Wala Shihilɛ He Sane

Ní Aaaha Shihilɛ Afee Mlɛo Koni Anyɛ Asɔmɔ Yehowa

TAAKƐ CLARA GERBER MOYER GBA

Miye afii 92 ni minyɛɛɛ manyiɛ jogbaŋŋ, shi minyɛɔ mikaiɔ nii jogbaŋŋ lolo. Kwɛ bɔ ni midaa shi akɛ miná hegbɛ akɛ masɔmɔ Yehowa kɛjɛ migbekɛbiiashi! Shihilɛ ni yɔɔ mlɛo, ni bɛ hwanyaŋŋ mli ni mihi lɛ eye ebua mi waa diɛŋtsɛ kɛha nakai jwetri lɛ.

AFƆ́ mi yɛ August 18, 1907, yɛ Alliance, Ohio, U.S.A., ni mi ji gbekɛbii enumɔ lɛ ateŋ onukpa. Beni miye afii kpaanyɔ lɛ, be-fɛɛ shiɛlɔ ko ni fata Biblia Kaselɔi lɛ ahe, taakɛ atsɛɔ Yehowa Odasefoi yɛ nakai beaŋ lɛ, ta baisikel nɔ kɛba he ni wɔlɛɔ tsinai yɛ lɛ. Ekɛ minyɛ Laura Gerber kpe, yɛ shinaa lɛ naa ni ebi kɛji ele nɔ hewɔ ni aŋmɛ efɔŋfeemɔ gbɛ lɛ. Awo esusu sane nɛɛ he aahu.

Be mli ni ekɛ Ataa ni etee aboŋo lɛ mli lɛ eyasusu he sɛɛ lɛ, Awo shɛ Studies in the Scriptures wolo kpoi ekpaa lɛ. Ekase enɛɛmɛi fɛɛ ní eshiii eko, kɛkɛ ni Biblia mli anɔkwalei ni ekaseɔ lɛ ná enɔ hewalɛ waa. Ekase The New Creation wolo Kpo ni ji 6 lɛ, ni enu bɔ ni ehe hiaa akɛ Kristofoi aná nu mli baptisimɔ lɛ shishi jogbaŋŋ. Eyɛ mli akɛ eji March nyɔŋ lɛ nɔ yɛ afi 1916 mli ni fɛi miiye moŋ, shi akɛni eleee bɔ ni eeefee ena Biblia Kaselɔi lɛ hewɔ lɛ, ebi ni Ataa abaptisi lɛ yɛ faa bibioo ko ni hoɔ yɛ ŋmɔ lɛ mli lɛ mli.

Etsɛɛɛ tsɔ ni Awo na adafitswaa ko yɛ adafitswaa wolo lɛ mli ni miitswa wiemɔ ko ni abaaha yɛ Daughters of Veterans Hall yɛ Alliance lɛ he adafi. Wiemɔ lɛ yitso ji “The Divine Plan of the Ages.” (Nyɔŋmɔ Gbɛjianɔ ni Eto Kɛha Bei Lɛ) Ekpɛlɛ nɔ amrɔ nɔŋŋ, akɛni Studies in the Scriptures Kpo 1 lɛ hiɛ saneyitso ni tamɔ wiemɔ lɛ nɔŋŋ hewɔ. Agbala shwiili ni okpɔŋɔ gbalaa lɛ atsa, ni weku muu lɛ fɛɛ tee wɔ klɛŋklɛŋ kpee kɛtsɔ okpɔŋɔ kɛ shwiili lɛ nɔ. Kɛjɛ nakai beaŋ kɛyaa lɛ, wɔyaa kpeei daa Hɔgbaa kɛ daa Shɔ gbɛkɛ  yɛ nyɛmimɛi lɛ ashiai amli. Be fioo ko sɛɛ lɛ, Kristofoi asafo lɛ najiaŋdamɔlɔ ko baptisi Awo ekoŋŋ. Ataa, ní daa nɛɛ ebɛ dekã kɛ ŋmɔ shi nitsumɔ lɛ, ná Biblia lɛ kasemɔ he miishɛɛ ni yɛ naagbee, yɛ afii fioo komɛi asɛɛ lɛ abaptisi lɛ hu.

Mɛi ni Nyiɛɔ Hiɛ lɛ ni Wɔkɛaakpe

Yɛ June 10, 1917 lɛ, J. F. Rutherford, ni no mli lɛ eji Buu Mɔɔ Asafo lɛ sɛinɔtalɔ lɛ, basara Alliance ni ebaaha wiemɔ ni ji “Mɛni Hewɔ Jeŋmaji lɛ Wuɔ Ta?” lɛ. No mli lɛ miye afii nɛɛhu ni mikɛ mifɔlɔi kɛ minyɛmimɛi hii, Willie kɛ Charles tee. Wɔná toibolɔi ayifalɛ ni sa ni fa fe oha. Yɛ Nyɛminuu Rutherford wiemɔ lɛ sɛɛ lɛ, mɛi ni ba lɛ ateŋ mɛi babaoo sha mfoniri yɛ Columbia Theater lɛ kpo lɛ nɔ, heni eha ewiemɔ lɛ yɛ lɛ. Yɛ otsi ni nyiɛ sɛɛ lɛ mli lɛ, A. H. Macmillan ha wiemɔ ni yitso ji “God’s Coming Kingdom” (Nyɔŋmɔ Maŋtsɛyeli Ni Baa) lɛ yɛ jɛmɛ nɔŋŋ. Eji hegbɛ ni wɔná akɛ nɛkɛ nyɛmimɛi nɛɛ ebasara wɔmaŋ bibioo nɛɛ.

Mra Be Mli Kpeei ni Sa Kaimɔ

Klɛŋklɛŋ kpee ni mitee lɛ ji afi 1918 nɔ̃ lɛ yɛ Atwater, Ohio, kilomitai fioo ko kɛjɛ Alliance. Awo bi Asafo lɛ najiaŋdamɔlɔ ni yɔɔ jɛmɛ lɛ kɛji mida bɔ ni sa kɛha baptisimɔ. Minu he akɛ mijɔɔ mihe nɔ yɛ gbɛ ni ja nɔ miha Nyɔŋmɔ akɛ mafee esuɔmɔnaa nii, no hewɔ lɛ aŋmɛ gbɛ koni abaptisi mi nakai gbi lɛ yɛ faa ko ni bɛŋkɛ blɔfo gowa tso agbo ko masɛi lɛ mli. Miyatsake mitadei lɛ yɛ buu ko ni nyɛmimɛi lɛ efee kɛha nakai nifeemɔ lɛ mli, kɛkɛ ni abaptisi mi yɛ gbɛkɛnaashi atade momo ko ni mli ti lɛ mli.

Yɛ September 1919 mli lɛ, mikɛ mifɔlɔi ta oketeke mli kɛfo Lake Erie kɛtee Sandusky, yɛ Ohio. Jɛmɛ wɔyawo lɛlɛ ko yɛ, ni yɛ be kukuoo mli lɛ, wɔyashɛ Cedar Point heni afee wɔ kpeei ni sa kaimɔ lɛ yɛ lɛ. Beni wɔyi shi kɛjɛ lɛlɛ lɛ mli lɛ, no mli lɛ shwane niyelihe bibioo ko yɛ lɛjiadaamɔhe lɛ. Miyahe hamburger, ni ji nɔ ko ni misumɔɔ waa diɛŋtsɛ yɛ nakai beaŋ lɛ. Eŋɔɔ waa diɛŋtsɛ! Yibɔ ni fe fɛɛ ni aná kɛha wɔgbii kpaanyɔ kpeei lɛ ji 7,000. Akɛni tsɔne ni awieɔ awoɔ mli lɛ eko bɛ hewɔ lɛ, ebiɔ ni mata shi diŋŋ koni mabo sane lɛ toi jogbaŋŋ.

Ajie Buu Mɔɔ hefatalɔ ni yitso ji The Golden Age (amrɔ nɛɛ Awake!) lɛ kpo yɛ nɛkɛ kpee nɛɛ shishi. Bɔni afee ni manyɛ maya kpee lɛ, miyaaa skul yɛ klɛŋklɛŋ otsi lɛ mli, shi ehe ba sɛɛnamɔ. Cedar Point ji hejɔɔmɔhe ni afɔɔ jɛmɛ yaa waa, ni amɛyɛ nihoolɔi yɛ niyelihe lɛ ni hoɔ niyenii kɛhaa gbɔi lɛ. Shi yɛ yiŋtoo ko hewɔ lɛ, nihoolɔi kɛ okpɔlɔŋmɛlɔi lɛ kpoo akɛ amɛaatsa nitsumɔ lɛ nɔ, no hewɔ lɛ Kristofoi hii ni yɔɔ nihoomɔ he ŋaa lɛ baye amɛnajiaŋ ni amɛhoo niyenii amɛha gbɔi lɛ. Yɛ afii nyɔŋmai abɔ ni nyiɛ sɛɛ lɛ mli lɛ, Yehowa webii diɛŋtsɛ hoɔ amɛnii yɛ henaabuamɔi kɛ kpeei ashishi.

Wɔná hegbɛ hu akɛ wɔɔku wɔsɛɛ kɛya Cedar Point yɛ September 1922 mli kɛha gbii nɛɛhu kpeei ni mɛi ayibɔ ni fe fɛɛ ni ba lɛ ji 18,000. Jɛmɛ ji he ni nyɛminuu Rutherford wo wɔ hewalɛ koni “Wɔtswa, wɔtswa, wɔtswa, Maŋtsɛ lɛ kɛ emaŋtsɛyeli lɛ he adafi” lɛ yɛ. Shi kɛlɛ, mi diɛŋtsɛ misɔɔmɔ nitsumɔ lɛ je shishi kɛtsɔ dɛhiɛmɔ woji bibii lɛ kɛ The Golden Age lɛ ajaa afii babaoo kɛtsɔ hiɛ lɛ nɔ.

Hiɛsɔɔ Kɛha Sɔɔmɔ Nitsumɔ Lɛ

Mra mli yɛ afii 1918 lɛ, miná gbɛfaŋnɔ yɛ dɛhiɛmɔ wolo ni ji The Fall of Babylon lɛ ni ayajaa yɛ ŋmɔji ni ebɔle wɔhe lɛ mli lɛ mli. Yɛ fɛi lɛ hewɔ lɛ, wɔhaa tɛ ko ni yɔɔ bɔdɔɔ tamɔ samala lɛ dɔɔ yɛ stof nɔ yɛ shia, ni wɔhiɛɔ yɛ shwiili ni okpɔŋɔ gbalaa lɛ mli koni eha wɔnajiashi ahe afee kulɔkulɔ. Wɔwoɔ atadei ni wɔbuɔ faii ni mli ti, akɛni mamai ha shwiili lɛ yiteŋgbɛ kɛ ekoŋnɔgbɛ shi ebɛ nɔ ni haa tsũ mli dɔɔ lɛ hewɔ. Shi wɔmii shɛɔ wɔhe yɛ nakai beaŋ.

Yɛ afii 1920 lɛ, afee The Finished Mystery lɛ eko krɛdɛɛ ni atsɛɔ lɛ ZG, yɛ wolo tɛtrɛɛ nɔ. * Mikɛ mifɔlɔi kɛ wolo nɛɛ tee maŋ lɛ mli yɛ Alliance. Nakai beaŋ lɛ mɔ fɛɛ mɔ yaa shinaai anaa ekome, no hewɔ lɛ mikɛ gbeyeishemɔ kwɔ ablanaa ko ni mɛi babaoo tara jɛmɛ lɛ. Beni mikɛ sane ni mihiɛ lɛ eha amɛ migbe naa lɛ, yoo ko kɛɛ akɛ: “Ani jeee wiemɔ ni ŋɔɔ fioo ko eha nɛɛ,” kɛkɛ ni eŋɔ wolo lɛ. Miha ZG lɛ 13 nakai gbi lɛ, no ji gbi klɛŋklɛŋ kwraa ni mikɛ wiemɔ ni ato he gbɛjianɔ ni sɛɛ jɛkɛ ha yɛ shia kɛ shia.

 Beni miyɔɔ klas ni ji nɛɛhu lɛ, Awo ye tswetsweetswe ni ehi saa mli nɔ ni fe nyɔɔŋ kome. Minyɛmiyoo fioo Hazel ji abifao, no hewɔ lɛ mikpa skul yaa koni maye mabua kɛ ŋmɔshi nitsumɔ ní agbɛnɛ makwɛ gbekɛbii lɛ. Kɛlɛ, wɔweku lɛ kɛ hiɛdɔɔ susuɔ Biblia mli anɔkwale lɛ he, ni wɔyaa asafoŋ kpeei fɛɛ daa.

Yɛ afi 1928 mli, yɛ Kristo gbele lɛ Kaimɔ lɛ shishi lɛ, aha mɛi fɛɛ ni ba lɛ dɛhiɛmɔ wolo ko ni gbɛi ji “Where Are the Nine?” (Nɛgbɛ Mɛi Nɛɛhu lɛ Yɔɔ?) Egbála Luka 17:11-19 lɛ mli, he ni Biblia lɛ kɛɔ yɛ akɛ kpitiyelɔi nyɔŋma ni atsa amɛ lɛ ateŋ mɔ kome pɛ jɛ heshibaa mli eda Yesu shi kɛha enaakpɛɛ tsamɔ yɛ naakpɛɛ gbɛ nɔ lɛ hewɔ. No sa mitsui he. Mibi mihe akɛ, ‘Ani mihiɛ sɔɔ nii?’

Akɛni nibii miiya nɔ jogbaŋŋ yɛ shia ni miyɛ gbɔmɔtsoŋ hewalɛ ni sɔ̃ ko bɛ ni baatsi minaa hewɔ lɛ, mikpɛ miyiŋ akɛ mashi shia ni mikɛ mihe awo gbɛgbamɔ sɔɔmɔ lɛ mli, taakɛ atsɛɔ be-fɛɛ sɔɔmɔ nitsumɔ lɛ. Mifɔlɔi wo mi hewalɛ ni mafee nakai. Enɛ hewɔ lɛ, mikɛ mɔ ni akɛ lɛ fata mi he, Agnes Aleta nine shɛ wɔ nitsumɔ lɛ he woji anɔ, ni yɛ August 28, 1928 gbɛkɛ ŋmɛji 9 mli lɛ wɔyawo oketeke kɛtee. Wɔteŋ mɔ fɛɛ mɔ hiɛ gbɛfaa baagi kome kɛ baagi bibioo ni wɔkɛ wɔ Biblia kasemɔ woji baawo mli. Beni wɔyashɛ oketeke shidaamɔhe lɛ, minyɛmimɛi yei lɛ kɛ mifɔlɔi bɔi yaafo, ni wɔ hu nakai nɔŋŋ. Akɛni wɔheɔ wɔyeɔ akɛ Harmagedon ebɛŋkɛ kpaakpa hewɔ lɛ, misusu akɛ minaŋ amɛ dɔŋŋ. Enɔ jetsɛremɔ leebi lɛ, wɔyashɛ wɔ nitsumɔhe lɛ yɛ Brooksville, yɛ Kentucky.

Wɔyahai tsũ bibioo ko yɛ gbɔiatoohe ko mli ni wɔhe tsɛŋsi mli spaghetti, ni wɔfee bodobodo ni awo mli nibii hu wɔha wɔhe. Daa gbi lɛ wɔ fɛɛ wɔnyiɛɔ kɛtsɔɔ he kroko, wɔtsuɔ nii akɛ aŋkroaŋkro ni wɔhaa shiatsɛmɛi lɛ woji kpoi enumɔ kɛha tooyeli ni ji dɔlai 1.98. Fiofio lɛ wɔtsu maŋ lɛ fɛɛ mli nii, ni wɔkɛ mɛi babaoo ni yɔɔ Biblia lɛ he miishɛɛ waa lɛ gba sane.

Beni shɛɔ nyɔji etɛ lɛ, wɔtee mɔ fɛɛ mɔ ni yɔɔ Brooksville kɛ ehewɔ lɛ ŋɔɔ aahu kɛyashi Augusta tɔŋŋ. No hewɔ lɛ wɔtee wɔhiɛ ni wɔyatsu Maysville, Paris, kɛ Richmond maji lɛ amli nii. Yɛ afii etɛ ni nyiɛ sɛɛ lɛ mli lɛ, wɔtsu maji babaoo mli nii yɛ Kentucky hei ni asafoi bɛ kwraa lɛ. Bei babaoo lɛ nanemɛi kɛ weku mli bii ni jɛ Ohio baa wɔŋɔɔ, ni amɛbafataa wɔhe yɛ sɔɔmɔ nitsumɔ lɛ mli otsi kome aloo be komɛi lɛ nɔ ni fe nakai.

Kpeei Krokomɛi ni Sa Kaimɔ

Kpee ni afee yɛ Columbus, Ohio, yɛ July 24-30, 1931 lɛ, sa kaimɔ lɛɛlɛŋ. Jɛmɛ ji he ni atswa adafi yɛ akɛ akɛ gbɛi ni ji Yehowa Odasefoi ni damɔ Biblia lɛ nɔ lɛ baakadi wɔ. (Yesaia 43:12) Dani nakai be lɛ aaashɛ lɛ, kɛji mɛi bi wɔ nɔ̃ jamɔ mli ni wɔyɔɔ lɛ, wɔkɛɔ akɛ, wɔ ji “Majimaji Ateŋ Biblia Kaselɔi.” Shi no efeee wɔ mɛi srɔto ko tsɔ, akɛni Biblia kaselɔi yɛ ni kɛ amɛhe eyabɔ jamɔ kui krokomɛi babaoo lɛ hewɔ.

Mɔ ni akɛ lɛ fata mi he lɛ, ni ji Agnes, ebote gbalashihilɛ mli, ni mikome pɛ miyɔɔ; no hewɔ lɛ miná miishɛɛ waa diɛŋtsɛ be ni atswa adafi akɛ mɛi ni miitao ni amɛná gbɛgbalɔi ni baafata amɛhe lɛ abakpe yɛ he ko pɔtɛɛ lɛ. Jɛmɛ mikɛ Bertha kɛ Elsie Garty kɛ Bessie Ensminger kpe yɛ. Amɛhiɛ tsɔji enyɔ ni amɛmiitao nyɛmiyoo gbɛgbalɔ ni baafata amɛhe afee ejwɛ koni amɛkɛ amɛ atsu nii. Eyɛ mli akɛ wɔkpeko pɛŋ moŋ, shi wɔ fɛɛ wɔshi kpee lɛ shishi kutuu.

Wɔtsu nii yɛ Pennsylvania maŋ lɛ mli fɛɛ yɛ hulutsoo be lɛ mli. Agbɛnɛ, beni fɛi be lɛ shɛ lɛ, wɔbi ni aha wɔ nitsumɔ yɛ wuoyigbɛ maji ni fɛi yeee tsɔ yɛ jɛmɛ, ni ji North Carolina, Virginia, kɛ Maryland lɛ amli. Wɔku wɔsɛɛ kɛtee kooyigbɛ yɛ agbiɛnaa be mli. Nakai ji gbɛgbalɔi anifeemɔ yɛ nakai beaŋ. Yɛ afi 1934 lɛ, John Booth kɛ Rudolph Abbuhl ni kɛ nifeemɔ gbɛ nɛɛ tsu nii lɛ, ŋɔ Ralph Moyer kɛ enyɛminuu fioo Willard efata amɛhe kɛtee Hazard, yɛ Kentucky.

Mikɛ Ralph ekpe yɛ shii abɔ, ni wɔbale wɔhe jogbaŋŋ yɛ kpee wulu ko ni da waa ni afee yɛ Washington D.C., kɛjɛ May 30–June 3, 1935 lɛ mli. Mikɛ Ralph ta hekome yɛ ablanaa lɛ nɔ beni aha wiemɔ ni kɔɔ “gbɔmɛi babaoo lɛ” loo “asafo babaoo” lɛ he lɛ. (Kpojiemɔ 7:9-14) Dani nakai be lɛ aaashɛ lɛ, no mli lɛ wɔheɔ wɔyeɔ akɛ gbɔmɛi babaoo lɛ mli bii lɛ ji ŋwɛi kuu lɛ mli bii ko ni yeee anɔkwa kɛmɔɔɔ shi fe mɛi 144,000 lɛ. (Kpojiemɔ 14:1-3) No hewɔ lɛ misumɔɔɔ mafee tamɔ amɛteŋ mɔ ko!

 Beni Nyɛminuu Rutherford tsɔɔ mli akɛ asafo babaoo lɛ mli bii lɛ ji shikpɔŋ nɔ kuu ko ni ji anɔkwafoi ni baafo Harmagedon lɛ, efee mɛi babaoo naakpɛɛ. Kɛkɛ ni efɔ̃ nine etsɛ asafo babaoo lɛ mli bii lɛ fɛɛ koni amɛte shi amɛdamɔ shi. Ojogbaŋŋ, miteee shi, shi Ralph te shi. Sɛɛ mli lɛ, minu nibii ashishi jogbaŋŋ, no hewɔ lɛ afi 1935 lɛ ji naagbee afi nɔ ni mikɛ mihe wo bodobodo kɛ wein lɛ ni ji kaimɔ lɛ he nibii lɛ ayeli mli yɛ Kristo gbele lɛ Kaimɔ lɛ shishi. Kɛlɛ, Awo tee nɔ eye kɛyashi egbo yɛ November 1957 mli.

Hefatalɔ ko ni Yɔɔ Daa

Mikɛ Ralph tee nɔ wɔŋmala wɔhe woji. Miisɔmɔ yɛ Lake Placid, New York, ni lɛ hu eyɛ Pennsylvania. Yɛ afi 1936 mli lɛ, efee shwiili ni awɔɔ mli ni tsɔne gbalaa ni ebaanyɛ ekɛ etsɔne lɛ agbala. Efã kɛjɛ Pottstown, yɛ Pennsylvania, kɛtee Newark, yɛ New Jersey, kɛha kpee ni afee yɛ jɛmɛ yɛ October 16-18 lɛ. Yɛ gbɛjianɔtoo lɛ sɛɛ gbɛkɛ ko lɛ, wɔ gbɛgbalɔi lɛ ateŋ mɛi babaoo tee koni wɔyakwɛ Ralph shwiili hee ni awɔɔ mli ni tsɔne gbalaa lɛ lɛ. Ekɛ mi damɔ shwiili ni awɔɔ mli ni tsɔne gbalaa lɛ mli yɛ kulo ko ni afee awo mli lɛ masɛi beni ebi akɛ, “Ani oosumɔ shwiili ni awɔɔ mli ni tsɔne gbalaa lɛ?”

Beni mikpɛlɛ nɔ lɛ, ebi akɛ, “Ani oosumɔ ni ohi mli?”

Mihere nɔ akɛ: “Hɛɛ,” kɛkɛ ni eshɔ minaa yɛ suɔmɔ gbɛ ko nɔ ni mihiɛ kpaŋ nɔ gbi ko gbi ko. Yɛ gbii komɛi asɛɛ lɛ, wɔnine shɛ gbalashihilɛ mlibotemɔ he wolo nɔ. Yɛ October 19 lɛ, kpee lɛ sɛɛ lɛ, wɔtee Brooklyn ni wɔyashara shi yɛ Buu Mɔɔ Asafo lɛ woji akalamɔ he lɛ. Kɛkɛ ni wɔbi ni aha wɔ shikpɔŋkuku ko ní wɔyatsu nii yɛ mli. Grant Suiter ji mɔ ni kwɛɔ shikpɔŋkuku lɛ nɔ, kɛkɛ ni ebi mɔ ni baatsu mli nii. Ralph kɛɛ akɛ, “Wɔ wɔbaatsu, kɛji wɔbaanyɛ wɔbote gbalashihilɛ mli.”

Nyɛminuu Suiter here nɔ akɛ: “Wɔbaanyɛ wɔto he gbɛjianɔ, kɛji nyɛku nyɛsɛɛ nyɛba gbɛkɛ ŋmɛji 5 mli.” No hewɔ lɛ nakai gbɛkɛ lɛ wɔbote gbalashihilɛ mli yɛ Odasefonyo ko shia yɛ Brooklyn Heights. Wɔkɛ nanemɛi komɛi yaye nii yɛ maŋ lɛŋ niyelihe ko kɛkɛ ni wɔwo maŋ lɛ mli tsɔne kɛtee Ralph shwiili ni awɔɔ mli ni tsɔne gbalaa lɛ he yɛ Newark, New Jersey.

No sɛɛ etsɛɛɛ lɛ, wɔyi gbɛ kɛtee Heathsville, Virginia, klɛŋklɛŋ ni wɔtsu nii kutuu akɛ gbɛgbalɔi. Wɔtsu nii yɛ Northumberland Kpokpaa lɛ nɔ kɛkɛ ni agbɛnɛ wɔtsa nɔ kɛtee Fulton kɛ Franklin kpokpai lɛ anɔ yɛ Pennsylvania. Yɛ afi 1939 lɛ, afɔ̃ Ralph nine koni ebatsu shikpɔŋ wulu ko he nii, nitsumɔ ko ni baaha wɔyasara asafoi babaoo ko, yɛ be kɛ beaŋ. Wɔsɔmɔ asafoi ni yɔɔ Tennessee maŋ lɛ mli. Afi ni nyiɛ sɛɛ lɛ mli wɔfɔ́ wɔbinuu Allen, kɛkɛ ni yɛ afi 1941 lɛ afo shikpɔŋ wulu mli nitsumɔ lɛ mli. Kɛkɛ ni agbɛnɛ aha wɔ nitsumɔ yɛ Marion, Virginia, akɛ gbɛgbalɔi krɛdɛɛi. Nakai gbii lɛ amli lɛ, no tsɔɔ akɛ daa nyɔɔŋ nɔ lɛ, okɛ ŋmɛlɛtswai 200 baatsu nii yɛ sɔɔmɔ nitsumɔ lɛ mli.

 Ní Aaafee Tsakemɔi

Yɛ afi 1943 lɛ, mina akɛ ehe miihia ni maŋmɛɛ gbɛgbamɔ krɛdɛɛ nitsumɔ lɛ he. Akɛni shwiili bibioo ni awɔɔ mli ni tsɔne gbalaa mli miyɔɔ, ni miikwɛ gbekɛ bibioo, ni miihoo niyenii, kɛ mɔ ni haa wɔ fɛɛ wɔwoɔ atadei ni he tse lɛ, ŋmɛlɛtswai 60 pɛ ji fɛɛ ni manyɛ mikɛ tsu nii yɛ sɔɔmɔ nitsumɔ lɛ mli daa nyɔŋ nɔ. Shi Ralph tee nɔ akɛ gbɛgbalɔ krɛdɛɛ.

Wɔku wɔsɛɛ kɛtee Alliance, Ohio, yɛ afi 1945, wɔhɔ̀ɔ shwiili ni awɔɔ mli ni tsɔne gbalaa lɛ, ní wɔkɛ afii nɛɛhu ehi mli lɛ, ni mikɛ mifɔlɔi fã kɛyahi shia ni yɔɔ ŋmɔ lɛ mli lɛ mli. Jɛmɛ, yɛ ablanaa ni kã hiɛ lɛ nɔ mifɔ́ wɔbiyoo Rebekah yɛ. Ralph tao nitsumɔ ni akɛ be fã tsuɔ yɛ maŋ lɛ mli ni etsa nɔ akɛ daa gbɛgbalɔ. Mitsu nii yɛ ŋmɔ lɛ mli ni mifee bɔ fɛɛ bɔ ni manyɛ koni maye mabua lɛ ni etsa gbɛgbamɔ nitsumɔ lɛ nɔ. Eyɛ mli akɛ mifɔlɔi ha wɔ shikpɔŋ kɛ shia yaka moŋ, shi Ralph kpoo. Eesumɔ ni ehi shi akɛ mɔ ni nɔ ko etsiii enaa koni wɔnyɛ wɔtiu Maŋtsɛyeli lɛ he nibii asɛɛ jogbaŋŋ kɛmɔ shi.

Yɛ afi 1950 mli lɛ wɔyahi Pottstown yɛ Pennsylvania, ni wɔyahai shia ko, ni wɔwoɔ dɔlai 25 daa nyɔŋ. Enɔ sɛɛ afii 30 mli aŋmɛ tsũ nyɔmɔwoo lɛ nɔ kɛyashɛ dɔlai 75 pɛ. Wɔnu he akɛ Yehowa miiye eebua wɔ koni wɔha wɔshihilɛ afee mlɛo. (Mateo 6:31-33) Ralph tsuɔ nii gbii etɛ yɛ otsi lɛ mli akɛ yikũlɔ. Wɔkɛ wɔbii enyɔ lɛ kaseɔ Biblia lɛ daa otsi, wɔyaa asafoŋ kpeei, ni wɔshiɛɔ Maŋtsɛyeli lɛ he sanekpakpa lɛ akɛ weku. Ralph sɔmɔ akɛ sɛinɔtalɔ yɛ asafo mli ni wɔyɔɔ lɛ. Kɛtsɔ wɔshihilɛ ni wɔha efee mlɛo lɛ nɔ lɛ, wɔnyɛ wɔfee babaoo yɛ Yehowa sɔɔmɔ lɛ mli.

Misuɔmɔ Hefatalɔ lɛ Gbele

Yɛ May 17, 1981 lɛ, wɔta shi yɛ Maŋtsɛyeli Asa lɛ nɔ wɔmiibo maŋshiɛmɔ toi. Ralph he tseee lɛ kwraa, ete shi kɛtee asa lɛ sɛɛ, ni eŋma wolo fioo ko ni ekɛtsu shitaramɔ nɔkwɛlɔ lɛ ni ekɛbaha mi ni miitsɔɔ akɛ eeya shia. Akɛni Ralph efɔɔɔ nakai feemɔ hewɔ lɛ, miha mɔ ko kɛ lɔle wo mi kɛtee shia amrɔ nɔŋŋ. Yɛ nakai ŋmɛlɛtswaa lɛ mli nɔŋŋ Ralph gbo yɛ hela ko ni gbeɔ gbɔmɔtso lɛ fã ni naa wa waa lɛ mli. Atswa asafo lɛ adafi nakai leebi lɛ yɛ Buu Mɔɔ nikasemɔ lɛ naagbee mli akɛ eje mli.

Ralph kɛ nɔ ni fe ŋmɛlɛtswai 50 etsu nii momo yɛ sɔɔmɔ nitsumɔ lɛ mli yɛ nakai nyɔŋ lɛ mli. Ebe-fɛɛ sɔɔmɔ nitsumɔ akɛ gbɛgbalɔ lɛ etsa nɔ aahu fe afi 46. Ekɛ mɛi ni fe oha efee Biblia mli nikasemɔ, mɛi ni yɛ be ni sa mli lɛ amɛbatsɔmɔ Yehowa Odasefoi ni abaptisi amɛ lɛ. Mumɔŋ jɔɔmɔi ni wɔnine shɛ nɔ lɛ sa afɔle fɛɛ afɔle ni wɔshã yɛ afii ni eho lɛ amli.

Hiɛsɔɔ Kɛha Hegbɛi ni Miná Lɛ

Yɛ afii 18 ni eho lɛ fɛɛ mli lɛ, mi diɛŋtsɛ mikwɛ mihe kɛhi shi, mishiɛɔ mihaa mɛi krokomɛi bɔ ni manyɛ, ni mikaseɔ Nyɔŋmɔ Wiemɔ lɛ. Amrɔ nɛɛ miyɛ maŋbii ni egbɔlɔ ni amɛba hejɔɔmɔ ashia mli. Miyɛ tsũ mli nibii ni akɛ tsei fee fioo ko pɛ ni mihala akɛ misumɔŋ ni maná tɛlivishiŋ ko. Shi mishihilɛ eyi obɔ, ni niiatsɛ ji mi yɛ mumɔ mli. Mifɔlɔi kɛ minyɛmimɛi hii enyɔ lɛ ye anɔkwa kɛyashi amɛgbele mli, ni minyɛmimɛi yei enyɔ lɛ tee nɔ yɛ anɔkwayeli mli yɛ anɔkwale gbɛ lɛ nɔ.

Mináa miishɛɛ akɛ mibinuu Allen, miisɔmɔ akɛ Kristofonyo onukpa. Ekɛ afii babaoo wo Maŋtsɛyeli Asai kɛ Kpee Asai amli tsɔji ni awieɔ awoɔ mli, ni etsu nii yɛ wiemɔ tsɔji kɛha kpeei ni afeɔ yɛ hulutsoo be mli lɛ. Eŋa ji Nyɔŋmɔ tsulɔ ni yeɔ anɔkwa, ni amɛbii enyɔ lɛ miisɔmɔ akɛ onukpai. Mibiyoo Rebekah Karres, kɛ nɔ ni fe afii 35 ehi be-fɛɛ sɔɔmɔ nitsumɔ lɛ mli, kɛ afii ejwɛ yɛ Yehowa Odasefoi ajeŋ muu fɛɛ nitsumɔhe yitso lɛ yɛ Brooklyn. Yoo lɛ kɛ ewu fɛɛ kɛ afii 25 ni eho lɛ etsu nii yɛ gbɛfaa nitsumɔ lɛ mli yɛ United States hei srɔtoi.

Yesu kɛɛ akɛ Maŋtsɛyeli lɛ tamɔ jwetri ko ni aŋɔtee ni abaanyɛ ana. (Mateo 13:44) Miida shi akɛ miweku lɛ ná nakai jwetri afii babaoo ni eho nɛ. Mɛɛ hegbɛ po nɛ akɛ mafo misɛɛ makwɛ nɔ ni fe afii 80 henɔjɔɔmɔ sɔɔmɔ ni mikɛha Nyɔŋmɔ—ni heshwamɔ ko bɛ mli lɛ! Eji manyɛ mahi wala mli lolo kulɛ, mahi shi nakai nɔŋŋ ejaakɛ, yɛ anɔkwale mli lɛ, ‘Nyɔŋmɔ mlihilɛ lɛ hi fe wala kwraa.’—Lala 63:4.

[Shishigbɛ niŋmaa]

[Mfoniri ni yɔɔ baafa 23]

Wɔyabo Nyɛminuu Rutherford wiemɔ lɛ toi yɛ afi 1917 mli yɛ Alliance, yɛ Ohio

[Mfoniri ni yɔɔ baafa 23]

Mikɛ Ralph damɔ shwiili ni awɔɔ mli ni tsɔne gbalaa ni efee lɛ hiɛ

[Mfoniri ni yɔɔ baafa 24]

Mikɛ mibii enyɔ lɛ ŋmɛnɛ