Kɛ́ wɔɔwie lɛ, wɔ fɛɛ wɔyɛ he ko ni “nugbɔ wulu” ko miiba ebanɛ yɛ, ni Yesu tsɛ nɔ ni baa nɛɛ akɛ “amanehulu kpeteŋkpele.” (Mateo 24:21) Bɔ fɛɛ bɔ ni fee lɛ, ebaaba. Shi wɔbaanyɛ wɔfee nɔ ko koni wɔhiɛ akakpãtã. Mɛni?

Yesu Kristo kɛ gbɛtsɔɔmɔ nɛɛ hã yɛ e-Gɔŋ Nɔ Shiɛmɔ lɛ mli akɛ: “No hewɔ lɛ, nyɛyaa nɔ nyɛtaoa [Nyɔŋmɔ] Maŋtsɛyeli lɛ kɛ Nyɔŋmɔ jalɛ lɛ klɛŋklɛŋ.” (Mateo 6:33) Te wɔɔfee tɛŋŋ wɔfee nakai?

Taomɔ Nyɔŋmɔ Maŋtsɛyeli lɛ klɛŋklɛŋ. Enɛ tsɔɔ akɛ, esa akɛ wɔna Nyɔŋmɔ Maŋtsɛyeli lɛ akɛ ehe hiaa fe nibii krokomɛi fɛɛ. (Mateo 6:25, 32, 33) Mɛni hewɔ esa akɛ wɔna lɛ nakai? Ejaakɛ adesai nyɛŋ atsu wɔnaagbai lɛ ahe nii kɔkɔɔkɔ. Wɔnaagbai lɛ ahe nitsumɔ bɛ mlɛo kwraa, ni Nyɔŋmɔ Maŋtsɛyeli lɛ pɛ baanyɛ atsu he nii.

Taomɔ ejalɛ lɛ. Esa akɛ wɔbɔ mɔdɛŋ ni wɔhi shi yɛ Nyɔŋmɔ mlai kɛ eshishitoo mlai ni ja lɛ anaa. Mɛni hewɔ? Ejaakɛ kɛ́ wɔ diɛŋtsɛ wɔkpɛ wɔyiŋ yɛ nɔ ni ja kɛ nɔ ni ejaaa he lɛ, ekɛ oshãra baaba. (Abɛi 16:25) Shi kɛ́ wɔhi shi yɛ Nyɔŋmɔ taomɔ nii anaa lɛ, wɔbaasa ehiɛ, ni wɔbaaná miishɛɛ hu.​—Yesaia 48:17, 18.

Yaa nɔ otao Nyɔŋmɔ Maŋtsɛyeli lɛ kɛ Nyɔŋmɔ jalɛ lɛ klɛŋklɛŋ. Yesu bɔ kɔkɔ akɛ, mɛi komɛi ahiɛ baanyɛ aje amɛhe nɔ, ejaakɛ amɛbaasusu akɛ kɛ́ amɛná shika babaoo lɛ, no baahã amɛfee shweshweeshwe. Mɛi krokomɛi  hu baaye amɛtsui yɛ shihilɛ mli hiamɔ nii ahe aahu akɛ, amɛnáŋ be kɛtaoŋ Nyɔŋmɔ Maŋtsɛyeli lɛ.​—Mateo 6:19-21, 25-32.

Shi Yesu wo shi akɛ, mɛi ni fiɔ Nyɔŋmɔ Maŋtsɛyeli lɛ sɛɛ lɛ anine baashɛ amɛhiamɔ nii anɔ bianɛ, ni wɔsɛɛ lɛ hu lɛ, abaajɔɔ amɛ kɛya naanɔ.​—Mateo 6:33.

Eyɛ mli akɛ Yesu kaselɔi ni hi shi yɛ klɛŋklɛŋ afii 100 lɛ mli lɛ tao Nyɔŋmɔ Maŋtsɛyeli lɛ kɛ Nyɔŋmɔ jalɛ lɛ klɛŋklɛŋ moŋ, shi naagbai kɛ piŋmɔi ni amɛkɛkpe lɛ fɛɛ baaa naagbee yɛ amɛbeiaŋ. Fɛɛ sɛɛ lɛ, amɛhi shi shweshweeshwe. Yɛ mɛɛ gbɛ nɔ?

Amɛhi shi yɛ Nyɔŋmɔ taomɔ nii ni ja lɛ anaa, ni no bu amɛhe kɛje naagbai ni mɛi ni booo Nyɔŋmɔ toi lɛ kɛkpe lɛ ahe. Hemɔkɛyeli ni mli wa ni amɛyɔɔ akɛ Maŋtsɛyeli lɛ baaba lɛ wa amɛ ni amɛnyɛ amɛdamɔ naagbai ni mli wala po anaa. Ni Nyɔŋmɔ hu hã amɛ “hewalɛ ni fa kɛteke nɔ,” koni amɛnyɛ amɛfi shi.​—2 Korintobii 4:7-9.

Klɛŋklɛŋ afii 100 lɛ mli Kristofoi lɛ bo famɔ ni Yesu kɛhã akɛ atao Maŋtsɛyeli lɛ klɛŋklɛŋ lɛ toi. Amɛshiɛ Maŋtsɛyeli lɛ he sane kpakpa lɛ amɛtsɔɔ amɛbeiaŋ bii lɛ fɛɛ. (Kolosebii 1:23) Ani mɛi komɛi miifee nakai ŋmɛnɛ?

Hɛɛ! Yehowa Odasefoi le akɛ etsɛŋ kwraa, Nyɔŋmɔ Maŋtsɛyeli lɛ baakpãtã jeŋ fɔŋ nɛɛ hiɛ. No hewɔ lɛ, amɛfeɔ bɔ fɛɛ bɔ ni amɛbaanyɛ koni amɛye Yesu wiemɔi nɛɛ nɔ. Ewie akɛ: “Abaashiɛ Maŋtsɛyeli lɛ he sane kpakpa nɛɛ yɛ shikpɔŋ lɛ nɔ fɛɛ koni akɛye jeŋmaji lɛ fɛɛ odase, ni no sɛɛ lɛ naagbee lɛ baaba.”​—Mateo 24:14.

Ani obaabo sane kpakpa lɛ toi? Wɔmiiwo bo hewalɛ ni okase klɛŋklɛŋ afii 100 lɛ mli bii ni hi Makedonia maŋtiase ni atsɛɔ lɛ Beroia mli lɛ. Be ni bɔfo Paulo shiɛ Maŋtsɛyeli lɛ he sane kpakpa lɛ etsɔɔ amɛ lɛ, “amɛjie amɛyitsoŋ fɛɛ amɛmɔ wiemɔ lɛ mli.” Ni ‘amɛtao ŋmalɛi lɛ amli jogbaŋŋ’ koni amɛle kɛji nɔ ni amɛnu lɛ kɛ Ŋmalɛ lɛ kpãa gbee lo, ni amɛkɛ nɔ amɛkase lɛ tsu nii.​—Bɔfoi 17:11, 12.

Bo hu obaanyɛ ofee nakai. Kɛ́ otao Nyɔŋmɔ Maŋtsɛyeli lɛ kɛ Nyɔŋmɔ jalɛ lɛ klɛŋklɛŋ lɛ, obaahi shi shweshweeshwe bianɛ, ni wɔsɛɛ hu lɛ, obaaná toiŋjɔlɛ kɛya naanɔ.