“Be ni minyɛkwɛ̃ bi lɛ kɛ mi bɔi bémɔ lɛ, mimɔ esɛ̃ ni mibɔi kamɔ. Kulɛ miitao magbe lɛ.”​—Paul.

“Yɛ shĩa lɛ, nɔ ko fioo nɔŋŋ kɛkɛ lɛ mitsui eba. Ni kɛ́ mitsui ba nakai lɛ, mikɛ nɔ fɛɛ nɔ ni minine baashɛ nɔ lɛ tswaa shi, kɛ́ sɛ̃i jio, okpɔlɔ jio, nibii ni gbekɛbii lɛ kɛshwɛɔ jio.”​—Marco.

Ekolɛ wɔfeŋ nibii ni mɛi enyɔ ni wɔtsĩ amɛtã nɛɛ fee lɛ. Kɛ̃lɛ, bei komɛi lɛ, ewa kɛhã wɔ akɛ wɔbaaye wɔhe nɔ, titri lɛ, yɛ emuu ni wɔyeee lɛ hewɔ. (Rom. 5:12) Wɔteŋ mɛi komɛi yɛ ni ewa kɛhã wɔ akɛ wɔbaaye wɔmlifu nɔ, tamɔ eji yɛ Paul kɛ Marco gbɛfaŋ lɛ. Wɔteŋ mɛi komɛi hu yɛ ni nibii ni woɔ wɔhe gbeyei kɛ nibii ni jeɔ wɔnijiaŋ wui lɛ, nomɛi sɔŋŋ ahe wɔsusuɔ, ni ewa kɛhã wɔ akɛ wɔbaajwɛŋ nibii kpakpai ahe. Dani mɛi komɛi hu yɛ ni amɛhe nɔ ni amɛnyɛɛɛ amɛye lɛ hewɔ lɛ, amɛbɔɔ ajwamaŋ, amɛnuɔ dãa fe nine, loo amɛkɛ tsofãi tsuɔ nii yɛ gbɛ ni esaaa nɔ.

Kɛ́ wɔnyɛɛɛ wɔye wɔhe nɔ yɛ nibii ni wɔsusuɔ he, nibii ni wɔshweɔ, kɛ nibii ni wɔfeɔ lɛ amli lɛ, wɔbaanyɛ wɔye wɔ diɛŋtsɛ wɔhe awui. Kɛ́ wɔsumɔɔɔ ni ebaa lɛ nakai lɛ, mɛni esa akɛ wɔfee? Esa akɛ wɔmia wɔhiɛ wɔye wɔhe nɔ. Nyɛhãa wɔsusua sanebimɔi etɛ ni baaye abua wɔ ni wɔfee nakai lɛ ahe. Nomɛi ji: (1) Mɛni ji henɔyeli? (2) Mɛni hewɔ ehe miihia ni wɔjie su nɛɛ kpo? (3) Ni mɛni baaye abua wɔ ni wɔnyɛ wɔjie su nɛɛ ni fata sui kpakpai ni mumɔ lɛ hãa wɔjieɔ lɛ kpo lɛ ahe lɛ kpo? (Gal. 5:22, 23) No sɛɛ lɛ, wɔbaakwɛ nɔ ni wɔbaanyɛ wɔfee kɛ́ wɔyanyɛɛɛ wɔye wɔhe nɔ yɛ shihilɛ ko mli.

Kɛ́ akɛɛ mɔ ko yeɔ ehe nɔ lɛ, etsɔɔ akɛ, jeee nɔ fɛɛ nɔ ni baa ejwɛŋmɔ mli akɛ efee lɛ efeɔ. Kɛ́ mɔ ko ni tamɔ nakai lɛ nu he akɛ ewie loo efee nɔ ko ni esaaa Nyɔŋmɔ hiɛ lɛ, efeee.

Yesu fee henɔyeli he nɔkwɛmɔnɔ ni nɔ bɛ ehã wɔ. Biblia lɛ kɛɔ akɛ: “Be ni ajɛɔ lɛ lɛ, ejɛɛɛ mɔ ko etooo najiaŋ. Be ni enaa nɔ lɛ, ewieee akɛ ebaafee mɔ ko nɔ ko, shi moŋ etu ehe ewo mɔ ni kojoɔ yɛ jalɛ naa lɛ dɛŋ.” (1 Pet. 2:23) Be ni etsotsoro piŋmɔ tso lɛ nɔ, ni ehenyɛlɔi lɛ yeɔ ehe fɛo lɛ, eye ehe nɔ waa. (Mat. 27:39-44) Be ni jamɔŋ hiɛnyiɛlɔi lɛ ka akɛ amɛbaatsɔ nɔ ni ebaawie lɛ nɔ amɛdũ lɛ lɛ, no hu eye ehe nɔ waa diɛŋtsɛ. (Mat. 22:15-22) Ani okaiɔ nɔ ni efee be ni Yudafoi komɛi amli fu lɛ ni amɛkɔlɔ tɛi akɛ amɛkɛbaatswia lɛ lɛ? ‘Etee ehe ni eje sɔlemɔ shĩa lɛ etee,’ ni efeee amɛ nɔ ko.​—Yoh. 8:57-59.

Ani wɔbaanyɛ wɔkase Yesu? Hɛɛ, wɔbaanyɛ. Bɔfo Petro wie akɛ: “Kristo po na nɔ yɛ nyɛhewɔ, ni efee nɔkwɛmɔnɔ efɔ̃ shi ehã nyɛ koni nyɛnyiɛ enanemaahei lɛ asɛɛ kpaakpa.” (1 Pet. 2:21) Wɔnyɛŋ wɔkase Yesu pɛpɛɛpɛ kɛmɔ shi ni wɔtɔ̃ɔɔ shi kome po. Kɛ̃lɛ, yɛ emuu ni wɔyeee lɛ fɛɛ sɛɛ lɛ, wɔbaanyɛ wɔnyiɛ enanemaahei lɛ asɛɛ kpaakpa, ni wɔ hu wɔye wɔhe nɔ. Mɛni hewɔ ehe miihia ni wɔfee nakai?

Kɛ́ wɔmiitao Yehowa aná wɔhe miishɛɛ lɛ, belɛ esa akɛ wɔye wɔhe nɔ. Kɛ́ wɔyeee wɔhe  nɔ, ni wɔyawie loo wɔyafee nɔ ko ni esaaa Yehowa hiɛ lɛ, ebaanyɛ efite naanyobɔɔ ni yɔɔ wɔ kɛ lɛ teŋ lɛ, ekɔɔɔ he eko afii abɔ ni wɔkɛsɔmɔ lɛ.

Susumɔ Mose sane lɛ he okwɛ. Biblia lɛ wie yɛ ehe akɛ, yɛ ebeiaŋ lɛ, lɛ ji nuu ni ‘he jɔ fe gbɔmɛi fɛɛ ni yɔɔ shikpɔŋ lɛ nɔ.’ (4 Mo. 12:3) Israelbii lɛ tɔke amɛwo lɛ shii abɔ, shi eto etsui shi ni eye ehe nɔ afii pii. Shi be ko be ni amɛtɔke amɛwo lɛ shi kome ekoŋŋ akɛ amɛbɛ nu lɛ, eyanyɛɛɛ ehe nɔ eye. Etsui ba waa, ni ekɛ amɛ wie bɔ ni esaaa. Ekɛɛ amɛ akɛ: “Agbɛnɛ, nyɛboa toi, nyɛ atuatselɔi! Ani nyɛmiitao wɔjie nu yɛ tɛsaa nɛɛ mli wɔhã nyɛ?”​—4 Mo. 20:2-11.

Kulɛ, esa akɛ Mose ahã Israelbii lɛ ale akɛ, Yehowa ji mɔ ni tsɔ naakpɛɛ gbɛ nɔ ehã amɛ nu lɛ. Shi akɛni eyayeee ehe nɔ hewɔ lɛ, efeee nakai. (Lala 106:32, 33) Enɛ hewɔ lɛ, Yehowa hãaa eya Shiwoo Shikpɔŋ lɛ nɔ. (4 Mo. 20:12) Ŋwanejee ko bɛ he akɛ, kɛyashi egbele mli tɔ̃ɔ lɛ, Mose shwa ehe waa akɛ eyanyɛɛɛ eye emlifu nɔ nakai gbi lɛ.​—5 Mo. 3:23-27.

Mɛni wɔkaseɔ yɛ sane nɛɛ mli? Kɛ́ wɔkɛ afii pii ehi asafo lɛ mli po lɛ, esa akɛ wɔkwɛ jogbaŋŋ ni wɔkɛ mɛi akawie basabasa kɛ́ amɛwo wɔ mli la loo amɛfee nɔ ko ni ehe bahia ni wɔjaje amɛ. (Efe. 4:32; Kol. 3:12) Be ni wɔ afii lɛ yaa hiɛ lɛ, bei komɛi lɛ, ebawaa kɛhãa wɔ akɛ wɔbaato wɔtsui shi. Shi esa akɛ wɔkai Mose. Wɔsumɔŋ ni wɔyafee loo wɔyawie nɔ ko ni baafite gbɛ́i kpakpa ni wɔfee wɔhã wɔhe afii pii nɛɛ fɛɛ lɛ yɛ wɔhe nɔ fioo ni wɔyanyɛɛɛ wɔye lɛ hewɔ. Mɛni baaye abua wɔ ni wɔnyɛ wɔjie su ni he hiaa waa nɛɛ kpo?

Sɔlemɔ obi Yehowa mumɔ krɔŋkrɔŋ lɛ. Mɛni hewɔ? Ejaakɛ henɔyeli fata sui ni feɔ Nyɔŋmɔ mumɔ lɛ yibii lɛ ahe, ni Yehowa kɛ emumɔ lɛ hãa mɛi fɛɛ ni biɔ lɛ lɛ. (Luka 11:13) Yehowa baanyɛ atsɔ emumɔ lɛ nɔ ewaje wɔ koni wɔnyɛ wɔye wɔhe nɔ. (Fip. 4:13) Agbɛnɛ hu, ebaanyɛ eye ebua wɔ ni wɔjie sui krokomɛi ni fata sui ni feɔ mumɔ lɛ yibii lɛ ahe lɛ kpo, koni no aye abua wɔ ni wɔnyɛ wɔye wɔhe nɔ waa. Sui nɛɛ ekome ji suɔmɔ.​—1 Kor. 13:5.

Kaafee nɔ ko ni baahã ewa kɛhã bo akɛ obaaye ohe nɔ. Akɛ nɔkwɛmɔnɔ lɛ, esaaa akɛ oyaa wɛbsaitii ni jieɔ jeŋba sha yi, loo okɛ nibii ni woɔ jeŋba sha he hewalɛ lɛ jieɔ ohiɛtserɛ. (Efe. 5:3, 4) Anɔkwa, esa akɛ otsi ohe kɛje nɔ fɛɛ nɔ ni  baanyɛ ahã oyafee efɔŋ lɛ he. (Abɛi 22:3; 1 Kor. 6:12) Akɛ nɔkwɛmɔnɔ lɛ, kɛ́ ewa kɛhã bo akɛ obaaye obɔlɛnamɔ akɔnɔi anɔ lɛ, belɛ ekolɛ ehe baahia ni otswa ofai shi akɛ okaneŋ woji ni kɔɔ nuu kɛ yoo teŋ suɔmɔ he, ni okwɛŋ sinii ni tamɔ nakai hu.

Ekolɛ ebaawa kɛhã wɔ akɛ wɔkɛ ŋaawoo nɛɛ baatsu nii. Shi kɛ́ wɔmia wɔhiɛ lɛ, Yehowa baaye abua wɔ ni wɔnyɛ wɔye wɔhe nɔ. (2 Pet. 1:5-8) Ebaaye ebua wɔ ni wɔsusu nibii kpakpai ahe, ni agbɛnɛ hu, wɔkwɛ wɔwiemɔ kɛ wɔnifeemɔ jogbaŋŋ. Bɔ ni nibii tee lɛ ehã yɛ Paul kɛ Marco, ni wɔtsĩ amɛtã kɛtsɔ hiɛ lɛ agbɛfaŋ lɛ yeɔ enɛ he odase. Amɛ fɛɛ amɛnyɛ amɛye amɛmli ni fuɔ mramra lɛ nɔ. Nyɛmi nuu ko hu ni no mli lɛ, emli fuɔ tsɔnekudɔlɔi krokomɛi waa ni ekɛ amɛ béɔ yɛ gbɛ lɛ nɔ lɛ nyɛ etsake. Te efee lɛ tɛŋŋ? Ewie akɛ: “Misɔle waa daa gbi. Mikase saji ni kɔɔ henɔyeli he, ni mikpe ŋmalɛi komɛi ni baanyɛ aye abua mi lɛ miwo miyitsoŋ. Afii pii nɛ ni mibɔi minaagba nɛɛ he nitsumɔ, ni kɛ̃lɛ, daa gbi lɛ, mikaiɔ mihe akɛ, esa akɛ mamia mihiɛ waa ni mikɛ mɔ ko akabé yɛ gbɛ lɛ nɔ. Enɛ eye ebua mi waa. Agbɛnɛ hu, kɛ́ miiya he ko lɛ, mishiɔ shĩa mra bɔ ni afee ni mikakpe sɛɛ ni minu he akɛ mɛi miiwo minajiaŋ.”

Bei komɛi lɛ, shihilɛi komɛi baa ni wɔyanyɛɛɛ wɔhe nɔ wɔye. Kɛ́ eba lɛ nakai lɛ, ekolɛ ebaafee wɔ hiɛgbele po akɛ wɔbaasɔle wɔhã Yehowa. Shi nakai beiaŋ moŋ ehe miihia waa ni wɔsɔle. No hewɔ lɛ, sɔlemɔ ohã Yehowa amrɔ nɔŋŋ. Kpa lɛ fai ni ekɛ ohe esha lɛ ake bo ni eye ebua bo, ni otswa ofai shi akɛ ofeŋ nakai dɔŋŋ. (Lala 51:9-11) Kɛ́ ojɛ otsuiŋ osɔle ni Yehowa ana bo mɔbɔ lɛ, ebaabo bo toi. (Lala 102:17) Bɔfo Yohane wie akɛ, Nyɔŋmɔ Bi lɛ lá lɛ “hãa wɔhe tseɔ kɛjeɔ esha fɛɛ esha mli.” (1 Yoh. 1:7; 2:1; Lala 86:5) Yehowa kɛɛ wɔkɛ mɛi ahe ake amɛ kɛ́ amɛtɔ̃ wɔnɔ shii abɔ po. Ani efeŋ nakai ehãŋ wɔ kɛ́ wɔ hu wɔtɔ̃ enɔ? Ebaafee aahu!​—Mat. 18:21, 22; Kol. 3:13.

Be ni Mose eyanyɛɛɛ ehe nɔ eye yɛ ŋa lɛ nɔ lɛ, Yehowa mli fu lɛ. Shi ekɛ etɔmɔ lɛ ke lɛ. Enɛ hewɔ lɛ, Nyɔŋmɔ Wiemɔ lɛ wieɔ Mose he akɛ mɔ ko ni hemɔkɛyeli mli wa ni esa akɛ wɔkase lɛ. (5 Mo. 34:10; Heb. 11:24-28) Yehowa hãaa Mose aya Shiwoo Shikpɔŋ lɛ nɔ, shi ebaahere lɛ atuu kɛba Paradeiso lɛ mli, ni kɛ́ eye anɔkwa lɛ, ebaahi shi kɛya naanɔ. Wɔ hu wɔbaaná nakai hegbɛ lɛ kɛji wɔmia wɔhiɛ waa wɔjie su ni he hiaa waa nɛɛ, ni ji henɔyeli lɛ kpo.​—1 Kor. 9:25.