Dabi, nɔ ko bɛ Biblia lɛ mli loo yinɔsane mli ni tsɔɔ akɛ amɛfee nakai.

Bɔ ni atsɔɔ ŋmalɛ nɛɛ shishi ahã yɛ Bibliai pii amli lɛ ni hãa mɛi náa jwɛŋmɔ lɛ akɛ yɛ Paulo beiaŋ lɛ, Kristofoi komɛi hã abaptisi amɛ yɛ gbohii anajiaŋ. Akɛ nɔkwɛmɔnɔ lɛ, Ga Biblia lɛ kɛɔ akɛ: “Mɛi ni hãa abaptisiɔ amɛ yɛ gbohii anajiaŋ lɛ, te amɛbaafee tɛŋŋ? Kɛ́ gbohii eteŋ shi kwraa lɛ, mɛɛba mɔ ni amɛhãa abaptisiɔ amɛ yɛ gbohii anajiaŋ lɛ?”

Shi kadimɔ nɔ ni Biblia he nilelɔi enyɔ komɛi wie yɛ sane nɛɛ he. Amɛteŋ mɔ kome ni atsɛɔ lɛ Gregory Lockwood lɛ wie akɛ, yɛ yinɔsane mli fɛɛ lɛ, wɔnaaa ni “mɔ ko ehã abaptisi lɛ yɛ gbonyo ko najiaŋ,” ni “wɔnaaa nɔ ko nakai yɛ Biblia lɛ hu mli.” Biblia he nilelɔ kroko ni atsɛɔ lɛ Gordon D. Fee lɛ wie akɛ: “Mɔ ko mɔ ko bɛ ni awie ehe yɛ yinɔsane mli loo Biblia lɛ mli ni hã abaptisi lɛ yɛ gbonyo ko najiaŋ. Kɛ́ wɔkɛ nɔ ni Paulo wie nɛɛ fɔ̃ afã lɛ, awieko nɔ ko ni tamɔ nakai yɛ Kpaŋmɔ Hee lɛ mli; nɔ ko bɛ ni tsɔɔ akɛ blema Kristofoi lɛ loo Kristofoi ni hi shi yɛ bɔfoi lɛ agbele sɛɛ lɛ fee nakai.”

Biblia lɛ hãa wɔleɔ akɛ, Yesu fã esɛɛnyiɛlɔi lɛ ni ‘amɛyafee mɛi ni jɛ jeŋmaji lɛ fɛɛ amli lɛ kaselɔi, amɛbaptisi amɛ, ni amɛtsɔɔ amɛ ni amɛye nii fɛɛ ni efã amɛ lɛ nɔ.’ (Mat. 28:19, 20) Enɛ tsɔɔ akɛ, dani mɔ ko baanyɛ ebatsɔ Yesu kaselɔ ni abaptisi lɛ lɛ, esa akɛ ekase Yehowa kɛ e-Bi lɛ he nii, ehe amɛnɔ eye, ni ebo amɛ toi. Ekã shi faŋŋ akɛ, gbohii nyɛŋ afee enɛ, ni nakai nɔŋŋ mɔ ko nyɛŋ afee nakai yɛ gbonyo ko najiaŋ.​—Jaj. 9:5, 10; Yoh. 4:1; 1 Kor. 1:14-16.

Kɛ́ nakai ni lɛ, belɛ mɛni nɔ ni Paulo wie lɛ tsɔɔ mɔ?

Kristofoi komɛi ni yɔɔ Korinto lɛ kɛɛ “gbohiiashitee ko bɛ.” (1 Kor. 15:12) Shi Paulo hã amɛna faŋŋ akɛ nakai susumɔ lɛ ejaaa. Ekɛɛ amɛ akɛ, daa gbi lɛ, ewala yajeɔ oshãra mli, ni ‘ekɛ gbele kpeɔ hiɛ kɛ hiɛ.’ Shi esheee gbeyei, ejaakɛ ele akɛ, kɛ́ egbo po lɛ, abaatee lɛ shi ni ahã lɛ mumɔŋ gbɔmɔtso, tamɔ eba lɛ yɛ Yesu gbɛfaŋ lɛ.​—1 Kor. 15:30-32, 42-44.

Ehe bahia ni Kristofoi ni yɔɔ Korinto lɛ anu shishi akɛ, kɛ́ ‘abaptisi mɔ ko awo Kristo Yesu mli lɛ,’ belɛ ‘abaptisi lɛ awo egbele lɛ hu mli.’ (Rom. 6:3) Mɛni mfonirifeemɔŋ baptisimɔ nɛɛ tsɔɔ? Nɔ ni etsɔɔ ji akɛ, kɛ́ afɔ mɔ ko mu lɛ, mɔ lɛ kɛ kai baakpe daa gbi, ni ehe baahia ni eye Yehowa anɔkwa. Agbɛnɛ hu, etsɔɔ akɛ, ebaagbo, ni no sɛɛ dani abaatee lɛ shi kɛya ŋwɛi.

Be ko lɛ, Yesu kɛɛ ebɔfoi lɛ ateŋ mɛi enyɔ akɛ: “Abaabaptisi nyɛ kɛ baptisimɔ ni akɛbaptisiɔ mi lɛ.” (Mar. 10:38, 39) Be ni Yesu kɛ amɛ wie lɛ, no mli lɛ, afii komɛi eho kɛjɛ be ni abaptisi lɛ yɛ nu mli lɛ. No hewɔ lɛ, ekã shi faŋŋ akɛ, jeee nu mli baptisimɔ he ekɛ amɛ wieɔ lɛ. Moŋ lɛ, ekɛ amɛ miiwie anɔkwa ni eeye Yehowa kɛmiiya gbele mli tɔ̃ɔ lɛ he. Paulo kɛɛ Kristofoi ni afɔ amɛ mu lɛ akɛ, ‘amɛkɛ Kristo baafee ekome kɛna nɔ, koni awo amɛ kɛ lɛ fɛɛ hiɛ nyam hu.’ (Rom. 8:16, 17; 2 Kor. 4:17) No hewɔ lɛ, mɛi ni afɔ amɛ mu lɛ hu baagboi dani abaatee amɛ shi kɛya ŋwɛi.

Saji ni wɔsusu he lɛ hãa wɔnaa akɛ, eja jogbaŋŋ akɛ Jeŋ Hee Shishitsɔɔmɔ lɛ tsɔɔ 1 Korintobii 15:29 lɛ shishi akɛ, “Kɛjeee nakai lɛ, mɛni mɛi ni abaptisiɔ amɛ awoɔ gbele mli lɛ baafee? Kɛ́ ateee gbohii ashi kwraa lɛ, mɛni hewɔ abaptisiɔ amɛ awoɔ gbele mli lɛ mɔ?”