1-2. (a) Mɛni afã Yesu bɔfoi etɛ komɛi akɛ amɛfee? Ni te amɛfee amɛnii yɛ he amɛhã tɛŋŋ? (b) Mɛni he wɔbaasusu yɛ nikasemɔ nɛɛ mli?

YƐ AFI 32 Ŋ.B. Hehoo lɛ sɛɛ lɛ, bɔfo Petro, bɔfo Yakobo, kɛ bɔfo Yohane na ninaa ko ni yɔɔ naakpɛɛ. Yesu kɛ amɛ tee gɔŋ ko ni kwɔ ni eeenyɛ efee akɛ, no ji Hermon Gɔŋ lɛ afã ko nɔ, ni etsake yɛ amɛhiɛ. “Ehiɛ kpɛ tamɔ hulu, ni etadei anɔhaanɔi lɛ yɛ tamɔ la.” (Mat. 17:1-4) Be ni ninaa lɛ miihe aba naagbee lɛ, bɔfoi lɛ nu ni Nyɔŋmɔ miikɛɛ akɛ: “Mɔ nɛ ji mi-Bi ni misumɔɔ lɛ lɛ, mɔ ni miná ehe miishɛɛ lɛ. Nyɛboa lɛ toi.” (Mat. 17:5) Bɔ ni bɔfoi etɛ nɛɛ hi shi amɛhã lɛ hãa wɔnaa akɛ, amɛbo Yesu toi, ni esa akɛ wɔkase amɛ.

² Yɛ nikasemɔ ni tsɔ hiɛ lɛ mli lɛ, wɔna akɛ nɔ kome ni baatsɔɔ akɛ wɔmiibo Yesu toi ji, ni wɔbaakpa nibii komɛi feemɔ. Yɛ nikasemɔ nɛɛ mli lɛ, wɔbaakwɛ nibii enyɔ ni Yesu kɛɛ wɔfee.

3. Yɛ Mateo 7:13, 14 lɛ, mɛni Yesu kɛɛ wɔfee?

³ Kanemɔ Mateo 7:13, 14. Kadimɔ akɛ, Yesu tsĩ agbói enyɔ kɛ gbɛi enyɔ tã. Ekɛɛ gbɛ lɛ ekome “lɛɛ” ni ekroko lɛ “elɛɛɛ.” Ewieee akɛ gbɛ ni ji etɛ ko yɛ. Wɔteŋ mɔ fɛɛ mɔ baahala gbɛi enyɔ nɛɛ ateŋ nɔ ni ebaatsɔ nɔ. Enɛ ji yiŋ ni he hiaa fe fɛɛ ni wɔbaakpɛ yɛ wɔshihilɛ mli, ejaakɛ no baatsɔɔ kɛji wɔbaaná naanɔ wala aloo wɔnáŋ.

4. Mɛni obaanyɛ owie yɛ “gbɛ ni lɛɛ lɛ” he?

 ⁴ Esa akɛ wɔhã srɔto ni yɔɔ gbɛi enyɔ nɛɛ ateŋ lɛ ahi wɔjwɛŋmɔ mli jogbaŋŋ. Mɛi babaoo nyiɛ “gbɛ ni lɛɛ lɛ” nɔ, ejaakɛ enɔ nyiɛmɔ waaa. Dɔlɛ sane ji akɛ, amɛteŋ mɛi babaoo sumɔɔɔ ni amɛshiɔ gbɛ nɛɛ nɔ, ejaakɛ amɛsumɔɔɔ ni esoroɔ amɛ yɛ mɛi krokomɛi ahe. Amɛyɔseee akɛ gbɛ nɛɛ kɛ mɔ yaa gbele mli, ni akɛ, Satan Abonsam ji mɔ ni miisumɔ ni mɛi anyiɛ nɔ.​—1 Kor. 6:9, 10; 1 Yoh. 5:19.

5. Mɛni mɛi komɛi efee ni no ehã amɛna “gbɛ ni elɛɛɛ lɛ” ni amɛbɔi nɔ nyiɛmɔ?

⁵ Gbɛ kroko lɛ ni Yesu wie he lɛ ji “gbɛ ni elɛɛɛ lɛ,” ni ekɛɛ mɛi fioo ji mɛi ni naa nakai gbɛ lɛ. Mɛni hewɔ? Kadimɔ akɛ, yɛ kuku ni nyiɛ sɛɛ lɛ mli lɛ, Yesu bɔ esɛɛnyiɛlɔi lɛ kɔkɔ yɛ amale gbalɔi ahe. (Mat. 7:15) Mɛi komɛi kɛɛ jamɔi akpekpei abɔ ni yɔɔ je lɛ mli, ni jamɔi nɛɛ fɛɛ kɛɛ amɛtsɔɔ anɔkwale lɛ. Enɛ hewɔ lɛ, mɛi babaoo anijiaŋ eje wui loo amɛyiŋ efutu amɛ, ni amɛgbaaa amɛhe naa po ni amɛbaatao gbɛ ni kɛ mɔ yaa wala mli lɛ. Shi nakai gbɛ lɛ yɛ, ni amɛbaanyɛ amɛna. Yesu wie akɛ: “Kɛji nyɛhi miwiemɔ lɛ mli lɛ, belɛ mikaselɔi ji nyɛ lɛɛlɛŋ, ni nyɛbaale anɔkwale lɛ, ni anɔkwale lɛ baahã nyɛye nyɛhe.” (Yoh. 8:31, 32) Osa yijiemɔ akɛ onyiɛɛɛ mɛi babaoo lɛ asɛɛ, shi moŋ lɛ, otao anɔkwale lɛ. Okɛ hiɛdɔɔ kase Nyɔŋmɔ Wiemɔ lɛ koni ole bɔ ni eesumɔ ni wɔhi shi wɔhã, ni obo Yesu tsɔɔmɔi lɛ toi. Nibii ni okase lɛ ekomɛi ji akɛ, Yehowa miisumɔ ni wɔtsi wɔhe kwraa kɛje amale jamɔ he, ni wɔkpa gbii juji ni jɛ amale jamɔ mli lɛ yeli. Okase hu akɛ, kɛ́ ootao ofee nɔ ni Yehowa sumɔɔ ni otsi ohe kɛje nifeemɔi ni esaaa ehiɛ lɛ ahe lɛ, onáŋ lɛ mlɛo. (Mat. 10:34-36) Ni lɛɛlɛŋ, ekolɛ onáaa lɛ mlɛo akɛ obaafee tsakemɔi ni esa akɛ ofee lɛ. Shi omia ohiɛ ofee kɛ̃, ejaakɛ osumɔɔ Yehowa, o-Tsɛ ni yɔɔ ŋwɛi lɛ, ni oosumɔ ni ená ohe miishɛɛ. Ohã Yehowa tsui enyɔ emli waa diɛŋtsɛ!​—Abɛi 27:11.

6. Yɛ nɔ ni aŋma yɛ Lala 119:9, 10, 45, 133 lɛ naa lɛ, mɛni baaye abua wɔ ni wɔkaje gbɛ ni elɛɛɛ lɛ nɔ?

⁶ Amrɔ nɛɛ ni obayi gbɛ ni elɛɛɛ lɛ nɔ lɛ, mɛni baaye abua bo ni okaje nɔ? Hã wɔsusu nɔkwɛmɔnɔ ko he wɔkwɛ. Bei komɛi lɛ, afoɔ gbɛjegbɛi ni elɛɛɛ ni kamɔ gɔji anɔ lɛ ahe afabaŋ koni tsɔji akayanyiɛ gbɛ lɛ toi loo amɛje gbɛ lɛ nɔ amɛyagbee jɔɔ lɛ mli. Mɔ ko mɔ ko bɛ ni baakɛɛ akɛ akɛni afabaŋ lɛ hãaa enyɛ eje gbɛ lɛ nɔ ni eyagbee jɔɔ lɛ mli hewɔ lɛ, ehiii. Yehowa shishitoo mlai ni yɔɔ Biblia lɛ mli lɛ tamɔ nakai afabaŋ lɛ. Shishitoo mlai nɛɛ yeɔ amɛbuaa wɔ koni wɔkaje gbɛ ni elɛɛɛ lɛ nɔ.​—Kanemɔ Lala 119:9, 10, 45, 133.

7. Oblahii kɛ oblayei, te esa akɛ nyɛna gbɛ ni elɛɛɛ lɛ nyɛhã tɛŋŋ?

⁷ Oblahii kɛ oblayei, ani bei komɛi lɛ nyɛnuɔ he akɛ Yehowa shishitoo mlai lɛ hãaa nyɛhe ajɔ nyɛ? Nakai Satan miisumɔ ni nyɛnu he. Eesumɔ ni nyɛnu he akɛ, mɛi ni nyiɛ gbɛ ni lɛɛ lɛ nɔ lɛ ahe ejɔ amɛ, ni amɛmiiye wala. Ekolɛ ebaahã nyɛnu he akɛ, akɛni nyɛfeee nibii ni mɛi ni nyɛkɛyaa skul loo mɛi ni nyɛnaa yɛ Intanɛt lɛ nɔ lɛ feɔ lɛ eko hewɔ lɛ, nyɛbɛ mli ni ayaa. Satan miisumɔ ni nyɛnu he akɛ, Yehowa shishitoo mlai lɛ miifite nyɛmiishɛɛ. * Shi nyɛkaia akɛ, Satan sumɔɔɔ ni mɛi ni nyiɛ egbɛ lɛ nɔ lɛ ana akɛ  ekɛ amɛbaayagbe naa yɛ gbele mli. Shi Yehowa ehã nyɛna faŋŋ akɛ, kɛ́ nyɛnyiɛ gbɛ ni elɛɛɛ lɛ nɔ lɛ, nyɛbaaná naanɔ wala.​—Lala 37:29; Yes. 35:5, 6; 65:21-23.

8. Mɛni oblahii kɛ oblayei baanyɛ akase yɛ Olaf niiashikpamɔ lɛ mli?

⁸ Nyɛhãa wɔkwɛa nɔ ni oblahii kɛ oblayei baanyɛ akase yɛ nyɛmi nuu ko ni atsɛɔ lɛ Olaf * lɛ niiashikpamɔ lɛ mli. Mɛi ni ekɛyaa skul lɛ ka akɛ amɛbaanyɛ enɔ ni ekɛ ehe awo jeŋba sha mli. Be ni ekɛɛ amɛ akɛ Yehowa Odasefonyo ji lɛ, ni ehiɔ shi yɛ Biblia mli shishitoo mlai ni kɔɔ jeŋba he lɛ anaa lɛ, oblayei komɛi ni kɛ lɛ yɔɔ klas lɛ tswa amɛfai shi akɛ, amɛbaafee bɔ fɛɛ bɔ ni amɛbaanyɛ ni amɛhã ekɛ amɛ aná bɔlɛ. Shi Olaf hãaa amɛ hegbɛ. Olaf kɛ naagba kroko hu kpe. Ewie akɛ: “Mitsɔɔlɔi lɛ bɔ mɔdɛŋ akɛ amɛbaakɔne miyiŋ ni maya yunivɛsiti. Amɛkɛɛ kɛ́ mitee lɛ, no dani mihiɛ baaba nyam yɛ mɛi ahiɛ. Shi kɛ́ miyaaa lɛ, mináŋ nitsumɔ kpakpa matsu, ni mináŋ miishɛɛ yɛ shihilɛ mli.” Mɛni ye ebua Olaf yɛ shihilɛi enyɔ nɛɛ fɛɛ amli? Ewie akɛ: “Mikɛ misafoŋbii  lɛ bɔ kpaakpa, amɛbatsɔ tamɔ miweku. Agbɛnɛ hu, mikɛ hiɛdɔɔ kase Biblia lɛ waa. Biblia lɛ ni mikase lɛ hã miná nɔmimaa akɛ, anɔkwale lɛ mli miyɔɔ lɛ. Enɛ hewɔ lɛ, mitswa mifai shi akɛ masɔmɔ Yehowa.”

9. Kɛ́ wɔsumɔɔɔ ni wɔjeɔ gbɛ ni elɛɛɛ lɛ nɔ lɛ, mɛni esa akɛ wɔfee?

⁹ Satan miifee nibii ni baanyɛ ahã oje gbɛ ni kɛ mɔ yaa wala mli lɛ nɔ. Eesumɔ ni oyafata mɛi babaoo ni nyiɛ gbɛ ni lɛɛ “ni kɛ mɔ yaa hiɛkpatamɔ mli” lɛ nɔ lɛ ahe. (Mat. 7:13) Shi kɛ́ wɔtee nɔ wɔbo Yesu toi ni wɔna gbɛ ni elɛɛɛ lɛ akɛ ebuɔ wɔhe lɛ, no lɛ wɔjeŋ gbɛ nɛɛ nɔ kɔkɔɔkɔ. Agbɛnɛ, nyɛhãa wɔsusua nɔ kroko ni Yesu kɛɛ wɔfee lɛ he.

10. Yɛ nɔ ni Yesu wie yɛ Mateo 5:23, 24 lɛ naa lɛ, mɛni esa akɛ wɔfee?

¹⁰ Kanemɔ Mateo 5:23, 24. Yɛ ŋmalɛ nɛɛ mli lɛ, Yesu wie nɔ ko ni Yudafoi lɛ buɔ lɛ akɛ ehe miihia waa lɛ he. Feemɔ nɔ ni ewie lɛ he mfoniri okwɛ. Naa mɔ ko ni etee sɔlemɔ shĩa lɛ ni ekɛ kooloo yaahã osɔfo lɛ ni akɛshã afɔle ahã lɛ. Nɔŋŋ ni ekai akɛ, enyɛmi ko kɛ lɛ yɛ sane. Yesu kɛɛ eshi efɔle lɛ ni ‘eya.’ Mɛni hewɔ? Mɛni nɔŋŋ eyaafee ni he hiaa fe ni ebaashã afɔle ehã Yehowa? Yesu tsɔɔ nɔ ni ji lɛ faŋŋ. Ekɛɛ: “Klɛŋklɛŋ lɛ, okɛ onyɛmi lɛ ayasaa.”

11. Mɛni Yakob fee koni esaa ekɛ enyɛmi Esau teŋ?

¹¹ Wɔbaanyɛ wɔkase nɔ ko ni he hiaa waa yɛ bɔ ni wɔbaafee wɔsaa wɔ kɛ mɛi ateŋ lɛ he yɛ sane ko ni tee nɔ yɛ Yakob shihilɛ mli lɛ mli. Be ko lɛ, Nyɔŋmɔ tsɔ ŋwɛibɔfo ko nɔ efã lɛ akɛ eku esɛɛ kɛya emaŋ. No mli lɛ, eshi jɛmɛ nɛɛ eehe eshɛ afii 20. (1 Mo. 31:11, 13, 38) Shi sane ko yɛ ni miigba Yakob naa. Dani ebaashi lɛ, no mli lɛ enyɛmi nuu onukpa Esau miitao egbe lɛ. (1 Mo. 27:41) Enu he akɛ benɛ nɛɛ, enyɛmi lɛ miitao lɛ egbe lolo, ni no hã eshe gbeyei waa ni “ehao.” (1 Mo. 32:7) Mɛni Yakob fee koni ekɛsaa ekɛ enyɛmi lɛ teŋ? Klɛŋklɛŋ lɛ, ekɛ hiɛdɔɔ sɔle waa ehã Yehowa yɛ sane lɛ he. No sɛɛ lɛ, etsu ni akɛ nikeenii pii yahã enyɛmi lɛ. (1 Mo. 32:9-15) Naagbee kwraa lɛ, be ni Yakob na Esau lɛ, ejie bulɛ kpo etsɔɔ lɛ. Ekula shi ni ekɛ ehiɛ bu shi, jeee shi kome, jeee shii enyɔ, shi shii kpawo sɔŋŋ! Bɔ ni Yakob ba ehe shi ni ejie bulɛ kpo etsɔɔ Esau lɛ hewɔ lɛ, enyɛ esaa ekɛ lɛ teŋ.​—1 Mo. 33:3, 4.

12. Mɛni wɔbaanyɛ wɔkase yɛ gbɛ ni Yakob tsɔ nɔ esaa ekɛ Esau teŋ lɛ mli?

¹² Mɛni wɔbaanyɛ wɔkase yɛ gbɛ ni Yakob tsɔ nɔ esaa ekɛ Esau teŋ lɛ mli? Klɛŋklɛŋ lɛ, Yakob ba ehe shi ni esɔle ebi Yehowa dɛŋ yelikɛbuamɔ. No sɛɛ lɛ, efee nɔ fɛɛ nɔ ni ebaanyɛ koni enyɛ esaa ekɛ enyɛmi lɛ teŋ, ni no tsɔɔ akɛ nɔ ni esɔle ebi lɛ kã etsui nɔ. Be ni Yakob kɛ Esau kpe lɛ, ebɔɔɔ mɔdɛŋ akɛ ebaatsɔɔ lɛ mɔ ni sane ja kɛ mɔ ni sane ejaaa, ejaakɛ nɔ ni he hiaa lɛ ji, ni esaa ekɛ enyɛmi lɛ teŋ. Te wɔbaafee tɛŋŋ wɔkase Yakob?

13-14. Kɛ́ wɔtɔ̃ wɔnyɛmi Kristofonyo ko nɔ lɛ, mɛni esa akɛ wɔfee?

¹³ Kɛ́ wɔmiitao wɔhi gbɛ ni kɛ mɔ yaa wala mli lɛ nɔ lɛ, belɛ esa akɛ wɔbɔ mɔdɛŋ wɔhã toiŋjɔlɛ ahi wɔ kɛ mɛi ateŋ. (Rom. 12:18) No hewɔ lɛ, kɛ́ wɔna akɛ wɔtɔ̃ wɔnyɛmi ko nɔ lɛ, mɛni esa akɛ wɔfee? Esa akɛ wɔsɔle waa wɔhã Yehowa, tamɔ bɔ ni Yakob fee lɛ. Wɔbaanyɛ wɔbi lɛ ni eye ebua wɔ ni wɔsaa wɔ kɛ wɔnyɛmi lɛ teŋ.

 ¹⁴ Agbɛnɛ hu, esa akɛ wɔhe be kɛpɛi wɔmli wɔkwɛ. Wɔbaanyɛ wɔbi wɔhe saji tamɔ, ‘Ani majɛ heshibaa mli makpɛlɛ mitɔmɔ lɛ nɔ ni makpa minyɛmi lɛ fai koni toiŋjɔlɛ ahi wɔteŋ? Kɛ́ mi tsutsu mitee minyɛmi lɛ ŋɔɔ koni miyasaa mi kɛ lɛ teŋ lɛ, te Yehowa kɛ Yesu baanu he amɛhã tɛŋŋ?’ Bɔ ni wɔbaahã sanebimɔi nɛɛ ahetoo wɔhã lɛ baatsirɛ wɔ ni wɔbo Yesu toi ni wɔba wɔhe shi wɔya wɔnyɛmi lɛ ŋɔɔ koni wɔyasaa wɔ kɛ lɛ teŋ. Kɛ́ wɔtee wɔnyɛmi lɛ ŋɔɔ lɛ, mɛɛ gbɛ nɔ wɔbaanyɛ wɔkase Yakob?

15. Mɛɛ gbɛ nɔ ŋaawoo ni yɔɔ Efesobii 4:2, 3 lɛ baanyɛ aye abua wɔ ni wɔsaa wɔ kɛ wɔnyɛmi teŋ?

¹⁵ Kɛ́ okwɛ lɛ, eji be ni Yakob kɛ Esau yakpe lɛ eka akɛ ebaatsɔɔ lɛ mɔ ni sane ja kɛ mɔ ni sane ejaaa kulɛ, mɛni baaba? Kulɛ nibii eyaŋ lɛ jogbaŋŋ tamɔ bɔ ni etee lɛ lɛ. Nakai nɔŋŋ kɛ́ wɔ hu wɔtee wɔnyɛmi lɛ ŋɔɔ koni wɔyasaa wɔ kɛ lɛ teŋ lɛ, esa akɛ wɔba wɔhe shi. (Kanemɔ Efesobii 4:2, 3.) Abɛi 18:19 lɛ kɛɛ: “Nyɛmi ni atɔ̃ enɔ lɛ, efaŋ maŋ ni atswa gbogbo awo he, ni naataamɔi komɛi tamɔ mɔɔ sɛɛ adabaŋi.” Kɛ́ wɔjɛ heshibaa mli wɔkpa wɔnyɛmi lɛ fai lɛ, wɔbaanyɛ wɔjie nakai ‘adabaŋ’ lɛ ni toiŋjɔlɛ aba wɔ kɛ wɔnyɛmi lɛ teŋ.

16. Mɛni he esa akɛ wɔsusu? Ni mɛni hewɔ?

¹⁶ Agbɛnɛ hu, esa akɛ wɔsusu nɔ ni wɔbaawie kɛ bɔ ni wɔbaawie lɛ wɔhã lɛ he jogbaŋŋ. No sɛɛ lɛ, wɔbaanyɛ wɔya wɔnyɛmi lɛ ŋɔɔ agbɛnɛ, ni wɔhã ehi wɔjwɛŋmɔ mli akɛ, wɔmiiya wɔyajɔɔ etsui he koni ekɛ wɔtɔmɔ lɛ ake wɔ. Ekolɛ shishijee mli lɛ, ebaawie nibii ni baanyɛ awo wɔmli la, ni ekolɛ wɔmli baafu loo wɔbaabɔ mɔdɛŋ ni wɔfã wɔhe. Shi kɛ́ wɔfee nakai lɛ, ani no baahã wɔnyɛ wɔsaa wɔ kɛ wɔnyɛmi lɛ teŋ? Dabi. Esa akɛ wɔhã ehi wɔjwɛŋmɔ mli akɛ, wɔ kɛ wɔnyɛmi lɛ teŋ ni wɔbaasaa lɛ he miihia fe ni abaana mɔ ni sane ja kɛ mɔ ni sane ejaaa.​—1 Kor. 6:7.

17. Mɛni okaseɔ yɛ Gilbert sane lɛ mli?

¹⁷ Nyɛmi nuu ko ni atsɛɔ lɛ Gilbert lɛ fee nɔ fɛɛ nɔ ni ebaanyɛ koni ehã toiŋjɔlɛ aba ekɛ eweku kɔkrɔɔ lɛ mli bii lɛ ateŋ mɔ ko teŋ. Ewie akɛ: “Nɔ ni fe afii enyɔ ho ni miibɔ mɔdɛŋ ni mikɛ lɛ awie yɛ toiŋjɔlɛ mli koni masaa mi kɛ lɛ teŋ.” Mɛni ekoŋŋ Gilbert fee? Ewie akɛ: “Dani mikɛ lɛ baawie lɛ, misɔleɔ ni misaa mijwɛŋmɔ koni kɛ́ ewie nɔ ko ni baanyɛ awo mimli la po lɛ, mimli akafu. Mikpɛ miyiŋ akɛ, kɛ́ ewie nɔ ko loo efee nɔ ko ni edɔ mi po lɛ, mikɛbaake lɛ. Akɛni  mina akɛ sɔ̃ kã minɔ akɛ misaa mi kɛ lɛ teŋ hewɔ lɛ, mikpɛ miyiŋ akɛ mikaŋ akɛ matsɔɔ lɛ akɛ misane ja.” Mɛni jɛ mli kɛba? Gilbert wie akɛ: “Ŋmɛnɛ lɛ, miyɛ miishɛɛ, ejaakɛ toiŋjɔlɛ yɛ mi kɛ miweku lɛ mli bii lɛ fɛɛ ateŋ.”

18-19. Kɛ́ ona akɛ otɔ̃ onyɛmi Kristofonyo ko nɔ lɛ, mɛni esa akɛ ofee? Ni mɛni hewɔ?

¹⁸ Kɛ́ ona akɛ otɔ̃ onyɛmi Kristofonyo ko nɔ lɛ, mɛni esa akɛ ofee? Okɛ nɔ ni Yesu wie lɛ atsu nii, ni osaa okɛ onyɛmi lɛ teŋ. Sɔlemɔ ohã Yehowa yɛ sane lɛ he, ni ohã emumɔ krɔŋkrɔŋ lɛ aye abua bo ni otiu toiŋjɔlɛ sɛɛ. Kɛ́ ofee nakai lɛ, obaaná miishɛɛ, ni no hu baatsɔɔ akɛ oobo Yesu toi.​—Mat. 5:9.

¹⁹ Eŋɔɔ wɔnaa waa akɛ, Yehowa sumɔɔ wɔ ni etsɔɔ Yesu Kristo, ni ji “asafo lɛ yitso” lɛ nɔ etsɔɔ wɔ gbɛ. (Efe. 5:23) Nyɛhãa wɔtswaa wɔfai shi akɛ, wɔbaabo Yesu toi, tamɔ bɔ ni bɔfo Petro, bɔfo Yakobo, kɛ bɔfo Yohane bo lɛ toi lɛ. (Mat. 17:5) Wɔbana akɛ, gbɛ kome ni wɔbaanyɛ wɔtsɔ nɔ wɔfee nakai ji, ni wɔbaasaa wɔ kɛ wɔnyɛmi Kristofonyo ko ni wɔtɔ̃ enɔ lɛ teŋ. Kɛ́ wɔfee nakai, ni agbɛnɛ hu, wɔhi “gbɛ ni elɛɛɛ” ni kɛ mɔ yaa wala mli lɛ nɔ lɛ, Yehowa baajɔɔ wɔ waa bianɛ, ni wɔsɛɛ lɛ wɔbaaná miishɛɛ kɛya naanɔ.