Sanebimɔi ni Jɛ Kanelɔi Adɛŋ

Te gbalashihilɛ ní akɛ wekunyo ni bɛŋkɛ kpaakpa lɛ aaabote mli lɛ ní atsĩ efeemɔ naa yɛ Mose Mla lɛ mli lɛ kɔɔ Kristofoi ahe ŋmɛnɛ ehaa tɛŋŋ?

Mla ni Yehowa kɛha Israel maŋ lɛ ewieee nibii babaoo tsɔ ko yɛ yookpeemɔ nifeemɔi ahe. Shi kɛlɛ, ewieɔ nibii komɛi ni agu efeemɔ yɛ gbalashihilɛi ahe. Ákɛ nɔkwɛmɔnɔ lɛ, yɛ 3 Mose 18:6-20 lɛ, wɔnaa saji ni ato naa ni tsɔɔ bɔlɛnamɔi ni agu yɛ mɔ kɛ ‘wekunyo ni bɛŋkɛ kpaakpa’ lɛ teŋ. Nakai ŋmalɛ lɛ tsĩ nibii babaoo tã ni etsɔɔ wekumɛi lɛ ateŋ mɛi ni esaaa akɛ amɛkɛ amɛhe náa bɔlɛ. Eji anɔkwale akɛ, Kristofoi bɛ Mose Mla lɛ shishi loo emli mlai lɛ fimɔɔɔ amɛ. (Efesobii 2:15; Kolosebii 2:14) Ni kɛlɛ, enɛ etsɔɔɔ akɛ Kristofoi baanyɛ aku amɛhiɛ amɛshwie sane nɛɛ nɔ kɛji amɛmiihala mɔ ni amɛkɛbaabote gbalashihilɛ mli. Yiŋtoi babaoo yɛ ni tsɔɔ nɔ hewɔ ni enɛ ji nakai.

Klɛŋklɛŋ lɛ, je lɛŋ mlai yɛ ni kudɔɔ wekumɛi ni bɛŋkɛ kpaakpa lɛ ateŋ gbalashihilɛ, ni sɔ̃ kã Kristofoi anɔ akɛ amɛfee toiboo amɛha mlai ni awo yɛ maji anɔ ni amɛyɔɔ lɛ. (Mateo 22:21; Romabii 13:1) Eji anɔkwale akɛ, nakai mlai nɛɛ tsakeɔ yɛ he fɛɛ he. Ŋmɛnɛŋmɛnɛ beaŋ mlai babaoo ni tamɔ enɛ lɛ kɔɔ fɔmɔ su he titri. Eji anɔkwale ni ale jogbaŋŋ akɛ, gbalashihilɛ mli ni akɛ wekunyo ni bɛŋkɛ kpaakpa lɛ boteɔ lɛ baanyɛ ekɛ bii ni abaafɔ lɛ awo fɔmɔ mli helai babaoo mli. Yɛ enɛ kɛ ‘he shi ni abaa ahaa hegbɛi ni yeɔ nɔ lɛ’ hewɔ lɛ, Kristofoi ni taoɔ ni amɛbote gbalashihilɛ mli lɛ yeɔ maŋ ni amɛyɔɔ nɔ lɛ he gbalashihilɛ he mlai anɔ.

No sɛɛ lɛ, ayɛ nibii ni akpɛlɛɔ nɔ kɛ nɔ ni akpɛlɛɛɛ nɔ yɛ akutso mli he ni mɔ ko yɔɔ lɛ. Maŋ fɛɛ maŋ yɛ mlai kɛ kusumii ni guɔ mɛi ni bɛŋkɛ amɛhe kpaakpa yɛ weku mli lɛ ateŋ gbalashihilɛ, ni bei pii lɛ abuɔ gbalashihilɛi ni tamɔ nɛkɛ akɛ bɔlɛnamɔ ni yaa nɔ yɛ wekumɛi ni bɛŋkɛ kpaakpa ateŋ, ni no hewɔ lɛ, eji musũ. Eyɛ mli akɛ wekukpai amli gbalashihilɛi pɔtɛɛ ni aguɔ lɛ baanyɛ afee srɔto waa yɛ maji srɔtoi anɔ moŋ, shi The Encyclopædia Britannica lɛ kɛɛ akɛ, “kɛ wɔɔwie he tamɔ bɔ ni ale lɛ, babaoo ni fɔmɔ su mli tsakpaa ni yɔɔ mɛi enyɔ lɛ ateŋ lɛ yɔɔ kpaakpa lɛ, babaoo ni henumɔ ni mli waa lɛ ji musũ ni tsiɔ bɔlɛnamɔ ni aaahi amɛteŋ lɛ naa.” No hewɔ lɛ, yɛ he ni akɛ wekunyo ko ni bɛŋkɛ kpaakpa po naaa bɔlɛ lɛ gbɛfaŋ lɛ, Kristofoi sumɔɔɔ ni amɛkuɔ amɛhiɛ amɛshwieɔ kusumii ni ato shishi lɛ loo akutsoŋbii lɛ ahenumɔ nii anɔ kwraa bɔni afee ni ekɛ heguɔgbee akaba Kristofoi asafo lɛ loo Nyɔŋmɔ gbɛi lɛ nɔ.—2 Korintobii 6:3.

Esaaa akɛ wɔkuɔ wɔhiɛ wɔshwieɔ henilee ni Nyɔŋmɔ kɛha wɔ lɛ hu nɔ. Abɔ gbɔmɛi fɛɛ kɛ henilee ni tsɔɔ nɔ ni ja kɛ nɔ ni ejaaa, ekpakpa kɛ efɔŋ. (Romabii 2:15) Amɛhenilee lɛ kɛɔ amɛ nɔ ni afɔɔ feemɔ kɛ nɔ ni hi, kɛ nɔ ni jeee adebɔɔ su naa nɔ kɛ nɔ ni teɔ shi ewoɔ mla, ja akɛ nibii ni fiteɔ nii efite lɛ loo ewaje lɛ kɛtsɔ nibii ni ehiii ni afeɔ lɛ shii abɔ lɛ nɔ. Yehowa wie anɔkwale nɛɛ he beni ekɛ emla lɛ ha Israelbii lɛ kɛte shi ewo gbalashihilɛ mlibotemɔ ni aaakã wekumɛi ni bɛŋkɛ kpaakpa ateŋ lɛ. Wɔkaneɔ akɛ: “Mizraim shikpɔŋ lɛ nɔ, he ni nyɛhi lɛ, jeŋba lɛ nyɛkabaa, ni asaŋ Kanaan shikpɔŋ lɛ nɔ, he ni mikɛ nyɛ yaa nɛɛ, jeŋba lɛ hu nyɛkabaa, ni amɛkpɔi lɛ hu nyɛkayea nɔ.” (3 Mose 18:3) Kristofoi buɔ amɛhenilee ni Biblia etsɔse lɛ lɛ akɛ ejara wa waa ni amɛŋmɛɛɛ gbɛ ni jeŋmaji lɛ ahenumɔ ni tsɔɔ nɔ ni ja kɛ nɔ ni ejaaa lɛ afite lɛ.—Efesobii 4:17-19.

Belɛ, te wɔɔmu sane naa wɔha tɛŋŋ? Yɛ be mli ni Kristofoi bɛ Mose Mla lɛ shishi lɛ, amɛhenilee kɛɔ amɛ yɛ faŋŋ mli akɛ akpɛlɛɛɛ gbalashihilɛ ni kã wekumɛi ni bɛŋkɛ kpaakpa—tamɔ tsɛ kɛ biyoo, nyɛ kɛ binuu, nyɛmi nuu kɛ nyɛmi yoo—teŋ lɛ nɔ kwraa yɛ Kristofoi ateŋ. * Yɛ be mli ni nɔ ni tsɔɔ weku ni bɛŋkɛ kpaakpa lɛ mli lɛɛɔ lɛ, Kristofoi yɔseɔ akɛ mlai kɛ akpɔi yɛ ni kudɔɔ gbalashihilɛ ni yɔɔ mla naa, ni akɛ, shishitoo mlai yɛ ni maŋbii kɛ kusumii kpɛlɛɔ nɔ. Esa akɛ asusu enɛɛmɛi ahe jogbaŋŋ bɔni afee ni wɔnyɛ wɔkɛ Ŋmalɛ mli famɔ nɛɛ atsu nii akɛ: “Awo gbala hiɛ nyam yɛ nyɛ fɛɛ nyɛteŋ.”—Hebribii 13:4.

[Shishigbɛ niŋmaa]