Henok Kɛ Nyɔŋmɔ Nyiɛ yɛ Jeŋ ni Bɛ Nyɔŋmɔ Gbeyeishemɔ Mli

ABONSAM taa sane naa akɛ, ebaanyɛ eha gbɔmɛi fɛɛ akpa Nyɔŋmɔ jamɔ, ni yɛ bei komɛi amli lɛ, efeɔ tamɔ nɔ ni eeye omanye. Nɔ ni miihe ashɛ afii ohai enumɔ yɛ Habel gbele sɛɛ lɛ, mɔ ko mɔ ko ejieee ehe kpo akɛ eji Yehowa anɔkwa tsulɔ. Yɛ gbɛ kroko nɔ lɛ, eshafeemɔ kɛ su ni tsɔɔ Nyɔŋmɔ gbeyeishemɔ ni bɛ miiya nɔ.

Yɛ nakai shihilɛ ni efite yɛ mumɔŋ lɛ mli ni Henok hi shikpɔŋ lɛ nɔ. Biblia be he akɔntaabuu tsɔɔ akɛ, afɔ́ lɛ afi 3404 D.Ŋ.B. Ákɛ mɔ ni tamɔɔɔ eyinɔ bii lɛ, Henok jie ehe kpo akɛ nuu ni Nyɔŋmɔ kpɛlɛɔ enɔ. Bɔfo Paulo kɛ lɛ fata Yehowa tsuji ni yɔɔ hemɔkɛyeli lɛ ahe akɛ nɔkwɛmɔnɔ kɛha Kristofoi. Namɔ ji Henok? Mɛɛ kaai ehe bahia ni ekpee naa? Te etsu he nii eha tɛŋŋ? Ni mɛɛ gbɛ nɔ ehemɔkɛyeli mlihiɛmɔ lɛ he baa sɛɛnamɔ kɛhaa wɔ yɛ?

Yɛ Enosh beaŋ, nɔ ni miihe ashɛ afii ohai ejwɛ dani Henok beaŋ aaashɛ lɛ, no mli lɛ “abɔi Yehowa gbɛi tsɛmɔ.” (1 Mose 4:26) Akɛ Nyɔŋmɔ gbɛi lɛ etsu nii kɛjɛ adesa yinɔsane shishijee mli tɔŋŋ. No hewɔ lɛ, eka shi faŋŋ akɛ Yehowa gbɛi lɛ tsɛmɔ ni je shishi beni Enosh yɔɔ wala mli lɛ, jeee nɔ ni damɔ hemɔkɛyeli kɛ jamɔ krɔŋŋ nɔ. Hebri wiemɔ he nilelɔi komɛi kpɛlɛɔ nɔ akɛ esa akɛ 1 Mose 4:26 nɛɛ akane akɛ “akɛ musubɔɔ bɔi” loo “kɛkɛ ni musubɔɔ je shishi.” Ekolɛ gbɔmɛi kɛ Yehowa gbɛi lɛ tsɛɔ amɛhe loo adesai krokomɛi, mɛi anɔ ni amɛtsɔɔ amɛkɛ jamɔ haa Nyɔŋmɔ lɛ. Aloo ekolɛ, amɛkɛ egbɛi tsɛɔ amagai.

‘Henok kɛ Anɔkwa Nyɔŋmɔ lɛ Nyiɛ’

Eyɛ mli akɛ Henok yɛ mɛi ni bɛ Nyɔŋmɔ gbeyeishemɔ lɛ teŋ moŋ, shi ‘etee nɔ ekɛ’ Yehowa, ni ji ‘anɔkwa Nyɔŋmɔ lɛ nyiɛ.’ Awieee akɛ e-nanakaŋsowai—Set, Enosh, Kenan, Mahalalel kɛ Yared—kɛ Nyɔŋmɔ nyiɛ. Kɛ hoo kwraa lɛ, amɛfeee taakɛ Henok fee lɛ, mɔ ni eshihilɛ gbɛ ha efee mɔ srɔto ko kwraa yɛ amɛhe lɛ.—1 Mose 5:3-27.

Yehowa ni akɛ lɛ aaanyiɛ lɛ tsɔɔ le ni aaale lɛ kɛ naanyobɔɔ ni mli wa ni baakã mɔ kɛ Nyɔŋmɔ teŋ, enɛ nyɛ eba mli ejaakɛ Henok hi shi yɛ Nyɔŋmɔ suɔmɔnaa nii kɛ gbeekpamɔ naa. Yehowa kpɛlɛ Henok hetuu-kɛhamɔ lɛ nɔ. Yɛ anɔkwale mli lɛ, Hela Septuagint lɛ kɛɛ akɛ “Henok nifeemɔ saa” Nyɔŋmɔ hiɛ, ni eji susumɔ ko ni bɔfo Paulo hu jie lɛ kpo.—1 Mose 5:22, NW shishigbɛ niŋmaa; Hebribii 11:5.

Oti ni he hiaa fe fɛɛ ni hã wekukpaa kpakpa bakã Henok kɛ Yehowa teŋ lɛ ji ehemɔkɛyeli. Ekolɛ ejie hemɔkɛyeli kpo yɛ Nyɔŋmɔ “yoo” lɛ shiwoo “seshi” lɛ mli. Eji Henok le Adam jogbaŋŋ kulɛ, enine baanyɛ ashɛ sane ni kɔɔ bɔ ni Nyɔŋmɔ kɛ klɛŋklɛŋ hefatalɔi lɛ ye hã yɛ Eden lɛ nɔ. Nilee ni Henok yɔɔ yɛ Nyɔŋmɔ he lɛ hã etsɔ mɔ ni “taoɔ esɛɛgbɛ.”—1 Mose 3:15; Hebribii 11;6, 13.

Yɛ Henok shihilɛ lɛ kɛ wɔ hu wɔ nɔ̃ lɛ mli lɛ, wɔkɛ Yehowa teŋ wekukpaa kpakpa lɛ biɔ babaoo fe Nyɔŋmɔ he nilee kɛkɛ ní wɔɔná. Kɛji akɛ wɔbuɔ naanyobɔɔ ni mli wa ni kã wɔkɛ mɔ ko teŋ lɛ, ani ejeee anɔkwale akɛ bɔ ni esusuɔ  nii ahe ehaa lɛ náa wɔsusumɔi kɛ wɔnifeemɔi anɔ hewalɛ? Wɔkpoɔ wiemɔi loo nifeemɔi ni baafite nakai naanyobɔɔ lɛ. Ni kɛji akɛ wɔsusu he akɛ wɔbaafee tsakemɔi komɛi yɛ wɔshihilɛi amli lɛ, ani wɔsusuuu bɔ ni enɛ baasa nakai naanyobɔɔ lɛ he ehã?

Shwe ni ashweɔ koni ahiɛ akɛ Nyɔŋmɔ teŋ wekukpaa ni yɔɔ gbagbalii mli lɛ hu náa hewalɛ yɛ nɔ ni wɔfeɔ nɔ. Nɔ ni he hiaa tsutsu ji anɔkwa nilee ni kɔɔ nɔ ni ekpɛlɛɔ nɔ kɛ nɔ ni ekpɛlɛɛɛ nɔ lɛ he. Kɛkɛ lɛ ehe baahia ni wɔha nakai nilee lɛ akudɔ wɔ, koni wɔbɔ mɔdɛŋ akɛ wɔbaasa ehiɛ kɛtsɔ wɔsusumɔi kɛ nifeemɔi anɔ.

Hɛɛ, bɔni afee ni wɔkɛ Nyɔŋmɔ anyiɛ lɛ, esa akɛ wɔsa ehiɛ. Enɛ ji nɔ ni Henok kɛ afii ohai abɔ sɔŋŋ fee. Yɛ anɔkwale mli lɛ, Hebri feemɔ wiemɔ su ni tsɔɔ akɛ Henok kɛ Nyɔŋmɔ “nyiɛ” lɛ tsɔɔ nifeemɔ ni etee nɔ efee be kɛ be fɛɛ. Nuu anɔkwafo kroko hu ni ‘kɛ Nyɔŋmɔ nyiɛ’ ji Noa.—1 Mose 6:9.

Henok ji nuu ni yɔɔ weku, ni yɛ ŋa kɛ “bihii kɛ biyei.” Ebihii lɛ ateŋ mɔ kome ji Metusela. (1 Mose 5:21, 22) Ekolɛ Henok fee bɔ fɛɛ bɔ ni eeenyɛ bɔni afee ni ekwɛ ewe nɔ jogbaŋŋ. Shi kɛlɛ, yɛ Nyɔŋmɔ gbeyeishemɔ ni abɛ ni ebɔle ehe kɛkpe lɛ hewɔ lɛ, enaaa lɛ mlɛo akɛ eesɔmɔ Nyɔŋmɔ. Ekolɛ Lamek ni ji Noa tsɛ lɛ pɛ ji etipɛŋfonyo ni jie hemɔkɛyeli kpo yɛ Yehowa mli. (1 Mose 5:28, 29) Ni kɛlɛ, Henok kɛ ekãa tsu anɔkwa jamɔ he nii.

Mɛni ye bua Henok koni eya nɔ eye Nyɔŋmɔ anɔkwa lɛ? Ŋwanejee ko bɛ he akɛ, ekɛ mɛi ni gbeɔ Yehowa gbɛi lɛ he guɔ loo mɛi krokomɛi ni esaaa akɛ nanemɛi kɛha Nyɔŋmɔ jalɔ lɛ ebɔɔɔ. Ekolɛ Yehowa yelikɛbuamɔ ni Henok tao yɛ sɔlemɔ mli lɛ hu waje eyiŋ ni ekpɛ akɛ ebaakpoo nɔ fɛɛ nɔ ni esaaa e-Bɔlɔ lɛ hiɛ lɛ.

Gbalɛ ni Agba Ashi Mɛi ni Bɛ Nyɔŋmɔ Gbeyeishemɔ

Ewa waa akɛ aaahiɛ shishitoo mlai ni nɔ kwɔlɔ lɛ amli kɛji gbɔmɛi ni bɛ Nyɔŋmɔ gbeyeishemɔ ji mɛi ni ebɔle wɔ. Shi Henok hu jaje kojomɔ shɛɛ saji ni naa wa eshi mɛi fɔji lɛ. Kɛtsɔ  Nyɔŋmɔ mumɔ lɛ kudɔmɔ nɔ lɛ, Henok gba akɛ: “Naa, [Yehowa, NW] miiba kɛ ekrɔŋkrɔŋbii akpei-nyɔŋmanyɔŋmai abɔ, ni ebakojo mɛi fɛɛ, ni eeekã nɔshafeelɔi lɛ yɛ amɛnishai anitsumɔi fɛɛ ni amɛtsu lɛ kɛ wiemɔi wawaai fɛɛ ni eshafeelɔi Nyɔŋmɔ kwalɔi ewie yɛ ehe lɛ hewɔ.”—Yuda 14, 15.

Mɛɛ hewalɛ nakai sane lɛ baaná yɛ kuɛŋtilɔi ni heee yeee lɛ anɔ? Eji nɔ ni nilee yɔɔ mli akɛ aaasusu akɛ, wiemɔi ni tsurɔɔ mɔ ni tamɔ nɛkɛ lɛ ha Henok bafee mɔ ko ni asumɔɔɔ esane, ekolɛ enɛ tée hefɛoyelii, ahorabɔɔ, kɛ hegbeyeiwoo shi. Mɛi komɛi ná kulɛ, amɛfo ewala sɛɛ amrɔ nɔŋŋ. Shi kɛlɛ, Henok sheee gbeyei. Ele nɔ ni ba jalɔ Abel nɔ, ni ákɛ mɔ ni tamɔ lɛ lɛ, Henok etswa efai shi akɛ ebaasɔmɔ Nyɔŋmɔ, ekɔɔɔ he eko nɔ ni baaba.

“Nyɔŋmɔ Ŋɔ lɛ Kɛtee”

Eka shi faŋŋ akɛ, Henok wala eyaje oshara mli beni “Nyɔŋmɔ ŋɔ lɛ kɛtee” lɛ. (1 Mose 5:24) Yehowa eŋmɛɛɛ gbɛ ni enɔkwa gbalɔ lɛ ana amanehulu yɛ henyɛlɔi ni yi wa nɛɛ adɛŋ. Taakɛ bɔfo Paulo tsɔɔ lɛ, “aŋɔ Henok kɛtee, koni ekana gbele.” (Hebribii 11:5) Mɛi babaoo kɛɔ akɛ Henok gbooo—ni ákɛ, Nyɔŋmɔ ŋɔ lɛ kɛtee ŋwɛi, he ni ekã he eyɔɔ shihilɛ mli yɛ lolo lɛ. Shi kɛlɛ, Yesu jaje faŋŋ akɛ: “Gbɔmɔ ko ekwɔko kɛyako ŋwɛi, fe mɔ ni kpeleke shi kɛjɛ ŋwɛi lɛ, gbɔmɔ Bi lɛ.” Yesu ji mɛi fɛɛ ni kwɔ kɛtee ŋwɛi lɛ “ahiɛnyiɛlɔ.”—Yohane 3:13 NW; Hebribii 6:19, 20.

No hewɔ lɛ, mɛni ba Henok nɔ mɔ? ‘Ŋɔ ni aŋɔ lɛ kɛtee koni ekana gbele’ lɛ baanyɛ atsɔɔ akɛ, Nyɔŋmɔ ha eyaje mumɔŋ shihilɛ ko mli, kɛkɛ ni efo ewala sɛɛ beni eyɔɔ nakai shihilɛ lɛ mli lɛ. Yɛ shihilɛ ni tamɔ nɛkɛ mli lɛ, Henok naŋ gbele mli piŋmɔ mli amanehulu. Eka shi faŋŋ akɛ, akɛni Yehowa jie egbonyo lɛ kɛtee hewɔ lɛ, “anaaa lɛ dɔŋŋ” tamɔ bɔ ni ejie Mose gbonyo lɛ hu kɛtee lɛ.—5 Mose 34:5, 6.

Henok ye afii 365—nɔ ni shɛɛɛ afii abɔ ni etipɛŋfoi lɛ ateŋ mɛi babaoo ye lɛ. Shi nɔ ni he hiaa mɛi ni yɔɔ suɔmɔ kɛha Yehowa lɛ ji akɛ, amɛsɔmɔ lɛ yɛ anɔkwayeli mli kɛyashi amɛgbele mli. Wɔle akɛ Henok fee nakai ejaakɛ “dani aaaŋɔ lɛ kɛya lɛ, aye ehe odase akɛ esa Nyɔŋmɔ hiɛ.” Ŋmalɛi lɛ ewieee gbɛ nɔ ni Yehowa tsɔ ekɛ Henok wie enɛ he eha lɛ he. Shi kɛlɛ, dani Henok baagbo lɛ, aha ená Nyɔŋmɔ nɔkpɛlɛmɔ mli nɔmimaa, ni wɔbaanyɛ wɔná nɔmimaa akɛ Yehowa baakai lɛ yɛ gbohiiashitee lɛ mli.

Kasemɔ Hemɔkɛyeli ni Henok Yɔɔ Lɛ

Wɔbaanyɛ wɔkase adesai ni sheɔ Nyɔŋmɔ gbeyei lɛ ahemɔkɛyeli lɛ yɛ gbɛ ni sa nɔ. (Hebribii 13:7) Hemɔkɛyeli naa Henok sɔmɔ yɛ akɛ Nyɔŋmɔ klɛŋklɛŋ gbalɔ anɔkwafo. Henok beaŋ je lɛ tamɔ wɔ nɔ̃ lɛ—basabasafeemɔ, musubɔɔ, kɛ Nyɔŋmɔ gbeyeishemɔ ni bɛ. Shi kɛlɛ, esoro Henok. Eyɛ anɔkwa hemɔkɛyeli ni eji nɔkwɛmɔnɔ yɛ Nyɔŋmɔ jamɔ hetuu-kɛhamɔ mli. Hɛɛ, Yehowa kɛ kojomɔ shɛɛ sane ni mli wa ha lɛ koni ejaje, shi ewaje lɛ hu koni enyɛ ejaje. Henok kɛ ekãa tsu nitsumɔ ni akɛwo edɛŋ lɛ he nii, ni Nyɔŋmɔ kwɛ enɔ yɛ shitee-kɛ-woo ni henyɛlɔi kɛba enɔ lɛ fɛɛ sɛɛ.

Kɛji wɔjie hemɔkɛyeli kpo taakɛ Henok fee lɛ, Yehowa baawaje wɔ koni wɔjaje eshɛɛ sane lɛ yɛ nɛkɛ naagbee gbii nɛɛ amli. Ebaaye ebua wɔ koni wɔkɛ ekãa akpee shitee-kɛwoo naa, ni wɔ-Nyɔŋmɔ jamɔ hetuu-kɛhamɔ lɛ baaha wɔfee mɛi ni yɔɔ srɔto yɛ mɛi ni bɛ Nyɔŋmɔ gbeyeishemɔ lɛ ahe. Hemɔkɛyeli baaye ebua wɔ koni wɔkɛ Nyɔŋmɔ anyiɛ ni wɔfee wɔnii yɛ gbɛ ni haa etsui nyaa nɔ. (Abɛi 27:11) Kɛtsɔ hemɔkɛyeli nɔ lɛ, Henok jalɔ lɛ ye omanye yɛ Nyɔŋmɔ ni akɛlɛ nyiɛɔ yɛ jeŋ ko ni bɛ Nyɔŋmɔ gbeyeishemɔ mli, ni wɔ hu wɔbaanyɛ wɔfee nakai.

[Akrabatsa ni yɔɔ baafa 30]

Ani Biblia lɛ Tsɛɔ Wiemɔi Asɛɛ Kɛjɛɔ Henok Wolo lɛ Mli?

Henok wolo lɛ ji apokrifa kɛ apasa niŋmaa. Kɛɛmɔ ni akɛɛ ejɛ Henok dɛŋ lɛ ji apasa. Ekolɛ akala yɛ klɛŋklɛŋ afii oha lɛ kɛ nɔ ni ji enyɔ lɛ mli D.Ŋ.B., eji Yudafoi adesãi ni bɛ yinɔsane ni awo he babaoo ni abua naa, eka shi faŋŋ akɛ eji amaniɛ fioo ni 1 Mose wolo lɛ bɔ yɛ Henok he lɛ mli tsɔɔmɔ ni yɔɔ hwanyaŋŋ. Enɛ pɛ kɛkɛ fa kɛha mɛi ni yɔɔ suɔmɔ kɛha Nyɔŋmɔ Wiemɔ lɛ koni amɛkpoo Henok Wolo lɛ akɛ eji nɔ ni esaaa.

Yɛ Biblia lɛ mli lɛ, Yuda wolo lɛ pɛ ni wie Henok gbalɛ wiemɔi lɛ ahe, akɛ: “Naa, [Yehowa, NW] miiba kɛ ekrɔŋkrɔŋbii akpei-nyɔŋmanyɔŋmai abɔ, ni ebakojo mɛi fɛɛ, ni eeekã nɔshafeelɔi lɛ yɛ amɛnishai anitsumɔi fɛɛ ni amɛtsu lɛ kɛ wiemɔi wawaai fɛɛ ni eshafeelɔi Nyɔŋmɔ kwalɔi ewie yɛ ehe lɛ hewɔ.” (Yuda 14, 15) Nilelɔi pii taa sane naa akɛ, atsɛ Henok gbalɛ ni egba eshi etipɛŋfoi ni bɛ Nyɔŋmɔ gbeyeishemɔ lɛ yisɛɛ tɛ̃ɛ kɛjɛ Henok Wolo lɛ mli. Ani eji anɔkwale akɛ Yuda kɛ apokrifa wolo ni abɛ hekɛnɔfɔɔ yɛ mli lɛ tsu nii akɛ eniŋmaa lɛ jɛɛhe?

Awieee bɔ ni fee ni Yuda ná ele Henok gbalɛ lɛ he yɛ Ŋmalɛi lɛ amli. Ekolɛ etsɛ yisɛɛ kɛjɛ jɛɛhe ni mɔ fɛɛ mɔ le, ni ji blema sane ko ni akɛ he fɔ̃ɔ nɔ ní aŋmala ashwie shi kɛjɛ blema beebe lɛ mli. Eka shi faŋŋ akɛ Paulo fee nɔ ko ni tamɔ nakai pɛpɛɛpɛ, beni etsɛ Yane kɛ Yambre akɛ amɛji ashwãifeelɔi ni yɔɔ Farao shia lɛ ni aleee amɛgbɛi ni te shi wo Mose lɛ. Kɛji mɔ ni ŋma Henok Wolo lɛ nine shɛ blema jɛɛhe ko ni tamɔ enɛ henɔ ko nɔ lɛ, mɛni hewɔ esa akɛ wɔtso akɛ Yuda hu nine shɛ nɔ ko ni tamɔ nakai nɔ? *—2 Mose 7:11, 22; 2 Timoteo 3:8.

Bɔ ni fee ni Yuda nine shɛ sane ni kɔɔ Henok shɛɛ sane kɛha mɛi ni bɛ Nyɔŋmɔ gbeyeishemɔ lɛ nɔ lɛ jeee sane ni wa. Aye bɔ ni anyɛɔ akɛ he fɔ̃ɔ nɔ lɛ he odase kɛtsɔ anɔkwale ni eji akɛ Yuda ŋma yɛ Nyɔŋmɔ mumɔ lɛ kudɔmɔ naa lɛ nɔ. (2 Timoteo 3:16) Nyɔŋmɔ mumɔ krɔŋkrɔŋ lɛ bu ehe koni ekaŋma nɔ ko ni jeee anɔkwale.

[Shishigbɛ niŋmaa]

[Mfoniri ni yɔɔ baafa 31]

Henok kɛ ekãa jaje Yehowa wiemɔ lɛ