Maŋtsɛyeli Jajelɔi Bɔ Amaniɛ

Yehowa Hãa Ewebii Hejɔɔmɔhe

HEJƆƆMƆHE ko ni hɔ̃ɔŋ yɔɔ shishi ni yɔɔ gbɛ ni kã gɔŋ ko nɔ lɛ ji miishɛɛhe ní fe fɛɛ kɛha gbɛfalɔ ko ni etɔ lɛ. Atsɛɔ hejɔɔmɔhei ni tamɔ nɛkɛ yɛ Nepal akɛ chautara. Abaanyɛ ana bɔ ni chautara ji diɛŋtsɛ yɛ tso agbo ni ebu kusuu masɛi, ni ji he ko ni hɔ̃ɔŋ yɔɔ ni ataa jɛmɛ ajɔɔ he lɛ. Eji mlihilɛ nifeemɔ akɛ aaafee chautara aha, ni mɛi ni feɔ enɛ lɛ ateŋ mɛi babaoo haaa mɛi ale mɛi ni amɛji.

Niiashikpamɔi ni jɛ Nepal lɛ tsɔɔ bɔ ni Yehowa Nyɔŋmɔ ebatsɔ miishɛɛ kɛ mumɔŋ hejɔɔmɔ Jɛɛhe kɛha “gbɛfalɔi” babaoo ni etɔ amɛ ni yɔɔ nɛkɛ nibii agbɛjianɔtoo nɛɛ mli lɛ.—Lala 23:2.

• Lil Kumari yɛ maŋtiase fɛfɛo ko ni yɔɔ Pokhara lɛ mli, he ni Himalaya Gɔji ni dara waa diɛŋtsɛ ni snoo ehà amɛnɔ lɛ yɔɔ ní anaa lɛ. Shi akɛni Lil Kumari ehao yɛ weku lɛ shika he saji ahe hewɔ lɛ, enu he akɛ hiɛnɔkamɔ tsɔ ko bɛ. Beni Yehowa Odasefoi lɛ ateŋ mɔ kome yasara lɛ lɛ, Biblia mli hiɛnɔkamɔ kpakpa ni ená lɛ tsirɛ lɛ ni amrɔ lɛ nɔŋŋ ebi ni akɛ lɛ afee shia Biblia mli nikasemɔ.

Eyɛ mli akɛ Lil Kumari ná nikasemɔ lɛ he miishɛɛ moŋ, shi ebɛ mlɛo akɛ ebaatsa nɔ yɛ weku shitee-kɛ-woo ni mli wa waa ni ekɛkpeɔ lɛ hewɔ. Shi enijiaŋ ejeee wui. Eyaa Kristofoi akpeei ashishi be fɛɛ be ni ekɛ nɔ ni ekaseɔ lɛ tsuɔ nii, titri lɛ nɔ ni kɔɔ ŋa heshibaa he lɛ. Nɔ ni jɛ mli ba ji akɛ, ewu kɛ enyɛ bayɔse akɛ weku muu lɛ fɛɛ miiná Lil Kumari Biblia mli nikasemɔ lɛ he sɛɛ.

Amrɔ nɛɛ ewu kɛ wekumɛi lɛ ateŋ mɛi komɛi miikase Nyɔŋmɔ Wiemɔ lɛ. Yɛ kpee ko ni afee nyɛsɛɛ nɛɛ lɛ shishi yɛ Pokhara lɛ, Lil Kumari kɛ ewekumɛi krokomɛi 15 ni fata ehe lɛ ná gbɛjianɔtoo lɛ he miishɛɛ waa. Ewie akɛ: “Mishia lɛ ebatsɔ hejɔɔmɔhe ejaakɛ amrɔ nɛɛ wɔweku lɛ efee ekome yɛ anɔkwa jamɔ mli, ni miná anɔkwa jwɛŋmɔŋ toiŋjɔlɛ.”

• Eyɛ mli akɛ mla eŋmɛɛɛ hiɛnyamwoo ni jieɔ hiɛaŋkwɛmɔ kpo gbɛ yɛ Nepal moŋ, shi enáa gbɔmɛi lɛ ashihilɛ gbɛ lɛ nɔ hewalɛ waa lolo. No hewɔ lɛ, mɛi babaoo yɛ miishɛɛ yɛ nɔ ni Biblia lɛ yɔɔ kɛɛmɔ yɛ hegbɔyeli kɛ hiɛaŋ ni akwɛɛɛ he. Akɛni Surya Maya kɛ eweku lɛ ná amɛle akɛ “Nyɔŋmɔ jeee mɛi ahiɛaŋkwɛlɔ” hewɔ lɛ, enɛ tsake amɛshihilɛ gbɛ kwraa.—Bɔfoi lɛ Asaji 10:34.

Hiɛnyamwoo ni jieɔ hiɛaŋkwɛmɔ kpo ni jalɛsaneyeli bɛ mli lɛ kɛ blema saji kɛ kusumii ni ehe shi waa lɛ he nɔnyɛɛ lɛ hao Surya Maya waa. Ákɛ yoo ni etuu ehe eha jamɔ lɛ, Surya Maya kɛ afii abɔ ebi yelikɛbuamɔ kɛjɛ emaga nyɔŋmɔi lɛ adɛŋ. Shi ahaaa esɔlemɔi lɛ ahetoo. Gbi ko beni ebolɔɔ kɛha yelikɛbuamɔ lɛ, Babita ni ji enabi yoo ni eye afii ekpaa lɛ tsi ebɛŋkɛ lɛ ni ebi akɛ: “Mɛni hewɔ obiɔ yelikɛbuamɔ yɛ amagai ni nyɛŋ nɔ ko afee nɛɛ ahiɛ?”

Sane lɛ ji akɛ, Babita nyɛ kɛ Yehowa Odasefoi lɛ ateŋ mɔ kome miikase Biblia lɛ. Babita kɛ ekãa fɔ enaa nine kɛtee Kristofoi akpee ko. Beni Surya Maya tee kpee lɛ, efee lɛ naakpɛɛ akɛ eyana gbɔmɛi srɔtoisrɔtoi ni miinyanyaai amɛhe kɛ miishɛɛ ni hetsɛ̃ ko kwraa bɛ mli. Amrɔ nɔŋŋ ni ebi ni akɛ lɛ afee shia Biblia mli nikasemɔ. Eyɛ mli akɛ nɔ ni jɛ mli kɛba ji enaneshi tu ni ekutsoŋbii lɛ tswa lɛ moŋ, shi enijiaŋ ejeee wui; ni bɔ ni elé nikanemɔ kɛ niŋmaa jogbaŋŋ lɛ hu nyɛɛɛ atsĩ enaa yɛ mumɔŋ hiɛyaa mli.

Afi kpaanyɔ eho, ni eweku lɛ mli bii ekpaa ni ewu kɛ ebii etɛ fata he lɛ ebatsɔmɔ Yehowa Odasefoi. Amrɔ nɛɛ Surya Maya ji be-fɛɛ sɔɔlɔ, daa gbɛgbalɔ, ni kɛ miishɛɛ miiye miibua mɛi krokomɛi koni amɛto amɛjatsui ni tsii lɛ shi yɛ hejɔɔmɔhe diɛŋtsɛ ni Yehowa pɛ baanyɛ ekɛha lɛ.