1-2. Mɛni gbalɔ Hagai gba akɛ ebaaya nɔ yɛ wɔbei nɛɛ amli?

 BE NI shikpɔŋhosomɔ ko ba yɛ Nepal yɛ afi 2015 lɛ, naa nɔ ni mɛi komɛi wie. Mɔ ko wie akɛ: “Shwapoi lɛ kɛ tsũi memeji lɛ kumɔ amɛshwie shi yɛ minitii fioo pɛ mli.” Mɔ ko hu wie akɛ: “Mɔ fɛɛ mɔ tsui fã. Mɛi pii kɛɛ eye aaafee minitii enyɔ. Shi mi lɛ, efee mi tamɔ nɔ ni eye ŋmɛlɛtswai babaoo.” Kɛ́ okɛ shihilɛ ni hãa mɔ tsui fãa tamɔ nɛkɛ kpe lɛ, ekã shi faŋŋ akɛ ohiɛ kpaŋ nɔ kɔkɔɔkɔ.

² Ŋmɛnɛ hu lɛ, nɔ ko ehã jeŋmaji lɛ fɛɛ miihoso, ni enɛ etee nɔ afii babaoo. Gbalɔ Hagai gba hosomɔ nɛɛ he sane efɔ̃ shi. Ewie akɛ: “Nɔ ni Yehowa, taiatsɛ lɛ, kɛɛ nɛ, ‘Eshwɛ shi kome ekoŋŋ​—etsɛŋ kwraa​—ni mahoso ŋwɛi kɛ shikpɔŋ kɛ ŋshɔ kɛ shikpɔŋ gbiŋ.’”​—Hag. 2:6.

3. Mɛɛ gbɛ nɔ esoro hosomɔ ni Hagai wie he lɛ yɛ shikpɔŋhosomɔ diɛŋtsɛ he?

³ Kɛ́ shikpɔŋ hoso lɛ, nii ahiɛ pɛ ekpãtãa; shi jeee nakai eji yɛ hosomɔ ni Hagai wie he lɛ gbɛfaŋ. No lɛ, nibii kpakpai ni jɛɔ mli kɛbaa. Yehowa diɛŋtsɛ wie akɛ: “Mahoso jeŋmaji lɛ fɛɛ, ni jeŋmaji lɛ fɛɛ anibii ni jara wala lɛ baaba; ni mikɛ anunyam baawo shĩa nɛɛ obɔ.” (Hag. 2:7) Te gbalɛ nɛɛ ba mli ehã tɛŋŋ yɛ Hagai beiaŋ? Ni te ebaa mli ehãa tɛŋŋ yɛ wɔbei nɛɛ amli? Wɔbaahã sanebimɔi nɛɛ ahetoo, ni agbɛnɛ hu, wɔkwɛ bɔ ni wɔbaafee wɔná nitsumɔ ni atsuɔ kɛhosoɔ jeŋmaji lɛ ŋmɛnɛ lɛ mli gbɛfaŋnɔ.

4. Mɛni ba ni Yehowa tsu gbalɔ Hagai akɛ eyawo ewebii lɛ hewalɛ?

⁴ Yehowa kɛ nitsumɔ ko ni he hiaa waa wo gbalɔ Hagai dɛŋ. Susumɔ nɔ ni tee nɔ dani Yehowa tsu lɛ lɛ he okwɛ. Yɛ afi 537 D.Ŋ.B. lɛ, Yudafoi komɛi ku amɛsɛɛ kɛjɛ nomŋɔɔ mli yɛ Babilon kɛba Yerusalem, ni eeenyɛ efee akɛ Hagai fata amɛhe kɛba. Be ni amɛbashɛ shi lɛ sɛɛ etsɛɛɛ lɛ, amɛbɔi Yehowa shĩa lɛ maa, ni eyeee be ko ni amɛtswa efaneshi lɛ amɛgbe naa. (Ezr. 3:8, 10) Shi no sɛɛ etsɛɛɛ lɛ, nɔ ko ni yɔɔ dɔlɛ ba. Ate shi awo Yehowa tsuji anɔkwafoi nɛɛ, ni no hã amɛnijiaŋ je wui ni amɛkpa sɔlemɔ shĩa lɛ maa. (Ezr. 4:4; Hag. 1:1, 2) No hewɔ lɛ yɛ afi 520 D.Ŋ.B. lɛ, Yehowa kɛ nitsumɔ wo Hagai dɛŋ akɛ eyawo ewebii lɛ hewalɛ koni amɛtsa sɔlemɔ shĩa lɛ maa nɔ ni amɛgbe nitsumɔ lɛ naa. *​—Ezr. 6:14, 15.

5. Mɛni Hagai wie yɛ esane lɛ mli ni eeenyɛ efee akɛ no wo Nyɔŋmɔ webii lɛ hewalɛ?

⁵ Sane ni Hagai yakɛɛ Yehowa webii lɛ wo amɛ hewalɛ ni amɛkɛ amɛhiɛ afɔ̃ Yehowa nɔ. Gbalɔ lɛ kɛ ekãa kɛɛ Yudafoi ni nijiaŋ eje wui lɛ akɛ: “‘Nyɛwajea nyɛhe, nyɛ shikpɔŋ lɛ nɔ bii fɛɛ, ní nyɛtsua nii,’ Yehowa kɛɛ. ‘Ejaakɛ mikɛ nyɛ yɛ,’ Yehowa, taiatsɛ lɛ kɛɛ.” (Hag. 2:4) Ŋwanejee ko bɛ he akɛ, wiemɔ ni ji “Yehowa taiatsɛ lɛ,” wo Yudafoi lɛ hewalɛ waa. Yehowa yɛ ŋwɛibɔfoi asraafoi babaoo yɛ eshishi, no hewɔ lɛ kɛ́ Yudafoi lɛ miitao amɛgbe amɛnitsumɔ lɛ naa lɛ, belɛ esa akɛ amɛkɛ amɛhiɛ afɔ̃ enɔ.

6. Mɛni baajɛ hosomɔ ni Hagai gba efɔ̃ shi lɛ mli kɛba?

⁶ Yehowa kɛ emumɔ lɛ tsirɛ Hagai ni ekɛɛ Yudafoi lɛ akɛ, ebaahoso jeŋmaji lɛ fɛɛ. Sane nɛɛ wo Yudafoi ni nijiaŋ eje wui ni amɛkpa Yehowa sɔlemɔ shĩa lɛ maa lɛ hewalɛ. Ehã amɛna akɛ, Yehowa baahoso maji fɛɛ ni yɔɔ Persia nɔyeli lɛ, ni ji jeŋ hewalɛ ni yɔɔ yɛ nakai beiaŋ lɛ, shishi lɛ. Mɛni baajɛ hosomɔ nɛɛ mli kɛba? Klɛŋklɛŋ lɛ, Nyɔŋmɔ webii lɛ baama sɔlemɔ shĩa lɛ amɛgbe naa. No sɛɛ lɛ, mɛi ni jeee Yudafoi po baaba amɛbafata amɛhe ni amɛjá Yehowa yɛ nakai sɔlemɔ shĩa lɛ mli. Ŋwanejee ko bɛ he akɛ, sane nɛɛ wo Nyɔŋmɔ webii lɛ hewalɛ waa!​—Zak. 8:9.

7. Mɛɛ nitsumɔ wɔtsuɔ ŋmɛnɛ ni miihoso je lɛ? Ni mɛni hewɔ okɛɔ nakai?

⁷ Mɛɛ gbɛ nɔ Hagai gbalɛ lɛ baa mli ŋmɛnɛ? Shi kome ekoŋŋ lɛ, Yehowa miihoso jeŋmaji lɛ fɛɛ, ni bianɛ lɛ, wɔmiitsu nɔ ko kɛmiiye wɔmiibua lɛ ni efee nakai. Susumɔ sane nɛɛ he okwɛ: Yɛ afi 1914 lɛ, Yehowa wó Yesu Kristo akɛ E-ŋwɛi Maŋtsɛyeli lɛ nɔ Maŋtsɛ. (Lala 2:6) Be ni ato Maŋtsɛyeli lɛ shishi lɛ, ebafee faŋŋ akɛ je lɛŋ nɔyelɔi lɛ yɛ sane mli. Mɛni hewɔ? Ejaakɛ no tsɔɔ akɛ “jeŋmaji lɛ abei ni ato lɛ,” ni ji bei ni maŋtsɛ ko bɛ ni ta Yehowa maŋtsɛ sɛi lɛ nɔ lɛ, eba naagbee. (Luka 21:24) Enɛ hewɔ lɛ, Yehowa webii lɛ miikɛɛ mɛi fɛɛ akɛ, Nyɔŋmɔ Maŋtsɛyeli lɛ pɛ baanyɛ atsu adesai anaagbai fɛɛ ahe nii, ni amɛbɔi nakai feemɔ titri lɛ kɛjɛ afi 1919. “Maŋtsɛyeli lɛ he sane kpakpa” nɛɛ ni amɛshiɛɔ lɛ ehoso je lɛ fɛɛ.​—Mat. 24:14.

8. Tamɔ bɔ ni awie yɛ Lala 2:1-3 lɛ, te jeŋmaji babaoo efee amɛnii amɛhã tɛŋŋ yɛ sane ni wɔshiɛɔ lɛ he?

⁸ Te mɛi efee amɛnii amɛhã tɛŋŋ yɛ sane nɛɛ he? Mɛi pii ete shi amɛwo. (Kanemɔ Lala 2:1-3.) Jeŋmaji lɛ efee hoo, ni tsɔɔ akɛ amɛmli efu. Amɛsumɔɔɔ ni Maŋtsɛ ni  Yehowa ehala lɛ aye amɛnɔ. Amɛnaaa Maŋtsɛyeli lɛ he sane ni wɔshiɛɔ lɛ akɛ “sane kpakpa.” Nɔyelii komɛi po etsĩ shiɛmɔ nitsumɔ lɛ naa! Nɔyelɔi nɛɛ pii kɛɛ amɛjáa Nyɔŋmɔ, shi amɛsumɔɔɔ ni amɛŋmɛɔ hegbɛ ni amɛyɔɔ lɛ he koni Nyɔŋmɔ aye amɛnɔ. Nɔyelɔi ni yɔɔ ŋmɛnɛ lɛ teɔ shi amɛwoɔ mɔ ni Yehowa efɔ lɛ mu lɛ, ni amɛwaa esɛɛnyiɛlɔi anɔkwafoi lɛ ayi tamɔ bɔ ni nɔyelɔi lɛ fee yɛ Yesu beiaŋ lɛ pɛpɛɛpɛ.​—Bɔf. 4:25-28.

9. Mɛni Yehowa kɛɔ jeŋmaji lɛ yɛ amɛmli ni efu lɛ hewɔ?

⁹ Mɛni Yehowa kɛɔ jeŋmaji lɛ yɛ amɛmli ni efu lɛ hewɔ? No ji nɔ ni wɔnaa yɛ Lala 2:10-12 lɛ. Jɛmɛ kɛɔ akɛ: “No hewɔ lɛ, agbɛnɛ, nyɛ maŋtsɛmɛi, nyɛyoa nii asɛɛ; nyɛ shikpɔŋ lɛ nɔ kojolɔi, nyɛhãa ajajea nyɛ. Nyɛsɔmɔa Yehowa kɛ gbeyeishemɔ, nyɛmii ashɛa nyɛhe waa, shi nyɛkwɛa jogbaŋŋ. Nyɛkɛ woo ahãa bi lɛ, kɛjeee nakai lɛ Nyɔŋmɔ mli baafu ni abaakpãtã nyɛhiɛ yɛ gbɛ lɛ nɔ, ejaakɛ Nyɔŋmɔ mlifu lɛ baa oya. Mɛi fɛɛ ni baa lɛ abo lɛ yɛ miishɛɛ.” Akɛni Yehowa mli hi hewɔ lɛ, ehã mɛi fɛɛ ni teɔ shi amɛwoɔ sane ni wɔshiɛɔ lɛ be ni amɛtsake amɛtsui ni amɛfi e-Maŋtsɛyeli lɛ sɛɛ. Shi be ni eshwɛ lɛ faaa dɔŋŋ, ejaakɛ “naagbee gbii” lɛ amli wɔyɔɔ lɛ. (2 Tim. 3:1; Yes. 61:2) No hewɔ lɛ, amrɔ nɛɛ ji be ni ehe miihia waa ni mɛi atao anɔkwale lɛ ni amɛbasɔmɔ Yehowa.

10. Mɛɛ gbɛ nɔ mfonirifeemɔŋ hosomɔ ni awie he yɛ Hagai 2:7-9 lɛ ená mɛi anɔ hewalɛ kpakpa?

¹⁰ Mfonirifeemɔŋ hosomɔ ni Hagai gba efɔ̃ shi lɛ ená mɛi komɛi anɔ hewalɛ kpakpa. Hagai wie akɛ, “jeŋmaji lɛ fɛɛ anibii ni jara wala lɛ,” ni ji mɛi ni hiɛ tsui kpakpa lɛ, baaba amɛbajá Yehowa. * (Kanemɔ Hagai 2:7-9.) Yesaia kɛ Mika gba akɛ nɔ ko tamɔ nakai baaya nɔ “yɛ naagbee gbii lɛ amli.”​—Yes. 2:2-4, shn.; Mika 4:1, 2, shn.

11. Klɛŋklɛŋ be ni nyɛmi nuu ko nu Maŋtsɛyeli lɛ he sane lɛ, mɛni efee?

 ¹¹ Naa bɔ ni sane ni ashiɛɔ ni ehoso shikpɔŋ lɛ fɛɛ lɛ ná nyɛmi nuu ko ni atsɛɔ lɛ Ken ni sɔmɔɔ yɛ nitsumɔhe yitso lɛ nɔ hewalɛ ehã. Ekaiɔ bɔ ni enu he ehã be ni enu Maŋtsɛyeli lɛ he sane lɛ klɛŋklɛŋ kwraa aaafee afii 40 ni eho nɛ. Ewie akɛ: “Be ni ajɛ Nyɔŋmɔ Wiemɔ lɛ mli atsɔɔ mi anɔkwale lɛ klɛŋklɛŋ kwraa ni miná mile akɛ wɔyɛ naagbee gbii lɛ amli lɛ, miná miishɛɛ waa. Mina akɛ kɛ́ miitao Nyɔŋmɔ aná mihe miishɛɛ, ni mahi shi kɛya naanɔ lɛ, belɛ esa akɛ maje jeŋ ni hiɛ yaakpãtã nɛɛ mli ni maba Yehowa masɛi. Misɔle mihã Yehowa ni mifee nakai amrɔ nɔŋŋ. Mitsi mihe kwraa kɛje je lɛ he, ni mikɛ mihe yadɔmɔ Nyɔŋmɔ Maŋtsɛyeli lɛ ni anyɛŋ ahoso kɔkɔɔkɔ lɛ.”

12. Mɛɛ gbɛ nɔ Yehowa kɛ anunyam ewo mfonirifeemɔŋ sɔlemɔ shĩa lɛ obɔ yɛ naagbee gbii nɛɛ amli?

¹² Wɔmiina faŋŋ akɛ, Yehowa miijɔɔ ewebii lɛ. Akɛ nɔkwɛmɔnɔ lɛ, yɛ naagbee gbii nɛɛ amli lɛ, mɛi ni jáa lɛ lɛ ayi efa waa. Yɛ afi 1914 lɛ, no mli lɛ wɔyi fa fioo fe akpei enumɔ. Shi ŋmɛnɛ lɛ, wɔyi fa fe akpekpei kpaanyɔ, ni mɛi akpekpei abɔ bafataa wɔhe kɛhã Kaimɔ lɛ daa afi. Yehowa miitsɔ shiɛmɔ nitsumɔ lɛ nɔ eehã mfonirifeemɔŋ sɔlemɔ shĩa lɛ kpoi lɛ miiyi obɔ kɛ “jeŋmaji lɛ fɛɛ anibii ni jara wala lɛ.” Mfonirifeemɔŋ sɔlemɔ shĩa lɛ ji gbɛjianɔ ni anɔkwa Nyɔŋmɔ lɛ eto akɛ atsɔ nɔ ajá lɛ lɛ. Bɔ ni mɛi hei ni baa anɔkwale lɛ mli lɛ tsakeɔ amɛsubaŋ ni amɛwoɔ subaŋ hee lɛ hãa awoɔ Yehowa gbɛ́i lɛ hiɛ nyam.​—Efe. 4:22-24.

13. Mɛɛ gbalɛi krokomɛi hiɛyaa nɛɛ ehã eba mli? (Kwɛmɔ mfoniri ni yɔɔ wolo lɛ hiɛ lɛ.)

¹³ Hiɛyaa nɛɛ ehã gbalɛi krokomɛi hu eba mli, tamɔ gbalɛi ni yɔɔ Yesaia yitso 60 lɛ nɛkɛ. Ekuku 22 lɛ kɛɛ: “Mɔ bibioo lɛ baatsɔ mɛi akpe ni mɔ fioo lɛ baatsɔ maŋ ni he wa. Kɛ́ eshɛ ebe lɛ, mi, Yehowa, mafee lɛ oya.” Bɔ ni mɛi keɔ kɛbaa anɔkwa jamɔ lɛ mli lɛ ehã nɔ ko ni sa kadimɔ hu miiya nɔ. Mɛi nɛɛ, ni ji  “jeŋmaji lɛ fɛɛ anibii ni jara wala lɛ,” kɛ hesai srɔtoi baa, ni amɛkɛ miishɛɛ yeɔ amɛbuaa kɛshiɛɔ “Maŋtsɛyeli lɛ he sane kpakpa” lɛ. Tamɔ bɔ ni gbalɔ Yesaia wie yɛ gbalɛ kroko mli lɛ, Yehowa ehã ewebii lɛ miinu ‘jeŋmaji lɛ amliki.’ (Yes. 60:5, 16) Mɛi ni jara wa nɛɛ miiye amɛmiibua ni aashiɛ yɛ maji 240 anɔ, ni aakala woji yɛ wiemɔi fe akpe mli.

14. Mɛni esa akɛ mɔ fɛɛ mɔ afee amrɔ nɛɛ?

¹⁴ Yɛ naagbee gbii nɛɛ amli lɛ, hosomɔ ni ahosoɔ jeŋmaji lɛ ehã sɔ̃ ebakã mɔ fɛɛ mɔ nɔ akɛ ekpɛ eyiŋ yɛ nɔ ni ebaafee he; kɛji ebaafi Nyɔŋmɔ Maŋtsɛyeli lɛ sɛɛ jio, ebaafi je nɛŋ nɔyelii lɛ asɛɛ jio. Eyɛ mli akɛ Yehowa webii boɔ mlai ni nɔyeli lɛ ewo yɛ he ni amɛyɔɔ lɛ toi moŋ, shi amɛkɛ amɛhe wooo pɔlitis kɛ maŋ saji amli. (Rom. 13:1-7) Amɛle akɛ, Maŋtsɛyeli lɛ pɛ baanyɛ atsu adesai anaagbai fɛɛ ahe nii, ni nakai Maŋtsɛyeli lɛ fataaa jeŋ nɛɛ he.​—Yoh. 18:36, 37.

15. Mɛɛ kaa ni mli wa awie yɛ Kpojiemɔ wolo lɛ mli akɛ wɔkɛbaakpe?

¹⁵ Kpojiemɔ wolo lɛ wieɔ kaa ni abaaka Nyɔŋmɔ webii lɛ yɛ naagbee gbii lɛ amli lɛ he. Enɛ tsɔɔ akɛ, abaaya nɔ ate shi awo wɔ waa, ni abaawa wɔyi. Je lɛŋ nɔyelɔi lɛ baanyɛ wɔnɔ ni wɔfi amɛsɛɛ ni wɔbo amɛ toi moŋ fe Nyɔŋmɔ, ni kɛ́ wɔkɛɛ wɔfeee lɛ, amɛbaawa wɔyi. (Kpo. 13:12, 15) Amɛbaanyɛ “gbɔmɛi fɛɛ​—mɛi bibii kɛ mɛi wuji, niiatsɛmɛi kɛ ohiafoi, mɛi ni jeee nyɔji kɛ nyɔji​—anɔ akɛ amɛkpɛlɛ ni akadi amɛ yɛ amɛninejurɔ nɔ loo yɛ amɛhiɛnai.” (Kpo. 13:16) Yɛ blema lɛ, akadiɔ nyɔji koni ana mɔ ni nyɔŋ ni amɛji. Nakai nɔŋŋ yɛ wɔbei nɛɛ amli lɛ, je lɛŋ nɔyelɔi lɛ baakpa gbɛ akɛ mɔ fɛɛ mɔ baakpɛlɛ ni akadi lɛ yɛ enine he loo yɛ ehiɛnaa. Nɔ ni enɛ tsɔɔ ji akɛ, amɛbaakpa gbɛ akɛ wɔkɛ wɔsusumɔi kɛ wɔnifeemɔi baatsɔɔ akɛ wɔfiɔ amɛsɛɛ.

16. Mɛni hewɔ amrɔ nɛɛ ji be ni esa akɛ wɔpɛi wɔshihilɛ mli ni wɔkwɛ ni wɔye Yehowa anɔkwa yɛ nibii bibii po amli?

¹⁶ Ani wɔkɛ wɔsusumɔi kɛ wɔnifeemɔi baatsɔɔ akɛ wɔfiɔ je lɛŋ nɔyelɔi lɛ asɛɛ, aloo wɔbaahã ana akɛ wɔfiɔ Nyɔŋmɔ Maŋtsɛyeli lɛ sɛɛ? Mɛi ni fiii je lɛŋ nɔyelɔi lɛ asɛɛ lɛ baana nɔ ni amɛwala baayaje oshãra mli. Kpojiemɔ wolo lɛ wie akɛ: “Mɔ ko mɔ ko nyɛŋ ahé nii loo ehɔ̃ɔ nii, akɛ ja mɔ ni yɔɔ okadi lɛ . . . pɛ.” (Kpo. 13:17) Kpojiemɔ 14:9, 10 lɛ hãa wɔleɔ nɔ ni baaba mɛi ni yɔɔ okadi lɛ anɔ. Enɛ hewɔ lɛ, wɔkpɛlɛŋ ni akadi wɔ, shi moŋ wɔkɛ wɔnifeemɔ baatsɔɔ akɛ yɛ mfonirifeemɔŋ lɛ, wɔŋma yɛ wɔnine he akɛ, “Yehowa nii ji mi.” (Yes. 44:5) Kɛ́ nakai ni lɛ, te esa akɛ wɔhi shi wɔhã tɛŋŋ amrɔ nɛɛ? Esa akɛ wɔpɛi wɔshihilɛ mli ni wɔkwɛ ni wɔye Yehowa anɔkwa yɛ nibii bibiibibii po amli. Kɛ́ wɔfee nakai lɛ, ebaaŋɔɔ Yehowa naa waa akɛ ebaakɛɛ akɛ enii ji wɔ!

17. Mɛni esa akɛ wɔhã ehi wɔjwɛŋmɔ mli be fɛɛ be yɛ Yehowa tsui shi ni eto lɛ he?

¹⁷ Yehowa eto etsui shi waa yɛ naagbee gbii nɛɛ amli, ejaakɛ esumɔɔɔ akɛ akpãtã mɔ ko mɔ ko hiɛ. (2 Pet. 3:9) Ehã mɔ fɛɛ mɔ hegbɛ akɛ etsake etsui ni ekpɛ eyiŋ akɛ ebaasɔmɔ lɛ. Shi etsɛŋ, etsuishitoo lɛ baaba naagbee, ni mɛi ni eŋɔɔɔ hegbɛ lɛ ni amɛbaatsake amɛtsui lɛ baayaje shihilɛ ni Farao ni hi shi yɛ Mose beiaŋ lɛ yaje mli lɛ nɔŋŋ mli. Yehowa kɛɛ Farao akɛ: “Kulɛ, benɛ nɛɛ mikpã minine mli mihã hela ko ni naa wa waa emɔ bo kɛ omaŋbii lɛ, ni kulɛ, benɛ nɛɛ akpãtã ohiɛ kɛje shikpɔŋ lɛ nɔ momo. Shi nɔ tuuntu hewɔ ní mihã otee nɔ ohi wala mli lɛ nɛ: koni majie mihewalɛ lɛ kpo matsɔɔ bo,  ní ajaje migbɛ́i lɛ atsɔɔ yɛ shikpɔŋ lɛ nɔ fɛɛ.” (2 Mo. 9:15, 16) Etsɛŋ, shikpɔŋ lɛ nɔ jeŋmaji lɛ fɛɛ baaná amɛle akɛ, Yehowa ji anɔkwa Nyɔŋmɔ kome lɛ. (Eze. 38:23) Mɛɛ gbɛ nɔ Yehowa baatsɔ ehã amɛle enɛ?

18. (a) Mɛɛ hosomɔ kroko awie he yɛ Hagai 2:6, 20-22 lɛ? (b) Te wɔfeɔ tɛŋŋ wɔleɔ akɛ Hagai wiemɔi lɛ baaba mli ekoŋŋ wɔsɛɛ?

¹⁸ Be ni Hagai gbo lɛ sɛɛ afii pii lɛ, Yehowa kɛ emumɔ lɛ tsirɛ bɔfo Paulo ni etsɔɔ akɛ wiemɔi ni yɔɔ Hagai 2:6, 20-22 lɛ baaba mli ekoŋŋ wɔsɛɛ. (Kanemɔ.) Paulo wie akɛ: “Amrɔ nɛɛ ewo shi akɛ: ‘Shi mahoso shikpɔŋ lɛ shi kome ekoŋŋ, ni jeee shikpɔŋ lɛ kɛkɛ, shi ŋwɛi hu.’ Agbɛnɛ, wiemɔ ni ji ‘shi kome ekoŋŋ’ lɛ tsɔɔ akɛ abaajie nibii ni ahosoɔ lɛ kɛya, nibii ni afee lɛ, bɔ ni afee ni nibii ni hosooo lɛ ahi shi.” (Heb. 12:26, 27) Esoro hosomɔ nɛɛ yɛ hosomɔ ni awie he yɛ Hagai 2:7 lɛ he, ejaakɛ sɛɛkpee hosomɔ nɛɛ kɛ hiɛkpatamɔ baaba mɛi fɛɛ ni feɔ amɛnii tamɔ Farao ni amɛkpɛlɛɛɛ Yehowa nɔ akɛ amɛ-Nɔyelɔ lɛ anɔ.

19. Mɛni hosoŋ? Ni te wɔfeɔ tɛŋŋ wɔleɔ nakai?

¹⁹ Mɛni hosoŋ loo ajieŋ kɛyaŋ? Paulo tsa nɔ akɛ: “Akɛni wɔna akɛ wɔnine baashɛ Maŋtsɛyeli ko ni anyɛŋ ahoso nɔ hewɔ lɛ, nyɛhãa wɔyaa nɔ wɔnáa dromɔ lɛ, nɔ ni wɔbaatsɔ nɔ wɔkɛ Nyɔŋmɔ gbeyeishemɔ kɛ woo aŋɔ sɔɔmɔ krɔŋŋ wɔhã Nyɔŋmɔ bɔ ni sa ehiɛ lɛ.” (Heb. 12:28) Kɛ́ naagbee hosomɔ kpeteŋkpele lɛ ba naagbee lɛ, Nyɔŋmɔ Maŋtsɛyeli lɛ pɛ ni ebaashwɛ, ni ebaadamɔ shi kɛya naanɔ!​—Lala 110:5, 6; Dan. 2:44.

20. Mɛɛ sane esa akɛ mɛi akpɛ amɛyiŋ yɛ he? Ni te wɔbaafee tɛŋŋ wɔye wɔbua amɛ ni amɛkpɛ yiŋ ni ja lɛ?

²⁰ Be bɛ dɔŋŋ! Esa akɛ mɛi akpɛ amɛyiŋ kɛji amɛbaaya nɔ amɛfi je nɛɛ sɛɛ ni amɛhiɛ akpãtã, loo amɛbaafee nɔ ni Yehowa sumɔɔ koni amɛhi shi kɛya naanɔ. (Heb. 12:25) Sane ni wɔshiɛɔ lɛ baanyɛ aye abua mɛi ni amɛkpɛ yiŋ ni ja yɛ sane ni he hiaa waa nɛɛ he. No hewɔ lɛ, nyɛhãa wɔyea wɔbuaa mɛi pii ni amɛbasɔmɔ Yehowa ni amɛfi e-Maŋtsɛyeli lɛ sɛɛ. Ni nyɛhãa nɔ ni wɔ-Nuŋtsɔ Yesu wie lɛ ahia wɔjwɛŋmɔ mli be fɛɛ be. Ewie akɛ: “Abaashiɛ Maŋtsɛyeli lɛ he sane kpakpa nɛɛ yɛ shikpɔŋ lɛ nɔ fɛɛ koni akɛye jeŋmaji lɛ fɛɛ odase, ni no sɛɛ lɛ naagbee lɛ baaba.”​—Mat. 24:14.