Biblia Lɛ Baanyɛ Atsɔɔ Bo Nɔ Ni Ja Kɛ Nɔ Ni Ejaaa
Kɛ́ wɔdamɔ bɔ ni wɔnuɔ he wɔhãa loo bɔ ni mɛi krokomɛi nuɔ he amɛhãa lɛ pɛ nɔ wɔkpɛ wɔyiŋ yɛ nɔ ni ja kɛ nɔ ni ejaaa he lɛ, wɔnyɛŋ wɔná nɔmimaa akɛ nibii baahi ahã wɔ. Biblia lɛ tsɔɔ nɔ hewɔ ni ebaa lɛ nakai, ni ehãa wɔnaa nibii krokomɛi hu yɛ sane nɛɛ he. Jeŋba he gbɛtsɔɔmɔi ni ja yɛ mli, ni kɛ́ wɔkɛtsu nii lɛ, ebaahã wɔná miishɛɛ.
NYƆŊMƆ GBƐTSƆƆMƆ HE MIIHIA WƆ
Yehowa a Nyɔŋmɔ hãa wɔnaa yɛ Biblia lɛ mli akɛ egbɛtsɔɔmɔ he miihia adesai ejaakɛ amɛ diɛŋtsɛ amɛnyɛŋ amɛkudɔ amɛnajifaamɔi. (Yeremia 10:23) Ni no hewɔ ni ehã aŋmala ejeŋba he gbɛtsɔɔmɔi yɛ Biblia lɛ mli lɛ. Esumɔɔ wɔ, ni esumɔɔɔ ni wɔkpɛɔ yiŋ gbohii ni baaye wɔ awui ni baahã etɔ wɔ yɛ shihilɛ mli. (5 Mose 5:29; 1 Yohane 4:8) Nɔ ni he hiaa fe fɛɛ lɛ, lɛ ji wɔ-Bɔlɔ, ni ele nii, ni ehiɛ kã shi bɔ ni baahã ekɛ jeŋba he gbɛtsɔɔmɔi ni hi fe fɛɛ ahã wɔ. (Lala 100:3; 104:24) Fɛɛ sɛɛ lɛ, Nyɔŋmɔ enyɛɛɛ mɛi anɔ ni amɛhi shi yɛ egbɛtsɔɔmɔi lɛ anaa.
Yehowa hã klɛŋklɛŋ nuu kɛ yoo ni ji Adam kɛ Hawa nɔ fɛɛ nɔ ni he hiaa amɛ ni baahã amɛná miishɛɛ. (1 Mose 1:28, 29; 2:8, 15) Agbɛnɛ hu, ekɛ gbɛtsɔɔmɔi ni nɔyeli waaa ni esa akɛ amɛbo toi hã amɛ. Shi eshi ehã amɛ ni amɛ diɛŋtsɛ amɛkpɛ amɛyiŋ kɛ́ amɛbaabo toi loo amɛboŋ toi. (1 Mose 2:9, 16, 17) Mɔbɔ sane ji akɛ, Adam kɛ Hawa hala akɛ amɛbaahi shi yɛ amɛ diɛŋtsɛ amɛgbɛtsɔɔmɔi anaa, moŋ fe ni amɛbaahi shi yɛ Nyɔŋmɔ gbɛtsɔɔmɔi anaa. (1 Mose 3:6) Mɛni ejɛ mli kɛba? Kɛ́ mɛi fee nɔ fɛɛ nɔ ni amɛsusuɔ akɛ eja lɛ, ani no hãa amɛnáa miishɛɛ? Dabi. Yɛ afii ni eho lɛ amli fɛɛ lɛ, wɔna akɛ kɛ́ mɛi ku amɛhiɛ amɛshwie Nyɔŋmɔ gbɛtsɔɔmɔi anɔ lɛ, ehãaa amɛná toiŋjɔlɛ kɛ miishɛɛ.—Jajelɔ 8:9.
Gbɛtsɔɔmɔi ni baanyɛ awa wɔ ni wɔkpɛ yiŋ kpakpai ekɔɔɔ he eko he ni wɔyɔɔ loo shihilɛ mli ni wɔyɔɔ lɛ yɛ Biblia lɛ mli. (2 Timoteo 3:16, 17; kwɛmɔ akrabatsa ni ji “ Wolo Kɛhã Gbɔmɛi Fɛɛ” lɛ.) Hã wɔsusu enɛ he wɔkwɛ.
Kɛ́ ootao ole saji krokomɛi ni hãa wɔnaa akɛ eja gbɛ akɛ abaatsɛ Biblia lɛ akɛ “Nyɔŋmɔ wiemɔ” lɛ, kwɛmɔ vidio ni ji, Namɔ Ji Biblia lɛ Ŋmalɔ? ni yɔɔ jw.org lɛ nɔ lɛ.—1 Tesalonikabii 2:13.
BIBLIA LƐ HÃA WƆNAA NYƆŊMƆ GBƐTSƆƆMƆI LƐ
Biblia lɛ hãa wɔleɔ bɔ ni Yehowa kɛ adesai eye ehã kɛjɛ be ni abɔ Adam kɛ Hawa lɛ tɔ̃ɔ. Saji ni yɔɔ Biblia lɛ mli lɛ hãa wɔnaa nifeemɔi ni Nyɔŋmɔ naa amɛ akɛ amɛja ni wɔbaaná he sɛɛ kɛ nifeemɔi ni enaa amɛ akɛ amɛjaaa ni baaye wɔ awui. (Lala 19:7, 11) Ŋaawoi ni yɔɔ mli lɛ hi, ni amɛbe hooo, ni amɛwaa wɔ ni wɔkpɛɔ yiŋ kpakpai yɛ shihilɛ mli.
Akɛ nɔkwɛmɔnɔ lɛ, hã wɔsusu ŋaawoo ni yɔɔ Abɛi 13:20 lɛ he wɔkwɛ, aŋma yɛ jɛmɛ akɛ: “Mɔ ni kɛ hiɛshikalɔi nyiɛɔ lɛ, ebaatsɔ hiɛshikalɔ, shi mɔ ni kɛ kwashiai bɔɔ lɛ, egbeŋ naa ekpakpa.” Ŋaawoo nɛɛ hi kɛhã wɔ ŋmɛnɛ, tamɔ eji yɛ blema lɛ nɔŋŋ. Biblia lɛ eyi kɛ ŋaawoi kpakpai tamɔ nɛkɛ ni he yɔɔ sɛɛnamɔ.—Kwɛmɔ akrabatsa ni ji, “ Ŋaawoi Ni Yɔɔ Biblia Lɛ Mli Lɛ Abe Hooo” lɛ.
Shi ekolɛ, obaabi ohe akɛ, ‘Te mafee tɛŋŋ maná nɔmimaa akɛ ŋaawoi ni yɔɔ Biblia lɛ mli lɛ baanyɛ awa mi?’ Wɔbaasusu bɔ ni Biblia lɛ eye ebua mɛi komɛi ŋmɛnɛ lɛ he yɛ sane ni nyiɛ sɛɛ lɛ mli.
a Nyɔŋmɔ gbɛ́i diɛŋtsɛ ji Yehowa.—Lala 83:18.
