“Nyɛkɛfafaa Nyɛhe”

ANI oheɔ oyeɔ akɛ Nyɔŋmɔ kɛ ohe eshai lɛ efa bo? Yɛ United States lɛ, etamɔ nɔ ni mɛi ni edara lɛ ateŋ mɛi babaoo heɔ amɛyeɔ nakai. Datrɛfonyo Loren Toussaint, ni ji jwɛŋmɔ he nilelɔ kpanaa, ni ji klɛŋklɛŋ mɔ ni ŋma niiamlipɛimɔ ko ni afee yɛ University of Michigan Institute for Social Research lɛ bɔ amaniɛ akɛ, yɛ Amerikabii 1,423 ni abibii amɛ saji lɛ ateŋ lɛ, mɛi ni edara ni eye fe afii 45 lɛ ateŋ mɛi aaafee oha mlijaa 80 kɛɛ akɛ Nyɔŋmɔ kɛ amɛhe eshai lɛ efa amɛ.

Shi kɛlɛ, eyɛ miishɛɛ akɛ mɛi ni abibii amɛ saji lɛ ateŋ oha mlijaa 57 pɛ kɛɛ akɛ amɛkɛ mɛi krokomɛi ahe eshai efa amɛ. Nakai yibɔ lɛ kaiɔ wɔ wiemɔi ni Yesu wie yɛ Gɔŋ nɔ Shiɛmɔ lɛ mli akɛ: “Kɛji nyɛkɛ mɛi atɔmɔi fa amɛ lɛ, nyɛtsɛ ni yɔɔ ŋwɛi lɛ kɛaafa nyɛ hu; shi kɛji nyɛkɛ mɛi atɔmɔi efaaa amɛ lɛ, nyɛtsɛ lɛ hu kɛ nyɛtɔmɔi efaŋ nyɛ.” (Mateo 6:14, 15) Hɛɛ, eshai ni Nyɔŋmɔ kɛaafa wɔ lɛ damɔ nɔ ko nɔ, yɛ gbɛ ko nɔ lɛ edamɔ bɔ ni wɔfee klalo akɛ wɔkɛ mɛi krokomɛi atɔmɔi aaafa amɛ lɛ nɔ.

Bɔfo Paulo kai Kristofoi ni yɔɔ Kolose lɛ yɛ shishitoo mla nɛɛ he. Ewo amɛ hewalɛ akɛ: “Ni kɛji mɔ ko kɛ mɔ ko ná sane ko lɛ, nyɛnanaa nyɛhaa nyɛhe ni nyɛkɛfafaa nyɛhe, taakɛ bɔ ni [Yehowa, NW] hu ŋɔfa nyɛ lɛ, nakai nyɛ hu nyɛfea.” (Kolosebii 3:13) Eji anɔkwale akɛ jeee be fɛɛ be enɛ feemɔ yɔɔ mlɛo. Ákɛ nɔkwɛmɔnɔ lɛ, kɛji mɔ ko wie wiemɔi ni esusuuu he loo nɔ ni mlihilɛ bɛ mli kɛshi bo lɛ, ebaanyɛ efee walɛ sane akɛ okɛ mɔ lɛ he aaake lɛ yɛ nɔ ni efee lɛ hewɔ.

Yɛ fɛɛ sɛɛ lɛ, sɛɛnamɔi ni yɔɔ eshai ni akɛfaa he lɛ fa babaoo. Datrɛfonyo David R. Williams, ni ji jeŋ nilee niiamlipɛimɔ onukpa lɛ wie niiamlipɛimɔ ko ni efee lɛ he akɛ: “Wɔyɔse tsakpaa ni mli wa diɛŋtsɛ ni kã mɛi ahe eshai ni akɛfaa amɛ kɛ jwɛŋmɔŋ hewalɛnamɔ teŋ lɛ yɛ Amerikabii ni eye aaafee afii nyɔŋmai ejwɛ kɛyaa kɛ mɛi ni egbɔlɔ lɛ ateŋ.” No kɛ Maŋtsɛ Salomo nilelɔ lɛ wiemɔi ni eŋma aaafee afii 3,000 ni eho nɛ akɛ: “Tsui ni mli jɔ lɛ, gbɔmɔtso lɛ yiwala ni” lɛ kpãa gbee. (Abɛi 14:30) Akɛni mumɔ ni haa akɛ esha faa lɛ haa wekukpaa kpakpa hiɔ wɔ kɛ Nyɔŋmɔ kɛ wɔnaanyo gbɔmɔ teŋ hewɔ lɛ, wɔyɛ yiŋtoo kpakpa ni wɔɔdamɔ nɔ koni wɔsumɔ akɛ wɔkɛ mɛi krokomɛi ahe eshai aaafa amɛ kɛjɛ wɔtsuii amli.—Mateo 18:35.