Mɛɛba? ‘Nyɔŋmɔ, Mɛɛba Oŋmɛ Enɛ Gbɛ?’

RICARDO kaiɔ beni ekɛ eŋa Maria ta tsũ ni amɛmɛɔ datrɛfonyo yɛ mli lɛ mli lɛ lolo. * Amɛteŋ mɔ ko mɔ ko naaa ekãa ni ekɛaakane saji ni aŋmala ashwie shi ni tsɔɔ nɔ ni ana yɛ Maria hela ni akwɛ mli nyɛsɛɛ nɛɛ lɛ mli lɛ. Kɛkɛ ni Ricardo gbele wolo kotoku lɛ naa, ni amɛkɛ oyaiyeli kwɛ tsofafeemɔ he saji ni aŋmala ni kɔɔ hela lɛ he lɛ. Amɛhiŋmɛi gba wiemɔ “kansa” lɛ nɔ, kɛkɛ ni amɛyi enyɔ lɛ fɛɛ amɛjwa yaafo akɛni amɛle nɔ ni nakai wiemɔ lɛ shishitsɔɔmɔ diɛŋtsɛ ji lɛ hewɔ.

Ricardo tsɔɔ mli akɛ: “Datrɛfonyo lɛ mli jɔ waa, shi ekã shi faŋŋ akɛ eyɔse hiɛdɔɔ ni yɔɔ shihilɛ lɛ he lɛ ejaakɛ etee nɔ ekɛɛ wɔ shii abɔ akɛ, esa akɛ wɔkɛ wɔhiɛ afɔ̃ Nyɔŋmɔ nɔ.”

Dani abaaje la kpɛmɔ hewalɛ ni akɛtsaa mɔ lɛ shishi lɛ, datrɛfonyo ni kwɛɔ Maria lɛ yɔse akɛ Maria nanejurɔ miikpokpo. Elá mli ni atee nɔ akwɛ lɛ jie lɛ kpo akɛ, kansa lɛ eyashɛ ansɔ lɛ mli. Beni afee lɛ tsofa otsi pɛ sɛɛ lɛ, akɛ lakpɛmɔ hewalɛ ni akɛtsaa lɛ lɛ kpa nitsumɔ dã. Nɔ̃ nyɔ Maria nɔ, ni egbo yɛ nyɔji enyɔ sɛɛ. Ricardo tsɔɔ mli akɛ: “Mimii shɛ mihe akɛ epiŋmɔ lɛ eba naagbee, shi mihiɛ tse lɛ aahu akɛ miná ni kulɛ mi hu mije mli. Bei pii lɛ mibolɔɔ mitsɛɔ Nyɔŋmɔ akɛ: ‘Mɛɛba oŋmɛ enɛ gbɛ koni eba?’”

Kɛ́ Oshara Ba lɛ, Eteeɔ Sanebimɔi Babaoo Ashi

Taakɛ Ricardo ji lɛ, ehe bahiaa ni mɛi babaoo ni yɔɔ jeŋ muu lɛ fɛɛ lɛ akpee nɔ̃ diɛŋtsɛ ni jɛɔ piŋmɔ mli kɛbaa lɛ naa. Bei babaoo lɛ, mɛi ni leee sane lɛ he nɔ ko lɛ ji mɛi ni naa nɔ̃ lɛ. Susumɔ awerɛhoyeli ni kumɔɔ mɔ tsui ní tai babaoo ni tsaraa nɔ, ni haoɔ adesai aweku lɛ kɛba lɛ he okwɛ. Aloo susumɔ piŋmɔ ni mɛi babaoo ni atoɔ amɛ kaabonaa, gbekɛbii ni afeɔ amɛ niseniianii, mɛi ni awaa amɛ yi yɛ shiai amli lɛ nuɔ he, kɛ efɔŋfeemɔi krokomɛi ni adesai kɛbaa lɛ he lɛ he okwɛ. Yɛ yinɔsane be fɛɛ mli lɛ, etamɔ nɔ ni jalɛ sane ni ayeee kɛ piŋmɔ ni hii kɛ yei enyɛ amɛkɛba mɛi krokomɛi anɔ lɛ baaa naagbee. (Jajelɔ 4:1-3) Agbɛnɛ hu, mɛi ni adebɔɔ naa osharai eba amɛnɔ loo mɛi ni he miiye yɛ henumɔŋ, jwɛŋmɔŋ kɛ gbɔmɔtsoŋ hu yɛ ni amɛfee yeyeeye. Ebɛ naakpɛɛ mɔ akɛ mɛi babaoo biɔ akɛ, “Mɛɛba Nyɔŋmɔ ŋmɛɔ amanehulu ni tamɔ nɛkɛ gbɛ?”

Yɛ mɛi ni yɔɔ jamɔŋ hemɔkɛyelii lɛ po agbɛfaŋ lɛ, ebɛ mlɛo kwraa akɛ amɛaakpee amanehulu naa. Ekolɛ bo hu osusu nɔ hewɔ ni ekolɛ Nyɔŋmɔ ni yɔɔ suɔmɔ ni yɔɔ hewalɛ fe fɛɛ lɛ eŋmɛ gbɛ ni adesai piŋɔ lɛ he. Hetoo ni ja ni haa mɔ tsui nyɔɔ emli ni wɔɔná wɔha sanebimɔ ni futuɔ mɔ yiŋ nɛɛ he miihia kɛha wɔjwɛŋmɔŋ toiŋjɔlɛ kɛ wekukpaa ni kã wɔkɛ Nyɔŋmɔ teŋ lɛ. Biblia lɛ kɛ hetoo ni tamɔ nakai haa. Ofainɛ, kanemɔ nɔ ni eyɔɔ kɛɛmɔ taakɛ atsɔɔ mli yɛ sane ni nyiɛ sɛɛ lɛ mli lɛ.

[Shishigbɛ niŋmaa]

[Mfonirii ni yɔɔ baafa 3]

Datrɛfonyo lɛ tee nɔ ekɛɛ wɔ shii abɔ akɛ, esa akɛ wɔkɛ wɔhiɛ afɔ̃ Nyɔŋmɔ nɔ