1. Kɛ́ nyɛmi nuu ko kɛɛ eetao ekɛ bo abote gbalashihilɛ mli lɛ, mɛɛ saji esa akɛ obi ohe?

KRISTOFOI fɛɛ yɛ Yesu Kristo shishi, ni wɔle akɛ eyeɔ emuu. Shi kɛ́ yoo ko ni ji Kristofonyo lɛ bote gbalashihilɛ mli lɛ, ebajeɔ ewu ni yeee emuu lɛ yitsoyeli shishi. Shi jeee be fɛɛ be eyɔɔ mlɛo akɛ yoo baaba ehe shi ewo ewu ni yeee emuu lɛ shishi. No hewɔ lɛ, kɛ́ nyɛmi yoo ji bo, ni nyɛmi nuu ko kɛɛ eetao ekɛ bo abote gbalashihilɛ mli lɛ, bi ohe akɛ: ‘Mɛni tsɔɔ akɛ nyɛmi nuu nɛɛ baafee weku yitso kpakpa? Ani ehiɛ dɔɔ Yehowa sɔɔmɔ lɛ he fe nibii krokomɛi? Kɛ́ jeee nakai eji lɛ, belɛ mɛni tsɔɔ akɛ kɛ́ wɔbote gbalashihilɛ mli lɛ, ebaaye ebua wɔ ni wɔbɛŋkɛ Yehowa kpaakpa?’ Shi esa akɛ nyɛmi yoo lɛ abi lɛ diɛŋtsɛ ehe hu akɛ: ‘Mɛɛ sui miyɔɔ ni baahã miishɛɛ ahi wɔ gbãla lɛ mli? Ani mitoɔ mitsui shi, mimli hi, ni mifeɔ ejurɔ? Ani misumɔɔ Yehowa waa?’ (Jaj. 4:9, 12) Kɛ́ yoo ko baaná miishɛɛ yɛ gbalashihilɛ mli jio, enáŋ miishɛɛ jio lɛ, kɛ́ wɔɔwie lɛ, ebaadamɔ yiŋ ni ekpɛɔ dani eboteɔ gbalashihilɛ mli lɛ nɔ.

2. Mɛɛ sanebimɔi wɔbaahã hetoo yɛ nikasemɔ nɛɛ mli?

² Nyɛmimɛi yei pii baa amɛhe shi amɛhãa amɛwumɛi. Enɛ ji nɔkwɛmɔnɔ ni sa jogbaŋŋ diɛŋtsɛ, ni amɛsa yijiemɔ! Ani eŋɔɔɔ wɔnaa akɛ wɔkɛ yei anɔkwafoi nɛɛ efee ekome kɛmiisɔmɔ Yehowa? Yɛ nikasemɔ nɛɛ mli lɛ, wɔbaahã sanebimɔi etɛ komɛi ahetoo. Nomɛi ji: (1) Mɛni hãa ewaa kɛhãa ŋamɛi ni ji Kristofoi lɛ akɛ amɛbaaba amɛhe shi amɛhã amɛwumɛi? (2) Mɛni hewɔ nyɛmimɛi yei jɛɔ amɛsuɔmɔ mli amɛbaa amɛhe shi amɛhãa amɛwumɛi? (3) Mɛɛ gbɛ nɔ Yesu, Abigail kɛ Yosef ŋa Maria, ni ji Yesu mami lɛ, ahe saji ni yɔɔ Biblia lɛ mli lɛ baanyɛ aye abua Kristofoi wumɛi kɛ ŋamɛi ni amɛna nɔ ni atsɔɔ kɛ́ akɛɛ mɔ ko aba ehe shi ewo mɔ ko shishi?

3. Mɛni hewɔ gbalashihilɛ ko bɛ ni naagba bɛ mli lɛ?

³ Gbalashihilɛ ji gbɛjianɔtoo ko ni eye emuu ni Yehowa kɛke adesai, shi adesai yeee emuu. (1 Yoh. 1:8) Enɛ hewɔ Nyɔŋmɔ Wiemɔ lɛ bɔɔ mɛi ni boteɔ gbalashihilɛ mli lɛ kɔkɔ akɛ “amɛbaana amanehulu yɛ amɛheloo mli,” ni tsɔɔ akɛ, amɛkɛ naagbai baakpe lɛ. (1 Kor. 7:28) Hã wɔsusu naagbai komɛi ni yoo ko baanyɛ ekɛkpe yɛ egbalashihilɛ mli lɛ ahe wɔkwɛ.

4. Mɛni hewɔ yei komɛi nuɔ he akɛ kɛ́ amɛba amɛhe shi amɛhã amɛwumɛi lɛ, mɛi ebuŋ amɛ lɛ?

⁴ Yei komɛi yɛ ni he ni amɛjɛ kɛ bɔ ni atsɔse amɛ ahã lɛ hewɔ lɛ, amɛnuɔ he akɛ kɛ́ amɛba amɛhe shi amɛwo amɛwumɛi ashishi lɛ, mɛi ebuŋ amɛ. Nyɛmi yoo ko ni yɔɔ United States ni atsɛɔ lɛ Marisol lɛ wie akɛ: “He ni mida yɛ lɛ, daa nɛɛ akɛɔ yei akɛ, nuu efeee yoo yɛ nɔ ko nɔ ko mli. Mile akɛ Yehowa ehala nuu lɛ akɛ weku lɛ yitso, ni eekpa gbɛ akɛ yei aba amɛhe shi amɛhã amɛwumɛi. Ni mile hu akɛ enɛ etsɔɔɔ akɛ ebuuu yei moŋ, shi bei komɛi lɛ, ewa kɛhã mi akɛ maba mihe shi mahã miwu. Ejaakɛ jeee nakai je lɛ woɔ yei hewalɛ ni amɛfee.”

5. Mɛɛ susumɔi hii komɛi hiɛ yɛ yei ahe ni teɔ shi ewoɔ nɔ ni Biblia lɛ tsɔɔ lɛ?

⁵ Nɔ kroko ni hãa ewaa kɛhãa yei komɛi akɛ amɛbaaba amɛhe shi amɛhã amɛwumɛi ji, kɛ́ amɛwumɛi lɛ ebuuu yei. Nyɛmi yoo ko ni yɔɔ South America ni atsɛɔ lɛ Ivon lɛ wie akɛ: “He ni wɔyɔɔ lɛ, kɛ́ nuu yeko nii lɛ, yoo yeee nii. Gbekɛbii yei ji mɛi ni hoɔ nii, ni amɛsaa shĩa lɛ. Shi gbekɛbii hii lɛ, amɛmamimɛi kɛ amɛnyɛmimɛi yei lɛ hãaa amɛtsu nɔ ko. Ni akɛɔ amɛ akɛ, maŋtsɛmɛi ji amɛ.” Nyɛmi yoo ko ni yɔɔ Asia maji lɛ eko nɔ ni atsɛɔ lɛ Yingling lɛ wie akɛ: “Ayɛ wiemɔ ko ni awieɔ yɛ mimaŋ wiemɔ lɛ mli ni tsɔɔ akɛ, ehe ehiaaa ni yoo ale nii loo ená hesaa ko. Yoo lɛ, enɔ nɔŋŋ ji ni efee shĩa nii, ni ebɛ hegbɛ akɛ etsɔɔ ewu esusumɔ.” Susumɔ ni tamɔ nɛkɛ lɛ etsɔɔɔ suɔmɔ, ni eteɔ shi ewoɔ nɔ ni Biblia lɛ tsɔɔ lɛ. Ni nuu fɛɛ nuu ni hiɛ susumɔ ni tamɔ nɛkɛ lɛ hãa etɔɔ eŋa lɛ. Agbɛnɛ hu, ekaseee Yesu. Ni Yehowa náŋ ehe miishɛɛ.​—Efe. 5:28, 29; 1 Pet. 3:7.

6. Mɛni esa akɛ ŋamɛi afee koni naanyobɔɔ ni yɔɔ amɛ kɛ Yehowa teŋ lɛ mli awa?

⁶ Tamɔ wɔna yɛ nikasemɔ ni tsɔ hiɛ lɛ mli lɛ, Yehowa miitao ni wumɛi ni ji Kristofoi lɛ aye abua amɛweku lɛ ni amɛjá lɛ jogbaŋŋ, ni amɛhã amɛ amɛheloonaa hiamɔ nii. (1 Tim. 5:8) Shi kɛ́ nyɛmi yoo ji bo ni obote gbalashihilɛ mli lɛ, esa akɛ bo diɛŋtsɛ hu ohe be ni okane Nyɔŋmɔ Wiemɔ lɛ ni ojwɛŋ nɔ, ni osɔle ohã Yehowa waa. Enɛ feemɔ bɛ mlɛo kwraa. Ŋamɛi anitsumɔ fa, ni etɔɔ amɛ waa. No hewɔ lɛ, ekolɛ amɛbaanu he akɛ amɛbɛ dekã ni amɛkɛbaafee nibii nɛɛ. Shi ehe miihia ni amɛfee nibii nɛɛ. Mɛni hewɔ? Ejaakɛ Yehowa miitao ni wɔteŋ mɔ fɛɛ mɔ kɛ lɛ abɔ naanyo, ni efee nibii ni baahã nakai naanyobɔɔ lɛ mli awa.​—Bɔf. 17:27.

7. Mɛni hãŋ ewa tsɔ kɛhã yoo ko akɛ ebaaba ehe shi ehã ewu?

⁷ No hewɔ lɛ eyɛ faŋŋ akɛ, ja yoo ko emia ehiɛ waa dani ebaanyɛ eba ehe shi ehã ewu ni yeee emuu lɛ. Shi kɛ́ ená ele nɔ hewɔ ni Ŋmalɛ lɛ kɛɔ akɛ eba ehe shi ewo ewu lɛ shishi, ni enu shishi lɛ, ewaŋ tsɔ kɛhãŋ lɛ akɛ ebaafee nakai.

8. Yɛ nɔ ni awie yɛ Efesobii 5:22-24 lɛ naa lɛ, mɛni hewɔ ŋamɛi ni ji Kristofoi lɛ jɛɔ amɛsuɔmɔ mli amɛbaa amɛhe shi amɛwoɔ amɛwumɛi ashishi?

⁸ Nɔ hewɔ ni ŋa ni ji Kristofonyo lɛ jɛɔ esuɔmɔ mli ebaa ehe shi ehãa ewu ji, no ji nɔ ni  Yehowa biɔ ni efee. (Kanemɔ Efesobii 5:22-24.) Akɛni eheɔ Yehowa e-Tsɛ ni yɔɔ ŋwɛi lɛ eyeɔ hewɔ lɛ, ele akɛ nɔ fɛɛ nɔ ni Yehowa kɛɔ lɛ akɛ efee lɛ, suɔmɔ ni eyɔɔ kɛhã lɛ lɛ hewɔ ekɛɔ lɛ akɛ efee lɛ. Ni agbɛnɛ hu ekɛŋ lɛ akɛ efee nɔ ko ni baaye lɛ awui.​—5 Mo. 6:24; 1 Yoh. 5:3.

9. Kɛ́ yoo ni ji Kristofonyo lɛ ba ehe shi ewo ewu lɛ shishi lɛ, mɛni jɛɔ mli kɛbaa?

⁹ Je lɛ woɔ yei hewalɛ ni amɛku amɛhiɛ amɛshwie Yehowa shishitoo mlai lɛ anɔ ni amɛnu he akɛ, kɛ́ amɛba amɛhe shi amɛwo amɛwumɛi ashishi lɛ, no hãŋ abu amɛ. Amɛfeɔ nakai ejaakɛ amɛleee wɔ-Nyɔŋmɔ ni yɔɔ suɔmɔ lɛ. Yehowa ekɛŋ ebiyei ni esumɔɔ amɛ waa lɛ akɛ amɛfee nɔ ko ni hãŋ abu amɛ. Kɛ́ nyɛmi yoo ko mia ehiɛ waa eba ehe shi ewo ewu shishi lɛ, ekɛ toiŋjɔlɛ baa. (Lala 119:165) Agbɛnɛ hu, enáa he sɛɛ, ewu lɛ náa he sɛɛ, ni ebii lɛ hu náa he sɛɛ.

10. Mɛni wɔkaseɔ kɛjɛɔ nɔ ni Carol wie lɛ mli?

¹⁰ Kɛ́ yoo ko ba ehe shi ehã ewu ni yeee emuu lɛ, no tsɔɔ akɛ, esumɔɔ Yehowa, mɔ ni fee ewu lɛ weku lɛ yitso lɛ, ni ebuɔ lɛ. Nyɛmi yoo ko ni yɔɔ South America ni atsɛɔ lɛ Carol lɛ wie akɛ: “Mile akɛ miwu lɛ lɛ baanyɛ atɔ̃. Shi mile hu akɛ, bɔ ni mifeɔ minii mihãa kɛ́ etɔ̃ lɛ hãa anaa kɛji akɛ misumɔɔ Yehowa waa lɛɛlɛŋ. No hewɔ lɛ, mibɔɔ mɔdɛŋ mibaa mihe shi miwoɔ eshishi, ejaakɛ miitao mafee nɔ ni Yehowa, mi-Tsɛ ni yɔɔ ŋwɛi lɛ sumɔɔ.”

11. Mɛni yeɔ ebuaa nyɛmi yoo ko ni atsɛɔ lɛ Aneese lɛ ni ekɛ tɔmɔi keɔ? Ni mɛni wɔkaseɔ yɛ nɔ ni ewie lɛ mli?

¹¹ Kɛ́ yoo ko nuɔ he akɛ ewu lɛ booo lɛ toi ni esusuuu ehe lɛ, ebaanyɛ ewa kɛhã lɛ akɛ ebaaba ehe shi ewo eshishi ni ebu lɛ. Shi naa nɔ ni nyɛmi yoo ko ni atsɛɔ lɛ Aneese lɛ feɔ kɛ́ enu he nakai. Ewie akɛ: “Kɛ́ eba lɛ nakai lɛ, mikɛ sane lɛ wooo mimli. Mikaiɔ akɛ, wɔ fɛɛ wɔtɔ̃ɔ. Mibɔɔ mɔdɛŋ akɛ mikɛbaake lɛ tswaa tamɔ bɔ ni Yehowa feɔ lɛ. Ni kɛ́ mifee nakai lɛ, mihe jɔɔ mi.” (Lala 86:5) Bei pii lɛ, ewaaa kɛhãaa yoo ni kɛ tɔmɔi keɔ lɛ akɛ ebaaba ehe shi ewo ewu shishi.

12. Mɛni wɔnaa yɛ mɛi pii ni awie amɛhe yɛ Biblia lɛ mli lɛ ahe?

¹² Mɛi komɛi nuɔ he akɛ kɛ́ mɔ ko ba ehe shi ewo mɔ ko shishi lɛ, belɛ eleee nii. Shi enɛ  jeee anɔkwale. Awie mɛi babaoo ahe yɛ Biblia lɛ mli ni ba amɛhe shi, tsɛbelɛ amɛji mɛi ni yɔɔ ekãa. Amɛteŋ mɛi komɛi ji Yesu, Abigail, kɛ Maria. Hã wɔkwɛ nɔ ni wɔbaanyɛ wɔkase yɛ amɛhe.

13. Mɛni hewɔ Yesu baa ehe shi ewoɔ Yehowa shishi? Ni mɛni hewɔ enɛ ni efeɔ lɛ etsɔɔɔ akɛ eleee nii lɛ?

¹³ Yesu baa ehe shi ewoɔ Yehowa shishi. Shi enɛ etsɔɔɔ akɛ eleee nii. Ja mɔ ko le nii waa dani ebaanyɛ etsɔɔ nii yɛ gbɛ ni waaa nɔ ni emli akã shi faŋŋ tamɔ Yesu fee lɛ. (Yoh. 7:45, 46) Yehowa le akɛ Yesu le nii waa, ni no hewɔ ehã efata ehe be ni ebɔɔ nibii fɛɛ ni yɔɔ ŋwɛi kɛ shikpɔŋ lɛ. (Abɛi 8:30; Heb. 1:2-4) Agbɛnɛ hu, kɛjɛ be ni atee Yesu shi nɛɛ, Yehowa ehã lɛ ‘hegbɛ fɛɛ yɛ ŋwɛi kɛ shikpɔŋ lɛ nɔ.’ (Mat. 28:18) Yɛ hesai ni Yesu yɔɔ nɛɛ fɛɛ sɛɛ lɛ, ebiɔ gbɛtsɔɔmɔ yɛ e-Tsɛ Yehowa dɛŋ. Mɛni hewɔ? Ejaakɛ esumɔɔ e-Tsɛ lɛ.​—Yoh. 14:31.

14. (a) Mɛni wumɛi baanyɛ akase yɛ bɔ ni Yehowa naa yei ehãa lɛ mli? (b) Ni mɛni amɛbaanyɛ amɛkase yɛ nɔ ni awie yɛ Abɛi 31 lɛ mli?

¹⁴ Nɔ ni wumɛi baanyɛ akase. Jeee akɛ Yehowa naa hii akɛ amɛnɔ kwɔlɔ fe yei hewɔ ekɛɛ yei akɛ amɛba amɛhe shi amɛwo hii ashishi lɛ. Mɛni hewɔ wɔkɛɔ nakai? Ejaakɛ jeee hii pɛ Yehowa hala akɛ amɛkɛ Yesu baaye nɔ. Shi yei hu fata he. (Gal. 3:26-29) Yehowa ehã e-Bi lɛ hegbɛ yɛ nibii komɛi amli. Ni enɛ tsɔɔ akɛ eheɔ lɛ eyeɔ. Nakai nɔŋŋ nuu ni hiɛ kã shi lɛ hu baahã eŋa hegbɛ yɛ nibii komɛi amli. Biblia lɛ wieɔ yɛ yoo kpakpa he akɛ, ebaanyɛ ekwɛ shĩa, ebaanyɛ ehé shikpɔŋ loo ehɔ̃ɔ, ni ebaanyɛ eye jara hu. (Kanemɔ Abɛi 31:15, 16, 18.) Ewieee akɛ nyɔŋ ji lɛ, ni no hewɔ lɛ ebɛ hegbɛ akɛ etsɔɔ ejwɛŋmɔ. Moŋ lɛ, ewu heɔ lɛ eyeɔ. Ni kɛ́ etsɔɔ ejwɛŋmɔ lɛ, nuu lɛ boɔ lɛ toi. (Kanemɔ Abɛi 31:11, 26, 27.) Kɛ́ nuu ko kɛ eŋa ye yɛ nɛkɛ gbɛ nɔ lɛ, no tsɔɔ akɛ ebuɔ lɛ. Ni enɛ baahã eŋa lɛ ajɛ etsuiŋ eba ehe shi ewo eshishi.

15. Mɛni ŋamɛi baanyɛ akase yɛ Yesu dɛŋ?

¹⁵ Nɔ ni ŋamɛi baanyɛ akase. Yɛ nibii ni Yesu nyɛɔ efeɔ lɛ fɛɛ sɛɛ lɛ, enuuu he akɛ kɛ́ eba ehe shi ewo Yehowa shishi lɛ, no hãŋ aná bulɛ ahã lɛ. (1 Kor. 15:28; Fip. 2:5, 6) Nakai nɔŋŋ yoo kpakpa ni kaseɔ Yesu lɛ nuŋ he akɛ kɛ́ eba ehe shi ewo ewu shishi lɛ, no hãŋ ni abu lɛ. Ebaa ehe shi ehãa ewu ejaakɛ esumɔɔ lɛ. Shi suɔmɔ ni eyɔɔ kɛhã Yehowa kɛ bulɛ ni eyɔɔ kɛhã lɛ lɛ ji nɔ titri hewɔ ni efeɔ nakai.

16. Yɛ nɔ ni awie yɛ 1 Samuel 25:3, 23-28 lɛ naa lɛ, mɛɛ shihilɛ ni mli wa Abigail kɛkpe? (Kwɛmɔ mfoniri ni yɔɔ wolo lɛ hiɛ lɛ.)

¹⁶ Mɔ kroko ni wɔbaasusu ehe ji Abigail. Atsɛɔ ewu Nabal, ni eji nuu ni fóɔ lɛ pɛ enɔ mli, ewoɔ ehe nɔ, ni ehiɛ esɔɔɔ nii. Shi enɛ fɛɛ sɛɛ lɛ, be ni Abigail nu akɛ David kɛ ehii lɛ miiba ni amɛbagbe ewu lɛ, etaaa shi ni ebaakwɛ ni abagbe ewu lɛ, kɛ jwɛŋmɔ lɛ akɛ no baahã eye ehe kɛjɛ gbalashihilɛ lɛ mli. Moŋ lɛ, efee nɔ ni ebaanyɛ kɛbu ewu lɛ kɛ eshĩabii lɛ fɛɛ he. Ekɛ David kɛ ehii 400 lɛ yakpe. Ni ekɛ David susu nii ahe yɛ gbɛ ni bulɛ yɔɔ mli nɔ. Enɛ ni efee lɛ tsɔɔ akɛ eyɛ ekãa waa. Ejaakɛ no mli lɛ, David kɛ ehii lɛ hiɛ tawuu nii. Ewie po akɛ akɛ nɔ ni ewu lɛ efee lɛ he shwamɔ lɛ afɔ̃ enɔ. (Kanemɔ 1 Samuel 25:3, 23-28.) David na faŋŋ akɛ, Yehowa etsɔ yoo ni yɔɔ ekãa nɛɛ nɔ ewo lɛ ŋaa koni ekatɔ̃ tɔmɔ ni yɔɔ hiɛdɔɔ nɛɛ.

17. Mɛni wumɛi baanyɛ akase yɛ David kɛ Abigail sane lɛ mli?

¹⁷ Nɔ ni wumɛi baanyɛ akase. Abigail ji yoo ni hiɛ kã shi waa. No hewɔ lɛ, ehi waa akɛ David bo lɛ toi be ni ewo lɛ ŋaa lɛ. No ye ebua lɛ ni eyafeee nɔ ko ni baahã eye lá yi sɔ. Nakai nɔŋŋ nuu ni hiɛ kã shi lɛ hu baasusu nɔ ni eŋa ewie lɛ he jogbaŋŋ, dani ekpɛ yiŋ ko ni he hiaa waa. Ekolɛ nakai ni ebaafee lɛ baaye abua lɛ ni ekakpɛ yiŋ ni ejaaa.

18. Mɛni ŋamɛi baanyɛ akase kɛjɛ Abigail dɛŋ?

 ¹⁸ Nɔ ni ŋamɛi baanyɛ akase. Kɛ́ yoo ko sumɔɔ Yehowa ni ebuɔ lɛ lɛ, eweku lɛ baanyɛ aná he sɛɛ waa, kɛ́ ewu lɛ jeee Yehowa tsulɔ loo ehiii shi yɛ Yehowa shishitoo mlai lɛ anaa po. Yoo ni tamɔ nɛkɛ lɛ taoŋ nɔ ko ekɛjie enaa koni eshi ewu lɛ. Moŋ lɛ, ebuɔ ewu lɛ ni ebaa ehe shi ewoɔ eshishi akɛ aleenɔ no baatsirɛ lɛ ni ekase Yehowa he nii lo. (1 Pet. 3:1, 2) Shi kɛ́ ewu lɛ lɛ tsakeee po lɛ, Yehowa náa ehe miishɛɛ yɛ ehe shi ni ebaa ehãa ewu lɛ lɛ hewɔ. Ejaakɛ no tsɔɔ akɛ eeye Yehowa anɔkwa.

19. Mɛɛ shihilɛ mli esaaa akɛ yoo ko boɔ ewu toi?

¹⁹ Shi kɛ́ akɛɛ ŋa ni ji Kristofonyo lɛ aba ehe shi ehã ewu lɛ, no etsɔɔɔ akɛ kɛ́ ewu lɛ kɛɛ lɛ akɛ efee nɔ ko ni teɔ shi ewoɔ Yehowa mlai loo eshishitoo mlai lɛ, efee. Tamɔ ekolɛ, kɛ́ ekɛɛ lɛ akɛ emale, eju loo efee nɔ kroko ni Yehowa sumɔɔɔ. Esa akɛ Kristofoi fɛɛ, ni nyɛmimɛi yei ni ebote gbalashihilɛ mli hu fata he lɛ akadi akɛ, Yehowa ji mɔ ni esa akɛ amɛbo lɛ toi fe mɔ fɛɛ mɔ. No hewɔ lɛ, kɛ́ nyɛmi yoo ko wu kɛɛ lɛ akɛ efee nɔ ko ni esaaa Yehowa hiɛ lɛ, esa akɛ ejɛ bulɛ mli ehã ele akɛ enyɛŋ efee. Ni egbala nɔ hewɔ ni enyɛŋ efee lɛ mli faŋŋ etsɔɔ lɛ.​—Bɔf. 5:29.

20. Mɛni hãa wɔnaa akɛ naanyobɔɔ ni yɔɔ Maria kɛ Yehowa teŋ lɛ mli wa waa?

²⁰ Naanyobɔɔ ni yɔɔ Maria kɛ Yehowa teŋ lɛ mli wa waa. Ele ŋmalɛi lɛ amli jogbaŋŋ. Be ni Maria kɛ Elizabet ni ji Yohane Baptisilɔ lɛ mami gbaa sane lɛ, Maria tsɛ ŋmalɛi fe 20 ayisɛɛ kɛjɛ Hebri Ŋmalɛi lɛ amli. (Luka 1:46-55) Naa nɔ ko hu ni sa kadimɔ. Eyɛ mli akɛ no mli lɛ Yosef ewo Maria shi akɛ ekɛ lɛ baabote gbalashihilɛ mli moŋ, shi Yehowa tsuuu bɔfo lɛ kɛyaaa Yosef ŋɔɔ klɛŋklɛŋ. Bɔfo lɛ tee Maria ŋɔɔ klɛŋklɛŋ ni ehã ele akɛ ebaafɔ Nyɔŋmɔ Bi lɛ. (Luka 1:26-33) Bɔ ni Yehowa le Maria ehã hewɔ lɛ, ená nɔmimaa akɛ ebaasumɔ e-Bi lɛ, ni ebaakwɛ lɛ jogbaŋŋ. Ni ŋwanejee ko bɛ he akɛ, be ni Yesu gbo ni etee ŋwɛi po lɛ, naanyobɔɔ ni yɔɔ Maria kɛ Yehowa teŋ lɛ fiteee.​—Bɔf. 1:14.

21. Mɛni wumɛi baanyɛ akase yɛ nɔ ni Biblia lɛ wieɔ yɛ Maria he lɛ mli?

²¹ Nɔ ni wumɛi baanyɛ akase. Nuu ni hiɛ kã shi lɛ, kɛ́ ena akɛ eŋa le ŋmalɛi lɛ amli lɛ eŋɔɔ enaa. Eyeee eŋa lɛ he awuŋa, ni enuuu he akɛ ebaahe eyitsoyeli lɛ yɛ edɛŋ. Moŋ lɛ eyɔseɔ  akɛ, kɛ́ eŋa lɛ le Biblia lɛ mli kɛ Biblia mli shishitoo mlai jogbaŋŋ lɛ, ebaanyɛ eye ebua weku lɛ waa. Shi kɛ́ yoo lɛ etee skul fe nuu lɛ, loo ele woloŋ fe lɛ po lɛ, eji nuu lɛ sɔ̃ akɛ enyiɛ weku lɛ hiɛ yɛ weku jamɔ kɛ Nyɔŋmɔ jamɔ nifeemɔi krokomɛi amli.​—Efe. 6:4.

22. Mɛni ŋamɛi baanyɛ akase kɛjɛ Maria dɛŋ?

²² Nɔ ni ŋamɛi baanyɛ akase. Eyɛ mli akɛ abiɔ ni ŋa aba ehe shi ewo ewu shishi moŋ, shi loloolo lɛ, eji yoo lɛ sɔ̃ akɛ efee nibii ni baahã ekɛ Yehowa teŋ naanyobɔɔ lɛ mli awa. (Gal. 6:5) Enɛ hewɔ lɛ, esa akɛ eto be ni ekɛbaakase nii, ni ekɛjwɛŋ nii anɔ. Enɛ baahã bulɛ kɛ suɔmɔ ni eyɔɔ kɛhã Yehowa lɛ mli awa be fɛɛ be. Ni ebaahã ejɛ etsuiŋ eba ehe shi ewo ewu lɛ shishi.

23. Kɛ́ yei ba amɛhe shi amɛwo amɛwumɛi ashishi lɛ, mɛɛ gbɛ nɔ amɛ, amɛweku lɛ, kɛ asafo lɛ náa he sɛɛ?

²³ Yei ni yaa nɔ amɛbaa amɛhe shi amɛhãa amɛwumɛi yɛ suɔmɔ ni amɛyɔɔ kɛhã Yehowa lɛ hewɔ lɛ, amii baashɛ amɛhe, ni amɛtsui baanyɔ amɛmli fe yei ni baaa amɛhe shi. Agbɛnɛ hu, amɛji nɔkwɛmɔnɔ kpakpa kɛhã oblahii kɛ oblayei. Ni amɛhãa suɔmɔ kɛ toiŋjɔlɛ hiɔ amɛweku lɛ kɛ asafo lɛ mli fɛɛ. (Tito 2:3-5) Ŋmɛnɛ lɛ, Yehowa tsuji lɛ ateŋ mɛi babaoo ji yei. (Lala 68:11) Shi kɛ́ hii ji wɔ jio, yei ji wɔ jio, nɔ ko yɛ ni wɔ fɛɛ wɔbaanyɛ wɔfee koni miishɛɛ ahi asafo lɛ mli. Wɔbaasusu nɔ ni wɔbaanyɛ wɔfee lɛ he yɛ nikasemɔ ni nyiɛ sɛɛ lɛ mli.