1-2. (a) Mɛɛ gbɛ nɔ shihilɛi ni wɔkɛkpeɔ ŋmɛnɛ lɛ tamɔ shihilɛi ni Yudafoi ni ku amɛsɛɛ kɛba Yerusalem lɛ kɛkpe lɛ? (b) Tsɔɔmɔ nibii ni tee nɔ be ni Yudafoi lɛ ku amɛsɛɛ kɛba Yerusalem lɛ. (Kwɛmɔ akrabatsa ni ji, “ Nibii Ni Tee Nɔ Yɛ Hagai, Zakaria, Kɛ Ezra Gbii Lɛ Amli.”)

 BEI komɛi lɛ, ani otsui yeɔ yɛ nibii ni oleee ni baanyɛ aba wɔsɛɛ lɛ ahewɔ? Ekolɛ onitsumɔ efite ni ooye otsui yɛ bɔ ni obaafee okwɛ oweku lɛ he. Loo ekolɛ bɔ ni nibii yaa nɔ yɛ maŋ nɔ ni nyɛyɔɔ lɛ, yiwaa, loo bɔ ni ateɔ shi awoɔ nyɛ yɛ shiɛmɔ nitsumɔ lɛ hewɔ lɛ, oonu he akɛ oweku lɛ bɛ shweshweeshwe. Kɛ́ okɛ shihilɛi nɛɛ ateŋ eko miikpe lɛ, belɛ obaaná nikasemɔ nɛɛ he sɛɛ waa diɛŋtsɛ. Nikasemɔ nɛɛ baaye ebua bo ni ona bɔ ni Yehowa ye ebua blema Israelbii lɛ be ni amɛkɛ shihilɛi ni tamɔ nɛkɛ nɔŋŋ kpe lɛ.

² Ehe bahia ni Israelbii ni ehi Babilon amɛwala gbii abɔ fɛɛ lɛ aná hemɔkɛyeli waa dani amɛnyɛ amɛshi ogbɔjɔ shihilɛ ni amɛyɔɔ mli yɛ Babilon lɛ ni amɛfã gbɛ kɛya maŋ ko ni amɛleee jɛmɛ jogbaŋŋ lɛ nɔ. Be ni amɛyashɛ lɛ, etsɛɛɛ ni amɛkɛ shihilɛi ni mli wawai kpe. Ebawa kɛhã amɛ akɛ amɛbaakwɛ amɛwekui lɛ. Agbɛnɛ hu, basabasafeemɔ pii tee nɔ yɛ Persia Nɔyeli lɛ ni yeɔ amɛnɔ lɛ mli, ni maji komɛi ni bɔle Israelbii lɛ hu te shi amɛwo amɛ. Enɛ hã amɛteŋ mɛi babaoo jie amɛjwɛŋmɔ kɛje Yehowa sɔlemɔ shĩa lɛ ni amaa lɛ nɔ. No hewɔ lɛ yɛ afi 520 D.Ŋ.B. lɛ, Yehowa hã gbalɔi enyɔ, ni ji Hagai kɛ Zakaria bawo ewebii lɛ hewalɛ. (Hag. 1:1; Zak. 1:1) Wɔbaana yɛ nikasemɔ nɛɛ mli akɛ, hewalɛ ni amɛwo Yehowa webii lɛ ye ebua amɛ waa. Shi aaafee afii 50 sɛɛ lɛ, ehe bahia ni awo Yudafoi lɛ hewalɛ ekoŋŋ. No hewɔ lɛ, Ezra, ni ji woloŋmalɔ ni le Mla lɛ jogbaŋŋ lɛ, jɛ Babilon eba Yerusalem koni ebawo Nyɔŋmɔ webii lɛ hewalɛ ni amɛhã Yehowa jamɔ he ahia amɛ fe nɔ fɛɛ nɔ yɛ amɛshihilɛ mli.—Ezr. 7:​1, 6.

3. Mɛɛ sanebimɔi ahe wɔbaasusu yɛ nikasemɔ nɛɛ mli? (Abɛi 22:19)

 ³ Gbalɛi ni Hagai kɛ Zakaria gba lɛ ye ebua Yehowa webii ni hi shi yɛ blema lɛ ni amɛkɛ amɛhiɛ fɔ̃ Yehowa nɔ be ni ate shi awo amɛ lɛ. Nakai nɔŋŋ gbalɛi nɛɛ baahã wɔhe wɔye waa akɛ, Yehowa baaye ebua wɔ kɛ́ wɔkɛ shihilɛ ni mli wa kpe. (Kanemɔ Abɛi 22:19.) Yɛ nikasemɔ nɛɛ mli lɛ, wɔbaasusu saji ni Nyɔŋmɔ kɛhã Hagai kɛ Zakaria lɛ he, ni wɔbaasusu nɔkwɛmɔnɔ ni Ezra fee lɛ hu he. Be ni wɔsusuɔ saji nɛɛ ahe lɛ, wɔbaahã sanebimɔi nɛɛ ahetoo: Te shihilɛi ni mli wawai ni Yudafoi ni ku amɛsɛɛ kɛjɛ Babilon kɛba lɛ kɛkpe lɛ sa amɛhe ehã tɛŋŋ? Mɛni hewɔ esa akɛ Yehowa jamɔ he ahia wɔ fe nɔ fɛɛ nɔ kɛ́ wɔkɛ shihilɛi ni mli wawai miikpe? Ni kɛ́ wɔkɛ shihilɛi ni mli wawai miikpe lɛ, mɛni wɔbaanyɛ wɔfee ni baahã wɔhe wɔye waa akɛ Yehowa baaye ebua wɔ?

4-5. Mɛni ekolɛ ehã ekãa ni Israelbii lɛ kɛmaa sɔlemɔ shĩa lɛ naa ba shi?

⁴ Be ni Yudafoi lɛ ku amɛsɛɛ kɛba Yerusalem lɛ, no mli lɛ, nibii pii yɛ ni esa akɛ amɛtsu. Be ni amɛba nɔŋŋ lɛ, amɛma Yehowa afɔleshaa latɛ lɛ ni amɛtswa sɔlemɔ shĩa lɛ faneshi lɛ. (Ezr. 3:​1-3, 10) Shi etsɛɛɛ ni ekãa ni amɛyɔɔ lɛ naa ba shi. Mɛni hã eba lɛ nakai? Amɛkɛ naagbai pii kpe. Yɛ sɔlemɔ shĩa ni amɛmaa lɛ sɛɛ lɛ, ehe bahia ni amɛmamɔ tsũi ni amɛbaahi mli, amɛfee ŋmɔji, ni amɛkwɛ amɛwekui lɛ hu. (Ezr. 2:​68, 70) Agbɛnɛ hu, amɛhenyɛlɔi lɛ te shi amɛwo amɛ, ni amɛka akɛ amɛbaahã amɛkpa sɔlemɔ shĩa lɛ maa.—Ezr. 4:​1-5.

⁵ Be ni Israelbii lɛ ku amɛsɛɛ kɛba lɛ, nibii amli bawa kɛhã amɛ yɛ heloo gbɛfaŋ, ni agbɛnɛ hu, basabasafeemɔ tee nɔ yɛ Persia Nɔyeli lɛ ni yeɔ amɛmaŋ lɛ nɔ lɛ mli. Be ni Persia maŋtsɛ Koresh gbo yɛ afi 530 D.Ŋ.B. lɛ, mɔ ni baye esɛɛ ji, Kambisis. Ekɛ Ejipt bɔi tawuu koni eye enɔ. Eeenyɛ efee akɛ, be ni Kambisis asraafoi lɛ yaa koni amɛkɛ Ejipt ayawu lɛ, amɛtsɔ Israel ni amɛbi Israelbii lɛ ni amɛhã amɛ niyenii, nu, kɛ wɔɔhe, ni enɛ hã nibii amli bawa waa kɛhã Israelbii lɛ. Be ni Kambisis gbo lɛ, mɔ ni baye esɛɛ ji Dario I lɛ. Lɛ hu yɛ enɔyeli lɛ shishijee lɛ, mɛi te shi amɛwo enɔyeli lɛ, ni amɛfee basabasa waa. Enɛɛmɛi fɛɛ ahewɔ lɛ, Israelbii lɛ ye amɛtsui yɛ bɔ ni amɛbaafee amɛkwɛ amɛwekui lɛ he. Naagbai nɛɛ ahewɔ lɛ, amɛteŋ mɛi komɛi nu he akɛ amɛbɛ dekã ni amɛkɛbaama Yehowa sɔlemɔ shĩa lɛ.—Hag. 1:2.

6. Mɛɛ naagba kroko Israelbii lɛ kɛkpe? Ni yɛ nɔ ni aŋma yɛ Zakaria 4:​6, 7 lɛ naa lɛ, mɛɛ gbɛ nɔ Yehowa tsɔ Zakaria nɔ ewo amɛ hewalɛ?

⁶ Kanemɔ Zakaria 4:​6, 7. Yɛ bɔ ni nibii amli bawa yɛ heloo gbɛfaŋ kɛhã Israelbii lɛ, kɛ basabasafeemɔ ni tee nɔ yɛ Persia Nɔyeli lɛ mli lɛ sɛɛ lɛ, Israelbii lɛ ahenyɛlɔi lɛ te shi amɛwo amɛ. Yɛ afi 522 D.Ŋ.B. lɛ, amɛhenyɛlɔi lɛ hã atsĩ sɔlemɔ shĩa lɛ nitsumɔ lɛ naa. Shi Zakaria wo Israelbii lɛ hewalɛ akɛ, Yehowa baatsɔ emumɔ krɔŋkrɔŋ lɛ nɔ eye ebua amɛ ni amɛma sɔlemɔ shĩa lɛ. Ni nakai pɛpɛɛpɛ eba lɛ. Yɛ afi 520 D.Ŋ.B. lɛ, Maŋtsɛ Dario jie naatsii ni akɛfɔ̃ sɔlemɔ shĩa lɛ maa nɔ lɛ, ni ehã Israelbii lɛ shika kɛ nibii ni he baahia amɛ kɛhã sɔlemɔ shĩa lɛ maa.—Ezr. 6:​1, 6-10.

7. Be ni Israelbii lɛ hã Nyɔŋmɔ suɔmɔnaa nii ni amɛbaafee lɛ he hia amɛ fe nɔ fɛɛ nɔ lɛ, mɛɛ jɔɔmɔi amɛná?

 ⁷ Yehowa tsɔ Hagai kɛ Zakaria nɔ ewo ewebii lɛ shi akɛ, kɛ́ amɛhã sɔlemɔ shĩa lɛ maa lɛ he hia amɛ fe nibii krokomɛi lɛ, ebaaye ebua amɛ. (Hag. 1:​8, 13, 14; Zak. 1:​3, 16) Bɔ ni gbalɔi nɛɛ wo Israelbii lɛ hewalɛ hewɔ lɛ, amɛje sɔlemɔ shĩa lɛ maa shishi ekoŋŋ yɛ afi 520 D.Ŋ.B., ni amɛkɛ nɔ ni shɛɛɛ afii enumɔ ma amɛgbe naa. Israelbii lɛ fee Yehowa suɔmɔnaa nii yɛ naagbai ni amɛyɔɔ lɛ fɛɛ sɛɛ.  Enɛ hewɔ lɛ, Yehowa ye ebua amɛ ni amɛná amɛheloonaa hiamɔ nii, ni eye ebua amɛ ni amɛto anɔkwa jamɔ shishi. Enɛ hã amɛjá Yehowa kɛ miishɛɛ.—Ezr. 6:​14-16, 22.

8. Mɛɛ gbɛ nɔ wiemɔi ni yɔɔ Hagai 2:4 lɛ baanyɛ aye abua wɔ ni wɔhã Nyɔŋmɔ suɔmɔnaa nii ni wɔbaafee lɛ he ahia wɔ fe nɔ fɛɛ nɔ? (Kwɛmɔ shishigbɛ niŋmaa lɛ hu.)

⁸ Amanehulu kpeteŋkpele lɛ ebɛŋkɛ waa, no hewɔ lɛ, ehe miihia waa ni wɔbo famɔ akɛ wɔshiɛ wɔhã mɛi lɛ toi. (Mar. 13:10) Shi ekolɛ, kɛ́ wɔkɛ shika he naagbai miikpe loo ekolɛ aate shi aawo wɔ yɛ shiɛmɔ nitsumɔ lɛ hewɔ lɛ, ebaanyɛ ewa kɛhã wɔ akɛ wɔbaashiɛ kɛ ekãa. Mɛni baaye abua wɔ ni wɔhã Nyɔŋmɔ nitsumɔ ni wɔbaatsu lɛ he ahia wɔ fe nɔ fɛɛ nɔ? No ji, ni wɔbaahe wɔye waa akɛ, “Yehowa, taiatsɛ” b lɛ shiŋ wɔ kɔkɔɔkɔ. Kɛ́ wɔhã esuɔmɔnaa nii he hia wɔ fe nɔ fɛɛ nɔ yɛ wɔshihilɛ mli lɛ, ebaaye ebua wɔ. No hewɔ lɛ, esaaa akɛ wɔsheɔ gbeyei.—Kanemɔ Hagai 2:4.

9-10. Mɛɛ gbɛ nɔ nyɛmi nuu ko kɛ eŋa na akɛ Yesu wiemɔi ni yɔɔ Mateo 6:33 lɛ ji anɔkwale?

⁹ Naa nyɛmi nuu ko ni atsɛɔ lɛ Oleg kɛ eŋa Irina c ni amɛ fɛɛ amɛji gbɛgbalɔi lɛ aniiashikpamɔ. Amɛfã kɛtee amɛmaŋ lɛ he kroko koni amɛyaye amɛbua asafo ko ni hiamɔ da yɛ mli lɛ. Bɔ ni nibii amli wo wu yɛ amɛmaŋ lɛ mli lɛ hewɔ lɛ, amɛnitsumɔ fite. Amɛhi shi afi sɔŋŋ ni amɛnáaa nitsumɔ pɔtɛɛ ko amɛtsu, shi Yehowa tee nɔ eye ebua amɛ. Bei komɛi hu lɛ, nyɛmimɛi lɛ bahãa amɛ nibii ni he hiaa amɛ. Mɛni ye ebua amɛ be ni amɛkɛ shihilɛ ni mli wa nɛɛ kpe lɛ? Oleg hao waa be ni naagbai nɛɛ je shishi lɛ, shi ewie akɛ: “Wɔhe ni wɔkɛwo shiɛmɔ nitsumɔ lɛ mli waa lɛ ye ebua wɔ ni wɔhã Nyɔŋmɔ suɔmɔnaa nii ni wɔbaafee lɛ he hia wɔ waa.” Eyɛ mli akɛ amɛtee nɔ amɛtao nitsumɔ  moŋ, shi amɛkɛ amɛhe wo shiɛmɔ nitsumɔ lɛ mli waa.

¹⁰ Be ko be ni amɛjɛ shiɛmɔ amɛba lɛ, amɛná amɛle akɛ amɛnaanyo ko efã gbɛ kilomitai 160 sɔŋŋ ni ebashi baagii enyɔ ni eye jara ewo mli ehã amɛ. Oleg wie akɛ: “Nakai gbi lɛ, wɔna shi kome ekoŋŋ akɛ, Yehowa susuɔ wɔhe waa ni wɔnyɛmimɛi lɛ hu susuɔ wɔhe. Wɔna faŋŋ akɛ, Yehowa hiɛ kpaaa etsuji anɔ ekɔɔɔ he eko bɔ ni amɛshihilɛ efee basaa ehã.”—Mat. 6:33.

11. Kɛ́ wɔtee nɔ wɔfee Nyɔŋmɔ suɔmɔnaa nii lɛ, mɛni wɔbaanyɛ wɔhe wɔye akɛ Yehowa baafee?

¹¹ Yehowa miisumɔ ni wɔkɛ wɔhe awo shiɛmɔ nitsumɔ lɛ, ni ji nitsumɔ ni hereɔ mɔ yiwala lɛ mli waa. Tamɔ wɔna yɛ  kuku 7 lɛ mli lɛ, Hagai wo Nyɔŋmɔ webii lɛ hewalɛ ni amɛje Nyɔŋmɔ sɔlemɔ shĩa lɛ maa lɛ shishi ekoŋŋ, oookɛɛ nɔ ni kpaako kwraa amɛyaatswa efaneshi lɛ. Yehowa wo amɛ shi akɛ kɛ́ amɛfee nakai lɛ, ‘ebaajɔɔ amɛ.’ (Hag. 2:​18, 19) Wɔ hu wɔbaanyɛ wɔhe wɔye akɛ, Yehowa baajɔɔ wɔ kɛ́ wɔhã nitsumɔ ni ekɛwo wɔdɛŋ akɛ wɔtsu lɛ he hia wɔ fe nɔ fɛɛ nɔ.

12. Mɛni hewɔ ehe bahia ni Ezra kɛ mɛi ni ekɛfã gbɛ kɛba Yerusalem lɛ aná hemɔkɛyeli ni mli wa lɛ?

¹² Yɛ afi 468 D.Ŋ.B. lɛ, Ezra kɛ Israelbii krokomɛi fã gbɛ kɛjɛ Babilon kɛba Yerusalem. Ehe bahia ni Ezra kɛ mɛi ni ekɛfãa gbɛ lɛ aná hemɔkɛyeli ni mli wa waa. Mɛni hewɔ? Nɔ hewɔ lɛ ji akɛ, amɛhiɛ jwiɛtɛi kɛ shika tsuru ni akɛhã kɛhã sɔlemɔ shĩa lɛ maa, ni gbɛi ni amɛbaatsɔ nɔ kɛba lɛ anɔ yɛ oshãra waa. Nibii ni amɛhiɛ nɛɛ hewɔ lɛ, ewaaa kwraa akɛ ojotswalɔi baatutua amɛ. (Ezr. 7:​12-16; 8:31) Agbɛnɛ hu, amɛna akɛ Yerusalem hu bɛ shweshweeshwe. Mɛi babaoo bɛ maŋ lɛ mli, ni atswako maŋ lɛ gbogboi lɛ, ni agboi hu bɛ naa. Mɛni hã Ezra he eye waa akɛ Yehowa baaye ebua lɛ? Ni mɛni wɔbaanyɛ wɔkase kɛjɛ mli?

13. Mɛni hã Ezra he Yehowa eye waa? (Kwɛmɔ shishigbɛ niŋmaa lɛ hu.)

¹³ Be ko be ni Yehowa webii lɛ kɛ shihilɛ ni mli wa ko kpe lɛ, Ezra na bɔ ni Yehowa ye ebua amɛ. Yɛ afi 484 D.Ŋ.B. be ni Maŋtsɛ Ahasweros fã ni agbe Yudafoi fɛɛ ni yɔɔ Persia Nɔyeli lɛ mli lɛ, eeenyɛ efee akɛ no mli lɛ, Ezra yɛ Babilon. (Est. 3:​7, 13-15) Ezra kɛ Yudafoi krokomɛi lɛ fɛɛ awala yaje oshãra mli. Famɔ nɛɛ hewɔ lɛ, Yudafoi ni yɔɔ “kpokpaa fɛɛ kpokpaa” nɔ lɛ hi ŋmaa ni amɛye awerɛho, ni amɛsɔle amɛhã Yehowa koni eye ebua amɛ. (Est. 4:3) Nibii tsɔ sɛɛsɛɛ, ni agbe mɛi ni tsɔ̃ ŋaa koni agbe Yudafoi lɛ moŋ. (Est. 9:​1, 2) Kɛ́ okwɛ lɛ, te enɛ hã Ezra kɛ Yudafoi krokomɛi lɛ fɛɛ nu he amɛhã tɛŋŋ? Ŋwanejee ko bɛ he akɛ, amɛná miishɛɛ waa. Eyɛ faŋŋ akɛ, shihilɛ ni Ezra tsɔ mli nɛɛ saa lɛ eto shihilɛi krokomɛi ni mli wa ni ekɛbaakpe wɔsɛɛ, ni ehã ehe eye waa akɛ Yehowa baanyɛ abu Ewebii lɛ ahe. d

14. Be ni nyɛmi yoo ko yaje shihilɛ ni mli wa ko mli ni ena bɔ ni Yehowa kwɛ lɛ lɛ, mɛni ekase yɛ mli?

¹⁴ Kɛ́ wɔyaje shihilɛ ni mli wa ko mli ni wɔna bɔ ni Yehowa ye ebua wɔ lɛ, ehãa wɔheɔ wɔyeɔ waa akɛ ebaaye ebua wɔ wɔsɛɛ hu. Naa nyɛmi yoo ko ni atsɛɔ lɛ Anastasia ni yɔɔ Yuropa bokãgbɛ lɛ niiashikpamɔ. Akɛni esumɔɔɔ ni ekɛ ehe woɔ pɔlitis mli hewɔ lɛ, ekpa nitsumɔ ni etsuɔ lɛ. Enɛ hã ehe fi lɛ. Ewie akɛ: “Mihe fiko mi nɛkɛ pɛŋ yɛ mishihilɛ mli.” Ekɛfata he akɛ: “Misɔle mihã Yehowa ni mishi sane lɛ mihã lɛ, ni mina bɔ ni eye ebua mi. Wɔsɛɛ ko kɛ́ ekolɛ minitsumɔ je midɛŋ ekoŋŋ lɛ, misheŋ gbeyei. Kɛ́ miŋwɛi Tsɛ lɛ ekwɛ mi ŋmɛnɛ lɛ, ebaakwɛ mi wɔ́ hu.”

15. Mɛni ye ebua Ezra ni etee nɔ ehe Yehowa eye waa? (Ezra 7:​27, 28)

¹⁵ Ezra na Yehowa nine yɛ eshihilɛ mli.  Ŋwanejee ko bɛ he akɛ, Ezra tee nɔ esusu bei srɔtoi ni ekɛ shihilɛi ni mli wawai kpe ni Yehowa ye ebua lɛ lɛ he, ni enɛ ye ebua lɛ ni ehe eye akɛ, Yehowa baaye ebua lɛ. Ezra kɛ wiemɔ ni ji, “Yehowa, mi-Nyɔŋmɔ lɛ nine yɛ minɔ” lɛ tsu nii yɛ ewolo lɛ mli. (Kanemɔ Ezra 7:​27, 28.) Ekɛ wiemɔ ni tamɔ nakai tsu nii shii ekpaa sɔŋŋ yɛ ewolo lɛ mli.—Ezr. 7:​6, 9; 8:​18, 22, 31.

16. Mɛɛ shihilɛi nɛkɛ baanyɛ agbele gbɛ ahã wɔ ni wɔnyɛ wɔna Yehowa nine yɛ wɔshihilɛ mli? (Kwɛmɔ mfoniri lɛ hu.)

¹⁶ Yehowa baanyɛ eye ebua wɔ kɛ́ wɔkɛ naagba ko miikpe. Akɛ nɔkwɛmɔnɔ lɛ, kɛ́ wɔyana wɔnitsumɔtsɛ ni wɔbi lɛ gbɛ koni wɔnyɛ wɔya kpokpaa wulu nɔ kpee ko loo wɔyana lɛ koni etsake be ni wɔtsuɔ nii lɛ mli ehã wɔ koni wɔnyɛ wɔya asafoŋ kpeei daa lɛ, no baagbele gbɛ ehã wɔ koni wɔna Yehowa nine yɛ wɔshihilɛ mli. Ekolɛ bɔ ni Yehowa baatsu saji ahe nii ehã lɛ baahã wɔnaa akpɛ wɔhe waa, ni enɛ baanyɛ ahã wɔhe wɔye waa akɛ Yehowa baaye ebua wɔ be fɛɛ be.

17. Kɛ́ Ezra kɛ shihilɛ ko kpe ni hã ehao lɛ, mɛni efeɔ ni tsɔɔ akɛ ebaa ehe shi? (Kwɛmɔ mfoniri ni yɔɔ wolo lɛ hiɛ lɛ.)

¹⁷ Ezra jɛ heshibaa mli esɔle ebi Yehowa koni eye ebua lɛ. Be fɛɛ be ni ebaanu he akɛ nitsumɔ ni jwere enɔ lɛ tsii fe lɛ lɛ, esɔleɔ ebiɔ Yehowa koni eye ebua lɛ. Enɛ tsɔɔ akɛ ebaa ehe shi. (Ezr. 8:​21-23; 9:​3-5) Akɛni Ezra kɛ ehiɛ fɔ̃ Yehowa nɔ hewɔ lɛ, mɛi krokomɛi ye amɛbua lɛ, ni amɛkase ehemɔkɛyeli lɛ. (Ezr. 10:​1-4) Kɛ́ wɔ hu wɔhao yɛ bɔ ni wɔbaafee wɔhã wɔweku lɛ amɛheloonaa hiamɔ nii loo bɔ ni wɔbaafee wɔbu amɛhe koni amɛfee shweshweeshwe lɛ he lɛ, esa akɛ wɔsɔle wɔbi Yehowa ni eye ebua wɔ.

18. Mɛni baahã wɔkɛ wɔhiɛ afɔ̃ Yehowa nɔ waa?

¹⁸ Kɛ́ wɔjɛ heshibaa mli wɔbi Yehowa ni eye ebua wɔ, ni wɔhã wɔnyɛmimɛi Kristofoi lɛ ye amɛbua wɔ lɛ, wɔkɛ wɔhiɛ baafɔ̃ Yehowa nɔ waa. Nyɛmi yoo ko ni atsɛɔ lɛ Erika ni yɔɔ bii etɛ lɛ he eye waa akɛ Yehowa baaye ebua lɛ be ni ekɛ shihilɛi komɛi ni hãa mɔ tsui kumɔɔ kpe lɛ. Emusu fite, ni no sɛɛ etsɛɛɛ lɛ, ewu hu gbo. Be ni esusu nɔ ni ba lɛ kɛ nɔ ni tee nɔ yɛ no sɛɛ lɛ he lɛ, ewie akɛ: “Onyɛŋ otsɔ hiɛ ole bɔ ni Yehowa baaye ebua bo kɔkɔɔkɔ. Ebaanyɛ etsɔ gbɛi ni ojwɛŋmɔ shɛɛɛ he lɛ anɔ eye ebua bo. Mina akɛ, Yehowa tsɔ nibii ni minanemɛi lɛ wie kɛ nibii ni amɛfee lɛ anɔ ehã misɔlemɔi lɛ babaoo ahetoo. Kɛ́ migba minanemɛi lɛ nɔ ni gbaa minaa lɛ, ewaaa kwraa akɛ amɛbaaye amɛbua mi.”

19-20. Mɛni wɔkaseɔ yɛ Israelbii ni nyɛɛɛ aku amɛsɛɛ kɛya Yerusalem lɛ sane lɛ mli?

¹⁹ Nɔ ko hu yɛ ni wɔbaanyɛ wɔkase yɛ Israelbii ni nyɛɛɛ aku amɛsɛɛ kɛya Yerusalem lɛ dɛŋ. Israelbii lɛ ateŋ mɛi komɛi yɛ ni gbɔlɛ, hela, loo shihilɛ ni amɛweku lɛ yɔɔ mli lɛ hewɔ lɛ, amɛnyɛɛɛ amɛku amɛsɛɛ kɛba Yerusalem. Fɛɛ sɛɛ lɛ, amɛjɛ amɛtsuiŋ amɛkɛ nibii babaoo hã mɛi ni ku amɛsɛɛ lɛ koni amɛkɛbama sɔlemɔ shĩa lɛ. (Ezr. 1:​5, 6) Etamɔ nɔ ni be ni klɛŋklɛŋ kuu lɛ ku amɛsɛɛ kɛba Yerusalem lɛ aaafee afii 19 sɛɛ po lɛ, Israelbii ni yɔɔ Babilon lɛ tee nɔ amɛkɛ nibii maje ni akɛya Yerusalem.—Zak. 6:10.

²⁰ Kɛ́ shihilɛ ko hewɔ lɛ wɔnyɛɛɛ wɔtsu bɔ ni wɔtsui shweɔ yɛ Yehowa sɔɔmɔ lɛ mli lɛ, wɔbaanyɛ wɔhe wɔye akɛ Yehowa hiɛ sɔɔ nɔ ni wɔjɛɔ wɔtsui mli wɔtsuɔ lɛ. Mɛni hewɔ wɔkɛɔ nakai? Yɛ Zakaria gbii lɛ amli lɛ, Yehowa kɛɛ lɛ ni ekɛ jwiɛtɛi kɛ shika tsuru ni amɛnyɛmimɛi ni yɔɔ Babilon lɛ kɛmaje lɛ eko afee akekere. (Zak. 6:11) “Akekere kpeteŋkpele” nɛɛ “baatsɔ kaimɔ nɔ” ni akɛbaakai amɛ yɛ nibii ni amɛkɛmajeɔ amɛnyɛmimɛi lɛ hewɔ. (Zak. 6:​14, shn.) Enɛ hãa wɔnaa akɛ, Yehowa hiɛ kpaaa wɔtsui mli ni wɔjɛɔ wɔsɔmɔɔ lɛ yɛ shihilɛi ni mli wawai amli lɛ nɔ.—Heb. 6:10.

21. Mɛni baaye abua wɔ ni wɔhe wɔye waa akɛ, Yehowa baaye ebua wɔ ekɔɔɔ he eko nɔ ni wɔkɛbaakpe?

²¹ Bɔ fɛɛ bɔ ni fee lɛ, wɔbaaya nɔ wɔkɛ shihilɛi ni mli wawai akpe yɛ naagbee gbii nɛɛ amli, ni nibii amli baanyɛ awo wu po. (2 Tim. 3:​1, 13) Shi esaaa akɛ wɔyeɔ wɔtsui fe nine. Kaimɔ nɔ ni Yehowa kɛɛ ewebii lɛ yɛ Hagai gbii lɛ amli lɛ. Ekɛɛ amɛ akɛ: “Mikɛ nyɛ yɛ . . . Nyɛkashea gbeyei.” (Hag. 2:​4, 5) Wɔ hu wɔbaanyɛ wɔhe wɔye akɛ, Yehowa baaya nɔ eye ebua wɔ kɛ́ wɔtee nɔ wɔfee nɔ fɛɛ nɔ ni wɔbaanyɛ kɛfee esuɔmɔnaa nii. Kɛ́ wɔkɛ nibii ni wɔkase yɛ gbalɛi ni Yehowa kɛhã Hagai kɛ Zakaria, kɛ nɔkwɛmɔnɔ ni Ezra fee lɛ mli lɛ tsu nii lɛ, wɔbaanyɛ wɔhe wɔye waa akɛ, ekɔɔɔ he eko nɔ ni baaba lɛ, Yehowa baaye ebua wɔ.