koni akatsɔɔ Biblia lɛ shishi, akajara, ni agbɛnɛ hu, akakane lɛ efee efolo. Ŋmɛnɛ lɛ, no ji wolo ni aja ni atsɔɔ shishi fe fɛɛ. Akɛni anyɛko akpãtã Biblia lɛ hiɛ hewɔ lɛ, wɔbaanyɛ wɔwie akɛ, “wɔ-Nyɔŋmɔ lɛ wiemɔ lɛ hiɔ shi kɛyaa naanɔ.”​—Yesaia 40:8.

Nɔ kroko ni Nyɔŋmɔ efee ji gbɛjianɔ krɛdɛɛ ni eto koni bɔ fɛɛ bɔ ni fee lɛ, yiŋtoo ni eyɔɔ kɛhã wɔ lɛ aba mli lɛ. Tamɔ bɔ ni awie kɛtsɔ hiɛ lɛ, Nyɔŋmɔ to akɛ adesai ahi shikpɔŋ lɛ nɔ kɛya naanɔ. Shi be ni Adam je gbɛ egbo Nyɔŋmɔ nɔ toi ni efee esha lɛ, hegbɛ ni eyɔɔ akɛ ebaahi shi kɛya naanɔ lɛ ŋmɛɛ lɛ kɛ bii ni ebaafɔ sɛɛ mli lɛ fɛɛ. Biblia lɛ kɛɛ: “Gbɔmɔ kome nɔ esha tsɔ kɛba je lɛ mli, ni gbele tsɔ esha nɔ kɛba, ni no hã gbele tsɛŋe gbɔmɛi fɛɛ, ejaakɛ amɛ fɛɛ amɛfee esha lɛ.” (Romabii 5:12) Adam toigbele lɛ hã efee tamɔ nɔ ni Nyɔŋmɔ yiŋtoo lɛ nyɛŋ aba mli. Shi mɛni Yehowa fee yɛ he?

Nɔ ni Yehowa fee lɛ kɛ esui lɛ kpãa gbee. Ekɛ Adam kɛ Hawa ye yɛ nɔ ni amɛfee lɛ naa, shi ejɛ suɔmɔ mli eto gbɛjianɔ kɛhã bii ni amɛbaafɔ wɔsɛɛ lɛ. Akɛni Yehowa hiɛ kã shi hewɔ lɛ, ekpɛ eyiŋ yɛ nɔ ni ebaafee yɛ naagba lɛ he, nɔŋŋ kɛkɛ ni etsɔɔ bɔ ni ebaatsu he nii ehã. (1 Mose 3:15) Nyɔŋmɔ baatsɔ e-Bi Yesu Kristo nɔ ekpɔ̃ adesai kɛje esha kɛ gbele mli. Mɛni enɛ baabi ni efee?

Yehowa tsu Yesu kɛba shikpɔŋ lɛ nɔ koni ebatsɔɔ adesai gbɛ ni kɛ mɔ yaa wala mli lɛ, ni agbɛnɛ hu, “ekɛ ewala ahã akɛ kpɔmɔnɔ kɛkpɔ̃ mɛi babaoo,”  koni amɛye amɛhe kɛje nɔ ni ejɛ Adam atuatsemɔ lɛ mli kɛba lɛ he. a (Mateo 20:28; Yohane 14:6) Akɛni Yesu eye emuu tamɔ Adam hewɔ lɛ, ebaanyɛ ekɛ ewala ahã kɛkpɔ̃ adesai. Shi Yesu efeee enii tamɔ Adam, ebo Nyɔŋmɔ toi kɛtee gbele mli tɔ̃ɔ. Akɛni Yesu esaaa gbele hewɔ lɛ, Yehowa tee lɛ shi kɛtee ŋwɛi ekoŋŋ. Agbɛnɛ Yesu baanyɛ afee nɔ ni Adam nyɛɛɛ afee lɛ​—ebaahã adesai ni boɔ Nyɔŋmɔ toi lɛ hiɛnɔkamɔ akɛ amɛbaahi shi kɛya naanɔ. Biblia lɛ kɛɛ: “Ejaakɛ bɔ ni gbɔmɔ kome lɛ toigbele lɛ hã mɛi pii tsɔmɔ eshafeelɔi lɛ, nakai nɔŋŋ hu gbɔmɔ kome lɛ toiboo lɛ baahã mɛi pii atsɔmɔ jalɔi.” (Romabii 5:19) Nyɔŋmɔ baatsɔ Yesu kpɔmɔ afɔle lɛ nɔ ehã shi ni ewo akɛ, adesai baahi shikpɔŋ lɛ nɔ kɛya naanɔ lɛ aba mli.

Bɔ ni Yehowa tsu naagbai ni jɛ Adam toigbele lɛ mli kɛba lɛ ahe nii lɛ hãa wɔkaseɔ nibii babaoo yɛ ehe. Wɔna akɛ, nɔ ko kwraa bɛ ni baanyɛ atsĩ Yehowa naa ni ekagbe nɔ ni eje shishi lɛ naa; ewiemɔ lɛ baaba mli “pɛpɛɛpɛ.” (Yesaia 55:11) Wɔna hu akɛ, Yehowa sumɔɔ wɔ waa diɛŋtsɛ. Biblia lɛ kɛɔ akɛ: “Enɛ nɔ atsɔ ajie Nyɔŋmɔ suɔmɔ lɛ kpo yɛ wɔgbɛfaŋ, no ji akɛ, Nyɔŋmɔ tsu e-Bi koome lɛ kɛba je lɛ mli koni wɔtsɔ enɔ wɔná wala. Nɛkɛ ji bɔ ni suɔmɔ lɛ yɔɔ, jeee akɛ wɔ wɔsumɔ Nyɔŋmɔ, shi moŋ akɛ lɛ esumɔ wɔ ni etsu e-Bi lɛ akɛ kpatamɔ afɔle yɛ wɔhe eshai lɛ ahewɔ.”​—1 Yohane 4:9, 10.

Nyɔŋmɔ kamaaa “wɔ lɛ diɛŋtsɛ e-Bi lɛ, shi moŋ ekɛ lɛ hã yɛ wɔ fɛɛ wɔhewɔ,” no hewɔ lɛ, wɔyɛ nɔmimaa akɛ, ekɛ “nibii krokomɛi fɛɛ” ni ewo he shi lɛ ‘baahã wɔ tswaa.’ (Romabii 8:32) Mɛni Nyɔŋmɔ ewo shi akɛ ebaafee ehã wɔ? Ofainɛ, tsa nikanemɔ lɛ nɔ.