1-2. (a) Kɛ́ atsĩ wɔnitsumɔ lɛ naa lɛ, mɛni hewɔ esaaa akɛ efeɔ wɔ naakpɛɛ? (b) Mɛni he wɔbaasusu yɛ nikasemɔ nɛɛ mli?

YƐ AFI 2018 lɛ, nyɛmimɛi 223,000 kɛ sɛɛ nyɛɛɛ amɛsɔmɔ Yehowa bɔ ni amɛsumɔɔ, ejaakɛ yɛ amɛmaji lɛ anɔ lɛ, amralofoi lɛ etsĩ wɔnitsumɔ lɛ naa loo amɛhãaa wɔná hejɔlɛ kɛtsu bɔ ni wɔtsui shweɔ. Shi enɛ efeee wɔ naakpɛɛ. Tamɔ bɔ ni ahã wɔle yɛ nikasemɔ ni tsɔ hiɛ lɛ mli lɛ, anɔkwa Kristofoi le akɛ abaawa amɛ yi. (2 Tim. 3:12) Ekɔɔɔ he eko maŋ nɔ ni wɔyɔɔ lɛ, wɔle akɛ nɔyeli lɛ baanyɛ atsĩ wɔnaa trukaa akɛ wɔkajá Yehowa Nyɔŋmɔ.

² Kɛ́ nɔyeli lɛ tsĩ nitsumɔ lɛ naa yɛ maŋ nɔ he ni oyɔɔ lɛ, ekolɛ obaabi ohe akɛ: ‘Ani wɔyi ni awaa nɛɛ tsɔɔ akɛ Nyɔŋmɔ mli efu wɔ? Ani naatsĩi lɛ hewɔ lɛ, wɔnyɛŋ wɔjá Yehowa dɔŋŋ? Ani mifã kɛya maŋ kroko nɔ koni maná heyeli kɛsɔmɔ Nyɔŋmɔ?’ Wɔbaahã sanebimɔi nɛɛ ahetoo yɛ nikasemɔ nɛɛ mli. Kɛfata he lɛ, wɔbaakwɛ nɔ ni wɔbaanyɛ wɔfee koni wɔnyɛ wɔya nɔ wɔjá Yehowa kɛ́ atsĩ wɔnitsumɔ lɛ naa po, kɛ agbɛnɛ hu, nibii komɛi ni esaaa akɛ wɔfeɔ.

3. Eyɛ mli akɛ bɔfo Paulo ye Yehowa anɔkwa moŋ, shi tamɔ bɔ ni wɔnaa yɛ 2 Korintobii 11:23-27 lɛ, mɛɛ gbɛ nɔ awa lɛ yi? Ni mɛni wɔkaseɔ yɛ Paulo sane lɛ mli?

³ Kɛ́ nɔyeli ko tsĩ wɔnitsumɔ lɛ naa lɛ, ekolɛ wɔbaamu sane naa akɛ Nyɔŋmɔ mli efu wɔ. Shi susumɔ nɛɛ ejaaa. Kaimɔ akɛ, kɛ́ aawa Yehowa tsulɔ ko yi lɛ, no etsɔɔɔ akɛ Yehowa mli efu lɛ. Bo lɛ, susumɔ bɔfo Paulo he okwɛ. Nibii pii yɛ ni hãa wɔnaa  akɛ Nyɔŋmɔ ná ehe miishɛɛ waa. Akɛ nɔkwɛmɔnɔ lɛ, ená hegbɛ eŋma Kristofoi A-Greek Ŋmalɛ lɛ mli woji 14 sɔŋŋ, ni esɔmɔ akɛ jeŋmaji lɛ abɔfo. Fɛɛ sɛɛ lɛ, awa lɛ yi waa. (Kanemɔ 2 Korintobii 11:23-27.) Mɛni esane lɛ tsɔɔ wɔ? Etsɔɔ wɔ akɛ, Yehowa ŋmɛɔ gbɛ ni awaa etsuji anɔkwafoi ayi.

4. Mɛni hewɔ je lɛ nyɛɔ wɔ lɛ?

⁴ Yesu hã wɔle nɔ hewɔ ni esaaa akɛ efeɔ wɔ naakpɛɛ akɛ mɛi baanyɛ wɔ ni amɛbaate shi amɛwo wɔ lɛ. Ewie akɛ, amɛbaafee nakai ejaakɛ wɔfataaa je lɛ he. (Yoh. 15:18, 19) Kɛ́ aawa wɔ yi lɛ, no etsɔɔɔ akɛ Yehowa mli efu wɔ. Moŋ lɛ, etsɔɔ akɛ wɔmiifee nɔ ni sa ehiɛ.

5. Ani gbɔmɛi adesai baanyɛ ahã akpa Yehowa jamɔ? Tsɔɔmɔ mli.

⁵ Gbɔmɛi adesai foji nyɛŋ amɛhã akpa Yehowa, Nyɔŋmɔ Ofe lɛ jamɔ. Mɛi pii eka akɛ amɛbaafee nakai, shi amɛyeee omanye. Akɛ nɔkwɛmɔnɔ lɛ, be ni awuɔ Jeŋ Ta II lɛ, maji pii anɔyelii wa Nyɔŋmɔ webii lɛ ayi waa. Nazi nɔyeli lɛ tsĩ wɔnitsumɔ lɛ naa yɛ Germany, ni atsĩ wɔnitsumɔ lɛ naa yɛ Australia, Canada, kɛ maji krokomɛi hu anɔ. Ani enɛ hã akpa Yehowa jamɔ? Dabi kwraa! Be ni abɔi ta lɛ wuu yɛ afi 1939 lɛ, no mli lɛ shiɛlɔi ni yɔɔ jeŋ fɛɛ lɛ ayifalɛ ji 72,475. Shi be ni awu ta lɛ agbe naa yɛ afi 1945 lɛ, shiɛlɔi lɛ ayifalɛ eku ebɔ he toi enyɔ kɛ sɛɛ. Yehowa jɔɔ nitsumɔ lɛ nɔ, ni aná shiɛlɔi 156,299!

6. Kɛ́ ate shi awo wɔ lɛ, mɛɛ yibii kpakpai ebaanyɛ ewo? Okɛ enɛ he nɔkwɛmɔnɔ ahã.

⁶ Kɛ́ ate shi awo wɔ lɛ, wɔsheɔ gbeyei fioo. Shi yɛ nakai beiaŋ nɔŋŋ lɛ, ebaanyɛ ehã wɔfai shi ni wɔtswa akɛ wɔbaasɔmɔ Yehowa jogbaŋŋ lɛ mli awa. Nyɛmi nuu ko kɛ eŋa kɛ amɛbi fioo lɛ aniiashikpamɔ lɛ yeɔ enɛ he odase. Be ni nɔyeli lɛ tsĩ wɔnitsumɔ lɛ naa yɛ maŋ nɔ he ni amɛyɔɔ lɛ, amɛhãaa no awo amɛhe gbeyei ni amɛkpa Yehowa sɔɔmɔ. Moŋ lɛ, nyɛmi nuu lɛ kɛ eŋa lɛ fɛɛ bɔi gbɛgbamɔ nitsumɔ lɛ. Nyɛmi yoo lɛ kpa nitsumɔ ni etsuɔ lɛ po koni enyɛ etsɔ gbɛgbalɔ, eyɛ mli akɛ nitsumɔ lɛ hãa enáa shika waa. Ewu lɛ wie akɛ, wɔnitsumɔ lɛ naa ni atsĩ lɛ hã mɛi pii bibii amɛhe saji babaoo yɛ Yehowa Odasefoi ahe. Enɛ hewɔ lɛ, ená lɛ mlɛo waa akɛ ekɛ mɛi baabɔi Biblia lɛ kasemɔ. Shi jeee weku nɛɛ pɛ kɛ́ wɔbaawie lɛ, amɛná wɔnitsumɔ lɛ naa ni atsĩ lɛ he sɛɛ. Asafoŋ onukpa ko ni sɔmɔɔ yɛ nakai maŋ lɛ nɔŋŋ nɔ lɛ wie akɛ, mɛi pii ni ekpa Yehowa sɔɔmɔ lɛ bɔi kpeei  baa ni aye abua amɛ ni amɛbɔi shiɛmɔyaa ekoŋŋ.

7. (a) Mɛni wɔkaseɔ yɛ 3 Mose 26:36, 37 lɛ mli? (b) Kɛ́ atsĩ wɔnitsumɔ lɛ naa lɛ, mɛni obaafee?

⁷ Kɛ́ wɔhenyɛlɔi lɛ tsĩ wɔnitsumɔ lɛ naa lɛ, ekolɛ amɛbaafee nibii kɛwo wɔhe gbeyei koni ŋmiŋmi amɔ wɔ ni wɔkpa Yehowa sɔɔmɔ. Akɛ nɔkwɛmɔnɔ lɛ, ekolɛ yɛ nitsumɔ lɛ naa ni amɛtsĩ lɛ sɛɛ lɛ, amɛbaagbɛ wɔhe amalei amɛshwã, amɛbaatsu polisifoi loo mɛi krokomɛi ni tamɔ nakai ni amɛbagbɛlɛ wɔnibii amli yɛ shĩa, loo amɛkɛ wɔteŋ mɛi komɛi baaya kɔɔtu loo amɛwo wɔ tsuŋ po. Ekolɛ amɛbaanu he akɛ, kɛ́ amɛwo wɔteŋ mɛi fioo komɛi tsuŋ lɛ, wɔbaashe gbeyei. Shi kɛ́ wɔhã amɛnifeemɔi lɛ wo wɔhe gbeyei lɛ, ekolɛ yiwaa lɛ shɛŋ wɔnɔ po ni ekãa ni wɔkɛsɔmɔɔ lɛ naa baaba shi loo wɔkɛ wɔsɔɔmɔ lɛ baakpasa shi kwraa, ni wɔbaafee wɔnii tamɔ mɛi ni awie amɛhe yɛ 3 Mose 26:36, 37 lɛ. (Kanemɔ.) No hewɔ lɛ, ekaba kɔkɔɔkɔ akɛ wɔbaahã wɔhenyɛlɔi lɛ ahe ŋmiŋmi amɔ wɔ ni ekãa ni wɔkɛsɔmɔɔ Yehowa lɛ naa aba shi loo wɔkpa lɛ sɔɔmɔ kwraa. Moŋ lɛ, nyɛhãa wɔkɛ wɔhiɛ afɔ̃a Yehowa nɔ kwraa ni wɔtsui akafã, ni wɔsɔle wɔkpa lɛ fai ni etsɔɔ wɔ gbɛ. (Yes. 28:16) Kɛ́ Yehowa yɛ wɔsɛɛ lɛ, adesa nɔyeli ko nɔyeli ko bɛ, ekɔɔɔ he eko bɔ ni ehe wa hã, ni baanyɛ ahã wɔje wɔ-Nyɔŋmɔ lɛ sɛɛ loo etsĩ wɔnaa ni wɔkpa lɛ jamɔ.​—Heb. 13:6.

8-9. (a) Mɛɛ yiŋ esa akɛ wekuyitso fɛɛ wekuyitso loo Kristofonyo fɛɛ Kristofonyo akpɛ? (b) Ni mɛni baaye abua mɔ ko ni ekpɛ yiŋ kpakpa?

⁸ Kɛ́ nɔyeli lɛ tsĩ wɔnitsumɔ lɛ naa yɛ maŋ nɔ he ni oyɔɔ lɛ, ekolɛ obaabi ohe akɛ, ‘Ani mifã kɛya maŋ kroko nɔ koni maná heyeli kɛsɔmɔ Yehowa?’ Mɔ ko mɔ ko nyɛŋ ahã sanebimɔ nɛɛ hetoo ehã bo. Bo diɛŋtsɛ obaakpɛ oyiŋ yɛ he. Shi dani obaafee nakai lɛ, obaanyɛ osusu nɔ ni blema Kristofoi lɛ fee be ni abɔi amɛyi waa yɛ Stefano gbele lɛ sɛɛ lɛ he. Kaselɔi ni yɔɔ Yerusalem lɛ gbɛ amɛshwã Yudea kɛ Samaria fɛɛ, ni amɛtee aahu kɛyashɛ Foinike, kɛ Kipro, kɛ Antiokia tɔ̃ɔ. (Mat. 10:23; Bɔf. 8:1; 11:19) Agbɛnɛ hu, obaanyɛ osusu nɔ ni bɔfo Paulo fee sɛɛ mli be ni abɔi blema Kristofoi lɛ ayi waa ekoŋŋ lɛ he. Paulo kpɛ eyiŋ akɛ, efãŋ kɛshiŋ kpokpaa ni ate shi awo shiɛmɔ nitsumɔ lɛ yɛ jɛmɛ lɛ nɔ. Moŋ lɛ, ekɛ ewala wo oshãra mli ni etee nɔ eshiɛ sane kpakpa lɛ yɛ jɛmɛ ni ewaje nyɛmimɛi ni awaa amɛyi lɛ.​—Bɔf. 14:19-23.

⁹ Mɛni wɔkaseɔ yɛ nɔkwɛmɔnii enyɔ nɛɛ amli? No ji akɛ, wekuyitso fɛɛ wekuyitso baakpɛ eyiŋ kɛji ekɛ eweku lɛ baafã aloo amɛfãŋ. Shi dani ebaafee nakai lɛ, esa akɛ esɔle ni esusu shihilɛ mli ni eweku lɛ yɔɔ, kɛ agbɛnɛ hu, naagbai kɛ sɛɛnamɔi ni baajɛ fã ni amɛbaafã lɛ mli kɛba lɛ ahe jogbaŋŋ. Yɛ nɛkɛ fãa sane nɛɛ mli lɛ, Kristofonyo fɛɛ Kristofonyo “baatere lɛ diɛŋtsɛ ejatsu.” (Gal. 6:5) No hewɔ lɛ, esaaa akɛ awieɔ ashiɔ nyɛmi ko yɛ yiŋ ni ebaakpɛ yɛ sane nɛɛ he lɛ hewɔ.

10. Nitsumɔhe nine lɛ kɛ asafoŋ onukpai lɛ baahã wɔ gbɛtsɔɔmɔi yɛ mɛɛ nibii ahe?

¹⁰ Kɛ́ atsĩ wɔnitsumɔ lɛ naa lɛ, mɛɛ gbɛ nɔ obaatsɔ oya nɔ ojá Yehowa? Nitsumɔhe nine lɛ baatsɔɔ osafoŋ onukpai lɛ bɔ ni nyɛbaafee ni nyɛnine aya nɔ ashɛ mumɔŋ niyenii nɔ, gbɛ ni nyɛbaatsɔ nɔ nyɛto kpeei ahe gbɛjianɔ, kɛ bɔ ni nyɛbaafee nyɛshiɛ sane kpakpa lɛ. Kɛ́ nitsumɔhe nine lɛ nine nyɛɛɛ ashɛ asafoŋ onukpai lɛ anɔ lɛ, no lɛ, asafoŋ onukpai lɛ baaye abua bo kɛ asafoŋbii krokomɛi lɛ fɛɛ ni nyɛya nɔ nyɛjá Yehowa. Amɛbaadamɔ Biblia lɛ kɛ nibii ni awie yɛ wɔwoji lɛ amli lɛ anɔ amɛkɛ gbɛtsɔɔmɔi ahã.​—Mat. 28:19, 20; Bɔf. 5:29; Heb. 10:24, 25.

11. Mɛni hewɔ esaaa akɛ osheɔ gbeyei akɛ be ko baashɛ ni onáŋ mumɔŋ niyenii lɛ? Ni mɛni obaanyɛ ofee kɛbu mumɔŋ niyenii ni oyɔɔ lɛ he?

 ¹¹ Yehowa ewo shi akɛ, ebaadro etsuji lɛ nibii fɛɛ ni he hiaa amɛ koni amɛhemɔkɛyeli lɛ mli awa. (Yes. 65:13, 14; Luka 12:42-44) No hewɔ lɛ, esafo lɛ baaya nɔ afee nɔ fɛɛ nɔ ni esa akɛ efee koni onine ashɛ mumɔŋ niyenii kɛ hewalɛwoo nɔ, ni esaaa akɛ oyiŋ feɔ bo kɔshikɔshi yɛ enɛ he kɔkɔɔkɔ. Shi mɛni bo hu obaanyɛ ofee? Kɛ́ atsĩ wɔnitsumɔ lɛ naa lɛ, taomɔ he ko ni obaanyɛ okɛ o-Biblia kɛ woji krokomɛi lɛ atee. Kwɛmɔ ni okashi nibii ni jara wala nɛɛ oshwie shi kɛkɛ. Kɛ́ ilɛtrɔniki tsɔne ko nɔ amɛyɔɔ lɛ, too he gbɛjianɔ bɔ ni ebaawa akɛ mɔ ko baana. Anɔkwa, esa akɛ wɔteŋ mɔ fɛɛ mɔ akwɛ nɔ ni ebaanyɛ efee koni ehemɔkɛyeli lɛ mli akagbɔjɔ.

12. Mɛɛ gbɛ nɔ asafoŋ onukpai lɛ baanyɛ ato kpeei ahe gbɛjianɔ bɔ ni mɛi enaŋ sɛɛ?

¹² Ni kpeei ni wɔfeɔ daa otsi lɛ hu? Asafoŋ onukpai lɛ baato kpeei ahe gbɛjianɔ bɔ ni wɔhenyɛlɔi lɛ yoŋ sɛɛ. Ekolɛ amɛbaakɛɛ wɔ akɛ wɔkpe yɛ kui bibii amli, ni amɛbaafɔ be ni akɛfeɔ kpeei lɛ kɛ he ni afeɔ yɛ lɛ tsakemɔ. Nɔ ni bo hu obaanyɛ ofee kɛbu mɛi ni baa kpeei lɛ ashishi lɛ ahe ji, ni obaaba ogbee shi kɛ́ ootao owie nɔ ko yɛ gbɛ lɛ nɔ be ni obaa kpeei lɛ loo oshiɔ kɛyaa shĩa lɛ. Agbɛnɛ hu, ekolɛ ehe baahia ni osaa ohe bɔ ni mɛi ajwɛŋmɔ baŋ nɔ akɛ kpee oyaa lɛ.

13. Mɛni wɔkaseɔ yɛ nɔkwɛmɔnɔ kpakpa ni wɔnyɛmimɛi ni hi maji ni tsutsu ko lɛ amɛfeɔ Soviet Union lɛ anɔ lɛ fee lɛ mli?

¹³ Esoro he fɛɛ he kɛ bɔ ni shihilɛ feɔ kɛ́ atsĩ wɔnitsumɔ lɛ naa yɛ jɛmɛ. Kɛ̃lɛ, akɛni wɔsumɔɔ Yehowa, ni wɔmiisumɔ ni wɔgba mɛi e-Maŋtsɛyeli lɛ he sane hewɔ lɛ, wɔbaatao gbɛ ko kɛ̃ ni wɔtsɔ nɔ wɔshiɛ. (Luka 8:1; Bɔf. 4:29) Yinɔsaneŋmalɔ ko ni atsɛɔ lɛ Emily B. Baran lɛ tsɔɔ bɔ ni Yehowa Odasefoi ni yɔɔ maji ni feɔ Soviet Union lɛ anɔ lɛ fee amɛshiɛ be ni atsĩ amɛnaa be ko ni eho lɛ. Ewie akɛ: “Be ni nɔyeli lɛ kɛɛ Odasefoi lɛ akɛ amɛkpa shiɛmɔ lɛ, Odasefoi lɛ kɛ amɛkutsoŋbii, mɛi ni amɛkɛtsuɔ nii, kɛ amɛnanemɛi gba amɛhemɔkɛyeli lɛ he sane. Be ni amɔmɔ Odasefoi lɛ kɛtee nitsumɔ nsarai amli yɛ enɛ hewɔ lɛ, amɛshiɛ amɛhã mɛi ni amɛkɛyɔɔ nsarai lɛ amli lɛ.” Yɛ wɔnitsumɔ lɛ naa ni atsĩ lɛ fɛɛ sɛɛ lɛ, wɔnyɛmimɛi lɛ kpaaa shiɛmɔ. Kɛ́ eba lɛ akɛ atsĩ wɔnitsumɔ lɛ naa yɛ he ni oyɔɔ lɛ, bo hu tswaa ofai shi akɛ obaaya nɔ oshiɛ!

14. Lala 39:1 lɛ bɔɔ wɔ kɔkɔ akɛ wɔkafee mɛni?

¹⁴ Mɔ onaabu mli. Kɛ́ atsĩ wɔnitsumɔ lɛ naa lɛ, esa akɛ wɔhã ehi wɔjwɛŋmɔ mli akɛ “be yɛ ni afeɔ diŋŋ.” (Jaj. 3:7) Esaaa akɛ wɔtsɔɔ mɔ fɛɛ mɔ kɛkɛ wɔnyɛmimɛi lɛ agbɛ́i, hei ni wɔkpeɔ yɛ, gbɛi ni wɔtsɔɔ nɔ wɔshiɛɔ, bɔ ni feɔ ni wɔnine shɛɔ mumɔŋ niyenii nɔ, kɛ saji krokomɛi ni tamɔ nakai. Kɛ́ amralofoi lɛ loo amɛnajiaŋdamɔlɔi bi wɔ nibii nɛɛ, esaaa akɛ wɔtsɔɔ  amɛ; ni nakai nɔŋŋ esaaa akɛ wɔwieɔ nibii nɛɛ ahe wɔtsɔɔ wɔnanemɛi kɛ wɔwekumɛi ni yɔɔ wɔmaŋ lɛ loo maji krokomɛi anɔ lɛ, kɛ́ amɛji Yehowa tsuji jio, amɛjeee Yehowa tsuji jio. Kɛ́ wɔwie saji ni tamɔ nɛkɛ lɛ ahe wɔtsɔɔ mɛi ni esaaa akɛ amɛleɔ lɛ, wɔkɛ nyɛmimɛi lɛ miiwo oshãra mli.​—Kanemɔ Lala 39:1.

15. Mɛni Satan baasumɔ ni efee? Ni mɛni baaye abua wɔ ni wɔkagbee etsɔne lɛ mli?

¹⁵ Kaahã nibii bibii fite okɛ onyɛmimɛi lɛ ateŋ. Satan le akɛ “kɛ́ shĩa ko te shi ewo lɛ diɛŋtsɛ ehe lɛ, nakai shĩa lɛ nyɛŋ adamɔ shi.” (Mar. 3:24, 25) Enɛ hewɔ lɛ, be fɛɛ be lɛ, ebaasumɔ ni ekɛ mligbalamɔi aba wɔteŋ. Ele akɛ, kɛ́ enyɛ ewo wɔteŋ béi lɛ, wɔ sɔŋŋ wɔkɛ wɔhe baawu, moŋ fe ni wɔbaawu wɔshi lɛ.

16. Mɛɛ nɔkwɛmɔnɔ kpakpa Nyɛmiyoo Gertrud Poetzinger fee?

¹⁶ Esa akɛ nyɛmimɛi ni etsɛ yɛ asafo lɛ mli lɛ po akwɛ jogbaŋŋ yɛ Satan tsɔne nɛɛ he. Naa niiashikpamɔ ko ni hãa wɔnaa nakai. Ekɔɔ Nyɛmiyoo Gertrud Poetzinger kɛ Nyɛmiyoo Elfriede Löhr he. Nyɛmimɛi yei enyɔ nɛɛ fata mɛi ni afɔ amɛ mu lɛ ahe, ni awo amɛ kɛ nyɛmimɛi yei krokomɛi tsuŋ yɛ Nazi yiwalɛ nsara ko mli. Be ni amɛyɔɔ nsara lɛ mli lɛ, Elfriede hãa wiemɔi kɛwoɔ nyɛmimɛi krokomɛi lɛ hewalɛ. Enɛ hewɔ lɛ, Gertrud bɔi ehe awuŋayeli. Shi sɛɛ mli lɛ, ena akɛ nɔ ni efeɔ lɛ ehiii, ni ekpa Yehowa fai ni eye ebua lɛ. Ewie akɛ, “Kɛ́ mɛi krokomɛi bɔɔ mɔdɛŋ fe wɔ loo atuu sɔ̃i pii awo amɛdɛŋ fe wɔ lɛ, esa akɛ wɔkpɛlɛ nɔ kɛkɛ.” Mɛni ekoŋŋ Gertrud fee koni ekaye Elfriede he awuŋa? Ekɛ ejwɛŋmɔ ma Elfriede sui kpakpai lɛ kɛ bɔ ni ekɛ mɔ fɛɛ mɔ ŋmɔɔ lɛ nɔ. Enɛ ye ebua lɛ ni esaa ekɛ lɛ teŋ. Nyɛmimɛi yei enyɔ nɛɛ fata mɛi ni hiɛ kpãtãaa yɛ yiwalɛ nsarai lɛ amli lɛ ahe, ni amɛye Yehowa anɔkwa ni amɛsɔmɔ lɛ kɛyashi amɛgbe amɛshikpɔŋ nɔ sɔɔmɔ lɛ naa. Kɛ́ sane ba wɔ kɛ wɔnyɛmimɛi lɛ ateŋ, ni wɔmia wɔhiɛ waa wɔsaa lɛ, ebaahã ekomefeemɔ ahi wɔteŋ be fɛɛ be.​—Kol. 3:13, 14.

17. Mɛni hewɔ esaaa akɛ wɔyeɔ wɔtsui naa sane?

¹⁷ Kaaye otsui naa sane. Kɛ́ atsĩ wɔnitsumɔ lɛ naa lɛ, esa akɛ wɔbo gbɛtsɔɔmɔi ni nyɛmimɛi hii ni nyiɛɔ hiɛ lɛ kɛbaahã lɛ toi ni wɔkɛtsu nii. Kɛ́ wɔfee nakai lɛ, wɔnáŋ naagbai. (1 Pet. 5:5) Akɛ nɔkwɛmɔnɔ lɛ, be ni atsĩ wɔnitsumɔ lɛ naa yɛ maŋ ko nɔ lɛ, nyɛmimɛi ni nyiɛ hiɛ lɛ kɛ gbɛtsɔɔmɔ hã akɛ kɛ́ nyɛmimɛi lɛ tee shiɛmɔ lɛ, amɛkahã woji. Nyɛmi nuu gbɛgbalɔ ko ku ehiɛ efɔ̃ gbɛtsɔɔmɔ nɛɛ nɔ ni ehã mɛi woji. Ani ole nɔ ni jɛ mli kɛba? Be ko be ni ekɛ nyɛmimɛi komɛi tee shiɛmɔ amɛkpa lɛ, eyeee be ko ni polisifoi mɔmɔ amɛ ni amɛbibii amɛ saji. Asomoaŋ lɛ, be ni amɛshiɛɔ lɛ fɛɛ lɛ, etamɔ nɔ ni polisifoi lɛ nyiɛ amɛsɛɛ ni amɛhehee woji ni amɛhã lɛ. Mɛni wɔkaseɔ yɛ sane nɛɛ mli? No ji akɛ, kɛ́ ahã wɔ gbɛtsɔɔmɔ, ni wɔmiinu he akɛ  gbɛtsɔɔmɔ lɛ ehiii po lɛ, esa akɛ wɔkɛtsu nii. Kɛ́ wɔbo nyɛmimɛi ni Yehowa ehala akɛ amɛnyiɛ wɔhiɛ lɛ toi lɛ, bɔ fɛɛ bɔ ni fee lɛ, Yehowa baajɔɔ wɔ.​—Heb. 13:7, 17.

18. Mɛni hewɔ esaaa akɛ wɔwoɔ mlai ni he ehiaaa?

¹⁸ Kaawo mlai ni he ehiaaa. Kɛ́ asafoŋ onukpai lɛ wo mlai ni he ehiaaa lɛ, amɛmiigba nyɛmimɛi lɛ anaa. Nɔ ko nakai tee nɔ be ni atsĩ wɔnitsumɔ lɛ naa yɛ maŋ ni tsutsu ko lɛ atsɛɔ lɛ Czechoslovakia lɛ. Nyɛmi nuu ko ni atsɛɔ lɛ Juraj Kaminský lɛ wie yɛ nɔ ni tee nɔ lɛ he akɛ: “Be ni amɔmɔ nyɛmimɛi ni nyiɛ hiɛ lɛ kɛ asafoŋ onukpai lɛ ateŋ mɛi pii lɛ, nyɛmimɛi hii ni shwɛ lɛ ateŋ mɛi komɛi bɔi mlai woo yɛ bɔ ni esa akɛ nyɛmimɛi lɛ afee amɛnii amɛhã lɛ he, kɛ nibii ni esa akɛ amɛfee kɛ nibii ni esaaa akɛ amɛfeɔ.” Yehowa hãko wɔteŋ mɔ ko mɔ ko hegbɛ akɛ ewo mɛi krokomɛi mlai. Mɛi ni woɔ mlai ni he ehiaaa lɛ baasusu akɛ amɛmiibu amɛnyɛmimɛi lɛ ahe, shi yɛ anɔkwale mli lɛ, amɛnyɛmimɛi lɛ ahemɔkɛyeli lɛ nɔ nuŋtsɔmɛi moŋ amɛtsɔmɔ lɛ.​—2 Kor. 1:24.

19. Yɛ nɔ ni awie yɛ 2 Kronika 32:7, 8 lɛ naa lɛ, mɛni hewɔ esa akɛ wɔfee ekãa ekɔɔɔ he eko nɔ ni Satan baafee?

¹⁹ Satan Abonsam, wɔhenyɛlɔ ni fe fɛɛ lɛ, baaya nɔ efee nɔ fɛɛ nɔ ni ebaanyɛ kɛwa Yehowa tsuji anɔkwafoi ayi. (1 Pet. 5:8; Kpo. 2:10) Lɛ kɛ esamaŋfoi lɛ baasumɔ ni amɛtsĩ wɔnitsumɔ lɛ naa koni wɔkanyɛ wɔjá Yehowa. Shi wɔhãŋ amɛhe ŋmiŋmi amɔ wɔ ni wɔkpa Yehowa jamɔ kɔkɔɔkɔ! (5 Mo. 7:21) Yehowa yɛ wɔsɛɛ, ni ebaaya nɔ eye ebua wɔ kɛ́ atsĩ wɔnitsumɔ lɛ naa po.​—Kanemɔ 2 Kronika 32:7, 8.

20. Mɛni otswa ofai shi akɛ obaafee?

²⁰ Be ni afã blema Kristofoi lɛ akɛ amɛkashiɛ dɔŋŋ lɛ, amɛkɛɛ nɔyelɔi lɛ akɛ: “Kɛ́ eja yɛ Nyɔŋmɔ hiɛ akɛ abo nyɛ moŋ toi fe Nyɔŋmɔ lɛ, nyɛ diɛŋtsɛ nyɛkojoa. Shi wɔ lɛ, wɔnyɛŋ wɔkpa nibii ni wɔna kɛ nibii ni wɔnu lɛ ahe wiemɔ.” (Bɔf. 4:19, 20) Nyɛhãa wɔkasea blema Kristofoi lɛ, ni wɔtswa wɔfai shi akɛ, wɔkpaŋ Yehowa jamɔ kɔkɔɔkɔ, ekɔɔɔ he eko nɔ ni baaba.