1. Mɛni Jajelɔ 3:1, 7 lɛ hãa wɔleɔ?

WƆTEŊ mɛi komɛi sumɔɔ wiemɔ waa. Shi mɛi komɛi hu sumɔɔɔ wiemɔ kwraa. Tamɔ bɔ ni awie yɛ ŋmalɛ ni nikasemɔ nɛɛ damɔ nɔ lɛ mli lɛ, be yɛ ni awieɔ, ni be hu yɛ ni afeɔ diŋŋ. (Kanemɔ Jajelɔ 3:1, 7.) Kɛ̃lɛ bei komɛi lɛ, wɔnuɔ he akɛ wɔnyɛmimɛi lɛ ekomɛi yɛ diŋŋ tsɔ, ni amɛteŋ mɛi komɛi hu sumɔɔ wiemɔ tsɔ.

2. Namɔ yɔɔ hegbɛ ni etsɔɔ wɔ be ni esa wɔwie kɛ bɔ ni esa akɛ wɔwie wɔhã?

² Wiemɔ ji nikeenii ni jɛ Yehowa ŋɔɔ, ni yɛ e-Wiemɔ lɛ mli lɛ, etsɔɔ wɔ bɔ ni esa akɛ wɔkɛ nikeenii nɛɛ atsu nii ahã. (2 Mo. 4:10, 11; Kpo. 4:11) Yɛ nikasemɔ nɛɛ mli lɛ, wɔbaasusu saji komɛi ni yɔɔ Biblia lɛ mli ni yeɔ ebuaa wɔ ni wɔle be ni esa akɛ wɔwie kɛ be ni esa akɛ wɔfee diŋŋ lɛ ahe. Agbɛnɛ hu, wɔbaana bɔ ni Yehowa nuɔ he ehãa yɛ bɔ ni wɔkɛ mɛi wieɔ wɔhãa lɛ he. Nyɛhãa wɔsusua be ni esa akɛ wɔwie lɛ he klɛŋklɛŋ.

3. Yɛ nɔ ni awie yɛ Romabii 10:14 lɛ naa lɛ, mɛɛ be esa akɛ wɔgba mɛi Yehowa he sane?

³ Esa akɛ wɔfee klalo be fɛɛ be akɛ wɔbaagba mɛi Yehowa kɛ Maŋtsɛyeli lɛ he sane. (Mat. 24:14; kanemɔ Romabii 10:14.) Kɛ́ wɔfee nakai lɛ, wɔmiikase Yesu, ejaakɛ yiŋtoi ahewɔ ni eba shikpɔŋ lɛ nɔ lɛ ateŋ ekome ni he hiaa waa ji, koni ebatsɔɔ mɛi e-Tsɛ lɛ he anɔkwa saji. (Yoh. 18:37) Shi esaaa akɛ wɔhiɛ kpaa nɔ akɛ, bɔ ni wɔwieɔ wɔhãa lɛ hu he miihia. No hewɔ lɛ, kɛ́ wɔkɛ mɛi miigba Yehowa he sane lɛ, esa akɛ ‘wɔkɛ mlijɔlɛ kɛ bulɛ ni mli kwɔ’ afee nakai, ni agbɛnɛ hu, wɔsusu nibii ni amɛheɔ amɛyeɔ kɛ bɔ ni amɛnuɔ he amɛhãa yɛ saji ahe lɛ he. (1 Pet. 3:15) Kɛ́ wɔfee nakai lɛ, amɛbaakase nɔ ko yɛ nɔ ni wɔbaakɛɛ amɛ lɛ mli, ni ekolɛ no baata amɛtsuiŋ ni amɛkase Yehowa he nii.

4. Tamɔ bɔ ni awie yɛ Abɛi 9:9 lɛ, kɛ́ wɔna akɛ ŋaawoo he miihia mɔ ko lɛ, mɛni esa akɛ wɔfee?

 ⁴ Kɛ́ asafoŋ onukpai lɛ na akɛ nyɛmi ko miikɔ gbɛ ko ni ejaaa lɛ, esaaa akɛ amɛmuaa amɛnaa; esa akɛ amɛwo lɛ ŋaa. Shi esa akɛ amɛfee nakai yɛ be ni sa mli, koni amɛkawo mɔ lɛ hiɛgbele. Kɛ́ amɛkɛ mɔ lɛ kome too wie be ni mɛi krokomɛi bɛ jɛmɛ lɛ, ebaahi jogbaŋŋ. Be fɛɛ be lɛ, asafoŋ onukpai kwɛɔ jogbaŋŋ koni amɛkɛ mɛi akawie bɔ ni baahã mɛi lɛ anu he akɛ amɛhe bɛ sɛɛnamɔ. Kɛ̃lɛ, amɛshashaooo shi kwraa akɛ amɛbaatsɔɔ mɛi Biblia mli shishitoo mlai ni baanyɛ aye abua amɛ ni amɛfee nɔ ni ja. (Kanemɔ Abɛi 9:9.) Kɛ́ wɔna akɛ mɔ ko miikɔ gbɛ ko ni ejaaa lɛ, mɛni hewɔ ehe miihia waa ni wɔfee ekãa ni wɔkɛ lɛ awie? Nyɛhãa wɔsusua nɔkwɛmɔnii enyɔ komɛi ahe wɔkwɛa. Ekome ji nɔkwɛmɔnɔ kpakpa, ni ekroko lɛ ji nɔkwɛmɔnɔ gbonyo. Yɛ ekome mli lɛ, ehe bahia ni nuu ko ajaje ebihii, ni yɛ ekroko lɛ mli lɛ, ehe bahia ni yoo ko awo mɔ ko ni baatsɔ maŋtsɛ wɔsɛɛ lɛ ŋaa.

5. Mɛni kulɛ esa akɛ Osɔfonukpa Eli afee shi efeee?

⁵ No mli lɛ, Osɔfonukpa Eli yɛ bihii enyɔ ni esumɔɔ amɛsane waa. Shi ebihii nɛɛ ebuuu Yehowa kwraa. Amɛsɔmɔ akɛ osɔfoi yɛ kpeebuu lɛ mli, ni enɛ jeee hegbɛ bibioo. Shi amɛkɛ hegbɛ nɛɛ tsu nii yɛ gbɛ gbonyo nɔ, amɛbuuu Yehowa afɔle lɛ, ni amɛbɔ ajwamaŋ kpetekpelee. (1 Sam. 2:12-17, 22) Yɛ Mose Mla lɛ naa lɛ, kulɛ esa akɛ agbe amɛ. Shi Eli kɛ amɛ wie kɛkɛ, ni no po diɛŋtsɛ lɛ, efeee lɛ kɛ hiɛdɔɔ. Eŋmɛɛ ebii lɛ ahe ni amɛtee nɔ amɛsɔmɔ yɛ kpeebuu lɛ mli. (5 Mo. 21:18-21) Ani Yehowa ná bɔ ni Eli tsu saji ahe nii ehã lɛ he miishɛɛ? Dabi. Ekɛɛ Eli akɛ: “Mɛni hewɔ oyaa nɔ owoɔ obii lɛ ahiɛ nyam fe mi?” Yehowa kpɛ mli akɛ ebaagbe hii yakagbɔmɛi enyɔ nɛɛ.​—1 Sam. 2:29, 34.

6. Mɛni wɔkaseɔ yɛ Eli sane lɛ mli?

⁶ Nɔ ko ni he hiaa waa yɛ ni wɔbaanyɛ wɔkase yɛ Eli sane lɛ mli. Kɛ́ wɔná wɔle akɛ wɔnaanyo ko loo wɔwekunyo ko eku Nyɔŋmɔ mla ko mli lɛ, esaaa akɛ wɔmuaa wɔnaa. Esa akɛ wɔkai lɛ nɔ ni Yehowa kpaa gbɛ akɛ efee yɛ nɔ ni eba lɛ he, ni agbɛnɛ hu, wɔkwɛ ni mɛi ni Yehowa etu lɛ ewo amɛdɛŋ lɛ aye abua lɛ. (Yak. 5:14) Ekaba kɔkɔɔkɔ akɛ wɔbaawo wɔnaanyo lɛ loo wɔwekunyo lɛ hiɛ nyam fe Yehowa, tamɔ bɔ ni Eli fee lɛ. Ebiɔ ekãa dani wɔbaanyɛ wɔjaje mɔ ko ni ekɔ gbɛ ni ejaaa, shi kɛ́ wɔmia wɔhiɛ wɔfee nakai lɛ, ebaanyɛ ewo yibii kpakpai. Israel yoo ko ni atsɛɔ lɛ Abigail lɛ kɛ shihilɛ ko ni tamɔ Eli nɔ lɛ kpe, shi efeee enii tamɔ lɛ. Hã wɔsusu esane lɛ he wɔkwɛ.

7. Mɛni ba ni ehe bahia ni Abigail kɛ David ayawie lɛ?

⁷ Abigail ji nuu niiatsɛ ko ni atsɛɔ lɛ Nabal  lɛ ŋa. Be ni Maŋtsɛ Saul miitao egbe David, ni David kɛ ewebii lɛ joɔ foi lɛ, amɛyaje he ni Nabal tookwɛlɔi lɛ yɔɔ lɛ. David kɛ ewebii lɛ bu Nabal toi lɛ ahe koni julɔi akabaju. Ani Nabal hiɛ sɔ nɔ ni amɛfee amɛhã lɛ lɛ? Dabi. Be ni David tsu ehii lɛ ateŋ mɛi komɛi kɛtee Nabal ŋɔɔ koni amɛyabi lɛ ni ehã amɛ niyenii fioo kɛ nu lɛ, Nabal mli fu ni eto jɛmɔ eshwie amɛnɔ. (1 Sam. 25:5-8, 10-12, 14) Enɛ hã David tsui ba, ni ekpɛ eyiŋ akɛ ebaagbe hii fɛɛ ni yɔɔ Nabal shĩa lɛ. (1 Sam. 25:13, 22) Abigail na akɛ, kɛ́ emua enaa ni ewieee nɔ ko lɛ, sane baanina Nabal shĩa lɛ. No hewɔ lɛ, efee ekãa ni etee koni ekɛ David ayawie. No mli lɛ, David kɛ ehii 400 lɛ eŋmɔlɔ amɛklante ni amɛkɛ amɛhɔmɔ kɛ amɛmlifu lɛ yaato Nabal shĩa lɛ nɔ.

8. Mɛni wɔkaseɔ yɛ Abigail sane lɛ mli?

⁸ Be ni Abigail kɛ David kpe lɛ, efee ekãa ni ekɛ lɛ wie, shi efee nakai kɛ bulɛ, ni ewie nibii ni baahã David yiŋ atsɔ. Eyɛ mli akɛ, naagba lɛ jɛɛɛ lɛ moŋ, shi ekpa David fai. Ekɛɛ David akɛ, ele akɛ gbɔmɔ kpakpa ji lɛ, ni ebaafee nɔ ni ja. Abigail kɛ ehiɛ fɔ̃ Yehowa nɔ akɛ ebaaye ebua lɛ. (1 Sam. 25:24, 26, 28, 33, 34) Mɛni wɔkaseɔ yɛ Abigail sane lɛ mli? Kɛ́ wɔna ni mɔ ko miikɔ gbɛ ni ejaaa lɛ, esa akɛ wɔ hu wɔfee ekãa ni wɔkɛ lɛ awie. (Lala 141:5) Esa akɛ wɔjɛ bulɛ mli wɔfee nakai, ni kɛ̃lɛ, esaaa akɛ wɔsheɔ mɔ lɛ gbeyei. Kɛ́ wɔwo mɔ ko ŋaa yɛ suɔmɔ ni wɔyɔɔ kɛhã lɛ lɛ hewɔ lɛ, no tsɔɔ akɛ nanemɛi kpakpai ji wɔ.​—Abɛi 27:17.

9-10. Kɛ́ asafoŋ onukpai miiwo mɛi ŋaa lɛ, mɛni esa akɛ amɛhã ehi amɛjwɛŋmɔ mli?

⁹ Kɛ́ nyɛmi ko kɔ gbɛ ko ni ejaaa lɛ, mɛi titri ni esa akɛ amɛfee ekãa ni amɛkɛ lɛ awie ji, asafoŋ onukpai lɛ. (Gal. 6:1) Onukpai lɛ baa amɛhe shi, ni amɛhãa ehiɔ amɛjwɛŋmɔ mli akɛ, amɛ hu amɛyeee emuu, ni no hewɔ lɛ, ekolɛ wɔsɛɛ ko lɛ, ehe baahia ni awo amɛ hu ŋaa. Ni kɛ̃lɛ, kɛ́ ehe bahia ni amɛjaje mɔ ko loo amɛtsɔse lɛ lɛ, amɛshashaooo shi kwraa akɛ amɛbaafee  nakai. (2 Tim. 4:2; Tito 1:9) Akɛni amɛsumɔɔ amɛnyɛmimɛi lɛ hewɔ lɛ, kɛ́ ehe bahia ni amɛwo amɛteŋ mɔ ko ŋaa lɛ, amɛkɛ hiɛshikamɔ kɛ tsuishitoo feɔ nakai koni mɔ lɛ akase nɔ ko yɛ mli. (Abɛi 13:24) Shi nɔ titri ni he hiaa amɛ ji, ni amɛbaawo Yehowa hiɛ nyam. Enɛ hewɔ lɛ, amɛkwɛɔ koni nyɛmimɛi lɛ kɛ Yehowa gbɛtsɔɔmɔi atsu nii, ni amɛbuɔ asafo lɛ he.​—Bɔf. 20:28.

¹⁰ Saji ni wɔsusu he kɛbashi kuku nɛɛ nɔ lɛ eye ebua wɔ ni wɔna be ni esa akɛ wɔwie. Shi bei komɛi hu yɛ ni esa akɛ wɔfee diŋŋ. Mɛni baanyɛ ahã nakai feemɔ awa kɛhã wɔ?

11. Mɛɛ nɔkwɛmɔnɔ Yakobo kɛtsu nii? Ni mɛni hewɔ eji nɔkwɛmɔnɔ kpakpa?

¹¹ Jeee be fɛɛ be eyɔɔ mlɛo akɛ wɔbaakudɔ wɔlilɛi. Yakobo kɛ nɔkwɛmɔnɔ ko ni sa jogbaŋŋ tsu nii kɛgbala sane nɛɛ mli. Ewie akɛ: “Kɛ́ mɔ ko tɔ̃ɔɔ yɛ wiemɔ mli lɛ, no lɛ gbɔmɔ ni eye emuu ji lɛ, ni enyɛɔ ewoɔ egbɔmɔtso muu lɛ fɛɛ manyoflɛ.” (Yak. 3:2, 3, shn.) Manyoflɛ ji nɔ ko ni akɛwoɔ okpɔŋɔ yitso kɛ edaaŋ, koni okpɔŋɔnɔtalɔ lɛ anyɛ akudɔ lɛ, loo ehã edamɔ shi. Kɛ́ okpɔŋɔnɔtalɔ lɛ kɛ manyoflɛ lɛ tsuuu nii jogbaŋŋ lɛ, okpɔŋɔ lɛ baanyɛ atse kpãa ni eye lɛ diɛŋtsɛ ehe kɛ enɔtalɔ lɛ awui. Nakai nɔŋŋ eji yɛ wɔlilɛi gbɛfaŋ. Kɛ́ wɔyaleee wɔlilɛi kudɔmɔ lɛ, ebaanyɛ eye awui waa. Nyɛhãa wɔkwɛa shihilɛi komɛi amli ni ehe baahia ni wɔmɔ wɔnaabu mli.

12. Mɛɛ be esa akɛ wɔmɔ wɔnaabu mli?

¹² Saji ni wɔnyɛmimɛi lɛ le lɛ ekomɛi yɛ ni amɛ pɛ amɛyitsoŋ esa akɛ ehi, ni esaaa akɛ amɛhãa mɛi krokomɛi leɔ. Akɛ nɔkwɛmɔnɔ lɛ, esaaa akɛ nyɛmimɛi ni sɔmɔɔ yɛ maji ni atsĩ wɔnitsumɔ lɛ naa yɛ jɛmɛ lɛ gbaa mɛi krokomɛi bɔ ni ato nitsumɔ lɛ he gbɛjianɔ ahã yɛ jɛmɛ. No hewɔ lɛ, kɛ́ okɛ nyɛmi ko ni jɛ maji nɛɛ eko nɔ lɛ kpe lɛ, te esa akɛ ofee onii ohã tɛŋŋ?  Ani esa akɛ obi lɛ bɔ ni ato nitsumɔ lɛ he gbɛjianɔ ahã yɛ jɛmɛ, ekolɛ kɛ jwɛŋmɔ lɛ akɛ, ootao ole koni otsĩ tã yɛ osɔlemɔ mli? Dabi, esa akɛ omɔ onaabu mli. Ŋwanejee ko bɛ he akɛ, osumɔɔ onyɛmimɛi lɛ, ni jeee yiŋtoo fɔŋ ko hewɔ otaoɔ ole bɔ ni nibii yaa nɔ yɛ jɛmɛ lɛ. Shi kɛ́ ohiɛ nyɛmi ko ni le sane ko ni tamɔ nɛkɛ lɛ doo akɛ, etĩ he fioo etsɔɔ bo lɛ, belɛ osumɔɔɔ lɛ kɛ nyɛmimɛi krokomɛi ni hiɛ kã enɔ akɛ, ebaahã sane lɛ ahi teemɔŋ lɛ asane. Nyɛmimɛi ni yɔɔ hei ni atsĩ nitsumɔ lɛ naa yɛ lɛ náaa nibii mlɛo momo, ni wɔsumɔŋ ni wɔfee nɔ ko ni baahã amɛnaagbai lɛ afa. Kɛ́ wɔmiisɔmɔ yɛ maŋ ko ni atsĩ wɔnitsumɔ lɛ naa yɛ jɛmɛ lɛ nɔ lɛ, esa akɛ wɔkwɛ jogbaŋŋ ni wɔkagba mɛi krokomɛi bɔ ni Odasefoi ni yɔɔ jɛmɛ lɛ tsuɔ shiɛmɔ nitsumɔ lɛ kɛ Yehowa sɔɔmɔ lɛ fãi krokomɛi lɛ ahe nii amɛhãa.

13. Tamɔ bɔ ni wɔnaa yɛ Abɛi 11:13 lɛ, mɛni esaaa akɛ asafoŋ onukpai feɔ? Ni mɛni hewɔ?

¹³ Esa akɛ wɔ fɛɛ, titri lɛ asafoŋ onukpai lɛ, abɔ mɔdɛŋ ni wɔkɛ Biblia mli shishitoo mla ni yɔɔ Abɛi 11:13 lɛ atsu nii ni wɔkajie mɛi ateemɔŋ saji akpo. (Kanemɔ.) Enɛ feemɔ baanyɛ awa, titri lɛ, kɛhã asafoŋ onukpai ni ebote gbalashihilɛ mli lɛ. Gbalashihilɛ mli bii kɛ amɛhefatalɔi gbaa sane waa ni amɛkɛɔ amɛ nibii ni amɛsusuɔ, bɔ ni amɛnuɔ he amɛhãa, kɛ naagbai ni amɛkɛmiikpe. Enɛ hãa suɔmɔ ni yɔɔ amɛteŋ lɛ mli waa. Shi asafoŋ onukpai le akɛ, esaaa akɛ amɛjieɔ saji ni mɛi ni yɔɔ asafo lɛ mli lɛ ‘kɛ amɛ pɛ ewie lɛ’ kpo. Kɛ́ amɛfee nakai lɛ, nyɛmimɛi lɛ heŋ amɛ amɛyeŋ dɔŋŋ, ni amɛbaafite amɛgbɛ́i kpakpa lɛ. Esaaa akɛ nyɛmimɛi ni ahala yɛ asafo lɛ mli akɛ nɔkwɛlɔi lɛ feɔ “lilɛi-nta-tsɛmɛi” loo “mɛi ni kɛ amɛwiemɔi lakaa mɛi.” (1 Tim. 3:8; shn.) Nɔ ni enɛ tsɔɔ ji akɛ, esaaa akɛ amɛmaleɔ loo amɛyeɔ osheku. Kɛ́ asafoŋ onukpa ko gba eŋa saji ni esaaa akɛ eleɔ lɛ, ekɛ jatsu ni tsii diɛŋtsɛ etere lɛ. Ani wu ni sumɔɔ eŋa lɛɛlɛŋ lɛ baafee nakai?

14. Mɛni ŋamɛi baanyɛ afee kɛye amɛbua amɛwumɛi koni amɛkafite amɛgbɛ́i kpakpa lɛ?

¹⁴ Ŋamɛi, mɛni nyɛbaanyɛ nyɛfee kɛye nyɛbua nyɛwumɛi koni amɛkafite amɛgbɛ́i kpakpa lɛ? Esaaa akɛ nyɛnyɛɔ amɛnɔ ni amɛgba nyɛ saji ni esaaa akɛ amɛgbaa nyɛ. Kɛ́ nyɛkɛ ŋaawoo nɛɛ tsu nii lɛ, nyɛwumɛi lɛ baaná he sɛɛ. Kɛfata he lɛ, no baatsɔɔ hu akɛ, nyɛbuɔ nyɛmimɛi ni ekɛɛ nyɛwumɛi lɛ amɛteemɔŋ saji lɛ. Nɔ ni fe fɛɛ lɛ, nyɛbaahã Yehowa aná miishɛɛ, ejaakɛ nyɛmiiye nyɛmiibua ni toiŋjɔlɛ kɛ ekomefeemɔ aya nɔ ahi asafo lɛ mli.​—Rom. 14:19.

15. Mɛni Hiob nanemɛi etɛ lɛ fee? Ni te Yehowa nu he ehã tɛŋŋ yɛ nɔ ni amɛfee lɛ he?

¹⁵ Hiob sane ni yɔɔ Biblia lɛ mli lɛ baanyɛ aye abua wɔ ni wɔna be ni esa akɛ wɔwie kɛ bɔ ni esa akɛ wɔwie wɔhã. Hiob kɛ naagbai pii kpe, ni no hã etsui kumɔ. Hii ejwɛ komɛi nu nɔ ni enina lɛ lɛ, ni amɛba koni amɛbashɛje emii ni amɛwo lɛ ŋaa. Shi be ni amɛba lɛ, amɛbatara shi diŋŋ ni amɛwieee nɔ ko. Ani amɛkɛ be nɛɛ susu Hiob he kɛ nɔ ni amɛbaanyɛ amɛwie loo amɛfee kɛye amɛbua lɛ? Saji ni amɛteŋ mɛi etɛ, ni ji Elifaz, Bildad, kɛ Zofar wie lɛ hãa wɔnaa akɛ, amɛkɛ be lɛ kwɛ bɔ ni amɛbaafee amɛhã Hiob ana akɛ efee nɔ ko gbonyo moŋ. Nibii ni amɛwie yɛ Yehowa kɛ Hiob he lɛ ekomɛi ja, shi pii hu ejaaa, loo etsɔɔɔ suɔmɔ. Amɛtsɛ Hiob gbɔmɔ fɔŋ. (Hiob 32:1-3) Te Yehowa nu he ehã tɛŋŋ yɛ nɔ ni amɛfee lɛ he? Emli fu amɛ waa diɛŋtsɛ. Ehã amɛle akɛ buulu amɛfee lɛ, ni ekɛɛ amɛ ni amɛkpa Hiob fai ni esɔle ehã amɛ.​—Hiob 42:7-9.

16. Mɛni wɔkaseɔ yɛ nɔ ni Elifaz, Bildad, kɛ Zofar fee lɛ mli?

¹⁶ Nibii pii yɛ ni wɔbaanyɛ wɔkase yɛ nɔ ni Elifaz, Bildad, kɛ Zofar fee lɛ mli. Klɛŋklɛŋ lɛ, esaaa akɛ wɔkojoɔ wɔnyɛmimɛi lɛ. (Mat. 7:1-5) Moŋ lɛ, esa akɛ wɔbo amɛ toi jogbaŋŋ dani  wɔgbele wɔnaa. Ja wɔfee nakai dani wɔbaanu shihilɛ mli ni amɛyɔɔ lɛ shishi jogbaŋŋ. (1 Pet. 3:8) Nɔ ni ji enyɔ lɛ, kɛ́ wɔbo amɛ toi wɔgbe naa ni agbɛnɛ wɔyaawie lɛ, esa akɛ wɔwie saji ni ja ni baahã amɛna akɛ wɔsusuɔ amɛhe. (Efe. 4:25) Ni nɔ ni ji etɛ lɛ, kɛ́ wɔkɛ wɔnyɛmimɛi lɛ wie bɔ ni esaaa lɛ, Yehowa le, ni kɛ́ wɔkɛ amɛ wie jogbaŋŋ hu, ele.

17. Mɛni wɔkaseɔ yɛ bɔ ni Elihu fee enii ehã lɛ mli?

¹⁷ Atsɛɔ hii ni basara Hiob lɛ ateŋ mɔ ni ji ejwɛ lɛ Elihu, ni Abraham seshinyo ji lɛ. Ebo sane ni Hiob kɛ enanemɛi etɛ lɛ gba lɛ toi. Ni wɔbaanyɛ wɔkɛɛ akɛ ebo toi jogbaŋŋ, ejaakɛ emusuŋ tsɔ lɛ yɛ Hiob he, ni enyɛ ewo lɛ ŋaa yɛ nibii pɔtɛi komɛi ahe koni ekɛjaje ejwɛŋmɔ. (Hiob 33:1, 6, 17) Nɔ ni he hiaa Elihu fe fɛɛ ji, ni ebaawo Yehowa hiɛ nyam, jeee lɛ diɛŋtsɛ ehe loo adesa kroko ko. (Hiob 32:21, 22; 37:23, 24) Nɔ ni efee lɛ hãa wɔnaa akɛ, bei komɛi lɛ, esa akɛ wɔfee diŋŋ ni wɔbo sane toi. (Yak. 1:19) Ehãa wɔnaa hu akɛ, kɛ́ ehe bahia ni wɔwo mɔ ko ŋaa lɛ, esaaa akɛ wɔfeɔ lɛ bɔ ni baahã mɔ lɛ jwɛŋmɔ aba wɔnɔ. Moŋ lɛ, esa akɛ wɔfee lɛ bɔ ni baahã mɔ lɛ jwɛŋmɔ aya Yehowa nɔ ni ewo ehiɛ nyam, ejaakɛ no ji nɔ titri ni he hiaa.

18. Mɛni wɔbaanyɛ wɔfee kɛtsɔɔ akɛ, wɔhiɛ sɔɔ nikeenii ni Nyɔŋmɔ kɛdro wɔ lɛ?

¹⁸ Kɛ́ wɔkɛ ŋaa ni Biblia lɛ ewo yɛ be ni esa akɛ wɔwie kɛ bɔ ni esa akɛ wɔwie wɔhã lɛ he lɛ tsu nii lɛ, no tsɔɔ akɛ wɔhiɛ sɔɔ nikeenii nɛɛ ni jɛ Nyɔŋmɔ ŋɔɔ lɛ. Yehowa kɛ emumɔ lɛ tsirɛ Maŋtsɛ Solomon, nilelɔ lɛ, ni eŋma akɛ: “Wiemɔ ni awieɔ yɛ be ni sa mli lɛ eyɛ fɛo tamɔ apol ni akɛ shika tsuru efee ewo jwiɛtɛi nii amli.” (Abɛi 25:11) Kɛ́ wɔbo nɔ ni mɛi yɔɔ wiemɔ lɛ toi jogbaŋŋ, ni wɔsusu wɔwiemɔi lɛ ahe jogbaŋŋ dani wɔgbele wɔnaa lɛ, wɔwiemɔi lɛ baafee tamɔ apol ni akɛ shika tsuru efee, ni tsɔɔ akɛ, wɔbaawie jogbaŋŋ, ni amɛbaaná saji ni wɔbaawie lɛ ahe sɛɛ. Kɛkɛ lɛ, no lɛ, wɔwie pii jio, wɔwie fioo jio lɛ, saji ni wɔbaawie lɛ baatswa mɛi ama shi, ni Yehowa baaná wɔhe miishɛɛ. (Abɛi 23:15; Efe. 4:29) Enɛ ji gbɛ ni hi fe fɛɛ ni wɔbaanyɛ wɔtsɔ nɔ wɔhã Nyɔŋmɔ ana akɛ, wɔhiɛ sɔɔ nikeenii nɛɛ ni ekɛdro wɔ lɛ!