Sanebimɔi ni Jɛ Kanelɔi Adɛŋ

Yɛ mɛɛ shihilɛi amli esa akɛ Kristofonyo yoo ahà eyi nɔ yɛ jamɔŋ yiŋtoi ahewɔ?

Bɔfo Paulo ŋma akɛ: “Yoo fɛɛ yoo ni sɔleɔ aloo gbaa ni eyitso kã efolo lɛ, lɛ hu eegbe eyitso lɛ he guɔ.” Mɛni hewɔ? Yɛ Biblia mli shishitoo mla ni kɔɔ yitsoyeli lɛ he hewɔ akɛ: “Yoo fɛɛ yoo . . . yitso ji nuu.” Bei pii lɛ, sɔlemɔ ni asɔleɔ yɛ Kristofoi asafo lɛ mli loo shiɛmɔ ni ashiɛɔ yɛ mli lɛ ji nuu gbɛnaa nii. No hewɔ lɛ, kɛ́ Kristofonyo yoo ko miitsu jamɔŋ saji ahe nii, ní bei pii lɛ kulɛ ewu loo nuu ni abaptisi lɛ ji mɔ ni esa akɛ etsu he nii lɛ, no lɛ esa akɛ ehà eyi nɔ.—1 Korintobii 11:3-10.

Shihilɛi amli ni esa akɛ Kristofonyo yoo ahà eyi nɔ lɛ baanyɛ aba yɛ egbalashihilɛ mli wekukpaa lɛ mli. Ákɛ nɔkwɛmɔnɔ lɛ, kɛ́ weku lɛ bua amɛhe naa kɛha Biblia mli nikasemɔ loo kɛha niyeli lɛ, bei pii lɛ, wu lɛ tsɔɔ amɛ nii ni edamɔɔ amɛnajiaŋ yɛ sɔlemɔ mli ehãa Nyɔŋmɔ. Shi kɛlɛ, kɛ́ eji mɔ ni heee yeee lɛ, ekolɛ gbɛnaa nii nɛɛ baakã eŋa lɛ nɔ. No hewɔ lɛ, kɛ́ yoo lɛ miisɔle waa yɛ lɛ kɛ mɛi krokomɛi anajiaŋ aloo be mli ni ekwɛɔ Biblia mli nikasemɔ ni lɛ kɛ ebii lɛ feɔ lɛ nɔ ní ewu lɛ fata he lɛ, eja gbɛ akɛ nyɛmi yoo Kristofonyo lɛ ahà eyi nɔ. Kɛ ewu lɛ fataaa he lɛ, ehe ehiaaa ni ŋa lɛ ahà eyi nɔ, akɛni Nyɔŋmɔ efã lɛ koni etsɔ̃ɔ bii lɛ anii lɛ hewɔ.—Abɛi 1:8; 6:20.

Ni kɛlɛ, kɛ́ binuu fioo ko ni yɔɔ weku lɛ mli lɛ ji Yehowa Nyɔŋmɔ sɔɔlɔ ni ejɔɔ ehe nɔ, ni abaptisi lɛ hu? Akɛni binuu lɛ ji Kristofoi asafo lɛ mli bii lɛ  ateŋ mɔ kome hewɔ lɛ, esa akɛ enine ashɛ tsɔsemɔ nɔ kɛjɛ hii ni yɔɔ mli lɛ adɛŋ. (1 Timoteo 2:12) Kɛji akɛ etsɛ ji heyelilɔ lɛ, esa akɛ etsɔɔ binuu lɛ nii. Shi kɛlɛ, kɛ́ tsɛ lɛ bɛ lɛ, no lɛ esa akɛ nyɛ lɛ ahà eyi nɔ kɛ́ eekwɛ Biblia mli nikasemɔ ni ekɛ binuu fioo ni abaptisi lɛ lɛ kɛ bii krokomɛi lɛ feɔ lɛ nɔ. Kɛ eeebi binuu ni abaptisi lɛ lɛ koni esɔle yɛ nikasemɔ ni tamɔ nɛkɛ shishi loo yɛ niyeli be mli lɛ, yoo lɛ ji mɔ ni baakpɛ eyiŋ yɛ he. Ekolɛ nyɛ lɛ baanu he akɛ ebinuu lɛ nako hesaa bɔ ni sa, ni ekolɛ nyɛ lɛ baasumɔ ni lɛ diɛŋtsɛ esɔle. Kɛ nyɛ lɛ kpɛ eyiŋ akɛ ebaasɔle yɛ be ni tamɔ nɛkɛ mli lɛ, esa akɛ ehà eyi nɔ.

Yɛ be mli ni Kristofoi yei kɛ amɛhe woɔ asafoŋ nifeemɔi komɛi amli lɛ, ekolɛ ehe baahia ni amɛhà amɛyi nɔ. Ákɛ nɔkwɛmɔnɔ lɛ, yɛ kpee kɛha otsi teŋ shiɛmɔyaa shishi lɛ, ekolɛ nyɛmimɛi yei Kristofoi pɛ baaba shishi, ni hii ni abaptisi amɛ bɛ jɛmɛ. Ekolɛ bei krokomɛi baaba ni anaŋ nuu ko nuu ko ni abaptisi lɛ yɛ asafoŋ kpee ko shishi. Kɛ esa akɛ nyɛmi yoo ko atsu nitsumɔi ni bei pii lɛ nyɛmi nuu ko tsuɔ he nii yɛ asafoŋ kpeei ni ato he gbɛjianɔ lɛ shishi, loo kpee kɛha shiɛmɔyaa lɛ, esa akɛ ehà eyi nɔ.

Ani esa akɛ Kristofoi yei ahà amɛyi nɔ beni amɛkɛ amɛnaabu tsɔɔ Biblia wiemɔi ashishi loo amɛtsɔɔ shishi kɛyaa mumuii awiemɔ mli, loo beni amɛkaneɔ Biblia kasemɔ wolo ni akɛmiitsu nii yɛ asafoŋ kpee shishi lɛ mli kukuji lɛ amli yɛ mɛi ahiɛ lɛ? Dabi. Nyɛmimɛi yei ni tsuɔ nitsumɔi nɛɛ ahe nii lɛ jeee mɛi ni miikwɛ nikasemɔ lɛ nɔ loo mɛi ni miitsɔɔ nii. Nakai nɔŋŋ ehe ehiaaa ni nyɛmimɛi yei ni miifee nɔkwɛmɔnii, amɛmiigba niiashikpamɔi, loo ni amɛmiitsu nikaselɔ wiemɔi ahe nii yɛ Teokrase Sɔɔmɔ Skul lɛ mli lɛ ahà amɛyi nɔ.

Yɛ be mli ni esa akɛ hii ni abaptisi amɛ lɛ atsɔɔ nii yɛ asafo lɛ mli lɛ, gbɛnaa nii kã hii kɛ yei fɛɛ nɔ koni amɛshiɛ ni amɛtsɔɔ nii yɛ asafo lɛ sɛɛ. (Mateo 24:14; 28:19, 20) No hewɔ lɛ kɛ́ Kristofonyo yoo ko miigba mɛi ni heee yeee lɛ Nyɔŋmɔ Wiemɔ lɛ he sane, ni Yehowa Odasefonyo nuu ko fata he lɛ, ehe ebahiaŋ akɛ ehà eyi nɔ.

Shi kɛlɛ, shihilɛ lɛ yɛ srɔto kɛ́ eekwɛ Biblia mli nikasemɔ ni ato he gbɛjianɔ ni efeɔ daa lɛ nɔ, ní nuu ni ejɔɔ ehe nɔ ni abaptisi lɛ fata ehe lɛ. Enɛ ji nitsɔɔmɔ henaabuamɔ ni atsɔ hiɛ ato he gbɛjianɔ, ní yɛ anɔkwale mli lɛ, mɔ ni kwɛɔ nikasemɔ lɛ nɔ lɛ nyiɛɔ hiɛ lɛ. Yɛ nɛkɛ shihilɛi nɛɛ ashishi lɛ, nikasemɔ ko bafeɔ asafo lɛ mli nikasemɔ lɛ fã ko. Kɛ Odasefonyo yoo ni abaptisi lɛ lɛ kwɛɔ nikasemɔ ni tamɔ nɛkɛ nɔ, ní Odasefonyo nuu ni abaptisi lɛ lɛ fata he lɛ, ebaafee nɔ ni ja akɛ ehà eyi nɔ. Shi kɛlɛ, esa akɛ nyɛmi nuu ni ejɔɔ ehe nɔ lɛ asɔle. Nyɛmi yoo ko sɔleŋ yɛ be mli ni nyɛmi nuu ni ejɔɔ ehe nɔ fata ehe, ja yɛ yiŋtoo ko ni anyɛɛɛ he nɔ ko afee hewɔ, ákɛ nɔkwɛmɔnɔ lɛ, kɛ́ nyɛmi nuu lɛ nyɛɛɛ awie.

Ekolɛ, bei komɛi lɛ, Maŋtsɛyeli shiɛlɔ ni eji nuu ni abaptisiko lɛ lɛ baafata nyɛmi yoo Kristofonyo ko he kɛha Biblia mli nikasemɔ feemɔ ko. Kɛ nyɛmi yoo lɛ miisumɔ lɛ, ebaanyɛ eha ekwɛ nikasemɔ lɛ nɔ. Shi akɛni enyɛŋ edamɔ nyɛmi yoo lɛ najiaŋ jogbaŋŋ eha Yehowa yɛ sɔlemɔ mli hewɔ lɛ, ebaafee nɔ ni ja akɛ nyɛmi yoo lɛ asɔle yɛ nikasemɔ lɛ shishi. Kɛ nyɛmi yoo lɛ baakwɛ nikasemɔ lɛ nɔ ní ebaasɔle lɛ, ehe baahia ni nyɛmi yoo lɛ ahà eyi nɔ. Eyɛ mli akɛ abaptisiko shiɛlɔ nuu lɛ moŋ, shi mɛi ni yɔɔ sɛɛ lɛ naa lɛ akɛ asafo lɛ mlinyo yɛ eshiɛmɔ nitsumɔ lɛ hewɔ.

Bɔfo Paulo ŋma akɛ: “Esa akɛ yoo aná hewalɛ he okadi ko yɛ eyiteŋ yɛ ŋwɛibɔfoi lɛ ahewɔ.” Hɛɛ, eji hegbɛ ni nyɛmimɛi yei Kristofoi ená akɛ amɛaafee nɔkwɛmɔnii kpakpai amɛha ŋwɛibɔfoi akpekpei abɔ ni kɛ anɔkwayeli yaa nɔ amɛbaa amɛhe shi amɛhãa Yehowa lɛ. Kwɛ bɔ ni esa jogbaŋŋ akɛ yei ni sheɔ Nyɔŋmɔ gbeyei lɛ aaasusu amɛyi ni amɛbaahà nɔ lɛ he jogbaŋŋ kɛ́ ehe bahia koni afee nakai!

[Mfonirii ni yɔɔ baafa 26]

Yi ni ahàa nɔ lɛ ji okadi ni tsɔɔ bulɛ ni ayɔɔ kɛha yitsoyeli