“Nyɛdia Yehowa kɛ Ehewalɛ lɛ Sɛɛ”
“Nyɛdia Yehowa kɛ Ehewalɛ lɛ Sɛɛ”
“Yehowa yɔɔ nɛɛ, ehiŋmɛii kpaa shikpɔŋ muu lɛ fɛɛ nɔ, ni ejieɔ ehewalɛ kpo ehaa mɛi ni amɛtsui ehi kɛwula shi yɛ egbɛfaŋ lɛ.”—2 KRONIKA 16:9.
1. Mɛni ji hewalɛ, ni te adesai kɛtsu nii amɛha tɛŋŋ?
HEWALƐ baanyɛ atsɔɔ nibii babaoo, tamɔ mɛi krokomɛi anɔ hewalɛnamɔ loo hewalɛ ni ayɔɔ; nyɛmɔ ni akɛfeɔ nii loo akɛtsuɔ nɔ ko he nii; gbɔmɔtsoŋ nyɛmɔ (hewalɛ); loo jwɛŋmɔŋ loo jeŋba mli hewalɛ. Kɛ aawie saji tamɔ hewalɛ kɛ nitsumɔ he lɛ, adesai efeko nɔkwɛmɔnɔ kpakpa ko kwraa. Beni yinɔsaneŋmalɔ Lord Acton, wieɔ hewalɛ ni yɔɔ maŋkwralɔi adɛŋ lɛ he lɛ, ekɛɛ akɛ: “Hewalɛ haa gbɔmɔ fiteɔ, ni hewalɛ ní husu bɛ he lɛ fiteɔ mɔ kɛmɔɔ shi.” Ŋmɛnɛŋmɛnɛ beaŋ yinɔsane eyi obɔ kɛ nɔkwɛmɔnii ni tsɔɔ bɔ ni Lord Acton wiemɔi lɛ ji anɔkwale ha. Yɛ afii ohai 20 lɛ mli lɛ, ‘gbɔmɔ ye enaanyo gbɔmɔ nɔ ni ekɛye ehe awui’ yɛ gbɛ ni afeko nakai dã lɛ nɔ. (Jajelɔi 8:9) Adesai nɔyelɔi yiwalɔi ni efite lɛ kɛ amɛhewalɛ etsu nii babaoo yɛ gbɛ fɔŋ nɔ ni amɛkɛkpata gbɔmɛi akpekpei abɔ awala hiɛ. Hewalɛ ni akɛ suɔmɔ, nilee, kɛ jalɛsaneyeli kudɔɔɔ lɛ yɛ oshara.
2. Tsɔɔmɔ bɔ ni ŋwɛi sui krokomɛi saa bɔ ni Yehowa kɛ ehewalɛ tsuɔ nii ehaa lɛ he lɛ mli.
2 Ákɛ mɔ ni tamɔɔɔ adesai babaoo lɛ, Nyɔŋmɔ kɛ ehewalɛ lɛ tsuɔ nɔ kpakpa be fɛɛ be. “Yehowa yɔɔ nɛɛ, ehiŋmɛii kpaa shikpɔŋ muu lɛ fɛɛ nɔ, ni ejieɔ ehewalɛ kpo ehaa mɛi ni amɛtsui ehi kɛ wula shi yɛ egbɛfaŋ lɛ.” (2 Kronika 16:9) Yehowa kɛ ehewalɛ lɛ tsuɔ nii yɛ gbɛ kpakpa nɔ. Nyɔŋmɔ jɛɔ tsuishiŋmɛɛ mli etsiɔ hiɛkpatamɔ ni ekɛbaaba mɛi fɔji anɔ lɛ naa ni ehaa amɛ hegbɛ ni amɛkɛtsake amɛtsui. Suɔmɔ tsirɛɔ lɛ ni ehaa hulu tsoɔ ehaa adesai srɔtoi fɛɛ—mɛi kpakpai kɛ mɛi fɔji. Naagbee lɛ, jalɛsaneyeli baatsirɛ lɛ ní ekɛ ehewalɛ ni bɛ naagbee lɛ atsu nii ni ekɛkpata mɔ ni kɛ gbele ba, ni ji Satan Abonsam lɛ hiɛ.—Mateo 5:44, 45; Hebribii 2:14; 2 Petro 3:9.
3. Mɛni hewɔ Nyɔŋmɔ hewalɛ kpele lɛ ji yiŋtoo hewɔ ni esa akɛ wɔkɛ wɔhe afɔ̃ enɔ lɛ?
3 Wɔ ŋwɛi-Tsɛ lɛ hewalɛ kpeteŋkpele lɛ ji yiŋtoo ní wɔɔdamɔ nɔ wɔná hemɔkɛyeli kɛ hekɛnɔfɔɔ—yɛ eshiwoi kɛ ehebuu fɛɛ mli. Gbekɛ fioo nuɔ he akɛ eyɛ shweshweeshwe yɛ gbɔi ateŋ kɛji emɔ etsɛ nine mli, ejaakɛ ele akɛ etsɛ haŋ nɔ fɔŋ ko aba enɔ. Nakai nɔŋŋ hu wɔ ŋwɛi-Tsɛ lɛ, mɔ ni “yɔɔ hewalɛ ní ekɛhereɔ yiwala lɛ” baabu wɔhe kɛjɛ efɔŋ ni hiɔ shi daa lɛ mli kɛji wɔkɛ lɛ nyiɛ. (Yesaia 63:1; Mika 6:8) Ni ákɛ Tsɛ kpakpa lɛ, Yehowa yeɔ eshiwoi anɔ be fɛɛ be. Ehewalɛ ni bɛ naagbee lɛ maa nɔ mi ehaa wɔ akɛ ‘eeeha nɔ ni etsu ewiemɔ lɛ yɛ hewɔ lɛ aya nɔ!’—Yesaia 55:11; Tito 1:2.
4, 5. (a) Mɛni ba beni Maŋtsɛ Asa kɛ ehe fɔ̃ Yehowa nɔ kwraa lɛ? (b) Mɛni baanyɛ aba kɛji wɔkɛ wɔhiɛ fɔ̃ adesai aŋaawoo nɔ kɛha wɔnaagbai ahe nitsumɔ lɛ?
4 Mɛni hewɔ ehe hiaa waa ni wɔtswa wɔfai shi ni wɔkaha hebuu ni wɔ ŋwɛi-Tsɛ lɛ kɛhaa wɔ lɛ miiŋmɛɛ wɔ lɛ? Ejaakɛ shihilɛi baanyɛ aye wɔnɔ ni wɔhiɛ akpa he ni wɔ shweshweeshwe shihilɛ diɛŋtsɛ yɔɔ lɛ nɔ. Wɔnaa enɛ yɛ Maŋtsɛ Asa, mɔ ni ná hekɛnɔfɔɔ yɛ Yehowa mli lɛ nɔkwɛmɔnɔ lɛ mli. Yɛ Asa nɔyeli beaŋ lɛ, Kush asraafoi akpei akpe ni he wa lɛ batutua Yuda. Beni Asa yɔse akɛ ehenyɛlɔi lɛ baanyɛ aye kunim lɛ, esɔle akɛ: “Yehowa! mɔ ni he wa kɛ mɔ ni he waaa teŋ lɛ mɔ ko bɛ ni aaanyɛ aye abua mɔ akɛ ja bo. Ye obua wɔ, Yehowa, wɔ-Nyɔŋmɔ! Ejaakɛ bo nɔŋŋ onɔ wɔhiɛ kã, ni ogbɛi anɔ wɔbaa wɔkɛ asafo babaoo nɛɛ abakpe nɛɛ. Yehowa, bo ji wɔ-Nyɔŋmɔ; kaaha adesa nine miitsɔ onɔ!” (2 Kronika 14:10) Yehowa bo Asa nibimɔ lɛ toi, ni eha eye kunim kɛmɔ shi.
5 Shi kɛlɛ, beni Asa kɛ afii babaoo esɔmɔ yɛ anɔkwale mli lɛ sɛɛ lɛ, hekɛnɔfɔɔ ni eyɔɔ yɛ hewalɛ ni Yehowa yɔɔ ni ekɛhereɔ mɔ yiwala lɛ mli lɛ hoso. Bɔni afee ni etsĩ Israel kooyigbɛ maŋtsɛyeli lɛ ta lɛ naa lɛ, ekɛ ehiɛ yafɔ̃ Aram nɔ kɛha yelikɛbuamɔ. (2 Kronika 16:1-3) Eyɛ mli akɛ shika ni ekɛyaha Aram Maŋtsɛ Ben-hadad lɛ jie Yuda he gbeyei ni Israel woɔ lɛ kɛtee moŋ, shi kpaŋmɔ ni Asa kɛ Aram fee lɛ tsɔɔ hekɛnɔfɔɔ ni ebɛ yɛ Yehowa mli. Gbalɔ Hanani je gbɛ ebi lɛ tɛ̃ɛ akɛ: “Nto Kushbii kɛ Lubbii lɛ ata lɛ fá babaoo, ni amɛshwiilii kɛ okpɔŋɔiatsɛmɛi lɛ hu fá babaoo diɛŋtsɛ? Ni kɛlɛ akɛni okɛ ohiɛ fɔ̃ Yehowa nɔ hewɔ lɛ, atu amɛ awo odɛŋ.” (2 Kronika 16:7, 8) Shi kɛlɛ, Asa kpoo kãmɔ nɛɛ. (2 Kronika 16:9-12) Kɛ́ wɔkɛ naagbai kpe lɛ, nyɛkahaa wɔkɛ wɔhe fɔ̃a adesai aŋaawoo nɔ. Shi moŋ nyɛhaa wɔkɛ wɔhe afɔ̃a Nyɔŋmɔ nɔ, ejaakɛ bɔ fɛɛ bɔ ni fee lɛ, hekɛnɔfɔɔ ni wɔɔná yɛ adesai ahewalɛ mli lɛ kɛ nijiaŋwujee baaba.—Lala 146:3-5.
Taomɔ Hewalɛ ni Nyɔŋmɔ Kɛhaa lɛ Sɛɛgbɛ
6. Mɛni hewɔ esa akɛ ‘wɔtao Yehowa kɛ ehewalɛ lɛ sɛɛgbɛ lɛ’?
6 Yehowa baanyɛ awo etsuji lɛ hewalɛ ni ebu amɛhe hu. Biblia lɛ woɔ wɔ hewalɛ ni ‘wɔtao Yehowa kɛ ehewalɛ lɛ sɛɛgbɛ.’ (Lala105:4) Mɛni hewɔ? Ejaakɛ kɛ wɔfee nii yɛ Nyɔŋmɔ hewalɛ mli lɛ, wɔkɛ wɔhewalɛ lɛ baatsu nii ni mɛi krokomɛi aná he sɛɛ, moŋ fe ni eeeye amɛ awui. He ko he ko bɛ ni wɔnaa nɔkwɛmɔnɔ ni hi fe fɛɛ yɛ enɛ mli fe yɛ Yesu Kristo mli, mɔ ni fee naakpɛɛ nii pii yɛ ‘Yehowa hewalɛ’ mli lɛ. (Luka 5:17) Kulɛ, Yesu baanyɛ ejɔɔ ehe nɔ ni ebatsɔ niiatsɛ, gbɔmɔ ní ehe gbɛi, loo maŋtsɛ ni yɔɔ hewalɛ waa po. (Luka 4:5-7) Yɛ no najiaŋ lɛ, ekɛ hewalɛ ni Nyɔŋmɔ kɛha lɛ lɛ tsu nii ni ekɛ tsɔse mɛi, ni ekɛ tsɔɔ nii, ni ekɛ ye ebua mɛi, ni ekɛ tsa helai. (Marko 7:37; Yohane 7:46) Mɛɛ nɔkwɛmɔnɔ kpakpa eji kɛha wɔ nɛkɛ!
7. Mɛɛ su ni he hiaa wɔwoɔ kɛji wɔfee nii yɛ Nyɔŋmɔ hewalɛ lɛ mli moŋ fe wɔ diɛŋtsɛ wɔnɔ lɛ?
7 Kɛfata he lɛ, kɛ́ wɔfee nii yɛ “hewalɛ ni Nyɔŋmɔ duroɔ” wɔ lɛ mli lɛ, enɛ baaye abua wɔ ni wɔba wɔhe shi. (1 Petro 4:11) Gbɔmɛi ni taoɔ hewalɛ amɛhaa amɛhe lɛ batsɔmɔɔ hewolɔi. Enɛ he nɔkwɛmɔnɔ kome ji Ashur Maŋtsɛ Esar-Hadon, mɔ ni kɛ henɔwomɔ jaje akɛ: “Miji ofe, miji ofe ni yɔɔ hewalɛ, miyɛ ekãa, mida kpeteŋkpele, mije agbo.” Nɔ ni tamɔɔɔ nakai lɛ, “je nɛŋ gbɔjɔmɔ nii lɛ” Yehowa “hala, koni ekɛwo nii ni he wa lɛ ahiɛgbele.” No hewɔ lɛ, kɛ́ anɔkwa Kristofonyo miishwã lɛ, eshwãa yɛ Yehowa mli, ejaakɛ ele akɛ nɔ ni efee lɛ jɛɛɛ lɛ diɛŋtsɛ ehewalɛ mli. ‘Wɔhe shi ni wɔɔba yɛ Nyɔŋmɔ nine ni wa lɛ shishi lɛ’ baaha awo wɔnɔ diɛŋtsɛ.—1 Korintobii 1:26-31; 1 Petro 5:6.
8. Mɛni esa akɛ wɔfee klɛŋklɛŋ ni wɔnine ashɛ Yehowa hewalɛ lɛ nɔ?
8 Te wɔfeɔ tɛŋŋ wɔnáa Nyɔŋmɔ hewalɛ lɛ? Klɛŋklɛŋ kwraa lɛ, esa akɛ wɔbi yɛ sɔlemɔ mli. Yesu ma nɔ mi eha ekaselɔi lɛ akɛ e-Tsɛ lɛ kɛ mumɔ krɔŋkrɔŋ baaha mɛi ni biɔ lɛ lɛ. (Luka 11:10-13) Susumɔ bɔ ni enɛ wo Kristo kaselɔi lɛ hewalɛ beni amɛhala akɛ amɛaabo Nyɔŋmɔ moŋ toi fe jamɔ mli hiɛnyiɛlɔi ni fã amɛ akɛ amɛfɔɔ Yesu he odaseyeli lɛ he okwɛ. Beni amɛsɔle amɛbi Yehowa yelikɛbuamɔ lɛ, aha amɛsɔlemɔ ní jɛ anɔkwayeli mli lɛ hetoo, ni mumɔ krɔŋkrɔŋ lɛ wo amɛ hewalɛ koni amɛya nɔ amɛshiɛ sanekpakpa lɛ kɛ ekãa.—Bɔfoi lɛ Asaji 4:19, 20, 29-31, 33.
9. Tsĩi mumɔŋ hewalɛ jɛɛhe ni ji enyɔ lɛ tã, ni otsĩ Ŋmalɛ mli nɔkwɛmɔnɔ kome tã ni okɛtsɔɔ bɔ ni enɛ tsuɔ nii ehaa lɛ mli.
9 Nɔ ni ji enyɔ lɛ, wɔbaanyɛ wɔná mumɔŋ hewalɛ kɛjɛ Biblia lɛ mli. (Hebribii 4:12) Hewalɛ ni Nyɔŋmɔ wiemɔ lɛ yɔɔ lɛ bafee faŋŋ yɛ Maŋtsɛ Yosia gbii lɛ amli. Eyɛ mli akɛ no mli lɛ, Yuda maŋtsɛ nɛɛ ejie wɔŋjalɔi amagai lɛ kɛje shikpɔŋ lɛ nɔ momo moŋ, shi Yehowa Mla ni ayana trukaa yɛ sɔlemɔwe lɛ tsirɛ lɛ ni etsa enii ahetsuumɔ gbɛjianɔtoo lɛ nɔ. * Beni Yosia diɛŋtsɛ kane Mla lɛ etsɔɔ gbɔmɛi lɛ sɛɛ lɛ, maŋ muu lɛ fɛɛ kɛ Yehowa fee kpaŋmɔ, ni aku sɛɛ ato ta ni afãa ashiɔ wɔŋjamɔ yɛ ekãa mli lɛ he gbɛjianɔ ekoŋŋ. Nibii kpakpai ni jɛ Yosia nibii atsakemɔ lɛ mli kɛba ji akɛ, “egbii lɛ fɛɛ mli lɛ amɛjeee Yehowa, . . . he.”—2 Kronika 34:33.
10. Mɛɛ gbɛ ni ji etɛ nɔ abaanyɛ atsɔ nɔ aná hewalɛ kɛjɛ Yehowa ŋɔɔ, ni mɛni hewɔ ehe hiaa lɛ?
10 Nɔ ni ji etɛ lɛ, wɔnáa hewalɛ kɛjɛɔ Yehowa ŋɔɔ kɛtsɔ Kristofoi anaanyobɔɔ nɔ. Paulo wo Kristofoi hewalɛ ni amɛya kpeei daa bɔni afee ni ‘amɛwo suɔmɔ kɛ nitsumɔi kpakpai ahe hewalɛ’ ni amɛwo amɛhe hewalɛ. (Hebribii 10:24, 25) Beni ajie Petro yɛ gboklɛfoi atsuŋ yɛ naakpɛɛ gbɛ nɔ lɛ, eesumɔ ni ekɛ enyɛmimɛi lɛ ahi shi, no hewɔ lɛ, etee Yohane Marko nyɛ shia lɛ tɛ̃ɛ, he ni “mɛi pii anaa ebakpe shi yɛ ni amɛsɔleɔ lɛ.” (Bɔfoi lɛ Asaji 12:12) Eji anɔkwale akɛ, kulɛ, amɛ fɛɛ amɛbaanyɛ amɛhi shia ni amɛsɔle. Shi amɛhala akɛ amɛnaa aaakpe shi ni amɛsɔle ni amɛwo amɛhe hewalɛ yɛ nakai jaramɔ be lɛ mli. Beni Paulo gbɛfaa kakadaŋŋ ni yɔɔ oshara kɛmiiya Roma lɛ bɛŋkɛɔ enaagbee lɛ, ekɛ nyɛmimɛi komɛi kpe yɛ Puteoli kɛ sɛɛ mli lɛ, mɛi ni fã gbɛ koni amɛkɛ lɛ abakpe lɛ. Te efee enii eha tɛŋŋ? “Beni Paulo na amɛ [sɛɛkpee bii] lɛ, eda Nyɔŋmɔ shi ni ená tsui.” (Bɔfoi lɛ Asaji 28:13-15) Ená ekãa yɛ nanemɛi Kristofoi ni ekɛkpe ekoŋŋ lɛ mli. Wɔ hu wɔnáa hewalɛ kɛjɛɔ nanemɛi Kristofoi ni wɔkɛbɔɔ lɛ mli. Shii abɔ ni wɔyɔɔ hegbɛ akɛ wɔkɛ wɔhe bɔɔ lɛ, esaaa akɛ wɔbɔɔ mɔdɛŋ akɛ wɔ kome pɛ wɔɔnyiɛ gbɛ ni etsa ni kɛ mɔ yaa wala mli lɛ nɔ.—Abɛi 18:1; Mateo 7:14.
11. Tsĩi shihilɛi komɛi amli ni “hewalɛ ni fa kɛteke nɔ” he baahia yɛ titri lɛ tã.
11 Kɛtsɔ sɔlemɔ daa, Nyɔŋmɔ Wiemɔ lɛ kasemɔ, kɛ nanemɛi heyelilɔi kɛ bɔɔ nɔ lɛ, ‘wɔhe waa yɛ Nuntsɔ lɛ kɛ ehewalɛ nyɛmɔ lɛ mli.’ (Efesobii 6:10) Ŋwanejee ko bɛ he akɛ, “Nuntsɔ lɛ kɛ ehewalɛ nyɛmɔ lɛ” he miihia wɔ fɛɛ. Mɛi komɛi naa nɔ yɛ helai ni gbɔjɔɔ mɔ mli, mɛi krokomɛi hu kɛjɛ naagbai ni gbɔlɛ kɛbaa lɛ mli, loo hefatalɔ ni akɛhi shi be saŋŋ lɛ gbele mli. (Lala 41:3) Mɛi krokomɛi hu miaa amɛhiɛ yɛ shitee-kɛ-woo ni amɛhefatalɔi ni heee yeee lɛ kɛbaa amɛnɔ lɛ mli. Fɔlɔi, titri lɛ fɔlɔi komekomei baanyɛ ana akɛ, ní aaahiɛ be-fɛɛ nitsumɔ mli yɛ be mli ni akwɛɔ weku nɔ lɛ baanyɛ afee gbɛnaa nii ni tɔɔ mɔ waa. Hewalɛ he miihia Kristofoi oblahii kɛ oblayei koni amɛte shi amɛshi tipɛŋfoi anɔnyɛɛ, ni amɛtsi amɛhe kɛjɛ tsofai fɔji kɛ nitsumɔ kɛ jeŋba shara he. Esaaa akɛ mɔ ko mɔ ko shashaoɔ shi akɛ eeebi Yehowa ni eha lɛ “hewalɛ ní fá kɛteke nɔ” ni ekɛkpee nɛkɛ kaai nɛɛ anaa.—2 Korintobii 4:7.
“Ehaa Mɔ ni Egbɔjɔ lɛ Hewalɛ”
12. Yehowa wajeɔ wɔ yɛ Kristofoi asɔɔmɔ nitsumɔ lɛ mli yɛ mɛɛ gbɛ nɔ?
12 Kɛfata he lɛ, Yehowa haa etsuji lɛ hewalɛ kɛji amɛkɛ amɛhe wo amɛsɔɔmɔ nitsumɔ lɛ mli. Wɔkaneɔ yɛ Yesaia gbalɛ lɛ mli akɛ: “Lɛ ehaa mɔ ni egbɔjɔ lɛ hewalɛ, ni mɔ ni bɛ nyɛmɔ lɛ ehaa ehewalɛ fáa. . . . Mɛi ni hiɛ kã Yehowa nɔ lɛ náa hewalɛ hee, amɛholeɔ amɛfiji anɔ tamɔ okropɔŋi, amɛjoɔ foi, ni etɔɔɔ amɛ, amɛnyiɛɔ hu, ni amɛgbɔjɔɔɔ.” (Yesaia 40:29-31) Bɔfo Paulo diɛŋtsɛ nine shɛ hewalɛ nɔ ni ekɛtsu esɔɔmɔ nitsumɔ lɛ. Enɛ hewɔ lɛ, esɔɔmɔ nitsumɔ lɛ mɔ shi waa. Eŋma kɛyaha Kristofoi ni yɔɔ Tesalonika lɛ akɛ: “Wɔsanekpakpa lɛ baaa nyɛŋɔɔ yɛ wiemɔ mli kɛkɛ, shi moŋ yɛ hewalɛ kɛ Mumɔ krɔŋkrɔŋ . . . mli.” (1 Tesalonikabii 1:5) Eshiɛmɔ kɛ nitsɔɔmɔ lɛ ná hewalɛ ni ekɛaafee tsakemɔi wuji yɛ mɛi ni bo lɛ toi lɛ ashihilɛi anɔ.
13. Mɛni waje Yeremia ni eto etsui shi yɛ shitee-kɛ-woo fɛɛ sɛɛ?
13 Kɛ wɔkɛ shikpilikpiifeemɔ mumɔ kpe yɛ wɔshikpɔŋkuku—shikpɔŋkuku ni ekolɛ wɔkɛ afii babaoo eshiɛ yɛ mli shii abɔ shi ewooo yibii lɛ—mli lɛ, wɔnijiaŋ baanyɛ aje wui. Yeremia hu nijiaŋ je wui yɛ shitee-kɛ-woo, hefɛoyeli, kɛ shikpilikpiifeemɔ ni ekɛkpe lɛ hewɔ. Ekɛɛ ehe akɛ: “Mitsiŋ [Nyɔŋmɔ] tã, ni miwieŋ yɛ egbɛi anɔ dɔŋŋ.” Shi enyɛɛɛ efee dioo. Eshɛɛ sane lɛ tsɔ “tamɔ la . . . ní aŋa yi awo [ewui] amli.” (Yeremia 20:9) Mɛni ha ená hewalɛ hee yɛ amanehulu lɛ fɛɛ sɛɛ? Yeremia kɛɛ akɛ: “Yehowa kɛ mi yɛ tamɔ ekãalɔ ní he wa.” (Yeremia 20:11) Hiɛsɔɔ ni Yeremia ná eha bɔ ni eshɛɛ sane lɛ kɛ nitsumɔ ni Nyɔŋmɔ kɛwo edɛŋ lɛ he hiaa ha lɛ, ha etsu ekãawoo ni Yehowa kɛha lɛ lɛ he nii.
Hewalɛ ní Akɛyeɔ Awui kɛ Hewalɛ ní Akɛtsaa Mɔ
14. (a) Lilɛi lɛ ji nii ni yɔɔ hewalɛ yɛ mɛɛ gbɛ nɔ? (b) Ha nɔkwɛmɔnii ni okɛtsɔɔ nii ni lilɛi lɛ baanyɛ afite.
14 Jeee hewalɛ ni wɔyɔɔ lɛ fɛɛ jɛɔ Nyɔŋmɔ ŋɔɔ tɛ̃ɛ. Ákɛ nɔkwɛmɔnɔ lɛ, lilɛi lɛ yɛ hewalɛ ni akɛyeɔ awui kɛ nɔ ni akɛtsaa mɔ. Salomo bɔ kɔkɔ akɛ: “Gbele kɛ wala yɛ lilɛi dɛŋ.” (Abɛi 18:21) Nɔ ni jɛ sane kuku ni Satan kɛ Hawa gba lɛ mli kɛba lɛ tsɔɔ bɔ ni wiemɔi ni akɛtsuuu nii jogbaŋŋ lɛ baanyɛ afite nii babaoo aha. (1 Mose 3:1-5; Yakobo 3:5) Wɔ hu wɔbaanyɛ wɔkɛ wɔlilɛi afite nii babaoo. Wiemɔi ni woɔ mɔ hiɛgbele ni aaawie yɛ oblayoo ko dalɛ he lɛ baanyɛ aha edaaŋ agbo kwraa ní niyenii baŋ etsine. Mɔ he wiemɔ ni asusuuu he ni atiɔ mli lɛ baanyɛ afite naanyo ni akɛ be babaoo ebɔ lɛ. Hɛɛ, ehe miihia ni akudɔ lilɛi lɛ.
15. Wɔbaanyɛ wɔkɛ wɔlilɛi lɛ atswa mɛi krokomɛi wɔma shi ni wɔtsa amɛ yɛ mɛɛ gbɛ nɔ?
15 Shi kɛlɛ, lilɛi lɛ nyɛɔ esaa nii ni enyɛɔ efiteɔ nii hu. Biblia abɛbua lɛ kɛɔ akɛ: “Mɔ ko yɛ ni wieɔ bambam, tamɔ adumɔɔ klante; shi nilelɔ lilɛi tsaa mɔ.” (Abɛi 12:18) Kristofoi ni yɔɔ nilee lɛ kɛ hewalɛ ni lilɛi lɛ yɔɔ lɛ tsuɔ nii ni amɛkɛ shɛjeɔ mɛi ni ehao kɛ mɛi ni agbo yɛ amɛnɔ lɛ amii. Wiemɔi ni suɔmɔ yɔɔ mli baanyɛ awo mɛi ni eye afii nyɔŋma kɛ etɛ kɛyaa ni wuɔ amɛshiɔ tipɛŋfoi anɔnyɛɛ ni yeɔ awui lɛ hewalɛ. Lilɛi ni susuɔ nii ahe lɛ baanyɛ ama nɔ mi aha nyɛmimɛi hii kɛ yei lɛ akɛ amɛhe miihia lolo ni asumɔɔ amɛ. Wiemɔi ni mlihilɛ yɔɔ mli ni wɔɔwie lɛ baanyɛ aha mɛi ni he yeɔ lɛ aná miishɛɛ. Nɔ ni fe fɛɛ lɛ, wɔbaanyɛ wɔkɛ wɔlilɛi lɛ atsu nii ni wɔkɛwie Maŋtsɛyeli shɛɛ sane ni yɔɔ hewalɛ lɛ wɔtsɔɔ mɛi fɛɛ ni baabo toi. Kɛ́ Nyɔŋmɔ wiemɔ lɛ yɛ wɔtsui mli lɛ, no lɛ wɔbaanyɛ wɔjaje. Biblia lɛ kɛɔ akɛ: “Mɛi ni sa ejurɔfeemɔ lɛ, kaakama amɛ, kɛji efeemɔ yɛ odɛŋ hewalɛ mli lɛ.”—Abɛi 3:27.
Gbɛ Kpakpa Nɔ ni Atsɔɔ akɛ Hewalɛ Tsuɔ Nii
16, 17. Kɛ onukpai, fɔlɔi, kɛ wumɛi, kɛ ŋamɛi kɛ hewalɛ ni Nyɔŋmɔ kɛha amɛ lɛ miitsu nii lɛ, te amɛaafee tɛŋŋ amɛkase Yehowa?
16 Eyɛ mli akɛ Yehowa ji ofe moŋ, shi ekɛ suɔmɔ yeɔ asafo lɛ nɔ. (1 Yohane 4:8) Yɛ ekasemɔ mli lɛ, Kristofoi nɔkwɛlɔi lɛ kwɛɔ Nyɔŋmɔ tookuu lɛ yɛ suɔmɔ mli—ni amɛkɛ amɛhewalɛ lɛ tsuuu nii yɛ gbɛ gbonyo nɔ. Eji anɔkwale akɛ, bei komɛi lɛ, ehe hiaa ni nɔkwɛlɔi ‘akã hiɛ, ní amɛwo ŋaa, ní amɛbɔ kɔkɔ’ hu, shi amɛfeɔ enɛ yɛ “tsuishitoo kɛ nitsɔɔmɔ fɛɛ mli.” (2 Timoteo 4:2) No hewɔ lɛ, onukpai lɛ susuɔ wiemɔi ni bɔfo Petro ŋma kɛyaha mɛi ni yɔɔ nɔyeli hegbɛ yɛ asafo lɛ mli lɛ nɔ be fɛɛ be lɛ he, akɛ: “Nyɛlɛa Nyɔŋmɔ asafoku ni yɔɔ nyɛteŋ lɛ, nyɛkwɛa nɔ, jeee nɔnyɛ̃ɛ naa, shi moŋ yɛ suɔmɔ naa; asaŋ jeee sɛɛnamɔ ni yɔɔ hiɛgbele hewɔ, shi moŋ tsuijurɔ naa; asaŋ jeee mɛi ni yeɔ asafoi lɛ anɔ nuntsɔmɛi asane, shi moŋ mɛi ni toɔ okadii amɛhaa asafoku lɛ.”—1 Petro 5:2, 3; 1 Tesalonikabii 2:7, 8.
17 Fɔlɔi kɛ wumɛi hu yɛ nɔyeli hegbɛ ni Yehowa kɛha amɛ, ni esa akɛ amɛkɛ hewalɛ nɛɛ atsu nii ni amɛkɛye amɛbua mɛi krokomɛi, amɛkɛlɛ̀ amɛ, ni amɛkɛsumɔ amɛ. (Efesobii 5:22, 28-30; 6:4) Yesu nɔkwɛmɔnɔ lɛ tsɔɔ akɛ abaanyɛ akɛ nɔyeli hegbɛ atsu nii jogbaŋŋ kɛmɔ shi yɛ suɔmɔ gbɛ nɔ. Kɛ tsɔsemɔ lɛ ŋmɛɔ pɛpɛɛpɛ ni esa lɛ, ehaaa gbekɛbii lɛ anijiaŋ aje wui. (Kolosebii 3:21) Kɛ Kristofoi wumɛi jɛ suɔmɔ mli amɛtsu amɛyitsoyeli lɛ he nii, ni ŋamɛi kɛ bulɛ ni mli kwɔ ha amɛwumɛi, moŋ fe ni amɛaateke hewalɛ ni Nyɔŋmɔ kɛha amɛ koni amɛkɛye amɛnɔ lɛ nɔ lɛ, ewajeɔ gbalashihilɛ lɛ.—Efesobii 5:28, 33; 1 Petro 3:7.
18. (a) Esa akɛ wɔkase Yehowa nɔkwɛmɔnɔ lɛ yɛ wɔmlifu ni wɔɔye nɔ lɛ mli yɛ mɛɛ gbɛ nɔ? (b) Mɛni esa akɛ mɛi ni yɔɔ nɔyeli hegbɛ lɛ abɔ mɔdɛŋ ni amɛdu amɛwo mɛi ni yɔɔ amɛkwɛmɔ shishi lɛ amli?
18 Esa akɛ mɛi ni yɔɔ nɔyeli hegbɛ yɛ weku lɛ kɛ asafo lɛ mli lɛ akwɛ amɛhe nɔ jogbaŋŋ koni amɛkudɔ amɛmlifu, ejaakɛ mlifu duɔ gbeyeishemɔ ewoɔ mɔ mli moŋ fe suɔmɔ. Gbalɔ Nahum kɛɛ akɛ: “Yehowa mli fuuu mra, ni ehewalɛ lɛ da kpele.” (Nahum 1:3; Kolosebii 3:19) Kɛ́ wɔyeɔ wɔmlifu nɔ lɛ, etsɔɔ akɛ wɔyɛ hewalɛ, shi kɛ́ wɔjieɔ wɔmlifu kpo lɛ, etsɔɔ akɛ wɔyɛ gbɔjɔmɔ. (Abɛi 16:32) Oti lɛ ji ní wɔha suɔmɔ—suɔmɔ kɛha Yehowa, suɔmɔ kɛha mɔ kroko, kɛ suɔmɔ kɛha jalɛ shishitoo mlai ahi weku lɛ kɛ asafo lɛ fɛɛ mli. Suɔmɔ ji ekomefeemɔ kpãa ni mli wa fe fɛɛ kɛ kanyamɔ hu ní mli wa fe fɛɛ kɛha nɔ kpakpa feemɔ.—1 Korintobii 13:8, 13; Kolosebii 3:14.
19. Mɛɛ nɔmimaa ni shɛjeɔ mɔ mii Yehowa kɛhaa, ni te esa akɛ wɔhere nɔ wɔha tɛŋŋ?
19 Ní wɔɔle Yehowa lɛ tsɔɔ akɛ wɔyɔseɔ ehewalɛ lɛ. Yehowa wie kɛtsɔ Yesaia nɔ akɛ: “Ani oleee, ani onuko? naanɔ Nyɔŋmɔ lɛ, Yehowa ni bɔ shikpɔŋ lɛ naagbeehei lɛ, egbɔjɔɔɔ ni asaŋ etɔɔɔ lɛ.” (Yesaia 40:28) Yehowa hewalɛ lɛ etaaa. Kɛ́ wɔkɛ wɔhe fɔ̃ enɔ, ni jeee wɔnɔ lɛ, ekwaŋ wɔ. Emaa nɔ mi ehaa wɔ akɛ: “Kaashe gbeyei, shi mi, mikɛo yɔɔ! Kaakwɛkwɛɛ ohe, shi mi ji o-Nyɔŋmɔ lɛ! Mawajeo, ni maye mabuao; ni mahiɛ omli kɛ mijalɛ ninejurɔ lɛ.” (Yesaia 41:10) Te esa akɛ wɔhere esuɔmɔ kwɛmɔ lɛ nɔ wɔha tɛŋŋ? Taakɛ Yesu fee lɛ, nyɛhaa wɔkɛ hewalɛ fɛɛ hewalɛ ni Yehowa kɛhaa wɔ lɛ atsua nii be fɛɛ be ni wɔkɛye wɔbua ni wɔkɛtswa mɔ wɔma shi. Eba akɛ wɔɔkudɔ wɔlilɛi lɛ bɔni afee ni wɔkɛtswa mɔ wɔma shi moŋ fe ni wɔkɛaaye awui. Ni eba akɛ wɔhiɛ aaatsɛ̃ yɛ mumɔŋ daa, ni wɔdamɔ shi shiŋŋ yɛ hemɔkɛyeli lɛ mli, ni wɔda yɛ Yehowa Nyɔŋmɔ, wɔ-Bɔlɔ Kpeteŋkpele lɛ hewalɛ lɛ mli.—1 Korintobii 16:13.
[Shishigbɛ niŋmaa]
^ kk. 9 Eka shi faŋŋ akɛ, Yudafoi lɛ yana Mose Mla ni aŋma klɛŋklɛŋ ni akɛwo sɔlemɔwe lɛ afii ohai abɔ ni eho lɛ.
Ani Obaanyɛ Otsɔɔ Mli?
• Mɛɛ gbɛ nɔ Yehowa kɛ ehewalɛ lɛ tsuɔ nii yɛ?
• Mɛɛ gbɛ̀i anɔ wɔɔtsɔ ni wɔnine ashɛ Yehowa hewalɛ lɛ nɔ?
• Mɛɛ gbɛ nɔ esa akɛ akɛ hewalɛ ni lilɛi lɛ yɔɔ lɛ atsu nii yɛ?
• Nɔyeli hegbɛ ni Nyɔŋmɔ kɛha lɛ baanyɛ afee jɔɔmɔ yɛ mɛɛ gbɛ nɔ?
[Nikasemɔ lɛ he Sanebimɔi]
[Mfoniri ni yɔɔ baafa 15]
Yesu kɛ Yehowa hewalɛ lɛ tsu nii ni ekɛye ebua mɛi krokomɛi
[Mfonirii ni yɔɔ baafa 17]
Kɛ́ Nyɔŋmɔ Wiemɔ lɛ yɛ wɔtsui mli lɛ, no lɛ wɔbaanyɛ wɔjaje