Ekolɛ obaasusu akɛ okpɔŋɔnɔtaralɔi lɛ ahe yɛ gbeyei, shi esaaa akɛ osusuɔ nakai. Mɛni hewɔ? Ejaakɛ Biblia lɛ, kɛ nibii ni etee nɔ yɛ yinɔsane mli ŋmɛnɛ lɛ yeɔ ebuaa wɔ koni wɔna nɔ ni okpɔŋɔnɔtaralɔi lɛ ateŋ mɔ fɛɛ mɔ damɔ shi kɛhã. Ni eyɛ mli akɛ amɛkpɔŋɔtamɔ lɛ kɛ naagbai eba shikpɔŋ lɛ nɔ moŋ, shi ebaanyɛ efee sane kpakpa hu kɛhã bo kɛ oweku lɛ. Mɛni hewɔ wɔkɛɔ nakai? Klɛŋklɛŋ lɛ, hã wɔsusu nɔ ni okpɔŋɔnɔtaralɔi lɛ ateŋ mɔ fɛɛ mɔ damɔ shi kɛhã lɛ he.

Ninaa lɛ je shishi yɛ nɛkɛ gbɛ nɔ: “Mikwɛ, ni naa! okpɔŋɔ yɛŋ, ni mɔ ni ta enɔ lɛ hiɛ gãi; ni ahã lɛ akekere, ni eje kpo, eeye kunim koni egbe ekunimyeli lɛ naa.”—Kpojiemɔ 6:2.

Namɔ ji okpɔŋɔ yɛŋ lɛ nɔtalɔ? Nɔ titri ni baaye abua wɔ ni wɔna mɔ ni eji lɛ yɛ Biblia mli wolo ni ji Kpojiemɔ lɛ mli. Sɛɛ mli lɛ awie okpɔŋɔnɔtalɔ ni jɛ ŋwɛi nɛɛ he akɛ “Nyɔŋmɔ Wiemɔ Lɛ” yɛ Kpojiemɔ wolo nɛɛ nɔŋŋ mli. (Kpojiemɔ 19:11-13) Nakai gbɛnaa gbɛ́i lɛ, ni ji Wiemɔ Lɛ, ji gbɛ́i ni akɛtsɛɔ Yesu Kristo, ejaakɛ eji Nyɔŋmɔ naawielɔ. (Yohane 1:1, 14) Kɛfata he lɛ, atsɛɔ lɛ “maŋtsɛmɛi a-Maŋtsɛ kɛ nuŋtsɔmɛi a-Nuŋtsɔ,” ni atsɛɔ lɛ hu akɛ, “Anɔkwayelɔ kɛ Anɔkwafo.” (Kpojiemɔ 19:11, 16) Eyɛ faŋŋ akɛ, ahã lɛ hegbɛ ni esɔmɔ akɛ maŋtsɛ tabilɔ, shi ekɛ ehewalɛ lɛ tsuuu nii yɛ gbɛ ni ejaaa nɔ. Kɛ̃lɛ, sanebimɔi komɛi yɛ ni esa akɛ ahã hetoo.

Namɔ hã Yesu hegbɛ ni ekɛye kunim lɛ? (Kpojiemɔ 6:2) Gbalɔ Daniel na yɛ ninaa ko mli akɛ, Yehowa Nyɔŋmɔ, * ni ji “mɔ ni eye gbii pii lɛ,” hã “gbɔmɔ bi” lɛ, ni ji Mesia lɛ, “nɔyeli kɛ anunyam kɛ maŋtsɛyeli.” (Daniel 7:13, 14) No hewɔ lɛ, Nyɔŋmɔ Ofe lɛ diɛŋtsɛ ni hã Yesu hewalɛ kɛ hegbɛ ní ekɛye nɔ, ni ekojo lɛ. Okpɔŋɔ yɛŋ lɛ damɔ shi kɛhã jalɛ ta ni Nyɔŋmɔ Bi lɛ wuɔ lɛ, ni enɛ ji nɔ ko ni sa jogbaŋŋ, ejaakɛ bei pii lɛ, Ŋmalɛi lɛ kɛ kɔla yɛŋ damɔɔ shi kɛhãa jalɛ.—Kpojiemɔ 3:4; 7:9, 13, 14.

Mɛɛ be okpɔŋɔnɔtaralɔi lɛ bɔi amɛkpɔŋɔi lɛ tamɔ? Kadimɔ akɛ Yesu, ni ji klɛŋklɛŋ okpɔŋɔnɔtalɔ lɛ, bɔi ekpɔŋɔ lɛ tamɔ be ni enine shɛ akekre ko nɔ lɛ. (Kpojiemɔ 6:2) Mɛɛ be awó Yesu Maŋtsɛ yɛ ŋwɛi? Jeee yɛ egbele sɛɛ, be ni atee lɛ shi kɛtee ŋwɛi lɛ. Biblia lɛ hãa wɔleɔ akɛ, emɛ kɛyashi be ko. (Hebribii 10:12, 13) Yesu hã esɛɛnyiɛlɔi lɛ okadi ko ni baakadi be ni be ni ekɛmɛɔ lɛ baaba naagbee, kɛ be ni ebaabɔi nɔyeli yɛ ŋwɛi. Ekɛɛ amɛ akɛ, kɛ́ ebɔi nɔyeli lɛ, je lɛŋ shihilɛ lɛ mli baawo wu fe bei fɛɛ ni eho. Tai, hɔji, kɛ tsɛŋemɔ helai baaba. (Mateo 24:3, 7; Luka 21:10, 11) Be ni Jeŋ Ta 1 lɛ je shishi yɛ afi 1914 lɛ sɛɛ nɔŋŋ lɛ, ebafee faŋŋ akɛ, adesai eyaje jaramɔ shihilɛ ko ni Biblia lɛ tsɛɔ lɛ “naagbee gbii lɛ” mli.—2 Timoteo 3:1-5.

Shi mɛni hewɔ kɛjɛ be ni awó Yesu maŋtsɛ yɛ afi 1914 lɛ kɛbaa nɛɛ, shihilɛ lɛ ehiko, shi moŋ emli miiwo wu lɛ? Ejaakɛ yɛ nakai beiaŋ Yesu je enɔyeli lɛ shishi yɛ ŋwɛi, jeee shikpɔŋ lɛ nɔ. No sɛɛ lɛ, ta te shi yɛ ŋwɛi, ni Yesu, ni ji Maŋtsɛ hee ni awó ní atsɛɔ lɛ Mikael lɛ, shɛrɛ Satan kɛ edaimonioi lɛ eshwie shikpɔŋ lɛ nɔ. (Kpojiemɔ 12:7-9, 12) Kɛjɛ be ni ashɛ Satan afɔ̃ shikpɔŋ lɛ nɔ nɛɛ, egiri waa diɛŋtsɛ, ejaakɛ ele akɛ be ni eyɔɔ lɛ faaa. Hɛɛ, etsɛŋ, Nyɔŋmɔ baakpãtã Satan hiɛ, ni no baahã afee esuɔmɔnaa nii yɛ shikpɔŋ lɛ nɔ. (Mateo 6:10) Agbɛnɛ, hã wɔkwɛ bɔ ni okpɔŋɔnɔtaralɔi etɛ lɛ hu hãa wɔnaa akɛ, wɔyɛ be ni jaraa, ni ji “naagbee gbii” lɛ amli lɛɛlɛŋ. Klɛŋklɛŋ okpɔŋɔnɔtalɔ lɛ ji mɔ pɔtɛɛ ko, shi okpɔŋɔnɔtaralɔi etɛ ni nyiɛ esɛɛ lɛ feɔ shihilɛi srɔtoi ni eba jeŋ fɛɛ, ni esa adesai fɛɛ ahe lɛ he mfoniri.

“Okpɔŋɔ kroko ní tsuɔ tamɔ lalilɛi je kpo, ni ahã mɔ ni ta enɔ lɛ hegbɛ akɛ ejie toiŋjɔlɛ kɛje shikpɔŋ lɛ nɔ koni amɛgbegbee amɛhe, ni ahã lɛ klante kpeteŋkpele ko.”—Kpojiemɔ 6:4.

Okpɔŋɔnɔtalɔ nɛɛ feɔ ta he mfoniri. Kadimɔ akɛ, jeee maji komɛi pɛ anɔ ejieɔ toiŋjɔlɛ kɛjeɔ, moŋ lɛ, shikpɔŋ muu lɛ fɛɛ nɔ. Yɛ afi 1914 lɛ, awu ta yɛ jeŋ fɛɛ, ni enɛ ji klɛŋklɛŋ nɔ ni ba yɛ yinɔsane mli. No sɛɛ lɛ, jeŋ ta ni ji enyɔ ba, ni efite nii kwraa fe klɛŋklɛŋ nɔ lɛ. Akɔntaabuu ko tsɔɔ akɛ, kɛjɛ afi 1914 kɛbaa nɛɛ, tai wuji kɛ tai bibii egbe mɛi ni fa fe akpekpei oha! Kɛfata he lɛ, mɛi babaoo hu epila waa.

Mɛɛ gbɛ nɔ tai hãa wɔnaa akɛ, wɔyɛ naagbee gbii lɛ amli? Yɛ yinɔsane mli fɛɛ lɛ, etamɔ nɔ ni ŋmɛnɛ lɛ, adesai yɛ nyɛmɔ ni amɛbaanyɛ amɛkɛkpãtã adesai fɛɛ ahiɛ. Gbɛjianɔtoi ni ale akɛ amɛtiuɔ toiŋjɔlɛ sɛɛ, tamɔ Jeŋmaji Ekomefeemɔ lɛ po nyɛko atsĩ okpɔŋɔ tsuru lɛ nɔtalɔ lɛ naa.

“Mikwɛ, ni naa! okpɔŋɔ diŋ, ni mɔ ni ta enɔ lɛ hiɛ nsɛnii yɛ edɛŋ. Minu nɔ ko ni tamɔ gbee ko yɛ bɔɔ nii ejwɛ ní hiɛ kamɔ lɛ ateŋ miikɛɛ: ‘Ŋmaa susumɔnɔ kome lɛ denario kome kɛ akoko susumɔnii etɛ lɛ denario kome; ni oliv mu lɛ kɛ wein lɛ, kaakpãtã hiɛ.’”—Kpojiemɔ 6:5, 6.

Okpɔŋɔnɔtalɔ nɛɛ feɔ hɔmɔ he mfoniri. Wɔnaa yɛ ŋmalɛ nɛɛ mli akɛ, niyenii jara wa aahu akɛ, ŋmaa susumɔnɔ kome (kilogram 0.7) jara ji denario kome. Denario kome ji gbi muu fɛɛ nyɔmɔwoo yɛ klɛŋklɛŋ afii 100 lɛ mli! (Mateo 20:2) Nakai shika lɛ nɔŋŋ baanyɛ ahé akoko susumɔnii etɛ (kilogram 2.1). Akoko ji niyenii ko ni abuuu lɛ akɛ eji niyenii kpakpa ko tamɔ abuɔ ŋmaa lɛ. Hewɔ lɛ, te aaafee tɛŋŋ akɛ enɛ alɛ weku ko ni mli bii fa lɛ? Abɔɔ mɛi kɔkɔ po ni amɛkafite shika pii yɛ amɛdaa gbi niyenii, tamɔ oliv mu kɛ wain he, ni enɛ sa jogbaŋŋ yɛ bɔ ni shihilɛ lɛ ji yɛ nakai beiaŋ lɛ hewɔ.

Kɛjɛ afi 1914 kɛbaa nɛɛ, ani wɔnako nibii babaoo ni tsɔɔ akɛ, okpɔŋɔ diŋ lɛ nɔtalɔ lɛ hiɛ edɔ waa? Ŋwanejee ko bɛ he akɛ wɔna nibii babaoo ni tsɔɔ nakai! Yɛ afi 1900 afii lɛ amli fɛɛ lɛ, mɛi aaafee akpekpei 70 sɔŋŋ gboi yɛ hɔmɔ hewɔ. Nitsumɔhe ko wie akɛ, “Kɛjɛ afi 2012 kɛyashi afi 2014 lɛ, mɛi aaashɛ akpekpei 805 náaa niyenii kpakpa amɛye—ni tsɔɔ akɛ, kɛ́ ahala mɛi nɛɛhu yɛ jeŋ fɛɛ lɛ, amɛteŋ mɔ kome náaa niyenii.” Amaniɛbɔɔ kroko hu tsɔɔ akɛ, “Daa afi lɛ, mɛi ni hɔmɔ gbeɔ lɛ ayi fa kwraa fe mɛi ni AIDS, atiridii, kɛ wɔlɔmɔ fɔŋ gbeɔ.” Yɛ mɔdɛŋ ni abɔɔ koni alɛ mɛi babaoo ni hɔmɔ yeɔ amɛ lɛ fɛɛ sɛɛ lɛ, okpɔŋɔ diŋ lɛ nɔtalɔ lɛ miiya nɔ eefite nii lolo.

“Mikwɛ, ni naa! okpɔŋɔ ní hiɛ su ni ekwá, ni mɔ ni ta enɔ lɛ gbɛ́i ji Gbele. Ni Gbonyo Bu lɛ nyiɛ esɛɛ kpaakpa. Ni ahã amɛ hegbɛ yɛ shikpɔŋ lɛ mlijai ejwɛ mli ekome nɔ, akɛ amɛkɛ klante kakadaŋŋ kɛ hɔmɔ kɛ gbele hela kɛ shikpɔŋ lɛ nɔ kooloi awuiyelɔi lɛ agbegbee amɛ.”—Kpojiemɔ 6:8.

Okpɔŋɔnɔtalɔ ni ji ejwɛ lɛ feɔ gbele ni hela kɛ nibii krokomɛi kɛbaa lɛ he mfoniri. Yɛ afi 1914 sɛɛ nɔŋŋ lɛ, Spanish flu lɛ gbe mɛi akpekpei nyɔŋmai abɔ. Hela nɛɛ mɔ mɛi aaafee akpekpei 500 sɔŋŋ, ni tsɔɔ akɛ, kɛ́ ahala mɛi etɛ lɛ, emɔ amɛteŋ mɔ kome!

Shi Spanish flu lɛ ji helai ni baaba lɛ shishijee kɛkɛ. Niiamlitaolɔi tsɔɔ mli akɛ, yɛ afi 1900 afii lɛ amli lɛ, kpate hela lɛ (smallpox) gbe mɛi akpekpei ohai abɔ. Yɛ wɔbei nɛɛ amli po lɛ, eyɛ mli akɛ atee hiɛ waa yɛ helatsamɔ he nilee mli moŋ, shi AIDS, wɔlɔmɔ fɔŋ, kɛ atiridii miigbe mɛi akpekpei abɔ lolo.

Nɔ kome pɛ ji nɔ ni jɛɔ tai, hɔji, loo helai ni awie he kɛtsɔ hiɛ lɛ mli kɛbaa—no ji gbele. Gbonyo Bu lɛ etɔko kwraa kɛ mɛi ni egboi lɛ mii, ni ehã mɛi ahiɛnɔkamɔ fɛɛ etã.

Etsɛŋ, naagbai ni wɔkɛkpeɔ amrɔ nɛɛ fɛɛ sɛɛ baafo. Kaimɔ akɛ: Yɛ afi 1914 lɛ, Yesu ‘je kpo, eeye kunim,’ ni eshwie Satan kɛba shikpɔŋ lɛ nɔ, shi Yesu egbeee ekunimyeli lɛ naa yɛ nakai beiaŋ. (Kpojiemɔ 6:2; 12:9, 12) Etsɛŋ kwraa, Yesu baatsĩ Satan naa koni ekaná adesai anɔ hewalɛ dɔŋŋ, ni ebaakpãtã mɛi fɛɛ ni fĩɔ Abonsam sɛɛ lɛ ahiɛ yɛ Harmagedon ta lɛ mli. (Kpojiemɔ 20:1-3) Jeee akɛ Yesu baafo okpɔŋɔnɔtaralɔi etɛ lɛ akpɔŋɔtamɔ lɛ sɛɛ kɛkɛ, moŋ lɛ ebaasaa nibii fɛɛ ni amɛfite lɛ. Yɛ mɛɛ gbɛ nɔ? Susumɔ shiwoi ni Biblia lɛ kɛhãa ni nyiɛ sɛɛ nɛɛ ahe okwɛ.

Yɛ ta najiaŋ lɛ, toiŋjɔlɛ baahi he fɛɛ he. Biblia lɛ kɛɔ akɛ, Yehowa lɛ, “ehãa tai asɛɛ foɔ kɛyaa shikpɔŋ lɛ naagbeehei lɛ, ekuɔ gãi mli, ni efoɔ akpɔlɔ mli.” (Lala 46:10) Mɛi ni sumɔɔ toiŋjɔlɛ lɛ, “amɛmii aaashɛ amɛhe yɛ hejɔlɛ babaoo mli.”—Lala 37:11.

Yɛ hɔmɔ najiaŋ lɛ, niyenii baabu. “Shikpɔŋ lɛ nɔ aaaba abele babaoo kɛyashwie gɔji lɛ ayiteaŋ.”—Lala 72:16.

Yɛ hela kɛ gbele najiaŋ lɛ, mɛi fɛɛ baaná gbɔmɔtsoŋ hewalɛ kpakpa kɛ naanɔ wala. Nyɔŋmɔ baatsumɔ “amɛhiŋmɛiiaŋ yaafonui fɛɛ, ni gbele bɛ dɔŋŋ, asaŋ awerɛhoyeli ko loo yarawoo ko loo hejaramɔ ko hu bɛ dɔŋŋ.”—Kpojiemɔ 21:4.

Be ni Yesu yɔɔ shikpɔŋ lɛ nɔ lɛ, efee nibii kpakpai ni ebaafee yɛ enɔyeli lɛ shishi wɔsɛɛ lɛ he nɔkwɛmɔnɔ. Etiu toiŋjɔlɛ sɛɛ, etsɔ naakpɛɛ gbɛ nɔ elɛ mɛi akpei abɔ, etsa helai, ni etee gbohii ashi po.—Mateo 12:15; 14:19-21; 26:52; Yohane 11:43, 44.

Yehowa Odasefoi yɛ he miishɛɛ akɛ amɛbaatsɔɔ bo kɛjɛ bo diɛŋtsɛ o-Biblia lɛ mli bɔ ni obaafee osaa ohe oto, be ni okpɔŋɔnɔtaralɔi etɛ lɛ akpɔŋɔtamɔ lɛ baa naagbee lɛ. Ani obaasumɔ ni mɔ ko kɛ bo abakase nii ni etsɔɔ bo babaoo?