1-2. Mɛɛ gbɛ nɔ Yehowa wiemɔi ni yɔɔ Yesaia 65:16, 17 lɛ woɔ wɔ hewalɛ ni wɔya nɔ wɔfi shi?

 AFI 2017 kpokpaa wulu nɔ kpee lɛ saneyitso ji, “Fi Shi Shiŋŋ!” ni enɛ wo wɔ hewalɛ waa. Kpee lɛ ye ebua wɔ ni wɔna bɔ ni wɔbaafee wɔdamɔ kai kɛ naagbai ni wɔkɛkpeɔ lɛ anaa. Kɛjɛ be ni wɔtee kpee nɛɛ, afii ejwɛ sɔŋŋ nɛ, shi jeŋ fɔŋ nɛɛ bako naagbee, ni wɔmiifi shi lolo.

² Mɛɛ naagbai okɛkpeɔ bianɛ? Ani owekunyo ko loo onaanyo ko ni osumɔɔ esane waa lɛ egbo? Ani hela ko miisu otsui? Ani gbɔlɛ eta ohe? Ani adebɔɔ naa oshãra loo basabasafeemɔ ekpãtã nii ahiɛ yɛ he ni oyɔɔ lɛ, aloo aawa nyɛ yi? Ani COVID-19 hela lɛ loo nɔ kroko ni tamɔ nakai ehã oshihilɛ fɛɛ efee basaa? Wɔmiikpa be ni wɔnaagbai lɛ fɛɛ asɛɛ baafo lɛ gbɛ waa. Nakai beiaŋ lɛ, wɔkaiŋ nibii gbohii nɛɛ dɔŋŋ, ni eko hu baŋ dɔŋŋ!—Kanemɔ Yesaia 65:16, 17.

3. Mɛni esa akɛ wɔfee amrɔ nɛɛ? Ni mɛni hewɔ?

³ Jeŋ fɔŋ nɛɛ mli shihilɛ wa, ni ekolɛ wɔsɛɛ lɛ, emli baawa fe nɛkɛ po. (Mat. 24:21) Enɛ hewɔ lɛ, esa akɛ wɔfee nibii ni baaye abua wɔ ni wɔya nɔ wɔfi shi, ejaakɛ Yesu wie akɛ, ‘kɛ́ wɔfi shi lɛ, wɔbaabaa wɔwala yi.’ (Luka 21:19) Kɛ́ wɔsusu bɔ ni mɛi komɛi fi shi yɛ naagbai ni tamɔ nɔ ni wɔkɛkpeɔ lɛ nɔŋŋ amli lɛ he lɛ, no baaye abua wɔ ni wɔya nɔ wɔfi shi.

4. Mɛni hewɔ wɔbaanyɛ wɔkɛɛ akɛ Yehowa ji mɔ ni efi shi fe mɔ fɛɛ mɔ lɛ?

⁴ Namɔ ji mɔ ni efi shi fe mɔ fɛɛ mɔ? Lɛ ji Yehowa Nyɔŋmɔ. Ekolɛ enɛ ehã ohiɛ miifee bo yaa. Shi susumɔ sane lɛ he okwɛ.  Jeŋ nɛɛ kã Abonsam dɛŋ, ni naagbai eyi mli obɔ. Yehowa baanyɛ afo nɔ fɛɛ nɔ sɛɛ amrɔ nɔŋŋ, shi eemɛ kɛyashi be ko dani efee nakai. (Rom. 9:22) No hewɔ lɛ, bianɛ lɛ, Nyɔŋmɔ miifi shi kɛyashi nakai be lɛ baashɛ. Nyɛhãa wɔkwɛa nibii nɛɛhu amli ni Nyɔŋmɔ miifi shi yɛ.

5. Mɛni afee kɛwo Nyɔŋmɔ gbɛ́i lɛ he muji? Ni te onuɔ he ohã tɛŋŋ yɛ enɛ he?

⁵ Awo egbɛ́i lɛ he muji. Yehowa shwɛɛɛ egbɛ́i lɛ he kwraa, ni esumɔɔɔ ni mɔ ko mɔ ko woɔ egbɛ́i lɛ he muji. (Yes. 42:8) Shi mɛi ewo egbɛ́i lɛ he muji afii akpei ekpaa sɔŋŋ nɛ. (Lala 74:10, 18, 23) Klɛŋklɛŋ be ni afee enɛ ji yɛ Eden abɔɔ mli be ni Abonsam (ni shishi ji, “Mɔ Ni Wieɔ Mɔ He Efɔŋ” lɛ) kɛ sane fɔ̃ Nyɔŋmɔ nɔ akɛ ekɛ nɔ ko ni he miihia Adam kɛ Hawa koni amɛná miishɛɛ lɛ miikama amɛ lɛ. (1 Mo. 3:1-5) Kɛjɛ no nɔ kɛbaa nɛɛ, awie ashi Yehowa akɛ ekɛ nibii ni he hiaa adesai kamaa amɛ. Edɔ Yesu waa akɛ aawo e-Tsɛ lɛ gbɛ́i he muji nɛkɛ. No hewɔ lɛ, etsɔɔ ekaselɔi lɛ ni amɛsɔle akɛ: “Wɔ-Tsɛ ni yɔɔ ŋwɛi, ogbɛ́i lɛ he atse.”—Mat. 6:9.

6. Mɛni hewɔ Yehowa ehã be kplaŋŋ eho dani ehã ana akɛ lɛ pɛ ji mɔ ni sa akɛ eyeɔ jeŋ muu lɛ fɛɛ nɔ?

⁶ Awie ashi Yehowa akɛ jeee lɛ esa akɛ eyeɔ nɔ. Yehowa pɛ ji mɔ ni sa akɛ eyeɔ ŋwɛi kɛ shikpɔŋ lɛ nɔ, ni gbɛ ni etsɔɔ nɔ eyeɔ nɔ lɛ nɔ bɛ. (Kpo. 4:11) Shi Abonsam elaka ŋwɛibɔfoi kɛ adesai komɛi ni ehã amɛhe amɛye akɛ Nyɔŋmɔ esaaa mɔ ni yeɔ jeŋ muu lɛ fɛɛ nɔ. Ebaahe be dani abaana nɛkɛ sane nɛɛ naa. Yehowa eŋmɛ gbɛ ni adesai eka nɔyelii srɔtoi amɛkwɛ be kplaŋŋ koni amɛ diɛŋtsɛ amɛna akɛ, kɛ́ lɛ eyeee amɛnɔ lɛ, nibii ehiŋ hãŋ amɛ. (Yer. 10:23) Enɛ ni efee lɛ hãa wɔnaa akɛ, ehiɛ kã shi waa. Bɔ ni Nyɔŋmɔ eto etsui shi lɛ hewɔ lɛ, kɛ́ ana sane nɛɛ naa lɛ, mɔ ko nyɛŋ atee sane nɛɛ shi dɔŋŋ. Mɔ fɛɛ mɔ baana akɛ Yehowa sane ja, ni akɛ e-Maŋtsɛyeli lɛ pɛ baanyɛ ahã adesai ahi shi yɛ toiŋjɔlɛ mli ni nɔ fɔŋ ko ninaaa amɛ.

7. Namɛi ete shi amɛwo Yehowa? Ni mɛni ebaafee amɛ?

⁷ Ebii lɛ ekomɛi ete shi amɛwo lɛ. Be ni Yehowa bɔ ŋwɛibɔfoi lɛ kɛ adesai lɛ, no mli lɛ amɛyeɔ emuu. Shi ŋwɛibɔfoi lɛ ateŋ mɔ kome ni sɛɛ mli lɛ abale lɛ akɛ Satan (ni shishi ji, “Shiteekɛwolɔ” lɛ) te shi ewo Yehowa, ni ehã Adam kɛ Hawa ni no mli lɛ amɛ hu amɛye emuu lɛ te shi amɛwo lɛ. Sɛɛ mli lɛ, ŋwɛibɔfoi krokomɛi kɛ adesai krokomɛi hu te shi amɛwo Yehowa. (Yuda 6) Nyɔŋmɔ webii lɛ, ni ji Israel maŋ lɛ mli bii lɛ ateŋ mɛi komɛi po je esɛɛ ni amɛyajá nyɔŋmɔi krokomɛi. (Yes. 63:8, 10) Enɛ dɔ Yehowa waa. Shi Yehowa eto etsui shi eemɛ kɛyashi be baashɛ ni ebaakpãtã mɛi fɛɛ ni teɔ shi amɛwoɔ lɛ lɛ ahiɛ. Enɛ baahã Yehowa kɛ mɛi ni yeɔ lɛ anɔkwa lɛ ahe ajɔ amɛ, ejaakɛ ehe ebahiaŋ ni amɛfi shi dɔŋŋ!

8-9. Mɛɛ amalei awie yɛ Yehowa he? Ni mɛni wɔbaanyɛ wɔfee kɛtsɔɔ akɛ nɛkɛ amalei nɛɛ bɛ mli?

⁸ Satan miimale lɛ kɛ etsuji lɛ ahe. Satan emale Yehowa kɛ etsuji anɔkwafoi lɛ fɛɛ ahe. Efee enɛ be ni efolɔ Nyɔŋmɔ tsulɔ anɔkwafo Hiob naa akɛ nibii ni Nyɔŋmɔ hãa lɛ lɛ ahewɔ esɔmɔɔ lɛ lɛ. (Hiob 1:8-11; 2:3-5) Abonsam miimale Nyɔŋmɔ tsuji ahe kɛbashi ŋmɛnɛ. (Kpo. 12:10) Kɛ́ wɔtee nɔ wɔfi shi yɛ naagbai ni wɔkɛkpeɔ lɛ fɛɛ sɛɛ, ni wɔye Yehowa anɔkwa yɛ suɔmɔ ni wɔyɔɔ kɛhã lɛ lɛ hewɔ lɛ, no baahã ana akɛ nɔ ni Satan ewie lɛ fɛɛ ji amale. Kɛ́ wɔfi shi lɛ, Yehowa baajɔɔ wɔ tamɔ bɔ ni ejɔɔ Hiob lɛ.—Yak. 5:11.

⁹ Satan tsɔɔ amale jamɔŋ hiɛnyiɛlɔi lɛ anɔ ehãa mɛi nuɔ he akɛ Yehowa yitsoŋ wa, ni lɛ ehãa adesai piŋɔ. Mɛi komɛi po kɛɛ kɛ́ gbekɛ ko gbo lɛ, Nyɔŋmɔ ni ebawó lɛ koni eyatsɔ  bɔfo yɛ ŋwɛi. Enɛ lɛ, musubɔɔ wiemɔ diɛŋtsɛ ni! Shi wɔ lɛ, wɔle akɛ Yehowa ji Tsɛ ni yɔɔ suɔmɔ waa. No hewɔ lɛ, kɛ́ hela mɔ wɔ waa loo wɔsuɔlɔ ko gbo lɛ, wɔshwaaa Yehowa kɔkɔɔkɔ. Wɔheɔ wɔyeɔ akɛ wɔsɛɛ ko lɛ, Yehowa baatsa wɔhelai fɛɛ, ni ebaatee mɛi ni egboi lɛ shi. Wɔbaakɛɛ mɛi fɛɛ ni yɔɔ tsui kpakpa lɛ akɛ Yehowa ji Nyɔŋmɔ ni yɔɔ suɔmɔ. Enɛ baahã Yehowa aná hetoo kpakpa ehã Abonsam, mɔ ni wieɔ eshiɔ lɛ lɛ.—Abɛi 27:11.

10. Mɛni Lala 22:23, 24 lɛ hãa wɔleɔ yɛ Yehowa he?

¹⁰ Etsuji ni esumɔɔ amɛsane waa lɛ miipiŋ. Yehowa musuŋ tsɔɔ lɛ yɛ ewebii lɛ ahe. No hewɔ lɛ, kɛ́ ena ni wɔmiipiŋ yɛ wɔyi ni awaa, hela ko ni emɔ wɔ, loo wɔtɔmɔi ahewɔ lɛ, egbaa enaa waa. (Kanemɔ Lala 22:23, 24.) Kɛ́ wɔmiipiŋ lɛ, Yehowa nuɔ he ehãa wɔ; eesumɔ ni efo wɔpiŋmɔ lɛ sɛɛ, ni ebaafo sɛɛ hu. (Okɛto 2 Mose 3:7, 8; Yesaia 63:9 lɛ he.) Wɔsɛɛ lɛ, ‘Yehowa baatsumɔ wɔhiŋmɛiiaŋ yaafonui fɛɛ, ni gbele ehiŋ shi dɔŋŋ, ni mɔ ko yeŋ awerɛho dɔŋŋ, ni mɔ ko hu fóŋ dɔŋŋ, ni mɔ ko hu piŋŋ dɔŋŋ.’—Kpo. 21:4.

11. Kɛ́ Yehowa kai etsuji anɔkwafoi ni egboi lɛ, te enuɔ he ehãa tɛŋ?

¹¹ Ehiɛ tseɔ enanemɛi ni egboi lɛ. Kɛ́ Yehowa kai etsuji anɔkwafoi ni egboi lɛ, te enuɔ he ehãa tɛŋŋ? Ehiɛ tseɔ amɛ waa! (Hiob 14:15) Yehowa hiɛ tseɔ enaanyo Abraham waa. (Yak. 2:23) Ehiɛ tseɔ Mose, mɔ ni ekɛ lɛ wie “hiɛ kɛ hiɛ” lɛ hu. (2 Mo. 33:11) Ni eeshwe ni enu David kɛ lalatsɛmɛi krokomɛi lɛ ayijiemɔ lalai ni ŋɔɔŋɔi lɛ. (Lala 104:33) Eyɛ mli akɛ Yehowa nanemɛi nɛɛ egboi moŋ, shi ehiɛ kpako amɛnɔ. (Yes. 49:15) Ekaiɔ amɛhe nɔ fɛɛ nɔ. Anɔkwa, “yɛ ehiɛ lɛ, amɛ fɛɛ amɛhiɛ kamɔ.” (Luka 20:38) Wɔsɛɛ lɛ, Yehowa baatee amɛ shi, ni ebaanu amɛsɔlemɔi ni amɛjɛɔ amɛtsui mli amɛsɔleɔ lɛ ekoŋŋ ni amɛbaajá lɛ. Kɛ́ owekunyo ko loo onaanyo ko egbo lɛ, saji ni wɔsusu he nɛɛ baanyɛ ashɛje omii.

12. Mɛɛ nibii miiya nɔ yɛ naagbee gbii nɛɛ amli ni haoɔ Yehowa waa?

 ¹² Mɛi fɔji ehã mɛi miipiŋ. Be ni ate shi awo Yehowa yɛ Eden abɔɔ lɛ mli lɛ, ena akɛ nibii baafite kwraa kɛyashi lɛ diɛŋtsɛ ebaafo nɔ fɛɛ nɔ sɛɛ. Yehowa nyaaa efɔŋfeemɔ, jalɛ sane ni ayeee, kɛ basabasafeemɔ ni yaa nɔ yɛ je lɛ lɛ mli ŋmɛnɛ lɛ ahe kwraa. Mɛi ni amɛsane dɔɔ lɛ waa ji, mɛi ni he waaa, mɛi ni bɛ mɔ ko ni baafã amɛhe, awusai, kɛ agbɛnɛ hu okulafoi. (Zak. 7:9, 10) Ni nɔ ni gbaa enaa fe fɛɛ ji, kɛ́ ena ni aawa etsuji anɔkwafoi lɛ ayi loo aawo amɛ tsuŋ. Nyɛ mɛi fɛɛ ni nyɛmiifi shi, nyɛnáa nyɛlea akɛ Yehowa sumɔɔ nyɛ waa.

13. Mɛɛ gbɛ nɔ mɛi ajeŋba ekpɔtɔ ŋmɛnɛ? Ni mɛni Nyɔŋmɔ baafee yɛ he?

¹³ Mɛi ajeŋba ekpɔtɔ. Nyɔŋmɔ bɔ adesai yɛ esubaŋ nɔ koni amɛfee nibii kpakpai. Shi Satan lakaa amɛ koni amɛkɛ amɛhe awo jeŋba sha mli loo amɛfee nibii gbohii krokomɛi. Yɛ Noa beiaŋ lɛ, Nyɔŋmɔ “na akɛ gbɔmɔ nɔfɔŋfeemɔ lɛ efa babaoo yɛ shikpɔŋ lɛ nɔ,” ni “edɔ Yehowa waa akɛ efee gbɔmɛi yɛ shikpɔŋ lɛ nɔ, ni ewerɛ ho ehe yɛ etsui mli.” (1 Mo. 6:5, 6, 11) Ani kɛjɛ nakai be lɛ kɛbashi ŋmɛnɛ lɛ, nibii ehi? Dabi kwraa! Ŋmɛnɛ lɛ, mɛi ajeŋba ekpɔtɔ waa. Ajwamaŋbɔɔ, gbalafitemɔ, hii ni kɛ hii náa bɔlɛ, kɛ yei ni kɛ yei náa bɔlɛ egbɛ eshwã he fɛɛ he, ni enɛ ŋɔɔ Satan naa waa! (Efe. 4:18, 19) Agbɛnɛ hu, Satan náa miishɛɛ waa kɛji Nyɔŋmɔ tsuji lɛ ateŋ mɔ ko yafee esha ni tamɔ nɛkɛ. Amrɔ nɛɛ, Yehowa miito etsui shi, shi kɛ́ be ni eto lɛ shɛ lɛ, ebaajie jeŋba sha kɛya.

14. Mɛni adesai feɔ shikpɔŋ lɛ kɛ kooloi ni yɔɔ nɔ lɛ?

¹⁴ Aafite shikpɔŋ lɛ. Gbɔmɔ ‘miiye enyɛmi gbɔmɔ nɔ kɛmiiye lɛ awui.’ Shi jeee no pɛ; eefite shikpɔŋ lɛ ni Yehowa etu ewo edɛŋ lɛ, ni eekpãtã kooloi ni Yehowa kɛɛ ekwɛ amɛnɔ lɛ hu ahiɛ. (Jaj. 8:9; 1 Mo. 1:28) Jeŋ shikpalɔi kɛɔ akɛ, adesai anifeemɔ baanyɛ ahã tsei kɛ kooloi srɔtoisrɔtoi akpei akpe kome ashishi abule yɛ afii fioo ni kamɔ wɔhiɛ lɛ amli. Enɛ hãa wɔnaa nɔ hewɔ ni mɛi pii atsui yeɔ yɛ bɔ ni akpãtãa shikpɔŋ lɛ hiɛ lɛ he lɛ. Shi miishɛɛ sane ji akɛ, Yehowa ewo shi akɛ ‘ebaakpãtã mɛi ni kpãtãa shikpɔŋ lɛ hiɛ lɛ ahiɛ,’ ni ehã shikpɔŋ muu lɛ fɛɛ atsɔ Paradeiso.—Kpo. 11:18, shn.; Yes. 35:1.

15-16. Mɛni esa akɛ etsirɛ wɔ ni wɔto wɔtsui shi tamɔ bɔ ni Yehowa eto etsui shi lɛ? Okɛ enɛ he nɔkwɛmɔnɔ ahã.

¹⁵ Yehowa wɔ-Tsɛ ni yɔɔ ŋwɛi lɛ, eto etsui shi yɛ naagbai ni ekɛkpe afii akpei abɔ nɛɛ amli. (Kwɛmɔ akrabatsa ni ji “ Nɔ Ni Eba Hewɔ Ni Yehowa Miifi Shi.”) Yehowa baanyɛ akpãtã jeŋ fɔŋ nɛɛ hiɛ be fɛɛ be ni esumɔɔ, shi eto etsui shi, ni wɔná etsuishitoo lɛ he sɛɛ waa! Wɔbaanyɛ wɔkɛ enɛ afee he nɔkwɛmɔnɔ. Ŋɔɔ lɛ akɛ yoo ko hiɛ hɔ, ni akɛɛ lɛ kɛ ewu lɛ lɛ akɛ kɛ́ efɔ lɛ, gbekɛ lɛ baafee helatsɛ ni ehiŋ shi etsɛŋ. Shi fɛɛ sɛɛ lɛ, amɛfɔ amɛbi lɛ lɛ, eyɛ mli akɛ amɛle akɛ ekwɛmɔ baatɔ amɛ waa. Akɛni amɛsumɔɔ gbekɛ lɛ hewɔ lɛ, amɛfee nɔ fɛɛ nɔ ni amɛbaanyɛ koni gbekɛ lɛ aná miishɛɛ yɛ shihilɛ mli.

¹⁶ Nakai nɔŋŋ eji yɛ wɔ ni ji Adam kɛ Hawa bii lɛ fɛɛ agbɛfaŋ. Be ni abaafɔ wɔ beebe lɛ, wɔyeee emuu. Shi loloolo lɛ, Yehowa sumɔɔ wɔ ni ekwɛɔ wɔ. (1 Yoh. 4:19) Fɔlɔi lɛ ni wɔwie amɛhe yɛ nɔkwɛmɔnɔ lɛ mli lɛ nyɛŋ afee nɔ ko yɛ amɛbi lɛ shihilɛ lɛ he, shi Yehowa baanyɛ afee nɔ ko yɛ wɔshihilɛ lɛ he. Eto be ni ekɛbaajie adesai anaagbai fɛɛ kɛje jɛmɛ. (Mat. 24:36) Esa akɛ suɔmɔ ni ejie kpo etsɔɔ wɔ lɛ atsirɛ wɔ ni wɔ hu wɔto wɔtsui shi kɛyashi be ni eto lɛ baashɛ, aloo jeee nakai?

17. Kɛ́ wɔsusu nɔ ni awie yɛ Yesu he yɛ Hebribii 12:2, 3 lɛ he lɛ, mɛɛ gbɛ nɔ no baanyɛ awaje wɔ ni wɔya nɔ wɔfi shi?

 ¹⁷ Yehowa ji mɔ ni efi shi fe mɔ fɛɛ mɔ. Yesu kase e-Tsɛ lɛ ni lɛ hu efi shi. Be ni eba shikpɔŋ lɛ nɔ lɛ, awie ashi lɛ, ashwie ehiɛ shi, ni apiŋ lɛ yɛ piŋmɔ tso nɔ. Shi edamɔ fɛɛ naa yɛ wɔ hewɔ. (Kanemɔ Hebribii 12:2, 3.) Ekã shi faŋŋ akɛ, bɔ ni Yehowa miifi shi lɛ ji nɔ ni waje Yesu ni lɛ hu efi shi lɛ. Wɔ hu Yehowa nɔkwɛmɔnɔ lɛ baanyɛ awaje wɔ ni wɔfi shi.

18. Mɛɛ gbɛ nɔ 2 Petro 3:9 lɛ hãa wɔnaa nɔ ni ejɛ Yehowa tsuishitoo lɛ mli kɛba?

¹⁸ Kanemɔ 2 Petro 3:9. Yehowa le be ni hi fe fɛɛ ni ekɛbaafo efɔŋfeemɔ sɛɛ. Etsuishitoo lɛ hewɔ lɛ, mɛi pii ebale lɛ. Ni amrɔ nɛɛ, mɛi akpei abɔ nɛɛ fɛɛ miijá lɛ. Eŋɔɔ amɛ fɛɛ amɛnaa akɛ, Yehowa tsuishitoo lɛ hewɔ lɛ, afɔ amɛ, amɛkase ehe nii ni amɛbasumɔ lɛ, ni amɛjɔɔ amɛhe nɔ amɛhã lɛ. Kɛ́ mɛi akpekpei abɔ nɛɛ fi shi kɛyashi naagbee lɛ, Yehowa baajwere amɛ, ni no baahã ana faŋŋ akɛ ehi waa akɛ eto etsui shi!

19. Mɛni esa akɛ wɔtswa wɔfai shi akɛ wɔbaafee? Ni kɛ́ wɔfee nakai lɛ, mɛɛ jɔɔmɔi wɔbaaná?

¹⁹ Yehowa ehã wɔna akɛ, wɔbaanyɛ wɔfi shi kɛ miishɛɛ. Yɛ naagbai kɛ piŋmɔi ni Satan kɛba lɛ fɛɛ sɛɛ lɛ, Yehowa kã he eji “miishɛɛ Nyɔŋmɔ lɛ.” (1 Tim. 1:11) Wɔ hu wɔbaanyɛ wɔya nɔ wɔfi shi kɛ miishɛɛ be mli ni wɔmɛɔ ni Yehowa atse egbɛ́i lɛ he, ehã ana akɛ lɛ ji mɔ ni sa akɛ eyeɔ jeŋ muu lɛ fɛɛ nɔ, efo efɔŋfeemɔ fɛɛ sɛɛ, ni ehã wɔnaagbai lɛ fɛɛ asɛɛ afo lɛ. Nyɛhãa wɔtswaa wɔfai shi akɛ wɔbaafi shi, ni wɔkai be fɛɛ be akɛ, wɔ-Tsɛ ni yɔɔ ŋwɛi lɛ hu miifi shi. Kɛ́ wɔfee nakai lɛ, wiemɔi nɛɛ baaba mli yɛ wɔgbɛfaŋ, akɛ: “Gbɔmɔ ni yaa nɔ efiɔ shi yɛ shihilɛ ni mli wa mli lɛ yɛ miishɛɛ, ejaakɛ kɛ́ Nyɔŋmɔ ná ehe miishɛɛ lɛ, ebaaná wala akekere lɛ, nɔ ni Yehowa wo shi akɛ ekɛbaahã mɛi ni yaa nɔ amɛsumɔɔ lɛ lɛ.”—Yak. 1:12.