Wala Shihilɛ He Sane

Yehowa Tsɔɔ Wɔ Tsuishiŋmɛɛ kɛ Hiɛmiamɔ

TAAKƐ ARISTOTELIS APOSTOLIDIS GBA

Yɛ gɔji bibii ni kãmɔ Caucasus Gɔji lɛ jɔɔ mli yɛ kooyigbɛ lɛ, jɛmɛ Pyatigorsk, ni ji Russia maŋtiase ni ehe gbɛi waa yɛ tɛ bui ni nu jɛɔ mli ni kɔɔyɔŋ tsakemɔ ni naa waaa lɛ yɔɔ lɛ kã. Biɛ ji he ni Greece abobalɔi fɔ́ mi yɛ, yɛ afi 1929 lɛ mli. Afii nyɔŋma sɛɛ, yɛ Stalin nifeemɔ ni yɔɔ gbeyei ni etsɔ weku shishibulemɔ nɔ ekɛba lɛ mli lɛ, wɔbatsɔmɔ abobalɔi ekoŋŋ yɛ be mli ni anyɛ wɔnɔ koni wɔshi kɛya Greece lɛ.

BENI wɔshi kɛtee Piraiévs, Greece lɛ, wɔbaná shishinumɔ hee ko kwraa kɛha wiemɔ “abobalɔi” lɛ. Wɔnu he tamɔ gbɔi diɛŋtsɛ. Eyɛ mli akɛ mi kɛ minyɛmi nuu lɛ hiɛ Greece jeŋnilelɔi enyɔ ni ehe gbɛi waa, Socrates kɛ Aristotle lɛ agbɛi moŋ, shi akɛ nakai gbɛi lɛ efɔɔɔ wɔ tsɛmɔ. Mɔ fɛɛ mɔ tsɛɔ wɔ Russiabii bibii.

Beni Jeŋ Ta II lɛ fɛ sɛɛ lɛ, etsɛɛɛ ni minyɛ ni misumɔɔ lɛ lɛ gbo. Lɛ ji mɔ titri ni wɔshia lɛ kwɛmɔ kã enɔ, ni egbele lɛ fite nii waa. Akɛni hela mɔ lɛ be fioo ko hewɔ lɛ, etsɔɔ mi shia nifeemɔi babaoo. Miná tsɔsemɔ nɛɛ he sɛɛ waa yɛ mishihilɛ mli sɛɛ mli.

Ta kɛ Heyeli

Ta lɛ, Nazi nɔyeli lɛ, kɛ okplɛmii babaoo ni asraafoi Akui ni Efee Ekome lɛ tswaa lɛ ha gbi fɛɛ gbi bafee tamɔ naagbee nɔ. Ohia yɛŋ futaa, hɔmɔ ni naa wa, kɛ gbelei he shi waa. Beni miye kɛjɛ afii 11 kɛyaa lɛ, ehe bahia ni mafata mitsɛ he kɛtsu nii dɛŋdɛŋ bɔni afee ni enyɛ ekwɛ wɔyi etɛ lɛ. Greece wiemɔ ni minuuu lɛ jogbaŋŋ, kɛ agbɛnɛ hu ta lɛ  kɛ esɛɛ saji lɛ hewɔ lɛ, miwolo kasemɔ nyɛɛɛ aya hiɛ.

Germanybii anɔyeli yɛ Greece nɔ lɛ ba naagbee yɛ October 1944 lɛ mli. No sɛɛ lɛ, etsɛɛɛ ni mikɛ Yehowa Odasefoi lɛ kpe. Yɛ nɛkɛ haomɔ kɛ awerɛho bei nɛɛ amli lɛ, Biblia mli wɔsɛɛ be kpakpa yɛ Nyɔŋmɔ Maŋtsɛyeli lɛ shishi lɛ he hiɛnɔkamɔ lɛ sa mitsui he. (Lala 37:29) Nyɔŋmɔ shiwoo akɛ ekɛ shihilɛ ni bɛ naagbee yɛ toiŋjɔlɛ shihilɛ mli yɛ biɛ yɛ shikpɔŋ nɔ baaba lɛ, bafee tsofa diɛŋtsɛ kɛha mipilamɔi lɛ. (Yesaia 9:6) Yɛ afi 1946 lɛ mli lɛ, abaptisi mi kɛ mitsɛ, ni wɔkɛfee wɔhenɔjɔɔmɔ kɛha Yehowa lɛ he okadi.

Enɔ afi lɛ, miná miishɛɛ waa akɛ minine shɛ mi-klɛŋklɛŋ nitsumɔ nɔ ákɛ sɔɔlɔ ni kwɛɔ adafitswaa nɔ (sɛɛ mli lɛ atsɛ lɛ akɛ woji tɛtrɛbii anɔkwɛlɔ) yɛ asafo ni ji enyɔ ni ato shishi yɛ Piraiévs lɛ mli. Wɔshikpɔŋkuku lɛ mli kpã kɛjɛ Piraiévs kɛyashi Eleusis tɔŋŋ, nɔ ni ejɛkɛmɔ shɛɔ aaafee kilomitai 50 lɛ. Yɛ nakai be lɛ mli lɛ, Kristofoi ni akɛ mumɔ efɔ amɛ mu babaoo miisɔmɔ yɛ asafo lɛ mli. Miná hegbɛ akɛ mikɛ amɛ baatsu nii ni makase nii kɛjɛ amɛŋɔɔ. Miná mikɛ amɛ bɔɔ lɛ he miishɛɛ waa ejaakɛ amɛyɛ niiashikpamɔi babaoo ni amɛbaagba yɛ mɔdɛŋ ni ebiɔ ni abɔ jogbaŋŋ koni akɛtsu shiɛmɔ nitsumɔ lɛ he nii lɛ hewɔ. Mina kɛjɛ amɛshihilɛ gbɛ lɛ mli faŋŋ akɛ, ní aaasɔmɔ Yehowa yɛ anɔkwale mli lɛ biɔ tsuishitoo kɛ hiɛmiamɔ diɛŋtsɛ. (Bɔfoi lɛ Asaji 14:22) Kwɛ bɔ ni mináa miishɛɛ akɛ ŋmɛnɛ, ayɛ Yehowa Odasefoi asafoi ni fa fe 50 yɛ biɛ nɛɛ!

Kaa ko ni Ba Trukaa

Be ko sɛɛ lɛ, mibaná mile Eleni, ni ji Kristofonyo oblayoo fɛfɛo ko ni yɔɔ ekãa ni yɔɔ Patras maŋtiase lɛ mli lɛ. Wɔwo wɔhe shi yɛ afi 1952 naagbee gbɛ. Shi kɛlɛ, nyɔji fioo komɛi asɛɛ lɛ, Eleni he baye waa diɛŋtsɛ. Datrɛfoi lɛ na akɛ eeye ansɔ fuumɔ hela, ni eshihilɛ lɛ mli wa. Ehe bahia ni afee lɛ opireshɛn amrɔ nɔŋŋ. Beni wɔbɔ mɔdɛŋ aahu lɛ, wɔnyɛ wɔná datrɛfonyo ko yɛ Athens—ní yɛ tsofai ni bɛ yɛ nakai beaŋ lɛ fɛɛ sɛɛ lɛ—ená he miishɛɛ akɛ ebaakpɛlɛ wɔjamɔ mli hemɔkɛyelii lɛ anɔ ní efee opireshɛn lɛ ni ekɛ lá tsuŋ nii. (3 Mose 17:10-14; Bɔfoi lɛ Asaji 15:28, 29) Yɛ opireshɛn lɛ feemɔ sɛɛ lɛ, datrɛfoi lɛ ná jwɛŋmɔ kpakpa yɛ miwɔsɛɛ be mli gbalashihilɛ mli hefatalɔ lɛ gbɛkpamɔi ahe, shi amɛkuuu amɛhiɛ amɛshwieee nyɛ ni eeenyɛ efee akɛ ehela lɛ mli baanyɛ awo wu lɛ nɔ.

Mɛni esa akɛ mafee yɛ shihilɛ nɛɛ mli? Yɛ bɔ ni shihilɛ lɛ etsake ehã lɛ naa lɛ, ani esa akɛ mafo shi ní miwo lɛ lɛ mli ni maye mihe? Dabi! Yɛ suɔmɔ ni mibi lɛ lɛ mli lɛ, miwo shi ko, ni miisumɔ ni mi hɛɛ afee hɛɛ. (Mateo 5:37) Miŋmɛɛɛ gbɛ kɔkɔɔkɔ ni mijwɛŋmɔ asusu nɔ kroko he. Yɛ Eleni nyɛmi yoo nukpa kwɛmɔ naa lɛ, ená hewalɛ fioo, ni wɔbote gbalashihilɛ mli yɛ December 1954.

Afii etɛ sɛɛ lɛ, Eleni hela lɛ mli wo wu, ni ehe bahia ni nakai datrɛfonyo lɛ nɔŋŋ afee opireshɛn kroko. Nɛkɛ be nɛɛ mli lɛ, ebote jwɛŋmɔ lɛ mli vii bɔni afee ni enyɛ ejie loo ni efuu lɛ kɛjɛ jɛmɛ kwraa. Nɔ ni jɛ mli ba ji akɛ, hela lɛ ha miŋa kumɔ fioo, ni esa jwɛŋmɔ lɛ fã ni kudɔɔ wiemɔ lɛ he waa. Enɛ kɛ kaa  hee ko ni mli wa ba wɔyi enyɔ lɛ fɛɛ nɔ. Nitsumɔ ni waaa po bafee gbɛtsii nii wulu kɛha miŋa ni misumɔɔ lɛ lɛ. Egbɔmɔtsoŋ hewalɛnamɔ ni baa shi lɛ he bahia ni wɔfee tsakemɔi wuji yɛ wɔdaa gbi nifeemɔi amli. Nɔ ni fe fɛɛ lɛ, ebi tsuishiŋmɛɛ kɛ hiɛmiamɔ babaoo diɛŋtsɛ.

Nɛkɛ be nɛɛ mli tsɔsemɔ ní minine shɛ nɔ kɛjɛ minyɛ ŋɔɔ lɛ he ba sɛɛnamɔ waa yɛ. Daa leebi mra lɛ, mitoɔ nihoomɔ nibii fɛɛ he gbɛjianɔ, ni Eleni hoɔ. Bei pii lɛ, wɔfɔ̃ɔ gbɔi, ní be-fɛɛ sɔɔlɔi, mɛi ni wɔkɛ amɛ kaseɔ Biblia lɛ, kɛ nanemɛi Kristofoi ni ehia amɛ ni jɛ asafo lɛ mli lɛ fata he lɛ nine. Amɛ fɛɛ amɛkpɛlɛ nɔ akɛ nɛkɛ niyenii nɛɛ ŋɔɔ waa diɛŋtsɛ! Mi kɛ Eleni fee ekome hu yɛ shia nitsumɔi krokomɛi amli, bɔni afee ni wɔshia lɛ mli atse fɛfɛo. Nɛkɛ shihilɛ ni biɔ mɔdɛŋbɔɔ babaoo nɛɛ tee nɔ ekoŋŋ nɔ ni fe afii 30.

Ekãa yɛ Gbɔjɔmɔ Fɛɛ Sɛɛ

Eji nɔ ni tsirɛ mi kɛ mɛi krokomɛi akɛ wɔɔna akɛ nɔ ko nyɛɛɛ aba suɔmɔ ni miŋa yɔɔ kɛha Yehowa lɛ kɛ ekãa ni eyɔɔ kɛha esɔɔmɔ lɛ shi. Yɛ be ko sɛɛ lɛ, Eleni bɔ mɔdɛŋ aahu ni emia ehiɛ koni eshara wiemɔi lɛ ekomekomei. Esumɔɔ ni ebɛŋkɛ gbɔmɛi lɛ yɛ gbɛjegbɛi lɛ anɔ koni ejɛ Biblia lɛ mli ni ekɛ sanekpakpa lɛ aha amɛ. Kɛ́ nitsumɔ baaha mafã gbɛ lɛ, mikɛ lɛ yaa ni mikɛ tsɔne lɛ yamaa gbɛ ko ni mɛi fɔɔ nɔ tsɔmɔ toi. Egbeleɔ kar lɛ samfɛlɛ lɛ ni efɔ̃ɔ mɛi ni hoɔ lɛ nine koni amɛbakɔlɔ Buu-Mɔɔ kɛ Awake! lɛ eko. Be ko lɛ, ekɛ ekomekomei 80 hã yɛ ŋmɛlɛtswai enyɔ mli. Bei pii lɛ, ekɛ woji tɛtrɛbii memeji fɛɛ ni yɔɔ asafo lɛ mli lɛ haa. Eleni kɛ ehe woɔ shiɛmɔ nitsumɔ fãi krokomɛi lɛ hu mli be fɛɛ be.

Nɛkɛ afii nɛɛ fɛɛ ni miŋa he yeɔ waa lɛ, ekɛ mi yaa kpeei be fɛɛ be. Efooo kpee wulu loo kpee bibioo ko mli gbi ko gbi ko, yɛ be mli po ni ehe bahia ni wɔfã gbɛ kɛya maŋsɛɛ yɛ Yehowa Odasefoi ni awaa amɛyi yɛ Greece lɛ hewɔ. Yɛ ehelai lɛ fɛɛ sɛɛ lɛ, ekɛ miishɛɛ tee kpeei yɛ Austria, Germany, Cyprus, kɛ maji krokomɛi anɔ. Eleni ewieee nii ahe loo ni eeekpa gbɛ akɛ aaagbala jwɛŋmɔ waa kɛba enɔ, yɛ be mli po ni migbɛnaa nii ni yɔɔ Yehowa sɔɔmɔ lɛ mli lɛ ha bei komɛi lɛ ebafee nɔ ni ehiii kɛhaaa lɛ lɛ.

Yɛ migbɛfaŋ lɛ, nɛkɛ shihilɛ nɛɛ bafee tsɔsemɔ be kakadaŋŋ yɛ tsuishiŋmɛɛ kɛ hiɛmiamɔ mli. Minine shɛ Yehowa yelikɛbuamɔ nɔ shii abɔ. Nyɛmimɛi hii kɛ yei kɛ amɛhe shã afɔle diɛŋtsɛ bɔni afee ni amɛye amɛbua wɔ yɛ gbɛ ni amɛbaanyɛ nɔ, ni datrɛfoi lɛ jɛ mlihilɛ mli amɛye amɛbua wɔ. Yɛ nɛkɛ afii ni mli wawai nɛɛ fɛɛ mli lɛ, shihilɛ mli nɔ ko nɔ ko he ehiaaa wɔ, eyɛ mli akɛ wɔshihilɛ ni heɔ bei lɛ ha ehe bahia ni mikɛ be-fã atsu nii. Yehowa suɔmɔnaa nii kɛ sɔɔmɔ lɛ yeɔ klɛŋklɛŋ gbɛhe be fɛɛ be.—Mateo 6:33.

Mɛi babaoo ebi nɔ ni waje wɔ yɛ nɛkɛ kaa bei nɛɛ amli. Amrɔ nɛɛ kɛ́ mifo mihiɛ mikwɛ misɛɛ lɛ, miyɔseɔ akɛ teemɔŋ Biblia kasemɔ, sɔlemɔ ni jɛ tsuiŋ kɛha Nyɔŋmɔ, Kristofoi  akpeei ni wɔyaa daa, kɛ wɔhe ni wɔkɛwoɔ shiɛmɔ nitsumɔ lɛ mli kɛ ekãa lɛ waje wɔtsuishiŋmɛɛ kɛ hiɛmiamɔ lɛ. Akɛ ekãawoo wiemɔi ni yɔɔ Lala 37:3-5 lɛ kaiɔ wɔ be fɛɛ be: “Ŋɔɔ ohiɛ ofɔ̃ Yehowa nɔ, ni ofee ekpakpa; . . . Omii ashɛ Yehowa he . . . Gbɛ ní onyiɛ nɔ lɛ, ŋɔɔfɔ̃ Yehowa nɔ, ní oŋɔ ohiɛ ofɔ̃ enɔ, ni eeefee.” Ŋmalɛ kroko ni he ba sɛɛnamɔ diɛŋtsɛ kɛha wɔ ji Lala 55:23: “Shɛ ojatsu lɛ ofɔ̃ Yehowa nɔ, ni lɛ eeehiɛ omli.” Taakɛ gbekɛ ko kɛ ehe fɔ̃ɔ etsɛ nɔ kwraa lɛ, jeee wɔjatsu pɛ esa akɛ wɔshɛ wɔfɔ̃ Yehowa nɔ, shi moŋ esa akɛ wɔshi wɔha lɛ hu.—Yakobo 1:6.

Yɛ April 12, 1987 mli, beni miŋa shiɛɔ yɛ wɔshia lɛ hiɛ lɛ, dade shinaa ko ní tsii ŋa trukaa kɛjɛ esɛɛgbɛ, ni etsi lɛ kɛyagbee nane nyiɛmɔ gbɛ lɛ nɔ, ni eye lɛ awui waa diɛŋtsɛ. Nɔ ni jɛ mli ba ji akɛ, nɔ̃ nyɔ enɔ afii etɛ. Egbo yɛ afi 1990 lɛ shishijee gbɛ.

Yehowa ní Mikɛ Minyɛmɔi Fɛɛ Sɔmɔɔ Lɛ

Yɛ afi 1960 mli lɛ, ahala mi koni miyasɔmɔ akɛ asafoŋ nɔkwɛlɔ yɛ Nikaia, Piraiévs. Kɛjɛ no beaŋ kɛbaa nɛɛ, miná hegbɛ akɛ misɔmɔ yɛ asafoi krokomɛi babaoo mli yɛ Piraiévs. Eyɛ mli akɛ mibɛ bi mi diɛŋtsɛ moŋ, shi miná miishɛɛ akɛ miye mibua mumɔŋ bii babaoo ni amɛhe ebawa yɛ anɔkwale lɛ mli. Amrɔ nɛɛ, amɛteŋ mɛi komɛi miisɔmɔ akɛ asafoŋ onukpai, asafoŋ sɔɔlɔi, sɔɔlɔi gbɛgbalɔi, kɛ Betel weku lɛ mli bii.

Beni ato demokrase shishi ekoŋŋ yɛ Greece yɛ afi 1975 mli lɛ, Yehowa Odasefoi nyɛ amɛfee amɛkpeei yɛ heyeli mli, ni ehe ehiaaa ni amɛtee amɛhe yɛ koo mli dɔŋŋ. Niiashikpamɔ ni wɔteŋ mɛi komɛi ná beni wɔtoɔ kpeei wuji ahe gbɛjianɔ yɛ maji asɛɛ lɛ he ba sɛɛnamɔ waa bianɛ. No hewɔ lɛ, miná miishɛɛ kɛ hegbɛ akɛ masɔmɔ yɛ kpee ajinafoi akui srɔtoi amli afii babaoo.

Kɛkɛ ni yɛ afi 1979 mli lɛ, ato gbɛjianɔ koni ama klɛŋklɛŋ Kpee Asa yɛ Greece, yɛ Athens maŋ lɛ klotia. Akɛ nitsumɔ wo midɛŋ koni miye mibua ni akɛto tsumaa nitsumɔ kpele nɛɛ he gbɛjianɔ. Nɛkɛ nitsumɔ nɛɛ hu biɔ tsuishiŋmɛɛ kɛ hiɛmiamɔ diɛŋtsɛ. Nii ni mikɛ nyɛmimɛi hii kɛ yei ohai abɔ ni kɛ amɛhe eshã afɔle lɛ fee ekome kɛtsu lɛ ha suɔmɔ kɛ ekomefeemɔ ni mli wa waa bakã wɔteŋ. Nibii ni mikaiɔ yɛ nɛkɛ tsumaa nɛɛ mli lɛ yɛ mitsui mli ni mihiɛ kpaŋ nɔ.

Gboklɛfoi Amɛmumɔŋ Hiamɔ Nii Ahe Nitsumɔ

Afii fioo komɛi asɛɛ lɛ, hegbɛ hee ko naa gbele. Tsuŋwoohei ni da fe fɛɛ yɛ Greece lɛ ateŋ ekome bɛŋkɛ asafo ni miyɔɔ mli yɛ Korydallos lɛ shikpɔŋkuku lɛ. Kɛjɛ April 1991 kɛbaa lɛ, ahala mi koni miya tsuŋwoohe nɛɛ daa otsi ákɛ Yehowa Odasefonyo sɔɔlɔ. Aŋmɛ mi gbɛ koni mikɛ mɛi ni yɔɔ jɛmɛ ni yɔɔ wiemɔ lɛ he miishɛɛ lɛ afee Biblia mli nikasemɔ kɛ Kristofoi akpeei yɛ jɛmɛ. Amɛteŋ mɛi babaoo efee tsakemɔi wuji, ni etsɔɔ hewalɛ kpele ni Nyɔŋmɔ Wiemɔ lɛ yɔɔ lɛ. (Hebribii 4:12) Enɛ ená nitsulɔi ni yɔɔ tsuŋwoohe lɛ kɛ mɛi krokomɛi ni awo amɛ tsuŋ lɛ fɛɛ nɔ hewalɛ. Ájie gboklɛfoi lɛ ateŋ mɛi komɛi ni mikɛ amɛ kase Biblia lɛ, ni amrɔ nɛɛ amɛji sanekpakpa lɛ shiɛlɔi.

Mikɛ tsofai fɔji jarayelɔi etɛ ni ehe gbɛi fɔŋ lɛ bɔi nikasemɔ. Beni amɛná nɔyaa yɛ mumɔŋ lɛ, amɛba amɛ Biblia mli nikasemɔ lɛ shishi ni amɛshɛ amɛtsɛŋ, amɛshwa amɛyitsɔi fɛfɛo, ni amɛwo atade ni amɛfi tai yɛ August teŋgbɛ—nyɔji ni jeŋ dɔɔ waa diɛŋtsɛ yɛ Greece lɛ ateŋ ekome mli! Tsuŋwoohe lɛ nɔkwɛlɔ lɛ, kɛ gboklɛfoi anɔkwɛlɔ nukpa lɛ, kɛ jɛmɛ nitsulɔi lɛ ekomɛi kɛ oyaiyeli jɛ amɛ ɔfis srɔtoi lɛ amli koni amɛbakwɛ nɔ ni yaa nɔ lɛ. Amɛnyɛɛɛ amɛhe nɔ ni amɛnaa lɛ amɛye!

Niiashikpamɔ kroko ni kanyaa mɔ lɛ ba yɛ yei atsuŋwoohe lɛ. Akɛ yoo ko ni awo lɛ tsuŋ ewala gbii abɔ fɛɛ yɛ gbɔmɔgbee hewɔ lɛ bɔi Biblia lɛ kasemɔ. Eji mɔ ko ni ale lɛ waa ákɛ mɔ ni tseɔ atua. Shi kɛlɛ, etsɛɛɛ ni Biblia mli anɔkwale ni ekaseɔ lɛ ha efee tsakemɔi ni sa  kadimɔ waa, ni eha mɛi babaoo wie akɛ etamɔ jata ko ni miitsake kɛmiitsɔ gwantɛŋ bi! (Yesaia 11:6, 7) Etsɛɛɛ ni tsuŋwoohe lɛ nɔkwɛlɔ lɛ ná bulɛ kɛ hekɛnɔfɔɔ kɛha lɛ. Miná miishɛɛ akɛ mana lɛ ni eeya ehiɛ jogbaŋŋ yɛ mumɔŋ ni eshɛ he ni ebaajɔɔ ehe nɔ eha Yehowa.

Yelikɛbuamɔ Kɛha Mɛi ni Egbɔjɔ kɛ Mɛi ni Egbɔlɔ

Miŋa ni he ye waa be kpalaŋŋ lɛ eha minuɔ he mihaa helatsɛmɛi kɛ mɛi ni egbɔlɔ ni yɔɔ wɔteaŋ lɛ waa. Be fɛɛ be ni wɔwoji lɛ aaawie saji ni woɔ wɔ hewalɛ koni wɔjɛ suɔmɔ mli wɔye wɔbua aŋkroaŋkroi ni tamɔ nakai lɛ, enɛ teeɔ mimiishɛɛ shi. Mibuɔ nakai saji lɛ akɛ ejara wa waa ni mibuaa naa. Afii komɛi asɛɛ lɛ, no mli lɛ mibua woji ni hiɛ baafai fe oha naa—ni mije shishi kɛ sane ni ji “Mɛi ni Egbɔlɔ kɛ Nɔnalɔi ní Aaasusu Amɛhe” ni yɔɔ July 15, 1962 The Watchtower lɛ mli lɛ. Nɛkɛ saji nɛɛ ateŋ babaoo tsɔɔ mli akɛ ehi jogbaŋŋ akɛ asafo fɛɛ asafo ato gbɛjianɔ koni eye ebua helatsɛmɛi kɛ mɛi ni egbɔlɔ lɛ.—1 Yohane 3:17, 18.

Onukpai lɛ to nyɛmimɛi hii kɛ yei akuu ko ni kɛ amɛhe ha lɛ he gbɛjianɔ koni amɛkwɛ helatsɛmɛi kɛ mɛi ni egbɔlɔ ni yɔɔ wɔ asafo lɛ mli lɛ. Wɔto mɛi ni kɛ amɛhe eha lɛ he gbɛjianɔ wɔwo kui srɔtoi amli—tamɔ mɛi ni baanyɛ amɛye amɛbua yɛ gbi lɛ mli, mɛi krokomɛi ni baanyɛ aye abua jenamɔ fɛɛ, kɛ mɛi ni baanyɛ amɛkɛ tsɔne aye abua, kɛ mɛi ni baanyɛ aye abua yɛ gbi muu lɛ fɛɛ mli. Nɛkɛ naagbee bii nɛɛ bafee kuu bibioo ko ni tsuɔ nii oya nɔŋŋ kɛ́ amɛhe aaahia.

Nɔ ni ejɛ nakai mɔdɛŋbɔɔ lɛ mli kɛba lɛ woɔ mɔ hewalɛ waa. Ákɛ nɔkwɛmɔnɔ lɛ, ana nyɛmi yoo helatsɛ ko ní lɛ pɛ eyɔɔ lɛ akɛ nɔ̃ enyɔ enɔ kɛkã shi yɛ saramɔ gbii ni akɛyasaraa lɛ lɛ ateŋ ekome mli. Wɔwó nyɛmi yoo ko ni bɛŋkɛ jɛmɛ ni yɔɔ kar lɛ toi nɔ. Eŋɔ nyɛmi yoo helatsɛ lɛ kɛtee helatsamɔhe ni bɛŋkɛ fe fɛɛ lɛ yɛ be naa—yɛ minitii nyɔŋma pɛ mli! Datrɛfoi lɛ kɛɛ akɛ no ji nɔ ni báa eyi.

Hiɛsɔɔ ni mɛi ni egbɔjɔ kɛ mɛi ni egbɔlɔ lɛ ejie lɛ kpo amɛtsɔɔ kuu nɛɛ mli bii lɛ haa mɔ tsui nyɔɔ mɔ mli jogbaŋŋ. Hiɛnɔkamɔ ni yɔɔ akɛ akɛ nyɛmimɛi hii kɛ yei nɛɛ baahi shi yɛ Nyɔŋmɔ gbɛjianɔtoo hee lɛ mli yɛ shihilɛi srɔtoi ashishi lɛ kanyaa mɔ tsui. Ni le ni amɛle akɛ aye abua amɛ ni amɛŋmɛ amɛtsui shi yɛ yelikɛbuamɔ ni amɛnine shɛ nɔ beni amɛnaa nɔ lɛ hu ji nyɔmɔwoo kroko hu.

Hiɛmiamɔ kɛ Nyɔmɔwoi Eba

Amrɔ nɛɛ, miisɔmɔ ákɛ onukpa yɛ asafoi ni yɔɔ Piraiévs lɛ ateŋ ekome mli. Yɛ mifii ni etee hiɛ waa kɛ migbɔmɔtsoŋ hewalɛnamɔ mli naagbai lɛ fɛɛ sɛɛ lɛ, miyɛ miishɛɛ akɛ miinyɛ miiná asafo lɛ nitsumɔi lɛ amli gbɛfaŋnɔ kɛ ekãa lolo.

Yɛ afii lɛ amli lɛ, shihilɛi ni kaa mɔ, kaai ni mli wawai, kɛ nibii krokomɛi ni baa trukaa ni aleee lɛ ebi ni majie ekãa kɛ hiɛmiamɔ babaoo kpo. Ni kɛlɛ, Yehowa haa mi hewalɛ ni he hiaa koni mikɛye naagbai nɛɛ anɔ kunim be fɛɛ be. Yɛ bei babaoo mli lɛ, mina anɔkwale ni lalatsɛ lɛ wiemɔi nɛɛ ji, akɛ: “Kɛ́ mikɛɛ: Minane miishane! lɛ, Yehowa, omɔbɔnalɛ lɛ hiɛ mimli. Kɛ ŋkɔmɔyeli fa babaoo yɛ mimli lɛ, omiishɛjemɔi lɛ haa misusuma mii shɛɔ ehe.”—Lala 94:18, 19.

[Mfoniri ni yɔɔ baafa 25]

Mi kɛ miŋa, Eleni, beni afee lɛ opireshɛn ni ji enyɔ lɛ sɛɛ yɛ afi 1957 mli

[Mfoniri ni yɔɔ baafa 26]

Yɛ kpee wulu ko ni afee yɛ Nuremberg, Germany, yɛ afi 1969 mli

[Mfoniri ni yɔɔ baafa 28]

Nyɛmimɛi hii kɛ yei akuu ko ní ye amɛbua helatsɛmɛi kɛ mɛi ni egbɔlɔ lɛ