Ani Okaiɔ?

Ani ohiɛ esɔ Buu-Mɔɔ srɔtoi ni je kpo nyɛsɛɛ nɛɛ akanemɔ he? Ojogbaŋŋ, kwɛmɔ akɛ obaanyɛ oha sanebimɔi ni nyiɛ sɛɛ nɛɛ ahetoo lo:

• Mɛni hewɔ wɔbaanyɛ wɔná nɔmimaa akɛ nɔ ni fata gbalɛ ni yɔɔ Yesaia 65:17-19 ni kɔɔ “ŋwɛi hee kɛ shikpɔŋ hee” lɛ he lɛ mlibaa he lɛ fe Yudafoi lɛ asɛɛkuu kɛmiijɛ nomŋɔɔ mli lɛ kɛkɛ?

Ejaakɛ beni bɔfo Petro kɛ Yohane ŋmaa yɛ Ŋ.B. klɛŋklɛŋ afii oha lɛ mli lɛ, amɛtsɔɔ emlibaa yɛ wɔsɛɛ be mli, ní nɔ ni fata he ji jɔɔmɔi ni baaba lolo lɛ. (2 Petro 3:13; Kpojiemɔ 21:1-4)—4/15, baafai 10-12.

• Mɛni baanyɛ afee nɔdaamɔ nɔ kɛha blema Hela adesãi ni kɔɔ yiwalɛ nyɔŋmɔi bibii lɛ ahe?

Ekolɛ enɛ baanyɛ afee wiemɔ hewoo kɛ saji ni atsɔmɔ yɛ anɔkwale ni eji akɛ dani Nu Afua lɛ baaba lɛ, bɔfoi komɛi ŋɔ adesai agbɔmɔtsei ni amɛkɛ amɛhe wo yiwalɛ kɛ jeŋba shara nifeemɔi amli yɛ shikpɔŋ lɛ nɔ. (1 Mose 6:1, 2)—4/15, baafai 26, 27.

• Mɛɛ osharai komɛi Kristofoi ni edara yɛ mumɔŋ lɛ baabu amɛhe kɛjɛ he yɛ yookpeemɔ nifeemɔi ashishi?

Ehe miihia waa akɛ abaakpoo shwɛmɔ fɔŋ ni yɔɔ hoo, ní baanyɛ aba kɛji aja dãa babaoo ni akudɔɔɔ kɛ yakayaka jooi ni akɛ lala ni gbɛɔ waa joɔ. Kɛ awieko yɛ faŋŋ mli akɛ mɔ fɛɛ mɔ baanyɛ aya hiɛtserɛjiemɔhe lɛ, no lɛ mɛi ni afɔ̃ko amɛnine lɛ akaya. Esa akɛ ayemforowu lɛ akwɛ akɛ Kristofoi ni tsuɔ amɛgbɛnaa nii ahe nii lɛ baahi shi kɛyashi gbijurɔyeli lɛ baaba naagbee yɛ ŋmɛlɛtswaa ni sa mli.—5/1, baafai 19-22.

• Mɛni wiemɔ ni atsĩ tã yɛ Lala 128:3 ni kɔɔ bii ni aaatamɔ “mutsei bibii” kɛaabɔle nuu ko okpɔlɔ he lɛ tsɔɔ?

Bei pii lɛ mutsei heei tsɛ̃ɔ kɛjɛɔ mutso lɛ tsoku lɛ shishigbɛ. Kɛji tso momo ko tsoku lɛ diɛŋtsɛ wooo yibii babaoo dɔŋŋ lɛ, ehee ni tsɛ̃ɔ lɛ baanyɛ afee tso kui ni he wa kɛbɔle lɛ. Nakai nɔŋŋ fɔlɔi baanyɛ amɛná miishɛɛ akɛ amɛyɛ gbekɛbii ni woɔ yibii ni fata amɛhe kɛmiisɔmɔ Yehowa.—5/15, baafa 27.

• Mɛni ji jɔɔmɔi komɛi ni gbekɛbii náa kɛjɛɔ weku shihilɛ kpakpa mli?

Etswaa shishitoo nɔ kɛha susumɔ kpakpa ní amɛaaná kɛha nɔyeli hegbɛ, hiɛsɔɔ kɛha sui kpakpai, kɛ miishɛɛ wekukpaa ni aaakã amɛkɛ mɛi krokomɛi ateŋ lɛ emaa shi. Shihilɛ ni tamɔ nɛkɛ hu baanyɛ aye abua amɛ koni amɛná amɛkɛ Nyɔŋmɔ teŋ naanyobɔɔ.—6/1, baafa 18.

• Yɛ shikpɔŋ ko ni yɔɔ Bokagbɛ Shɔŋŋ lɛ mli lɛ, mɛni afee koni akɛwaje shishinumɔ akɛ nyɛmimɛi ji Kristofoi fɛɛ?

Awo asafoi lɛ fɛɛ hewalɛ koni amɛkɛ wiemɔi ni kɛ woo haa mɛi komɛi lɛ akatsu nii. Shi moŋ, esa akɛ atsɛ mɔ fɛɛ mɔ akɛ nyɛmimɛi.—6/15, baafai 21, 22.

• Ani Yehowa Odasefoi kpɛlɛɔ tsofai ni akɛ lá fee lɛ nɔ?

Wɔheɔ wɔyeɔ akɛ Biblia famɔ ni ji ‘atsi he kɛjɛ lá he’ lɛ jieɔ lá diɛŋtsɛ ni agbalaa awoɔ mɔ mli loo efãi komɛi ni ji (plasma, red cells, white cells, kɛ platelets) lɛ kɛjɛɔ jɛmɛ. (Bɔfoi lɛ Asaji 15:28, 29) Yɛ nɔ ni kɔɔ wala yibii nɛɛ nɔŋŋ ni ajɛɔ amɛmli anaa wala yibii lɛ fai srɔtoi pii lɛ he lɛ, Kristofonyo fɛɛ Kristofonyo baakpɛ lɛ diɛŋtsɛ eyiŋ, be mli ni ehaa nɔ ni Biblia lɛ kɛɔ lɛ kɛ ekɛ Nyɔŋmɔ teŋ wekukpaa lɛ hiɔ ejwɛŋmɔŋ lɛ.—6/15, baafai 29-31.

• Ani abaanyɛ aná mligbɛ toiŋjɔlɛ diɛŋtsɛ ŋmɛnɛ?

Hɛɛ. Kɛtsɔ Biblia lɛ nɔ lɛ Yesu Kristo miikudɔ gbɔmɛi kɛmiiya jamɔ krɔŋŋ gbɛ, kɛ toiŋjɔlɛ ni atsɔɔ mli yɛ Yesaia 32:18 lɛ nɔ. Kɛfata he lɛ, mɛi ni nine shɛɔ toiŋjɔlɛ ni tamɔ nɛkɛ nɔ lɛ yɛ gbɛkpamɔ akɛ amɛbaaná toiŋjɔlɛ ni hiɔ shi daa mli miishɛɛ yɛ shikpɔŋ nɔ yɛ Lala 37:11, 29 lɛ mlibaa mli.—7/1, baafa 7.

• Mɛɛ gbɛfaŋnɔ George Young ná yɛ ŋmɛnɛŋmɛnɛ beaŋ teokrase yinɔsane mli?

Yɛ afi 1917 lɛ shishijee mli lɛ, ejie ehe kpo akɛ Maŋtsɛyeli sanekpakpa lɛ la hiɛlɔ yɛ maji babaoo nɔ. Esɔɔmɔ nitsumɔ lɛ kɛ lɛ yatsɔ Canada, kɛtee Caribbean ŋshɔkpɔi lɛ anɔ, kɛtee Brazil kɛ Amerika Wuoyigbɛ kɛtee Amerika Teŋgbɛ shikpɔji krokomɛi lɛ anɔ, kɛtee Spain, kɛtee Portugal, kɛtee maŋ ni no mli lɛ atsɛɔ jɛmɛ Soviet Union lɛ, kɛtee United States hu.—7/1, baafai 22-27.

• Mɛni ji nɔ ni 1 Korintobii 15:29 lɛ tsɔɔ beni ewie mɛi komɛi ahe akɛ “abaptisiɔ amɛ yɛ gbohii anajiaŋ lɛ”?

Oti lɛ ji akɛ kɛji akɛ mumɔ krɔŋkrɔŋ fɔ Kristofoi lɛ amu lɛ, abaptisiɔ amɛ awoɔ shihilɛ gbɛ ko ni kɛ amɛ yaa gbele kɛ amɛshitee kɛmiiya ŋwɛi wala shihilɛ mli lɛ mli.—7/15, baafa 17.

• Mɛni ji nɔ ni bɔfo Paulo fee yɛ be ni awie yɛ he akɛ edioofeemɔ afii lɛ?

Ebaanyɛ efee akɛ eye ebua ni akɛto loo awaje asafoi ni yɔɔ Siria kɛ Kilikia lɛ. Ekolɛ jaramɔ shihilɛi ni atsĩ tã yɛ 2 Korintobii 11:23-27 lɛ ba mli yɛ nɛkɛ be nɛɛ mli, ni tsɔɔ akɛ eeya nɔ ekɛ ekãa miitsu sɔɔmɔ nitsumɔ ko he nii.—7/15, baafa 26, 27.

• Mɛni baanyɛ aye abua wɔ koni wɔŋmɛ pɛpɛɛpɛ yɛ wɔgbɛkpamɔi amli?

Kaimɔ akɛ Yehowa nuɔ nii ashishi. Sɔlemɔ kɛha lɛ lɛ baanyɛ aye abua wɔ koni wɔha wɔsusumɔi aŋmɛ pɛpɛɛpɛ, ni etsɔɔ heshibaa. Yelikɛbuamɔ kroko hu ji ni aaaná susumɔ hee kɛtsɔ naanyo ko ni eda yɛ mumɔŋ ni akɛ lɛ aaawie lɛ nɔ.—8/1, baafai 29, 30.