Jiemɔ Hedɔɔ Kpo Otsɔɔ Weku Kɔkrɔɔ lɛ Mli Bii

TOHRU tswa eŋa Yoko mpoa akɛ: “Kɛ́ obaanyɛ lɛ, shãa! Shãa!” * Eŋa kɛ mlifu jie naa akɛ, “Hɛɛ mashã,” ni ekpɛ maŋtsɛsi koni ekɛshã mfoniri ni amɛyi enyɔ lɛ amɛshá lɛ. No sɛɛ lɛ eŋa kɛ mlifu ni naa wa waa kɛɛ akɛ: “Mashã shia lɛ!” Enɛ hewɔ lɛ, Tohru gbá eŋa lɛ toiŋ, ni naataamɔ lɛ ba naagbee kɛ yiwalɛ nifeemɔ.

Afii etɛ ni tsɔ hiɛ lɛ mli lɛ, Tohru kɛ Yoko kɛ ekomefeemɔ je amɛshihilɛ akɛ gbalashihilɛ mli hefatalɔi lɛ shishi kɛ miishɛɛ. Belɛ mɛni etɔ̃tɔ̃? Eyɛ mli akɛ Tohru tamɔ mɔ ko ni he yɔɔ miishɛɛ moŋ, shi eŋa nu he akɛ ejieee hedɔɔ kpo etsɔɔɔ lɛ, ni ákɛ esusuuu ehenumɔi ahe. Etamɔ nɔ ni enyɛɛɛ efee nɔ ko yɛ suɔmɔ ni eŋa bɔɔ mɔdɛŋ ni ejie lɛ kpo lɛ he. Akɛni Yoko nyɛɛɛ adamɔ enɛ naa hewɔ lɛ, edɔlɛ waa ni emli fu. Ená naagbai tamɔ wɔ ni anyɛɛɛ awɔ, yeyeeyefeemɔ, daaŋ ni gboɔ, mɔ mli ni etsɛɛɛ fumɔ, kɛ nɔnyɛɛ, ni etsui fãa waa po. Ni kɛlɛ, etamɔ nɔ ni naagba shihilɛ ni yaa nɔ yɛ shia lɛ gbaaa Tohru naa. Kɛha lɛ lɛ, etamɔ nɔ ni naagba ko bɛ.

“Jaramɔ Bei”

Naagbai ni tamɔ nɛkɛ fɔɔ kaa ŋmɛnɛ. Bɔfo Paulo gba akɛ gbɔmɛi ni “edɔɔɔ mɔ he” baakadi wɔbe nɛɛ. (2 Timoteo 3:1-5) Shishijee Hela wiemɔ ni atsɔɔ shishi akɛ “edɔɔɔ mɔ he” yɛ biɛ lɛ kɔɔ wiemɔ ni tsɔɔ adebɔɔ naa suɔmɔ ni anaa yɛ weku mli bii ateŋ lɛ he babaoo. Yɛ anɔkwale mli lɛ, wɔbe nɛɛ ebafee be ni abɛ suɔmɔ ni tamɔ nɛkɛ yɛ mli. Kɛ́ suɔmɔ yɛ po lɛ, weku mli bii efɔɔɔ lɛ kpojiemɔ kɛ amɛhe tsɔɔmɔ.

Fɔlɔi babaoo ni yɔɔ ŋmɛnɛ lɛ leee bɔ ni amɛaafee amɛjie suɔmɔ kɛ hedɔɔ kpo amɛtsɔɔ amɛbii. Mɛi komɛi edara yɛ weku shihilɛ ni hedɔɔ bɛ mli lɛ mli, ni ekolɛ amɛyɔseee akɛ hedɔɔ he ni aaanu ni aaajie lɛ kpo pɛ baaha shihilɛ afee nɔ ni yɔɔ miishɛɛ kɛ nɔ ni ŋɔɔ waa. Etamɔ nɔ ni no ji Tohru naagba lɛ. Yɛ egbekɛbiiashi lɛ, be fɛɛ be lɛ etsɛ bɛ deka kɛ nitsumɔ, ni ebaa shia nyɔɔŋteŋ. Ekɛ Tohru efɔɔɔ wiemɔ, ni kɛ ebaafee nakai hu lɛ, kɛ jɛmɔ wiemɔi. Tohru nyɛ hu kɛ ebe fɛɛ tsuɔ nii, ni no hewɔ lɛ enaaa be ehaaa lɛ. Tɛlivishiŋ lɛ ji abaawa ni kwɛ lɛ yɛ shia. Yijiemɔ loo sanegbaa ko bɛ weku lɛ mli.

Kusum hu baanyɛ afee oti kroko. Yɛ Latin Amerika hei komɛi lɛ, ebiɔ ni nuu aku ehiɛ afɔ kusum ni biɔ koni ejie hedɔɔ kpo etsɔɔ eŋa lɛ nɔ. Yɛ Bokagbɛ kɛ Afrika maji pii anɔ lɛ, eji nɔ ni teɔ shi ewoɔ kusum akɛ mɔ ko aaajie hedɔɔ kpo atsɔɔ yɛ wiemɔi kɛ nifeemɔi amli. Ekolɛ ebaafee nɔ ni wa kɛha wumɛi akɛ amɛaakɛɛ amɛŋamɛi loo amɛbii akɛ “Miisumɔ bo.” Shi kɛlɛ, wɔbaanyɛ wɔkase nii kɛjɛ klɛŋklɛŋ wekukpaa ni enyɛ eye omanye yɛ be babaoo ni eho lɛ mli lɛ mli.

 Wekukpaa He Nɔkwɛmɔnɔ Kpakpa

Anaa nɔkwɛmɔnɔ ni fe fɛɛ kɛha weku lɛ yɛ wekukpaa ni yɔɔ gbagbalii ni kã Yehowa Nyɔŋmɔ kɛ e-Bi koome lɛ teŋ lɛ mli. Amɛjieɔ suɔmɔ kpo amɛtsɔɔ amɛhe yɛ gbɛ ni yeɔ emuu nɔ. Mumɔŋ bɔɔ nɔ, ni sɛɛ mli lɛ ebatsɔ̃ Yesu Kristo lɛ ná wekukpaa ni yɔɔ miishɛɛ ni kã ekɛ e-Tsɛ teŋ lɛ mli ŋɔɔmɔ yɛ afii akpei abɔ ni aleee mli. Etsɔɔ tsakpaa lɛ mli yɛ nɛkɛ gbɛ nɔ akɛ: “Mimii shɛɔ mihe daa, mishwɛɔ yɛ ehiɛ be fɛɛ be.” (Abɛi 8:30) Bi lɛ ná e-Tsɛ suɔmɔ lɛ he nɔmimaa aahu akɛ enyɛ ekɛɛ mɛi krokomɛi akɛ Yehowa náa ehe miishɛɛ daa. Ená miishɛɛ yɛ e-Tsɛ hiɛ be fɛɛ be.

Beni Yesu yɔɔ shikpɔŋ lɛ nɔ akɛ adesa po lɛ, asaa ama e-Tsɛ suɔmɔ ni mli kwɔ lɛ nɔ mi aha Nyɔŋmɔ Bi lɛ. Beni abaptisi Yesu sɛɛ lɛ, enu e-Tsɛ gbee akɛ: “Mɔnɛ ji misuɔmɔ bi ní mináa ehe tsui lɛ.” (Mateo 3:17) Mɛɛ suɔmɔ kpojiemɔ ni woɔ mɔ hewalɛ yɛ Yesu nitsumɔ yɛ shikpɔŋ lɛ nɔ lɛ shishijee mli po enɛ ji nɛkɛ! Ekolɛ nu ni enu akɛ e-Tsɛ ekpɛlɛ enɔ lɛ ta etsui mli beni esaa ekai nibii fɛɛ ni kɔɔ eshihilɛ yɛ ŋwɛi lɛ he lɛ.

No hewɔ lɛ, Yehowa feɔ nɔkwɛmɔnɔ fɛfɛo yɛ suɔmɔ kpo ni ejieɔ etsɔɔ ejeŋ muu fɛɛ weku lɛ yɛ gbɛ ni da fe fɛɛ nɔ lɛ mli. Kɛji wɔkpɛlɛ Yesu Kristo nɔ lɛ, wɔ hu wɔbaanyɛ wɔná Yehowa hedɔɔ lɛ mli ŋɔɔmɔ. (Yohane 16:27) Eyɛ mli akɛ wɔnuŋ wiemɔ ko kɛjɛŋ ŋwɛi moŋ, shi wɔbaayɔse suɔmɔ ni Yehowa jieɔ lɛ kpo lɛ yɛ edebɔɔ nii, Yesu kpɔmɔ afɔleshaa ni ekɛha lɛ, kɛ yɛ gbɛ̀i krokomɛi amli. (1 Yohane 4:9, 10) Yehowa boɔ wɔsɔlemɔi lɛ atoi ni ehaa hetoo po yɛ gbɛ ni he baa sɛɛnamɔ kɛhaa wɔ nɔ. (Lala 145:18; Yesaia 48:17) Beni wɔtaoɔ wɔkɛ Yehowa teŋ wekukpaa ni yɔɔ gbagbalii lɛ, wɔhaa hiɛsɔɔ ni wɔyɔɔ kɛha esuɔmɔ kwɛmɔ lɛ mli kwɔɔ.

Yesu kase bɔ ni ajieɔ mɔbɔnalɛ, mɔ hesusumɔ, mlihilɛ, kɛ mɔ hesusumɔ ni mli kwɔ kpo atsɔɔ mɛi krokomɛi lɛ kɛjɛ e-Tsɛ ŋɔɔ. Etsɔɔ mli akɛ: “Nibii fɛɛ ni no [Tsɛ lɛ] feɔ lɛ, nomɛi nɔŋŋ ni bi lɛ hu feɔ. Ejaakɛ tsɛ lɛ sumɔɔ bi lɛ, ni etsɔɔ lɛ nibii fiaa ní lɛ diɛŋtsɛ efeɔ lɛ.” (Yohane 5:19, 20) Enɛ hewɔ lɛ, wɔbaanyɛ wɔkase hedɔɔ kpojiemɔ mli hesaai kɛtsɔ nɔkwɛmɔnɔ ni Yesu fee beni eyɔɔ shikpɔŋ nɔ lɛ ni wɔɔkase lɛ nɔ.—Filipibii 1:8.

Hedɔɔ yɛ Weku lɛ Mli—Yɛ Mɛɛ Gbɛ Nɔ?

Akɛni “Nyɔŋmɔ lɛ, suɔmɔ ji lɛ,” ni abɔ wɔ yɛ “esubaŋ lɛ nɔ” hewɔ lɛ, wɔyɛ nyɛmɔ ni wɔkɛaanu suɔmɔ he ni wɔjie lɛ kpo wɔtsɔɔ. (1 Yohane 4:8; 1 Mose 1:26, 27) Kɛlɛ, nakai nyɛmɔ lɛ baaa trukaa. Bɔni afee ni wɔjie hedɔɔ kpo wɔtsɔɔ lɛ, klɛŋklɛŋ lɛ esa akɛ wɔjie hedɔɔ kpo wɔtsɔɔ wɔ hefatalɔi kɛ wɔbii. Yoomɔ nii asɛɛ ni okadi subaŋi ni onyaa he lɛ, yɛ bɔ ni klɛŋklɛŋ lɛ ekolɛ no baafee nɔ ni jeee nɔ ko kwraa lɛ fɛɛ sɛɛ, ni ojwɛŋ nomɛi ahe. Shi ekolɛ obaakɛɛ akɛ: ‘Nɔ kpakpa ko bɛ miwu [ŋa loo bii] ahe.’ Ekolɛ mɛi ni amɛfɔlɔi loo weku mli bii yatao gbalashihilɛ mli hefatalɔi ha amɛ lɛ baaná hedɔɔ fioo pɛ amɛha amɛhefatalɔi. Ekolɛ amɛteŋ mɛi komɛi sumɔŋ akɛ amɛfɔ bii. Shi fɛɛ sɛɛ lɛ, susumɔ bɔ ni Yehowa nu he eha efonirifeemɔŋ ŋa, ni ji Israel maŋ lɛ, yɛ afii ohai nyɔŋma D.Ŋ.B. lɛ he okwɛ. Be mli ni egbalɔ Elia mu sane naa akɛ Yehowa jálɔi ko kwraa bɛ Israel maŋ akutsei nyɔŋma lɛ mli dɔŋŋ lɛ, Yehowa tao amɛmli fitsofitso ni ená gbɔmɛi ayibɔ ni sa—ni feɔ 7,000—ni hiɛ sui ni saa ehiɛ. Ani obaanyɛ okase Yehowa kɛtsɔ nibii kpakpai ni oweku lɛ mli bii lɛ feɔ ni oootao lɛ nɔ?—1 Maŋtsɛmɛi 19:14-18.

 Ni kɛlɛ, bɔni afee ni oha weku lɛ mli bii krokomɛi anu hedɔɔ ni oyɔɔ lɛ he lɛ, esa akɛ obɔ mɔdɛŋ waa koni ojie lɛ kpo. Be fɛɛ be ni oooyɔse nɔ ko ni sa yijiemɔ lɛ, wiemɔ kɛjie ohiɛsɔɔ kpo kɛtsɔɔ. Beni Nyɔŋmɔ Wiemɔ lɛ tsɔɔ bɔ ni ŋa kpakpa ji lɛ mli lɛ, ekadi su kpakpa ko ni yɔɔ eweku lɛ he akɛ: “Ebii lɛ teɔ shi, ni amɛjɔɔ lɛ, ewu lɛ hu kafoɔ lɛ.” (Abɛi 31:28) Kadimɔ bɔ ni weku lɛ mli bii lɛ jie hiɛsɔɔ kpo amɛtsɔɔ amɛhe yɛ heyeli mli lɛ. Tsɛ ko kɛ wiemɔ mli ni ejɛɔ ejieɔ eŋa yi lɛ feɔ nɔkwɛmɔnɔ ehaa ebinuu, ni no woɔ lɛ hewalɛ koni ejɛ mlihilɛ mli ejie ehefatalɔ yi kɛji ebote gbalashihilɛ mli.

Agbɛnɛ hu, esa akɛ fɔlɔi ajie amɛbii ayi. No baanyɛ aye abua koni atɛo bulɛ ni anáa ahaa he awo gbekɛbii lɛ atsui mli. Yɛ anɔkwale mli lɛ, te aaafee tɛŋŋ ni mɔ ko ‘aaasumɔ enaanyo tamɔ bɔ ni esumɔɔ lɛ diɛŋtsɛ ehe,’ kɛji ebuuu lɛ diɛŋtsɛ ehe lɛ? (Mateo 22:39) Yɛ gbɛ kroko nɔ lɛ, kɛji fɔlɔi wieɔ amɛbii ahiɛ be fɛɛ be, ni amɛjieee amɛyi kwraa lɛ, gbekɛbii lɛ baanyɛ alaaje bulɛ ni amɛyɔɔ kɛha amɛ diɛŋtsɛ amɛhe lɛ yɛ gbɛ ni waaa nɔ, ni ekolɛ ebaawa kɛha amɛ akɛ amɛaajie hedɔɔ kpo amɛtsɔɔ mɛi krokomɛi.—Efesobii 4:31, 32.

Obaanyɛ Oná Yelikɛbuamɔ

Ni kɛji akɛ atsɔse bo yɛ shia ni suɔmɔ bɛ mli lɛ mli hu? Yɛ fɛɛ sɛɛ lɛ obaanyɛ okase bɔ ni ajieɔ hedɔɔ kpo atsɔɔ. Klɛŋklɛŋ nii ni esa akɛ ofee ji ni oyɔse naagba lɛ, ni ohiɛ asɔ bɔ ni ehe hiaa ni ofee tsakemɔ lɛ. Nyɔŋmɔ Wiemɔ ni ji Biblia lɛ ji yelikɛbuamɔ nɔ̃ kpele yɛ enɛ gbɛfaŋ. Abaanyɛ akɛto ashwishwɛ he. Kɛ́ wɔkwɛ wɔ diɛŋtsɛ wɔhe yɛ mfonirifeemɔŋ ashwishwɛ ni ji Biblia lɛ tsɔɔmɔi amli lɛ, tɔmɔi kɛ fatɔɔi ni yɔɔ wɔsusumɔi amli lɛ bafeɔ faŋŋ kɛhaa wɔ. (Yakobo 1: 23) Yɛ Biblia lɛ tsɔɔmɔi lɛ kɛ gbeekpamɔ naa lɛ, wɔbaanyɛ wɔsaa wɔjaje susumɔ fɛɛ susumɔ ni ejaaa lɛ. (Efesobii 4:20-24; Filipibii 4:8, 9) Ehe miihia ni wɔfee enɛ daa, ni ‘wɔkakpa ekpakpafeemɔ’ kɔkɔɔkɔ.—Galatabii 6:9.

Ekolɛ bɔ ni atsɔse mɛi komɛi aha aloo kusum baaha ewa kɛha amɛ akɛ amɛaajie hedɔɔ kpo amɛtsɔɔ. Shi kɛlɛ, niiamlitaomɔi ni afee nyɛsɛɛ nɛɛ etsɔɔ akɛ abaanyɛ atsu gbɛtsiinii ni tamɔ nɛkɛ he nii. Datrɛfonyo Daniel Goleman, ni ji jwɛŋmɔŋ hewalɛnamɔ he nilelɔ ni he esa lɛ tsɔɔ mli akɛ, ‘abaanyɛ atsake subaŋi ni akase yɛ gbekɛbiiashi ni eka tsui lɛ mli lɛ po.’ Nɔ ni fe afii ohai 19 ni eho nɛ lɛ, Biblia lɛ tsɔɔ mli akɛ, yɛ Nyɔŋmɔ mumɔ lɛ yelikɛbuamɔ naa lɛ, abaanyɛ atsake subaŋi ni eka tsui lɛ mli waa lɛ po. Ebɔɔ kɔkɔ akɛ: “Nyɛjie gbɔmɔ momo lɛ kɛ enitsumɔi lɛ nyɛshwie, ni nyɛwo gbɔmɔ hee.”—Kolosebii 3:9, 10.

Kɛ́ ayɔse naagba lɛ pɛ lɛ, weku lɛ baanyɛ aha amɛ Biblia kasemɔ lɛ akɔ amɛhiamɔ nii lɛ ahe. Akɛ nɔkwɛmɔnɔ lɛ, mɛni hewɔ otaooo nɔ ni Biblia lɛ yɔɔ kɛɛmɔ yɛ “hedɔɔ” he? Ekolɛ obaana ŋmalɛ ko tamɔ enɛ: “Nyɛnu Hiob tsuishiŋmɛɛ lɛ he, ni nyɛna Nuŋtsɔ lɛ naagbee lɛ; akɛ Nuŋtsɔ lɛ mli tsɔ̃ɔ lɛ babaoo, ni emli jɔ hu.” (Yakobo 5:11) No sɛɛ lɛ, susumɔ Biblia mli sane ni kɔɔ Hiob he lɛ he, ni ogbala ojwɛŋmɔ kɛya bɔ ni Yehowa jie mlitsɔlɛ kɛ mlijɔlɛ kpo etsɔɔ Hiob lɛ nɔ. Ŋwanejee ko bɛ he akɛ obaasumɔ ni okase Yehowa yɛ mlitsɔlɛ kɛ mlijɔlɛ kpo ni ooojie otsɔɔ oweku lɛ mli bii lɛ mli.

Shi kɛlɛ, akɛni wɔyeee emuu hewɔ lɛ, “wɔ fɛɛ wɔtɔɔ babaoo” yɛ wɔwiemɔi amli. (Yakobo 3:2) Ekolɛ wɔkɛ wɔlilɛi lɛ tsuŋ nii yɛ gbɛ ni woɔ mɔ hewalɛ nɔ yɛ wɔweku kɔkrɔɔ lɛ mli. Biɛ  ji he ni sɔlemɔ kɛ he ni akɛfɔɔ Yehowa nɔ lɛ he bahiaa yɛ. Onijiaŋ akaje wui. ‘Sɔlemɔ daa.’ (1 Tesalonikabii 5:17) Yehowa baaye abua mɛi ni taoɔ koni amɛjie hedɔɔ kpo yɛ weku lɛ mli, kɛ mɛi ni miisumɔ ni amɛjie lɛ kpo shi no feemɔ wa kɛha amɛ lɛ hu.

Kɛfata he lɛ, Yehowa ejɛ mlihilɛ mli eto yelikɛbuamɔ he gbɛjianɔ yɛ Kristofoi asafo lɛ mli. Yakobo ŋma akɛ: “Kɛ nyɛteŋ mɔ ko he waaa lɛ [yɛ mumɔŋ] lɛ, etsɛ́ asafo lɛ mli onukpai lɛ kɛba eŋɔɔ, ni amɛ́kpa lɛ mu yɛ Nuntsɔ lɛ gbɛi amli ni amɛsɔle amɛha lɛ.” (Yakobo 5:14) Hɛɛ, onukpai ni yɔɔ Yehowa Odasefoi asafoi lɛ amli lɛ baanyɛ afee yelikɛbuamɔ nɔ̃ kpele kɛha wekui ni miiná naagbai yɛ hedɔɔ kpo ni amɛaajie amɛtsɔɔ amɛhe lɛ mli lɛ. Eyɛ mli akɛ onukpai lɛ jeee jwɛŋmɔ he nilelɔi moŋ, shi amɛbaanyɛ amɛkɛ tsuishitoo aye abua amɛnanemɛi heyelilɔi lɛ, jeee ni amɛaakɛɛ amɛ nɔ ni esa akɛ amɛfee, shi moŋ akɛ amɛtsɔɔ amɛ Yehowa susumɔ yɛ sane lɛ he, ni amɛkɛ amɛ afee ekome kɛsɔle ni amɛkai amɛ yɛ sɔlemɔ mli.—Lala 119:105; Galatabii 6:1.

Yɛ Tohru kɛ Yoko sane lɛ mli lɛ, Kristofoi onukpai bo amɛnaagbai lɛ atoi be fɛɛ be, ni amɛshɛje amɛmii. (1 Petro 5:2, 3) Yɛ bei komɛi amli lɛ, onukpa ko kɛ eŋa yasaraa Yoko, bɔni afee ni ekolɛ Yoko aná jɛmɛ ni Kristofonyo yoo ni yɔɔ niiashikpamɔ, ni baanyɛ atsɔɔ lɛ ‘koni esumɔ ewu’ lɛ yɔɔ lɛ he sɛɛ. (Tito 2:3, 4) Kɛtsɔ saneshishinumɔ kɛ musuŋtsɔlɛ kpo ni onukpai lɛ jieɔ amɛtsɔɔ yɛ nanemɛi Kristofoi lɛ anɔnaa kɛ awerɛhoyeli mli hewɔ lɛ, amɛbatsɔmɔɔ “abobaahe yɛ kɔɔyɔɔ naa kɛ teemɔhe yɛ nyɔŋmɔnɛmɔ naa.”—Yesaia 32:1, 2.

Yɛ onukpai ni yɔɔ mlihilɛ lɛ ayelikɛbuamɔ naa lɛ, Tohru bayɔse akɛ eyɛ naagba yɛ bɔ ni ejieɔ ehedɔɔ kpo ehaa lɛ mli, ni ákɛ Satan miitutua weku gbɛjianɔtoo lɛ yɛ “naagbee gbii” lɛ amli. (2 Timoteo 3:1) Tohru kpɛ eyiŋ akɛ ebaatsu enaagba lɛ he nii. Ebɔi yɔsemɔ akɛ suɔmɔ kpo ni enyɛɛɛ ejie etsɔɔ lɛ jɛ suɔmɔ kpo ni ajieee atsɔɔɔ lɛ beni edaa lɛ hewɔ. Kɛtsɔ Biblia nikasemɔ ni hiɛdɔɔ yɔɔ mli kɛ sɔlemɔ nɔ lɛ, fiofio lɛ Tohru banu Yoko henumɔŋ hiamɔ nii lɛ ahe waa.

Eyɛ mli akɛ Yoko mli efu Tohru moŋ, shi beni enu ewu weku he saji lɛ ashishi, ni eyɔse lɛ diɛŋtsɛ etɔmɔi lɛ, ebɔ mɔdɛŋ waa koni eyɔse nibii kpakpai ni ewu feɔ lɛ. (Mateo 7:1-3; Romabii 5:12; Kolosebii 3:12-14) Ekɛ hiɛdɔɔ kpa Yehowa fai kɛha hewalɛwoo koni eya nɔ esumɔ ewu. (Filipibii 4:6, 7) Yɛ naagbee lɛ, Tohru bɔi hedɔɔ kpojiemɔ, ni eŋa ná miishɛɛ.

Hɛɛ, kɛji ewa kɛha bo akɛ ooonu hedɔɔ he ni ojie lɛ kpo yɛ weku lɛ mli po lɛ, yɛ anɔkwale mli lɛ obaanyɛ otsu nakai naagba lɛ he nii. Nyɔŋmɔ Wiemɔ lɛ kɛ ŋaawoo kpakpa haa wɔ. (Lala 19:8) Kɛtsɔ hiɛdɔɔ ni yɔɔ sane lɛ mli ni oooyɔse lɛ nɔ, kɛtsɔ mɔdɛŋ ni ooobɔ koni ona nibii kpakpai ni oweku lɛ mli bii feɔ lɛ nɔ, kɛtsɔ Nyɔŋmɔ Wiemɔ lɛ kasemɔ kɛ ekɛ nitsumɔ nɔ, kɛtsɔ ohe ni okɛaafɔ Yehowa nɔ kɛtsɔ sɔlemɔ ni hiɛdɔɔ yɔɔ mli lɛ nɔ lɛ nɔ, kɛ kɛtsɔ bi ni ooobi ni Kristofoi onukpai ni edara yɛ mumɔŋ lɛ aye abua bo lɛ nɔ lɛ, obaanyɛ otsu nɔ ni ekolɛ etamɔ gbɛtsiinii ni da ni yɔɔ bo kɛ oweku lɛ teŋ lɛ he nii. (1 Petro 5:7) Bo hu obaanyɛ oná miishɛɛ, taakɛ eba lɛ yɛ wu ko ni yɔɔ United States lɛ gbɛfaŋ lɛ. Awo lɛ hewalɛ koni ejie ehedɔɔ kpo etsɔɔ eŋa. Beni yɛ naagbee lɛ ená ekãa ni ekɛɛ akɛ “Miisumɔ bo lɛ,” enaa kpɛ ehe yɛ hetoo ni eŋa ha lɛ lɛ he. Beni miishɛɛ yaafonui eyi eŋa hiŋmɛii amli obɔ̃ lɛ, ekɛɛ akɛ: “Mi hu miisumɔ bo, shi enɛ ji klɛŋklɛŋ be ni owie yɛ nɛkɛ gbɛ nɔ yɛ afii 25 mli.” Kaamɛ be kakadaŋŋ dani ojie ohedɔɔ kɛha ohefatalɔ kɛ obii lɛ kpo!

[Shishigbɛ niŋmaa]

[Mfoniri ni yɔɔ baafa 28]

Yehowa kɛ yelikɛbuamɔ haa yɛ e-Wiemɔ ni ji Biblia lɛ mli