Toiŋjɔlɛ He Sanekpakpa lɛ Eyashɛ Chiapas Shikpɔji lɛ Anɔ

“Yɛ gbɔmɔgbee ni ehiii fe fɛɛ ni mɔ fɛɛ mɔ baanyɛ akai ni ba yɛ maŋ ni ji Chiapas lɛ mli lɛ, hii akuu ni kɛ awuiyeli nibii ewula amɛhe . . . gbe kosɛɛbii 45 mɔbɔmɔbɔ, ni abifabii 13 fata he.” Nakai ji bɔ ni adafitswaa wolo ni ji “El Universal” lɛ bɔ amaniɛ yɛ nɔ ni ba yɛ Acteal, Chiapas State lɛ mli, yɛ December 22, 1997 lɛ.

CHIAPAS yɛ Mexico maŋ lɛ wuoyigbɛ shɔŋŋ, ni ekɛ Guatemala jeɔ husu. Yɛ yinɔsane kakadaŋŋ ni kɔɔ ohiayeli shihilɛ he hewɔ lɛ, shikwɛɛbii ni ji Maya Indiabii akuu ko to gbɛjianɔ ni amɛkɛ tu te shi amɛwo nɔyeli lɛ yɛ January 1994, yɛ gbɛi ni ji Ejército Zapatista de Liberación Nacional (EZLN, Zapatista Asraafoi Maŋ Kpɔmɔ) shishi. Gbeekpamɔ kɛha tsabaa yɛ toiŋjɔlɛ mli lɛ sɛɛ tsɛ. Nɔ ni jɛ tu tswiamɔi kɛ tutuamɔi ni jɛ shitee-kɛ-wolɔi lɛ kɛ nɔyeli lɛ asraafoi lɛ fɛɛ aŋɔɔ ba ji, láshishwiemɔ kɛ gbele. Basabasafeemɔ lɛ ha kosɛɛbii babaoo ni yɔɔ nakai akutso lɛ mli lɛ shi kɛtee he ko ni yɔɔ shweshweeshwe.

Yɛ shihilɛi ni bɛ shiŋŋ ni tamɔ nɛkɛ mli lɛ, kuu ko yɛ ni sumɔɔ toiŋjɔlɛ ní amɛhi shi be fɛɛ akɛ mɛi ni kɛ amɛhe wooo maŋkwramɔ mpleshii lɛ mli. Kɛtsɔ ekãafeemɔ nɔ lɛ, amɛgbalaa jwɛŋmɔ kɛyaa Nyɔŋmɔ Maŋtsɛyeli lɛ nɔ akɛ hiɛnɔkamɔ pɛ kɛha naagbai ni baninaa gbɔmɛi lɛ ahe nitsumɔ, yɛ jɛmɛ kɛ je lɛŋ fɛɛ. (Daniel 2:44) Namɛi ni? Yehowa Odasefoi. Yɛ Yesu famɔ lɛ toiboo naa lɛ, amɛbɔɔ mɔdɛŋ koni amɛkɛ Nyɔŋmɔ Maŋtsɛyeli lɛ he sanekpakpa lɛ ayashɛ Chiapas shikpɔji lɛ fãi ni etse amɛhe banee lɛ amli. (Mateo 24:14) Te shiɛmɔ yɛ shihilɛ ni tamɔ nɛkɛ shishi lɛ yɔɔ tɛŋŋ, ni mɛni jɛ mli kɛba?

“Miji Yehowa Odasefoi lɛ Ateŋ Mɔ Kome”

Adolfo ni ji oblanyo fioo ko ni batsɔ Maŋtsɛyeli lɛ shiɛlɔ nyɛsɛɛ nɛɛ miitsu nii gbi ko yɛ redio nitsumɔhe ko yɛ maŋ ni ji Ocosingo lɛ mli. Trukaa lɛ, ashi shinaa lɛ waa. Hii akuu ko ni kɛ hebuu nibii ehà amɛhiɛ lɛ ba mli trukaa ni amɛkɛ amɛtui lɛ tsɔɔ eyitso. Amɛsha shi kɛtee heni ajɛɔ akɛ adafitswaa haa lɛ, amɛyakudɔ tsɔne lɛ kɛ hewalɛ, ni amɛtswa adafi akɛ amɛfã ta amɛshi nɔyeli lɛ.

Beni amɛtsɔ amɛhe amɛha Adolfo lɛ, hii ni hiɛ tui lɛ fã ni ebafata amɛkuu lɛ he. Eyɛ mli akɛ no mli lɛ abaptisiko lɛ moŋ, shi Adolfo ha hetoo akɛ “miji Yehowa Odasefoi lɛ ateŋ mɔ kome.” Etsɔɔ mli akɛ hiɛnɔkamɔ pɛ ni yɔɔ kɛha toiŋjɔlɛ ji Nyɔŋmɔ Maŋtsɛyeli lɛ, ni ekɛ ekãa kpoo atade kɛ tu ni amɛkɛ ha lɛ lɛ. Beni amɛna efai shi ni etswa lɛ, amɛŋmɛɛ ehe. Beni Aldolfo kaiɔ sane ni ba lɛ, ejaje akɛ: “Nakai nifeemɔ lɛ wo mihemɔkɛyeli lɛ mli hewalɛ waa diɛŋtsɛ.”

Yɛ naagbee lɛ jɛmɛ bajɔ, shi akutso lɛ yɛ asraafoi akudɔmɔ shishi lolo. Yɛ nibii nɛɛ fɛɛ asɛɛ lɛ, Adolfo kɛ miishɛɛ kpɛlɛ onukpai ni yɔɔ asafo ni yɔɔ jɛmɛ lɛ aninefɔɔ akɛ ekɛ Kristofoi akuu ko ni etse ehe yɛ akutso lɛ mli atsu nii lɛ nɔ. Yɛ hei ni akwɛɔ mɛi anibii amli yɛ ni ebiɔ ni etsɔ  mli lɛ, asraafoi lɛ jie bulɛ kpo amɛtsɔɔ lɛ beni ejie ehe kpo akɛ Yehowa Odasefoi lɛ ateŋ mɔ kome lɛ. Sɛɛ mli lɛ abaptisi lɛ ni ená tsui ni nyɔɔ mɔ mli akɛ enyɛ eye ebua kuu ni etse ehe lɛ ni ebatsɔ Yehowa Odasefoi asafo. Adolfo jaje akɛ: “Amrɔ nɛɛ ni abaptisi mi lɛ, manyɛ makɛɛ kɛ yiŋtsɔmɔ diɛŋtsɛ akɛ Yehowa Odasefoi lɛ ateŋ mɔ kome ji mi!”

“Yehowa Wo Wɔ Hewalɛ”

Beni EZLN bii lɛ tswa adafi akɛ amɛfã ta amɛshi nɔyeli lɛ yɛ redio nɔ lɛ sɛɛ etsɛɛɛ nɔŋŋ lɛ, maŋbii lɛ jo foi. Francisco ni ji be-fɛɛ shiɛlɔ, loo gbɛgbalɔ lɛ tsɔɔ bɔ ni Yehowa wo lɛ kɛ eŋa hewalɛ yɛ nɔ ni ebiɔ ni amɛtsɔ mli lɛ mli.

“Wɔkpɛ wɔyiŋ akɛ wɔbaaba abo yɛ he ko ni jɛkɛmɔ heɔ ŋmɛlɛtswai etɛ gbɛ nyiɛmɔ. Asafo ko yɛ jɛmɛ, no hewɔ lɛ wɔkɛ nyɛmimɛi lɛ baahi shi. Etsɛɛɛ ni be shɛ ni wɔ kpokpaa bibii anɔ kpee ni abaafee yɛ Palenque lɛ be lɛ shɛ. Mikɛ miŋa sumɔɔɔ ni kpee krɛdɛɛ kɛha gbɛgbalɔi lɛ aŋmɛɛ wɔ, shi wɔná wɔle akɛ EZLN bii lɛ etsĩ gbɛ ni yaa he ni abaafee kpee lɛ yɛ lɛ. Wɔkpɛ wɔyiŋ akɛ wɔbaatsɔ koo lɛ mli kɛya, ni enɛ he wɔ ŋmɛlɛtswai nɛɛhu. Wɔyashɛ yɛ be naa ni wɔnyɛ wɔtee gbɛgbalɔi akpee lɛ, ni wɔná ekɛ kpee he gbɛjianɔtoo lɛ fɛɛ he miishɛɛ waa.

 “Be mli ni wɔku wɔsɛɛ lɛ, wɔna akɛ ashã wɔshia lɛ ni aju wɔ kooloi lɛ. Nɔ pɛ ni ashi ji bagi bibioo ni atadei yɔɔ mli. Edɔ wɔ yɛ nibii ni wɔlaaje lɛ hewɔ, shi nyɛmimɛi ni yɔɔ Ocosingo lɛ jɛ mlihilɛ mli amɛŋɔ wɔ kɛtee amɛshiai amli. Amɛtsɔɔ bɔ ni atsuɔ nitsumɔi komɛi hu ní akɛ okwaafoi lɛ wɔfeko eko pɛŋ. Nyɛminuu ko tsɔɔ mi bɔ ni ashaa mfoniri, ni mɔ kroko hu tsɔɔ mi bɔ ni asaa aspaaterei. No ji nɔ ni mikɛ miŋa tsu ni wɔkɛkwɛ wɔhe kɛbashi ŋmɛnɛ ní ebiii ni wɔkpa gbɛgbamɔ nitsumɔ lɛ. Beni wɔsusuɔ nɔ ni ba lɛ he lɛ, wɔbana akɛ yɛ be mli ni ebɛ mlɛo kɛha wɔ akɛ wɔɔŋmɛ wɔtsui shi lɛ, Yehowa wo wɔ hewalɛ.”

Shiɛmɔ Nitsumɔ lɛ Mli Yibiiwoo

Odasefoi ni yɔɔ Chiapas maŋ lɛ mli lɛ eŋmɛɛɛ gbɛ ni shihilɛ ni mli wa kɛ oshara lɛ aha amɛnijiaŋ aje wui koni amɛkaná gbɛfaŋnɔ yɛ mɔdɛŋ krɛdɛɛ ni abɔɔ koni akɛ sanekpakpa lɛ ayaha gbɔmɛi ni yɔɔ nakai akutso lɛ mli lɛ. Ákɛ nɔkwɛmɔnɔ lɛ, yɛ April kɛ May 1995 mli lɛ, amɛfata amɛnanemɛi Kristofoi krokomɛi ahe yɛ jeŋ muu lɛ fɛɛ yɛ Maŋtsɛyeli Sane No. 34 lɛ he tafaa lɛ mli, nɔ ni hiɛ saneyitso ni sa ni ji Mɛni Hewɔ Shihilɛ Eyi Obɔ kɛ Naagbai Nɛkɛ?

Yɛ tafaa be lɛ mli—yɛ he ko ni atsɛɔ jɛmɛ akɛ Pueblo Nuevo lɛ—Ciro, ni ji daa gbɛgbalɔ lɛ nine shɛ weku ko ni jie miishɛɛ kpo nɔ. Gbii etɛ sɛɛ beni eku esɛɛ lɛ, enyɛ ekɛ amɛ yaje Biblia mli nikasemɔ shishi. Shi beni Ciro kɛ mɔ ni fata ehe lɛ ku amɛsɛɛ amɛtee koni amɛkɛ weku lɛ ayatsa nikasemɔ lɛ nɔ lɛ, nuu ni yɔɔ shia lɛ bɛ. Yɛ no najiaŋ lɛ, hii ni hebuu nibii hà amɛhiɛ akuu ko miimɛ lɛ koni amɛye lɛ awui. Amɛbi Ciro kɛ mɔ ni fata ehe lɛ nɔ ni amɛtaoɔ, ni amɛwo amɛhe gbeyei akɛ amɛbaagbe amɛ. Be mli ni amɛsɔle yɛ teemɔŋ amɛha Yehowa sɛɛ lɛ, Kristofoi enyɔ lɛ kɛ ekãa tsɔɔ mli akɛ amɛba koni amɛbatsɔɔ weku lɛ Biblia lɛ. Kɛkɛ ni hii ni kɛ hebuu nibii ehà amɛhiɛ lɛ ŋmɛɛ amɛhe. Yɛ yiŋtoo ko hewɔ lɛ, nuu ni yɔɔ shia lɛ baaa shia lɛ nakai gbi lɛ.

Gbi ko yɛ nɔ ni miihe ashɛ afii etɛ sɛɛ lɛ, efee Ciro naakpɛɛ akɛ nuu lɛ bapue yɛ eshinaa lɛ naa. Kwɛ miishɛɛ ni Ciro ná beni ená ele akɛ abaptisi weku muu lɛ fɛɛ ni ákɛ amrɔ nɛɛ amɛkɛ asafo ko ni yɔɔ Guatemala lɛ miibɔ lɛ! Biyei lɛ ateŋ mɔ kome po miisɔmɔ akɛ daa gbɛgbalɔ.

Hiɛsɔɔ Kɛha Mumɔŋ Niyenii

Yɛ shihilɛ ni yaa nɔ emli waa yɛ Chiapas lolo lɛ fɛɛ sɛɛ lɛ, kpokpaa wuji anɔkwɛlɔ ko bɔ amaniɛ akɛ Odasefoi ni yɔɔ akutso nɛɛ mli lɛ ahiɛ sɔɔ bɔni ehe ehia ni akpe kutuu lɛ waa. (Hebribii 10:24, 25) Ewie nɔ ni tee nɔ yɛ gbi kome kpee krɛdɛɛ ko ni afee nyɛsɛɛ nɛɛ mli, ni ato gbɛjianɔ koni  aje shishi leebi bɔni afee ni mɛi ni baaba lɛ anyɛ aku amɛsɛɛ kɛya shia shweshweeshwe yɛ shwane mli lɛ he. Eyɛ mli akɛ ebiɔ ni amɛteŋ mɛi babaoo anyiɛ nɔ ni fe ŋmɛlɛtsawai etɛ kɛtsɔ koo mli dani amɛyashɛ kpeehe lɛ moŋ, shi beni atswaa leebi ŋmɛji 7 lɛ, mɔ fɛɛ mɔ tara shi. Mɛi ni fata he yɛ toibolɔi lɛ ateŋ ji EZLN kuu lɛ mli bii ekpaa, ni miibo toi ni amɛmiitswa amɛdɛ, ekã shi faŋŋ akɛ amɛmiiná gbɛjianɔtoo lɛ he miishɛɛ. Amɛhu amɛnyiɛ ŋmɛlɛtswai etɛ koni amɛya kpee lɛ. Amɛteŋ mɛi 20 hu ba Kristo gbele lɛ Kaimɔ ni afee yɛ Maŋtsɛyeli Asa ni yɔɔ jɛmɛ lɛ shishi.

Atsu oblanyo kroko ni fata asraafoi akuu ni wuɔ shiɔ nɔyeli lɛ he lɛ koni eyakpa koo ko mli ni ekɛbu jɛmɛ. Beni ebashɛ nakai akutso lɛ mli lɛ, ena akɛ maŋbii lɛ fɛɛ, ni amɛteŋ mɛi babaoo ji Yehowa Odasefoi lɛ ejo foi. No hewɔ lɛ ehi shiai ni áshĩ lɛ ateŋ ekome mli. Akɛni nɔ ko tsɔ bɛ feemɔ hewɔ lɛ, ekɔlɔ woji ni ena ni ejwere shia lɛ mli lɛ ekomɛi ni eje shishi ebɔi kanemɔ. Enɛɛmɛi ji Buu Mɔɔ Asafo lɛ woji lɛ ekomɛi ni Odasefoi lɛ eshi yɛ sɛɛ. Akɛni etse ehe banee hewɔ lɛ, oblanyo lɛ ná be ni ekɛ susu nɔ ni ekaseɔ lɛ he. Ekpɛ eyiŋ akɛ esa akɛ etsake eshihilɛ koni ekɛ etawuu nibii lɛ ashwie shi. Etsɛɛɛ nɔŋŋ ni eyana Odasefoi lɛ ni eje Biblia lɛ kasemɔ shishi. Yɛ nyɔji ekpaa mli lɛ, eegba mɛi krokomɛi sanekpakpa lɛ. Amrɔ nɛɛ, lɛ kɛ eweku lɛ mli bii etɛ krokomɛi ni kulɛ amɛji mɛi ni fiɔ asraafoi akuu ni wuɔ eshiɔ nɔyeli lɛ sɛɛ lɛ ji Kristofoi ni abaptisi amɛ.

Nɔ ko Kpakpa Ejɛ Mli Kɛba

Eyɛ mli akɛ eji shihilɛ ni mli wa waa moŋ, shi béi lɛ ná hewalɛ kpakpa yɛ bɔ ni gbɔmɛi lɛ feɔ amɛnii yɛ shiɛmɔ nitsumɔ lɛ he lɛ nɔ. Onukpa ko ni yɔɔ maŋ lɛ mli he ni gidigidi lɛ je shishi yɛ lɛ tsɔɔ mli akɛ: “Yɛ nɔ ni miihe ashɛ gbii enumɔ sɛɛ beni ta lɛ eje shishi lɛ, wɔje shiɛmɔ nitsumɔ lɛ shishi yɛ maŋ lɛ mli kɛ esɛɛ fɛɛ. Gbɔmɛi lɛ miishwe ni amɛbo wɔ toi. Wɔkɛ Biblia kasemɔ woji babaoo ha ni wɔje Biblia kasemɔi srɔtoi babaoo ashishi. Yɛ he ko lɛ, kulɛ mɛi babaoo kpoɔ anɔkwale lɛ, shi yɛ béi lɛ hewɔ lɛ, amrɔ nɛɛ amɛboɔ toi, amɛkaseɔ Biblia lɛ, ni amɛbaa asafoŋ kpeei kɛ kpokpaa nɔ kpeei ashishi.”

Nyɛmimɛi lɛ yɛ miishɛɛ akɛ amɛnyɛ amɛha amɛ teokrase nitsumɔ lɛ miiya nɔ yɛ shihilɛi ni bɛ shiŋŋ ni yɔɔ lɛ fɛɛ sɛɛ. Akɛni nɔyeli lɛ asraafoi lɛ kɛ EZLN bii lɛ fɛɛ le amɛ hewɔ lɛ, amɛyaa nɔ amɛfeɔ amɛ kpokpaa nɔ kpeei ní woɔ amɛ hewalɛ yɛ mumɔŋ gbɛfaŋ lɛ. Nɔkwɛlɔi gbɛfalɔi lɛ asaramɔi lɛ hu ebafee kanyamɔ nɔ kɛha shiɛmɔ nitsumɔ lɛ nɔtsamɔ. Miishɛɛ sane ji akɛ, hewalɛwoo jɛɔ mɛi ni kɛ amɛhe ewo naataamɔ lɛ mli lɛ po aŋɔɔ kɛbaa, ni bei babaoo lɛ amɛwoɔ Odasefoi lɛ hewalɛ koni amɛya nɔ yɛ amɛshiɛmɔ nitsumɔ lɛ mli lɛ.

Eyɛ mli akɛ kaai kɛ jaramɔ shihilɛ ni ebiɔ ni gbɔmɛi ni yɔɔ Chiapas lɛ aŋmɛ amɛtsui shi yɛ mli lɛ eba shi be saŋŋ nɛ moŋ, shi ebako naagbee. Bɔ fɛɛ bɔ ni eji ha lɛ, wɔyɛ nɔmimaa yɛ nɔ kome he—no ji Yehowa Odasefoi etswa amɛfai shi akɛ amɛbaakã he, ni amɛŋmɛŋ mɔdɛŋ ni amɛbɔɔ koni amɛkɛ toiŋjɔlɛ sanekpakpa ni jɛ Nyɔŋmɔ Wiemɔ ni ji Biblia lɛ mli lɛ ayaha gbɔmɛi lɛ he. (Bɔfoi lɛ Asaji 10:34-36; Efesobii 6:15) Amɛyɔseɔ taakɛ gbalɔ Yeremia kɛɛ lɛ, akɛ: “Gbɔmɔ gbɛ bɛ lɛ diɛŋtsɛ edɛŋ, ni adesa ní nyiɛ nɛɛ, bɔ ni eeetsɔ ejaje enajifaamɔi eha lɛ, ebɛ edɛŋ.” (Yeremia 10:23) Nyɔŋmɔ Maŋtsɛyeli ni yɔɔ e-Bi, Yesu Kristo dɛŋ lɛ pɛ, baanyɛ ekɛ tsabaa abaha jalɛ sane ni ayeee kɛ ohia ni yɔɔ je lɛŋ lɛ.—Mateo 6:10.

[Shikpɔŋ he mfoniri ni yɔɔ baafa 9]

(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)

Mexico Ŋshɔnine

CHIAPAS

GUATEMALA

Pasifik Ŋshɔ

[He ni Sane lɛ Jɛ]

Mountain High Maps® Copyright © 1997 Digital Wisdom, Inc.

[Mfoniri ni yɔɔ baafa 9]

Odasefoi ni kɛ amɛhe miiwo sɔɔmɔ nitsumɔ lɛ mli yɛ Chiapas shikpɔji lɛ anɔ