1. Mɛni Yehowa efee ehã bo?

 TE FEE tɛŋŋ ni obatsɔ Yehowa Odasefonyo? Klɛŋklɛŋ lɛ, ekolɛ ofɔlɔi, mɔ ko ni okɛtsuɔ nii loo okɛyaa skul, loo nyɛmimɛi komɛi ni nyiɛ shiɛmɔ nɔ lɛ shiɛ “sane kpakpa lɛ” amɛtsɔɔ bo. (Mar. 13:10) No sɛɛ lɛ, ahe be ni akɛ bo kase Biblia lɛ. Nibii ni okase lɛ hã obasumɔ Yehowa waa ni obana hu akɛ esumɔɔ bo. Yehowa gbala bo kɛba anɔkwale lɛ mli, ni amrɔ nɛɛ ni obatsɔ Yesu Kristo kaselɔ lɛ, oná hiɛnɔkamɔ akɛ obaahi shi kɛya naanɔ. (Yoh. 6:44) Ŋwanejee ko bɛ he akɛ, eŋɔɔ onaa waa akɛ Yehowa tsirɛ mɔ ko ni etsɔɔ bo anɔkwale lɛ ni eye ebua bo ni obatsɔ etsulɔ.

2. Mɛni wɔbaasusu he yɛ nikasemɔ nɛɛ mli?

² Amrɔ nɛɛ ni wɔbale anɔkwale lɛ, esa akɛ wɔye wɔbua mɛi krokomɛi ni amɛ hu amɛyi gbɛ ni kɛ mɔ yaa naanɔ wala mli lɛ nɔ. Ekolɛ ewaaa kɛhãaa wɔ akɛ wɔbaaya shĩa fɛɛ shĩa, shi ewa kɛhã wɔ akɛ wɔkɛ mɛi baafee Biblia mli nikasemɔ. Ani nakai eji yɛ ogbɛfaŋ? Kɛ́ nakai ni lɛ, ekolɛ nibii ni wɔbaasusu he yɛ nikasemɔ nɛɛ mli lɛ baaye abua bo. Wɔbaasusu nɔ ni tsirɛɔ wɔ ni wɔye wɔbua mɛi ni amɛbatsɔmɔ Yesu kaselɔi lɛ he. Agbɛnɛ hu, wɔbaakwɛ bɔ ni wɔbaafee wɔye naagbai ni hãaa wɔnyɛ wɔkɛ mɛi afee Biblia mli nikasemɔ lɛ anɔ. Shi dani wɔbaaya nomɛi anɔ lɛ, nyɛhãa wɔsusua nɔ hewɔ ni esa akɛ wɔshiɛ sane kpakpa lɛ, ni agbɛnɛ hu, wɔtsɔɔ mɛi nii lɛ he.

3. Mɛni hewɔ esa akɛ wɔshiɛ?

³ Be ni Yesu yɔɔ shikpɔŋ lɛ nɔ lɛ, ekɛ nitsumɔi srɔtoi enyɔ wo esɛɛnyiɛlɔi lɛ adɛŋ. Klɛŋklɛŋ lɛ, ekɛɛ amɛ ni amɛshiɛ Maŋtsɛyeli lɛ he sane kpakpa lɛ, ni etsɔɔ amɛ bɔ ni amɛtsu lɛ amɛhã.  (Mat. 10:7; Luka 8:1) Akɛ nɔkwɛmɔnɔ lɛ, etsɔɔ amɛ nɔ ni amɛfee kɛ́ mɛi bo Maŋtsɛyeli lɛ he sane lɛ toi kɛ nɔ ni amɛfee kɛ́ mɛi booo toi. (Luka 9:2-5) Yesu gba hu akɛ ‘amɛbaaye jeŋmaji lɛ fɛɛ odase,’ ni tsɔɔ akɛ, amɛbaashiɛ amɛhã mɛi pii, ni amɛbaashiɛ yɛ hei srɔtoisrɔtoi pii hu. (Mat. 24:14; Bɔf. 1:8) Yesu fã ekaselɔi lɛ ni amɛgba mɛi Nyɔŋmɔ Maŋtsɛyeli lɛ kɛ nɔ ni ebaatsu lɛ he sane, ekɔɔɔ he eko bɔ ni mɛi baafee amɛnii amɛhã yɛ he.

4. Yɛ nɔ ni awie yɛ Mateo 28:18-20 lɛ naa lɛ, mɛɛ nitsumɔ kroko esa akɛ wɔtsu yɛ Nyɔŋmɔ Maŋtsɛyeli lɛ ni wɔbaashiɛ wɔhã mɛi lɛ sɛɛ?

⁴ Mɛni ji nitsumɔ ni ji enyɔ ni Yesu kɛhã esɛɛnyiɛlɔi lɛ? Ekɛɛ amɛtsɔɔ mɛi nii koni mɛi lɛ aye nii fɛɛ ni efã amɛ lɛ nɔ. Mɛi komɛi kɛɛ Yesu famɔ akɛ ashiɛ ni atsɔɔ mɛi nii lɛ kɔɔ blema Kristofoi lɛ pɛ ahe. Shi ani nakai eji lɛɛlɛŋ? Dabi. Yesu tsɔɔ akɛ abaaya nɔ ashiɛ ni atsɔɔ mɛi nii “kɛyashi je lɛ naagbee gbii lɛ amli,” ni ji, wɔbei nɛɛ amli. (Kanemɔ Mateo 28:18-20.) Eeenyɛ efee akɛ, Yesu kɛ famɔ akɛ afee mɛi kaselɔi lɛ hã be ni ejie ehe kpo etsɔɔ ekaselɔi ni fa fe 500 lɛ. (1 Kor. 15:6) Ni yɛ Kpojiemɔ wolo lɛ mli lɛ, efee lɛ faŋŋ akɛ, esa akɛ ekaselɔi lɛ fɛɛ aye abua mɛi ni amɛbale Yehowa.​—Kpo. 22:17.

5. Mɛɛ nɔkwɛmɔnɔ Paulo kɛtsu nii yɛ 1 Korintobii 3:6-9 lɛ kɛtsɔɔ tsakpãa ni yɔɔ shiɛmɔ kɛ nitsɔɔmɔ teŋ?

⁵ Bɔfo Paulo kɛ kaselɔfeemɔ nitsumɔ lɛ to nidumɔ he, ni ehã wɔna akɛ jeee wui lɛ pɛ kɛkɛ esa akɛ wɔdu; esa akɛ wɔfee nibii krokomɛi wɔfata he. Ekɛɛ Kristofoi ni yɔɔ Korinto lɛ akɛ: “Mi lɛ, midu, Apolo shwie nɔ nu . . . Nyɛ lɛ, Nyɔŋmɔ ŋmɔ ji nyɛ.” (Kanemɔ 1 Korintobii 3:6-9.) Akɛni nitsulɔi ji wɔ yɛ “Nyɔŋmɔ ŋmɔ” lɛ mli hewɔ lɛ, kɛ́ wɔdu wui lɛ kɛtsɔ shiɛmɔ nɔ lɛ, esa akɛ wɔshwie amɛnɔ nu kɛtsɔ nitsɔɔmɔ nɔ. (Yoh. 4:35) Shi wɔle akɛ Nyɔŋmɔ ji mɔ ni hãa dumɔwui lɛ daraa, ni tsɔɔ akɛ, lɛ ji mɔ ni gbalaa mɛi kɛbaa eŋɔɔ.

6. Kɛ́ wɔmiitsɔɔ mɛi nii lɛ, mɛni esa akɛ wɔye wɔbua amɛ ni amɛfee?

⁶ Wɔmiitao “mɛi fɛɛ ni yɔɔ anɔkwale lɛ ni baanyɛ ahã amɛná naanɔ wala lɛ he tsui kpakpa.” (Bɔf. 13:48) Nɔ ni wɔbaanyɛ wɔfee kɛye wɔbua mɛi ni tamɔ nɛkɛ koni amɛbatsɔmɔ kaselɔi ji, ni wɔbaaye wɔbua amɛ ni (1) amɛnu nibii ni amɛkaseɔ yɛ Biblia lɛ mli lɛ shishi, (2) amɛhe amɛye, ni (3) amɛkɛtsu nii. (Yoh. 17:3; Kol. 2:6, 7; 1 Tes. 2:13) Kɛ́ mɛi fɛɛ ni yɔɔ asafo lɛ mli lɛ jie suɔmɔ kpo amɛtsɔɔ Biblia mli nikaselɔi lɛ, ni amɛhere amɛ hiɛmɛɛ kɛ́ amɛba asafoŋ kpeei lɛ, no baaye abua amɛ ni amɛbatsɔmɔ kaselɔi. (Yoh. 13:35) Agbɛnɛ hu, esa akɛ mɛi ni kɛ amɛkaseɔ nii lɛ ahe be ni amɛye amɛbua amɛ ni amɛfãmɔ hemɔkɛyelii kɛ nifeemɔi ni ‘shishifãi emɔmɔ shi waa’ lɛ amɛshwie. (2 Kor. 10:4, 5) Bei komɛi lɛ, eheɔ nyɔji pii dani anyɛɔ ayeɔ abuaa mɔ ko ni fiofio lɛ efeɔ tsakemɔi ni he hiaa lɛ yɛ eshihilɛ mli, ni abaptisiɔ lɛ. Shi kɛ́ wɔmia wɔhiɛ wɔye wɔbua mɔ ko yɛ nakai gbɛ nɔ lɛ, wɔmɔdɛŋbɔi lɛ efeŋ efolo.

7. Mɛni tsirɛɔ wɔ ni wɔshiɛ sane kpakpa lɛ wɔhã mɛi ni wɔtsɔɔ amɛ nii?

⁷ Mɛni hewɔ wɔshiɛɔ ni wɔtsɔɔ mɛi nii koni amɛbatsɔmɔ Yesu kaselɔi? Klɛŋklɛŋ lɛ, wɔfeɔ nakai ejaakɛ wɔsumɔɔ Yehowa. Kɛ́ wɔmia wɔhiɛ wɔye famɔ akɛ wɔshiɛ ni wɔfee mɛi kaselɔi lɛ nɔ lɛ, no tsɔɔ akɛ wɔsumɔɔ Nyɔŋmɔ. (1 Yoh. 5:3) Susumɔ enɛ he okwɛ: Oshiɛɔ ohãa mɛi yɛ shĩa fɛɛ shĩa kɛ gbɛi krokomɛi anɔ ejaakɛ osumɔɔ Yehowa. Shi ani oná lɛ mlɛo akɛ obaaye nakai famɔ lɛ nɔ? Ekolɛ onáaa lɛ mlɛo. Klɛŋklɛŋ be ni otee shiɛmɔ lɛ, ani oshe gbeyei? Ŋwanejee ko bɛ he akɛ oshe gbeyei. Shi ole akɛ Yesu miisumɔ ni otsu nakai nitsumɔ lɛ, no hewɔ lɛ oye efamɔ lɛ nɔ ni otsu. Ekolɛ be ni  be shwie mli lɛ, agbɛnɛ ewaaa ehãaa bo tsɔ akɛ obaashiɛ ohã mɛi. Ni Biblia mli nikasemɔ feemɔ hu? Ani otsui fãa kɛ́ okai akɛ esa akɛ okɛ mɛi afee Biblia mli nikasemɔ? Ekolɛ otsui fãa. Shi kɛ́ osɔle obi Yehowa ni eye ebua bo ni ofee ekãa ni okɛ mɛi aje Biblia mli nikasemɔ shishi ni oye obua amɛ ni amɛbatsɔmɔ kaselɔi lɛ, ebaanyɛ eye ebua bo ni oná he miishɛɛ akɛ obaafee nakai.

8. Yɛ nɔ ni awie yɛ Marko 6:34 lɛ naa lɛ, mɛni ekoŋŋ baatsirɛ wɔ ni wɔtsɔɔ mɛi nii?

⁸ Nɔ ni ji enyɔ ni tsirɛɔ wɔ ni wɔtsɔɔ mɛi nii ji akɛ, wɔsumɔɔ wɔnyɛmi gbɔmɔ. Be ko lɛ, etɔ Yesu kɛ ekaselɔi lɛ waa ejaakɛ amɛyashiɛ waa. Kulɛ amɛyaajɔɔ amɛhe yɛ he ko shi mɛi babaoo ko ba amɛŋɔɔ. Yesu musuŋ tsɔ lɛ yɛ mɛi lɛ ahe, ni ebɔi amɛ “nibii pii” tsɔɔmɔ. (Kanemɔ Marko 6:34.) Yesu mia ehiɛ etsɔɔ mɛi lɛ nii yɛ bɔ ni etɔ lɛ lɛ fɛɛ sɛɛ. Mɛni hewɔ efee nakai? Yesu kɛ́ ehe wo mɛi lɛ ashihilɛ mli. Ena akɛ eetɔ amɛ waa ni amɛbɛ hiɛnɔkamɔ, ni no hewɔ lɛ eshwe akɛ eye ebua amɛ. Ŋmɛnɛ lɛ, mɛi pii miipiŋ ni amɛbɛ hiɛnɔkamɔ. Kɛ́ ona amɛ ni amɛmiiya amɛmiiba lɛ, kaasusu akɛ nibii miiya lɛ jogbaŋŋ kɛmiihã amɛ. Amɛtamɔ gwantɛŋi ni egbɛ eshwa ni bɛ kwɛlɔ. Bɔfo Paulo wie yɛ mɛi ni tamɔ nakai lɛ ahe akɛ amɛbɛ hiɛnɔkamɔ ni amɛbɛ Nyɔŋmɔ. (Efe. 2:12) Amɛnyiɛ gbɛ ni kɛ mɔ “yaa hiɛkpatamɔ mli” lɛ nɔ. (Mat. 7:13) Ehe miihia waa ni amɛle Nyɔŋmɔ, ni kɛ́ wɔjwɛŋ enɛ he lɛ, wɔmusuŋ baatsɔ wɔ yɛ amɛhe, ni suɔmɔ baatsirɛ wɔ ni wɔye wɔbua amɛ. Gbɛ ni hi fe fɛɛ ni wɔbaanyɛ wɔtsɔ nɔ wɔye wɔbua amɛ ji, ni wɔkɛ amɛ baakase Biblia lɛ.

9. Yɛ nɔ ni awie yɛ Filipibii 2:13 lɛ naa lɛ, mɛɛ gbɛ nɔ Yehowa baanyɛ aye abua bo?

⁹ Ekolɛ oshashaoɔ shi akɛ okɛ mɛi baaje Biblia mli nikasemɔ shishi ejaakɛ ole akɛ eheɔ be, ni efeemɔ kãaa shi akɔɔɔ. Kɛ́ nakai onuɔ he lɛ, kɛɛmɔ Yehowa. Kɛɛmɔ lɛ ni eye ebua bo ni oná shwelɛ lɛ akɛ obaatao mɔ ko ni okɛ lɛ akase nii. (Kanemɔ Filipibii 2:13.) Bɔfo Yohane kɛɛ wɔ akɛ kɛ́ wɔbi Nyɔŋmɔ nɔ ko ni kɛ esuɔmɔnaa nii kpãa gbee lɛ, eboɔ wɔ toi. (1 Yoh. 5:14, 15) No hewɔ lɛ, hemɔ oye akɛ Yehowa baaye ebua bo ni oná shwelɛ lɛ akɛ obaatao mɛi ni okɛ amɛ akase Biblia lɛ.

10-11. Mɛni hewɔ ekolɛ ebaafee wɔ akɛ wɔnyɛŋ wɔkɛ mɔ ko akase Biblia lɛ?

¹⁰ Eyɛ mli akɛ wɔkɛ naagbai ni hãaa wɔnyɛ wɔtsu bɔ ni wɔshweɔ yɛ kaselɔfeemɔ nitsumɔ lɛ mli lɛ kpeɔ moŋ, shi wɔkɛ nitsumɔ nɛɛ shwɛɛɛ kwraa. Nyɛhãa wɔsusua naagbai nɛɛ ekomɛi ahe kɛ nɔ ni wɔbaanyɛ wɔfee kɛye amɛ nɔ.

¹¹ Ekolɛ wɔnyɛɛɛ wɔshiɛ bɔ ni wɔsumɔɔ yɛ shihilɛ mli ni wɔyɔɔ lɛ hewɔ. Akɛ nɔkwɛmɔnɔ lɛ, nyɛmimɛi lɛ ekomɛi edara yɛ afii amli loo amɛbɛ gbɔmɔtsoŋ hewalɛ kpakpa. Ani nakai eji yɛ ogbɛfaŋ? Kɛ́ nakai ni lɛ, susumɔ nɔ kome ni wɔkase yɛ COVID-19 be nɛɛ mli lɛ he okwɛ. Wɔbana akɛ wɔbaanyɛ wɔtsɔ tɛlifoŋ loo Intanɛt lɛ nɔ wɔkɛ mɛi afee Biblia mli nikasemɔi ni mɔɔ shi. No hewɔ lɛ, obaanyɛ ni ota oshĩa nɔŋŋ ni okɛ mɛi aje Biblia mli nikasemɔ shishi. Enɛ baanyɛ aye abua bo yɛ gbɛ kroko hu nɔ. Mɛi komɛi yɛ ni amɛmiisumɔ ni akɛ amɛ akase Biblia lɛ. Shi ekolɛ be ni amɛyɔɔ dekã lɛ, jeee nakai be nyɛmimɛi lɛ pii fɔɔ shiɛmɔ yaa. Ekolɛ be ni amɛnáa dekã ji leebi mra loo gbɛkɛnaashi kwraa. Ani obaanyɛ okɛ ohe ashã afɔle ni okɛ mɛi ni tamɔ nakai lɛ akase nii? Yesu tsɔɔ Nikodemo nii nyɔŋ, ejaakɛ no ji be ni hi hã Nikodemo.​—Yoh. 3:1, 2.

12. Mɛɛ nibii baanyɛ ahã wɔná ekãa kɛtsɔɔ mɛi nii jogbaŋŋ?

¹² Ekolɛ wɔnuɔ he akɛ wɔshɛko mɛi ni baanyɛ amɛkɛ mɛi akase Biblia lɛ. Mɛi komɛi  yɛ ni amɛnuɔ he akɛ amɛleee nibii pii tsɔ loo amɛleee nitsɔɔmɔ jogbaŋŋ, ni no hewɔ lɛ amɛnyɛŋ amɛkɛ mɔ ko akase Biblia lɛ. Kɛ́ nakai bo hu onuɔ he lɛ, naa nibii etɛ ni baanyɛ aye abua bo. Klɛŋklɛŋ kwraa lɛ, Yehowa naa bo akɛ mɔ ko ni baanyɛ atsɔɔ mɛi nii. (2 Kor. 3:5) Nɔ ni ji enyɔ lɛ, Yesu, mɔ ni ‘akɛ hegbɛ fɛɛ ehã yɛ ŋwɛi kɛ shikpɔŋ lɛ nɔ’ lɛ efã bo akɛ otsɔɔ mɛi nii. (Mat. 28:18) Ni nɔ ni ji etɛ lɛ, Yehowa kɛ onyɛmimɛi lɛ baanyɛ amɛye amɛbua bo. Yehowa ye ebua Yesu koni ena nɔ ni esa akɛ ewie, ni nakai nɔŋŋ ebaanyɛ eye ebua bo. (Yoh. 8:28; 12:49) Agbɛnɛ hu, obaanyɛ obi oshiɛmɔyaa kuu nɔkwɛlɔ lɛ loo gbɛgbalɔ ko loo shiɛlɔ ko ni he esa ni eye ebua bo koni oje Biblia mli nikasemɔ shishi. Nɔ kome ni baaye abua bo ni ole bɔ ni atsɔɔ mɛi nii jogbaŋŋ ji, ni obaafata nyɛmimɛi nɛɛ ateŋ mɔ ko he be ni ekɛ mɔ ko kaseɔ nii lɛ.

13. Mɛni hewɔ esa akɛ wɔná he miishɛɛ akɛ wɔkɛ gbɛ hee ni atsɔɔ nɔ akɛ mɛi kaseɔ nii lɛ baatsu nii?

¹³ Ekolɛ ewa kɛhã wɔ akɛ wɔbaakase nɔ ko hee loo wɔkɛ dɛŋdade hee ko baatsu nii. Bianɛ lɛ, bɔ ni wɔkɛ mɛi kaseɔ nii wɔhãa lɛ etsake. Wolo titri ni wɔkɛ mɛi kaseɔ ji, Oyi Aná Wala Kɛya Naanɔ! wolo lɛ. Bɔ ni wolo nɛɛ yɔɔ hewɔ lɛ, gbɛ ni wɔtsɔɔ nɔ wɔsaa wɔhe kɛhã nikasemɔ lɛ kɛ bɔ ni wɔkɛ mɛi kaseɔ nii lɛ wɔhãa lɛ etsake kwraa. Akaneee nibii pii yɛ mli, moŋ lɛ, akɛ nikaselɔ lɛ gbaa sane waa. Agbɛnɛ hu, kɛ́ wɔkɛ mɛi kase lɛ, wɔkɛ vidioi, nibii ni akɛwo jw.org wɛbsaiti lɛ nɔ kɛ JW Library^® lɛ baatsu nii waa. Kɛ́ oleee bɔ ni akɛ nibii nɛɛ tsuɔ nii jogbaŋŋ lɛ, bi mɔ ko ni le bɔ ni akɛtsuɔ nii jogbaŋŋ lɛ ni etsɔɔ bo. Adesai yɔɔ nɛɛ, kɛ́ wɔmɔ nɔ kome mli lɛ, bei pii lɛ ewa kɛhã wɔ akɛ wɔbaaŋmɛɛ he. Shi kɛ́ wɔhã Yehowa kɛ wɔnyɛmimɛi lɛ ye amɛbua wɔ lɛ, wɔbaanyɛ wɔkɛ wolo hee nɛɛ kɛ gbɛ hee ni atsɔɔ nɔ akɛ mɛi kaseɔ nii lɛ atsu nii, ni wɔbaaná miishɛɛ waa. Gbɛgbalɔ ko wie yɛ gbɛ hee ni wɔtsɔɔ nɔ wɔkɛ mɛi kaseɔ nii lɛ he akɛ: “Ehãa nikasemɔ lɛ ŋɔɔ waa kɛhã nikaselɔ lɛ kɛ tsɔɔlɔ lɛ fɛɛ.”

14. Kɛ́ mɛi booo sane lɛ toi yɛ wɔshikpɔŋkuku lɛ mli lɛ, mɛni esa akɛ wɔhã ehi wɔjwɛŋmɔ mli? Ni mɛɛ gbɛ nɔ 1 Korintobii 3:6, 7 lɛ baanyɛ awo wɔ hewalɛ?

¹⁴ Ekolɛ he ni wɔyɔɔ lɛ, ekpakpa ko dani wɔnyɛɔ wɔnáa mɔ ko wɔkɛjeɔ Biblia mli nikasemɔ shishi. Ekolɛ mɛi booo wɔsane lɛ toi loo amɛteɔ shi amɛwoɔ wɔ po. Mɛni baanyɛ aye abua wɔ ni wɔnijiaŋ akaje wui kɛ́ nɛkɛ wɔshikpɔŋkuku lɛ mli yɔɔ? Ekome ji akɛ, esa akɛ wɔhã ehi wɔjwɛŋmɔ mli akɛ yɛ jeŋ fɔŋ nɛɛ mli lɛ, mɛi ashihilɛ baanyɛ atsake trukaa, ni mɛi ni ekolɛ be ko ni eho lɛ amɛnuɔ he akɛ Nyɔŋmɔ he ehiaaa amɛ lɛ, baanyɛ abɔi esɛɛgbɛ taomɔ agbɛnɛ. (Mat. 5:3) Akɛ nɔkwɛmɔnɔ lɛ, mɛi komɛi ni be ko ni eho lɛ kɛ́ wɔhã amɛ wolo lɛ amɛheee kɔkɔɔkɔ lɛ, ekpɛlɛ ni akɛ amɛ miikase Biblia lɛ. Agbɛnɛ hu wɔle akɛ Yehowa ji nikpamɔ Nuŋtsɔ lɛ. (Mat. 9:38) Eesumɔ ni wɔya nɔ wɔdu ni wɔshwie nɔ nu. Shi lɛ ji mɔ ni hãa edaa. (1 Kor. 3:6, 7) Nɔ kroko ni baanyɛ awo wɔ hewalɛ waa ji, ni wɔbaahã ehi wɔjwɛŋmɔ mli akɛ kɛ́ wɔnáaa mɔ ko wɔkɛ lɛ akase Biblia lɛ amrɔ nɛɛ po lɛ, Yehowa baajɔɔ wɔ, ejaakɛ eena akɛ wɔmiimia wɔhiɛ waa ni wɔye wɔbua mɛi. b

15. Kɛ́ akɛ mɔ ko bɔi Biblia lɛ kasemɔ ni ekɛ nɔ ni ekaseɔ lɛ bɔi nitsumɔ yɛ eshihilɛ mli lɛ, te Yehowa nuɔ he ehãa tɛŋŋ?

¹⁵ Kɛ́ akɛ mɔ ko bɔi Biblia lɛ kasemɔ ni lɛ hu ebɔi mɛi nibii ni ekaseɔ lɛ gbaa lɛ, Yehowa náa miishɛɛ waa. (Abɛi 23:15, 16) Kɛ́ Yehowa na bɔ ni ewebii lɛ kɛ ekãa shiɛɔ ni amɛtsɔɔ mɛi nii  ŋmɛnɛ lɛ, ŋwanejee ko bɛ he akɛ emii shɛɔ ehe waa! Akɛ nɔkwɛmɔnɔ lɛ, yɛ COVID-19 hela lɛ ni ba yɛ jeŋ fɛɛ yɛ afi 2020 sɔɔmɔ afi lɛ mli lɛ fɛɛ sɛɛ lɛ, akɛ mɛi 7,705,765 kase Biblia lɛ, ni no ye ebua ni mɛi 241,994 jɔɔ amɛhe nɔ amɛhã Yehowa ni abaptisi amɛ. Mɛi ni abaptisi amɛ nɛɛ kɛ mɛi krokomɛi baakase nii ni amɛ hu amɛbaabatsɔmɔ kaselɔi. (Luka 6:40) Ekã shi faŋŋ akɛ, kɛ́ wɔtsɔɔ mɛi nii ni amɛbatsɔmɔ kaselɔi lɛ, Yehowa náa miishɛɛ waa.

16. Mɛɛ oti ni sa obaanyɛ okɛma ohiɛ?

¹⁶ Kaselɔfeemɔ nitsumɔ lɛ wa. Shi Yehowa yelikɛbuamɔ naa lɛ, wɔ fɛɛ wɔbaanyɛ wɔfee nɔ ni wɔbaanyɛ kɛtsɔɔ mɛi nii koni amɛbasumɔ Yehowa, wɔ-Tsɛ ni yɔɔ ŋwɛi lɛ. Ani obaanyɛ okɛfee oti ni ma ohiɛ akɛ, kɛhooo kwraa lɛ, obaaná mɔ kome ni okɛ lɛ abɔi Biblia lɛ kasemɔ? Kɛ́ obi mɛi fɛɛ ni okɛgbaa sane lɛ kɛji amɛbaasumɔ ni okɛ amɛ akase Biblia lɛ, ebaafee bo naakpɛɛ akɛ obaaná mɔ ko kɛ̃ ni okɛ lɛ akase nii. Ni obaanyɛ oná nɔmimaa akɛ Yehowa baahã omɔdɛŋbɔɔ lɛ awo yibii.

17. Kɛ́ wɔnyɛ wɔkɛ mɔ ko bɔi Biblia lɛ kasemɔ lɛ, te wɔbaanu he wɔhã tɛŋŋ?

¹⁷ Eji hegbɛ kpele ni wɔná akɛ wɔbaashiɛ wɔhã mɛi, ni wɔtsɔɔ amɛ nii kɛjɛ Biblia lɛ mli! Nitsumɔi enyɔ nɛɛ hãa wɔnáa miishɛɛ waa diɛŋtsɛ! Bɔfo Paulo ye ebua mɛi babaoo yɛ Tesalonika ni amɛbatsɔmɔ kaselɔi. Naa bɔ ni enu he ehã. Ewie akɛ: “Mɛni ji wɔhiɛnɔkamɔ, loo wɔmiishɛɛ, loo wɔmlifilimɔ akekere yɛ wɔ-Nuŋtsɔ Yesu hiɛ, yɛ be ni eba lɛ mli? Ani yɛ anɔkwale mli lɛ, jeee nyɛ ni? Ekã shi faŋŋ akɛ, nyɛji wɔnunyam kɛ wɔmiishɛɛ.” (1 Tes. 2:19, 20; Bɔf. 17:1-4) Bɔ ni Paulo nu he ehã lɛ, nakai mɛi babaoo nuɔ he ŋmɛnɛ. Nyɛmi yoo ko ni atsɛɔ lɛ Stéphanie lɛ kɛ ewu eye amɛbua mɛi pii ni abaptisi amɛ. Ewie akɛ: “Nɔ ko bɛ ni hãa mináa miishɛɛ fe ni maye mabua mɛi ni amɛjɔɔ amɛhe nɔ amɛhã Yehowa.”