Bɔ ni Bi ko Ye Ebua Etsɛ

JAMES, ni jɛ England, ni eye kɛjɛ afii 30 kɛyaa lɛ yɛ jwɛŋmɔŋ naagba ni mli wa kɛ jwɛŋmɔŋ hela ko ni haaa enyɛ ewie tsɔ̃. Ni kɛlɛ, afii babaoo nɛ ni ekɛ enyɛ kɛ enyɛmi yoo onukpa yaa Yehowa Odasefoi akpeei. Shi kɛlɛ, etsɛ ejieko miishɛɛ kpo tsɔ̃ yɛ hemɔkɛyeli ni amɛyɔɔ lɛ he dã. Gbi ko gbɛkɛ beni akpa kpee ko ni afee nɔkwɛmɔnɔ ko yɛ mli ni tsɔɔ bɔ ni aaafee afɔ̃ mɔ ko ni ale lɛ lɛ nine kɛba Kristo gbele lɛ Kaimɔ lɛ shishi lɛ, James kɛ oyaiyeli tee esɛɛtsu lɛ mli. Tsuifaa naa lɛ, enyɛ nyiɛ esɛɛ ni eyanina lɛ akɛ ekɛ oyaiyeli miigbɛlɛ Buu-Mɔɔ kɛ Awake! woji tɛtrɛbii memeji lɛ amli. Ekɔ ekome ni atɛŋ ninefɔɔ wolo kɛha Kaimɔ lɛ yɛ sɛɛ lɛ ni esha foi kɛtee etsɛ ŋɔɔ. Ekɛ ewao tsɔɔ mfoniri lɛ klɛŋklɛŋ ni no sɛɛ lɛ ekɛ ewao lɛ tsɔɔ etsɛ ni ekɛɛ, “Bo!” Enyɛ kɛ etsɛ kwɛkwɛɛ amɛhiɛaŋ kɛkpe beni amɛyɔse akɛ James miifɔ̃ etsɛ nine kɛmiiya Kaimɔ lɛ. Etsɛ kɛɛ akɛ ekolɛ ebaaya.

Gbi gbɛkɛ ni abaaye Kaimɔ lɛ, James bote he ni etsɛ kɛ etadei tsotsoroɔ lɛ, ni ekɔ trɔɔs kɛyaha etsɛ, ni ekɛ enine fee okadi etsɔɔ etsɛ akɛ ewo. Etsɛ ha hetoo akɛ eyaŋ kpee lɛ. No hewɔ lɛ, James kɛ enyɛ kome too pɛ yi gbɛ kɛtee Maŋtsɛyeli Asa lɛ nɔ.

Shi kɛlɛ, be ko sɛɛ lɛ, James batsɔ mɔ ni fɔɔ atuatsemɔ, ni enɛ mli woɔ wu be fɛɛ be ni enyɛ bɔɔ mɔdɛŋ ni esaa ehe ni amɛya asafoŋ kpeei lɛ, ni esumɔɔ ni ekɛ etsɛ ahi shia moŋ. Kɛkɛ ni gbi ko Hɔgbaa leebi lɛ, James saa etse atua be mli ni enyɛ bɔɔ mɔdɛŋ ni esaa ehe koni aya kpee lɛ. Nɔ ni ha enyɛ naa kpɛ ehe waa ji akɛ, James tsɛ tsɔ ehe eha James ni ekɛɛ, “James, kɛ mitee kpee lɛ ŋmɛnɛ lɛ, bo hu obaaya?” James hiɛ bafee ŋmɔlɔŋmɔlɔ. Efua etsɛ lɛ ni ekɛɛ “Hɛɛ!” ni amɛyi etɛ lɛ fɛɛ amɛyi gbɛ kɛtee Maŋtsɛyeli Asa lɛ nɔ.

Kɛjɛ nakai gbi lɛ nɔ lɛ, James tsɛ tee nɔ etee kpeei fɛɛ ni afeɔ daa Hɔgbaa lɛ, ni yɛ be fioo sɛɛ lɛ ekɛɛ akɛ kɛ́ eeenyɛ eya ehiɛ lɛ, esa akɛ eya kpeei krokomɛi lɛ hu. (Hebribii 10:24, 25) Efee enɛ, ni yɛ nyɔji enyɔ sɛɛ lɛ ebɔi Biblia lɛ kasemɔ nɔtonɔto. Etee ehiɛ oyayaayai ni efee tsakemɔi ni he hiaa yɛ eshihilɛ mli, ni etsɛɛɛ ni ekɛ ehe wo Maŋtsɛyeli shiɛmɔ nitsumɔ lɛ mli. Beni ekɛ afi kome ekase Biblia lɛ, ejɔɔ ewala nɔ eha Yehowa ni ekɛ nu mli baptisimɔ fee he okadi. Amrɔ nɛɛ eesɔmɔ akɛ asafoŋ sɔɔlɔ yɛ asafo mli ni eyɔɔ lɛ mli. Mɛi fɛɛ ni yɔɔ weku lɛ mli lɛ kɛ ekomefeemɔ miisɔmɔ Yehowa bianɛ.