‘Ŋmɛlɛtswaa lɛ Eshɛ!’
‘Ŋmɛlɛtswaa lɛ Eshɛ!’
“Eŋmɛlɛtswaa ni ekɛbaaje je nɛɛ mli kɛya tsɛ lɛ ŋɔɔ lɛ eshɛ.”—YOHANE 13:1.
1. Beni afi 33 Ŋ.B. Hehoo lɛ bɛŋkɛɔ lɛ, no mli lɛ mɛɛ sane he awieɔ babaoo yɛ Yerusalem, ni mɛni hewɔ?
YESU je gbɛ ni kɛ lɛ baaya egbele, eshitee, kɛ ehiɛnyamwoo ‘ŋmɛlɛtswaa’ lɛ mli lɛ shishi yɛ ebaptisimɔ be lɛ mli yɛ afi 29 Ŋ.B. Agbɛnɛ ashɛ afi 33 Ŋ.B. agbiɛnaa be lɛ mli. Otsii fioo ko pɛ eho kɛjɛ be mli ni Yudafoi akojomɔhe wulu, ni ji Akuashɔŋ lɛ kpɛ mli akɛ amɛbaagbe Yesu. Akɛni ená ele amɛ ŋaatsɔɔ lɛ, ekolɛ kɛtsɔ Nikodemo, ni ji Akuashɔŋ lɛ mlinyo ni eji enaanyo lɛ nɔ hewɔ lɛ, Yesu eshi Yerusalem kɛtee akrowai lɛ amli yɛ Yordan Faa lɛ sɛɛ. Beni Hehoo Gbi Jurɔ lɛ bɛŋkɛɔ lɛ, mɛi pii jɛ maji lɛ amli amɛba Yerusalem, ni aawie Yesu he babaoo yɛ maŋtiase lɛ mli. Mɛi pii miibibii amɛhe akɛ: “Te nyɛsusuɔ tɛŋŋ, ani ebaŋ gbi jurɔ lɛ?” Osɔfonukpai lɛ kɛ Farisifoi lɛ eha hoofeemɔ lɛ mli ewo wu kɛtsɔ famɔ ni amɛkɛha akɛ mɔ fɛɛ mɔ ni aaana he ni Yesu yɔɔ lɛ ababɔ amaniɛ lɛ nɔ.—Yohane 11:47-57.
2. Mɛɛ Maria nifeemɔ ko tée naataomɔ shi, ni hetoo ni Yesu ha ni ekɛfã ehe lɛ tsɔɔ mɛni yɛ ehiɛ ni yɔɔ “eŋmɛlɛtswaa” lɛ nɔ lɛ he?
2 Yɛ Nisan 8, gbii ekpaa dani Hehoo lɛ aaashɛ lɛ, no mli lɛ Yesu eku esɛɛ eba he ni bɛŋkɛ Yerusalem. Eba Betania—enanemɛi ni esumɔɔ amɛ ni ji Marta, Maria, kɛ Lazaro maŋ lɛ mli—he ko ni kɛ Yerusalem jɛkɛmɔ aaafee kilomitai etɛ. Sohaa gbɛkɛ ni, ni Yesu ye Hejɔɔmɔ Gbi lɛ yɛ jɛmɛ. Enɔ gbɛkɛ beni Maria kɛ mu ni jara wa ni jeɔ ŋma waa sɔmɔɔ lɛ lɛ, kaselɔi lɛ te shi wo nakai feemɔ. Yesu ha amɛ hetoo akɛ: ‘Nyɛkagbaa enaa; efee enɛ eto mifuu gbi lɛ. Ejaakɛ ohiafoi lɛ, nyɛkɛ amɛ yɛ daa; shi mi lɛ, jeee daa nyɛkɛ mi yɔɔ.’ (Yohane 12:1-8; Mateo 26:6-13) Yesu le akɛ ‘ŋmɛlɛtswaa ni ebaaje je nɛɛ mli kɛya Tsɛ lɛ ŋɔɔ lɛ eshɛ.’ (Yohane 13:1) Eshwɛ gbii enumɔ ni ‘ebaaŋɔ esusuma eha yɛ mɛi pii akpɔmɔ hewɔ.’ (Marko 10:45) Kɛjɛ no beaŋ kɛyaa lɛ, hehiamɔ henumɔ ko sa nɔ fɛɛ nɔ ni Yesu feɔ ni etsɔɔ lɛ he. Mɛɛ nɔkwɛmɔnɔ ni yɔɔ naakpɛɛ po enɛ kɛhaa wɔ yɛ be mli ni wɔkɛ hehiamɔ mɛɔ nibii agbɛjianɔtoo nɛɛ naagbee lɛ! Susumɔ nɔ ni ba yɛ Yesu sane lɛ mli enɔ jetsɛremɔ pɛ lɛ he.
Gbi ni Yesu Bote Maŋ lɛ Mli yɛ Kunimyeli Mli Lɛ
3. (a) Mɛɛ gbɛ nɔ Yesu tsɔ ebote Yerusalem yɛ Hɔgbaa, Nisan 9, ni te mɛi ni ebɔle ehe lɛ ateŋ mɛi pii fee amɛnii amɛha tɛŋŋ? (b) Mɛɛ hetoo Yesu kɛha Farisifoi lɛ ni wieɔ shiɔ nɔ ni asafo lɛ feɔ lɛ?
3 Yɛ Hɔgbaa, Nisan 9 lɛ, Yesu ba Yerusalem yɛ kunimyeli mli. Beni ebɛŋkɛɔ maŋtiase lɛ—ni eta teji bi ko nɔ kɛha Zakaria 9:9 mlibaa lɛ—gbɔmɛi ni amɛbua amɛhe naa kɛbɔle lɛ lɛ ateŋ mɛi pii kɛ amɛtadei hà gbɛ lɛ nɔ, ni mɛi krokomɛi hu folɔ tsei aniji ni amɛŋɔshwie gbɛ lɛ nɔ. Ni amɛbolɔ amɛkɛɛ: ‘Ajɔɔ maŋtsɛ ni baa yɛ Yehowa gbɛi anɔ lɛ!’ Farisifoi ni yɔɔ asafo lɛ mli lɛ ateŋ mɛi komɛi miitao ni Yesu akã ekaselɔi lɛ ahiɛ. Shi, Yesu ha amɛ hetoo akɛ: “Miikɛɛ nyɛ akɛ, kɛji mɛnɛɛmɛi aaabu amɛnaa lɛ, no lɛ tɛi aaabolɔ.”—Luka 19:38-40; Mateo 21:6-9.
4. Mɛni hewɔ Yerusalem fee hoo beni Yesu bote maŋtiase lɛ mli lɛ?
4 Gbɔmɛi ni fata asafo lɛ he lɛ ateŋ mɛi babaoo ena bɔ ni Yesu tée Lazaro shi lɛ yɛ otsii fioo ni tsɔ hiɛ lɛ mli. Agbɛnɛ mɛnɛɛmɛi miigba mɛi krokomɛi nakai naakpɛɛ nii lɛ he sane. No hewɔ lɛ, beni Yesu boteɔ Yerusalem lɛ, maŋtiase lɛ fɛɛ mli fee hoo. Gbɔmɛi lɛ bi akɛ: “Namɔ nɛ?” Ni asafoi lɛ tee nɔ amɛkɛɛ akɛ: “Mɔ nɛɛ ji Yesu, gbalɔ lɛ ni jɛ Nazaret yɛ Galilea lɛ.” Akɛni Farisifoi lɛ na nɔ ni yaa nɔ lɛ hewɔ lɛ, amɛye ŋkɔmɔ akɛ: “Je lɛ efa kɛnyiɛ esɛɛ.”—Mateo 21:10, 11; Yohane 12:17-19.
5. Mɛni ba beni Yesu tee sɔlemɔwe lɛ?
5 Taakɛ Yesu, Tsɔɔlɔ Kpeteŋkpele lɛ fɔɔ feemɔ kɛ́ eyasara Yerusalem lɛ, etee sɔlemɔwe lɛ eyatsɔɔ nii. Shwilafoi kɛ obubuafoi ba eŋɔɔ yɛ jɛmɛ, ni etsá amɛ. Beni osɔfonukpai lɛ kɛ woloŋmalɔi lɛ na enɛ ni amɛnu akɛ gbekɛbii lɛ miibolɔ yɛ sɔlemɔwe lɛ akɛ: “Hosiana David bi lɛ!” amɛmli wo la naakpa. Amɛte shi amɛwo ni amɛkɛɛ lɛ akɛ: “Oonu nɔ ni mɛnɛɛmɛi kɛɔ nɛɛ lo?” Yesu ha hetoo akɛ: “Hɛɛ, ani nyɛkaneko dã akɛ: ‘Abifabii kɛ fufɔbii anaa ni osaa yijiemɔ oto yɛ’?” Beni Yesu yaa nɔ etsɔɔ nii lɛ, eje gbɛ ekwɛ nɔ ni yaa nɔ yɛ sɔlemɔwe lɛ jogbaŋŋ.—Mateo 21:15, 16; Marko 11:11.
6. Mɛni hewɔ gbɛ ni Yesu tsɔ nɔ efee enii lɛ yɔɔ srɔto yɛ tsutsu nɔ lɛ he lɛ, ni mɛni hewɔ?
6 Kwɛ bɔ ni Yesu tsu saji ahe nii eha lɛ yɔɔ srɔto ha yɛ bɔ ni eji yɛ nyɔji ekpaa ni tsɔ hiɛ lɛ mli lɛ nɔ̃ he! Kɛkɛ ni eba Yerusalem kɛha Asesei a-Gbi Jurɔ lɛ yeli “shi ejieee ehe shi, shi moŋ tamɔ teemɔ mli.” (Yohane 7:10) Ni etoɔ gbɛjianɔ be fɛɛ be koni kɛ aawo ewala he gbeyei lɛ ni eje mli shweshweeshwe. Agbɛnɛ ebote maŋtiase ni akɛ famɔ eha akɛ amɔ lɛ lɛ mli yɛ faŋŋ mli! Agbɛnɛ hu ejeee nɔ ni Yesu fɔɔ feemɔ akɛ eeetswa lɛ diɛŋtsɛ ehe adafi akɛ lɛ ji Mesia lɛ. (Yesaia 42:2; Marko 1:40-44) Esumɔɔɔ ni akɛ hoofeemɔ atswa ehe adafi loo akɛ ehe amaniɛbɔɔ ni jeee anɔkwale aha kɛtsɔ mɛi ni amɛkɛ amɛnaabu aaajaje nɔ. Agbɛnɛ asafoi lɛ miijaje yɛ faŋŋ akɛ eji Maŋtsɛ kɛ Yiwalaherelɔ—Mesia lɛ—ni ehwãnya jamɔ mli hiɛnyiɛlɔi lɛ ni biɔ akɛ eha asafoi lɛ afee dioo lɛ! Mɛni hewɔ tsakemɔ ni tamɔ nɛkɛ ba? Ejaakɛ, taakɛ Yesu tswa he adafi enɔ jetsɛremɔ nɔŋŋ lɛ, “ŋmɛlɛtswaa ni akɛbaawo gbɔmɔ bi lɛ hiɛ nyam lɛ eshɛ.”—Yohane 12:23.
Nifeemɔ kɛ Ekãa—Kɛkɛ lɛ Tsɔɔmɔi ni Hereɔ Mɔ Yiwala
7, 8. Yɛ mɛɛ gbɛ nɔ Yesu nifeemɔi yɛ Nisan 10, afi 33 Ŋ.B. lɛ kaiɔ wɔ nɔ ni efee yɛ sɔlemɔwe lɛ yɛ afi 30 Ŋ.B. Hehoo be lɛ mli lɛ?
7 Beni Yesu shɛ sɔlemɔwe lɛ Ju, Nisan 10 lɛ, etsu nɔ ni ena yɛ shwane ni tsɔ hiɛ lɛ he nii. Eje shishi ‘eshwie mɛi ni hɔɔ nii kɛ mɛi ni heɔ nii yɛ sɔlemɔwe lɛ kɛjɛ jɛmɛ, ni ebutu shika tsakelɔi lɛ akpɔlɔi lɛ kɛ mɛi ni hɔɔ okpoi lɛ asɛii lɛ; ni eŋmɛɛɛ gbɛ ni mɔ ko atere nɔ ko kɛtsɔ sɔlemɔwe lɛ.’ Ebu nɔ fɔŋ feelɔi lɛ fɔ, ni ejaje akɛ: “Ani aŋmako akɛ: ‘Aaatsɛ miwe lɛ jeŋmaji fɛɛ asɔlemɔwe?’ shi nyɛ lɛ nyɛkɛfee ‘ojotswalɔi abu!’ ”—Marko 11:15-17.
8 Yesu nifeemɔi lɛ haa akaiɔ nɔ ni efee yɛ afii etɛ ni eho lɛ mli beni eyasara sɔlemɔwe lɛ yɛ afi 30 Ŋ.B. lɛ Hehoo be lɛ mli lɛ. Ni kɛlɛ, jɛ ni ejɛ amɛ lɛ naa wa waa yɛ nɛkɛ be nɛɛ mli. Ewie jarayelɔi lɛ ni yɔɔ sɔlemɔwe lɛ ahe agbɛnɛ akɛ “ojotswalɔi.” (Luka 19:45, 46; Yohane 2:13-16) Nakai amɛji ejaakɛ amɛheɔ shika ni fa fe nine kɛjɛɔ mɛi ni ehe hiaa ni amɛhe kooloi ni amɛkɛsha afɔle lɛ adɛŋ. Osɔfonukpai lɛ, woloŋmalɔi lɛ, kɛ gbɔmɛi lɛ ateŋ hiɛnaanɔbii lɛ nu nɔ ni Yesu feɔ lɛ he, ni amɛtao shikome ekoŋŋ akɛ amɛaaha agbe lɛ. Kɛlɛ, amɛleee bɔ ni amɛaafee ni amɛgbe Yesu, ejaakɛ gbɔmɛi lɛ fɛɛ ahe jɔ̃ɔ amɛhe yɛ enitsɔɔmɔ lɛ hewɔ, ni amɛmiibɛŋkɛ lɛ koni amɛbo lɛ toi.—Marko 11:18; Luka 19:47, 48.
9. Mɛɛ nikasemɔ Yesu kɛ enɛ tsɔɔ, ni mɛɛ nine efɔ etoibolɔi lɛ ni yɔɔ sɔlemɔwe lɛ?
9 Beni Yesu yaa nɔ etsɔɔ nii yɛ sɔlemɔwe lɛ, ejaje akɛ: “Ŋmɛlɛtswaa ni akɛbaawo gbɔmɔ bi lɛ hiɛ nyam lɛ eshɛ.” Hɛɛ, ele akɛ gbii fioo ko pɛ eshwɛ kɛha ewala akɛ adesa lɛ. Yɛ be mli ni egba bɔ ni esa akɛ ŋmãa kuli agbo dani ewo yibii lɛ—nɔ ni kɛ lɛ diɛŋtsɛ egbele yeɔ egbɔ koni etsɔ mɔ ni atsɔɔ enɔ akɛ naanɔ wala haa mɛi krokomɛi lɛ—Yesu fɔ̃ nine etsɛ mɛi ni boɔ lɛ toi lɛ akɛ: “Kɛji mɔ ko miisɔmɔ mi lɛ, ha ni enyiɛ misɛɛ, ni he ni miyɔɔ lɛ, jɛi misɔɔlɔ lɛ hu aaahi; kɛji mɔ ko miisɔmɔ mi lɛ, mitsɛ aaawo lɛ.”—Yohane 12:23-26.
10. Te Yesu nuɔ piŋmɔ gbele ni mɛɔ lɛ lɛ he ehaa tɛŋŋ?
10 Beni esusuɔ epiŋmɔ gbele ni baaba yɛ gbii ejwɛ pɛ sɛɛ lɛ he lɛ, Yesu tee nɔ akɛ: “Agbɛnɛ misusuma miihao, ni mɛni makɛɛ? Ataa, heremɔ mi yɛ ŋmɛlɛtswaa nɛɛ mli?” Shi anyɛŋ ajo nɔ ni mɛɔ Yesu lɛ naa foi. Ekɛɛ akɛ: “Tsɛbelɛ enɛ hewɔ nɔŋŋ miba yɛ ŋmɛlɛtswaa nɛɛ mli.” Yɛ anɔkwale mli lɛ, Yesu kɛ Nyɔŋmɔ gbɛjianɔtoo muu lɛ fɛɛ kpãa gbee. Etswa efai shi akɛ ebaaha ŋwɛi suɔmɔnaa nii akudɔ enifeemɔi kɛyashi efɔleshaa gbele mli. (Yohane 12:27) Mɛɛ okadi po eto kɛha wɔ nɛkɛ—ehe shi ni eba kwraa kɛha ŋwɛi suɔmɔnaa nii!
11. Mɛɛ tsɔɔmɔi Yesu kɛha asafo ni etsɛko ni nu gbee ni jɛ ŋwɛi lɛ?
11 Akɛni Yesu susuɔ bɔ ni egbele lɛ baasa e-Tsɛ lɛ gbɛi lɛ he aha lɛ he waa hewɔ lɛ, esɔle akɛ: “Ataa, wo ogbɛi lɛ hiɛ nyam!” Asafoi babaoo ni amɛbua amɛhe naa yɛ sɔlemɔwe lɛ anaa kpɛ amɛhe beni amɛnu gbee ko ni jɛ ŋwɛi miijaje akɛ: “Miná miwo ehiɛ nyam, ni masaa mawo ehiɛ nyam ekoŋŋ” lɛ. Tsɔɔlɔ Kpeteŋkpele lɛ kɛ hegbɛ nɛɛ tsu nii ni ekɛɛ asafo lɛ nɔ hewɔ ni anu gbee lɛ, nɔ ni baajɛ egbele lɛ mli aba, kɛ nɔ hewɔ ni esa akɛ amɛná hemɔkɛyeli. (Yohane 12:28-36) Naagbee gbii enyɔ lɛ bafee nɔ ni nitsumɔ diɛŋtsɛ eyi mli obɔ kɛha Yesu. Shi gbi ni hiɛdɔɔ yɔɔ mli waa kã ehiɛ.
Heguɔgbee Wiemɔi Afɔsemɔ kɛ Shishwiemɔ Gbi
12. Mɛɛ mɔdɛŋ jamɔ mli hiɛnyiɛlɔi lɛ bɔ yɛ Jufɔ, Nisan 11, koni amɛtsɔ Yesu tsɔne, ni mɛni jɛ mli ba?
12 Yesu ku sɛɛ etee sɔlemɔwe lɛ shikome ekoŋŋ koni eyatsɔɔ nii yɛ Jufɔ, Nisan 11. Toibolɔi ni mli efu miimɛ lɛ. Beni osɔfonukpai lɛ kɛ maŋ onukpai lɛ wieɔ Yesu nifeemɔ yɛ gbi ni tsɔ hiɛ lɛ he lɛ amɛbi lɛ akɛ: “Mɛɛ hegbɛ oyɔɔ hewɔ ofeɔ nɛkɛ nibii nɛɛ, ni namɔ hao nɛkɛ hegbɛ nɛɛ?” Tsɔɔlɔ Kpele lɛ kɛ ehetoo lɛ ha amɛjwɛŋmɔ futu, ni ebu amɛ abɛi etɛ ko ni mli ka shi faŋŋ—emli enyɔ kɔɔ weintrom he ni ekome kɔɔ yookpeemɔ okpɔlɔŋmɛɛ he—ni ekpá bɔ ni mɛi ni teɔ shi woɔ lɛ lɛ ji mɛi fɔji diɛŋtsɛ ha lɛ he mama. Akɛni nɔ ni jamɔ mli hiɛnyiɛlɔi lɛ nuɔ lɛ wo amɛ mlila hewɔ lɛ, amɛmiitao ni amɛmɔ lɛ. Shi amɛmiishe asafoi lɛ, ni buɔ Yesu akɛ gbalɔ lɛ gbeyei. No hewɔ lɛ amɛka akɛ amɛaalaka lɛ koni ewie nɔ ko ni amɛbaadamɔ nɔ amɛmɔ lɛ. Hetooi ni Yesu haa lɛ ha amɛbu amɛnaa.—Mateo 21:23–22:46.
13. Mɛɛ ŋaa Yesu wo etoibolɔi lɛ yɛ woloŋmalɔi lɛ kɛ Farisifoi lɛ ahe?
13 Akɛni woloŋmalɔi lɛ kɛ Farisifoi lɛ kɛɔ akɛ amɛtsɔɔ Nyɔŋmɔ Mla lɛ hewɔ lɛ, Yesu wo etoibolɔi lɛ hewalɛ agbɛnɛ akɛ: “Nɔ fɛɛ nɔ ni amɛaakɛɛ nyɛ akɛ nyɛye nɔ lɛ, nyɛyea nɔ ni nyɛfea; shi amɛ nifeemɔnii lɛ nyɛkafea; ejaakɛ amɛkɛɔ moŋ, shi amɛfeee.” (Mateo 23:1-3) Mɛɛ heguɔgbee wiemɔi ni mli wa po ekɛha yɛ faŋŋ mli nɛkɛ! Shi Yesu kɛ amɛ egbeko naa. Enaagbee gbi yɛ sɔlemɔwe lɛ nɛ, ni ekɛ ekãa wie heguɔgbee wiemɔi ni tsara nɔ kɛkpa amɛhe mama—ni eko nyiɛ eko sɛɛ tamɔ nugbɔshimɔi ni tsara nɔ.
14, 15. Mɛɛ heguɔgbee jɛmɔi ni naa wa waa Yesu jaje eshi woloŋmalɔi lɛ kɛ Farisifoi lɛ?
14 “Kpoo ha nyɛ, woloŋmalɔi kɛ Farisifoi, osatofoi!” Yesu jaje enɛ shii ekpaa. Nakai amɛji, ejaakɛ taakɛ etsɔɔ mli lɛ, amɛŋáa ŋwɛi Maŋtsɛyeli lɛ naa yɛ gbɔmɛi ahiɛ, ni amɛŋmɛɛɛ mɛi ni taoɔ mli abote lɛ gbɛ koni amɛbote mli. Nɛkɛ osatofoi nɛɛ bɔleɔ ŋshɔ kɛ shikpɔŋ kpula koni amɛna mɔ kome amɛtsake lɛ kɛba Yudafoi ajamɔ mli, ni beni mɔ lɛ etsɔ nakai lɛ, amɛfeɔ lɛ naanɔ hiɛkpatamɔ bi. Yɛ be mli ni amɛkuɔ amɛhiɛ amɛshwieɔ ‘Mla lɛ mli nibii ni he jaraa ni ji kojomɔ kɛ mɔbɔnalɛ kɛ hemɔkɛyeli’ nɔ lɛ, amɛgbalaa jwɛŋmɔ kɛyaa mlijaa nyɔŋmanyɔŋma mli ekome nɔ waa. Ni ji akɛ, amɛtsumɔɔ “kpulu he kɛ kã sɛɛ; shi amɛmligbɛ eyimɔ obɔbɔ kɛ ojotswaa kɛ adufudeyeli” aahu akɛ amɛmligbɛ kpɔtɔmɔ kɛ sharamɔ lɛ etee ehe yɛ kponɔgbɛ jalɛ nii ni amɛfeɔ lɛ sɛɛ. Agbɛnɛ hu, amɛmiisumɔ ni amɛmamɔ gbalɔi lɛ agbohiiabui ni amɛwula amɛ ni amɛkɛgbala jwɛŋmɔ kɛba amɛ diɛŋtsɛ amɛ ejurɔfeemɔ nitsumɔi anɔ, eyɛ mli akɛ amɛji “mɛi ni gbe gbalɔi lɛ abii.”—Mateo 23:13-15, 23-31.
15 Beni Yesu buɔ mɛi ni teɔ shi woɔ lɛ ni amɛdiii mumɔŋ nibii ni jara wawai lɛ asɛɛ lɛ fɔ lɛ, ekɛɛ akɛ: “Kpoo ha nyɛ, gbɛtsɔɔlɔi shwilafoi!” Amɛshwila yɛ jeŋba gbɛfaŋ, ejaakɛ amɛmaa sɔlemɔwe lɛ shika lɛ nɔ mi babaoo fe mumɔŋ nibii ni jara wa ni nakai jamɔhe lɛ damɔ shi kɛha lɛ. Beni Yesu yaa nɔ lɛ, efɔse amɛ heguɔgbee wiemɔi ni mli wa fe fɛɛ lɛ eshwie shi. Ekɛɛ akɛ: “Onufui, shikpaai ashwiei! Te nyɛaafee tɛŋŋ nyɛjo gehena fɔbuu lɛ naa foiŋ?” Hɛɛ, Yesu miikɛɛ amɛ akɛ, yɛ amɛgbɛ fɔŋ lɛ ni amɛdiɔ sɛɛ lɛ hewɔ lɛ, amɛbaaná naanɔ hiɛkpatamɔ mli amanehulu. (Mateo 23:16-22, 33) Eba akɛ wɔ hu wɔɔjie ekãafeemɔ kpo yɛ Maŋtsɛyeli shɛɛ sane lɛ jajemɔ mli, kɛ́ ekɔɔ apasa jamɔ he mama ni wɔɔkpa po he.
16. Mɛɛ gbalɛ ko ni he hiaa Yesu kɛha ekaselɔi lɛ, beni eta Mu Gɔŋ lɛ nɔ lɛ?
16 Agbɛnɛ Yesu shi sɔlemɔwe lɛ. Beni shwane hulu kpɛmɔ lɛ naa baa shi lɛ, lɛ kɛ ebɔfoi lɛ kwɔ Mu Gɔŋ lɛ. Beni Yesu ta jɛmɛ lɛ, ekɛ gbalɛ ni kɔɔ sɔlemɔtsu lɛ hiɛkpatamɔ kɛ beni eba lɛ kɛ nibii agbɛjianɔtoo lɛ naagbee lɛ he okadi ha. Nɔ ni nɛkɛ gbalɛ wiemɔi nɛɛ tsɔɔ lɛ shɛɔ wɔnɔ kɛbashiɔ wɔbe nɛɛ mli. Nakai gbɛkɛ lɛ, Yesu kɛɛ ekaselɔi lɛ hu akɛ: “Nyɛle akɛ eshwɛ gbii enyɔ ni ayeɔ Hehoo lɛ, ni aaajie gbɔmɔ bi lɛ aha ni asɛŋ lɛ.”—Mateo 24:1-14; 26:1, 2.
Yesu ‘Sumɔ Emɛi lɛ Kɛwula Shi’
17. (a) Mɛɛ nikasemɔ ko Yesu tsɔɔ mɛi 12 lɛ, yɛ Nisan 14, Hehoo be lɛ mli? (b) Mɛɛ Kaimɔ Yesu to shishi beni eshwie Yuda Iskariot lɛ sɛɛ?
17 Yɛ gbii enyɔ ni nyiɛ sɛɛ ba lɛ mli lɛ—Nisan 12 kɛ 13 lɛ—Yesu ejieee ehe kpo faŋŋ yɛ sɔlemɔwe lɛ. Jamɔ mli hiɛnyiɛlɔi lɛ miitao lɛ amɛgbe, ni esumɔɔɔ ni nɔ ko bafolɔɔ Hehoo lɛ ni ekɛ ebɔfoi lɛ baaye lɛ mli. Hulu ni nyɔɔ shi Soo lɛ je shishi Nisan 14—Yesu shihilɛ yɛ shikpɔŋ nɔ akɛ adesa lɛ naagbee gbi lɛ. Nakai gbɛkɛ lɛ, Yesu kɛ ebɔfoi lɛ ekpe kutuu yɛ shia ko mli yɛ Yerusalem, he ni amɛto gbɛjianɔ yɛ koni amɛye Hehoo lɛ. Beni amɛ fɛɛ amɛyeɔ Hehoo lɛ, etsɔɔ mɛi 12 lɛ nikasemɔ kpakpa ko yɛ heshibaa he kɛtsɔ amɛnaji ahe ni efɔfɔɔ eha amɛ lɛ nɔ. Beni Yesu eshwie Yuda Iskariot ni eyakpɛlɛ nɔ akɛ ebaahe jwiɛtɛi kukuji 30—nɔ ni akɛheɔ nyɔ̃ŋ ko kɛkɛ yɛ Mose Mla lɛ naa—koni etsɔɔ e-Nuntsɔ lɛ sɛɛgbɛ lɛ sɛɛ lɛ, Yesu to egbele lɛ Kaimɔ lɛ shishi.—2 Mose 21:32; Mateo 26:14, 15, 26-29; Yohane 13:2-30.
18. Mɛɛ tsɔɔmɔi lolo Yesu jɛ esuɔmɔ mli ekɛha ebɔfoi anɔkwafoi 11 lɛ, ni mɛɛ gbɛ nɔ etsɔ esaa amɛ kɛha shi ni ebaashi amɛ lɛ ni bɛŋkɛɔ lɛ?
18 Beni ato Kaimɔ lɛ shishi lɛ sɛɛ lɛ, bɔfoi lɛ kɛ amɛhe wo ŋwanejee ni naa wa ni kɔɔ mɔ ni ji agbo yɛ amɛteŋ lɛ he lɛ mli. Yɛ nɔ najiaŋ ni Yesu aaakã amɛhiɛ lɛ, ekɛ tsuishitoo tsɔɔ amɛ sɛɛnamɔ ni yɔɔ mɛi krokomɛi ni amɛaasɔmɔ amɛ lɛ he nii. Akɛni ele akɛ amɛkɛ lɛ ehi shi yɛ ekaai lɛ amli hewɔ lɛ, lɛ diɛŋtsɛ ekɛ amɛ fee kpaŋmɔ kɛha maŋtsɛyeli. (Luka 22:24-30) Yesu fã amɛ hu akɛ amɛsumɔsumɔɔ amɛhe tamɔ bɔ ni esumɔ amɛ lɛ. (Yohane 13:34) Beni Yesu kɛ shishashaomɔ feɔ enii yɛ nakai tsũ lɛ mli lɛ, ejɛ suɔmɔ mli esaa amɛ kɛha shi ni eshiɔ amɛ ni ebɛŋkɛ lɛ. Ema ekɛ amɛ teŋ naanyobɔɔ lɛ nɔ mi eha amɛ, ewo amɛ hewalɛ ni amɛná hemɔkɛyeli, ni ewo amɛ shi akɛ ebaaha mumɔ krɔŋkrɔŋ lɛ abaye abua amɛ. (Yohane 14:1-17; 15:15) Dani Yesu aaashi shia lɛ, ekpa e-Tsɛ lɛ fai akɛ: “Ŋmɛlɛtswaa lɛ eshɛ: wo obi lɛ hiɛ nyam, koni obi lɛ hu awo ohiɛ nyam.” Yɛ anɔkwale mli lɛ, Yesu esaa bɔfoi lɛ kɛha eshimɔ, ni yɛ anɔkwale mli lɛ ‘esumɔ lɛ diɛŋtsɛ emɛi lɛ kɛyashi naagbee.’—Yohane 13:1; 17:1.
19. Mɛni hewɔ Yesu yɔɔ piŋmɔ mli yɛ Getsemane trom lɛ mli lɛ?
19 Eeenyɛ efee akɛ nyɔɔŋteŋ eho beni Yesu kɛ ebɔfoi anɔkwafoi 11 lɛ shɛ Getsemane trom lɛ mli lɛ. Ekɛ ebɔfoi lɛ etee jɛmɛ shii abɔ. (Yohane 18:1, 2) Yesu baagbo yɛ ŋmɛlɛtswai fioo ko mli tamɔ oookɛɛ eji mlatɔlɔ ni ahiɔ lɛ fe fɛɛ. Piŋmɔ ni akpaa gbɛ akɛ ebaajɛ niiashikpamɔ ni tamɔ nɛkɛ mli aba, kɛ bɔ ni ekɛ ahorabɔɔ aaaba e-Tsɛ gbɛi anɔ lɛ naa wa aahu akɛ beni Yesu sɔleɔ lɛ, ehe latsaa lɛ tsɔ tamɔ lá kulibii ni tsereɔ shwieɔ shi. (Luka 22:41-44) Yesu kɛɛ bɔfoi lɛ akɛ: “Ŋmɛlɛtswaa lɛ eshɛ, . . . naa, mɔ ni baatsɔɔ misɛɛgbɛ lɛ eshɛ shi etã.” Beni ewieɔ lolo lɛ, Yuda Iskariot pue, ni asafoi babaoo ni hiɛ kɔtii kɛ kanei kɛ tawuu nii fata ehe. Amɛba koni amɛbamɔ Yesu. Eteee shi ewooo amɛ. Etsɔɔ mli akɛ: “Shi no lɛ te aaafee tɛŋŋ ni ŋmalɛi lɛ aaaba mli, akɛ ja afee nɛkɛ nɔŋŋ?”—Marko 14:41-43; Mateo 26:48-54.
Awo Gbɔmɔ Bi lɛ Hiɛ Nyam!
20. (a) Mɛɛ niseniianii afee Yesu yɛ emɔmɔ lɛ sɛɛ? (b) Mɛni hewɔ Yesu bo akɛ: “Agbe naa!” beni eshwɛ fioo ni ebaagbo lɛ?
20 Beni amɔ Yesu sɛɛ lɛ, amale odasefoi folɔ enaa, kojolɔi ni hiɛ jwɛŋmɔ fɔŋ bu lɛ fɔ, Pontio Pilato bu lɛ gbele fɔ, osɔfoi kɛ asafoi ye ehe fɛo, ni asraafoi ye ehe fɛo ni amɛkɛ piŋmɔ ba enɔ. (Marko 14:53-65; 15:1, 15; Yohane 19:1-3) Beni shɛɔ Sohaa shwane lɛ, akala Yesu akpɛtɛ piŋmɔ sɛŋmɔtso nɔ, ni epiŋ waa diɛŋtsɛ yɛ be mli ni egbɔmɔtso lɛ tsiimɔ tsɛrɛɔ eheloo yɛ he ni akala eniji kɛ enaji plɛkooi lɛ awo lɛ. (Yohane 19:17, 18) Aaafee shwane ŋmɛji etɛ lɛ, Yesu bo waa akɛ: “Ágbe naa!” Hɛɛ, egbe nibii fɛɛ ni eba shikpɔŋ nɔ koni ebatsu lɛ naa. Beni ekɛ emumɔ woɔ Nyɔŋmɔ dɛŋ lɛ, ema eyi shi ni egbo. (Yohane 19:28, 30; Mateo 27:45, 46; Luka 23:46) Yɛ no sɛɛ gbi ni ji etɛ lɛ nɔ lɛ, Yehowa tée e-Bi lɛ shi. (Marko 16:1-6) Yesu shitee lɛ sɛɛ gbii 40 lɛ, ekwɔ kɛtee ŋwɛi, ni awo ehiɛ nyam.—Yohane 17:5; Bɔfoi lɛ Asaji 1:3, 9-12; Filipibii 2:8-11.
21. Te wɔɔfee tɛŋŋ wɔkase Yesu?
21 Te wɔɔfee tɛŋŋ ‘wɔnyiɛ Yesu nanemaahei asɛɛ kpaakpa’? (1 Petro 2:21) Taakɛ efee lɛ, nyɛhaa wɔwajea wɔhe waa yɛ Maŋtsɛyeli shiɛmɔ kɛ kaselɔfeemɔ nitsumɔ lɛ mli, ni wɔná ekãa kɛ hiɛwaa yɛ Nyɔŋmɔ wiemɔ lɛ he wiemɔ mli. (Mateo 24:14; 28:19, 20; Bɔfoi lɛ Asaji 4:29-31; Filipibii 1:14) Wɔkaha wɔhiɛ miije he ni wɔshɛ yɛ be ni hoɔ nɛɛ mli lɛ nɔ, aloo ni wɔɔkwa hewalɛ ni wɔɔwowoo wɔhe kɛya suɔmɔ kɛ nitsumɔi kpakpai amli lɛ. (Marko 13:28-33; Hebribii 10:24, 25) Eba akɛ wɔɔha Yehowa Nyɔŋmɔ suɔmɔnaa nii, kɛ wɔhiɛ ni wɔɔha ahi wɔhe nɔ akɛ “naagbee be lɛ” mli wɔyɔɔ lɛ, aye wɔshihilɛ mli nifeemɔi fɛɛ nɔ.—Daniel 12:4
Te Obaaha Hetoo Oha Tɛŋŋ?
• Mɛɛ hewalɛ le ni Yesu le akɛ egbele lɛ ebɛŋkɛ lɛ ná yɛ enaagbee sɔɔmɔ nitsumɔ yɛ sɔlemɔwe lɛ nɔ yɛ Yerusalem?
• Mɛni tsɔɔ akɛ Yesu ‘sumɔ emɛi lɛ kɛyashi naagbee’?
• Mɛni saji ni tee nɔ yɛ Yesu shihilɛ mli yɛ naagbee ŋmɛlɛtswai fioo lɛ mli lɛ tsɔɔ yɛ ehe?
• Te wɔɔfee tɛŋŋ wɔkase Kristo Yesu yɛ wɔsɔɔmɔ nitsumɔ lɛ mli?
[Nikasemɔ lɛ he Sanebimɔi]
[Mfoniri ni yɔɔ baafa 18]
Yesu ‘sumɔ amɛ kɛwula shi’