Yehowa Tsɔɔ Wɔ Wɔgbii lɛ Kanemɔ
Yehowa Tsɔɔ Wɔ Wɔgbii lɛ Kanemɔ
“Tsɔɔmɔ wɔ wɔgbii lɛ kanemɔ, beni afee ni wɔná nilee tsui!”—LALA 90:12.
1. Mɛni hewɔ eja gbɛ akɛ wɔɔbi Yehowa ní etsɔɔ wɔ “wɔgbii lɛ kanemɔ” lɛ?
YEHOWA NYƆŊMƆ ji wɔ-Bɔlɔ kɛ Wala-Halɔ. (Lala 36:10; Kpojiemɔ 4:11) No hewɔ lɛ mɔ ko mɔ ko bɛ ní fe lɛ, ní baanyɛ atsɔɔ wɔ gbɛ ní wɔɔtsɔ nɔ wɔkɛ wɔwala afii lɛ atsu nii yɛ nilee mli. Belɛ, eja gbɛ jogbaŋŋ akɛ lalatsɛ lɛ kpá Nyɔŋmɔ fai akɛ: “Tsɔɔmɔ wɔ wɔgbii lɛ kanemɔ, beni afee ni wɔná nilee tsui!” (Lala 90:12) Eka shi faŋŋ akɛ, esa akɛ wɔsusu Lala 90 lɛ, he ni wɔnaa nakai faikpamɔ lɛ yɛ lɛ he jogbaŋŋ. Shi, klɛŋklɛŋ lɛ, nyɛhaa wɔkpáa nɛkɛ lala ní jɛ mumɔŋ nɛɛ hiɛ kuku wɔkwɛa.
2. (a) Namɔ atsĩɔ etã akɛ lɛ efo Lala 90 lɛ, ni eeenyɛ efee akɛ mɛɛ be aŋma? (b) Te esa akɛ Lala 90 lɛ aná bɔ ni wɔsusuɔ wala shihilɛ he wɔhaa lɛ nɔ hewalɛ eha tɛŋŋ?
2 Lala 90 lɛ yiteŋgbɛ niŋmaa lɛ tsɛɔ lɛ akɛ “Nyɔŋmɔ gbɔmɔ Mose sɔlemɔ.” Akɛni lala nɛɛ maa bɔ ni adesa wala sɛɛ kɛɛɛ kwraa lɛ nɔ mi hewɔ lɛ, eeenyɛ efee akɛ afo lala lɛ yɛ Israelbii lɛ ajiemɔ kɛjɛ Mizraim nyɔŋyeli mli lɛ sɛɛ, yɛ amɛgbɛfaa ní he afii 40 yɛ ŋã lɛ nɔ lɛ mli, beni mɛi akpei abɔ gboi, ní akpata yinɔbii ní bɛ hemɔkɛyeli lɛ fɛɛ ahiɛ lɛ. (4 Mose 32:9-13) Bɔ fɛɛ bɔ ni eji lɛ, Lala 90 lɛ tsɔɔ akɛ adesai ní yeee emuu lɛ awala sɛɛ kɛɛɛ. Belɛ, eyɛ faŋŋ akɛ esa akɛ wɔkɛ wɔgbii ní jara wa waa lɛ atsu nii yɛ nilee mli.
3. Mɛɛ saji titri yɔɔ Lala 90 lɛ mli?
3 Lala 90, kuku 1 kɛyashi 6 lɛ wieɔ Yehowa he akɛ wɔ naanɔ abobaahe. Kuku 7 kɛyashi 12 lɛ tsɔɔ nɔ ni he hiaa wɔ bɔni afee ní wɔkɛ wɔwala afii ní hoɔ oyayaayai lɛ atsu nii yɛ gbɛ ní saa ehiɛ nɔ. Ni taakɛ atsɔɔ mli yɛ kuku 13 kɛyashi 17 lɛ, wɔshweɔ waa akɛ wɔnine ashɛ Yehowa suɔmɔ mlihilɛ kɛ edɛŋ jɔɔmɔi anɔ. Yɛ anɔkwale mli lɛ, lala nɛɛ egbaaa niiashikpamɔi ní wɔɔná aŋkroaŋkro akɛ Yehowa tsuji lɛ efɔ̃ɔɔ shi. Shi kɛlɛ, esa akɛ wɔsusu sɔlemɔ henumɔi ní yɔɔ mli lɛ he waa ní wɔkɛtsu nii. No hewɔ lɛ nyɛhaa wɔsusua Lala 90 lɛ he jogbaŋŋ taakɛ mɛi ní ejɔɔ amɛhe nɔ amɛha Nyɔŋmɔ lɛ naa lɛ amɛhaa.
Yehowa—“Wɔbobaahe” Diɛŋtsɛ
4-6. Yehowa ji “wɔbobaahe” diɛŋtsɛ yɛ mɛɛ gbɛ nɔ?
4 Lalatsɛ lɛ je shishi kɛ wiemɔi nɛɛ, akɛ: “[O Yehowa, “NW”], bo ji wɔbobaahe yɛ yinɔi fɛɛ mli. Beni anáko afɔ́ gɔji lɛ, ní onáko obɔ shikpɔŋ kɛ jeŋ lɛ, bo ji Mawu kɛjɛ naanɔ kɛyaa naanɔ.”—Lala 90:1, 2.
5 Yehowa, “naanɔ Nyɔŋmɔ lɛ,” ji “wɔbobaahe” diɛŋtsɛ—ni ji mumɔŋ abobaahe kɛha wɔ. (Romabii 16:26) Wɔnuɔ he akɛ wɔyɛ shweshweeshwe, ejaakɛ efee klalo be fɛɛ be akɛ eeeye ebua wɔ ákɛ ‘sɔlemɔ Toibolɔ.’ (Lala 65:3) Akɛni wɔshɛrɛɔ wɔ yeyeeyefeemɔi lɛ wɔshwieɔ wɔ ŋwɛi Tsɛ lɛ nɔ kɛtsɔ e-Bi ní esumɔɔ lɛ lɛ nɔ hewɔ lɛ, ‘Nyɔŋmɔ hejɔlɛ ní fe jwɛŋmɔi fɛɛ lɛ buɔ wɔtsuii kɛ wɔjwɛŋmɔi ahe.’—Filipibii 4:6, 7; Mateo 6:9; Yohane 14:6, 14.
6 Wɔnáa mumɔŋ shweshweeshwe shihilɛ mli ŋɔɔmɔ ejaakɛ, kɛ́ wɔɔwie yɛ mfonirifeemɔŋ lɛ, Yehowa ji “wɔbobaahe” diɛŋtsɛ. Ehaa wɔ ‘piai’ hu ákɛ mumɔŋ abobaahei—ekolɛ hei ní kɛ ewebii lɛ asafoi yɔɔ tsakpaa ní bɛŋkɛ kpaakpa—he ni tookwɛlɔi ní yɔɔ suɔmɔ lɛ yeɔ buaa babaoo ni wɔ shweshweeshwefeemɔ lɛ yaa hiɛ. (Yesaia 26:20; 32:1, 2; Bɔfoi lɛ Asaji 20:28, 29) Kɛfata he lɛ, wɔteŋ mɛi komɛi jɛ wekui ní kɛ afii babaoo esɔmɔ Nyɔŋmɔ lɛ amli, ni wɔ diɛŋtsɛ hu wɔna akɛ eji ‘wɔbobaahe diɛŋtsɛ yɛ yinɔi fɛɛ mli.’
7. “Afɔ́” gɔji lɛ ni ‘abɔ’ shikpɔŋ lɛ hu yɛ mɛɛ shishinumɔ naa?
7 Yehowa yɛ shihilɛ mli kwraa dani “afɔ́” gɔji lɛ, loo dani ‘abɔ’ shikpɔŋ lɛ. Kɛ́ aasusu he yɛ adesai ashishinumɔ naa lɛ, shikpɔŋ nɛɛ kɛ emli nibii srɔtoi lɛ fɛɛ, tsofai ní yɔɔ mli lɛ ahe gbɛjianɔtoo, kɛ gbɛjianɔtoi krokomɛi ní yɔɔ haŋtsii lɛ biɔ mɔdɛŋbɔɔ kpele diɛŋtsɛ. Ni kɛ́ lalatsɛ lɛ wie akɛ “afɔ́” gɔji lɛ ni ‘abɔ’ shikpɔŋ lɛ hu lɛ, belɛ etsɔɔ bulɛ kpele ní eyɔɔ kɛha nitsumɔ babaoo diɛŋtsɛ ní Yehowa tsu beni ebɔɔ nɛkɛ nibii nɛɛ fɛɛ lɛ. Ani esaaa akɛ wɔ hu wɔnáa bulɛ kɛ hiɛsɔɔ ní tamɔ nɛkɛ wɔhaa Bɔlɔ lɛ ninenaa nitsumɔi lɛ?
Yehowa Efee Klalo akɛ Eeeye Ebua Wɔ Be Fɛɛ Be
8. Mɛni ji wiemɔ ní awie akɛ Yehowa ji Nyɔŋmɔ “kɛjɛ naanɔ kɛyaa naanɔ” lɛ shishinumɔ?
8 Lalatsɛ lɛ lá akɛ: “Bo ji Mawu kɛjɛ naanɔ kɛyaa naanɔ.” “Naanɔ” ní akɛtsu nii yɛ shishijee wiemɔi lɛ amli lɛ baanyɛ atsɔɔ nibii ní yɔɔ naagbee, shi kɛlɛ atsɔɔɔ be pɔtɛɛ ní esɛɛkɛlɛ ji. (2 Mose 31:16, 17; Hebribii 9:15) Shi kɛlɛ, “naanɔ” ní akɛtsu nii yɛ Lala 90:2 lɛ kɛ hei krokomɛi yɛ Hebri Ŋmalɛi lɛ amli lɛ shishi ji “nɔ ni hiɔ shi daa.” (Jajelɔ 1:4) Wɔjwɛŋmɔi nyɛŋ anu bɔ ni enyɛɔ ebaa lɛ akɛ Nyɔŋmɔ ehi shi aahu be fɛɛ be lɛ shishi. Ni kɛlɛ, Yehowa bɛ shishijee ni ebɛ naagbee hu. (Habakuk 1:12) Ebaahi shi be fɛɛ be ní efee klalo akɛ eeeye ebua wɔ.
9. Lalatsɛ lɛ kɛ adesa shihilɛ be ni ji afii akpe toɔ mɛni he?
9 Akɛ mumɔ tsirɛ lalatsɛ lɛ ni ekɛ adesa shihilɛ be ni ji afii akpe to be kukuoo pɛ he, yɛ Bɔlɔ ní hiɔ shi kɛyaa naanɔ lɛ niiashikpamɔ mli. Beni ekɛ Nyɔŋmɔ wieɔ lɛ, eŋma akɛ: “Ohaa adesa kũɔ esɛɛ etsɔɔ sũ, ni okɛɔ akɛ: Nyɛkua nyɛsɛɛ nyɛbaa, nyɛ gbɔmɛi abii! Ejaakɛ ohiɛ lɛ, afii akpe tamɔ nyɛ kpaakpa nyɛ, kɛ nyɔɔŋ buu be pɛ.”—Lala 90:3, 4.
10. Nyɔŋmɔ haa adesa “kũɔ esɛɛ etsɔɔ sũ” ekoŋŋ yɛ mɛɛ gbɛ nɔ?
10 Adesa gboɔ, ni Nyɔŋmɔ haa ‘ekũɔ sɛɛ etsɔɔ sũ’ ekoŋŋ. No tsɔɔ akɛ, adesa kũɔ esɛɛ kɛyaa “sũ” mli, ákɛ shikpɔŋ lɛ fã ní ekpɔtɔ. Enɛ tsɔɔ akɛ, Yehowa kɛɔ akɛ: ‘Kuu osɛɛ kɛya shikpɔŋ sũ lɛ ní ajie bo kɛjɛ mli lɛ mli ekoŋŋ.’ (1 Mose 2:7; 3:19) Enɛ kɔɔ mɔ fɛɛ mɔ—mɛi ní he wa loo mɛi ní he waaa, niiatsɛmɛi loo ohiafoi fɛɛ ahe—ejaakɛ adesa ko bɛ ní yeɔ emuu, ní ‘eeenyɛ enyɛmi ekpɔ̃, loo ní eeeha Nyɔŋmɔ eyi nii, koni ehi shi daa.’ (Lala 49:7-10) Shi kwɛ bɔ ni wɔdaa shi babaoo akɛ ‘Nyɔŋmɔ ŋɔ e-Bi koome lɛ eha, koni mɔ fɛɛ mɔ ní heɔ enɔ yeɔ lɛ aná naanɔ wala’!—Yohane 3:16; Romabii 6:23.
11. Mɛni hewɔ wɔbaanyɛ wɔkɛɛ akɛ be kakadaŋŋ kɛha wɔ lɛ ji be kuku kɛha Nyɔŋmɔ lɛ?
11 Yɛ Yehowa hiɛ lɛ, Metusela ní ye afii 969 lɛ po shihilɛ be shɛɛɛ gbi kome. (1 Mose 5:27) Yɛ Nyɔŋmɔ hiɛ lɛ, afii akpe tamɔ nyɛ kpaakpa nyɛ—be falɛ ni ji ŋmɛlɛtswai 24 pɛ—ní eho etee. Lalatsɛ lɛ wie hu akɛ yɛ Nyɔŋmɔ hiɛ lɛ, afii akpe tamɔ bulɔ ko ŋmɛlɛtswai ejwɛ buu be ní ekɛbuɔ yɛ nsara mli yɛ nyɔɔŋteŋ lɛ. (Kojolɔi 7:19) Belɛ eyɛ faŋŋ akɛ, nɔ ni ji be kakadaŋŋ kɛha wɔ lɛ ji be kuku kwraa yɛ Yehowa, Nyɔŋmɔ ní hiɔ shi kɛyaa naanɔ lɛ hiɛ.
12. Nyɔŋmɔ ‘looɔ adesai kɛyaa tamɔ faa’ yɛ mɛɛ gbɛ nɔ?
12 Kɛ́ akɛ adesa amrɔ nɛɛ shihilɛ miito Nyɔŋmɔ naanɔ shihilɛ lɛ he lɛ, adesa shihilɛ yɛ kuku kwraa. Lalatsɛ lɛ kɛɛ akɛ: “Olooɔ amɛ kɛyaa tamɔ faa looɔ nii, amɛtamɔ wɔ ní awɔɔ; leebi lɛ amɛfeɔ frɔ̃frɔ̃ tamɔ jwɛi. Leebi lɛ egbaa afofro, ni efeɔ floŋŋ; gbɛkɛnaashi lɛ afoɔ afɔ̃ɔ shi ni eŋãlãa.” (Lala 90:5, 6) Mose na beni Israelbii lɛ akpei abɔ gboi yɛ ŋã lɛ nɔ, ní Nyɔŋmɔ ‘loo amɛ kɛtee’ tamɔ nu afua looɔ nii lɛ. Atsɔɔ lala lɛ fã nɛɛ shishi akɛ: “Olooɔ gbɔmɛi kɛyaa yɛ gbele wɔ mli.” (New International Version) Yɛ gbɛ kroko nɔ lɛ, adesa ní yeee emuu lɛ wala sɛɛkɛlɛ tamɔ “wɔ ní awɔɔ” be kukuoo kɛkɛ—ní abaanyɛ akɛto gbɛkɛ wɔdɔ̃iwɔɔ shikome pɛ he.
13. ‘Wɔtamɔ jwɛi fɔ́’ yɛ mɛɛ gbɛ nɔ, ni te esa akɛ enɛ asa wɔsusumɔ he eha tɛŋŋ?
13 ‘Wɔtamɔ jwɛi fɔ́ ní gbaa afofro leebi,’ shi beni aaashɛ gbɛkɛnaashi lɛ, hulu la ní naa wa waa lɛ eŋãlã lɛ. Hɛɛ, wɔwala be yɛ kuku kwraa, tamɔ jwɛi ní ŋãlãa yɛ gbi kome pɛ mli. No hewɔ lɛ, nyɛkahaa wɔkpataa nɛkɛ nii ní jara wa waa nɛɛ hiɛ kɛkɛ. Shi moŋ, esa akɛ wɔtao Nyɔŋmɔ gbɛtsɔɔmɔ ní tsɔɔ bɔ ni esa akɛ wɔkɛ wɔwala afii ní eshwɛ lɛ atsu nii aha yɛ nibii agbɛjianɔtoo nɛɛ mli.
Yehowa Yeɔ Ebuaa Wɔ ‘ní Wɔkane Wɔgbii Lɛ’
14, 15. Lala 90:7-9 lɛ ná mɛɛ mlibaa yɛ Israelbii lɛ anɔ?
14 Lalatsɛ lɛ kɛɛ Nyɔŋmɔ kɛfata he akɛ: “Wɔmiitã yɛ omlifu lɛ naa, ni omlila lɛ naa lɛ aahuu wɔ kɛmiiya. Oŋɔ wɔnishaianii lɛ oto ohiɛ, wɔdujiaŋ eshai lɛ hu yɛ ohiɛ la lɛ mli. Ejaakɛ wɔgbii lɛ fɛɛ hoɔ yɛ omlifu lɛ naa, wɔyeɔ wɔfii lɛ tãa tamɔɔ adesã ní atãa.”—Lala 90:7-9.
15 Israelbii ní bɛ hemɔkɛyeli lɛ ‘tã yɛ Nyɔŋmɔ mlifu lɛ naa.’ ‘Ahuu amɛ kɛtee yɛ emlila lɛ naa,’ loo ‘emlila lɛ wo amɛhe gbeyei.’ (New International Version) “Aplenee” amɛteŋ mɛi komɛi “yɛ ŋã lɛ nɔ” kɛtsɔ ŋwɛi kojomɔi ní ba amɛnɔ lɛ anɔ. (1 Korintobii 10:5) Yehowa ‘ŋɔ amɛnishaianii lɛ eto ehiɛ.’ Eha amɛbu tɔmɔi ní amɛtɔ̃ yɛ faŋŋ mli lɛ ahe akɔntaa, shi amɛ ‘dujiaŋ eshai,’ loo eshai ní amɛŋɔtee lɛ po, ‘baje kpo yɛ ehiɛ la lɛ mli.’ (Abɛi 15:3) Akɛni Nyɔŋmɔ mlifu ba amɛnɔ hewɔ lɛ, Israelbii ní shwaaa amɛhe lɛ ‘tã tamɔ adesã ní atãa.’ Enɛ hewɔ lɛ, wɔ diɛŋtsɛ wɔwala be kuku lɛ tamɔ kɔɔyɔɔ loo mumɔ ní jɛɔ wɔdaaŋ, tamɔ adesã folo ko kɛkɛ.
16. Kɛ́ mɛi komɛi miifee esha yɛ teemɔŋ lɛ, mɛni esa akɛ amɛfee?
16 Kɛ́ wɔteŋ mɔ ko feɔ esha yɛ teemɔŋ lɛ, ekolɛ wɔbaanyɛ wɔkɛ jeŋba nɛɛ atee wɔnanemɛi adesai yɛ be ko mli. Shi wɔ tɔmɔ ní wɔkɛtee lɛ baaje kpo ‘yɛ Yehowa hiɛ la lɛ mli,’ ni wɔnifeemɔi lɛ baafite wɔkɛ lɛ teŋ wekukpaa lɛ. Kɛ́ wɔɔná wɔkɛ lɛ teŋ wekukpaa ní bɛŋkɛ kpaakpa ekoŋŋ lɛ, no lɛ ehe baahia ní wɔsɔle wɔbi edɛŋ eshaifaa, ni wɔtsi wɔhe kɛjɛ wɔtɔmɔi lɛ ahe, ní wɔkɛ shidaa akpɛlɛ Kristofoi onukpai lɛ adɛŋ yelikɛbuamɔ nɔ. (Abɛi 28:13; Yakobo 5:14, 15) Kwɛ bɔ ni no baahi kwraa, moŋ fe ní eeeba akɛ ‘wɔfii lɛ aaatã tamɔ adesã ní atãa,’ yɛ be mli ní wɔ naanɔ wala he hiɛnɔkamɔ lɛ hu yɔɔ oshara mli!
17. Mɛni ji adesai fɛɛ awala sɛɛkɛlɛ, ni wɔwala afii eyi obɔ̃ kɛ mɛni?
17 Lalatsɛ lɛ wie yɛ adesai ní yeee emuu lɛ awala sɛɛkɛlɛ he akɛ: “Wɔfii amli gbii lɛ, afii nyɔŋmai kpawo ni, ni kɛ́ efá aahu lɛ, afii nyɔŋmai kpaanyɔ, ni amɛmli shwãa nii lɛ, tɔlɛ kɛ yakayakanii ni; ejaakɛ ehoɔ oyá, ni wɔfilikiɔ kɛyaa.” (Lala 90:10) Gbɔmɛi pii awala sɛɛkɛlɛ ji afii 70, ni beni Kaleb ye afii 85 lɛ, ewie bɔ ni eyɔɔ hewalɛ ní ekaaa lɛ he. Shi esoro mɛi fioo komɛi, tamɔ Aaron (123), Mose (120), kɛ Yoshua (110). (4 Mose 33:39; 5 Mose 34:7; Yoshua 14:6, 10, 11; 24:29) Shi yɛ yinɔbii ní bɛ hemɔkɛyeli, ní shi Mizraim lɛ ateŋ lɛ, mɛi ní aŋmala amɛgbɛi, ní amɛye kɛjɛ afii 20 kɛyaa lɛ fɛɛ gboi yɛ afii 40 ní nyiɛ sɛɛ lɛ mli. (4 Mose 14:29-34) Ŋmɛnɛ, yɛ maji pii anɔ lɛ, adesai awala sɛɛkɛlɛ lɛ kã he eyɛ husui ní lalatsɛ lɛ tsɔɔ lɛ amli lolo. Wɔwala afii lɛ eyi obɔ̃ kɛ “tɔlɛ kɛ yakayakanii.” Amɛhoɔ kɛyaa oyá, “ni wɔfilikiɔ kɛyaa.”—Hiob 14:1, 2.
18, 19. (a) ‘Wɔgbii lɛ ní wɔɔkane bɔni afee ní wɔná nilee tsui’ lɛ tsɔɔ mɛni? (b) Nilee ní wɔkɛaatsu nii lɛ baakanya wɔ ní wɔfee mɛni?
18 Lalatsɛ lɛ lá kɛtsa nɔ akɛ: “Namɔ le omlifu lɛ mliwalɛ kɛ gbeyei ní sa akɛ asheo yɛ omlila lɛ naa? Tsɔɔmɔ wɔ wɔgbii lɛ kanemɔ, beni afee ni wɔná nilee tsui!” (Lala 90:11, 12) Wɔteŋ mɔ kome folo po leee Nyɔŋmɔ mlifu lɛ mliwalɛ loo he ni emlila lɛ naawalɛ yashɛɔ, ni esa akɛ enɛ aha gbeyeishemɔ ní bulɛ yɔɔ mli, ní wɔyɔɔ kɛha Yehowa lɛ nɔ akwɔ. Yɛ anɔkwale mli lɛ, esa akɛ ekanya wɔ ní wɔbi lɛ ní “[etsɔɔ] wɔ wɔgbii lɛ kanemɔ, beni afee ni wɔná nilee tsui!”
19 Lalatsɛ lɛ wiemɔi lɛ ji sɔlemɔ ní esɔle akɛ Yehowa atsɔɔ ewebii lɛ gbɛ ní amɛaatsɔ nɔ amɛkɛ nilee atsu nii ní amɛbu amɛwala gbii ní eshwɛ lɛ akɛ ejara wa, ní amɛkɛtsu nii yɛ gbɛ ní Nyɔŋmɔ kpɛlɛɔ nɔ lɛ nɔ. Wala sɛɛkɛlɛ ni ji afii 70 lɛ kɛ hiɛnɔkamɔ ni ji gbii 25,500 haa. Ni kɛlɛ, afii abɔ ní wɔye lɛ fɛɛ sɛɛ lɛ, ‘wɔleee bɔ ni wɔwala baatamɔ aha wɔ́, ejaakɛ wɔtamɔ lamɔ ní pueɔ fioo ko, ni kɛ́ fee sɛɛ lɛ elaajeɔ.’ (Yakobo 4:13-15) Akɛni ‘be kɛ nibii ní aleee ní baa trukaa ninaa wɔ fɛɛ’ hewɔ lɛ, wɔnyɛŋ wɔtsɔɔ bei abɔ ní eshwɛ ní wɔkɛbaahi wala mli. No hewɔ lɛ, nyɛhaa wɔsɔlea wɔbia nilee ní wɔkɛkpee kaai anaa, ní wɔkɛ mɛi krokomɛi aye yɛ gbɛ kpakpa nɔ, ní wɔfee bɔ ni hi fe fɛɛ ní wɔɔnyɛ yɛ Yehowa sɔɔmɔ mli bianɛ—ŋmɛnɛ! (Jajelɔ 9:11; Yakobo 1:5-8) Yehowa kudɔɔ wɔ kɛtsɔɔ e-Wiemɔ lɛ, emumɔ lɛ, kɛ egbɛjianɔtoo lɛ nɔ. (Mateo 24:45-47; 1 Korintobii 2:10; 2 Timoteo 3:16, 17) Nilee ní wɔkɛtsuɔ nii lɛ kanyaa wɔ ní ‘wɔtao Nyɔŋmɔ Maŋtsɛyeli lɛ klɛŋklɛŋ,’ ni wɔkɛ wɔwala gbii ní eshwɛ lɛ atsu nii yɛ gbɛ ní woɔ Yehowa hiɛ nyam, ní haa etsui náa miishɛɛ lɛ nɔ. (Mateo 6:25-33; Abɛi 27:11) Yɛ anɔkwale mli lɛ, wɔtsui muu fɛɛ ní wɔkɛjáa lɛ lɛ ejieŋ wɔnaagbai lɛ fɛɛ kɛyaŋ moŋ, shi eka shi faŋŋ akɛ ekɛ miishɛɛ babaoo diɛŋtsɛ baa.
Yehowa Jɔɔmɔ Haa Wɔnáa Miishɛɛ
20. (a) ‘Nii feɔ Nyɔŋmɔ mɔbɔ’ yɛ mɛɛ gbɛ nɔ? (b) Kɛ́ wɔtɔ̃ tɔmɔ ko ní yɔɔ hiɛdɔɔ, shi wɔjie anɔkwa tsuitsakemɔ kpo lɛ, te Yehowa kɛ wɔ baaye aha tɛŋŋ?
20 Kwɛ bɔ ni eeefee fɛo, kɛji wɔɔnyɛ wɔná miishɛɛ yɛ wɔwala gbii ní eshwɛ lɛ fɛɛ mli! Mose kpá fai yɛ enɛ gbɛfaŋ akɛ: “Kuu osɛɛ, Yehowa! mɛɛ beyinɔ nɔŋŋ ni? ní oha otsuji lɛ anii afeeo mɔbɔ! Ha wɔtɔrɔ leebi kɛ omɔbɔnalɛ [loo, “anɔkwa suɔmɔ”] lɛ, koni wɔnyá ní wɔmii ashɛ wɔhe yɛ wɔgbii lɛ fɛɛ mli!” (Lala 90:13, 14; NW shishigbɛ niŋmaa) Nyɔŋmɔ tɔ̃ɔɔ. Shi kɛlɛ, ‘nii feɔ lɛ mɔbɔ’ ni ‘ekuɔ esɛɛ’ kɛjɛɔ emlifu kɛ toigbalamɔ ní ekɛaaha lɛ mli, kɛji kɔkɔbɔɔ ní ekɛhaa yɛ nakai nifeemɔ lɛ he lɛ kɛ tsakemɔ ba efɔŋfeelɔi ní etsake amɛtsui lɛ asubaŋ kɛ amɛjeŋba mli lɛ. (5 Mose 13:17) No hewɔ lɛ kɛ́ wɔtɔ̃ tɔmɔ ko ní yɔɔ hiɛdɔɔ, shi wɔjie anɔkwa tsuitsakemɔ kpo lɛ, no lɛ Yehowa ‘baaha wɔtɔrɔ kɛ emɔbɔnalɛ lɛ,’ ni wɔɔná yiŋtoo ní wɔɔdamɔ nɔ “wɔnyá.” (Lala 32:1-5) Ni kɛ́ wɔnyiɛ jalɛ gbɛ nɔ lɛ, no lɛ wɔbaanu anɔkwa suɔmɔ ní Nyɔŋmɔ yɔɔ kɛha wɔ lɛ he, ni no baaha “wɔmii ashɛ wɔhe yɛ wɔgbii lɛ fɛɛ mli”—hɛɛ, yɛ wɔwala gbii ní eshwɛ lɛ fɛɛ mli.
21. Taakɛ wiemɔi ní aŋmala yɛ Lala 90:15, 16 lɛ tsɔɔ lɛ, mɛni ekolɛ Mose biɔ lɛ?
21 Lalatsɛ lɛ kɛ ekãa sɔle akɛ: “Ha wɔmii ashɛ wɔhe tamɔ gbii abɔ ní ohao wɔ yɛ mli, kɛ afii abɔ ní wɔna nɔ̃ fɔŋ lɛ! Ha otsuji lɛ ana onitsumɔi lɛ, ni amɛbii hu ana onunyam lɛ!” (Lala 90:15, 16) Ekolɛ Mose miibi Nyɔŋmɔ ní ejɔɔ Israel kɛ miishɛɛ be ní kɛ amɛhaomɔ gbii lɛ kɛ afii abɔ ní amɛkɛna amanehulu lɛ yeɔ egbɔ, loo esɛɛkɛlɛ tamɔ nakai pɛpɛɛpɛ. Ebi ní Nyɔŋmɔ aha ‘enitsumɔ’ ni ji jɔɔmɔ ní eeejɔɔ Israelbii lɛ afee faŋŋ kɛha E-tsuji lɛ, ní E-nunyam lɛ hu aje kpo faŋŋ yɛ amɛbii, loo amɛshwiei lɛ anɔ. Wɔbaanyɛ wɔsɔle yɛ gbɛ ní ja nɔ ní jɔɔmɔi aba adesai ní feɔ toiboo lɛ anɔ, yɛ Nyɔŋmɔ jeŋ hee ní ewo shi yɛ he lɛ mli.—2 Petro 3:13.
22. Taakɛ Lala 90:17 lɛ tsɔɔ lɛ, wɔbaanyɛ wɔsɔle yɛ gbɛ ní ja nɔ yɛ mɛni he?
22 Lala 90 lɛ baa naagbee kɛ faikpamɔ nɛɛ, akɛ: “ Yehowa, wɔ-Nyɔŋmɔ lɛ, mlihilɛ lɛ ahi wɔnɔ, ni wɔniji anaa nitsumɔ lɛ ha ashwere aha wɔ; ni wɔniji anaa nitsumɔ lɛ ha ashwere!” (Lala 90:17) Nɛkɛ wiemɔi nɛɛ tsɔɔ akɛ wɔbaanyɛ wɔsɔle yɛ gbɛ ní sa nɔ ní Nyɔŋmɔ ajɔɔ mɔdɛŋ ní wɔbɔɔ yɛ esɔɔmɔ mli lɛ nɔ. Ákɛ Kristofoi ní afɔ amɛ mu loo amɛhefatalɔi, “tooi krokomɛi” lɛ, wɔmli filiɔ wɔ akɛ ‘Yehowa mlihilɛ lɛ’ hiɔ shi yɛ wɔnɔ. (Yohane 10:16) Kwɛ bɔ ni wɔnáa miishɛɛ akɛ Nyɔŋmɔ ‘eha wɔniji anaa nitsumɔ lɛ eshwere’ ákɛ Maŋtsɛyeli jajelɔi, kɛ gbɛ̀i krokomɛi anɔ hu!
Nyɛhaa Wɔyaa nɔ Wɔkanea Wɔgbii Lɛ
23, 24. Mɛɛ gbɛ nɔ wɔɔtsɔ ní wɔná Lala 90 lɛ he susumɔ he sɛɛ?
23 Esa akɛ Lala 90 lɛ he susumɔ aha wɔkɛ wɔhe afɔ̃ Yehowa, “wɔbobaahe” lɛ nɔ waa. Kɛ́ wɔsusu emli wiemɔi ní tsɔɔ bɔ ni wɔwala be yɔɔ kuku lɛ he lɛ, esa akɛ no aha wɔhiɛ ahi wɔhe nɔ jogbaŋŋ yɛ bɔ ni ŋwɛi gbɛtsɔɔmɔ he hiaa wɔ kɛha wɔgbii lɛ kanemɔ lɛ gbɛfaŋ. Ni kɛ́ wɔtee nɔ yɛ nilee ní Nyɔŋmɔ gbeyeishemɔ yɔɔ mli lɛ taomɔ kɛ ekɛ nitsumɔ mli lɛ, no lɛ wɔyɛ nɔmimaa akɛ wɔnine baashɛ Yehowa mlihilɛ lɛ kɛ edɛŋ jɔɔmɔi anɔ.
24 Yehowa baaya nɔ etsɔɔ wɔ wɔgbii lɛ kanemɔ. Ni kɛ́ wɔba wɔhe shi wɔha egbɛtsɔɔmɔ lɛ, no lɛ wɔbaanyɛ wɔya nɔ wɔkane wɔgbii lɛ aahu kɛya naanɔi anaanɔ. (Yohane 17:3) Shi, kɛ́ wɔkɛ naanɔ wala baafee oti ní ma wɔhiɛ lɛ, no lɛ esa akɛ Yehowa afee wɔbobaahe. (Yuda 20, 21) Taakɛ wɔbaana yɛ nikasemɔ ní nyiɛ sɛɛ lɛ mli lɛ, aha nɛkɛ oti nɛɛ efee faŋŋ diɛŋtsɛ yɛ Lala 91 lɛ mli wiemɔi ní woɔ mɔ hewalɛ waa lɛ amli.
Te Obaaha Hetoo Tɛŋŋ?
• Yehowa ji “wɔbobaahe” yɛ mɛɛ gbɛ nɔ?
• Mɛni hewɔ wɔbaanyɛ wɔkɛɛ akɛ Yehowa efee klalo be fɛɛ be akɛ ebaaye ebua wɔ lɛ?
• Yehowa yeɔ ebuaa wɔ ni ‘wɔkaneɔ wɔgbii lɛ’ yɛ mɛɛ gbɛ nɔ?
• Mɛni haa ‘wɔmii shɛɔ wɔhe yɛ wɔgbii fɛɛ mli’ lɛ”?
[Nikasemɔ lɛ he Sanebimɔi]
[Mfoniri ni yɔɔ baafa 10]
Yehowa ji Nyɔŋmɔ “beni anáko afɔ́ gɔji lɛ”
[Mfoniri ni yɔɔ baafa 12]
Yɛ Yehowa hiɛ lɛ, Metusela ní hi shi afii 969 lɛ wala be shɛɛɛ gbi kome
[Mfonirii ni yɔɔ baafa 14]
Yehowa ‘eha wɔniji anaa nitsumɔ lɛ eshwere’