1. Mɛɛ ŋaa bɔfo Petro wo enyɛmimɛi Kristofoi lɛ? Ni mɛni hewɔ ekolɛ wɔbaanu he akɛ wɔnyɛŋ wɔkɛ ŋaawoo nɛɛ atsu nii lɛ?

KƐ́ WƆYƐ hiɛnɔkamɔ akɛ wɔbaaya ŋwɛi jio, wɔbaahi shikpɔŋ lɛ nɔ jio lɛ, wɔbaanyɛ wɔná ŋaa ni bɔfo Petro wo blema Kristofoi ni afɔ amɛ mu lɛ he sɛɛ. Ekɛɛ amɛ akɛ: “Tamɔ bɔ ni Mɔ Krɔŋkrɔŋ ni tsɛ nyɛ lɛ yɔɔ lɛ, nyɛ hu nyɛfea mɛi krɔŋkrɔŋi yɛ nyɛnifeemɔi fɛɛ amli, ejaakɛ aŋma akɛ: ‘Nyɛfea krɔŋkrɔŋ, ejaakɛ miyɛ krɔŋkrɔŋ.’” (1 Pet. 1:15, 16) Wiemɔi nɛɛ hãa wɔnaa akɛ, wɔbaanyɛ wɔkase Yehowa mɔ ni yɔɔ krɔŋkrɔŋ fe fɛɛ lɛ. Esa akɛ wɔfee krɔŋkrɔŋ yɛ wɔnifeemɔi fɛɛ amli, ni wɔbaanyɛ wɔfee nakai aahu. Shi ekolɛ wɔbaanu he akɛ, emuu ni wɔyeee lɛ hewɔ lɛ, wɔnyɛŋ wɔfee krɔŋkrɔŋ. Petro diɛŋtsɛ po tɔ̃ shii abɔ, shi enɔkwɛmɔnɔ lɛ hãa wɔnaa akɛ wɔbaanyɛ ‘wɔfee krɔŋkrɔŋ.’

2. Mɛɛ sanebimɔi wɔbaahã hetoo yɛ nikasemɔ nɛɛ mli?

² Yɛ nikasemɔ nɛɛ mli lɛ, wɔbaahã sanebimɔi nɛɛ ahetoo: Kɛ́ akɛɛ mɔ ko yɛ krɔŋkrɔŋ lɛ, te atsɔɔ tɛŋŋ? Mɛni Biblia lɛ tsɔɔ wɔ yɛ bɔ ni Yehowa yɔɔ krɔŋkrɔŋ lɛ he? Te wɔbaafee tɛŋŋ wɔfee krɔŋkrɔŋ yɛ wɔnifeemɔi amli? Ni kɛ́ wɔfee krɔŋkrɔŋ lɛ, te esaa wɔ kɛ Yehowa teŋ naanyobɔɔ lɛ he ehãa tɛŋŋ?

3. Kɛ́ akɛɛ mɔ ko yɛ krɔŋkrɔŋ lɛ, mɛni baa mɛi pii ajwɛŋmɔ mli? Shi mɛɛ wolo baaye abua wɔ ni wɔna nɔ ni tsɔɔ akɛ mɔ ko yɛ krɔŋkrɔŋ?

³ Mɛi pii yɛ ni kɛ́ akɛɛ mɔ ko yɛ krɔŋkrɔŋ lɛ, amɛsusuɔ akɛ belɛ mɔ lɛ eŋmɔɔɔ, ewoɔ atadei kakadaji, ni daa nɛɛ ekpe mli. Shi nakai susumɔ lɛ ejaaa. Yehowa yɛ krɔŋkrɔŋ, shi yɛ Biblia lɛ mli lɛ, atsɛɔ lɛ “miishɛɛ Nyɔŋmɔ lɛ.” (1 Tim. 1:11) Ekɛɔ hu akɛ, mɛi ni jáa Yehowa lɛ “yɛ miishɛɛ.” (Lala 144:15) Yesu hu wie eshi mɛi ni woɔ atadei ni baahã mɛi ana amɛ akɛ esoro amɛ  kwraa, kɛ mɛi ni feɔ nibii kpakpai yɛ gbɔmɛi ahiɛ koni mɛi ana amɛ ni amɛjie amɛ yi lɛ. (Mat. 6:1; Mar. 12:38) Anɔkwa Kristofoi ekase Biblia lɛ mli, ni no hewɔ lɛ, kɛ́ akɛɛ mɔ ko yɛ krɔŋkrɔŋ lɛ, amɛle nɔ tuuntu ni atsɔɔ lɛ. Wɔle akɛ, Nyɔŋmɔ sumɔɔ wɔ ni ekɛŋ wɔ akɛ wɔfee nɔ ko ni ele akɛ wɔnyɛŋ wɔfee kɔkɔɔkɔ. No hewɔ lɛ, kɛ́ Yehowa kɛɛ wɔ akɛ, “Nyɛfea krɔŋkrɔŋ” lɛ, wɔle akɛ wɔbaanyɛ wɔfee. Shi dani wɔbaanyɛ wɔfee krɔŋkrɔŋ yɛ nɔ fɛɛ nɔ ni wɔfeɔ lɛ mli lɛ, esa akɛ wɔnu nɔ ni atsɔɔ kɛ́ akɛɛ mɔ ko yɛ krɔŋkrɔŋ lɛ shishi jogbaŋŋ.

4. Kɛ́ akɛɛ mɔ ko yɛ “krɔŋkrɔŋ” lɛ, te atsɔɔ tɛŋŋ?

⁴ Kɛ́ akɛɛ mɔ ko yɛ krɔŋkrɔŋ lɛ, te atsɔɔ tɛŋŋ? Yɛ Biblia lɛ mli lɛ, kɛ́ akɛɛ mɔ ko yɛ “krɔŋkrɔŋ” lɛ, yɛ kukufoo mli lɛ, etsɔɔ akɛ mɔ lɛ jeŋba kɛ ejamɔ he tse ni muji ko kwraa bɛ he. Agbɛnɛ hu, ebaanyɛ etsɔɔ akɛ, mɔ lɛ ejɔɔ ehe nɔ ehã Yehowa akɛ ebaasɔmɔ lɛ. Enɛ tsɔɔ akɛ, dani abaanyɛ akɛɛ akɛ wɔyɛ krɔŋkrɔŋ lɛ, esa akɛ wɔba wɔjeŋ jogbaŋŋ, wɔjá Yehowa yɛ gbɛ ni etsɔɔ akɛ wɔjá lɛ lɛ nɔ, ni wɔkɛ lɛ abɔ naanyo kpaakpa. Ani ebɛ naakpɛɛ akɛ bɔ ni Yehowa yɔɔ krɔŋkrɔŋ lɛ fɛɛ sɛɛ lɛ, eesumɔ ni wɔ ni wɔyeee emuu nɛɛ wɔkɛ lɛ abɔ naanyo kpaakpa?

5. Mɛni ŋwɛibɔfoi anɔkwafoi lɛ tsɔɔ wɔ yɛ Yehowa he?

⁵ Yehowa yɛ krɔŋŋ ni ehe tse yɛ nɔ fɛɛ nɔ mli. Wɔnaa enɛ yɛ nɔ ko ni ŋwɛibɔfoi komɛi ni bɛŋkɛ emaŋtsɛ sɛi lɛ waa ni atsɛɔ amɛ serafim lɛ wie lɛ mli. Amɛteŋ mɛi komɛi kɛ gbee ni wa wie akɛ: “Krɔŋkrɔŋ, krɔŋkrɔŋ, krɔŋkrɔŋ ji Yehowa, taiatsɛ lɛ.” (Yes. 6:3) Ŋwɛibɔfoi nɛɛ yɛ krɔŋkrɔŋ, ejaakɛ eji amɛbɛ krɔŋkrɔŋ kulɛ amɛnyɛŋ amɛhi Yehowa, Nyɔŋmɔ ni yɔɔ krɔŋkrɔŋ lɛ masɛi kpaakpa. Enɛ hewɔ bei komɛi lɛ kɛ́ ŋwɛibɔfoi ba he ko yɛ shikpɔŋ lɛ nɔ lɛ, jɛmɛ feɔ krɔŋkrɔŋ lɛ, tamɔ bɔ ni wɔnaa yɛ Mose kɛ ŋmeitso ni miitso lɛ sane lɛ mli lɛ.​—2 Mo. 3:2-5; Yos. 5:15.

6-7. (a) Tamɔ bɔ ni wɔnaa yɛ 2 Mose 15:1, 11 lɛ, mɛɛ gbɛ nɔ Mose hã Israelbii lɛ na faŋŋ akɛ Nyɔŋmɔ yɛ krɔŋkrɔŋ? (b) Mɛni hã Israelbii lɛ kai be fɛɛ be akɛ Nyɔŋmɔ yɛ krɔŋkrɔŋ? (Kwɛmɔ mfoniri ni yɔɔ wolo lɛ hiɛ lɛ.)

⁶ Be ni Mose nyiɛ Israelbii lɛ ahiɛ kɛfo Ŋshɔ Tsuru lɛ, ehã amɛle faŋŋ akɛ, Yehowa amɛ-Nyɔŋmɔ lɛ yɛ krɔŋkrɔŋ. (Kanemɔ 2 Mose 15:1, 11.) No mli lɛ, Ejiptbii lɛ jáa amale nyɔŋmɔi, ni no hewɔ lɛ amɛbɛ krɔŋkrɔŋ. Nakai nɔŋŋ Kanaanbii ni já amale nyɔŋmɔi lɛ hu bɛ krɔŋkrɔŋ. Nibii ni amɛfee yɛ amɛjamɔi lɛ amli lɛ eko ji akɛ, amɛkɛ gbekɛbii shã afɔle ni amɛkɛ amɛhe wo bɔlɛnamɔ nifeemɔi ni yɔɔ tãŋ amli. (3 Mo. 18:3, 4, 21-24; 5 Mo. 18:9, 10) Esoro Yehowa kwraa yɛ amale nyɔŋmɔi ni Ejiptbii lɛ kɛ Kanaanbii lɛ já lɛ ahe, ejaakɛ Yehowa ekɛŋ mɛi ni jáa lɛ lɛ akɛ amɛkɛ amɛhe awo jeŋba sha mli loo amɛfee yitsoŋwalɛ nɔ ko yɛ ejamɔ mli kɔkɔɔkɔ. Eyɛ krɔŋkrɔŋ yɛ nɔ fɛɛ nɔ mli. Bɔ ni afee ni Israelbii lɛ ahiɛ akakpa enɛ nɔ lɛ, Yehowa hã aŋma nɔ ko yɛ shika tsuru dade fɛtɛfɛtɛ ko ni osɔfonukpa lɛ fiɔ yɛ eyitsofiinɔ lɛ hiɛ lɛ nɔ. Ehã aŋma yɛ nɔ akɛ: “Krɔŋkrɔŋ ji Yehowa.”​—2 Mo. 28:36-38.

⁷ Sane ni aŋma yɛ dade fɛtɛfɛtɛ lɛ nɔ lɛ kai mɔ fɛɛ mɔ ni naa lɛ akɛ, Yehowa yɛ krɔŋkrɔŋ lɛɛlɛŋ. Shi kɛ́ Israelnyo ko nyɛɛɛ ana nɔ ni aŋma yɛ dade fɛtɛfɛtɛ lɛ nɔ akɛni enyɛɛɛ ebɛŋkɛ osɔfonukpa lɛ hu? Ani loloolo lɛ, ebaale akɛ Yehowa yɛ krɔŋkrɔŋ? Hɛɛ, ebaale. Ejaakɛ be fɛɛ be ni abaakane Mla lɛ yɛ hii, yei, kɛ gbekɛbii fɛɛ ni yɔɔ Israel lɛ ahiɛ lɛ, amɛnuɔ ni aawie akɛ, Yehowa yɛ krɔŋkrɔŋ. (5 Mo. 31:9-12) Eji oyɛ blema Israel kulɛ, kɛ́ aakane Mla lɛ obaanu wiemɔi nɛɛ: “Miji Yehowa, nyɛ-Nyɔŋmɔ lɛ, . . . nyɛfea krɔŋkrɔŋ, ejaakɛ miyɛ krɔŋkrɔŋ.” “Nyɛfea krɔŋkrɔŋ nyɛhãa mi, ejaakɛ mi Yehowa lɛ, miyɛ krɔŋkrɔŋ.”​—3 Mo. 11:44, 45; 20:7, 26.

8. Mɛni wɔkaseɔ yɛ 3 Mose 19:2 kɛ 1 Petro 1:14-16 lɛ mli?

 ⁸ Agbɛnɛ, nyɛhãa wɔsusua nɔ ko ni Yehowa kɛɛ Mose akɛ ekɛɛ Israelbii lɛ fɛɛ lɛ he. Aŋma yɛ 3 Mose 19:2 lɛ, ni ekɛɔ akɛ: “Okɛ Israel maŋ muu lɛ fɛɛ awie ni okɛɛ amɛ akɛ, ‘Nyɛfea krɔŋkrɔŋ, ejaakɛ mi Yehowa, nyɛ-Nyɔŋmɔ lɛ, miyɛ krɔŋkrɔŋ.’” Eeenyɛ efee akɛ, be ni Petro wo Kristofoi hewalɛ akɛ ‘amɛfee krɔŋkrɔŋ’ lɛ, no mli lɛ eetsɛ wiemɔi nɛɛ ayisɛɛ. (Kanemɔ 1 Petro 1:14-16.) Ŋmɛnɛ lɛ, wɔbɛ Mose Mla lɛ shishi. Shi nɔ ni Petro wie lɛ kɛ nɔ ni wɔkaseɔ yɛ 3 Mose 19:2 lɛ mli lɛ kpãa gbee. No ji akɛ, Yehowa yɛ krɔŋkrɔŋ ni esa akɛ mɛi ni sumɔɔ lɛ lɛ amia amɛhiɛ ni amɛ hu amɛfee krɔŋkrɔŋ. Ni enɛ lɛ, ekɔɔ mɛi ni yɔɔ hiɛnɔkamɔ akɛ amɛbaaya ŋwɛi kɛ mɛi ni yɔɔ hiɛnɔkamɔ akɛ amɛbaahi paradeiso mli yɛ shikpɔŋ lɛ nɔ lɛ fɛɛ ahe.​—1 Pet. 1:4; 2 Pet. 3:13.

9. Kɛ́ wɔkase 3 Mose yitso 19 lɛ, mɛɛ gbɛ nɔ wɔbaaná he sɛɛ?

⁹ Akɛni wɔmiisumɔ ni wɔsa wɔ-Nyɔŋmɔ ni yɔɔ krɔŋkrɔŋ lɛ hiɛ hewɔ lɛ, wɔmiisumɔ ni wɔle bɔ ni wɔbaafee wɔfee krɔŋkrɔŋ. Yehowa etsɔɔ wɔ nibii komɛi ni wɔbaanyɛ wɔfee koni wɔfee krɔŋkrɔŋ. Wɔnaa enɛ yɛ 3 Mose yitso 19 lɛ mli. Biblia he nilelɔ ko ni atsɛɔ lɛ Marcus Kalisch lɛ wie akɛ: “Etamɔ nɔ ni enɛ ji yitso ni he hiaa fe fɛɛ yɛ Mose Wolo Ni Ji Etɛ lɛ kɛ klɛŋklɛŋ woji enumɔ ni yɔɔ Biblia lɛ mli lɛ amli.” Nyɛhãa wɔsusua nɔ ni awie yɛ 3 Mose yitso 19 lɛ kukuji lɛ ekomɛi amli lɛ ahe ni wɔkwɛ nɔ ni wɔbaanyɛ wɔkase yɛ mli. Be ni wɔfeɔ nakai lɛ, hã ehi ojwɛŋmɔ mli akɛ, dani Yehowa baawie kukuji nɛɛ amli wiemɔi lɛ, no mli lɛ etsɔ hiɛ ekɛɛ Israelbii lɛ akɛ: “Nyɛfea krɔŋkrɔŋ.”

10-11. Mɛni 3 Mose 19:3 lɛ kɛɔ akɛ esa akɛ wɔfee? Ni mɛni hewɔ enɛ he hiaa lɛ?

¹⁰ Be ni Yehowa kɛɛ Israelbii lɛ akɛ amɛfee krɔŋkrɔŋ lɛ, ewie kɛfata he akɛ: “Nyɛteŋ mɔ fɛɛ mɔ abu emami kɛ epapa . . . Miji Yehowa, nyɛ-Nyɔŋmɔ lɛ.”​—3 Mo. 19:2, 3.

¹¹ Eyɛ faŋŋ akɛ, ehe miihia ni wɔbo famɔ ni Nyɔŋmɔ kɛhã akɛ wɔbu wɔfɔlɔi lɛ toi. Kɛ́ obaakai lɛ, be ko lɛ nuu ko bi Yesu akɛ: “Mɛɛ nɔ kpakpa esa akɛ mafee koni maná naanɔ wala?” Be ni Yesu hãa nuu lɛ hetoo lɛ, nibii ni ekɛɛ lɛ lɛ eko ji, “okɛ woo ahã opapa kɛ omami.”  (Mat. 19:16-19) Yesu wie eshi Farisifoi lɛ kɛ woloŋmalɔi lɛ ejaakɛ amɛfee nɔ fɛɛ nɔ ni amɛbaanyɛ koni amɛjo sɔ̃ ni kã amɛnɔ akɛ amɛkɛ woo ahã amɛfɔlɔi lɛ naa foi. Amɛsubaŋ gbonyo nɛɛ hewɔ lɛ, Yesu kɛɛ amɛ akɛ, ‘amɛgu Nyɔŋmɔ wiemɔ lɛ.’ (Mat. 15:3-6) Nibii ni Nyɔŋmɔ ewie lɛ eko ji, Kitãi Nyɔŋma lɛ ateŋ nɔ ni ji enumɔ lɛ kɛ sane ni yɔɔ 3 Mose 19:3 lɛ. (2 Mo. 20:12) Shi kome ekoŋŋ lɛ, hã ehi ojwɛŋmɔ mli akɛ, dani Yehowa kɛ famɔ ni yɔɔ 3 Mose 19:3 lɛ akɛ, mɔ fɛɛ mɔ abu emami kɛ epapa lɛ baahã lɛ, no mli lɛ etsɔ hiɛ ewie akɛ: “Nyɛfea krɔŋkrɔŋ, ejaakɛ mi Yehowa, nyɛ-Nyɔŋmɔ lɛ, miyɛ krɔŋkrɔŋ.”

12. Mɛni kɛ́ wɔfee lɛ no baatsɔɔ akɛ wɔmiiye famɔ ni yɔɔ 3 Mose 19:3 lɛ nɔ?

¹² Wɔteŋ mɔ fɛɛ mɔ baanyɛ abi ehe akɛ, ‘Ani miiye famɔ ni Nyɔŋmɔ kɛhã akɛ mikɛ woo ahã mifɔlɔi lɛ nɔ?’ Kɛ́ onuɔ he akɛ obɔko mɔdɛŋ yɛ enɛ gbɛfaŋ lɛ, obaanyɛ otswa ofai shi akɛ kɛjɛ bianɛ kɛyaa lɛ, obaatsake. Nɔ ni eho lɛ eho. Shi obaanyɛ otswa ofai shi akɛ kɛjɛ bianɛ kɛyaa lɛ, obaaná dekã pii ohã ofɔlɔi lɛ ni oye obua amɛ waa. Ekolɛ obaanyɛ oto gbɛjianɔ ni ofɔ amɛ saramɔ. Agbɛnɛ hu, obaanyɛ oto gbɛjianɔ ni amɛnine ashɛ nibii ni he hiaa amɛ yɛ heloŋ gbɛfaŋ lɛ anɔ, ni oye obua amɛ ni amɛya nɔ amɛsɔmɔ Yehowa ni amɛhi emasɛi kpaakpa. Aloo obaanyɛ owo amɛ hewalɛ ni oshɛje amɛmii. Kɛ́ ofee nibii nɛɛ, belɛ ooye famɔ ni Yehowa kɛhã yɛ 3 Mose 19:3 lɛ nɔ.

13. (a) Mɛɛ nɔ kroko wɔkaseɔ yɛ 3 Mose 19:3 lɛ mli? (b) Mɛni Yesu fee ni abɔ he amaniɛ yɛ Luka 4:16-18? Ni te wɔbaafee tɛŋŋ wɔkase lɛ?

¹³ Nɔ kroko yɛ 3 Mose 19:3 lɛ mli ni tsɔɔ wɔ nɔ ni kɛ́ wɔfee lɛ wɔbaafee krɔŋkrɔŋ. Yehowa fã Israelbii lɛ yɛ jɛmɛ akɛ, amɛye Hejɔɔmɔ Gbi lɛ. Kristofoi bɛ Mla lɛ shishi, ni no hewɔ lɛ, wɔyeee Hejɔɔmɔ Gbi lɛ. Shi nɔ ko ni he hiaa waa yɛ ni wɔbaanyɛ wɔkase yɛ nɔ ni Israelbii lɛ fee yɛ Hejɔɔmɔ Gbi lɛ nɔ lɛ kɛ bɔ ni amɛná he sɛɛ amɛhã lɛ mli. Yɛ Hejɔɔmɔ Gbi lɛ nɔ lɛ, Israelbii lɛ tsuuu heloonaa nitsumɔ, moŋ lɛ, amɛjáa Nyɔŋmɔ. * No hewɔ ni Yesu yaa kpeehe ni yɔɔ emaŋ lɛ mli lɛ yɛ Hejɔɔmɔ Gbi lɛ nɔ ni eyakaneɔ Nyɔŋmɔ Wiemɔ lɛ. (2 Mo. 31:12-15; kanemɔ Luka 4:16-18.) Esa akɛ famɔ ni Nyɔŋmɔ kɛhã yɛ 3 Mose 19:3 lɛ akɛ, ‘aye hejɔɔmɔ gbii lɛ’ awo wɔ hewalɛ ni daa gbi lɛ wɔto gbɛjianɔ ni wɔfee nibii ni baahã wɔbɛŋkɛ Yehowa. Ani oona akɛ obaanyɛ oya ohiɛ yɛ enɛ feemɔ mli? Kɛ́ daa gbi lɛ wɔto gbɛjianɔ koni wɔná be ni wɔkɛjá Yehowa lɛ, no baahã wɔbɛŋkɛ lɛ kpaakpa, ni kɛ́ wɔbɛŋkɛ lɛ kpaakpa lɛ, no baaye abua wɔ ni wɔfee krɔŋkrɔŋ.

14. Mɛɛ wiemɔ ni he hiaa waa akɛtsu nii shii abɔ yɛ 3 Mose yitso 19 lɛ mli?

¹⁴ Akɛ wiemɔ ko ni he hiaa waa ni baanyɛ aye abua wɔ ni wɔfee krɔŋkrɔŋ lɛ etsu nii shii abɔ yɛ 3 Mose yitso 19 lɛ mli. Yɛ kuku 4 lɛ naagbee lɛ, awie akɛ: “Miji Yehowa, nyɛ-Nyɔŋmɔ lɛ.” Wiemɔ nɛɛ nɔŋŋ loo ekrokomɛi ni tamɔ nakai lɛ jeɔ kpo shii 16 yɛ 3 Mose yitso 19 lɛ mli. Enɛ hãa wɔkaiɔ klɛŋklɛŋ kitã ni Yehowa kɛhã lɛ akɛ: “Miji Yehowa, o-Nyɔŋmɔ lɛ . . . Kaaná nyɔŋmɔi krokomɛi yɛ misɛɛ.” (2 Mo. 20:2, 3) Esa akɛ Kristofonyo fɛɛ Kristofonyo ni miitao afee krɔŋkrɔŋ lɛ akwɛ jogbaŋŋ ni mɔ ko mɔ ko loo nɔ ko nɔ ko akafite naanyobɔɔ ni yɔɔ ekɛ Nyɔŋmɔ teŋ lɛ. Ni akɛni Yehowa Odasefoi ji wɔ hewɔ lɛ, wɔtswa wɔfai shi akɛ wɔfeŋ nɔ ko ni baahã awo egbɛ́i krɔŋkrɔŋ lɛ he muji loo agbe he guɔ.​—3 Mo. 19:12; Yes. 57:15.

15. Kɛ́ wɔkane 3 Mose yitso 19 lɛ mli saji ni kɔɔ afɔleshai ahe lɛ, mɛni esa akɛ ewo wɔ hewalɛ ni wɔfee?

¹⁵ Nɔ kome ni Israelbii lɛ fee kɛtsɔɔ akɛ  Yehowa ji amɛ-Nyɔŋmɔ ji akɛ, amɛye emlai lɛ anɔ. Yɛ 3 Mose 18:4 lɛ, Yehowa kɛɛ amɛ akɛ: “Nyɛyea miyiŋkpɛi lɛ anɔ, ni nyɛyea mimlai lɛ hu anɔ, ni nyɛnyiɛa yɛ naa. Miji Yehowa, nyɛ-Nyɔŋmɔ lɛ.” Wɔnaa ‘mlai’ ni Yehowa kɛhã Israelbii lɛ ekomɛi yɛ 3 Mose yitso 19 lɛ mli. Akɛ nɔkwɛmɔnɔ lɛ, yɛ kuku 5-8, 21, 22 lɛ, wɔnaa mlai ni ekɛhã amɛ yɛ afɔlei ni akɛ kooloi shãa lɛ ahe. Yehowa bi ni amɛshã afɔlei nɛɛ bɔ ni hãŋ ‘amɛbule enibii krɔŋkrɔŋi lɛ.’ Kɛ́ wɔkane kukuji nɛɛ, esa akɛ ewo wɔ hewalɛ ni wɔfee nibii ni sa Nyɔŋmɔ hiɛ, ni wɔkɛ yijiemɔ afɔlei ni sa ehiɛ ahã lɛ, tamɔ bɔ ni Hebribii 13:15 lɛ woɔ wɔ hewalɛ ni wɔfee lɛ.

16. Mɛɛ shishitoo mla yɔɔ 3 Mose 19:19 lɛ mli ni kaiɔ wɔ akɛ esa akɛ mɛi ni jáa Nyɔŋmɔ lɛ ahã esoro amɛ yɛ mɛi ni jáaa lɛ lɛ ahe?

¹⁶ Kɛ́ wɔmiitao wɔfee krɔŋkrɔŋ lɛ, esa akɛ wɔhã mɛi ana akɛ esoro wɔ kwraa yɛ mɛi ni jáaa Nyɔŋmɔ lɛ ahe. Shi jeee be fɛɛ be enɛ feemɔ yɔɔ mlɛo. Bei komɛi lɛ, mɛi ni wɔkɛyaa skul, mɛi ni wɔkɛtsuɔ nii, wɔwekumɛi ni jeee Odasefoi, kɛ mɛi krokomɛi baanyɛ anyɛ wɔnɔ ni wɔfee nibii ni baanyɛ ahã ewa kɛhã wɔ akɛ wɔbaajá Yehowa jogbaŋŋ. Bɔ ni wɔfeɔ wɔnii wɔhãa yɛ shihilɛi ni tamɔ nakai lɛ amli lɛ he miihia waa. Mɛni baaye abua wɔ ni wɔfee nɔ ni ja? Shishitoo mla ni yɔɔ 3 Mose 19:19 lɛ baanyɛ aye abua wɔ. Efã ko kɛɔ akɛ: “Kaawo atade ni akɛ kpãi srɔtoi enyɔ futu kɛfee.” Mla nɛɛ ji nɔ kome ni hã esoro Israelbii lɛ yɛ maji ni bɔle amɛ lɛ ahe. Ŋmɛnɛ lɛ, wɔbɛ Mla lɛ shishi, ni no hewɔ lɛ, ejeee tɔmɔ akɛ wɔbaawo atade ni akɛ kpãi srɔtoi enyɔ, tamɔ ekolɛ pɔliɛsta kɛ kɔtin futu kɛfee. Shi wɔkwɛɔ jogbaŋŋ koni wɔkafee wɔnii tamɔ mɛi ni ehiii shi yɛ nibii ni Biblia lɛ tsɔɔ lɛ anaa, kɛ́ wɔkɛ mɛi nɛɛ yaa skul, wɔkɛ amɛ tsuɔ nii loo amɛji wɔwekumɛi po. Wɔsumɔɔ wɔwekumɛi lɛ kɛ mɛi krokomɛi asane. Shi akɛni Yehowa webii ji wɔ hewɔ lɛ, wɔmiisumɔ ni wɔbo lɛ toi, ni bei komɛi lɛ, enɛ hãa esoroɔ wɔ yɛ mɛi ni bɔle wɔ lɛ ahe. Be fɛɛ be lɛ, esa akɛ wɔhã sane ni he hiaa waa nɛɛ ahi wɔjwɛŋmɔ mli. No ji akɛ, wɔhe nɔ ni wɔjɔɔ wɔhã Nyɔŋmɔ lɛ fata nibii ni hãa wɔfeɔ krɔŋkrɔŋ lɛ ahe.​—2 Kor. 6:14-16; 1 Pet. 4:3, 4.

17-18. Mɛɛ nɔ ko ni he hiaa waa wɔkaseɔ yɛ 3 Mose 19:23-25 lɛ mli?

¹⁷ Kulɛ esa akɛ wiemɔ ni ji, “Miji Yehowa, nyɛ-Nyɔŋmɔ lɛ” ahã Israelbii lɛ ana akɛ esa akɛ amɛhã naanyobɔɔ ni yɔɔ amɛ kɛ Yehowa teŋ lɛ he ahia amɛ fe nibii krokomɛi fɛɛ. Mɛni hewɔ wɔkɛɔ nakai? Wɔnaa nɔ kome hewɔ ni wɔkɛɔ nakai lɛ yɛ 3 Mose 19:23-25. (Kanemɔ.) Ŋmalɛ nɛɛ hãa wɔnaa nɔ ni Yehowa bi ni Israelbii lɛ afee kɛ́ amɛyashɛ Shiwoo Shikpɔŋ lɛ nɔ. Ekɛɛ amɛ akɛ kɛ́ amɛdu yelitso ko lɛ, esaaa akɛ amɛyeɔ enɔ yibii lɛ afii etɛ. Yɛ afi ni  ji ejwɛ lɛ mli lɛ, akɛ yibii fɛɛ ni tso lɛ baawo lɛ baaya Yehowa shĩa lɛ. Kɛkɛ lɛ, kɛjɛ afi ni ji enumɔ lɛ nɔ kɛyaa lɛ, tso lɛ nɔtsɛ lɛ baanyɛ aye enɔ yibii lɛ. Kulɛ esa akɛ mla nɛɛ ahã Israelbii lɛ ana akɛ, nibii ni kɔɔ Yehowa jamɔ he lɛ ahe miihia fe amɛ diɛŋtsɛ amɛnibii. Yehowa miisumɔ ni amɛkɛ amɛhiɛ afɔ̃ enɔ akɛ ebaakwɛ amɛ, ni amɛhã ejamɔ lɛ he ahia amɛ fe nibii krokomɛi fɛɛ. Kɛ́ amɛfee nakai lɛ, ehãŋ hɔmɔ aye amɛ kɔkɔɔkɔ. Agbɛnɛ hu, mla nɛɛ hã amɛna akɛ esa akɛ amɛjɛ amɛsuɔmɔ mli amɛkɛ nikeenii aya he ni ajáa Nyɔŋmɔ yɛ lɛ.

¹⁸ Mla ni yɔɔ 3 Mose 19:23-25 lɛ kaiɔ wɔ nɔ ko ni Yesu wie yɛ Gɔŋ Nɔ Shiɛmɔ lɛ mli. Ewie akɛ: “Nyɛkpaa nyɛtsui ni nyɛyeɔ yɛ . . . nɔ ni nyɛbaaye loo nɔ ni nyɛbaanu lɛ hewɔ.” Kɛkɛ ni ewie kɛfata he akɛ: “Nyɛŋwɛi Tsɛ lɛ le akɛ nibii nɛɛ fɛɛ ahe miihia nyɛ.” Yehowa kwɛɔ loofɔji lɛ, ni ebaakwɛ wɔ hu. (Mat. 6:25, 26, 32) Wɔle akɛ Yehowa baakwɛ wɔ, ni no hewɔ lɛ, wɔyeɔ wɔbuaa mɛi ni efĩ amɛ lɛ. Shi wɔfeɔ lɛ bɔ ni gbalaŋ mɛi ajwɛŋmɔ kɛbaŋ wɔnɔ. Agbɛnɛ hu, wɔjɛɔ wɔsuɔmɔ mli wɔtsuɔ onia koni akɛwo nyɔji ni wɔsafo lɛ bɔɔ lɛ. Yehowa naa oniai ni wɔtsuɔ lɛ ni ebaajɔɔ wɔ. (Mat. 6:2-4) Kɛ́ wɔjɛ wɔsuɔmɔ mli wɔye wɔbua mɛi, ni wɔtsu onia lɛ, no tsɔɔ akɛ wɔkase nii kɛjɛ 3 Mose 19:23-25 lɛ mli.

19. Mɛɛ gbɛ nɔ oná 3 Mose yitso 19 lɛ mli kukuji ni wɔsusu he lɛ ahe sɛɛ?

¹⁹ Wɔsusu 3 Mose yitso 19 lɛ mli kukuji fioo komɛi ahe ni no ehã wɔna bɔ ni wɔbaafee wɔkase wɔ-Nyɔŋmɔ ni yɔɔ krɔŋkrɔŋ lɛ. Kɛ́ wɔkase Nyɔŋmɔ lɛ, no tsɔɔ akɛ wɔmiimia wɔhiɛ ni ‘wɔfee krɔŋkrɔŋ yɛ wɔnifeemɔi fɛɛ amli.’ (1 Pet. 1:15) Mɛi ni jáaa Yehowa lɛ ateŋ mɛi pii naa wɔjeŋba kpakpa lɛ, ni no etsirɛ amɛteŋ mɛi komɛi ni amɛwo Yehowa hiɛ nyam. (1 Pet. 2:12) Shi nibii krokomɛi yɛ ni wɔbaanyɛ wɔkase yɛ 3 Mose yitso 19 lɛ mli. Yɛ nikasemɔ ni nyiɛ sɛɛ lɛ mli lɛ, wɔbaasusu nakai ŋmalɛ lɛ mli kukuji krokomɛi ahe. Enɛ baaye abua wɔ ni wɔna nibii krokomɛi ni wɔbaanyɛ wɔfee koni ‘wɔfee krɔŋkrɔŋ’ tamɔ bɔ ni Petro wo wɔ hewalɛ ni wɔfee lɛ.