Tsɔsemɔ Otsui ni Eshe Yehowa Gbeyei
Tsɔsemɔ Otsui ni Eshe Yehowa Gbeyei
“Miná ni kulɛ amɛná nɛkɛ tsui dã, ní amɛkɛshe mi gbeyei, ní amɛye mikitai lɛ fɛɛ nɔ.”— 5 MOSE 5:29.
1. Te wɔɔfee tɛŋŋ wɔná nɔmimaa akɛ gbi ko baaba ni gbɔmɛi baaye amɛhe kɛjɛ gbeyeishemɔ mli?
GBEYEISHEMƆ etee nɔ ehao adesai afii ohai abɔ. Hɔmɔ, hela, awuiyeli, aloo tawuu he gbeyeishemɔ haa gbɔmɛi akpekpei abɔ feɔ yeyeeye be fɛɛ be. Yɛ yiŋtoo nɛɛ hewɔ lɛ, Jeŋ Muu Fɛɛ Adesai Ahegbɛi Jajemɔ wolo lɛ mlibotemɔ wiemɔi lɛ tsɔɔ bɔ ni ashweɔ ni akɛ jeŋ ko ni adesai fɛɛ baaná heyeli kɛmiijɛ gbeyeishemɔ mli aba. * Miishɛɛ sane ji akɛ, Nyɔŋmɔ diɛŋtsɛ maa nɔ mi kɛhaa wɔ akɛ jeŋ ni tamɔ nɛkɛ baaba—eyɛ mli akɛ jeee kɛtsɔ adesai amɔdɛŋbɔɔ nɔ. Yehowa woɔ shi kɛtsɔɔ egbalɔ Mika nɔ akɛ, ‘mɔ ko bɛ ni baawo ewebii lɛ ahe gbeyei.’—Mika 4:4.
2. (a) Mɛɛ gbɛ nɔ Ŋmalɛi lɛ woɔ wɔ hewalɛ ni wɔshe Nyɔŋmɔ gbeyei yɛ? (b) Mɛɛ sanebimɔi baanyɛ ate shi kɛ wɔsusu gbɛnaa nii ni kã wɔnɔ akɛ wɔshe Nyɔŋmɔ gbeyei lɛ he lɛ?
2 Yɛ gbɛ kroko nɔ lɛ, gbeyeishemɔ hu baanyɛ afee hewalɛ kpakpa. Awoɔ Nyɔŋmɔ tsuji hewalɛ shii abɔ yɛ Ŋmalɛi lɛ amli akɛ amɛshe Yehowa gbeyei. Mose kɛɛ Israelbii lɛ akɛ: “Yehowa, o-Nyɔŋmɔ lɛ, gbeyei oshe ni lɛ nɔŋŋ oja.” (5 Mose 6:13) Afii ohai abɔ sɛɛ lɛ, Salomo ŋma akɛ: “She Nyɔŋmɔ gbeyei ni oye ekitai lɛ anɔ! shi enɛ ji gbɔmɛi fɛɛ agbɛnaa.” (Jajelɔ 12:13) Yɛ wɔ odaseyeli nitsumɔ ni wɔtsuɔ yɛ ŋwɛibɔfoi akwɛmɔ shishi lɛ mli fɛɛ lɛ, wɔ hu wɔwoɔ gbɔmɛi fɛɛ hewalɛ ni ‘amɛshe Nyɔŋmɔ gbeyei ni amɛkɛ anunyam aha lɛ.’ (Kpojiemɔ 14:6, 7) Kɛfata gbeyeishemɔ ni wɔkɛaaha Yehowa lɛ he lɛ, esa akɛ Kristofoi ajɛ amɛtsui muu fɛɛ mli amɛsumɔ lɛ. (Mateo 22:37, 38) Te wɔɔfee tɛŋŋ wɔsumɔ Nyɔŋmɔ ni wɔshe lɛ gbeyei yɛ nakai beaŋ nɔŋŋ hu? Mɛni hewɔ ehe hiaa ni wɔshe Nyɔŋmɔ ni yɔɔ suɔmɔ lɛ gbeyei? Mɛɛ sɛɛnamɔi wɔnaa kɛjɛɔ Nyɔŋmɔ gbeyeishemɔ ni esa akɛ wɔná nɛɛ mli? Bɔni afee ni wɔha sanebimɔi nɛɛ ahetoo lɛ, klɛŋklɛŋ lɛ, esa akɛ wɔnu nɔ ni Nyɔŋmɔ gbeyeishemɔ nɛɛ tsɔɔ, kɛ bɔ ni gbeyeishemɔ ni tamɔ nɛkɛ lɛ feɔ wekukpaa ni kã wɔkɛ Yehowa teŋ lɛ shishijee taomɔ nii lɛ eko shishi.
Naakpɛɛ, Woo, kɛ Gbeyeishemɔ
3. Mɛni ji Nyɔŋmɔ gbeyeishemɔ shishi?
3 Nyɔŋmɔ gbeyeishemɔ ji henumɔ ko ni esa akɛ Kristofoi aná yɛ amɛ-Bɔlɔ lɛ he. Nɛkɛ gbeyeishemɔ nɛɛ mlitsɔɔmɔ kome ji “naakpɛɛ kɛ woo ni mli kwɔ kɛha Bɔlɔ lɛ kɛ gbeyeishemɔ kpakpa ni ayɔɔ akɛ afeŋ nɔ ko ni esaŋ ehiɛ.” No hewɔ lɛ, Nyɔŋmɔ gbeyeishemɔ náa wɔshihilɛ lɛ fai enyɔ ko ni he hiaa lɛ anɔ hewalɛ: su ni wɔhiɛ yɛ Nyɔŋmɔ he kɛ su ni wɔhiɛ yɛ jeŋba ni ehiɔ lɛ he. Eyɛ faŋŋ akɛ fai enyɔ lɛ fɛɛ he hiaa waa, ni esa akɛ wɔkɛ henɔkwɛmɔ asusu he jogbaŋŋ. Taakɛ Vine Expository Dictionary of New Testament Words lɛ tsɔɔ mli lɛ, kɛha Kristofoi lɛ, nɛkɛ woo ni gbeyeishemɔ yɔɔ mli nɛɛ ji ‘shihilɛ mli yiŋtoo ni kudɔɔ mɔ, yɛ mumɔŋ kɛ jeŋba mli saji fɛɛ he.’
4. Te wɔɔfee tɛŋŋ wɔná henumɔi ni tsɔɔ naakpɛɛ kɛ woo wɔha wɔ-Bɔlɔ lɛ?
4 Te wɔɔfee tɛŋŋ wɔná henumɔi ni tsɔɔ naakpɛɛ kɛ woo wɔha wɔ-Bɔlɔ lɛ? Wɔnaa kpɛɔ wɔhe kɛji akɛ wɔna bɔ ni shikpɔŋ ko shikamɔ yɔɔ fɛo ha, bɔ ni nui ni jɛɔ gɔji anɔ shwieɔ jɔɔ mli lɛ yɔɔ naakpɛɛ ni haa ekaa mɔ jwɛŋmɔ mli, aloo bɔ ni hulushinyɔɔ ko yɔɔ fɛo ha. Nɛkɛ henumɔ nɛɛ yaa hiɛ beni wɔkɛ wɔhemɔkɛyeli hiŋmɛii yɔseɔ bɔ ni Nyɔŋmɔ nine yɔɔ nɛkɛ nibɔɔ nitsumɔi nɛɛ asɛɛ lɛ. Agbɛnɛ hu, taakɛ Maŋtsɛ David ji lɛ, wɔnaa bɔ ni wɔ diɛŋtsɛ lɛ wɔjeee fɛifɛi kɛ wɔkɛ wɔhe to Yehowa nibɔɔ ni yɔɔ naakpɛɛ lɛ he lɛ. “Kɛ́ mikwɛ oŋwɛi lɛ ni ji owaabii anaa nitsumɔi lɛ, nyɔɔŋtsere kɛ ŋulamii ní osaa oto lɛ: Mɛni ji adesa, ni ojwɛŋɔ enɔ? aloo gbɔmɔ bi hu, ni osaraa lɛ po?” (Lala 8:4, 5) Nɛkɛ naakpɛɛ nii ni mli kwɔ nɛɛ kɛ mɔ yaa woo mli, ni enɛ hu tsirɛɔ wɔ ni wɔda Yehowa shi ni wɔjie eyi yɛ nibii fɛɛ ni efeɔ kɛhaa wɔ lɛ hewɔ. David hu ŋma akɛ: “Miidao shi, ejaakɛ bɔ ni atsɔ afee mi lɛ yɛ gbeyei kɛ naakpɛɛ; onitsumɔi lɛ yɛ naakpɛɛ, ni misusuma le enɛ krɛdɛɛ.”
5. Mɛni hewɔ esa akɛ wɔshe Yehowa gbeyei, ni mɛɛ nɔkwɛmɔnɔ kpakpa ko wɔyɔɔ yɛ enɛ gbɛfaŋ?
5 Naakpɛɛ kɛ woo henumɔi kanyaa Nyɔŋmɔ hewalɛ ákɛ Bɔlɔ lɛ kɛ enɔyeli hegbɛ akɛ jeŋ muu fɛɛ Nɔyelɔ ni ja lɛ he bulɛ kɛ gbeyeishemɔ kpakpa. Yɛ ninaa ko ni bɔfo Yohane na lɛ mli lɛ, ‘mɛi ni jeɔ kpo yɛ kunimyeli mli kɛjɛɔ kooloo lɛ kɛ emaga lɛ mli lɛ’—ni ji Kristo sɛɛnyiɛlɔi ni afɔ amɛ mu ni yɔɔ amɛŋwɛi gbɛhei amli lɛ—jaje akɛ: “Onitsumɔi lɛ dara ni amɛyɛ naakpɛɛ, Nuŋtsɔ Nyɔŋmɔ Ofe; ogbɛi lɛ ja ni anɔkwa ji amɛ, bo jeŋmaji lɛ a-Maŋtsɛ. Namɔ po sheŋo gbeyei, Nuŋtsɔ, ni ewoŋ ogbɛi lɛ hiɛ nyam?” (Kpojiemɔ 15:2-4) Nyɔŋmɔ gbeyeishemɔ, ni anáa kɛjɛɔ woo ni mli kwɔ kɛha egbojee kɛ nyam lɛ nyiɛɔ Kristo hefatalɔi niyelɔi nɛɛ ahiɛ yɛ ŋwɛi Maŋtsɛyeli lɛ mli koni amɛwo Nyɔŋmɔ hiɛ nyam ákɛ mɔ ni yɔɔ nɔyeli hegbɛ ni fe fɛɛ. Kɛji akɛ wɔsusu nibii fɛɛ ni Yehowa efee lɛ he, kɛ jalɛ gbɛ ni etsɔɔ nɔ eyeɔ jeŋ muu lɛ fɛɛ nɔ lɛ he lɛ, ani wɔbɛ yiŋtoo ni fa bɔ ni aaaha wɔshe lɛ gbeyei?—Lala 2:11; Yeremia 10:7.
6. Mɛni hewɔ esa akɛ wɔná gbeyeishemɔ kpakpa yɛ nii ni esaaa Yehowa hiɛ lɛ feemɔ he?
6 Shi, kɛfata naakpɛɛ kɛ woo he lɛ, esa akɛ gbeyeishemɔ kpakpa ni ayɔɔ akɛ afeŋ nɔ ko ni esaaa ehiɛ lɛ hu afata Nyɔŋmɔ gbeyeishemɔ lɛ he. Mɛni hewɔ? Ejaakɛ yɛ be mli ni Yehowa ji “musuŋtsɔlɔ kɛ durolɔ ní toɔ tsui” lɛ, esa akɛ wɔkai akɛ “ehaaa mɔ ko mɔ ko aŋɔ ehe aye kwraa.” (2 Mose 34:6, 7) Eyɛ mli akɛ Yehowa yɛ suɔmɔ ni enaa mɔbɔ moŋ, shi ekpɛlɛɛɛ nii ni ejaaa gbɛ kɛ efɔŋ ni ajeɔ gbɛ afeɔ lɛ nɔ. (Lala 5:5, 6; Habakuk 1:13) Mɛi ni jeɔ gbɛ amɛfeɔ yiwalɛ nii yɛ Yehowa hiɛ ni amɛtsakeee amɛtsui ni teɔ shi woɔ lɛ lɛ nyɛŋ afee nakai kɛkɛ ni afooo amɛdaaŋ. Taakɛ bɔfo Paulo wie he lɛ, “Nyɔŋmɔ hiɛkalɔ lɛ dɛŋ gbeemɔ yɛ gbeyei pam.” Yɛ naagbee lɛ gbeyeishemɔ kpakpa ni wɔyɔɔ yɛ shihilɛ ni tamɔ nɛkɛ ni wɔɔgbee mli lɛ he lɛ buɔ wɔhe.—Hebribii 10:31.
“Lɛ Nɔŋŋ Ehe Nyɛkɛ Nyɛhe Akpɛtɛa”
7. Mɛɛ yiŋtoi wɔyɔɔ ni nomɛi ahewɔ wɔkɛ wɔhe fɔ̃ɔ Yehowa yiwalaheremɔ hewalɛ lɛ nɔ lɛ?
7 Nyɔŋmɔ he gbeyeishemɔ kɛ woo kɛ bɔ ni wɔhiɛ aaahi wɔhe nɔ jogbaŋŋ yɛ ehewalɛ kpele ni yɔɔ naakpɛɛ lɛ he lɛ ji shishijee nibii kɛha Yehowa mli hiɛnɔkamɔ kɛ hekɛnɔfɔɔ. Bɔ ni gbekɛ bibioo nuɔ hebuu he beni etsɛ bɛŋkɛ lɛ lɛ, nakai nɔŋŋ hu wɔnuɔ shweshweeshwefeemɔ kɛ hekɛnɔfɔɔ he yɛ Yehowa nine ni tsɔɔ wɔ gbɛ lɛ shishi. Kadimɔ bɔ ni Israelbii lɛ fee amɛnii amɛha beni Yehowa kɛ amɛ shi Mizraim lɛ: “Ni Israel na nine wulu ni Yehowa ŋɔ tsɔɔ Mizraim lɛ; ni maŋ lɛ she Yehowa gbeyei, ni amɛhe Yehowa . . . amɛye.” (2 Mose 14:31) Elisha niiashikpamɔ lɛ hu yeɔ anɔkwale ni eji akɛ “Yehowa bɔfo lɛ bɔɔ nsara yɛ mɛi ni sheɔ lɛ gbeyei lɛ ahe kɛkpeɔ, ni ejieɔ amɛ” lɛ he odase. (Lala 34:8; 2 Maŋtsɛmɛi 6:15-17) Ŋmɛnɛŋmɛnɛ beaŋ Yehowa webii ahe yinɔsane kɛ ekolɛ wɔ diɛŋtsɛ wɔ niiashikpamɔ maa nɔ mi akɛ Nyɔŋmɔ kɛ ehewalɛ lɛ tsuɔ nii yɛ mɛi ni sɔmɔɔ lɛ lɛ ahe. (2 Kronika 16:9) No hewɔ lɛ, wɔbaanyɛ wɔyoo akɛ “hiɛnɔkamɔ ni mli wa yɛ Yehowa gbeyeishemɔ mli.”—Abɛi 14:26.
8. (a) Mɛni hewɔ Nyɔŋmɔ gbeyeishemɔ tsirɛɔ wɔ ni wɔnyiɛɔ yɛ egbɛ̀i anɔ lɛ? (b) Tsɔɔmɔ bɔ ni esa akɛ wɔkɛ wɔhe ‘akpɛtɛ’ Yehowa he lɛ mli.
8 Jeee akɛ Nyɔŋmɔ gbeyeishemɔ kpakpa teeɔ hiɛnɔkamɔ kɛ hekɛnɔfɔɔ shi yɛ emli kɛkɛ, shi moŋ ekanyaa wɔ ni wɔnyiɛ yɛ egbɛ̀i anɔ. Beni Salomo gbele sɔlemɔtsu lɛ naa lɛ, esɔle eha Yehowa akɛ: “Beni afee ní [Israel] asheo gbeyei ní amɛnyiɛ ogbɛ̀i lɛ anɔ gbii abɔ fɛɛ ní amɛyɔɔ shikpɔŋ lɛ ní oŋɔha wɔtsɛmɛi lɛ nɔ lɛ!” (2 Kronika 6:31) No mli lɛ Mose etsɔ hiɛ ewo Israelbii lɛ hewalɛ momo akɛ: “Yehowa, nyɛ-Nyɔŋmɔ lɛ, sɛɛ nyɛnyiɛa, ni lɛ gbeyei nyɛshea, ni lɛ ekitãi lɛ anɔ nyɛyea, ni lɛ egbee toi nyɛboa, ni lɛ nyɛsɔmɔa, ni lɛ nɔŋŋ ehe nyɛkɛ nyɛhe akpɛtɛa.” (5 Mose 13:5) Taakɛ nɛkɛ kukuji nɛɛ tsɔɔ yɛ faŋŋ mli lɛ, shwe ni ashweɔ akɛ aaanyiɛ yɛ Yehowa gbɛ̀i anɔ ni akɛ he ‘akpɛtɛ’ ehe lɛ baa kɛjɛɔ hiɛnɔkamɔ kɛ hekɛnɔfɔɔ ni ayɔɔ yɛ Nyɔŋmɔ mli lɛ mli. Hɛɛ, gbeyeishemɔ kpakpa haa wɔboɔ Yehowa toi, wɔsɔmɔɔ lɛ, ni wɔkɛ wɔhe kpɛtɛɔ ehe, tamɔ bɔ ni gbekɛ fioo kɛ ehe baakpɛtɛ etsɛ ni eyɔɔ hiɛnɔkamɔ kɛ hekɛnɔfɔɔ kwraa yɛ emli lɛ he lɛ.—Lala 63:9; Yesaia 41:13.
Nyɔŋmɔ ni Asumɔɔ Lɛ Tsɔɔ Gbeyei ni Asheɔ Lɛ
9. Mɛni ji tsakpaa ni kã suɔmɔ kɛha Nyɔŋmɔ kɛ Nyɔŋmɔ gbeyeishemɔ teŋ?
9 Yɛ Ŋmalɛ lɛ naa lɛ, Nyɔŋmɔ ni asheɔ lɛ gbeyei lɛ etsɔɔɔ yɛ gbɛ ko gbɛ ko kwraa nɔ akɛ esaaa akɛ asumɔɔ lɛ. Nɔ ni tamɔɔɔ nakai lɛ, afã Israelbii lɛ ni ‘amɛshe Yehowa gbeyei, ní amɛnyiɛ yɛ egbɛ lɛ fɛɛ nɔ, ni amɛsumɔ lɛ.’ (5 Mose 10:12) No hewɔ lɛ, Nyɔŋmɔ gbeyeishemɔ kɛ Nyɔŋmɔ suɔmɔ tsa gbagbalii. Nyɔŋmɔ gbeyeishemɔ tsirɛɔ wɔ ni wɔnyiɛɔ egbɛ̀i anɔ, ni enɛ hu yeɔ suɔmɔ ni wɔyɔɔ kɛha lɛ lɛ he odase. (1 Yohane 5:3) Shishinumɔ yɛ enɛ mli, ejaakɛ kɛji akɛ wɔsumɔɔ mɔ ko lɛ, wɔsheɔ gbeyei yɛ gbɛ ni ja nɔ akɛ wɔsumɔŋ ni wɔfee lɛ nidɔɔnii. Israelbii lɛ fee Yehowa nidɔɔnii kɛtsɔ amɛ atuatsemɔ gbɛ yɛ ŋa lɛ nɔ lɛ nɔ. Yɛ anɔkwale mli lɛ, wɔsumɔŋ ni wɔfee nɔ ko ni baaha wɔŋwɛi Tsɛ lɛ aye awerɛho ni tamɔ nɛkɛ. (Lala 78:40, 41) Yɛ gbɛ kroko nɔ lɛ, akɛni ‘Yehowa mii shɛɔ mɛi ni sheɔ lɛ gbeyei lɛ ahe’ hewɔ lɛ, wɔ toiboo kɛ anɔkwayeli haa etsui nyaa. (Lala 147:11; Abɛi 27:11) Suɔmɔ kɛha Nyɔŋmɔ kanyaa wɔ ni wɔsa ehiɛ, ni Nyɔŋmɔ gbeyeishemɔ gbalaa wɔ kɛjɛɔ nidɔɔnii ni wɔfee lɛ lɛ he. Amɛji sui ni yeɔ buaa ni nii yeɔ emuu, jeee nɔ ni teɔ shi ewoɔ.
10. Mɛɛ gbɛ nɔ Yesu tsɔɔ yɛ akɛ enyaa Yehowa gbeyeishemɔ he?
10 Yesu Kristo shihilɛ gbɛ lɛ feɔ bɔ ni wɔbaanyɛ wɔsumɔ Nyɔŋmɔ ní wɔshe lɛ gbeyei yɛ nakai beaŋ nɔŋŋ lɛ he nɔkwɛmɔnɔ yɛ faŋŋ mli. Gbalɔ Yesaia ŋma yɛ Yesu he akɛ: “Ni Yehowa mumɔ lɛ aaahi enɔ, ŋaalee kɛ sanesɛɛkɔmɔ mumɔ lɛ, ŋaawoo kɛ hewalɛ mumɔ lɛ, nilee kɛ Yehowa gbeyeishemɔ mumɔ lɛ. Ni eeená Yehowa gbeyeishemɔ lɛ he miishɛɛ.” (Yesaia 11:2, 3) Taakɛ gbalɛ nɛɛ tsɔɔ lɛ, Nyɔŋmɔ mumɔ lɛ tsirɛ Yesu koni eshe eŋwɛi Tsɛ lɛ gbeyei. Agbɛnɛ hu, wɔkadiɔ akɛ nɛkɛ gbeyeishemɔ nɛɛ etsĩii mɔ naa kwraa, shi moŋ eji jɛɛhe ni haa mɔ tsui nyɔɔ emli. Yesu ná Nyɔŋmɔ suɔmɔnaa nifeemɔ kɛ ehiɛ ni eeesa lɛ he miishɛɛ, yɛ shihilɛi ni mli wawai fe fɛɛ po mli. Beni egbele yɛ sɛŋmɔtso nɔ lɛ kã ehiɛ lɛ, ekɛɛ Yehowa akɛ: “Jeee bɔ ni mi misumɔɔ, shi moŋ bɔ ni bo osumɔɔ.” (Mateo 26:39) Yɛ gbeyei ni esheɔ Nyɔŋmɔ nɛɛ hewɔ lɛ, Yehowa bo e-Bi lɛ faikpamɔi atoi, ewo lɛ hewalɛ, ni ehere eyiwala kɛjɛ gbele mli.—Hebribii 5:7.
Nyɔŋmɔ Gbeyeishemɔ ni Aaakase
11, 12. (a) Mɛni hewɔ esa akɛ wɔkase Nyɔŋmɔ gbeyeishemɔ? (b) Mɛɛ gbɛ Yesu tsɔɔ nɔ etsɔɔ wɔ bɔ ni wɔɔshe Yehowa gbeyei?
11 Nɔ ni tamɔɔɔ naakpɛɛ henumɔ ni wɔnáa beni wɔkɛ adebɔɔ mli hewalɛ kɛ agbojee ekpe lɛ, Nyɔŋmɔ gbeyeishemɔ jeee nɔ ni baa trukaa. No hewɔ ni David Kpeteŋkpele, Yesu Kristo, fɔ̃ɔ wɔ nine yɛ gbalɛ naa akɛ: “Mibii, nyɛbaa nyɛboa mi toi; mibatsɔɔ nyɛ Yehowa gbeyeishemɔ” lɛ. (Lala 34:12) Mɛɛ gbɛ nɔ wɔɔtsɔ wɔkase Yehowa gbeyeishemɔ kɛjɛ Yesu ŋɔɔ?
12 Yesu tsɔɔ wɔ nii koni wɔshe Yehowa gbeyei kɛtsɔ yelikɛbuamɔ ni ekɛhaa wɔ ni wɔnu wɔŋwɛi Tsɛ lɛ su kɛ baŋ ni nɔ bɛ lɛ shishi lɛ nɔ. (Yohane 1:18) Yesu diɛŋtsɛ nɔkwɛmɔnɔ lɛ jieɔ bɔ ni Nyɔŋmɔ jwɛŋɔ kɛ bɔ ni ekɛ mɛi krokomɛi yeɔ haa lɛ kpo, ejaakɛ Yesu jieɔ e-Tsɛ lɛ su kɛ baŋ kpo yɛ gbɛ ni yeɔ emuu nɔ. (Yohane 14:9, 10) Kɛfata he lɛ, wɔtsɔɔ Yesu afɔleshaa lɛ nɔ kɛyaa Yehowa ŋɔɔ kɛ wɔsɔle kɛha wɔhe eshaifaa. Nɛkɛ Nyɔŋmɔ mɔbɔnalɛ kpojiemɔ nɛɛ diɛŋtsɛ ji yiŋtoo titri ni wɔɔdamɔ nɔ wɔshe lɛ gbeyei. Lalatsɛ lɛ ŋma akɛ: “Shi bo odɛŋ eshaifaa yɔɔ, beni afee ni asheo gbeyei.”—Lala 130:4.
13. Mɛɛ gbɛjianɔ ni ato yɛ Abɛi awolo lɛ mli yeɔ ebuaa wɔ koni wɔshe Yehowa gbeyei?
13 Abɛi awolo lɛ etsɔɔ nibii srɔtoi ni yeɔ ebuaa wɔ ni haa wɔnáa Nyɔŋmɔ gbeyeishemɔ. “Mibi, kɛ́ omɔ miwiemɔi lɛ amli, ní okɛ mikitai lɛ to omasɛi, koni oba otoi shi oha nilee, ní okɛ otsui ha sanesɛɛkɔmɔ; hɛɛ, kɛ́ obolɔ otsɛ́ sɛɛyoomɔ, ní owó ogbee nɔ oha sane shishinumɔ, . . . lɛ: No dani ooonu Yehowa gbeyeishemɔ shishi, ni oooná Nyɔŋmɔ he nilee.” (Abɛi 2:1-5) No hewɔ lɛ, kɛ wɔɔshe Nyɔŋmɔ gbeyei lɛ, esa akɛ wɔkase e-Wiemɔ lɛ, ni wɔbɔ mɔdɛŋ waa ni wɔnu efamɔi lɛ ashishi, ni wɔbo eŋaawoo lɛ toi jogbaŋŋ.
14. Te wɔɔfee tɛŋŋ wɔnyiɛ ŋaawoo ni akɛha Israel maŋtsɛmɛi lɛ asɛɛ?
14 Afã blema Israel maŋtsɛ fɛɛ maŋtsɛ ni eŋma Mla lɛ eko eha ehe ni ‘ni ekane mli ewala gbii abɔ fɛɛ, koni ekase Yehowa, e-Nyɔŋmɔ lɛ, gbeyeishemɔ ni enyɛ eye mla lɛ mli wiemɔi lɛ fɛɛ nɔ.’ (5 Mose 17:18, 19) Biblia kanemɔ kɛ ekasemɔ fɛɛ hu he hiaa wɔ kɛji akɛ wɔɔkase Yehowa gbeyeishemɔ. Yɛ be mli ni wɔkɛ Biblia shishitoo mlai tsuɔ nii yɛ wɔshihilɛ mli lɛ, wɔnáa ŋwɛi nilee kɛ jwɛŋmɔ fiofio. ‘Wɔbanuɔ Yehowa gbeyeishemɔ shishi,’ ejaakɛ wɔnaa yibii kpakpai ni ewoɔ yɛ wɔshihilɛ mli lɛ, ni wɔbuɔ wekukpaa ni kã wɔkɛ Nyɔŋmɔ teŋ lɛ akɛ ejara wa waa. Kɛfata he lɛ, akɛni wɔkɛ nanemɛi heyelilɔi kpeɔ kutuu be fɛɛ be hewɔ lɛ, gbekɛbii kɛ onukpai fɛɛ baanyɛ abo ŋwɛi tsɔɔmɔ toi, ni amɛkase Nyɔŋmɔ gbeyeishemɔ, ni amɛnyiɛ yɛ egbɛ̀i anɔ.—5 Mose 31:12.
Miishɛɛ Ji Mɔ Fɛɛ Mɔ ni Sheɔ Yehowa Gbeyei
15. Nyɔŋmɔ gbeyeishemɔ kɔɔ jamɔ ni wɔkɛhaa lɛ lɛ he yɛ mɛɛ gbɛ nɔ?
15 Wɔnaa kɛjɛɔ nɔ ni eho nɛɛ mli akɛ, Nyɔŋmɔ gbeyeishemɔ ji subaŋ kpakpa ni esa akɛ wɔ fɛɛ wɔná, ejaakɛ eji jamɔ ni wɔkɛhaa Yehowa lɛ shishijee taomɔ nii lɛ eko. Ehaa wɔkɛ wɔhiɛ fɔ̃ɔ enɔ kwraa, ni wɔnyiɛ egbɛ̀i anɔ, ni wɔkɛ wɔhe akpɛtɛ ehe gbagbalii. Taakɛ eji anɔkwale yɛ Yesu Kristo he lɛ, Nyɔŋmɔ gbeyeishemɔ baanyɛ atsirɛ wɔ hu ni wɔtsu wɔ henɔjɔɔmɔ kita lɛ he nii bianɛ kɛ agbɛnɛ kɛya naanɔi anaanɔ.
16. Mɛni hewɔ Yehowa woɔ wɔ hewalɛ ni wɔshe lɛ gbeyei lɛ?
16 Nyɔŋmɔ gbeyeishemɔ tamɔɔɔ hela ko kɔkɔɔkɔ aloo nɔ ko ni tsiɔ mɔ naa yakatswaa. Biblia lɛ maa nɔ mi kɛhaa wɔ akɛ: “Ajɔɔ mɔ fɛɛ mɔ ni sheɔ Yehowa, ni enyiɛɔ egbɛi lɛ anɔ lɛ!” (Lala 128:1) Yehowa woɔ wɔ hewalɛ ni wɔshe lɛ gbeyei ejaakɛ ele akɛ nɛkɛ su nɛɛ baabu wɔhe. Wɔkadiɔ bɔ ni ekɛ suɔmɔ susuɔ mɔ he lɛ yɛ wiemɔi ni ewie etsɔɔ Mose lɛ mli: “Miná ni kulɛ [Israelbii lɛ] amɛná nɛkɛ tsui dã, ní amɛkɛshe mi gbeyei, ní amɛye mikitai lɛ fɛɛ nɔ, koni ahi aha amɛ kɛ amɛbii kɛya naanɔ!”—5 Mose 5:29.
17. (a) Mɛɛ sɛɛnamɔi wɔnáa kɛjɛɔ Nyɔŋmɔ ni wɔsheɔ lɛ gbeyei lɛ mli? (b) Mɛɛ Nyɔŋmɔ gbeyeishemɔ lɛ fa ko abaasusu he yɛ nikasemɔ ni nyiɛ sɛɛ lɛ mli?
17 Nakai nɔŋŋ kɛji akɛ wɔsaa wɔtsui koni eshe Nyɔŋmɔ gbeyei lɛ, ebaahi kɛha wɔ. Yɛ mɛɛ gbɛ̀i anɔ? Klɛŋklɛŋ kwraa lɛ, su ni tamɔ nɛkɛ baasa Nyɔŋmɔ hiɛ, ni ebaagbala wɔ kɛbɛŋkɛ lɛ. David le kɛjɛ lɛ diɛŋtsɛ eniiashikpamɔ mli akɛ, “mɛi ni sheɔ lɛ gbeyei lɛ, efeɔ nɔ ni amɛtaoɔ ehaa amɛ, eboɔ amɛbolɔmɔ toi, ni ehereɔ amɛyiwala.” (Lala 145:19) Nɔ ni ji enyɔ lɛ, Nyɔŋmɔ gbeyeishemɔ he baaba sɛɛnamɔ kɛha wɔ, ejaakɛ ebaasa su ni wɔhiɛ yɛ efɔŋ he lɛ he. (Abɛi 3:7) Nikasemɔ ni nyiɛ sɛɛ lɛ baapɛi bɔ ni gbeyeishemɔ ni tamɔ nɛkɛ lɛ buɔ wɔhe kɛjɛɔ mumɔŋ oshara he lɛ mli, ni ebaati Ŋmalɛ naa nɔkwɛmɔnii komɛi ni kɔɔ hii komɛi ni she Nyɔŋmɔ gbeyei ni amɛtsi amɛhe kɛjɛ efɔŋ he lɛ ahe lɛ mli.
[Shishigbɛ niŋmaa]
^ kk. 1 Jeŋmaji Ekomefeemɔ Gwabɔɔ lɛ kpɛlɛ Jeŋ Muu Fɛɛ Adesa Hegbɛi Jajemɔ lɛ nɔ yɛ December 10, 1948.
Ani Obaanyɛ Oha Nɔ ni Nyiɛ Sɛɛ Nɛɛ Ahetoo?
• Mɛni ji Nyɔŋmɔ gbeyeishemɔ shishi, ni te enɛ saa wɔhe ehaa tɛŋŋ?
• Mɛɛ tsakpaa kã Nyɔŋmɔ gbeyeishemɔ kɛ nyiɛmɔ ni akɛ Nyɔŋmɔ nyiɛɔ lɛ teŋ?
• Mɛɛ gbɛ nɔ Yesu nɔkwɛmɔnɔ lɛ tsɔɔ yɛ akɛ Nyɔŋmɔ gbeyeishemɔ kɔɔ suɔmɔ ni akɛhaa Nyɔŋmɔ lɛ he?
• Mɛɛ gbɛ̀i anɔ wɔɔnyɛ wɔtsɔ wɔná tsui ni sheɔ Yehowa gbeyei?
[Nikasemɔ lɛ he Sanebimɔi]
[Mfoniri ni yɔɔ baafa 17]
Afã Israel maŋtsɛmɛi ni amɛŋmala Mla lɛ eko amɛha amɛ diɛŋtsɛ amɛhe ni amɛkane daa gbi
[Mfoniri ni yɔɔ baafa 18]
Yehowa gbeyeishemɔ haa wɔkɛ wɔhe fɔ̃ɔ enɔ tamɔ bɔ ni binuu kɛ ehe fɔ̃ɔ etsɛ nɔ lɛ
[He ni Mfoniri ni yɔɔ baafa 15 lɛ Jɛ]
Ŋulamii: Photo by Malin, © IAC/RGO 1991