Hɛɛ, ŋwɛibɔfoi fɔji yɛ. Shi nɛgbɛ amɛjɛ? Kaimɔ akɛ, be ni Nyɔŋmɔ bɔ ŋwɛibɔfoi lɛ, ehã amɛ heyeli, ni tsɔɔ akɛ ehã amɛ hegbɛ koni amɛ diɛŋtsɛ amɛkpɛ amɛyiŋ yɛ saji ahe. Be fioo sɛɛ be ni abɔ klɛŋklɛŋ nuu kɛ yoo, ni ji Adam kɛ Hawa lɛ, ŋwɛibɔfo ko ni eye emuu lɛ kɛ ehegbɛ ni eyɔɔ akɛ ehalaa nɔ ni esumɔɔ lɛ tsu nii yɛ gbɛ gbonyo nɔ. Ewo ŋaa ni atse atua yɛ shikpɔŋ lɛ nɔ. Elaka Adam kɛ Hawa ni amɛtse Nyɔŋmɔ hiɛ atua. (1 Mose 3:1-7; Kpojiemɔ 12:9) Biblia lɛ etsɔɔɔ ŋwɛibɔfo nɛɛ gbɛ́i loo hegbɛ ni eyɔɔ yɛ ŋwɛi dani ebatse atsua lɛ. Shi be ni etse atua lɛ sɛɛ lɛ, Biblia lɛ tsɛ lɛ yɛ gbɛ ni ja nɔ akɛ Satan, ni shishi ji “Shiteekɛwolɔ,” kɛ Abonsam, ni shishi ji “Naafolɔlɔ.”—Mateo 4:8-11.

Dɔlɛ sane ji akɛ, atuatsemɔ nɛɛ waaa jɛmɛ. Noa gbii lɛ amli lɛ, ŋwɛibɔfoi komɛi ‘shi amɛ diɛŋtsɛ amɛshihilɛhe’ yɛ ŋwɛi he ni amɛyɔɔ yɛ Nyɔŋmɔ hiɛ lɛ. Amɛba shikpɔŋ lɛ nɔ ni amɛbaŋɔ heloo gbɔmɔtsei koni amɛkɛ amɛhe abawo jeŋba sha kɛ awuiyeli mli.​—Yuda 6; 1 Mose 6:1-4; 1 Petro 3:19, 20.

Mɛni ba ŋwɛibɔfoi fɔji nɛɛ anɔ? Be ni Nyɔŋmɔ kɛ nu afua ba shikpɔŋ lɛ hiɛ kpãtãmɔ lɛ, amɛtsake amɛhe amɛŋɔ mumɔŋ gbɔmɔtsei kɛtee mumɔi ashihilɛhe lɛ. Shi Nyɔŋmɔ eŋmɛɛɛ amɛ gbɛ koni amɛya “amɛ diɛŋtsɛ amɛshihilɛhe,” ni ji he ni amɛyɔɔ dani amɛba shikpɔŋ lɛ nɔ lɛ. Moŋ lɛ, eshɛrɛ amɛ eshwie Tartaro, ni ji “[mumɔŋ] duŋ kpii” mli. (Yuda 6; 2 Petro 2:4) Daimonioi nɛɛ eŋɔ amɛhe amɛwo Satan Abonsam, ni ji “daimonioi lɛ anɔyelɔ” ni “kwaa feɔ ehe tamɔ la bɔfo” lɛ kudɔmɔ shishi.​—Mateo 12:24; 2 Korintobii 11:14.

Biblia lɛ tsɔɔ akɛ ato Nyɔŋmɔ Mesia Maŋtsɛyeli lɛ, ni ji ŋwɛi nɔyeli lɛ shishi yɛ afi 1914. * Nifeemɔ ni sa kadimɔ waa nɛɛ sɛɛ lɛ, ashɛrɛ Satan kɛ edaimonioi lɛ kɛjɛ ŋwɛi ashwie shikpɔŋ nɛɛ nɔ. Amɛmli efu waa ni amɛsui gbohii lɛ miiná mɛi anɔ hewalɛ; bɔ ni yiwalɛ nifeemɔi kɛ jeŋba sha egbɛ eshwa je lɛŋ fɛɛ lɛ maa enɛ nɔ mi.​—Kpojiemɔ 12:9-12.

Anɔkwa sane ji akɛ, bɔ ni jeŋba sha kɛ awuiyeli efa babaoo nɛɛ maa nɔ mi akɛ, amɛnaagbee ebɛŋkɛ kpaakpa. Etsɛŋ abaatsĩ ŋwɛibɔfoi fɔji nɛɛ anaa, ni amɛnyɛŋ nɔ ko kwraa amɛfee. Be ni Nyɔŋmɔ Maŋtsɛyeli lɛ eye shikpɔŋ ni afee lɛ paradeiso lɛ nɔ afii 1,000 sɛɛ lɛ, abaahã ŋwɛibɔfoi fɔji nɛɛ hegbɛ shi kome ekoŋŋ koni amɛkɛka adesai. No sɛɛ lɛ, abaakpãtã amɛhiɛ kwraa.​—Mateo 25:41; Kpojiemɔ 20:1-3, 7-10.