Akanya Amɛ Koni Amɛsɔmɔ

MƐNI baakanya gbalashihilɛ mli hefatalɔi 24 ni miiye omanye yɛ amɛshihilɛ mli koni amɛshi amɛwekumɛi, nanemɛi, kɛ hei ni amɛle jogbaŋŋ lɛ koni amɛkɛ amɛhe awo maŋsɛɛ sanekpakpa shiɛmɔ nitsumɔ lɛ mli yɛ maŋsɛɛ? Mɛni hewɔ eŋɔɔ amɛnaa akɛ amɛaaya hei tamɔ Papua New Guinea kɛ Taiwan, kɛ agbɛnɛ hu lɛ Afrika kɛ Latin-Amerika maji anɔ? Ani bɔ ni amɛsumɔɔ ni amɛyakpá nibii ashi amɛkwɛ lɛ hewɔ? Dabi. Shi moŋ eji anɔkwale suɔmɔ ni amɛyɔɔ kɛha Nyɔŋmɔ kɛ amɛnanemɛi.—Mateo 22:37-39.

Namɛi ji nɛkɛ mɛi nɛɛ? Amɛji Buu Mɔɔ Biblia Gilead Skul klas ni ji 109 mli bii ni egbe skul naa lɛ. Yɛ Hɔɔ, September 9, 2000 lɛ, mɛi aaafee 5,198 bua amɛhe naa yɛ Watchtower Educational Center—ni yɔɔ Patterson, New York lɛ—kɛ hei krokomɛi ni amɔ wiemɔi lɛ kɛtee koni mɛi anyɛ abo suɔmɔ ŋaawoo ni baanyɛ eye ebua mɛi ni egbe skul lɛ naa lɛ koni amɛye omanye yɛ maŋsɛɛ sanekpakpa shiɛmɔ nitsumɔ lɛ mli.

Stephen Lett ni fata Yehowa Odasefoi a-Nɔyeli Kuu lɛ mli Teaching Committee (Nitsɔɔmɔ Ajinafoi Akuu) lɛ he lɛ ji sɛinɔtalɔ kɛha gbɛjianɔtoo lɛ. Ekɛ ehiɛkpamɔ wiemɔ lɛ damɔ Mateo 5:13 nɔ, “Shikpɔŋ lɛ nɔ ŋoo ji nyɛ.” Nyɛminuu Lett tsɔɔ mli akɛ, Yesu wiemɔi lɛ kɔɔ nikaselɔi lɛ ni egbe skul naa lɛ ahe. Ákɛ nɔkwɛmɔnɔ lɛ, ŋoo haa nii ŋɔɔ. No hewɔ lɛ, kɛtsɔ amɛ shiɛmɔ nitsumɔ ni mɔɔ shi lɛ nɔ lɛ, maŋsɛɛ sanekpakpa shiɛlɔi lɛ tamɔ ŋoo yɛ mfonirifeemɔ gbɛ nɔ.

Hewalɛwoo ni Akɛha

Kɛkɛ ni Nyɛminuu Lett ha Yehowa tsuji komɛi ni amɛ́sɔmɔ yɛ be kakadaŋŋ mli lɛ kɛ Ŋmalɛ mli wiemɔi kukuji ni hewalɛ yɔɔ mli ha amɛ. Klɛŋklɛŋ mɔ ni etsɛ ji John Wischuk ni tsuɔ nii yɛ Writing Department (Niŋmaa Nitsumɔhe) lɛ. Esane lɛ yitso lɛ ji, “Lala ni Sɛɛ Kɛɛɛ Kwraa lɛ Woɔ Maŋsɛɛ Sanekpakpa Shiɛlɔi Hewalɛ,” ni edamɔ lala 117 lɛ nɔ. Ŋmɛnɛ, ehe ebahia yɛ jeŋ fɛɛ akɛ aye “jeŋmaji” kɛ “majimaji” lɛ fɛɛ Yehowa kɛ e-Maŋtsɛyeli lɛ he odase. Awo nikaselɔi lɛ hewalɛ koni amɛtsu nɔ ni Lala 117 lɛ kɛɔ lɛ he nii kɛtsɔ hewalɛ ni amɛaawo mɛi krokomɛi koni ‘amɛjie Yehowa yi’ lɛ nɔ.

No sɛɛ lɛ sɛinɔtalɔ lɛ tsɛ Guy Pierce ni ji Nɔyeli Kuu lɛ mlinyo lɛ kɛba. Ewie saneyitso ni ji “Feemɔ Tswaa, Kɛlɛ Feemɔ Shiŋŋ” lɛ he. Nyɔŋmɔ Wiemɔ lɛ yɛ shiŋŋ. Atsɛ Yehowa Nyɔŋmɔ akɛ Tɛsaa yɛ 5 Mose 32:4 lɛ, ni kɛlɛ, e-Wiemɔ lɛ ŋmɛɔ tswaafeemɔ gbɛ, yɛ bɔ ni aŋmala yɛ wiemɔi srɔtoi kɛ hiŋmɛigbelemɔi srɔtoi amli lɛ hewɔ—hɛɛ kɛha gbɔmɛi fɛɛ. Awo nikaselɔi lɛ hewalɛ koni amɛshiɛ Nyɔŋmɔ wiemɔ lɛ, ni amɛha emli shɛɛ sane lɛ ashɛ mɛi lɛ atsui kɛ amɛhenilee he. (2 Korintobii 4:2) Nyɛminuu Pierce wo ŋaa akɛ: “Nyɛfea shiŋŋ yɛ shishitoo mlai ni ja ahe, shi kɛlɛ, nyɛfea tswaa. Nyɛkabaa mɛi ni yɔɔ he ni nyɛtsuɔ nii yɛ lɛ ashi, akɛni amɛ kusum nifeemɔ yɔɔ srɔto lɛ hewɔ.”

Karl Adams, ni ji Gilead nitsɔɔlɔi lɛ ateŋ mɔ kome ni kɛ nɔ ni miihe ashɛ afii 53 esɔmɔ yɛ Asafo lɛ jeŋ fɛɛ yitso lɛ wie sane ni he hiaa waa lɛ he, nɔ ni hiɛ yitso akɛ “Nɛgbɛ Nyɛbaajɛ Biɛ Kɛya.” Lɛɛlɛŋ, gbalashihilɛ  mli hefatalɔi 24 anine shɛ nitsumɔ nɔ kɛmiiya shikpɔji srɔtoi 20 nɔ yɛ je lɛŋ, shi abi sane lɛ akɛ, Kɛ nyɛyashɛ jɛmɛ lɛ, ni nyɛna lɛ, mɛni nyɛbaafee? Wɔyɛ jeŋ ni bɛ shiŋŋ mli. Gbɔmɛi sumɔɔ ni amɛya hei ní eji ehee, ni amɛyafee nibii heei yɛ mɔdɛŋ ni amɛbɔɔ koni amɛsa amɛ diɛŋtsɛ amɛhiɛ lɛ mli. Yɛ gbɛ kroko nɔ lɛ, kaselɔi lɛ anine shɛ nitsumɔ lɛ nɔ kɛjɛ Yehowa ŋɔɔ kɛmiiya he ni lɛ etaoɔ akɛ amɛya ni amɛjɛ amɛtsui mli amɛkwɛ ‘etooi’ lɛ. Esaaa akɛ amɛfeɔ amɛnii tamɔ mɛi ni hi blema Israel ni yɛ amɛ pɛsɛmkunya shihilɛi ahewɔ lɛ amɛnine eyashɛɛɛ hegbɛ ni Yehowa kɛha akɛ ekɛ amɛ aaatsu nii koni etsɔ amɛnɔ ejɔɔ adesai fɛɛ lɛ. Shi moŋ, esa akɛ amɛkase Yesu Kristo, mɔ ni be fɛɛ be lɛ efeɔ e-Tsɛ lɛ suɔmɔnaa nii ni esusuuu lɛ diɛŋtsɛ ehe, ni efeɔ toiboo yɛ shihilɛ fɛɛ shihilɛ ni ekɛkpeɔ lɛ mli lɛ.—Yohane 8:29; 10:16.

“Buu Nyɔŋmɔ Nibii ni Mli Kwɔlɔ lɛ akɛ Amɛjara Wa” ji saneyitso ni Wallace Liverance, ni ji Gilead Skul lɛ onukpa lɛ kɛha. Ŋmalɛi lɛ wie Nyɔŋmɔ Wiemɔ lɛ he shii abɔ akɛ eji nii ni jara wa, jwetrii, kɛ nii ni abuɔ waa ni esa akɛ atiu sɛɛ. Abɛi 2:1-5 tsɔɔ akɛ dani ‘wɔɔná Nyɔŋmɔ he nilee’ lɛ, esa akɛ wɔtao esɛɛgbɛ tamɔ “jwetrii ni aŋɔtee.” Wielɔ lɛ wo nikaselɔi lɛ hewalɛ koni amɛya nɔ amɛtsa Nyɔŋmɔ nibii ni mli kwɔlɔ lɛ yɛ be  mli ni amɛtsuɔ amɛ nitsumɔi heei lɛ ahe nii lɛ. Nyɛminuu Liverance kɛ amɛ susu sane lɛ he akɛ: “Anyɛɔ atsuɔ enɛ he nii ejaakɛ etswaa hemɔkɛyeli kɛ hekɛnɔfɔɔ ni ayɔɔ yɛ Yehowa mli lɛ emaa shi, ni ebaawaje nyɛ faishitswaa akɛ nyɛkɛ nyɛhe aaakpɛtɛ nyɛsɔɔmɔ nitsumɔ lɛ he kpɛŋŋ. Ebaaye ebua bo koni okɛ hekɛnɔfɔɔ awie, koni ofee tsɔɔlɔ ni he esa waa yɛ be mli ni ogbalaa Nyɔŋmɔ yiŋtoi amli otsɔɔ mɛi krokomɛi lɛ.”

Afee tamɔ nɔ ni ayɛ skultsu lɛ mli, ni Gilead Skul tsɔɔlɔi lɛ ateŋ mɔ kome tsɔɔ bɔ ni Yehowa ejɔɔ bɔ ni nikaselɔi lɛ shiɛɔ amɛhaa lɛ nɔ yɛ nyɔji enumɔ ni eho lɛ amli lɛ mli. Lawrence Bowen tsĩ bɔfo Paulo wiemɔi ni yɔɔ Bɔfoi lɛ Asaji 20:20 ni kɔɔ emaŋ sɔɔmɔ nitsumɔ lɛ he yɛ Efeso lɛ tã, ni ema nɔ mi akɛ Paulo kɛ hegbɛ fɛɛ hegbɛ ni ená lɛ tsu nii ni ekɛye odase. Niiashikpamɔi ni nikaselɔi lɛ kɛha lɛ tsɔɔ akɛ, taakɛ Paulo ji lɛ, mɛi ni suɔmɔ ni amɛyɔɔ kɛha Nyɔŋmɔ kɛ nanemɛi tsirɛɔ amɛ yɛ wɔbe nɛɛ amli lɛ kpaaa anɔkwale lɛ he wiemɔ, ni amɛhaa hewalɛ ni Nyɔŋmɔ Wiemɔ lɛ yɔɔ lɛ tsuɔ nii yɛ mɛi krokomɛi amli. Enɛ kɛ Yehowa jɔɔmɔi baa.

Mɛi ni Yɔɔ Niiashikpamɔ lɛ Wie

Yɛ amɛ skul nikasemɔ lɛ mli lɛ, Gilead klas nɛɛ mli bii lɛ ná Nitsumɔhe Niji Ajinafoi akui ni jɛ maji 23 ni amɛ hu amɛba Patterson Educational Center lɛ kɛha tsɔsemɔ krɛdɛɛ ni amɛkɛ amɛ bɔ lɛ he sɛɛ waa. Leon Weaver kɛ Merton Campbell ni tsuɔ nii yɛ Service Department (Sɔɔmɔ Nitsumɔhe) lɛ bibii Nitsumɔhe Niji Ajinafoi Akui mli bii lɛ saji, ni amɛteŋ mɛi komɛi étee Gilead dã. Saji ni anu yɛ maŋsɛɛ sanekpakpa shiɛlɔi ni etsɛ nɛɛ anaa lɛ ha nikaselɔi lɛ kɛ amɛwekumɛi lɛ ná hekɛnɔfɔɔ.

Nɔ ni fata ŋaawoo ni akɛha klas ni egbe nikasemɔ naa lɛ he koni eye ebua amɛ ni amɛtsake amɛshihilɛ amɛwo maŋsɛɛ nitsumɔ lɛ mli lɛ ji saji ni tamɔ enɛɛmɛi: “Hiɛmɔ jwɛŋmɔ ni ja. Kɛ okɛ shihilɛ ni onako dã kpe aloo nɔ ni onuuu shishi lɛ, kaaha onijiaŋ miije wui. Okɛ ohiɛ afɔ̃ Yehowa nɔ”; “le bɔ ni afeɔ ahiɔ shi yɛ miishɛɛ mli yɛ nɔ ni oyɔɔ lɛ naa, ni okɛ ohiɛ afɔ̃ Yehowa nɔ akɛ lɛ ekɛ nibii ni he hiaa bo yɛ shihilɛ mli lɛ baaha bo.” Saji krokomɛi ni awie he lɛ gbala jwɛŋmɔ kɛtee yelikɛbuamɔ ni akɛha nikaselɔi lɛ koni amɛna miishɛɛ daa yɛ amɛnitsumɔ mli lɛ nɔ. Wiemɔ lɛ mli wiemɔi komɛi ji akɛ: “Okɛ nitsumɔ ni atu awo odɛŋ lɛ akato he ni ojɛ lɛ he”; “kasemɔ jɛmɛ wiemɔ lɛ, ni owie lɛ jogbaŋŋ, bɔni afee ni onyɛ okɛ mɛi krokomɛi agba sane”; “kasemɔ gbɔmɛi lɛ akusum kɛ amɛnifeemɔi lɛ ejaakɛ enɛ baaye ebua bo koni oya nɔ osɔmɔ.” Nɛkɛ wiemɔi nɛɛ wo maŋsɛɛ sanekpakpa shiɛlɔi ehee nɛɛ hewalɛ waa diɛŋtsɛ.

Yɛ saji ni abibii amɛ lɛ asɛɛ lɛ, David Splane ni ji tsutsu maŋsɛɛ sanekpakpa shiɛlɔ kɛ mɔ ni gbe Gilead klas ni ji 42 naa, ni amrɔ nɛɛ eesɔmɔ akɛ Yehowa Odasefoi a-Nɔyeli Kuu lɛ mlinyo lɛ saa sane ko ni he hiaa waa ni hɛle mɛi ashi ni hiɛ saneyitso ni ji akɛ, “Nikaselɔi, aloo Nikaselɔi ni Egbe Nikasemɔ Naa—Te Emli Nɔ ni Ji?” Ebi klas ni egbe nikasemɔ naa lɛ akɛ: “Te nyɛbaabu nyɛhe nyɛha tɛŋŋ yɛ be mli ni nyɛyaa nyɛ maŋsɛɛ sanekpakpa shiɛmɔ nitsumɔ lɛ mli lɛ? Ákɛ nikaselɔi ni egbe nikasemɔ naa ni le nɔ fɛɛ nɔ ni kɔɔ maŋsɛɛ sanekpakpa shiɛmɔ nitsumɔ he, aloo ákɛ nikaselɔi ni yɔɔ nibii babaoo ni amɛbaakase lolo?” Nyɛminuu Splane tsĩ tã akɛ mɔ ni egbe nikasemɔ naa ni yɔɔ nilee lɛ buɔ ehe nikaselɔ. Esa akɛ maŋsɛɛ sanekpakpa shiɛlɔi lɛ ale akɛ, mɔ fɛɛ mɔ ni amɛkɛaakpe yɛ amɛmaŋsɛɛ nitsumɔ lɛ mli lɛ baanyɛ atsɔɔ amɛ nɔ ko. (Filipibii 2:3) Awo nikaselɔi lɛ hewalɛ koni amɛkɛ amɛnanemɛi maŋsɛɛ sanekpakpa shiɛlɔi lɛ, nitsumɔhe nine lɛ, kɛ asafo ni yɔɔ he ni amɛyɔɔ lɛ afee ekome. Nyɛminuu Splane wo hewalɛ akɛ: “Nyɛye omanye yɛ nyɛnaagbee kaa lɛ mli, shi nyɛji nikaselɔi lolo. Nyɛhaa enɛ afea faŋŋ kɛhaa mɔ fɛɛ mɔ akɛ nyɛba ni nyɛbakase nii yɛ jɛmɛ.”

Yɛ wiemɔ nɛɛ sɛɛ lɛ, nikaselɔi lɛ anine shɛ amɛyijiemɔ woji anɔ ni atswa hei ni amɛbaaya amɛyatsu nii yɛ lɛ ahe adafi atsɔɔ toibolɔi lɛ. Enɛ sɛɛ lɛ, eta nikaselɔi ni egbe nikasemɔ naa lɛ atsuiŋ waa beni klasbii lɛ anajiaŋdamɔlɔ kane amɛfai shi ni amɛtswa akɛ amɛbaaha nɔ ni amɛkase kɛjɛ Nyɔŋmɔ Wiemɔ lɛ mli lɛ awo amɛ hewalɛ koni amɛtsu sɔɔmɔ krɔŋkrɔŋ he nii waa lɛ.

Mɛi fɛɛ ni ba jɛmɛ lɛ baakpɛlɛ nɔ akɛ, ŋaawoo ni akɛha lɛ waje nikaselɔi ni egbe nikasemɔ naa lɛ, ní amɛtswa amɛfai shi akɛ amɛbaajie suɔmɔ kpo amɛtsɔɔ Nyɔŋmɔ kɛ amɛnanemɛi adesai lɛ. Agbɛnɛ hu eha amɛtswa amɛfai shi waa fe bei fɛɛ akɛ amɛbaaye amɛbua mɛi yɛ mumɔŋ yɛ amɛ maŋsɛɛ sanekpakpa shiɛmɔ nitsumɔ lɛ mli.

[Akrabatsa ni yɔɔ baafa 25]

KLAS LƐ HE SAJI

Maji srɔtoi anɔ ni amɛjɛ kɛba: 10

Maji srɔtoi ni aha amɛ nitsumɔ yɛ mli: 20

Nikaselɔi lɛ ayifalɛ: 48

Afii abɔ ni amɛye lɛ mlijaa: 33.7

Afii abɔ ni amɛkɛhi anɔkwale lɛ mli lɛ mlijaa: 16.2

Afii abɔ ni amɛkɛsɔmɔ kɛ amɛbei fɛɛ mlijaa: 12.5

[Mfoniri ni yɔɔ baafa 26]

Buu Mɔɔ Biblia Gilead Skul Klasbii ni Ji 109 ni Gbe Nikasemɔ Naa

Gbɛi ni yɔɔ shishigbɛ lɛ miitsɔɔ bɔ ni amɛdamɔ shi lɛ mli, kɛjɛ hiɛgbɛ kɛyaa sɛɛgbɛ, ni amɛgbɛi lɛ jeɔ shishi kɛjɛɔ abɛku kɛyaa ninejurɔgbɛ.

(1) Collins, E.; Miles, L.; Alvarado, A.; Lake, J. (2) Van Dusen, L.; Biharie, A.; Heikkinen, H.; Koós, S.; Smith, H. (3) Ashford, J.; Ashford, C.; Boor, C.; Richard, L.; Wilburn, D.; Lake, J. (4) Chichii, K.; Chichii, H.; Ramirez, M.; Baumann, D.; Becker, G.; Biharie, S.; Ramirez, A. (5) Van Dusen, W.; Lemâtre, H.; Pisko, J.; Cutts, L.; Russell, H.; Johnson, R. (6) Becker, F.; Baumann, D.; Johnson, K.; Pifer, A.; Madsen, C.; Lemâtre, J.; Heikkinen, P. (7) Smith, R.; Russell, J.; Collins, A.; Pisko, D.; Wilburn, R.; Koós, G. (8) Cutts, B.; Boor, J.; Madsen, N.; Pifer, S.; Richard, E.; Miles, B.; Alvarado, R.