1-2. (a) Yɛ nɔ ni aŋma yɛ Efesobii 6:16 lɛ naa lɛ, mɛni hewɔ esa akɛ wɔná hemɔkɛyeli ni mli wa tamɔ “tsɛŋ agbo”? (b) Mɛɛ sanebimɔi wɔbaahã hetoo?

ANI oyɛ hemɔkɛyeli ni mli wa tamɔ “tsɛŋ agbo”? (Kanemɔ Efesobii 6:16.) Ŋwanejee ko bɛ he akɛ, ohemɔkɛyeli lɛ mli wa. Bɔ ni tsɛŋ agbo buɔ gbɔmɔtso lɛ he lɛ, nakai nɔŋŋ ohemɔkɛyeli lɛ buɔ ohe koni jeŋba sha, awuiyeli, kɛ nibii gbohii krokomɛi ni yaa nɔ yɛ jeŋ fɔŋ nɛɛ mli lɛ akaná onɔ hewalɛ.

² Shi “naagbee gbii lɛ” amli wɔyɔɔ lɛ, ni wɔkɛ nibii ni baanyɛ aka wɔhemɔkɛyeli lɛ baakpe. (2 Tim. 3:1) Mɛni baaye abua bo ni ona kɛji ohemɔkɛyeli lɛ mli wa lolo? Ni mɛni baaye abua bo ni ohiɛ mli ni awa? Wɔbaahã sanebimɔi nɛɛ ahetoo yɛ nikasemɔ nɛɛ mli.

3. Mɛni asraafoi fee yɛ amɛtsɛŋi lɛ ahe? Ni mɛni hewɔ?

³ Tsɛŋi ni asraafoi ni hi shi yɛ blema lɛ hiɛɔ lɛ pii yɛ ni akɛ kooloo hewolo eha he. Bɔ ni afee ni kooloo hewolo lɛ akafite, ni agbɛnɛ hu, tsɛŋi lɛ hei ni akɛ dade fee lɛ akabɔ ŋkanale lɛ, asraafoi lɛ kɛ mu kpaa he. Agbɛnɛ hu, kɛ́ amɛna akɛ amɛtsɛŋ lɛ he ko miifite lɛ, amɛkwɛɔ ni asaa, koni ekaba lɛ akɛ be ni aaya ta lɛ, amɛhiɛɛɛ tsɛŋ kpakpa. Mɛɛ gbɛ nɔ wɔbaanyɛ wɔkɛ enɛ ato wɔhemɔkɛyeli lɛ he?

4. Mɛni hewɔ esa akɛ wɔpɛi wɔmli wɔkwɛ kɛji wɔhemɔkɛyeli lɛ mli wa lo? Ni te wɔbaafee tɛŋŋ wɔfee nakai?

⁴ Ŋmɛnɛ lɛ, wɔmiiwu ta wɔmiishi Satan kɛ daimonioi lɛ. (Efe. 6:10-12) No hewɔ lɛ, yɛ be kɛ beiaŋ lɛ, esa akɛ wɔkwɛ kɛji naagba  yɛ wɔtsɛŋ lɛ he lo, ni tsɔɔ akɛ, wɔkwɛ kɛji wɔhemɔkɛyeli lɛ mli wa lo. Kɛ́ wɔna akɛ emli miihe agbɔjɔ lɛ, esa akɛ wɔfee nibii ni baahã emli awa, bɔ ni afee ni kɛ́ wɔkɛ naagbai kɛ kai kpe lɛ, wɔnyɛ wɔdamɔ naa. Mɔ ko mɔ ko nyɛŋ ahã ohemɔkɛyeli lɛ mli awa ahã bo; esa akɛ bo diɛŋtsɛ otsu he nii. Mɛni kɛ́ ofee lɛ, ebaahã ohemɔkɛyeli lɛ mli awa bɔ ni kɛ́ okɛ kai kpe lɛ, obaanyɛ naa odamɔ? Klɛŋklɛŋ lɛ, esa akɛ osɔle obi Nyɔŋmɔ dɛŋ yelikɛbuamɔ. No sɛɛ lɛ, esa akɛ okɛ Nyɔŋmɔ Wiemɔ lɛ apɛi omli okwɛ akɛ oofee Nyɔŋmɔ suɔmɔnaa nii lo. (Heb. 4:12) Akɛ nɔkwɛmɔnɔ lɛ, Biblia lɛ kɛɔ akɛ: “Okɛ ohiɛ afɔ̃ Yehowa nɔ kɛ otsui fɛɛ, ni okɛ ohe akafɔ̃ bo diɛŋtsɛ oniiashishinumɔ nɔ.” (Abɛi 3:5, 6) Agbɛnɛ, susumɔ naagbai komɛi ni okɛkpe nyɛsɛɛ nɛɛ kɛ bɔ ni otsu amɛhe nii ohã lɛ ahe okwɛ. Ani nyɛsɛɛ nɛɛ ohe bafi bo waa yɛ shika gbɛfaŋ? Be ni eba lɛ nakai lɛ, ani okai shi ni Yehowa ewo ni abɔ he amaniɛ yɛ Hebribii 13:5 lɛ, akɛ: “Mishiŋ bo, ni mikwaŋ bo kɔkɔɔkɔ” lɛ? Ani nakai shiwoo lɛ hã otsɛ otsui oŋmɛ omli akɛ Yehowa baaye abua bo? Kɛ́ nakai nibii tee lɛ lɛ, belɛ ohemɔkɛyeli lɛ mli wa.

5. Kɛ́ opɛi omli okwɛ jogbaŋŋ lɛ, mɛni ekolɛ obaana yɛ ohemɔkɛyeli lɛ he?

⁵ Kɛ́ opɛi omli okwɛ jogbaŋŋ lɛ, ekolɛ onaa baakpɛ ohe, ejaakɛ obaana naagbai komɛi yɛ ohemɔkɛyeli lɛ he ni ojwɛŋmɔ eyako nɔ po. Akɛ nɔkwɛmɔnɔ lɛ, ekolɛ obaana akɛ tsuiyeli, amalei ni onu yɛ Yehowa kɛ esafo lɛ he, kɛ naagbai ni jeɔ mɔ nijiaŋ wui ehã ohemɔkɛyeli lɛ mli egbɔjɔ. Kɛ́ ona nakai lɛ, mɛni obaanyɛ ofee koni ekaba lɛ akɛ obaaŋmɛɛ ohemɔkɛyeli lɛ he kwraa?

6. Mɛɛ nibii komɛi kɛ́ wɔsusu he waa lɛ, ejeee tɔmɔ?

⁶ Nibii komɛi yɛ ni kɛ́ wɔsusu he waa lɛ, ejeee tɔmɔ. Akɛ nɔkwɛmɔnɔ lɛ, kɛ́ be fɛɛ be lɛ, wɔmiikwɛ bɔ ni wɔbaafee wɔsa Yehowa kɛ Yesu hiɛ lɛ, ehi. (1 Kor. 7:32) Agbɛnɛ hu, kɛ́ wɔyafee esha ko ni yɔɔ hiɛdɔɔ lɛ, wɔhaoɔ waa, ni wɔkwɛɔ bɔ ni wɔbaafee wɔsaa wɔ kɛ Nyɔŋmɔ teŋ. (Lala 38:18) Nakai nɔŋŋ wɔsusuɔ wɔgbalashihilɛ mli hefatalɔ lɛ, wɔweku lɛ, kɛ wɔnyɛmimɛi Kristofoi lɛ ahe waa, ni wɔkwɛɔ bɔ ni wɔbaafee wɔhã amɛná miishɛɛ.​—1 Kor. 7:33; 2 Kor. 11:28.

7. Yɛ nɔ ni awie yɛ Abɛi 29:25 lɛ naa lɛ, mɛni hewɔ esaaa akɛ wɔsheɔ gbɔmɔ gbeyei?

⁷ Shi kɛ́ wɔye wɔtsui fe nine lɛ, wɔhemɔkɛyeli lɛ he baajɔ. Akɛ nɔkwɛmɔnɔ lɛ, kɛ́ daa nɛɛ wɔmiiye wɔtsui yɛ nɔ ni wɔbaaye kɛ nɔ ni wɔbaawo he lɛ, ebaanyɛ ehã wɔkɛ wɔbe kɛ wɔhewalɛ fɛɛ atiu heloonaa nibii asɛɛ. (Mat. 6:31, 32) Kɛ́ wɔkwɛɛɛ ni ahi lɛ, wɔbaatsɔmɔ shika suɔlɔi po, ni no baanyɛ ahã wɔhemɔkɛyeli lɛ mli agbɔjɔ. Kɛ́ wɔhemɔkɛyeli lɛ mli gbɔjɔ lɛ, naanyobɔɔ ni yɔɔ wɔ kɛ Yehowa teŋ lɛ baafite. (Mar. 4:19; 1 Tim. 6:10) Kɛ́ daa nɛɛ wɔmiitao wɔsa mɛi ahiɛ lɛ, no hu baanyɛ ahã wɔye wɔtsui fe nine. Kɛ́ eba lɛ nakai lɛ, wɔbaashe hefɛoyeli kɛ yiwaa gbeyei, moŋ fe ni wɔbaashe Yehowa gbeyei ni wɔfee nɔ ni sa ehiɛ. Nɔ ni baaye abua wɔ ni wɔnyɛ wɔkpee kaa nɛɛ naa ji, ni wɔbaakpa Yehowa fai ni ehã wɔná hemɔkɛyeli kɛ ekãa.​—Kanemɔ Abɛi 29:25; Luka 17:5.

8. Kɛ́ mɔ ko bɔi Yehowa kɛ wɔnyɛmimɛi lɛ ahe saji ni bɛ mli wiemɔ lɛ, mɛni esaaa akɛ wɔfeɔ?

⁸ Satan, “malemɔ tsɛ” lɛ, tsɔɔ mɛi ni ekudɔɔ amɛ lɛ anɔ egbɛɔ Yehowa kɛ wɔnyɛmimɛi Kristofoi lɛ ahe amalei eshwãa. (Yoh. 8:44) Akɛ nɔkwɛmɔnɔ lɛ, mɛi ni ekwa anɔkwa jamɔ lɛ wieɔ Yehowa asafo lɛ he saji ni bɛ mli yɛ Intanɛt lɛ, TV lɛ, kɛ redio lɛ nɔ, kɛ agbɛnɛ hu, yɛ woji amli. Amalei nɛɛ fata Satan “gãimlibii ni tsoɔ lɛ” ahe. (Efe. 6:16) Kɛ́ wɔkɛ mɔ ko miigba sane ni ebɔi amalei nɛɛ ekomɛi wiemɔ lɛ, ani esa akɛ wɔbo toi? Dabi kwraa! Esaaa akɛ  wɔboɔ toi! Mɛni hewɔ? Ejaakɛ wɔheɔ Yehowa kɛ wɔnyɛmimɛi lɛ wɔyeɔ. Anɔkwa, esaaa akɛ wɔkɛ mɛi ni ekwa anɔkwa jamɔ lɛ shãraa yɛ gbɛ ko gbɛ ko nɔ. Asaŋ, esaaa akɛ wɔkɛ amɛ gbaa kadaa yɛ saji ahe, loo wɔtoiiaŋ ŋɔɔ wɔ yɛ nɔ ni amɛyɔɔ kɛɛmɔ lɛ he.

9. Kɛ́ wɔnijiaŋ je wui lɛ, mɛni baanyɛ ajɛ mli kɛba?

⁹ Naagbai ni wɔkɛkpeɔ lɛ baanyɛ ahã wɔnijiaŋ aje wui, ni kɛ́ wɔnijiaŋ je wui lɛ, wɔhemɔkɛyeli lɛ mli baanyɛ agbɔjɔ. Kɛ́ wɔkɛɛ wɔbaajie wɔjwɛŋmɔ kɛje wɔnaagbai lɛ anɔ kwraa lɛ, no hu ehiii. Kɛ̃lɛ, esaaa akɛ wɔhãa amɛheɔ wɔjwɛŋmɔ fɛɛ, kɛjeee nakai lɛ, wɔhiɛ baakpa nibii kpakpai ni Yehowa ewo shi akɛ ebaafee ehã wɔ lɛ anɔ. (Kpo. 21:3, 4) Kɛ́ wɔhiɛ kpa Yehowa shiwoi lɛ anɔ lɛ, ekãa ni wɔkɛsɔmɔɔ lɛ lɛ naa baaba shi, ni ekolɛ wɔbaakpa lɛ sɔɔmɔ po. (Abɛi 24:10) Shi esaaa akɛ wɔhãa ebaa lɛ nakai.

10. Mɛni okase yɛ wolo ni nyɛmi yoo ko ŋma lɛ mli?

¹⁰ Naa nɔ ni nyɛmi yoo ko ni yɔɔ United States, ni ewu bɛ hewalɛ kwraa lɛ wie akɛ no eye ebua lɛ koni ehemɔkɛyeli lɛ mli akagbɔjɔ. Yɛ wolo ko ni eŋma kɛtee asafo lɛ yitso lɛ mli lɛ, ewie akɛ: “Wɔshihilɛ lɛ bɛ mlɛo kwraa, ni bei komɛi lɛ, wɔnijiaŋ jeɔ wui, shi wɔhiɛ wɔhiɛnɔkamɔ lɛ mli kpɛŋŋ. Mihiɛ sɔɔ nibii fɛɛ ni Yehowa kɛdroɔ wɔ koni wɔhemɔkɛyeli lɛ mli awa ni wɔná hiɛnɔkamɔ lɛ waa. Ŋaawoo kɛ hewalɛwoo ni ekɛhãa wɔ lɛ he miihia wɔ waa. Nomɛi eye ebua wɔ koni wɔnijiaŋ akaje wui yɛ naagbai ni Satan kɛbaa wɔnɔ lɛ fɛɛ asɛɛ.” Nɔ ni nyɛmi yoo nɛɛ wie lɛ hãa wɔnaa akɛ, kɛ́ wɔkɛ naagbai ni baanyɛ aje wɔnijiaŋ wui kpe po lɛ, wɔbaanyɛ wɔya nɔ wɔsɔmɔ Yehowa. Mɛni baaye abua wɔ ni wɔfee nakai? Klɛŋklɛŋ lɛ, esa akɛ wɔyɔse akɛ, kɛ́ wɔhã wɔnaagbai lɛ je wɔnijiaŋ wui ni wɔŋmɛɛ wɔhemɔkɛyeli lɛ he lɛ, Satan eye wɔnɔ kunim. Nɔ ni ji enyɔ lɛ, esa akɛ wɔkɛ wɔhiɛ afɔ̃ Yehowa nɔ akɛ ebaashɛje wɔmii. Agbɛnɛ hu, esa akɛ wɔhiɛ asɔ nibii fɛɛ ni etsɔɔ esafo lɛ nɔ ehãa wɔ lɛ.

11. Mɛɛ saji esa akɛ wɔbi wɔhe kɛ́ wɔmiitao wɔle kɛji wɔhemɔkɛyeli lɛ mli wa lo?

¹¹ Ani saji ni wɔsusu he lɛ ateŋ eko ehã ona akɛ ohemɔkɛyeli lɛ he miijɔ? Yɛ nyɔji fioo ni eho lɛ amli lɛ, ani oye otsui fe nine yɛ nɔ ko he? Ani obo amalei ni mɛi ni ekwa anɔkwa  jamɔ lɛ wieɔ lɛ eko toi ni okɛ amɛ egba kadaa yɛ he? Ani naagba ko ni okɛkpe lɛ ehã onijiaŋ eje wui ni okpa Yehowa sɔɔmɔ? Kɛ́ onyɛ ohã sanebimɔi nɛɛ fɛɛ hetoo akɛ dabi lɛ, belɛ ohemɔkɛyeli lɛ mli wa. Shi nibii krokomɛi yɛ ni Satan baanyɛ etsɔ nɔ efite wɔhemɔkɛyeli lɛ, ni no hewɔ lɛ, esa akɛ wɔhã wɔhiɛ ahi wɔhe nɔ. Nyɛhãa wɔsusua ekome he wɔkwɛa.

12. Kɛ́ wɔtiu heloonaa nibii asɛɛ lɛ, mɛni baaba?

¹² Kɛ́ wɔtiu heloonaa nibii asɛɛ lɛ, wɔhemɔkɛyeli lɛ he baajɔ, ni wɔbaafee anihao yɛ Yehowa sɔɔmɔ lɛ mli. Bɔfo Paulo wie akɛ: “Mɔ ko mɔ ko bɛ ni sɔmɔɔ akɛ asraafonyo ni kɛ ehe woɔ shihilɛ mli nitsumɔi amli, bɔ ni afee ni esa mɔ ni he lɛ ewo asraafoi anitsumɔ lɛ mli lɛ hiɛ.” (2 Tim. 2:4) Yɛ blema lɛ, ahãaa Roma asraafoi atsu nii loo amɛhɔ̃ɔ nii. Kɛ́ asraafonyo ko ku ehiɛ efɔ̃ enɛ nɔ, ni ebɔi nitsumɔ loo nihɔ̃ɔmɔ lɛ, mɛni baanyɛ ajɛ mli kɛba?

13. Mɛni hewɔ esaaa akɛ asraafonyo tsuɔ nii lɛ?

¹³ Ŋɔɔ lɛ akɛ, leebi ko lɛ, asraafoi akuu ko miikase bɔ ni akɛ klante nɔɔ. Shi nakai leebi lɛ, amɛteŋ mɔ kome kɛ ehiɛ tsɔɔ maŋ lɛ mli moŋ. Eyato okpɔlɔ ni ebɔi niyenii hɔ̃ɔmɔ. Nakai gbɛkɛ lɛ, enanemɛi asraafoi lɛ he be amɛjɔɔ amɛklantei lɛ anaa ni amɛkwɛ akɛ amɛtawuu nibii lɛ fɛɛ yɛ bɔ ni sa lo. Shi lɛ lɛ, ekɛ ebe lɛ hoo nii koni ená eko ehɔ̃ɔ enɔ jetsɛremɔ. Kɛkɛ ni enɔ jetsɛremɔ lɛ, henyɛlɔi batutua amɛ trukaa. Kɛ́ okwɛ lɛ, ani asraafonyo nɛɛ baanyɛ awu ta lɛ jogbaŋŋ ni etatsɛ lɛ aná ehe miishɛɛ? Ni kɛ́ lɛ edamɔ omasɛi yɛ ta lɛ mli lɛ, ani otsui baanyɔ omli?

14. Mɛni he hiaa wɔ, ni ji Kristo asraafoi lɛ, fe fɛɛ yɛ shihilɛ mli?

¹⁴ Bɔ ni asraafoi kpakpai hãaa nibii agbala amɛjwɛŋmɔ lɛ, nakai nɔŋŋ esaaa akɛ wɔhãa nɔ ko nɔ ko gbalaa wɔjwɛŋmɔ kɛjeɔ oti ni ma wɔhiɛ lɛ nɔ, ni nakai oti lɛ ji, ni wɔbaahã wɔ-Tatsɛmɛi, Yehowa kɛ Kristo aná wɔhe miishɛɛ. Enɛ he miihia wɔ kwraa fe nibii fɛɛ ni yɔɔ Satan je lɛ mli. No hewɔ lɛ, wɔtoɔ wɔnibii ahe gbɛjianɔ jogbaŋŋ koni wɔná be kɛ hewalɛ ni fa bɔ ni sa kɛsɔmɔ Yehowa, ni agbɛnɛ hu wɔkɛkura wɔhemɔkɛyeli tsɛŋ agbo lɛ kɛ wɔtawuu  hewulamɔ nii krokomɛi ni jɛ Nyɔŋmɔ ŋɔɔ lɛ jogbaŋŋ.

15. Mɛɛ kɔkɔ Paulo bɔ wɔ? Ni mɛni hewɔ?

¹⁵ Esa akɛ wɔhã wɔhiɛ ahi wɔhe nɔ waa diɛŋtsɛ! Mɛni hewɔ? Bɔfo Paulo bɔ kɔkɔ akɛ, ‘kɛ́ wɔtswa wɔfai shi akɛ wɔbaatsɔmɔ niiatsɛmɛi lɛ, wɔbaadu gbɛ kɛje hemɔkɛyeli lɛ he.’ (1 Tim. 6:9, 10) ‘Wɔbaadu gbɛ’ kɛ shishinumɔ lɛ akɛ, wɔbaayatiu heloonaa nibii ni he ehiaaa asɛɛ, ni no baagbala wɔjwɛŋmɔ kɛje Yehowa sɔɔmɔ lɛ nɔ. Kɛ́ eba lɛ nakai lɛ, “kwashiai akɔnɔi pii ni yeɔ awui” baaba wɔtsine. Nyɛhãa wɔkaia be fɛɛ be akɛ, Satan ji mɔ ni miisumɔ ni wɔná akɔnɔi nɛɛ koni no afite wɔhemɔkɛyeli lɛ.

16. Mɛɛ saji esa akɛ amaniɛ ni abɔ yɛ Marko 10:17-22 lɛ ahã wɔbi wɔhe?

¹⁶ Ni kɛ́ ekolɛ bo lɛ, oyɛ shika lɛ momo hu? Ani eji tɔmɔ akɛ obaahé nɔ fɛɛ nɔ ni otsui shweɔ kɛji ehe ehiaaa bo po? Jeee doo. Shi dani obaahé nɔ ko lɛ, bi ohe saji nɛɛ: ‘Eyɛ mli akɛ miyɛ shika ni manyɛ mahé nii nɛɛ moŋ, shi ani maná dekã kɛ hewalɛ ni mikɛ nii nɛɛ atsu nii, ni agbɛnɛ hu, makwɛ nɔ? Kɛ́ mihé heloonaa nibii pii lɛ, ani mitsui mɔŋ nibii ni miyɔɔ lɛ? Ni kɛ́ mitsui mɔ amɛ nakai lɛ, ani no hãŋ mafee minii tamɔ oblanyo lɛ ni Yesu fɔ̃ lɛ nine ni ebanyiɛ esɛɛ koni elɛɛ esɔɔmɔ lɛ mli shi efeee lɛ?’ (Kanemɔ Marko 10:17-22.) Ehi moŋ akɛ omii baashɛ heloonaa nibii fioo ni  oyɔɔ lɛ ahe koni oná be kɛ hewalɛ pii ni okɛfee Nyɔŋmɔ suɔmɔnaa nii, aloo jeee nakai?

17. Mɛni esaaa akɛ wɔhiɛ kpaa nɔ kɔkɔɔkɔ?

¹⁷ Esaaa akɛ wɔhiɛ kpaa nɔ kɔkɔɔkɔ akɛ, wɔyɛ ta mli, ni esa akɛ wɔfee klalo akɛ wɔbaawu ta lɛ daa gbi. (Kpo. 12:17) Wɔnyɛmimɛi lɛ nyɛŋ ahiɛ wɔhemɔkɛyeli tsɛŋ lɛ amɛhã wɔ. Esa akɛ wɔ diɛŋtsɛ wɔhiɛ, ni wɔhiɛ mli kpɛŋŋ.

18. Yɛ blema lɛ, mɛni hewɔ asraafoi hiɛɔ amɛtsɛŋ mli kpɛŋŋ lɛ?

¹⁸ Yɛ blema lɛ, kɛ́ asraafonyo ko fee ekãa yɛ ta mli lɛ, awoɔ ehiɛ nyam. Shi kɛ́ be ni ebaajɛ ta lɛ eba lɛ, ehiɛɛɛ etsɛŋ lɛ, abuɔ lɛ akɛ eyɛ hiɛgbele. Romanyo yinɔsaneŋmalɔ ko ni atsɛɔ lɛ Tacitus lɛ ŋma akɛ: “Nɔ ko bɛ ni yɔɔ hiɛgbele fe ni asraafonyo baajɛ ta mli eba ni ehiɛɛɛ etsɛŋ.” Enɛ ji yiŋtoo kome hewɔ ni asraafoi bɔ mɔdɛŋ waa akɛ amɛbaahiɛ amɛtsɛŋ mli kpɛŋŋ lɛ.

19. Te wɔbaafee tɛŋŋ wɔhiɛ wɔhemɔkɛyeli tsɛŋ lɛ mli kpɛŋŋ?

¹⁹ Te wɔbaafee tɛŋŋ wɔhiɛ wɔhemɔkɛyeli tsɛŋ lɛ mli kpɛŋŋ? Esa akɛ wɔya Kristofoi akpeei daa, ni wɔhã mɛi ale Yehowa gbɛ́i lɛ kɛ e-Maŋtsɛyeli lɛ he sane. (Heb. 10:23-25) Agbɛnɛ hu, esa akɛ wɔkane Nyɔŋmɔ Wiemɔ lɛ daa gbi, ni wɔsɔle ni eye ebua wɔ ni wɔkɛ nibii ni wɔkaseɔ yɛ mli lɛ atsu nii yɛ wɔshihilɛ mli. (2 Tim. 3:16, 17) Kɛ́ wɔfee nibii nɛɛ, Satan tawuu nii lɛ eko kwraa bɛ ni baaye wɔ awui bɔ ni baahã naanɔ wala aŋmɛɛ wɔ. (Yes. 54:17) ‘Wɔhemɔkɛyeli tsɛŋ agbo’ lɛ baabu wɔhe. Wɔbaafi shi shiŋŋ, ni wɔkɛ wɔnyɛmimɛi lɛ baafee ekome kɛsɔmɔ Yehowa kɛ ekãa. Agbɛnɛ hu, wɔbaaye kunim yɛ ta ni wɔwuɔ daa gbi lɛ mli. Nɔ ni fe fɛɛ lɛ, wɔbaahi Yesu webii lɛ ateŋ kɛyashi ebaawu eshi Satan kɛ esamaŋfoi lɛ ni eye amɛnɔ kunim. Mɛɛ hegbɛ ni yɔɔ nyam po enɛ baaji nɛkɛ!​—Kpo. 17:14; 20:10.