Nitsumɔi Kpakpai Woɔ Nyɔŋmɔ Hiɛ Nyam

ANƆKWA Kristofoi tsɔɔ amɛjeŋba kɛ nitsumɔi kpakpai anɔ amɛkɛ hiɛnyamwoo bahaa Nyɔŋmɔ. (1 Petro 2:12) Abaanyɛ ana enɛ yɛ nɔ ni ba yɛ Italy yɛ nyɛsɛɛ afii nɛɛ amli lɛ mli.

Yɛ September 1997 mli lɛ, shikpɔŋhosomɔ ko ni naa wa ba yɛ Marche kɛ Umbria kpokpai lɛ anɔ hei srɔtoi, ni ekumɔ shiai ní miihe ashɛ 90,000 eshwie shi. Oya nɔŋŋ ni Yehowa Odasefoi akui kɛ yelikɛbuamɔ ha nanemɛi heyelilɔi kɛ mɛi krokomɛi hu. Amɛkɛ tsɔne ni tsũ yɔɔ sɛɛ, buu, stof, tsɔne ni haa sarawa hewalɛ, kɛ nibii krokomɛi ha amɛ. Mɛi na nɛkɛ yelikɛbuamɔ nibii nɛɛ ni akɛha lɛ.

Adafitswaa wolo ko ni gbɛi ji Il Centro bɔ amaniɛ akɛ: “Yehowa Odasefoi ni jɛ Roseto [yɛ Teramo kpokpai lɛ anɔ] ji mɛi klɛŋklɛŋ ní kɛ yelikɛbuamɔ nibii baha yɛ hei ni oshara lɛ eba yɛ lɛ . . . Yɛ kpe ni amɛkpɛɔ kɛsɔleɔ yɛ be kɛ bei amli lɛ sɛɛ lɛ, mɛi ni yeɔ Yehowa anɔkwa nɛɛ tsuɔ nitsumɔi kpakpai, ni amɛkɛ yelikɛbuamɔ haa mɛi ni oshara eshara amɛ ní jamɔ mli ni amɛyɔɔ lɛ kɔɔɔ he eko.”

Maŋkwralɔ ni kwɛɔ Nocera Umbra, ni ji maji ni shikpɔŋhosomɔ lɛ fite nii waa yɛ jɛmɛ lɛ ateŋ ekome lɛ nɔ lɛ ŋma kɛyaha Odasefoi lɛ akɛ: “Miida nyɛ shi kɛjɛ mitsui mli yɛ yelikɛbuamɔ ni nyɛkɛha Nocera maŋbii lɛ hewɔ. Miheɔ miyeɔ akɛ henumɔ ni tamɔ nɛkɛ nɔŋŋ maŋbii lɛ hu jieɔ lɛ kpo.” Kɛfata he lɛ, Nitsumɔhe ni Kwɛɔ Maŋ Saji Anɔ lɛ kɛ yijiemɔ wolo kɛ jweremɔ nɔ̃ ha Congregazione Cristiana dei Testimoni di Geova (Yehowa Odasefoi Kristofoi Asafo) lɛ “koni ekɛye nitsumɔ ni amɛtsu lɛ he odase kɛ mɔdɛŋ ni amɛbɔ yɛ oshara ni ba Umbria kɛ Marche kpokpai lɛ anɔ lɛ ahe nitsumɔi amli lɛ.”

Yɛ October 2000 lɛ mli lɛ, nu afua ko ni fite nii waa ba Piedmont, ni ji maŋ ko ni yɔɔ Italy kooyigbɛ lɛ. Shikome ekoŋŋ lɛ, Odasefoi lɛ to gbɛjianɔ oya nɔŋŋ ni amɛkɛ yelikɛbuamɔ nibii yaha. Ana nɛkɛ nitsumɔi kpakpai nɛɛ hu faŋŋ. Piedmont Kpokpai lɛ ha amɛ tao bibioo ko ni aŋmala nibii yɛ nɔ “yɛ amɛsuɔmɔ mli ni amɛjɛ ni amɛtsu nitsumɔi kpakpai koni amɛkɛye amɛbua Piedmontbii lɛ ní nu afua enina amɛ lɛ hewɔ.”

Yesu Kristo fã ekaselɔi lɛ akɛ: “Nyɛhaa nyɛla atsoa yɛ gbɔmɛi ahiɛ, koni amɛna nyɛnifeemɔ nii kpakpai lɛ, ni amɛwo nyɛtsɛ ni yɔɔ ŋwɛi lɛ hiɛ nyam.” (Mateo 5:16) Yehowa Odasefoi jɛɔ miishɛɛ mli amɛwoɔ Nyɔŋmɔ hiɛ nyam, shi jeee amɛ diɛŋtsɛ amɛhe kɛtsɔ ‘nitsumɔi kpakpai’ ni amɛtsuɔ kɛyeɔ ebua amɛnanemɛi yɛ mumɔŋ kɛ yɛ gbɛ̀i krokomɛi anɔ lɛ nɔ.