Maŋtsɛyeli Jajelɔi Bɔ Amaniɛ

Maŋtsɛyeli Asai Anaa Kã Ha Mɔ Fɛɛ Mɔ

BENI Yesu Kristo tsɔseɔ ekaselɔi lɛ kɛha maŋ sɔɔmɔ nitsumɔ lɛ, ewo amɛ hewalɛ ni ‘amɛshiɛ yɛ tsũi ayiteaŋ.’ (Mateo 10:27) Hɛɛ, ehe bahia ni amɛtsu amɛ-Kristofoi asɔɔmɔ nitsumɔ lɛ yɛ faŋŋ mli, yɛ maŋ lɛŋ hei ni abaana amɛ yɛ. Yɛ ŋaawoo ni kɔɔ nɛkɛ shishitoo mla nɛɛ kɛ nitsumɔ he lɛ hewɔ lɛ, atsuɔ Yehowa Odasefoi anitsumɔi lɛ hu ahe nii yɛ faŋŋ mli. Nakai faŋŋ mli ni Odasefoi lɛ tsuɔ nii yɛ lɛ eye ebua amɛ ni amɛye shitee-kɛ-woo nɔ, ni aná ale amɛ jogbaŋŋ diɛŋtsɛ.

Eyɛ mli akɛ aŋmɛɔ maŋbii agbɛ ni amɛya Yehowa Odasefoi asafoŋ kpeei ashishi moŋ, shi hetsɛ haa mɛi komɛi shashaoɔ shi akɛ amɛaabote Maŋtsɛyeli Asa ko mli. Enɛ ba mli nakai yɛ Finland. Mɛi krokomɛi sheɔ gbeyei akɛ amɛaaya hei ni amɛyako jɛmɛ dã lɛ. Kɛ́ ama Maŋtsɛyeli Asa hee ko loo asaa asa ko ní ama momo lɛ, bei pii lɛ atoɔ henaabuamɔ ko ni maŋbii kɛ nanemɛi baanyɛ amɛba ni amɛbakwɛ tsũ lɛ mli lɛ he gbɛjianɔ. Ekolɛ abɔɔ mɔdɛŋ krɛdɛɛ ko kɛfɔ̃ɔ akutseiaŋbii anine ní amɛbasara Maŋtsɛyeli Asa lɛ koni amɛna bɔ ni Yehowa Odasefoi agbɛjianɔtoi yɔɔ ha.

Yɛ akutso ko mli lɛ, Odasefoi lɛ to gbɛjianɔ koni amɛkɛ amɛhe awo woji tɛtrɛbii lɛ ajaa mli yɛ gbi ni amɛfee henaabuamɔ ko ni maŋbii baaba amɛ-Maŋtsɛyeli Asa hee lɛ nɔ lɛ nɔŋŋ nɔ. Odasefoi enyɔ komɛi kɛ nuumo ko ni tsɔɔ akɛ enáa Buu-Mɔɔ kɛ Awake! lɛ kanemɔ he miishɛɛ lɛ kpe. Nyɛmimɛi lɛ gba lɛ gbɛjianɔ ni ato koni maŋbii aba ni amɛbakwɛ bɔ ni tsũ lɛ yɔɔ hã lɛ he sane, ni amɛbi ni eha amɛkɛ lɛ aya Maŋtsɛyeli Asa lɛ nɔ. Nuu lɛ kɛɛ akɛ, ebaaŋɔɔ enaa akɛ ebaafata amɛhe. Akɛni eŋa bo sanegbaa ni yaa nɔ lɛ toi hewɔ lɛ, ebo ekɛɛ akɛ, “Ha mafata ohe kɛya!”

Beni amɛbote Maŋtsɛyeli Asa lɛ mli lɛ, nuu lɛ folɔ ehe ekwɛ tsũ lɛ mli ni ekɛɛ akɛ: “Jeee su diŋ kwraa nɛ. Kwɛmɔ, eyɛ fɛo ni ekpɛlɛɔ. Akɛɛ mi akɛ abaasha Maŋtsɛyeli Asa lɛ mli ediŋ!” Gbalashihilɛ mli hefatalɔi lɛ hi shi be fioo ni amɛbi ni aha amɛ woji ni ato ashwie shi lɛ eko.

Asafo ko tao ni amɛtswa henaabuamɔ ko ni abaafee koni maŋbii aba amɛbakwɛ tsũ lɛ mli yɛ be mli ni abaajɔɔ amɛ-Maŋtsɛyeli Asa lɛ nɔ lɛ he adafi yɛ amɛmaŋ adafitswaa wolo lɛ mli. Beni adafitswaa nitsulɔi anɔkwɛlɔ lɛ nine shɛ nifeemɔ lɛ he adafitswaa nɔ lɛ, ebi koni aŋma nɔ ko ni kɔɔ nifeemɔ lɛ he. Nyɛmimɛi lɛ kpɛlɛ nɔ, ni be fioo ko sɛɛ lɛ, sane ko ni sa jogbaŋŋ ni hé wolo lɛ baafa mlijaa lɛ je kpo yɛ adafitswaa wolo lɛ mli, ní miitsɔɔ nɔ ni baaya nɔ lɛ kɛ Yehowa Odasefoi asafo ni yɔɔ jɛmɛ lɛ anifeemɔi lɛ amli fitsofitso.

Beni aŋmala saji lɛ awo adafitswaa wolo lɛ mli sɛɛ lɛ, Odasefonyo yoomo ko kɛ ekutso lɛ mlinyo ko kpe ni kɛɛ lɛ akɛ: “Niŋmaa ko ni nɔ bɛ ni kɔɔ Yehowa Odasefoi ahe je kpo yɛ adafitswaa wolo lɛ mli ŋmɛnɛ!” Nyɛmi yoo lɛ nyɛ eye odase ni yɛ sɛɛ mli lɛ, enyɛ eha lɛ Jehovah’s Witnesses in the Twentieth Century wolo bibioo lɛ eko.

Kɛfata susumɔi ni ejaaa ni ayɔɔ yɛ Yehowa Odasefoi ahe ni aaaha emli aka shi faŋŋ lɛ he lɛ, nɛkɛ gbɛjianɔtoi ni kɔɔ henaabuamɔi ni maŋbii baa kɛ nɔjɔɔmɔ he gbɛjianɔtoi ni yaa nɔ yɛ Maŋtsɛyeli Asai heei anɔ lɛ ewaje shiɛlɔi lɛ kɛtsɔ hewalɛwoo ni ekɛhaa amɛ koni amɛfɔ̃ mɛi pii anine kɛba kpeei ashishi lɛ nɔ. Hɛɛ, yɛ maji pii anɔ, ní Finland fata he lɛ amli lɛ, mɛi ená ele akɛ Yehowa Odasefoi a-Maŋtsɛyeli Asai lɛ anaa kã ha mɔ fɛɛ mɔ.